കോഴിക്കോട് : സഹായം നൽകിയും സംഗീതാർച്ചന നടത്തിയും കുതിരവട്ടം മാനസികാരോഗ്യ കേന്ദ്രത്തിൽ ഗാന്ധി ജയന്തി ആഘോഷം വേറിട്ടതായി. വാർമുകിൽ സോഷ്യോ കൾച്ചറൽ ഫോറവും ലയൺസ് ക്ലബ് ഓഫ് കാലിക്കറ്റ് മെട്രൊയും സംയുക്തമായി നടത്തിയ ഗാന്ധി സ്മൃതി ലയൺസ് ക്ലബ് 318 - ഇ - ഡിസ്ടിക്റ്റ് ഗവർണ്ണർ ഡോ.പി.സുധീർ ഉദ്ഘാടനം ചെയ്തു.
മാനസിക സംഘർഷം കുറയ്ക്കാൻ സംഗീതത്തേക്കാൾ വലിയ മരുന്നില്ലന്ന് ഡോ.പി.സുധീർ പറഞ്ഞു. പ്രയാസങ്ങൾ പങ്കുവെയ്ക്കാൻ ഇടം ഇല്ലാത്തതാണ് മാനസിക സംഘർഷം കൂട്ടാൻ കാരണം. മറ്റുള്ളവരെ സഹായിക്കുന്നതും മാനസിക സന്തോഷം ഉണ്ടാകുമെന്നും അദ്ദേഹം പറഞ്ഞു. വാർമുകിൽ ചെയർമാൻ എ.വി.റഷീദ് അലി അധ്യക്ഷത വഹിച്ചു. ഡോ.പി.സുധീറിൽ നിന്നും മാനസികാരോഗ്യ കേന്ദ്രത്തിലേക്കുള്ള പേഷ്യന്റ് എയ്ഡ്സ് സൂപ്രണ്ട് ഡോ.ആർ രാജേന്ദ്രൻ ഏറ്റുവാങ്ങി. അന്തേവാസികൾ നിർമിച്ച ഉത്പന്നങ്ങൾ സൂപ്രണ്ട് ഡോ.ആർ. രാജേന്ദ്രനിൽ നിന്നും ലയൺസ് റീജണൽ ചെയർപേഴ്സൺ വത്സല ഗോപിനാഥ് ഏറ്റുവാങ്ങി. കെ.ബാലകൃഷ്ണൻ , ഡോ. ബിപിൻ ജോർജ് അലക്സ് , കെ.പി. സുഭാഷ് ചന്ദ്ര ബോസ്, രേഖ അജിത്ത്, വി.എം. ശശികുമാർ എന്നിവർ പ്രസംഗിച്ചു. തുടർന്ന് വാർമുകിൽ ഗായക സംഘം, ഗാന്ധി സ്മൃതി ഭജൻ, പിന്നണി ഗായകൻ പി.കെ. സുനിൽ കുമാർ എന്നിവരുടെ സംഗീത വിരുന്നും ഉണ്ടായിരുന്നു.
മുക്കം: ഗാന്ധി ജയന്തി ദിനത്തിൽ ശുചീകരണത്തിന് നേതൃത്വം നൽകി ജനപ്രതിനിധികളും ആശാവർക്കർമാരും എൻഎസ്എസ് വോളണ്ടിയർമാരും. കൊടിയത്തൂർ പഞ്ചായത്ത് ജനപ്രതിനിധികളും പഞ്ചായത്തിലെ ആശ വർക്കർമാരും ചെറുവാടി ഗവ.ഹയർ സെക്കൻഡറി സ്കൂൾ എൻഎസ്എസ് വോളണ്ടിയർമാരുമാണ് ചെറുവാടി കമ്യൂണിറ്റി ഹെൽത്ത് സെന്റർ പരിസരം ശുചീകരിച്ചത്. പരിപാടി കൊടിയത്തൂർ പഞ്ചായത്ത് പ്രസിഡന്റ് ഷംലൂലത്ത് ഉദ്ഘാടനം ചെയ്തു. ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സൺ ആയിഷ ചേലപ്പുറത്ത് അധ്യക്ഷയായി. ജില്ല ശുചിത്വമിഷന്റെ സ്വച്ഛത ഹി സേവ പദ്ധതിയുടെ ഭാഗമായി വലിച്ചെറിയൽ മുക്ത പ്രതിജ്ഞയും ചൊല്ലി. ദിവ്യ ഷിബു, പഞ്ചായത്തംഗങ്ങളായ ഫസൽ കൊടിയത്തൂർ, മറിയം കുട്ടി ഹസൻ, കെ.ജി. സീനത്ത്, ഡോക്ടർമാരായ അഖിൽ, റുമാന, എൻഎസ്എസ് കോ- ഓഡിനേറ്റർ ജമാൽ, ആരോഗ്യ പ്രവർത്തകർ തുടങ്ങിയവർ ചടങ്ങിൻ സംബന്ധിച്ചു.
