കൽപ്പറ്റ: ജില്ലയുടെ സുസ്ഥിര ഗ്രാമവികസനത്തിന് വേറിട്ട ദിശാബോധം നൽകാൻ 60.10 കോടി രൂപയുടെ കരടുപദ്ധതികൾ അവതരിപ്പിച്ച് ജില്ലാ പഞ്ചായത്ത് വികസന സെമിനാർ. ജില്ല അഭിമുഖീകരിക്കുന്ന രൂക്ഷമായ വന്യമൃഗ ശല്യവും അന്യനിന്ന് പോകുന്ന തനത് കാർഷിക മേഖലകളുടെ വീണ്ടെടുപ്പും ആരോഗ്യ വിദ്യാഭ്യാസ മേഖലയുടെ സമഗ്ര വികസനവും ലക്ഷ്യമിട്ടുളള 218 പദ്ധതികളാണ് സെമിനാറിൽ അവതരിപ്പിച്ചത്.
സ്ത്രീകൾ, കുട്ടികൾ, ഭിന്നശേഷിക്കാർ, ട്രാൻസ്ജെൻഡേഴ്സ് എന്നിവരുടെ ക്ഷേമത്തിനുളള വേറിട്ട പദ്ധതികളും പട്ടികയിൽ ഇടംപിടിച്ചു.
ജില്ലാ ആസൂത്രണ ഭവനിൽ നടന്ന സെമിനാറിൽ ജില്ലാ പഞ്ചായത്ത് പ്രസിഡന്റ് സംഷാദ് മരക്കാർ ഉദ്ഘാടനം ചെയ്തു. 2023 - 2024 വാർഷിക പദ്ധതികളുടെ കരട് രേഖ മാനന്തവാടി ബ്ലോക്ക് പഞ്ചായത്ത് പ്രസിഡന്റ് ജസ്റ്റിൻ ബേബിയ്ക്ക് നൽകി ജില്ലാ പഞ്ചായത്ത് പ്രസിഡന്റ് പ്രകാശനം ചെയ്തു.
വികസനകാര്യ സ്ഥിരംസമിതി അധ്യക്ഷ ഉഷാതന്പി കരടുരേഖ അവതരിപ്പിച്ചു. ആസൂത്രണ സമിതി ഉപാധ്യക്ഷൻ മംഗലശേരി നാരായണൻ പദ്ധതി വിശദീകരണം നടത്തി. വികസന ഫണ്ട് വിഭാഗത്തിൽ 32.83 കോടി രൂപ, മെയ്ന്റനൻസ് ഗ്രാൻഡ് വിഭാഗത്തിൽ 12.88 കോടി രൂപ, മറ്റു വിഭാഗത്തിൽ 14.39 കോടി രൂപയും ഉൾപ്പെടെ ആകെ 60.10 കോടി രൂപയുടെ കരട് പദ്ധതികളാണ് സെമിനാറിൽ അവതരിപ്പിച്ചത്.
നെൻമണി നെൽകൃഷി സബ്സിഡി, ക്ഷീര സാഗരം, പെണ്മ സ്ത്രീകൾക്ക് സംരംഭത്വ സഹായം നൽകൽ, സമഗ്ര വിദ്യാഭ്യാസ പരിപാലന പദ്ധതി, ജലാശയങ്ങലിൽ മത്സ്യ വിത്ത് നിക്ഷേപിക്കൽ, വിദ്യാഭ്യാസ സ്ഥാപനങ്ങളുടെ നവീകരണം, റോഡ് നവീകരണം, കുടിവെള്ള പദ്ധതികൾ, പട്ടികജാതി പട്ടികവർഗ ക്ഷേമം, കുട്ടികളുടെയും ഭിന്നശേഷിക്കാരുടെയും ക്ഷേമം, വയോജനങ്ങൾ, പാലിയേറ്റീവ് കെയർ, ഭവന നിർമ്മാണം, മൃഗ സംരംക്ഷണം, ദാരിദ്യ്രലഘൂകരണം, ശുചിത്വ മാലിന്യ സംസ്ക്കരണം തുടങ്ങീ ജില്ലയുടെ സമഗ്ര മുന്നേറ്റത്തിന് സഹായകരമാകുന്ന പദ്ധതികളാണ് 2023 - 2024 വർഷത്തിൽ ജില്ലാ പഞ്ചായത്ത് ഉൗന്നൽ നൽകിയത്. പദ്ധതികളിൽ ഗ്രൂപ്പുകളായി തിരിഞ്ഞുളള ചർച്ചയും വിലയിരുത്തലും നടന്നു.
യോഗത്തിൽ ജില്ലാ പഞ്ചായത്ത് അംഗങ്ങളായ ബീന ജോസ്, ജുനൈദ് കൈപ്പാണി, സുരേഷ് താളൂർ, ബ്ലോക്ക് പഞ്ചായത്ത് അസോസിയേഷൻ പ്രസിഡന്റ് ജസ്റ്റിൻ ബേബി, ഗ്രാമപഞ്ചായത്ത് അസോസിയേഷൻ സെക്രട്ടറി എ.കെ. റഫീക്, ജില്ലാ പഞ്ചായത്ത് സെക്രട്ടറി പി.സി. മജീദ് തുടങ്ങിയവർ പ്രസംഗിച്ചു. ജില്ലാ പഞ്ചായത്ത് അംഗങ്ങൾ, തദ്ദേശ സ്ഥാപന അധ്യക്ഷൻമാർ, നിർവഹണ ഉദ്യോഗസ്ഥർ തുടങ്ങിയവർ പങ്കെടുത്തു.