സംസ്ഥാന ടൂറിസം വകുപ്പിനു കീഴിൽ തിരുവനന്തപുരം, കൊല്ലം, ചേർത്തല, തൊടുപുഴ, കോട്ടയം, കളമശേരി, തൃശൂർ,പാലക്കാട്,തിരൂർ,പെരിന്തൽമണ്ണ, കോഴിക്കോട്, കണ്ണൂർ, ബേക്കൽ എന്നിവിടങ്ങളിൽ പ്രവർത്തിക്കുന്ന ഫുഡ് ക്രാഫ്റ്റ് ഇൻസ്റ്റിറ്റ്യൂട്ടുകളിൽ നടത്തുന്ന ഒരു വർഷത്തെ ഹോട്ടൽ മാനേജ്മെന്റ് കോഴ്സുകൾക്ക് അപേക്ഷിക്കാം. അപേക്ഷിക്കേണ്ട അവസാന തീയതി ഈ മാസം പത്ത്. സ്റ്റാർ ഹോട്ടലുകൾ, എയർലൈൻസ് കാറ്ററിംഗ്, ആഡംബര കപ്പലുകൾ, വിനോദ സഞ്ചാര മേഖലകളിലും വിദേശത്തും ധാരാളം തൊഴിലവസരങ്ങളുള്ളതാണ് കോഴ്സുകൾ. എസ്എസ്എൽസി പാസായവർക്ക് അപേക്ഷിക്കാം.
ഫൂഡ് ആൻഡ് ബിവറേജ് സർവീസ്: സ്റ്റാർ ഹോട്ടലുകളുടെ നിലവാരത്തിനനുസരിച്ച് ഭക്ഷണ സാധനങ്ങളും പാനീയങ്ങളും, കൃത്യമായ ക്രമത്തിൽ വിതരണം ചെയ്യുന്നതെങ്ങനെയെന്നാണ് ഈ കോഴ്സിൽ പഠിപ്പിക്കുന്നത്. ഈ പഠനത്തിന് ശേഷം വെയ്റ്റർ തസ്തികയിൽ ഹോട്ടലുകളിൽ ജോലിയിൽ പ്രവേശിക്കാവുന്നതും, ജോലിയിലെ പ്രാവീണ്യത്തിനും പ്രാഗൽഭ്യത്തിനുമനുസരിച്ച് സീനിയർ വെയിറ്റർ, ക്യാപ്റ്റൻ, റെസ്റ്ററന്റ് മാനേജർ, ഫൂഡ് ആൻഡ് ബീവറേജ് മാനേജർ എന്നീ നിലകളിൽ ഉയരാവുന്നതുമാണ്. ഫീസ് 14000 രൂപ
ഫ്രണ്ട് ഓഫീസ് ഓപ്പറേഷൻ: ഹോട്ടലിൽ എത്തിച്ചേരുന്ന അതിഥികളെ സ്വീകരിക്കൽ, മുറി അനുവദിച്ചു നൽകൽ, അതിഥികളിൽ നിന്നും വാടക ഈടാക്കൽ, റൂം റിസർവേഷൻ, രജിസ്ട്രേഷൻ, റൂം വിൽപന, ഗസ്റ്റ് ചെക്കൗട്ട് എന്നിവ ഈ വിഷയത്തിന്റെ ഭാഗമായി പഠിക്കുന്നു. ബുക്ക് കീപ്പിംഗ്, സോഫ്റ്റ്വേർ അധിഷ്ഠിത കംപ്യൂട്ടർ പരിശീലനം എന്നിവ കൂടി ഈ കോഴ്സിൽ ഉൾപ്പെടുത്തിയിട്ടുണ്ട്. ഫീസ് 14000 രൂപ.
ഫുഡ് പ്രൊഡക്ഷൻ: കൃത്യമായ രീതിയിൽ ആഹാരം പാചകം ചെയ്യാൻ പഠിപ്പിക്കുന്ന കോഴ്സാണിത്. ദേശീയ അന്തർദേശീയ തലത്തിലുള്ള 200 തരത്തിലുള്ള ആഹാരം നിർമിക്കുന്നതിന് ഈ കോഴ്സിലൂടെ പഠിപ്പിക്കുന്നു. ഫീസ് 20000 രൂപ.
ഹോട്ടൽ അക്കൊമഡേഷൻ ഓപ്പറേഷൻ: ഹോട്ടലുകളിലെ പ്രധാനപ്പെട്ട വിഭാഗമാണ് ഹൗസ് കീപ്പിംഗ്. ഹോട്ടലുകളിലെ മുറി അന്താരാഷ്ട്ര നിലവാരത്തിനനുസരിച്ച് സജ്ജീകരിക്കൽ, ഹോട്ടലും പരിസരവും വൃത്തിയായി സൂക്ഷിക്കൽ തുടങ്ങിയവ ഈ വിഭാഗത്തിൽപ്പെടുന്നവയാണ്. ഫീസ് 14000 രൂപ.
ബേക്കറി ആൻഡ് കണ്ഫെക്ഷനറി: കലാപരമായി ചെയ്യാൻ കഴിയുന്ന ബേക്കിംഗ് വളരെ തൊഴിൽ സാധ്യതയുള്ള വ്യവസായമാണ്. ഈ കോഴ്സ് പൂർത്തിയാക്കുന്ന ഒരാൾ ബ്രെഡ്, ബ്രെഡ് റോൾ, കേക്കുകൾ, പേസ്റ്റ്രീസ്, കുക്കീസ് എന്നിവ ബേക്ക് ചെയ്യുന്നതിനുള്ള തിയറിയിലും പ്രാക്റ്റിക്കലിലും പ്രാവീണ്യം നേടുന്നു. ഫീസ് 20000 രൂപ
കാനിംഗ് ആൻഡ് ഫുഡ് പ്രിസെർവേഷൻ: ഭക്ഷണ പദാർത്ഥങ്ങളെ അണുവിമുക്തമാക്കി ദീർഘകാലത്തേയ്ക്കു അതിന്റെ തനിമയെ നിലനിർത്തി ശാസ്ത്രീയമായി സൂക്ഷിക്കുന്ന പഠനരീതി. ഈ മേഖല വ്യാവസായികമായി വളരെ വേഗത്തിൽ വളർന്നുകൊണ്ടിരിക്കുകയും അനന്തമായ തൊഴിൽ അവസരങ്ങൾ ഉറപ്പുവരുത്തുകയും ചെയ്യുന്നു. ഫീസ് 20000 രൂപ.
ഒരു അപേക്ഷാ ഫോറം ഉപയോഗിച്ചുതന്നെ മൂന്ന് കോഴ്സുകള്ക്ക് മുന്ഗണനാ ക്രമത്തിൽ അപേക്ഷിക്കാവുന്നതാണ്. അപേക്ഷ സമര്പ്പിക്കുന്ന സ്ഥാപനത്തിലേക്ക് മാത്രമായിരിക്കും പ്രവേശനത്തിന് അവകാശം ഉണ്ടായിരിക്കുക. ഫോണ്: 0471 2310441, . 04842558385. https://fcikerala.org/