അധ്യാപകനിയമന കുംഭകോണം: ഇടപെടാതെ സുപ്രീംകോടതി
Saturday, May 27, 2023 1:05 AM IST
ന്യൂഡൽഹി: അധ്യാപക നിയമന ക്രമക്കേടിൽ തൃണമൂൽ കോണ്ഗ്രസ് എംപി അഭിഷേക് ബാനർജിയെ ചോദ്യം ചെയ്യാൻ കേന്ദ്ര ഏജൻസികൾക്ക് അനുമതി നൽകിയ ഹൈക്കോടതി വിധി സ്റ്റേ ചെയ്യാതെ സുപ്രീംകോടതി. ഹൈക്കോടതി വിധിക്കെതിരേ ബാനർജി നൽകിയ ഹർജിയിൽ സുപ്രീംകോടതി നോട്ടീസ് അയച്ചു.
ജസ്റ്റീസ് ജെ.കെ. മഹേശ്വരി, പി.എസ്. നരസിംഹ എന്നിവരുൾപ്പെട്ട ബെഞ്ചിന്റേതാണു നടപടി. അവധിക്കുശേഷം ജൂലൈ പത്തിന് ഹർജിയിൽ വാദം കേൾക്കാമെന്നും കോടതി വ്യക്തമാക്കി.
കേസിൽ കഴിഞ്ഞദിവസം അഭിഷേക് ബാനർജിയെ സിബിഐ എട്ടു മണിക്കൂർ ചോദ്യംചെയ്തിരുന്നു. 2016ൽ ബംഗാളിലെ വിദ്യാഭ്യാസമേഖലയിൽ ആയിരക്കണക്കിന് അധ്യാപകരെ നിയമിച്ചതുമായി ബന്ധപ്പെട്ടതാണു കുംഭകോണം.