ADVERTISEMENT

ADVERTISEMENT

ചേർത്തല ഉപജില്ലാ സ്കൂൾ ശാസ്ത്രോത്സവം സമാപിച്ചു

ചേർത്തല: ചേർത്തല ഉപജില്ലയിലെ വിവിധ സ്കൂളിൽനിന്നായി 3200ൽപരം കുട്ടികൾ പങ്കെടുത്ത ചേർത്തല വിദ്യാഭ്യാസ ഉപജില്ലാ സ്കൂൾ ശാസ്ത്രോത്സവം ചേർത്തല സൗത്ത് ഗവൺമെന്‍റ് ഹയർ സെക്കൻഡറി സ്കൂളിൽ സമാപിച്ചു. പ്രവൃത്തിപരിചയമേള, ശാസ്ത്രമേള സാമൂഹ്യശാസ്ത്രമേള, ഗണിതശാസ്ത്രമേള, ഐടി മേള എന്നിങ്ങനെ അഞ്ചു വിഭാഗങ്ങളിലാണ് മത്സരങ്ങൾ നടന്നത്.

സമാപന സമ്മേളനം ആലപ്പുഴ ജില്ലാ പഞ്ചായത്ത് വൈസ് പ്രസിഡന്‍റ് എൻ.എസ്. ശിവപ്രസാദ് ഉദ്ഘാടനവും സമ്മാനദാനവും നടത്തി. കഞ്ഞിക്കുഴി ബ്ലോക്ക് പഞ്ചായത്ത് മെംബർ രജനി ദാസപ്പൻ അധ്യക്ഷത വഹിച്ച ചടങ്ങിൽ കഞ്ഞിക്കുഴിബ്ലോക്ക് വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ സുധാ സുരേഷ്, ഗ്രാമപഞ്ചായത്ത് മെംബർമാരായ ബെൻസിലാൽ, സീമാ ദിലീപ്, ചേർത്തല ഗവൺമെന്‍റ് ഹയർ സെക്കൻഡറി സ്കൂൾ പ്രിൻസിപ്പാൾ ജീജാ ഭായ്, എച്ച്എം എസ്. മീര, കെപിഎസ്ടിഎ പ്രതിനിധി ഇ.ആർ. ഉദയകുമാർ, കെഎസ്ടിഎ പ്രതിനിധി വി. വിജു, എസ്എംസി ചെയർമാൻ വി. വിനോദ്, സുജിത്ത്മോൻ സി.എസ്, ചേർത്തല തെക്ക് സൊസൈറ്റി പ്രസിഡന്‍റ് കെ. രമേശൻ എന്നിവർ പ്രസംഗിച്ചു. ഫെസ്റ്റിവൽ കമ്മിറ്റി കൺവീനർ ഗിരീഷ് കമ്മത്ത് നന്ദി രേഖപ്പെടുത്തി.

