നിര്‍ധന വിദ്യാര്‍ഥികള്‍ക്കു കൈത്താങ്ങായി മമ്മൂട്ടിയുടെ ‘വിദ്യാമൃതം-4’
Wednesday, June 12, 2024 12:19 AM IST
കൊച്ചി: പഠനത്തില്‍ സമർഥരായ, സാമ്പത്തികമായി പിന്നാക്കം നില്ക്കുന്ന കുട്ടികള്‍ക്ക് കരുതലും കൈത്താങ്ങുമായി മമ്മൂട്ടിയുടെ ‘വിദ്യാമൃതം-4’ സൗജന്യ വിദ്യാഭ്യാസ പദ്ധതി.
എസ്എസ്എല്‍സി, പ്ലസ് ടുവിന് ഉന്നതവിജയം കൈവരിച്ച നിര്‍ധന വിദ്യാര്‍ഥികള്‍ക്ക് കേരളത്തില്‍ 21 വിദ്യാഭ്യാസ സ്ഥാപനങ്ങളുള്ള എംജിഎം ഗ്രൂപ്പുമായി ചേര്‍ന്ന് തുടര്‍പഠനത്തിന് അവസരമൊരുക്കുകയാണ് മമ്മൂട്ടി നേതൃത്വം നല്കുന്ന കെയര്‍ ആന്‍ഡ് ഷെയര്‍ ഇന്‍റര്‍നാഷണല്‍ ഫൗണ്ടേഷൻ.
സാമ്പത്തികമായി പിന്നാക്കാവസ്ഥ അനുഭവിക്കുന്നവര്‍, മാതാവോ പിതാവോ നഷ്ടപ്പെട്ടവര്‍, കാന്‍സര്‍ മുതലായ രോഗങ്ങളാല്‍ ബുദ്ധിമുട്ട് അനുഭവിക്കുന്ന കുടുംബത്തിലെ വിദ്യാര്‍ഥികള്‍ തുടങ്ങിയവര്‍ക്ക് പ്രഫഷണല്‍ വിദ്യാഭ്യാസം നല്‍കുക എന്നതാണ് പദ്ധതിയുടെ ലക്ഷ്യം.
എസ്എസ്എല്‍സി, പ്ലസ് ടു മാര്‍ക്കിന്‍റെ അടിസ്ഥാനത്തില്‍ തെരഞ്ഞെടുക്കപ്പെടുന്ന 250 വിദ്യാര്‍ഥികള്‍ക്കാണ് ഈ വര്‍ഷം ഈ പദ്ധതിയിലൂടെ പ്രവേശനം ലഭിക്കുക.
ഇന്നു രാവിലെ 11ന് കൊച്ചി റാഡിസണ്‍ ഹോട്ടലില്‍ നടക്കുന്ന ചടങ്ങില്‍ മമ്മൂട്ടി ഈ വര്‍ഷത്തെ പദ്ധതി പ്രഖ്യാപിക്കും. വിശദവിവരങ്ങള്‍ക്ക് ഫോണ്‍: 9946485111, 9946483111. രജിസ്‌ട്രേഷന്: www. mgmtc.in.