ചെങ്കോൽ വിഷയത്തിൽ ബിജെപിയുടെ നുണ ഫാക്ടറി വെളിച്ചത്തായെന്നു കോൺഗ്രസ് : Deepika.com National News |

Click here for detailed news of all items

ചെങ്കോൽ വിഷയത്തിൽ ബിജെപിയുടെ നുണ ഫാക്ടറി വെളിച്ചത്തായെന്നു കോൺഗ്രസ്

Saturday, June 10, 2023 12:13 AM IST

ന്യൂഡൽഹി: ചെങ്കോൽ വിഷയത്തിൽ ബിജെപിയുടെ നുണ ഫാക്ടറി വെളിച്ചത്തായെന്നു കോൺഗ്രസ് നേതാവ് ജയറാം രമേശ്. ദ ഹിന്ദു ദിനപത്രത്തിൽ പ്രസിദ്ധീകരിച്ച തിരുവാവദുതുറൈ അദീനം മഠാധിപതിയുടെ അഭിമുഖം ചൂണ്ടിക്കാട്ടിയായിരുന്നു ജയറാം രമേശ് ബിജെപിക്കെതിരേ രംഗത്തെത്തിയത്.

ജവഹർലാൽ നെഹ്റുവിന് ചെങ്കോൽ കൈമാറുന്പോൾ ലോർഡ് മൗണ്ട്ബാറ്റനോ സി. രാജഗോപാലാചാരിയോ സമീപത്ത് ഉണ്ടായിരുന്നില്ലെന്നു അദീനം മഠാധിപതി അഭിമുഖത്തിൽ വ്യക്തമാക്കുന്നു. 1947 ഓഗസ്റ്റ് 14 രാത്രി പത്തിനു നെഹ്റുവിന്‍റെ വസതിയിൽവച്ചാണു ചെങ്കോൽ കൈമാറിയത്.

""1947 ഓഗസ്റ്റ് 29ലെ ഹിന്ദു ദിനപത്രത്തിന്‍റെ പത്താം പേജിൽ ഒരു പരസ്യം ഉൾപ്പെടുത്തിയിരുന്നു. നെഹ്റുവിന് 1947 ഓഗസ്റ്റ് 14 രാത്രി പത്തിനു സുവർണ ചെങ്കോൾ നല്കുന്നതിന്‍റെ പടമായിരുന്നു അത്. തിരുവാവദുതുറൈ അദീനം നല്കിയ പരസ്യമായിരുന്നു അതെന്നു വ്യക്തമാണ്’’- ജയറാം രമേശ് ട്വീറ്റ് ചെയ്തു.

ബ്രിട്ടനിൽനിന്നുള്ള അധികാരക്കൈമാറ്റമാണു ചെങ്കോൽകൊണ്ട് ഉദ്ദേശിക്കുന്നതെന്ന് മൗണ്ട്ബാറ്റനോ രാജഗോപാലാചാരിയോ നെഹ്റുവോ പറയുന്നതിന്‍റെ രേഖകൾ ഇല്ലെന്നു നേരത്തേതന്നെ ജയറാം രമേശ് വ്യക്തമാക്കിയിരുന്നു. എന്നാൽ, ചെങ്കോൽ എന്നത് അധികാരകൈമാറ്റത്തിന്‍റെ ചിഹ്നമാണെന്നായിരുന്നു ബിജെപിയുടെ വാദം.

നെഹ്റുവിനു ലഭിച്ച ചെങ്കോൽ മേയ് 28ന് പുതിയ പാർലമെന്‍റ് മന്ദിരത്തിന്‍റെ ഉദ്ഘാടനത്തോടനുബന്ധിച്ച് വലിയ പ്രാധാന്യത്തോടെ നരേന്ദ്ര മോദി ലോക്സഭയിൽ സ്ഥാപിച്ചിരുന്നു.

അലാഹാബാദ് മ്യൂസിയത്തിലായിരുന്നു ചെങ്കോൽ സൂക്ഷിച്ചിരുന്നത്. ചെങ്കോൽ മ്യൂസിയത്തിലാക്കിയതിൽ കോൺഗ്രസിനെതിരേ ബിജെപി രൂക്ഷ വിമർശനമുന്നയിച്ചിരുന്നു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.