കോഴിക്കോട്: ഗാന്ധി ജയന്തി ദിനത്തിൽ കോഴിക്കോട് ജില്ലാ ബധിര അസോസിയേഷന്റെ ആഭിമുഖ്യത്തിൽ മിഠായി തെരുവ് ശുചീകരിച്ചു. എസ്.കെ. പൊറ്റക്കാട് പ്രതിമ വൃത്തിയാക്കുകയും ഇരിപ്പിടങ്ങൾ ശുചീകരിക്കുകയും ചെയ്തു. ഗാന്ധിസ്മൃതിയിൽ പുഷ്പാർച്ചന നടത്തി. പ്രസിഡന്റ് വി.എ. യൂസുഫ്, ജനറൽ സെക്രട്ടറി കെ. റഫീക്, ടി.എ. ഹസീന, വി. ഷിബി, പി. ഷബീർ, കെ.കെ. ഉണ്ണികൃഷ്ണൻ, ടി.പി. ബ്രിജേഷ്, റബിത, ബൈജു രാഹുൽ തുടങ്ങിയവർ നേതൃത്വം നൽകി.
തിരുവമ്പാടി: സൗപർണിക പബ്ലിക് ലൈബ്രറി ആർട്സ് ആൻഡ് സ്പോർട്സ് ക്ലബിന്റെ ആഭിമുഖ്യത്തിൽ ഗാന്ധിജയന്തി വാരാഘോഷത്തിന് തുടക്കമായി. പഞ്ചായത്ത് സ്ഥിരം സമിതി അധ്യക്ഷൻ രാമചന്ദ്രൻ കരിമ്പിൽ സേവന വാരാചരണം ഉദ്ഘാടനം ചെയ്തു. ഇലഞ്ഞിക്കൽ ജംഗ്ഷൻ മുതൽ ഇരുമ്പകം ജംഗ്ഷൻ വരെ റോഡിന് ഇരുവശങ്ങളും കാട് വെട്ടിതെളിച്ച് സൗപർണിക പ്രവർത്തകർ വൃത്തിയാക്കി. സൗപർണിക പാണ്ടിക്കോട്ടുമല റോഡ്, തമ്പലമണ്ണ ജംഗ്ഷൻ എന്നിവ നാളെയും മറ്റന്നാളുമായി വൃത്തിയാക്കും. കൂടാതെ ഗാന്ധി അനുസ്മരണം കുട്ടികൾക്കായി ക്വിസ് മത്സരങ്ങൾ എന്നിവ ഈയാഴ്ച ലൈബ്രറി ഹാളിൽ സംഘടിപ്പിക്കുമെന്നും ഭാരവാഹികൾ പറഞ്ഞു.
ക്ലബ് പ്രസിഡന്റ് കെ.സി. മാത്യു, സെക്രട്ടറി സാലസ് മാത്യു, സി.ബി. അനിൽ, എൻ.എ. സോമൻ, പി.കെ. സജിത്ത്, ഇ.കെ. നരേന്ദ്രൻ എന്നിവർ സേവന പ്രവർത്തനങ്ങൾക്ക് നേതൃത്വം നൽകി. ഞായറാഴ്ച വൈകുന്നേരം സാംസ്കാരിക സമ്മേളനത്തോടെ വാരാഘോഷത്തിന് സമാപനം കുറിക്കും. വിവിധ മത്സര വിജയികൾക്കുള്ള സമ്മാനവിതരണവും അന്ന് നടക്കും.
