പല കാരണങ്ങളാൽ ചട്ടലംഘനം ഉണ്ടായ നിരവധി കെട്ടിടങ്ങൾ ക്രമപ്പെടുത്താൻ സാധിക്കാത്തത് ശ്രദ്ധയിൽപ്പെട്ടതിനെ തുടർന്നാണ് സർക്കാർ ഇടപെടൽ ഉണ്ടായതെന്ന് മന്ത്രി എം.ബി. രാജേഷ് അറിയിച്ചു. കെട്ടിട ഉടമകളുടെ പ്രശ്നങ്ങൾ പരിഹരിക്കുന്നതിനോടൊപ്പം തദ്ദേശ സ്ഥാപനങ്ങളുടെ വരുമാനത്തിൽ വർധനവുണ്ടാക്കാനും നടപടി സഹായിക്കുമെന്നും മന്ത്രി പറഞ്ഞു.
എങ്ങനെ അപേക്ഷിക്കാം? തിരുവനന്തപുരം: നിശ്ചിത ഫോറത്തിലുള്ള ക്രമപ്പെടുത്തൽ അപേക്ഷകൾ കെട്ടിടത്തിന്റെ പ്ലാനും മറ്റ് അനുബന്ധ രേഖകളും സഹിതം തദ്ദേശ ഭരണ സ്ഥാപന സെക്രട്ടറിക്കാണ് സമർപ്പിക്കേണ്ടത്. നിശ്ചിത നിരക്കിലുള്ള അപേക്ഷാ ഫീസും ഒടുക്കണം. ഇങ്ങനെ ലഭിക്കുന്ന അപേക്ഷകൾ ജില്ലാതലത്തിലുള്ള ക്രമവത്കരണ കമ്മിറ്റി പരിശോധിച്ച് തീരുമാനമെടുക്കും.
ജില്ലാ ജോയിന്റ് ഡയറക്ടർ ചെയർമാനും ജില്ല ടൗണ് പ്ലാനർ കണ്വീനറും ബന്ധപ്പെട്ട തദ്ദേശ സ്ഥാപനത്തിലെ സെക്രട്ടറിയും എൻജിനിയറും അംഗങ്ങളായുള്ളതാണ് ജില്ലാതല ക്രമപ്പെടുത്തൽ കമ്മിറ്റി. കമ്മിറ്റിയുടെ തീരുമാനത്തിൽ ആക്ഷേപമുള്ളവർക്ക് സംസ്ഥാനതലത്തിലെ അപ്പീൽ കമ്മിറ്റിയെ സമീപിക്കാം.
പ്രിൻസിപ്പൽ ഡയറക്ടർ ചെയർമാനും ചീഫ് ടൗണ് പ്ലാനർ കണ്വീനറുമായിട്ടുള്ള സംസ്ഥാനതല കമ്മിറ്റിയിൽ റൂറൽ- അർബൻ ഡയറക്ടർ, ചീഫ് എൻജിനിയർ എന്നിവർ അംഗങ്ങളാണ്. സംസ്ഥാന തല അപ്പീൽ കമ്മിറ്റിയുടെ തീരുമാനത്തിൽ ആക്ഷേപമുള്ളവർക്ക് സർക്കാർ തലത്തിൽ അപ്പലറ്റ് അഥോറിറ്റിയായ തദ്ദേശ പ്രിൻസിപ്പൽ സെക്രട്ടറിക്ക് അപ്പീൽ നൽകാം.
സ്വന്തം ലേഖകൻ