പത്തനംതിട്ട: ജനജീവിതം ദുരിത പൂർണമാക്കുന്ന അന്യായമായ നികുതി വർധന പിൻവലിക്കണമെന്ന് കേരള ഐടി ആൻഡ് പ്രഫഷനൽ കോൺഗ്രസ് സംസ്ഥാന പ്രസിഡന്റ് അപു ജോൺ ജോസഫ്.
കേന്ദ്ര, സംസ്ഥാന സർക്കാരുകളുടെ ജനദ്രോഹ ബജറ്റിനെതിരേ കേരള കോൺഗ്രസ് ജില്ലാ കമ്മിറ്റിയുടെ ആഭിമുഖ്യത്തിൽ പത്തനംതിട്ട കളക്ടറേറ്റ് പടിക്കൽ നടത്തിയ സായാഹ്ന ധർണ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.
പെട്രോൾ,ഡീസൽ സെസ് വർധിപ്പിച്ച് വിലക്കയറ്റം ക്ഷണിച്ചു വരുത്തുകയാണ് സർക്കാർ ചെയ്യുന്നത്. ഭൂമിയുടെ ന്യായവിലയും കെട്ടിടനികുതിയും വൈദുതി ചാർജും വർധിപ്പിച്ചത് ഏറെ ജനദ്രോഹമാണ്. ഏലം, കുരുമുളക് തുടങ്ങിയ നാണ്യവിളകളുടെ വിലത്തകർച്ചയും പരിഗണിക്കപ്പെടുന്നില്ലെന്ന് അപു കുറ്റപ്പെടുത്തി.
ജില്ലാ പ്രസിഡന്റ് വിക്ടർ ടി. തോമസ് അധ്യക്ഷത വഹിച്ചു. സംസ്ഥാന വൈസ് ചെയർമാന്മാരായ ജോസഫ് എം. പുതുശേരി, പ്രഫ.ഡി. കെ. ജോൺ, ജോൺ കെ. മാത്യൂസ്,സംസ്ഥാന ട്രഷറർ ഏബ്രഹാം കലമണ്ണിൽ , സംസ്ഥാനഅഡ്വൈസർ വർഗീസ് മാമ്മൻ, ഉന്നതാധികാരസമിതിഅംഗം കുഞ്ഞു കോശി പോൾ, സംസ്ഥാന ജനറ സെക്രട്ടറിമാരായ എൻ. ബാബു വർഗീസ്, ഡോ. ജോർജ് വർഗീസ് കൊപ്പാറ, കെ. ആർ. രവി, നിയോജകമണ്ഡലം പ്രസിഡന്റുമാരായ ദീപു ഉമ്മൻ, കെ.എസ്. ജോസ്, രാജു പുളിമ്പള്ളിൽ, വൈ. രാജൻ, യൂത്ത് ഫ്രണ്ട് ജില്ലാ പ്രസിഡന്റ് ബിനു കുരുവിള തുടങ്ങിയവർ പ്രസംഗിച്ചു.
പ്രസംഗമത്സരം
തിരുവല്ല: വൈഎംസിഎയുടെ ആഭിമുഖ്യത്തിൽ കേരളത്തിലെ കോളജ് വിദ്യാർഥികൾക്കു വേണ്ടി നടത്തുന്ന പി. എസ്. ജോർജ് മെമ്മോറിയൽ പ്രസംഗ മത്സരം 11നു വൈഎംസിഎ ഹാളിൽ നടക്കും. ഇംഗ്ലീഷ്, മലയാളം പ്രസംഗം, ക്വിസ്, ലളിതഗാന മത്സരങ്ങളും ക്രമീകരിച്ചിട്ടുണ്ട്. ഒരു കോളജിൽനിന്ന് രണ്ട് കുട്ടികൾക്ക് ഓരോ വിഭാഗത്തിലും പങ്കെടുക്കാം. വിജയികൾക്ക് കാഷ് അവാർഡുകളും, ട്രോഫികളും വിതരണം ചെയ്യും. ഫോൺ : 9447456027.