ADVERTISEMENT

കാരുണ്യ പദ്ധതികളുമായി ഹരിപ്പാട് ഗ്രേറ്റർ റോട്ടറി ക്ലബ്

ഹരിപ്പാട്: ഹരിപ്പാട് ഗ്രേറ്റർ റോട്ടറി ക്ലബിന്‍റെ ഭാരവാഹികളുടെ സ്ഥാനാരോഹണവും സുധർമ മുരളീധരൻ വനിതാ രത്ന അവാർഡ് ദാനവും മൂന്നിന് കാർത്തികപ്പള്ളി പോൾ ഹാരീസ് ഹാളിൽ നടക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. റോട്ടറി ഡിസ്ട്രിക്ട് നിയുക്ത ഗവർണർ കൃഷ്ണൻ ജി. നായർ ഉദ്ഘാടനം ചെയ്യും. പുതിയ ഭാരവാഹികളായി ആർ.കെ. പ്രകാശ്(പ്രസിഡന്‍റ് ), സൗമ്യ പ്രമോദ് (സെക്രട്ടറി), സന്തോഷ് വർഗീസ് (ട്രഷറർ) എന്നിവർ ചുമതലയേൽക്കും. ഈ വർഷത്തെ ജീവകാരുണ്യപ്രവർത്തനങ്ങളുടെ ഉദ്ഘാടനവും നടക്കും. പ്രധാന പദ്ധതികളിൽ ഹരിതകർമസേനയ്ക്ക് സൗജന്യ പ്രഭാതഭക്ഷണ വിതരണം, വനിതകൾക്ക് സൗജന്യ കാൻസർ സ്ക്രീനിംഗ്, കിടപ്പുരോഗികൾക്കുള്ള സ്വാന്തന പരിചരണം, ഓപ്പോൾ പദ്ധതിയിലൂടെ നിരാലംബർക്ക് ഭവനനിർമാണം, വിദ്യ എന്ന പേരിൽ വിദ്യാർഥികൾക്കുള്ള പദ്ധതികൾ, നിർമല- ശുദ്ധജല വിതരണം, ആശ -വനിതകൾക്കുള്ള ആരോഗ്യ-തൊഴിൽ പരിശീലന പദ്ധതികൾ, ജനനി- കുട്ടികൾക്കുള്ള കളിപ്പാ വിതരണം, ഭൂമിക- ഫലവൃക്ഷതൈ എന്നിവ ഉൾപ്പെടുന്നു. ഈ പദ്ധതികളുടെ ഉദ്ഘാടനം ഇന്ന് ഒന്നിന് ഡിസ്ട്രിക്ട് ഗവർണർ ഡോ. റ്റീന ആന്‍റണി നിർവഹിക്കും. സുധർമ മുരളീധരൻ വനിതാ രത്ന അവാർഡ് മാവേലിക്കര സ്വദേശിനിയും വ്യവസായ സംരംഭകയുമായ ആർ. ഗീതാലക്ഷ്മിക്ക് സമ്മാനിക്കും. റോട്ടറിയും സുധാ മുരളീ ഫൗണ്ടേഷനും സംയുക്തമായി ഏർപ്പെടുത്തിയ അവാർഡ്, മുൻ റോട്ടറി അംഗം സുധാ മുരളീധരന്‍റെ സ്മരണാർഥമാണ്. വാർത്താസമ്മേളനത്തിൽ പ്രസിഡന്‍റ് ആർ.കെ. പ്രകാശ്‌, സെക്രട്ടറി സൗമ്യ പ്രമോദ്, ട്രഷറർ സന്തോഷ് വർഗീസ്, ക്ലബ്‌ അഡ്മിനിസ്ട്രേറ്റർ മുരുകൻ പാളയത്തിൽ, മെമ്പർഷിപ്പ് കമ്മിറ്റി ചെയർമാൻ മുരളീധരൻ, റോട്ടറി ഫൗണ്ടേഷൻ ചെയർമാൻ പ്രമോദ് ഇട്ടിക്കാട്ടിൽ, ക്ലബ്ബ് ട്രെയിനർ ജേക്കബ് സാമൂവൽ തുടങ്ങിയവർ പങ്കെടുത്തു.

