ഖത്തർ ലോകകപ്പ് ; നൂറ് ശതമാനം വിജയവുമായി ബ്രസീൽ : Deepika.com Sports News |

Click here for detailed news of all items

ഖത്തർ ലോകകപ്പ് ; നൂറ് ശതമാനം വിജയവുമായി ബ്രസീൽ

Wednesday, June 9, 2021 11:49 PM IST

അസുൻസിയോണ്‍ (പരാഗ്വെ): ഖത്തർ ലോകകപ്പ് ഫുട്ബോൾ ലാറ്റിനമേരിക്കൻ യോഗ്യതാ റൗണ്ടിൽ നൂറ് ശതമാനം വിജയവുമായി ബ്രസീൽ. യോഗ്യതാ റൗണ്ടിൽ തുടർച്ചയായ ആറാം മത്സരത്തിലും കാനറികൾ ജയം കൊത്തിപ്പറന്നു.

പരാഗ്വെയ്ക്കെതിരായ എവേ പോരാട്ടത്തിൽ ബ്രസീൽ 2-0നു ജയം സ്വന്തമാക്കി. നെയ്മർ (4’), ലൂകാസ് പക്വേറ്റ (90+3’) എന്നിവരായിരുന്നു മഞ്ഞപ്പടയ്ക്കായി വലകുലുക്കിയത്. ഗബ്രിയേൽ ജീസസിന്‍റെ അസിസ്റ്റിലായിരുന്നു നെയ്മറിന്‍റെ ഗോൾ. പക്വേറ്റയുടെ ഗോളിനു വഴി തെളിച്ചത് നെയ്മറായിരുന്നു.

അതേസമയം, 10 മിനിറ്റിനുള്ളിൽ രണ്ട് ഗോൾ നേടിയശേഷം ഇഞ്ചുറി ടൈം ഗോളിലൂടെ അർജന്‍റീന എവേ പോരാട്ടത്തിൽ 2-2ന് കൊളംബിയയോട് സമനില വഴങ്ങി. ക്രിസ്റ്റ്യൻ റൊമേറൊ (3’), ലിയാൻഡ്രൊ പരേഡെസ് (8’) എന്നിവരായിരുന്നു അർജന്‍റീനയെ മുന്നിലെത്തിച്ചത്. എന്നാൽ, ലൂയിസ് മുറീൽ (51 പെനൽറ്റി), മിഗ്വെൽ ബോർഹ (90+4’) എന്നിവരുടെ ഗോളിൽ അർജന്‍റീനയ്ക്ക് പോയിന്‍റ് പങ്കുവയ്ക്കേണ്ടിവന്നു.

മറ്റു മത്സരങ്ങളിൽ പെറു 2-0ന് ഇക്വഡോറിനെ പരാജയപ്പെടുത്തിയപ്പോൾ ഉറുഗ്വെയും വെനസ്വേലയും 0-0നും ചിലിയും ബൊളീവിയയും 1-1നും സമനിലയിൽ പിരിഞ്ഞു.

ബ്രസീൽ 18 പോയിന്‍റുമായി ഒന്നാം സ്ഥാനത്ത് തുടരുന്നു. അർജന്‍റീന (12), ഇക്വഡോർ (9), ഉറുഗ്വെ (8), കൊളംബിയ (8) എന്നിവയാണ് തുടർന്നുള്ള സ്ഥാനങ്ങളിൽ.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.