പാഠപുസ്തകങ്ങളിലെ ചരിത്രനിഷേധം ഉന്നയിക്കും: മന്ത്രി വി. ശിവൻകുട്ടി
Tuesday, April 29, 2025 2:51 AM IST
തിരുവനന്തപുരം: എൻസിഇആർടി പാഠപുസ്തകങ്ങളിൽ കാണിക്കുന്ന ചരിത്രനിഷേധം മേയ് രണ്ടിനു ന്യൂഡൽഹിയിൽ നടക്കുന്ന ഗവേണിംഗ് കൗണ്സിൽ യോഗത്തിൽ ചൂണ്ടിക്കാണിക്കുമെന്ന് പൊതുവിദ്യാഭ്യാസ മന്ത്രി വി. ശിവൻകുട്ടി പറഞ്ഞു.
യോഗത്തിൽ നേരിട്ടു പങ്കെടുത്ത് ഇക്കാര്യം അവതരിപ്പിക്കും. പാഠപുസ്തകങ്ങളിൽനിന്നു ചരിത്രസംഭവങ്ങൾ വെട്ടിമാറ്റുന്നത് നീതീകരിക്കാനാവില്ല. കുട്ടികൾ യഥാർഥ ചരിത്രം പഠിക്കേണ്ട എന്നത് അക്കാദമിക സത്യസന്ധതയല്ല. വിദ്യാഭ്യാസരംഗത്തെ കാവിവത്കരിക്കുന്നത് അക്കാദമിക തിരിച്ചടിക്കു കാരണമാകും.
എസ്എസ്കെയ്ക്ക് കേന്ദ്രം നൽകാനുള്ള വിദ്യാഭ്യാസ ഫണ്ട് തടഞ്ഞു വയ്ക്കുന്നതും നീതീകരിക്കാനാവില്ല. സമൂഹത്തിലെ ഏറ്റവും താഴെത്തട്ടിലുള്ള കുട്ടികൾക്കുള്ള ഫണ്ടാണത്. വിദ്യാഭ്യാസ ആവശ്യങ്ങൾക്ക് നൽകുന്ന കേന്ദ്ര ഫണ്ടിനെക്കുറിച്ച് വിദ്യാഭ്യാസ അവകാശനിയമത്തിൽ കൃത്യമായി പറയുന്നുണ്ട്. വിദ്യാഭ്യാസ അവകാശ നിയമത്തിന്റെ നഗ്നമായ ലംഘനമാണ് കേന്ദ്രം നടത്തുന്നതെന്നും മന്ത്രി പറഞ്ഞു.