പുഷ്പഗിരിയിൽ ഓട്ടിസം കുട്ടികൾക്ക് സെൻസറി പാർക്ക് തുറന്നു
1459891
Wednesday, October 9, 2024 6:12 AM IST
തിരുവല്ല: പുഷ്പഗിരി പ്രതീക്ഷ ചൈൽഡ് ഡെവലപ്മെന്റ് സെന്ററിൽ കുട്ടികൾക്കായി ഓസം സെൻസറി പാർക്ക് തിരുവല്ല ഡിവൈഎസ്പി എസ്. അഷാദ് ഉദ്ഘാടനം ചെയ്തു.
അമേരിക്കയിലെ ഹൈസ്കൂൾ വിദ്യാർഥി നെടുംകുന്നം സ്വദേശി ജയ്ഡൻ ജോഫി തന്റെ സ്കൗട്ട് പ്രോജക്ടിന്റെ ഭാഗമായി ഇത് ഏറ്റെടുക്കുകയും തിരുവല്ലയിൽ വന്ന് താമസിച്ച് പാർക്കിന്റെ നിർമാണം നടത്തുകയുമായിരുന്നു.
ഓട്ടിസം ബാധിതരായ കുട്ടികളുടെ സംവേദനശേഷിയും കാര്യക്ഷമതയും വർധിപ്പിക്കുന്നതിനായി പ്രകൃതിയോടിണങ്ങി കളിക്കുവാനുള്ള പ്രത്യേക സജ്ജീകരണങ്ങളാണ് ഓസം പാർക്കിലുള്ളത്. ആനയുടെ വായിൽനിന്ന് ഊർന്നിറങ്ങുന്ന സ്ലൈഡും കയറിയിരിക്കാവുന്ന തവളയും വെള്ളച്ചാട്ടവും പാർക്കിന്റെ സവിശേഷതകളാണന്ന് രൂപകല്പന നടത്തിയ പ്രതീക്ഷ സിഡിസി മേധാവി ഡോ. മഞ്ജു ജോർജ് ഇലഞ്ഞിക്കൽ പറഞ്ഞു.
തിരുവല്ല അതിരൂപത വികാരി ജനറാൾ ഫാ. ഐസക് പറപ്പള്ളിൽ, പുഷ്പഗിരി ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് സിഇഒ ഫാ. ബിജു വർഗീസ് പയ്യമ്പള്ളിൽ, പുഷ്പഗിരി ആശുപത്രി മെഡിക്കൽ ഡയറക്ടർ ഡോ. ഏബ്രഹാം വർഗീസ്, പുഷ്പഗിരി മെഡിക്കൽ കോളജ് പ്രിൻസിപ്പൽ ഡോ. റീന തോമസ്, തിരുവല്ല നഗരസഭ വൈസ് ചെയർമാൻ ജിജി വട്ടശേരിൽ, പ്രതീക്ഷ സിഡിസി സ്ഥാപക ഡയറക്ടർ ഫാ. മാത്യു പുനക്കുളം തുടങ്ങിയവർ പ്രസംഗിച്ചു. ചടങ്ങിൽ ജെയ്ഡൻ ജോഫിയെ ആദരിച്ചു.