നൂറ്റുവന്‍പാറ ടൂറിസം പദ്ധതിക്ക് ചിറകുമുളയ്ക്കുന്നു

ചെങ്ങന്നൂര്‍: പൗരാണിക ഐതിഹ്യപ്പെരുമയാല്‍ ശ്രധേയമായ പുലിയൂര്‍ പഞ്ചായത്തിലെ നൂറ്റുവന്‍പാറയെ കേന്ദ്രീകരിച്ച് ടൂറിസം പദ്ധതി നടപ്പാക്കാന്‍ സംസ്ഥാന ടൂറിസം വകുപ്പ് രണ്ടു കോടി 20 ലക്ഷം രൂപ അനുവദിച്ചു. മന്ത്രി സജി ചെറിയാന്‍റെ നിര്‍ദേശത്തെത്തുടര്‍ന്നാണ് തീരുമാനം. ചെങ്ങന്നൂരിന്‍റെ പാരമ്പര്യവും സാംസ്‌കാരിക പൈതൃകവും വിളിച്ചോതുന്ന പ്രദേശങ്ങളെ കൂട്ടിയിണക്കി പൈതൃക ടൂറിസം പദ്ധതി നടപ്പാക്കുന്നതിനുള്ള നിരന്തര പരിശ്രമങ്ങളുടെ ഭാഗമായാണ് നൂറ്റുവന്‍പാറ ടൂറിസം പദ്ധതിക്ക് ഇപ്പോള്‍ ഭരണാനുമതി ലഭിച്ചിരിക്കുന്നത്. പദ്ധതിയില്‍ വിഭാവനം ചെയ്യുന്ന പ്രധാന സൗകര്യങ്ങള്‍ പദ്ധതി യാഥാര്‍ഥ്യമാകുന്നതോടെ വിനോദസഞ്ചാരികള്‍ക്ക് നൂറ്റുവന്‍പാറയില്‍ മെച്ചപ്പെട്ട സൗകര്യങ്ങള്‍ ലഭ്യമാകും. വിശ്രമസ്ഥലം, റെയിന്‍ ഷെല്‍ട്ടര്‍, സുരക്ഷാ ഹാന്‍ഡ് റെയിലുകള്‍, കാന്‍റി ലിവര്‍ വ്യൂ പോയിന്‍റ്, സിസിടിവി നിരീക്ഷണം, ആധുനിക ശുചിമുറി സൗകര്യങ്ങള്‍, റോപ്പ് വേ, സുരക്ഷാ ഗാര്‍ഡുകള്‍, മറ്റ് സുരക്ഷാ സംവിധാനങ്ങള്‍ എന്നിവയാണ് ഇതില്‍ ഉള്‍പ്പെടുന്നത്. സന്ദര്‍ശകരുടെ എണ്ണം വര്‍ധിക്കുന്നതിനനുസരിച്ച് കൂടുതല്‍ സൗകര്യങ്ങള്‍ ഏര്‍പ്പെടുത്താനും പദ്ധതി ലക്ഷ്യമിടുന്നുണ്ട്. ചെങ്ങന്നൂരിന് പുതിയ ടൂറിസം സാധ്യതകള്‍ നൂറ്റുവന്‍പാറ ടൂറിസം പദ്ധതി യാഥാര്‍ഥ്യമാകുന്നതോടെ പാണ്ഡവന്‍ പാറ, ആലാ പൂമലച്ചാല്‍, കുതിരവട്ടം ചിറ അക്വാടൂറിസം തുടങ്ങിയ നിലവിലുള്ള പദ്ധതികളുമായി സംയോജിപ്പിച്ച് കൂടുതല്‍ ടൂറിസ്റ്റ് ഡെസ്റ്റിനേഷനുകള്‍ വികസിപ്പിക്കാന്‍ കഴിയും. ഇത് ചെങ്ങന്നൂരിന്‍റെ ടൂറിസം മേഖലയ്ക്ക് വലിയ ഉണര്‍വ് നല്‍കുമെന്ന് മന്ത്രി സജി ചെറിയാന്‍ പറഞ്ഞു. ഈ പദ്ധതി ചെങ്ങന്നൂരിന്‍റെ സാമ്പത്തിക, സാംസ്‌കാരിക രംഗങ്ങളില്‍ പുതിയ അധ്യായം കുറിക്കുമെന്ന പ്രതീക്ഷയിലാണ് പ്രദേശവാസികള്‍.

