പട്ടാമ്പിയിൽ യുവാവ് ട്രെയിനിൽനിന്ന് വീണ് മരിച്ചു
Wednesday, June 12, 2024 10:20 PM IST
പാലക്കാട്: എറണാംകുളത്തേക്ക് യാത്ര ചെയ്യുകയായിരുന്ന യുവാവ് ട്രെയിനിൽ നിന്ന് വീണ് മരിച്ചു. വൈകീട്ട് ആറോടെ കണ്ണൂർ - എറണാംകുളം ഇന്റർസിറ്റി ട്രെയിൻ പട്ടാമ്പിയിൽ എത്തിയപ്പോഴാണ് സംഭവം. ആലത്തിയൂർ സ്വദേശി പുതുപറമ്പിൽ അഫ്സൽ സാദിഖ് (23) ആണ് മരിച്ചത്.
ട്രെയിനിന്റെ ചവിട്ടുപടിയിൽ ഇരിക്കുകയായിരുന്ന അഫ്സൽ പട്ടാമ്പി പുതിയ ഗേറ്റിന് സമീപം എത്തിയപ്പോളാണ് വീണത്. ഒപ്പമുണ്ടായിരുന്ന സുഹൃത്തുക്കൾ ഉടനെ ട്രെയിൻ ചെയിൻ വലിച്ച് നിർത്തി.
യുവാവിനെ പട്ടാമ്പിയിലെ സ്വകാര്യ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. മൃതദേഹം പട്ടാമ്പി സ്വകാര്യ ആശുപത്രിയിൽ സൂക്ഷിച്ചിരിക്കുകയാണ്.