സയൻസ്, സോഷ്യൽ സയൻസസ്, ഹ്യുമാനിറ്റീസ്, ബിസിനസ് സ്റ്റഡീസ് എന്നീ വിഷയങ്ങളിൽ ബിരുദ കോഴ്സുകൾക്കു പഠിക്കുന്ന വിദ്യാർഥികൾക്ക് നൽകുന്ന സ്കോളർഷിപ്പിന് ഹയർ എഡ്യൂക്കേഷന് കൗൺസിൽ അപേക്ഷ ക്ഷണിച്ചു.
സർക്കാർ, എയ്ഡഡ് ആർട്സ് ആൻഡ് സയൻസ് കോളജുകളിൽ 2019 -20 വർഷം ആദ്യ വർഷ ബിരുദ കോഴ്സിനു പഠിക്കുന്നവർക്ക് അപേക്ഷിക്കാം.ഐഎച്ച്ആർഡി അപ്ലൈഡ് സയൻസ് കോളജുകളിൽ പഠിക്കുന്നവരും അപേക്ഷിക്കാൻ അർഹരാണ്.ബിരുദ കോഴ്സിന്റെ ആദ്യ വർഷം 12000 രൂപ, രണ്ടാം വർഷം 18000 രൂപ, മൂന്നാം വർഷം 24000 രൂപ എന്ന നിരക്കിൽ സ്കോളർഷിപ് ലഭിക്കും. തുടർന്നു ബിരുദാനന്തര ബിരുദ പഠനത്തിനു പോയാൽ ആദ്യ വർഷം 40000 രൂപയും രണ്ടാം വർഷം 60000 രൂപയും ലഭിക്കും.
ആകെ 1000 സ്കോളർഷിപ്പുകളാണു നൽകുക. ഡിസംബർ 31നകം അപേക്ഷിക്കണം. വെബ്സൈറ്റ്: www.kshec.kerala.gov.in. സയൻസ്, ബിസിനസ് സ്റ്റഡീസിന് 75 ശതമാനം മാർക്കോടെയും ഹ്യുമാനിറ്റീസ്, സോഷ്യൽ സയൻസ് 60 ശതമാനം മാർക്കോടെയും പാസായവർക്ക് അപേക്ഷിക്കാം.
ഇ.കെ. നായനാർ സ്കോളർഷിപ്
സഹകരണ വകുപ്പിന്റെ നിയന്ത്രണത്തിലുള്ള കേപ്പിന്റെ മുട്ടത്തറ, പെരുമണ്, ആറൻമുള, പത്തനാപുരം, കിടങ്ങൂർ, പുന്നപ്ര, വടകര, തലശേരി, തൃക്കരിപ്പൂർ എൻജിനിയറിംഗ് കോളജുകളിൽ 2019 -20 അധ്യയന വർഷത്തേക്കുള്ള ഇ.കെ. നായനാർ കോ-ഓപ്പറേറ്റീവ് പ്രഫഷണൽ എഡ്യൂക്കേഷൻ സ്കോളർഷിപ്പിന് അപേക്ഷ ക്ഷണിച്ചു.പ്ലസ് ടുവിന് 85 ശതമാനത്തിൽ കുറയാതെ മാർക്ക് നേടിയതും കുടുംബ വർഷിക വരുമാനം രണ്ടുലക്ഷം രൂപ കവിയാത്തതുമായ എല്ലാ വിദ്യർഥികൾക്കും സ്കോളർഷിപ്പിന് അർഹതയുണ്ട്. അപേക്ഷാ ഫോറത്തിനും കൂടുതൽ വിവരങ്ങൾക്കും അതതു കോളജു പ്രിൻസിപ്പൽമാരെ സമീപിക്കണം.