ആലപ്പുഴ: അദാനിക്കുവേണ്ടി എല്ഐസി, എസ്ബിഐ സ്ഥാപനങ്ങളെ സാമ്പത്തിക തട്ടിപ്പിനിരയാക്കിയ നരേന്ദ്രര മോദി സര്ക്കാരിന്റെ നടപടികളെക്കുറിച്ച് പാര്ലമെന്ററി സമിതിയെ കൊണ്ട് അന്വേഷിപ്പിക്കണമെന്ന് എഐസിസി സെക്രട്ടറി വിശ്വനാഥ പെരുമാള് ആവശ്യപ്പെട്ടു.
എഐസിസി ആഹ്വാനം പ്രകാരം ആലപ്പുഴ സൗത്ത് ബ്ലോക്ക് കോണ്ഗ്രസ് കമ്മിറ്റി എല്ഐസി ഓഫീസിനു മുന്നില് നടത്തിയ പ്രതിഷേധ ധര്ണ ഉദ്ഘാടനം ചെയുകയായിരുന്നു അദ്ദേഹം. ബ്ലോക്ക് കമ്മിറ്റികളുടെ നേതൃത്വത്തില് നടത്തുന്ന പ്രതിഷേധ ധര്ണകളുടെ ജില്ലാതല ഉദ്ഘാടനത്തിന് ഡിസിസി പ്രസിഡന്റ് ബി. ബാബുപ്രസാദ് അധ്യക്ഷത വഹിച്ചു.
പൊതുമേഖലാ സ്ഥാപനങ്ങളെ വിറ്റുതുലച്ച് രാജ്യത്തിന്റെ ഭാവി അപകടത്തിലാക്കിയ മോദി സര്ക്കാര് രാജ്യത്തെ സാധാരണക്കാരന്റെ വിയര്പ്പിന്റെ വില കൊടുത്തു വളര്ത്തിയ എല്ഐസി, എസ്ബിഐ സ്ഥാപനങ്ങള് അദാനിക്ക് അടിയറ വെയ്ക്കുകയായിരുന്നുവെന്ന് അദ്ദേഹം കൂട്ടിച്ചേർത്തു.
രാഷ്ട്രീയകാര്യ സമിതിയംഗം ഷാനിമോള് ഉസ്മാന്, കെപിസിസി ജനറല് സെക്രട്ടറിമാരായ എ.എ. ഷുക്കൂര്, എം.ജെ. ജോബ്, കെ.പി. ശ്രീകുമാര്, സി.വി. മനോജ്കുമാര്, മോളി ജേക്കബ്, സുനില് ജോര്ജ്, ബഷീര് കോയാപറമ്പില് എന്നിവര് പ്രസംഗിച്ചു. മുജീബ് അസീസ്, സീനത്ത് നാസര്, സസീം ചെമ്പകപ്പള്ളി, ഷോളി സിദ്ധകുമാര്, നൂറുദ്ദീന് കോയ, സലീം വട്ടപ്പള്ളി, എച്ച്.സിയാദ്, ബോബന് മാത്യു എന്നിവര് നേതൃത്വം നല്കി.