സിനിമ മുഴുവൻ കാണാതെ മോശം പറഞ്ഞെന്ന് ആരോപിച്ച് സന്തോഷ് വർക്കിക്ക് നേരെ കയ്യേറ്റം
Friday, June 2, 2023 4:12 PM IST
"ആറാട്ട്’ സിനിമയുടെ റിവ്യു പറഞ്ഞ് സമൂഹമാധ്യമങ്ങളിൽ വൈറലായ സന്തോഷ് വർക്കിക്കു നേരെ തിയറ്ററിൽ കയ്യേറ്റ ശ്രമം. കൊച്ചി വനിത–വിനീത തിയറ്ററിലാണ് സംഭവം. ഇന്ന് റിലീസ് ചെയ്ത ‘വിത്തിൻ സെക്കൻഡ്സ്’ എന്ന സിനിമയുടെ റിവ്യുവുമായി ബന്ധപ്പെട്ട തർക്കത്തെത്തുടർന്നായിരുന്നു സംഘർഷം.
സിനിമ മുഴുവൻ കാണാതെ സന്തോഷ് മോശം അഭിപ്രായം പറഞ്ഞെന്നാരോപിച്ചായിരുന്നു തർക്കം. താൻ സിനിമ മുഴുവൻ കണ്ടോ എന്നു ചോദിച്ച് ഒരു കൂട്ടം ആളുകൾ സന്തോഷിനെ കൂട്ടം ചേർന്ന് കയ്യേറ്റം ചെയ്യുകയായിരുന്നു.
ഇന്ദ്രന്സിനെ കേന്ദ്ര കഥാപാത്രമാക്കി വിജേഷ് പി. വിജയന് സംവിധാനം ചെയ്ത ചിത്രമാണ് വിത്തിൻ സെക്കൻഡ്സ്.
സുധീര് കരമന,സിദ്ദിഖ്, അലന്സിയാര്, സന്തോഷ് കീഴാറ്റൂർ, തലൈവാസൽ വിജയ്, സുനിൽ സുഖദ, സെബിന് സാബു, ബാജിയോ ജോര്ജ്, സാന്റിനോ മോഹന്, ജെ.പി. മണക്കാട്, നാരായണൻകുട്ടി, ഡോക്ടർ സംഗീത് ധർമരാജ, തുടങ്ങിയവരാണ് മറ്റ് കഥാപാത്രങ്ങളെ അവതരിപ്പിക്കുന്നത്.
അനില് പനച്ചുരാൻ എഴുതിയ വരികള്ക്ക് രഞ്ജിന് രാജ് സംഗീതം പകരുന്നു. ഡോക്ടര് സംഗീത് ധര്മരാജന്, വിനയന് പി. വിജയന് എന്നിവരുടേതാണ് കഥയും തിരക്കഥയും സംഭാഷണവും.