ഒത്തുതീര്‍പ്പിനു ശ്രമിക്കുകയാണെന്നു ‘മഞ്ഞുമ്മല്‍ ബോയ്‌സ്’ നിര്‍മാതാക്കള്‍
Thursday, June 13, 2024 2:46 AM IST
കൊച്ചി: ബോക്‌സ് ഓഫീസ് വിജയം നേടിയ ‘മഞ്ഞുമ്മല്‍ ബോയ്‌സ്’സിനിമയ്ക്കായി ഏഴു കോടി രൂപ നിക്ഷേപിച്ചയാള്‍ക്ക് പണവും ലാഭവിഹിതവും നല്‍കാതെ വഞ്ചിച്ചെന്ന കേസ് ഒത്തുതീര്‍പ്പിക്കാന്‍ ശ്രമിക്കുകയാണെന്ന് നിര്‍മാതാക്കള്‍ ഹൈക്കോടതിയെ അറിയിച്ചു.
നിര്‍മാതാക്കളായ ഷോണ്‍ ആന്‍റണി, സൗബിന്‍ ഷാഹിര്‍ എന്നിവരുടെ മുന്‍കൂര്‍ ജാമ്യ ഹര്‍ജിയിലാണ് അഭിഭാഷകന്‍ ഇക്കാര്യം അറിയിച്ചത്.
മരട് പോലീസിന്‍റെ കേസില്‍ ഹര്‍ജിക്കാരുടെ അറസ്റ്റ് തടഞ്ഞുകൊണ്ടുളള ഇടക്കാല ഉത്തരവ് 28 വരെ നീട്ടിയിട്ടുണ്ട്. നിക്ഷേപിച്ച തുകയടക്കം തിരിച്ചുനല്‍കിയില്ലെന്നു കാട്ടി അരൂര്‍ സ്വദേശി സിറാജ് വലിയതുറയാണ് മഞ്ഞുമ്മല്‍ നിര്‍മാതാക്കള്‍ക്കെതിരേ പരാതി നല്‍കിയത്. ജസ്റ്റീസ് സി.എസ്. ഡയസ് ഹര്‍ജി 28ന് പരിഗണിക്കാന്‍ മാറ്റി.