മാർക്കറ്റ് ക്ലോസിംഗിൽ 72,426 പോയിന്റിൽ നിലകൊള്ളുന്ന സെൻസെക്സ് 73,037ലെ ആദ്യ പ്രതിരോധമേഖലയെ ഉറ്റുനോക്കുന്നു. ഇതു മറികടക്കാൻ കരുത്തുലഭിച്ചാൽ 73,373 ലേക്കും തുടർന്ന് 73,427ലെ റിക്കാർഡിലേക്കും സഞ്ചരിക്കാം. തിരുത്തലുണ്ടായാൽ 71,322-70,218ൽ താങ്ങുണ്ട്. നാണയപ്പെരുപ്പ നിയന്ത്രണവും പെട്രോളിയം ഉത്പന്നവിലയിലെ സ്ഥിരതയും നിക്ഷേപകരെ വിപണിയിലേക്ക് ആകർഷിക്കും. അതേസമയം, തെരഞ്ഞടുപ്പ് അടുക്കുന്നത് ആശങ്ക പരത്താം.
നോട്ടം ചൈനയിൽ യുഎസ്-യൂറോപ്യൻ ഓഹരി ഇൻഡക്സുകൾക്കൊപ്പം ഏഷ്യൻ മാർക്കറ്റുകളും കഴിഞ്ഞവാരം നേട്ടത്തിലായിരുന്നു. ജപ്പാനിലെ നിക്കീ സൂചിക റിക്കാർഡായ 38,863ലേക്ക് ഉയർന്നു. ഹോങ്കോംഗ്, കൊറിയൻ വിപണികളും കരുത്തുകാട്ടി. ഒരാഴ്ചനീണ്ട ലൂണാർ ന്യൂ ഇയർ ആഘോഷങ്ങൾ കഴിഞ്ഞു ചൈനീസ് മാർക്കറ്റിൽ ഇന്ന് ഇടപാടുകൾ പുനരാരംഭിക്കും. ഷാംഗ്ഹായിയിലെ ചലനങ്ങളെ ഉറ്റുനോക്കുകയാണ് ഫണ്ടുകൾ.
ക്രൂഡ് ഓയിൽ വില ബാരലിന് 78.23 ഡോളറിലാണ്. സാങ്കേതികമായി ബുള്ളിഷായതിനാൽ 82-84 ഡോളറിലേക്ക് ഉയരാൻ എണ്ണ ശ്രമം നടത്താം.
മഞ്ഞലോഹത്തിനു മങ്ങൽ ന്യൂയോർക്ക് എക്സ്ചേഞ്ചിൽ സ്വർണത്തിലെ വാങ്ങൽ താത്പര്യം ചുരുങ്ങിയതു മഞ്ഞലോഹത്തിന്റെ തിളക്കത്തിനു മങ്ങലേൽപ്പിച്ചു. ട്രോയ് ഒൗണ്സിന് 2024 ഡോളറിൽനിന്ന് 2000ലെ താങ്ങുതകർത്ത് 1983 ഡോളറിലേക്ക് ഇടിഞ്ഞശേഷം ക്ലോസിംഗിൽ 2013 ഡോളറിലാണ്. ചൈനീസ് വിപണി അവധിയായത് ഏഷ്യൻ മേഖലയിലെ നിക്ഷേപതാത്പര്യം കുറച്ചു. ഈ വാരം അവർ സജീവമാക്കുന്നതോടെ ഇടപാടുകളുടെ വ്യാപ്തി വർധിക്കും.