എൻസിഇആർടി സിലബസിൽനിന്ന് പീരിയോഡിക് ടേബിളും പുറത്ത് : Deepika.com National News |

Click here for detailed news of all items

എൻസിഇആർടി സിലബസിൽനിന്ന് പീരിയോഡിക് ടേബിളും പുറത്ത്

Friday, June 2, 2023 1:07 AM IST

ന്യൂഡൽഹി: സിലബസ് പരിഷ്കരണത്തിന്‍റെ ഭാഗമായി പത്താം ക്ലാസ് എൻസിഇആർടി വിദ്യാർഥികളുടെ പാഠപുസ്തകത്തിൽനിന്ന് പീരിയോഡിക് ടേബിൾ (ആവർത്തന പട്ടിക) ഉൾപ്പെടെയുള്ള പാഠഭാഗങ്ങൾ പുറത്ത്.

വിദ്യാർഥികളുടെ പഠന ഭാരം ലഘൂകരിക്കുന്നതിന് പത്താം ക്ലാസ് എൻസിഇആർടി വിദ്യാർഥികളുടെ ശാസ്ത്ര പുസ്തകത്തിലെ പീരിയോഡിക് ക്ലാസിഫിക്കേഷൻ ഓഫ് എലമെന്‍റ്സ്, സോഴ്സസ് ഓഫ് എനർജി, സസ്റ്റയിനബിൾ മാനേജ്മെന്‍റ് ഓഫ് നാച്ചുറൽ റിസോഴ്സസ് എന്നീ പാഠഭാഗങ്ങളും പൊളിറ്റിക്കൽ സയൻസ് പുസ്തകത്തിൽനിന്നു പോപ്പുലർ സ്ട്രഗിൾസ് ആൻഡ് മൂവ്മെന്‍റ്സ്, പൊളിറ്റിക്കൽ പാർട്ടീസ്, ചലഞ്ചസ് ടു ഡെമോക്രസി എന്നിങ്ങനെയുള്ള പാഠഭാഗങ്ങളുമാണ് നീക്കിയത്.

എൻസിഇആർടി ഹയർ സെക്കൻഡറി പാഠപുസ്തകങ്ങളിൽനിന്നു മുഗൾ ചരിത്രം, പരിണാമ സിദ്ധാന്തം തുടങ്ങിയ പാഠഭാഗങ്ങൾ ഒഴിവാക്കിയ നടപടി വിവാദമായിരുന്നു. സ്വാതന്ത്ര‍്യാനന്തര ഇന്ത്യയിലെ കോണ്‍ഗ്രസ് പാർട്ടിയുടെ അപ്രമാദിത്വത്തെക്കുറിച്ച് പ്രതിപാദിക്കുന്ന ഇറാ ഓഫ് വണ്‍ പാർട്ടി ഡൊമിനൻസ് ഉൾപ്പെടെയുള്ള പാഠഭാഗങ്ങൾ എൻസിഇആർടി നീക്കം ചെയ്തിരുന്നു. ആർഎസ്എസ്-ബിജെപി പ്രത്യയശാസ്ത്രങ്ങൾക്ക് ഇണങ്ങാത്ത പാഠഭാഗങ്ങളാണ് എൻസിഇആർടി യഥേഷ്ടം പുസ്തകങ്ങളിൽനിന്ന് ഒഴിവാക്കുന്നതെന്ന് ജയ്റാം രമേശ് ഉൾപ്പെടെയുള്ള മുതിർന്ന കോണ്‍ഗ്രസ് നേതാക്കൾ വിമർശിച്ചിരുന്നു.

എന്നാൽ സിലബസ് പരിഷ്കരണത്തിന്‍റെ ഭാഗമായി പാഠഭാഗങ്ങൾ ഒഴിവാക്കുന്നത് സ്വാഭാവിക നടപടിയാണെന്നാണ് എൻസിഇആർടി ചെയർമാൻ ദിനേശ് പ്രസാദ് ശക്ലാനി നൽകിയ വിശദീകരണം.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.