പുന്നാട്: ഇരിട്ടി നഗരസഭയുടെ 2023-24 വാർഷിക പദ്ധതിയിൽ ഉൾപ്പെടുത്തി ശാരീരിക അവശതകൾ അനുഭവിക്കുന്നവർക്കുള്ള ഉപകരണങ്ങൾ വിതരണം ചെയ്യുന്നതിന് മുന്നോടിയായി ഗുണഭോക്താക്കളെ കണ്ടെത്തുന്നതിനു വേണ്ടിയുള്ള മെഡിക്കൽ ക്യാമ്പ് സംഘടിപ്പിച്ചു.
നഗരസഭാ ഓഫീസ് പരിസരത്ത് നടന്ന ക്യാമ്പ് നഗരസഭാധ്യക്ഷ കെ. ശ്രീലത ഉദ്ഘാടനം ചെയ്തു. വൈസ് ചെയർമാൻ പി.പി. ഉസ്മാൻ അധ്യക്ഷത വഹിച്ചു. ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ എ.കെ. രവീന്ദ്രൻ, പൊതുമരാമത്ത് സ്റ്റാൻഡിംഗ് കമ്മിറ്റി ചെയർമാൻ കെ. സുരേഷ്, ഡോ. ദിനേശൻ, ഡോ. നിറ്റു ജോസഫ്, ഐസിഡിഎസ് സൂപ്പർവൈസർ ജിസ്മി അഗസ്റ്റിൻ എന്നിവർ പ്രസംഗിച്ചു. നഗരസഭ ഇലക്ട്രോണിക് വീൽചെയർ, സാധാരണ വീൽ ചെയർ, വാക്കർ, ശ്രവണ സഹായി എന്നിവ വിതരണം ചെയ്തു.
കണ്ണവം: കോ- ഓപ്പറേറ്റീവ് ഇൻസ്റ്റിറ്റ്യൂട്ട് ഓഫ് ഹെൽത്ത് സയൻസസ് എൻഎസ്എസ് യൂണിറ്റും ഡിപ്പാർട്ട്മെന്റ് ഓഫ് മെഡിക്കൽ ലബോറട്ടറി ടെക്നോളജിയും സംയുക്തമായി കണ്ണവം ട്രൈബൽ യുപി സ്കൂളിൽ മെഡിക്കൽ ക്യാമ്പ് നടത്തി. പാട്യം പഞ്ചായത്ത് പ്രസിഡന്റ് എൻ.വി. ഷിനിജ ക്യാമ്പ് ഉദ്ഘാടനം ചെയ്തു. കോ- ഓപ്പറേറ്റീവ് ഇൻസ്റ്റിറ്റ്യൂട്ട് ഓഫ് ഹെൽത്ത് സയൻസ് എൻഎസ്എസ് പ്രോഗ്രാം ഓഫീസർ സി.പി. ബിനീഷ് അധ്യക്ഷത വഹിച്ചു. കണ്ണവം ട്രൈബൽ യുപി സ്കൂൾ മുഖ്യാധ്യാപകൻ രാജേഷ്, പി. ശരത് കുമാർ, മിനു മോഹൻ, ഡോ. അപർണ, കെ. ബിന്ദിപ് എന്നിവർ പ്രസംഗിച്ചു. കോ-ഓപ്പറേറ്റീവ് ഇൻസ്റ്റിറ്റ്യൂട്ട് ഓഫ് ഹെൽത്ത് സയൻസിലെ എൻഎസ്എസ് വോളണ്ടിയർമാരായ റിയ ഫാത്തിമ, നിദ ഫാത്തിമ എന്നിവർ പോഷകാഹാരത്തെയും ശുചിത്വത്തെയും കുറിച്ച് ബോധവത്കരണ ക്ലാസെടുത്തു. 100 വിദ്യാർഥികൾ ക്യാമ്പിൽ പങ്കെടുത്തു. ക്യാമ്പിൽ ബിഎംഐ, ഹീമോഗ്ലോബിൻ, ബ്ലഡ് ഗ്രൂപ്പിംഗ് പരിശോധനയും ഡോക്ടറുടെ സേവനവും ലഭ്യമാക്കിയിരുന്നു.