കാസര്ഗോഡ്: രാജ്യത്തിന്റെ പരമാധികാര സ്വത്വവും പൗരന്മാരുടെ അവകാശങ്ങളും സംസ്ഥാനങ്ങളുടെ അധികാരങ്ങളും ഭരണഘടനയുടെ ഉറപ്പുകളാണെന്നും ഈ ഭരണഘടനക്ക് ഏല്ക്കുന്ന ചെറിയ പരിക്കുപോലും രാജ്യത്തിന്റെ ഹൃദയത്തിനേല്ക്കുന്ന അപരിഹാര്യമായ ക്ഷതമായിരിക്കുമെന്നും മന്ത്രി അഹമ്മദ് ദേവര് കോവില് പറഞ്ഞു. കാസർഗോഡ് വിദ്യാനഗര് മുന്സിപ്പല് സ്റ്റേഡിയത്തില് റിപ്പബ്ലിക് ദിന പരേഡില് അഭിവാദ്യം സ്വീകരിച്ച ശേഷം സന്ദേശം നല്കുകയായിരുന്നു മന്ത്രി.
ഭരണഘടന അതിരൂക്ഷമായി ആക്രമിക്കപ്പെടുകയാണ്. അതു മാറ്റിയെഴുതണം എന്ന മുറവിളികള് വരെ ഉയര്ന്നുവരുന്നുണ്ട്. ആരാണോ സംരക്ഷിക്കാന് ബാധ്യസ്ഥരായവര് അവരില് നിന്നുതന്നെ ധ്വംസനവാസന പ്രകടമാകുമ്പോള് ഈ രാജ്യത്തെ ഏതൊരു പൗരന്റെയും അനിവാര്യമായ കര്ത്തവ്യമായി ഭരണഘടനാ സംരക്ഷണം മാറുകയാണെന്നും അദ്ദേഹം കൂട്ടിച്ചേര്ത്തു.
പോലീസ് വിഭാഗത്തില് കാസര്ഗോഡ് ജില്ലാ ആസ്ഥാനത്തെ പ്ലാറ്റൂണിനെ മികച്ച പ്ലാറ്റൂണായി തെരഞ്ഞെടുത്തു. കാസര്ഗോഡ് ഗവ. കോളജ് സീനിയര് ഡിവിഷന് എന്സിസി, പെരിയ ജവഹര് നവോദയ വിദ്യാലയ ബോയ്സ് ജൂണിയര് ഡിവിഷന് എന്സിസി, നീലേശ്വരം രാജാസ് സ്കൂള് ജൂണിയര് ഡിവിഷന് എയര് ആന്ഡ് നേവല്, ദുര്ഗ ഹയര് സെക്കന്ഡറി സ്കൂള് സ്റ്റുഡന്റ് പോലീസ് കേഡറ്റ്, വിദ്യാനഗര് ചിന്മയ വിദ്യാലയം സ്കൗട്ട് ആന്ഡ് ഗൈഡ് എന്നിവരും മികച്ച പ്ലാറ്റൂണുകള്ക്കുള്ള പുരസ്കാരം നേടി.
രാജ്മോഹന് ഉണ്ണിത്താന് എംപി, എംഎല്എമാരായ എ.കെ.എം.അഷ്റഫ്, എന്.എ. നെല്ലിക്കുന്ന്, സി.എച്ച്. കുഞ്ഞമ്പു, ഇ. ചന്ദ്രശേഖരന്, എം. രാജഗോപാലന്, ജില്ലാ പഞ്ചായത്ത് വൈസ് പ്രസിഡന്റ് ഷാനവാസ് പാദൂര് എന്നിവര് പങ്കെടുത്തു. ജില്ലാ കളക്ടര് സ്വാഗത് ഭണ്ഡാരി, ജില്ലാ പോലീസ് മേധാവി ഡോ.വൈഭവ് സക്സേന എന്നിവര് സല്യൂട്ട് സ്വീകരിച്ചു.
സ്വാതന്ത്ര്യസമരസേനാനികളായ കെ.കുഞ്ഞിക്കണ്ണന് നമ്പ്യാര്, ഗോപാലന് നായര് എന്നിവര് മുഖ്യാതിഥികളായി. ചെങ്കള പഞ്ചായത്ത് പ്രസിഡന്റ് ഖാദര് ബദരിയ, കാസര്ഗോഡ് ബ്ലോക്ക് പഞ്ചായത്ത് പ്രസിഡന്റ് സി.എ. സൈമ, എഎസ്പി പി.കെ.രാജു, എഎസ്പി മുഹമ്മദ് നദിമുദ്ദീന്, ആര്ഡിഒ അതുല് സ്വാമിനാഥ്, ഡെപ്യൂട്ടി കളക്ടര് എസ്.ശശിധരന് പിള്ള, കെ.അജേഷ് എന്നിവര് സംബന്ധിച്ചു.