കല്ലിമേൽ തേനീച്ചവളർത്തൽ കേന്ദ്രം ഹണി മ്യൂസിയമാക്കുന്നു

മാങ്കാംകുഴി: തഴക്കര പഞ്ചായത്തിലെ നൂറേക്കർ ജില്ലാ കൃഷിത്തോട്ടത്തോട് ചേർന്ന് പ്രവർത്തിക്കുന്ന കല്ലിമേൽ തേനീച്ചവളർത്തൽ കേന്ദ്രം ഹണി മ്യൂസിയമാക്കി ഉയർത്തുന്നു. രാജ്യത്തെ ആദ്യ തേനീച്ച സസ്യപാർക്കായി 2018 ലാണ് പ്രവർത്തനം ആരംഭിച്ചത്. ഏഴു വർഷം പിന്നിടുമ്പോൾ തേൻമധുരമുള്ള വിജയകഥയായി കേന്ദ്രം മാറി. ദിവസം 25,000 രൂപവരെയാണ് ഇവിടുത്തെ വിറ്റുവരവ്. അമ്പതിനായിരം കിലോയിലധികം തേനാണ് കർഷകരിൽനിന്നും ശേഖരിച്ച് സംസ്‌കരിച്ച് അമൃത് ഹണിയായി വിൽപ്പന നടത്തിയത്. സർക്കാർ സംവിധാനത്തിലെ ആദ്യത്തെ ആധുനിക തേൻനിർമാണ ശുദ്ധീകരണ വിപണന കേന്ദ്രം കൂടിയാണിത്. മൂന്ന് ഏക്കറിലായാണ് ഹോർട്ടികോർപ്പിന് കീഴിൽ കേന്ദ്രം പ്രവർത്തിക്കുന്നത്. തേനീച്ചകളുടെ പ്രയോജനത്തെക്കുറിച്ച് അവബോധം നൽകുന്നതിന് ഒരുകോടി രൂപ ചെലവിൽ കെട്ടിടം പുനർനിർമിച്ചാണ് പദ്ധതി ആരംഭിച്ചത്. പിന്നീട് വിവിധ ഘട്ടങ്ങളിലായി കേന്ദ്രത്തിന്‍റെ വികസനപ്രവർത്തനങ്ങൾക്ക് രണ്ടുകോടിയിലധികം രൂപ ചെലവഴിച്ചു. പ്രധാനമായും മൂന്നു രീതിയിലാണ് കേന്ദ്രത്തിന്‍റെ പ്രവർത്തനം. തേനീച്ചകളെ വളർത്തി തേൻ ഉത്പാദിപ്പിക്കുക, കർഷകരിൽനിന്ന് തേൻ സംഭരിച്ച് ശാസ്ത്രീയമായി സംസ്‌കരിച്ച് വിപണിയിൽ എത്തിക്കുക, കർഷകർക്ക് പരിശീലനം നൽകുക എന്നിവയാണവ. തേനീച്ച വളർത്തൽ കേന്ദ്രത്തിൽ ഇരുന്നൂറോളം തേനീച്ചക്കൂടുകളാണുള്ളത്. ചെറുതേനീച്ചകളെയും ഇന്ത്യൻ തേനീച്ചകളെയുമാണ് ഇതിൽ പ്രധാനമായും വളർത്തുന്നത്. വർഷം രണ്ടു ടൺ തേൻ ഇവയിൽനിന്നുമാത്രം ഉത്പാദിപ്പിക്കുന്നുണ്ട്. കർഷകർ ഉത്പാദിപ്പിക്കുന്ന തേൻ സർക്കാർ നിശ്ചയിക്കുന്ന തുകയ്ക്ക് നേരിട്ട് സംഭരിക്കുന്നതിലൂടെ കർഷകർക്ക് ന്യായമായ വില ഇവിടെ ഉറപ്പാക്കുന്നുണ്ട്. സംഭരിക്കുന്ന തേൻ ശാസ്ത്രീയമായി സംസ്‌കരിച്ച് തേനിന്‍റെ ഗുണനിലവാരം ഉറപ്പുവരുത്തിയ ശേഷം അമൃത് തേൻ എന്ന ബ്രാൻഡിലാണ് കുറഞ്ഞ വിലയിൽ വിൽക്കുന്നത്. 50 ഗ്രാം മുതലുള്ള അമൃത് ഹണി കാനുകൾ ലഭ്യമാണ്. ഒരു കിലോ തേനിന് 380 രൂപയാണ് വില. അഞ്ചു കിലോ തേൻ 1375 രൂപയ്ക്ക് അമൃത് ഹണി ഔട്ട് ലെറ്റിൽനിന്ന് വാങ്ങാം. ഹണി സോപ് ഉൾപ്പെടെ തേനിൽനിന്നുള്ള മൂല്യവർധിത ഉത്പന്നങ്ങളും ഇവിടെ ലഭ്യമാണ്. ഇരട്ടി മധുരം, നീല അമരി, വിവിധ തരം അരികൾ തുടങ്ങിയവയും ഇവിടെ വിൽപ്പനയ്ക്കുണ്ട്. ഇവിടെ വിജയകരമായി പരിശീലനം പൂർത്തിയാക്കുന്നവർക്ക് തേനീച്ചക്കൂടും അനുബന്ധ ഉപകരണങ്ങളും കേന്ദ്ര, സംസ്ഥാന സർക്കാരുകളുടെ വിവിധ പദ്ധതികൾ വഴി 40 ശതമാനം സബ്സിഡിയിൽ നൽകുന്നുമുണ്ട്. കൂടാതെ ബ്ലോക്ക് അടിസ്ഥാനത്തിൽ 30 കർഷകർക്ക് കൃഷി ഓഫീസറുടെ നിർദേശാനുസരണവും പരിശീലനവും നൽകിവരുന്നു. കൂടാതെ സംസ്ഥാനത്തെ വിവിധ സ്ഥലങ്ങളിൽ തേനീച്ചകളെ ഉത്പാദിപ്പിക്കുന്ന കർഷകരെ തെരഞ്ഞെടുത്ത് അവരിൽനിന്നും തേനീച്ചകളെ സംഭരിക്കുന്ന പ്രവർത്തനങ്ങളും ഇവിടെ നടക്കുന്നുണ്ട്. വിനോദസഞ്ചാരികളെയടക്കം ആകർഷിക്കാൻ കഴിയുന്ന ഹണി മ്യൂസിയമായി കല്ലിമേൽ തേനീച്ച വളർത്തൽ കേന്ദ്രത്തെ മാറ്റുന്നതിനുള്ള പരിശ്രമത്തിലാണ് സർക്കാറെന്ന് എം.എസ്. അരുൺകുമാർ എംഎൽഎ പറഞ്ഞു. സംസ്ഥാനത്തെ 1500ൽ അധികം കർഷകർക്ക് ഇവിടെനിന്ന് പരിശീലനം കൊടുക്കാനായി. പതിനായിരത്തിലധികം കർഷകർക്ക് സബ്‌സിഡിയായി തേനീച്ച കോളനികൾ നിർമിക്കുന്നതിന് സഹായം നൽകി. കർഷകർക്ക് തേനിന്‍റെ ഗുണനിലവാരം പരിശോധിക്കാനായി ലാബ് സ്ഥാപിക്കാനുള്ള അനുമതിയും കേന്ദ്രത്തിന് ലഭിച്ചിട്ടുണ്ടെന്നും രണ്ടു മാസത്തിനുള്ളിൽ ഇതിന്‍റെ നിർമാണപ്രവർത്തനങ്ങൾ ആരംഭിക്കുമെന്നും എംഎൽഎ പറഞ്ഞു. ഹോർട്ടികോർപ്പിന്‍റെ രണ്ടു പതിറ്റാണ്ട് കാലത്തെ പ്രയത്‌നത്തിന്‍റെ ഫലമായി ഇൻഫ്യൂഷൻ സാങ്കേതിക വിദ്യ ഉപയോഗിച്ച് വിവിധ പഴവർഗങ്ങളുടെ രുചിയുള്ള തേനും മാവേലിക്കരയിൽ ഉത്പാദിപ്പിക്കുന്നുണ്ട്. ഇതിനാവശ്യായ ഉപകരണങ്ങളും ഹോർട്ടികോർപ് വികസിപ്പിച്ചിട്ടുണ്ട്.

