നെടുമങ്ങാട് നഗരസഭാ ആരോഗ്യ വിഭാഗം നടത്തിയ പരിശോധനയിൽ ഒന്പത് സ്ഥാപനങ്ങള്ക്ക് നോട്ടീസ്
1429060
Thursday, June 13, 2024 6:38 AM IST
നെടുമങ്ങാട് : നെടുമങ്ങാട് നഗരസഭാ സെക്രട്ടറിയുടെ നേതൃത്വത്തില് ആരോഗ്യ വിഭാഗം നഗരത്തിലെ വിവിധ സ്ഥാപനങ്ങളില് പരിശോധന നടത്തി.
ക്രമക്കേടുകള് കണ്ടെത്തിയ ഒന്പത് സ്ഥാപനങ്ങള്ക്ക് നോട്ടീസ് നല്കി. വാളിക്കോട് പ്രവര്ത്തിക്കുന്ന നസീര് ഹോട്ടലിലെ മലിനജലം തൊട്ടടുത്തുള്ള ജലസ്രോതസില് ഒഴുക്കിവിടുന്നതായും പാചകം ചെയ്യുന്ന അടുപ്പില് പ്ലാസ്റ്റിക് കത്തിക്കുന്നതായും കണ്ടെത്തി.
വാളിക്കോട് പ്രവര്ത്തിക്കുന്ന സീനത്ത് ബേക്കറി, ഐഷാ ബേക്കേഴ്സ് ട്രെന്ഡ്സ്, റഹ്മത്ത് ഹോട്ടല്, പിജെജെ ഫ്രൂട്സ്, വിനായക ഹോട്ട് ചിപ്സ് എന്നീ സ്ഥാപനങ്ങളില് നിന്നും നിരോധിത പ്ലാസ്റ്റിക് കവറ്, പേപ്പര് കപ്പ് എന്നിവ പിടിച്ചെടുത്തു. വാളിക്കോട് പ്രവര്ത്തിക്കുന്ന റൈഫ് റസ്റ്റോറന്റില് നിന്നും പഴകിയ മാംസം പിടിച്ചെടുത്തു.
പിടിച്ചെടുത്ത 40-കിലോ പഴകിയ മാംസവും പഴക്കംചെന്ന എണ്ണയും നിരോധിച്ച പ്ലാസ്റ്റിക് ഉത്പ്പന്നങ്ങളും പിന്നീട് നശിപ്പിച്ചു.
കഴിഞ്ഞ ഒരുമാസമായി ആരോഗ്യവിഭാഗം നിരന്തര പരിശോധനകള് നടത്തി വരികയാണ്.
നിരവധി ഹോട്ടലുകള്ക്ക് നോട്ടീസ് നല്കുകയും നടപടികള് സ്വീകരിക്കുകയും ചെയ്തിട്ടും ഹോട്ടലുകളുടെ ക്രമക്കേടിന് പരിഹാരമാകുന്നില്ലെന്ന് ആക്ഷേപമുണ്ട്.
ഒരിക്കല് നോട്ടീസ് നല്കിയ ഹോട്ടലുകളില്പ്പോലും വീണ്ടും വീണ്ടും പഴയതുതന്നെ ആവര്ത്തിക്കപ്പെടുകയാണ്.