സമാനമായി ദക്ഷിണ റെയിൽവേയിലടക്കം പാസഞ്ചർ ടിക്കറ്റ് നിരക്ക് കുറയുന്നത് ഉടൻ പ്രാബല്യത്തിൽ വരുമെന്ന് ഉന്നത ഉദ്യോഗസ്ഥൻ സൂചിപ്പിച്ചു. യുടിഎസ് ആപ്പ് വഴി പാസഞ്ചർ ടിക്കറ്റ് എടുത്തവർക്ക് പത്ത് രൂപയ്ക്കുള്ള മിനിമം ടിക്കറ്റ് ലഭിക്കുകയും ചെയ്തു.
ടിക്കറ്റ് നിരക്ക് കുറയ്ക്കുന്നതിന്റെ ആദ്യപടിയാണ് യുടിഎസ് ( അൺ റിസർവ്ഡ് ടിക്കറ്റിംഗ് സർവീസ്) ആപ്പിലെ ഈ അപ്ഡേഷൻ എന്ന് ചൂണ്ടിക്കാണിക്കപ്പെടുന്നു.ഇത് റെയിൽവേ സ്റ്റേഷനുകളിലെ കൗണ്ടർ ടിക്കറ്റിംഗ് സിസ്റ്റത്തിൽ കൂടി അപ്ഡേറ്റ് ചെയ്താൽ ടിക്കറ്റ് നിരക്ക് കുറച്ചു കൊണ്ടുള്ള ഉത്തരവ് ഔദ്യോഗികമായി പുറത്തിറങ്ങുമെന്നാണ് അറിയുന്നത്.
പാർലമെന്റ് തെരഞ്ഞെടു പ്പിന്റെ ഔദ്യോഗിക പ്രഖ്യാപനം വരുന്നതിന് മുന്പു തന്നെ പാസഞ്ചർ ട്രെയിനുകളുടെ ടിക്കറ്റ് നിരക്ക് കുറച്ചുകൊണ്ടുള്ള അറിയിപ്പ് ഉണ്ടാകുമെന്നാണ് വിവരം.
എക്സ്പ്രസ്/ മെയിൽ സർവീസുകളിൽ മിനിമം നിരക്ക് 30 രൂപയും സൂപ്പർ ഫാസ്റ്റിൽ 45 രൂപയുമാണ്. ഈ നിരക്കുകളിൽ ഇളവുകൾ ഉണ്ടാകാൻ സാധ്യതയില്ല.