ചേര്‍ത്തല: കോണ്‍ഗ്രസ് വയലാർ ബ്ലോക്ക് കമ്മറ്റിയുടെ ആഭിമുഖ്യത്തില്‍ ഗാന്ധിജയന്തിദിനത്തില്‍ മധുരവിതരണവും ലഹരി വിരുദ്ധ പ്രതിജ്ഞയും നടത്തി. നാഗംകുളങ്ങര കോൺഗ്രസ് ഓഫീസിനു മുന്നിൽ നടന്ന പുഷ്പാർച്ചനയും അനുസ്മരണവും പ്രസിഡന്റ് അഡ്വ.വി.എൻ. അജയൻ ഉദ്ഘാടനം ചെയ്തു. ബ്ലോക്ക് സെക്രട്ടറി എ.പി. ലാലൻ അധ്യക്ഷത വഹിച്ചു.
ചേര്‍ത്തല: എന്‍എസ്എസ് താലൂക്ക് യൂണിയന്‍റെ നേതൃത്വത്തില്‍ ഗാന്ധിജയന്തിദിനാചരണത്തോടനുബന്ധിച്ച് ലഹരി വിരുദ്ധ സന്ദേശറാലി നടത്തി. ആലപ്പുഴ എക്‌സൈസ് അസിസ്റ്റന്റ് കമ്മീഷണര്‍ എസ്. സജീവ് ഫ്‌ളാഗ് ഓഫ് ചെയ്തു. യൂണിയന്‍ പ്രസിഡന്റ് പ്രഫ. ഇലഞ്ഞിയില്‍ രാധാകൃഷ്ണന്‍ ലഹരി വിരുദ്ധ പ്രതിജ്ഞ ചൊല്ലിക്കൊടുത്തു. സെക്രട്ടറി ബി.ഗോപാലകൃഷ്ണന്‍ നായര്‍ സ്വാഗതവും വൈസ് പ്രസിഡന്റ് എസ്.മുരളീകൃഷ്ണന്‍ നന്ദിയും പറഞ്ഞു.
ചേര്‍ത്തല: സംസ്ക്കാരയുടെ ആഭിമുഖ്യത്തിൽ ഗാന്ധിജയന്തി അഘോഷവും ലഹരി വിരുദ്ധ പ്രതിജ്ഞയും നടത്തി. അഴീക്കോടൻ സ്മാരക ഹാളിൽ നടന്ന സമ്മേളനം ജോസഫ് മാരാരിക്കുളം ഉദ്ഘാനം ചെയ്തു. പ്രസിഡന്റ് ഗീത തുറവൂർ അധ്യക്ഷത വഹിച്ചു. വെട്ടയ്ക്കൽ മജീദ്, ബേബി തോമസ്, ലീലരാമചന്ദ്രൻ, പ്രസന്നൻ അന്ധകാരനഴി, പ്രദീപ് കൊട്ടാരം തുടങ്ങിയവർ പ്രസംഗിച്ചു.
ചേര്‍ത്തല: തിരുനല്ലൂര്‍ ഗവ. സ്കൂളില്‍ ഗാന്ധിജയന്തി ദിനാചരണത്തോടനുബന്ധിച്ച് ശുചീകരണ വാരാഘോഷത്തിന് തുടക്കമായി. എസ്എംസി ചെയർമാൻ കെ.എം ഡാനൂബ് ഉദ്ഘാടനം ചെയ്തു. പ്രഥമാധ്യാപിക വിദ്യാകുമാരി ടീച്ചറും അധ്യാപകരും എസ്എംസി അംഗങ്ങളും ചേർന്ന് സ്കൂളും പരിസരവും ശുചിയാക്കി.
എടത്വ: ഗാന്ധിജയന്തി ദിനത്തില്‍ കൈതമുക്ക് കൂട്ടായ്മയുടെ നേത്യുത്വത്തില്‍ ശുചീകരണ പ്രവര്‍ത്തനം നടത്തി. കൈതമുക്ക് ജംഗ്ഷന്‍ മുതല്‍ അട്ടിയില്‍ പടി വരെയുള്ള റോഡിന്‍റെ ഇരുവശങ്ങളിലേയും മരച്ചില്ലകള്‍ വെട്ടിമാറ്റിയും പുല്ലും മാലിന്യങ്ങളും നീക്കം ചെയ്തുമാണ് ശുചീകരണ പ്രവര്‍ത്തനം നടത്തിയത്.
