ന്യൂഡൽഹി: ദോഹ ലോക അത്‌ലറ്റിക്സ് ചാന്പ്യൻഷിപ്പിനുള്ള ഇന്ത്യൻ ടീമിൽ മലയാളി താരം പി.യു. ചിത്ര ഇടംനേടി. അത്‌ലറ്റിക്സ് ഫെഡറേഷൻ ഓഫ് ഇന്ത്യ പ്രഖ്യാപിച്ച 25 അംഗ ടീമിലാണ് ചിത്ര ഉൾപ്പെട്ടത്. ഈ മാസം 27നാണ് ചാന്പ്യൻഷിപ്പ് ആരംഭിക്കുന്നത്. ചിത്ര കഴിഞ്ഞ തവണ ഒഴിവാക്കപ്പെട്ടത് വിവാദമായിരുന്നു.
നിലവിൽ വനിതകളുടെ 1500 മീറ്റർ ഏഷ്യൻ ചാന്പ്യനാണ് ചിത്ര. പുരുഷന്മാരുടെ 1500 മീറ്ററിൽ മലയാളിതാരം ജിൻസണ്‍ ജോണ്സനും ചാന്പ്യൻഷിപ്പിൽ പങ്കെടുക്കും. 400 മീറ്റർ ഹർഡിൽസിൽ എം.പി. ജാബിർ, 3000 മീറ്റർ സ്റ്റീപ്പിൾചേസിൽ അവിനാഷ് സാബ്ളെ, 20 കിലോമീറ്റർ നടത്തത്തിൽ കെ.ടി. ഇർഫാൻ, ദേവേന്ദർ സിംഗ്, മാരത്തണിൽ ടി. ഗോപി, ലോംഗ്ജംപിൽ എം. ശ്രീശങ്കർ, ഷോട്ട്പുട്ടിൽ തജീന്ദർ പാൽ സിംഗ്, ജാവലിനിൽ ശിവ്പാൽ സിംഗ്, 4x400 മീറ്റർ റിലേ, മിക്സഡ് റിലേയിൽ മുഹമ്മദ് അനസ്, നിർമൽ നോഹ് ടോം, അലക്സ് ആൻറണി, അമോജ് ജേക്കബ്, കെ.എസ്. ജീവൻ, ധരുണ്‍ അയ്യസ്വാമി, ഹർഷ് കുമാർ എന്നിവരാണുള്ളത്.
ഹിമ ദാസിനെ 4x400 മീറ്റർ വനിതാ റിലേ ടീമിൽ ഉൾപ്പെടുത്തി. മലയാളി താരങ്ങളായ ജിസ്ന മാത്യു, വി.കെ. വിസ്മയ, വി. രേവതി, കർണാടകയുടെ എം.ആർ. പൂവമ്മ, ആർ. വിദ്യ, ശുഭ വെങ്കടേശൻ എന്നിവരും റിലേ-മിക്സഡ് ടീമിലുണ്ട്. ജാവലിൻത്രോയിൽ പങ്കെടുക്കുന്ന അനു റാണിയാണ് ചിത്രയ്ക്കു പുറമേ വ്യക്തിഗത ഇനം പോരാട്ടത്തിനുള്ളത്.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.