താമരശേരി: കട്ടിപ്പാറ അംബേദ്ക്കര് സാംസ്കാരിക നിലയം, വായനശാല എന്നിവയുടെ ആഭിമുഖ്യത്തില് നേര്വഴി എന്ന പേരില് ലഹരി വിരുദ്ധ ബോധവത്കരണ ക്ലാസ് നടത്തി. താമരശേരി സബ് ഇന്സ്പെക്ടര് പുരുഷോത്തമന് ബോധവത്കരണ ക്ലാസ് ഉദ്ഘാടനം ചെയ്തു. സാംസ്കാരിക നിലയം പ്രസിഡന്റ് എന്.പി. കുഞ്ഞാലിക്കുട്ടി അധ്യക്ഷത വഹിച്ചു. വാര്ഡ് അംഗം വിഷ്ണു ചുണ്ടന്കുഴി, റിട്ട. വിജിലന്സ് എസ്ഐ അമൃത് സാഗര്, സംയുക്ത കര്ഷക കൂട്ടായ്മ ചെയര്മാന് കെ.വി. സെബാസ്റ്റ്യന്, സാംസ്കാരിക നിലയം വായനശാല സെക്രട്ടറി കെ.പി. രാജന് എന്നിവര് പ്രസംഗിച്ചു.
താമരശേരി: താമരശേരി മണ്ഡലം കോണ്ഗ്രസ് കമ്മിറ്റിയുടെ ആഭിമുഖ്യത്തില് ഗാന്ധി ജയന്തി ദിനത്തില് പുഷ്പാര്ച്ചനയും അനുസ്മരണവും നടത്തി. ബ്ലോക്ക് വൈസ് പ്രസിഡന്റ് പി. ഗിരീഷ് കുമാര് ഉദ്ഘാടനം ചെയ്തു. മണ്ഡലം പ്രസിഡന്റ് നവാസ് ഈര്പ്പോണ അധ്യക്ഷത വഹിച്ചു. സി. മുഹ്സിന്, കെ. സരസ്വതി, വേലായുധന് പള്ളിപ്പുറം, സണ്ണി, എസ്. ബാബു ആനന്ദ്, വേലായുധന് പള്ളിപ്പുറം, ബാലകൃഷ്ണന്, വി.കെ.എ. കബീര്, വി.സി. ആലിഹാജി എന്നിവര് പ്രസംഗിച്ചു.
കോടഞ്ചേരി: ഗാന്ധിജയന്തി ദിനത്തിന്റെ ഭാഗമായി കോടഞ്ചേരി പഞ്ചായത്തിൽ പൊതു സ്ഥാപനങ്ങളുടെ പരിസരം ശുചീകരിച്ചു. പഞ്ചായത്ത് പരിസരം, ബസ്റ്റാൻഡ്, ബസ് കാത്തിരിപ്പ് കേന്ദ്രം, അങ്കണവാടികൾ, സ്കൂളുകൾ, ലൈബ്രറി, റോഡ് തുടങ്ങിയവയുടെ പരിസരമെല്ലാം പഞ്ചായത്ത് അംഗങ്ങളുടെ നേതൃത്വത്തിൽ മഹാത്മാ ഗാന്ധി ദേശിയ ഗ്രാമീണ തൊഴിലുറപ്പ് തൊഴിലാളികൾ വൃത്തിയാക്കി. എല്ലാ വാർഡുകളിലെയും ശുചീകരണ പ്രവൃത്തി അംഗങ്ങൾ ഉറപ്പുവരുത്തി. കണ്ണോത്ത് പബ്ലിക്ക് ലൈബ്രറിയുമായി സഹകരിച്ചാണ് ശുചീകരണ പരിപാടി സംഘടിപ്പിച്ചത്.
