ഡോ. എം.ഐ. പുന്നൂസിന് ക്രാന്തദര്‍ശി പുരസ്കാരം
Thursday, May 30, 2024 2:06 AM IST
പാലാ: ഡോ. സിറിയക് തോമസ് ഫൗണ്ടേഷന്‍ ട്രസ്റ്റിന്‍റെ 2024ലെ ക്രാന്തദര്‍ശി പുരസ്കാരത്തിന് ആലുവ യുസി കോളജ് പ്രിന്‍സിപ്പല്‍ ഡോ. എം.ഐ. പുന്നൂസ് തെരഞ്ഞെടുക്കപ്പെട്ടു. 55,555 രൂപയും ശില്പവും അടങ്ങുന്നതാണ് അവാര്‍ഡ്.
സാഹിത്യകാരന്‍ സക്കറിയ ചെയര്‍മാനും കേന്ദ്ര സര്‍വകലാശാല മുന്‍ വൈസ് ചാന്‍സലര്‍ ഡോ. ജി. ഗോപകുമാര്‍, പിഎസ്‌സി അംഗം ഡോ. സ്റ്റാനി തോമസ് അംഗങ്ങളുമായുള്ള അവാര്‍ഡ് നിര്‍ണയ സമിതിയാണ് ഡോ.പുന്നൂസിനെ പുരസ്‌കാരത്തിനായി തെരഞ്ഞെടുത്തത്.
മികച്ച കോളജ് പ്രിന്‍സിപ്പലിനുള്ള അംഗീകാരമെന്ന നിലയിലും കോളജിനെ അക്കാഡമിക് നിലവാരത്തിലേക്ക് ഉയര്‍ത്തിയതിന്‍റെ അടിസ്ഥാനത്തിലുമാണ് പുരസ്കാരം. ജൂണില്‍ ആലുവായില്‍ നടക്കുന്ന ചടങ്ങില്‍ പുരസ്കാരം സമ്മാനിക്കും.