ജോസഫ് ആന്‍റണി ഒറ്റാറയ്ക്കല്‍ കാടാത്ത്, വിജയന്‍ കോയിപ്പള്ളി, അഭിലാഷ് കൂട്ടക്കര, ജയ്‌സണ്‍ കൊച്ചുപറമ്പില്‍, സോണി വെട്ടിയില്‍, ബിജു മനോഹരന്‍ എന്നിവര്‍ നേത്യത്വം നല്‍കി.
മാവേലിക്കര: അക്കോക്ക് മാവേലിക്കര മണ്ഡലം കമ്മിറ്റിയുടെ ആഭിമുഖ്യത്തിൽ ഗാന്ധി ജയന്തി ദിനാചരണം നടന്നു . സ്വാതന്ത്ര്യ സമര സേനാനി ഗംഗാധരപണിക്കർ ഉദ്ഘാടനം ചെയ്തു. ഗോപൻ ഗോപിനാഥ് അധ്യക്ഷത വഹിച്ചു. അക്കോക്ക് സംസ്ഥാന പ്രസിഡന്റ് അഡ്വ.സുരേഷ് കുറത്തികാട് മുഖ്യപ്രഭാഷണം നടത്തി.
പവർ ലിഫ്റ്റിംഗിൽ രാജ്യാന്തര മെഡലുകൾ സ്വന്തമാക്കിയ അമേയയെ ചടങ്ങിൽ ആദരിച്ചു. മണ്ഡലം സെക്രട്ടറി രതീഷ് പെർഫക്ട് സ്വാഗതവും ട്രഷറർ ചിത്രാമ്മാൾ കൃതജ്ഞതയും പറഞ്ഞു.
ചേര്‍ത്തല: ചേര്‍ത്തല നഗരസഭയുടെ നേതൃത്വത്തിൽ ഗാന്ധിജയന്തി ദിനാചരണത്തിന്‍റെ ഭാഗമായി സ്വാതന്ത്ര്യ സമര സേനാനികളുടെ പ്രതിമയിൽ പുഷ്പാർച്ചന നടത്തി. തുടർന്ന് ദേവി ക്ഷേത്ര ഷോപ്പിംഗ് കോംപ്ലക്സ് പരിസരത്ത് നടത്തിയ ശുചീകരണ പ്രവർത്തികളുടെ ഉദ്ഘാടനം ചെയർപേഴ്സൺ ഷേർളി ഭാർഗവൻ നിർവഹിച്ചു. വൈസ് ചെയർമാൻ ടി.എസ്. അജയകുമാർ, സ്റ്റാൻഡിംഗ് കമ്മിറ്റി ചെയർമാന്മാരായ എ.എസ് സാബു, ജി.രഞ്ജിത്ത്, ശോഭ ജോഷി, ലിസി ടോമി തുടങ്ങിയവർ പങ്കെടുത്തു.
മാവേലിക്കര: രാഷ്ട്രപിതാവ് മഹാത്മജിയുടെ 153 -ാം ജന്മദിനം മറ്റം സെന്‍റ് ജോൺസ് ഹയർ സെക്കൻഡറി സ്കൂൾ പിടിഎ യുടെ ആഭിമുഖ്യത്തിൽ സമുചിതമായി ആഘോഷിച്ചു. സ്കൂൾ അങ്കണത്തിലുള്ള മഹാത്മാ ഗാന്ധി പ്രതിമയിൽ മാല അണിയിച്ച് പുഷ്പാർച്ചന നടത്തി.
പിടിഎ പ്രസിഡന്റ് അഡ്വ കെ.ആർ. മുരളീധരൻ ഉദ്ഘാടനം ചെയ്തു.
എടത്വ: ഗാന്ധി ജയന്തി ദിനാചരണ ഭാഗമായി എടത്വ വിദ്യാ വിനോദിനി ഗ്രന്ഥശാലയുടെ നേതൃത്വത്തില്‍ ശുചീകരണം, ലഹരി വിരുദ്ധ പ്രതിജ്ഞ, ഗാന്ധിസ്മൃതി, കലാ മത്സരങ്ങള്‍, പൊതു സമ്മേളനം എന്നിവ നടത്തി. ഗാന്ധി ക്വിസ്, പ്രസംഗം മത്സരങ്ങളില്‍ ആന്‍ജോ മാത്യു അനില്‍, അലീനാ എല്‍സ ജോബി, എസ്ഥേര്‍ ഡി, ശിവാനി സന്തോഷ് എന്നിവര്‍ വിജയികളായി. ഗാന്ധി ക്വിസ് മത്സര വിജയി ആന്‍ജോ മാത്യു അനില്‍ സമാപന സമ്മേളനം ഉദ്ഘാടനം ചെയ്തു.