ജെ.ബി. കോശി കമ്മീഷന്‍ ശിപാര്‍ശകള്‍ ക്രോഡീകരിച്ച് നടപ്പാക്കും: പി. രാജീവ്
Saturday, July 13, 2024 12:57 AM IST
കൊച്ചി: ജെ.ബി. കോശി കമ്മീഷന്‍ ശിപാര്‍ശകള്‍ വിവിധ വകുപ്പുകളുടെ നിര്‍ദേശങ്ങള്‍ ക്രോഡീകരിച്ച് ഉടന്‍ നടപ്പാക്കുമെന്ന് മന്ത്രി പി. രാജീവ്. കെആര്‍എല്‍സിസി‌യുടെ 43-ാമത് ജനറല്‍ അസംബ്ലി എറണാകുളം ആശീർഭവനിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.
സ്വകാര്യ വിദ്യാഭ്യാസ മേഖലയില്‍ പുതിയ കോഴ്‌സുകള്‍ അനുവദിക്കുന്നതിനും സ്വകാര്യ യൂണിവേഴ്‌സിറ്റികള്‍ക്ക് അംഗീകാരം നൽകുന്നതിനുമുള്ള ബില്‍ സംസ്ഥാന മന്ത്രിസഭ ഉടന്‍ പരിഗണിക്കും. വിഴിഞ്ഞം സമരവുമായി ബന്ധപ്പെട്ട കേസുകള്‍ പിന്‍വലിക്കണമെന്നാണു സർക്കാർ ആഗ്രഹിക്കുന്നത്. കെആര്‍എല്‍സിസി മുഖ്യമന്ത്രിക്ക് സമര്‍പ്പിച്ച നിവേദനത്തിലെ 12 ആവശ്യങ്ങളില്‍ സാധ്യമാ‍യതെല്ലാം ചെയ്യുമെന്നും മന്ത്രി പറഞ്ഞു.
കെആര്‍എല്‍സിബിസി പ്രസിഡന്‍റ് ബിഷപ് ഡോ. വര്‍ഗീസ് ചക്കാലക്കല്‍ അധ്യക്ഷത വഹിച്ചു. സാധാരണ ജനങ്ങള്‍ ജനാധിപത്യപ്രക്രിയയില്‍ കൃത്യമായി ഇടപെട്ട് ആരെ അധികാരത്തില്‍ കൊണ്ടുവരണമെന്നു തെളിയിച്ച തെരഞ്ഞെടുപ്പാണ് രാജ്യത്തു നടന്നതെന്ന് അദ്ദേഹം പറഞ്ഞു.
വരാപ്പുഴ അതിരൂപത സഹായമെത്രാനായി നിയമിതനായ ഡോ. ആന്‍റണി വാലുങ്കലിനെ ചടങ്ങില്‍ ആദരിച്ചു. കെആര്‍എല്‍സിബിസി സെക്രട്ടറി ജനറല്‍ ബിഷപ് ഡോ. ആര്‍. ക്രിസ്തുദാസ്, ഭാരവാഹികളായ ജോസഫ് ജൂഡ്, പാട്രിക് മൈക്കിള്‍, ഫാ. തോമസ് തറയില്‍, റവ. ഡോ. ജിജു ജോര്‍ജ് അറക്കത്തറ തുടങ്ങിയവർ പ്രസംഗിച്ചു. റവ. ഡോ. ജോഷി മയ്യാറ്റില്‍ മുഖ്യപ്രഭാഷണം നടത്തി. സമ്മേളനം നാളെ സമാപിക്കും.