പഞ്ചായത്ത് പ്രസിഡന്റ് അലക്സ് തോമസ് ചെമ്പകശേരി ഗാന്ധി ജയന്തി ദിന സന്ദേശം നൽകി ശുചീകരണ പരിപാടി ഉദ്ഘാടനം ചെയ്തു. പഞ്ചായത്ത് വൈസ് പ്രസിഡന്റ് ലിസി ചാക്കോ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ റിയാന സുബൈർ, പഞ്ചായത്ത് അംഗങ്ങളായ ചിന്ന അശോകൻ, വാസുദേവൻ ഞാറ്റുകാലായിൽ, ചാൾസ് തയ്യിൽ, വനജ വിജയൻ, സൂസൻ, ചിന്നമ്മ വായിക്കാട്ട്, ഷാജി മുട്ടത്ത് തുടങ്ങിയവർ പങ്കെടുത്തു.
കോഴിക്കോട്: ഗാന്ധിജയന്തിയോടനുബന്ധിച്ച് ജില്ലാ ഇൻഫർമേഷൻ ഓഫീസിന്റെ ആഭിമുഖ്യത്തിൽ മഹാത്മാ ഗാന്ധിയുടെ ചിതാഭസ്മം സൂക്ഷിച്ച ഗാന്ധി സ്മൃതിമണ്ഡപത്തിൽ പുഷ്പാർച്ചന നടത്തി. നായനാർ ബാലികാ സദനത്തിൽ നടന്ന ചടങ്ങിൽ അസിസ്റ്റന്റ് കളക്ടർ സമീർകിഷൻ സ്മൃതി മണ്ഡപത്തിൽ പൂക്കൾ അർപ്പിച്ചു. ജില്ലാ ഇൻഫർമേഷൻ ഓഫീസർ കെ. ദീപ, നായനാര് ബാലികാ സദനം സൊസൈറ്റി സെക്രട്ടറി പ്രൊഫ. സി.കെ. ഹരീന്ദ്രനാഥ്, നായനാർ സദനം പ്രിൻസിപ്പൽ പി. തങ്കമണി, എ. അഭിലാഷ് ശങ്കർ തുടങ്ങിയവർ പങ്കെടുത്തു.
കോഴിക്കോട്: ഗാന്ധിജയന്തിയോട് അനുബന്ധിച്ച് ചാപ്പൻതോട്ടം യുവജന സംഘത്തിന്റെ നേതൃത്വത്തിൽ ചാത്തൻതോട്ടം പാലം മുതൽ ചാത്തൻതോട്ടം അങ്ങാടി വരെയുള്ള റോഡിന്റെ ഇരുവശങ്ങളിലുമുള്ള കാട് വെട്ടിതെളിച്ച് വൃത്തിയാക്കി. റോഡിന് ഇരുവശങ്ങളിലും കാടുവളർന്ന് കാൽനടയാത്രക്കാർക്കും വാഹനങ്ങൾക്കും ഒരുപോലെ ബുദ്ധിമുട്ടായിരുന്നു. ഈ ബുദ്ധിമുട്ട് മനസിലാക്കിയ നാട്ടിലെ യുവജനങ്ങൾ മുന്നിട്ടിറങ്ങി കാട് വെട്ടി വൃത്തിയാക്കുകയായിരുന്നു.
കോഴിക്കോട് : ജില്ലാ കോണ്ഗ്രസ് കമ്മിറ്റിയുടെ ആഭിമുഖ്യത്തിൽ മഹാത്മാഗാന്ധിയുടെ ജന്മദിനം ആചരിച്ചു. കെപിസിസി ജനറൽ സെക്രട്ടറി അഡ്വ.പി.എം. നിയാസ് ഉദ്ഘാടനം ചെയ്ത പരിപാടിയിൽ ഡിസിസി പ്രസിഡന്റ് അഡ്വ.കെ. പ്രവീണ്കുമാർ അധ്യക്ഷം വഹിച്ചു.
മുൻ ഡിസിസി പ്രസിഡന്റ് കെ.സി. അബു മുഖ്യ പ്രഭാഷണം നടത്തി. കെ.പി. ബാബു, കെ. രാമചന്ദ്രൻ മാസ്റ്റർ, പി. മൊയ്തീൻ മാസ്റ്റർ, ഗൗരി പുതിയോത്ത്, ഡോ.ഹരിപ്രിയ, രാജേഷ് കീഴരിയൂർ, എൻ. ഷെറിൽബാബു, പി.വി. ബിനീഷ്കുമാർ എന്നിവർ പ്രസംഗിച്ചു.