ചെപ്പോക്കിൽ ക്യാന്പ് : Deepika.com Sports News |

Click here for detailed news of all items

ചെപ്പോക്കിൽ ക്യാന്പ്

Wednesday, August 12, 2020 12:25 AM IST

ചെന്നൈ: ഐപിഎലിനായി യുഎഇയിലേക്ക് പറക്കുന്നതിനു മുന്പ് ചെന്നൈ ചെപ്പോക്ക് സ്റ്റേഡിയത്തിൽ നാല് ദിവസത്തെ ക്യാന്പ് നടത്താൻ ചെന്നൈ സൂപ്പർ കിംഗ്സ് ശ്രമം. ക്യാപ്റ്റൻ എം.എസ്. ധോണിയുടെ നിർദേശപ്രകാരമാണിതെന്നാണ് സൂചന. ഈ മാസം 16 മുതൽ 20വരെയായിരിക്കും ക്യാന്പ്. അങ്ങനെയെങ്കിൽ ധോണി അടക്കമുള്ള താരങ്ങൾ 16 മുതൽ ചെപ്പോക്കിൽ പരിശീലനം നടത്തും.

കോവിഡ്-19 ഭീഷണി നിലനിൽക്കുന്നതിനാൽ ക്യാന്പിന് സർക്കാർ അനുമതി ലഭിക്കേണ്ടതുണ്ട്. സ്വന്തം നാടായ റാഞ്ചിയിൽ കഴിഞ്ഞ ആഴ്ച മുതൽ ധോണി നെറ്റ്സ് പരിശീലനം ആരംഭിച്ചിരുന്നു. ഈ മാസം 21ന് ചെന്നൈ സൂപ്പർ കിംഗ്സ് യുഎഇയിലേക്ക് തിരിക്കുമെന്നാണ് വിവരം.

50 നെറ്റ് ബൗളർമാർ

ഐപിഎലിനായി ടീമുകൾ യുഎഇയിലേക്ക് പറക്കുന്പോൾ ചുരുങ്ങിയത് 50 നെറ്റ് ബൗളർമാരെങ്കിലും ഒപ്പമുണ്ടാകുമെന്ന് സൂചന. ചില ടീമുകൾ 10 എക്സ്ക്ലൂസീവ് നെറ്റ് ബൗളർമാരെ കൂടെക്കൂട്ടുമെന്നും റിപ്പോർട്ടുണ്ട്. ചെന്നൈ സൂപ്പർ കിംഗ്സ്, കോൽക്കത്ത നൈറ്റ് റൈഡേഴ്സ് ടീമുകൾ 10 വീതം നെറ്റ് ബൗളർമാരെ കൊണ്ടുപോകുന്പോൾ ഡൽഹി ക്യാപിറ്റൽസ് ആറു പേരെ ഒപ്പം കൂട്ടുമെന്നാണ് വിവരം. ഫസ്റ്റ് ക്ലാസ്, അണ്ടർ 19, അണ്ടർ -23 ബൗളർമാരാകും ടീമുകൾക്കൊപ്പമുണ്ടാകുക.

റോയൽ ചലഞ്ചേഴ്സ് ബംഗളൂരു, രാജസ്ഥാൻ റോയൽസ് എന്നിവ അവരുടെ അക്കാദമിയിൽനിന്നുള്ള ബൗളർമാരെയാണ് യുഎഇയിലേക്ക് കൊണ്ടുപോകുക എന്നാണ് റിപ്പോർട്ട്.

ആർസിബി 21ന് പുറപ്പെടും

വിരാട് കോഹ്‌ലിയുടെ നേതൃത്വത്തിലുള്ള ബംഗളൂരു റോയൽ ചലഞ്ചേഴ്സ് 2020 ഐപിഎലിനായി അടുത്ത ആഴ്ച പുറപ്പെടുമെന്ന് സ്ഥിരീകരണം. 21, 22 തീയതികളിലൊന്നിലായിരിക്കും ടീം യുഎഇയിലേക്ക് പറക്കുക. താരങ്ങൾ ബംഗളൂരുവിൽ ഒന്നിച്ചുകൂടിയശേഷം കോവിഡ് പരിശോധനയടക്കം നടത്തും.

ധോണിയുടെ കീഴിലുള്ള ചെന്നൈ സൂപ്പർ കിംഗ്സ് 21ന് പുറപ്പെടും. 20 മുതൽ ടീമുകൾക്ക് യുഎഇയിലേക്ക് പുറപ്പെടാമെന്ന് ബിസിസിഐ നേരത്തേ വ്യക്തമാക്കിയിട്ടുണ്ട്. ഇന്ത്യൻ ഓപ്പണറും കിംഗ്സ് ഇലവണ്‍ പഞ്ചാബിന്‍റെ നായകനുമായ കെ.എൽ. രാഹുൽ നെറ്റ്സ് പരിശീലനം പുനരാരംഭിച്ചിരുന്നു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.