ജലനിരപ്പിനു നേരിയ കുറവ്; ആശങ്കയിലാക്കി പെരുമഴ

എടത്വ: അപ്പര്‍ കുട്ടനാട്ടില്‍ ജലനിരപ്പിനു നേരിയ കുറവ്. ഇന്നലെ പകല്‍ തെളിഞ്ഞ കാലാവസ്ഥയായിരുന്നെങ്കിലും വൈകിട്ടോടെ വീശിയടിച്ച കാറ്റിലും പെരുമഴയിലും ജനങ്ങള്‍ വീണ്ടും ആശങ്കയിലായിരിക്കുകയാണ്. ശക്തമായ കാറ്റില്‍ നിരവധി മരങ്ങള്‍ കടപുഴകി വീണു. അരമണിക്കൂര്‍ നീണ്ടുനിന്ന പെരുമഴയില്‍ ജലനിരപ്പിനും കാര്യമായ മാറ്റം സംഭവിച്ചിട്ടുണ്ട്. രണ്ടു ദിവസമായി മഴയ്ക്കു നേരിയ ശമനമായെങ്കിലും അപ്പര്‍ കുട്ടനാട്ടില്‍ ജലനിരപ്പ് കാര്യമായി താഴുന്നില്ല. ഒട്ടുമിക്ക പ്രദേശങ്ങളും റോഡുകളും ഇപ്പോഴും മുട്ടോളം വെള്ളത്തിലാണ്. കിഴക്കന്‍ വെള്ളത്തിന്‍റെ വരവ് കുറഞ്ഞതോടെ ജലനിരപ്പ് താഴുമെന്ന് കരുതിയിരിക്കുമ്പോഴാണ് നിനച്ചിരിക്കാതെ പെരുമഴ പെയ്തത്. തലവടി, മുട്ടാര്‍, വീയപുരം, തകഴി, എടത്വ എന്നീ പഞ്ചായത്തില്‍ ജലനിരപ്പ് കുറഞ്ഞു തുടങ്ങിയിരുന്നു. വീടുകളില്‍നിന്ന് വെള്ളം ഇറങ്ങിയെങ്കിലും വീട്ടുപരിസരങ്ങള്‍ വെള്ളക്കെട്ടിലാണ്. അപ്പര്‍ കുട്ടനാട്ടിലെ ഒട്ടുമിക്ക ഗ്രാമീണ റോഡുകളിലും യാത്രക്കാര്‍ക്ക് സഞ്ചരിക്കാന്‍ കഴിയാത്ത നിലയില്‍ വെള്ളം കെട്ടിക്കിടക്കുകയാണ്. ഇതിനോടകം മൂന്നുതവണ വെള്ളം ഉയര്‍ന്ന് ജനജീവിതം സ്തംഭിച്ചിരുന്നു. നിരവധി വീടുകളും തകര്‍ന്നടിയുകയും വിദ്യാര്‍ഥികളുടെ പഠനം മുടങ്ങുകയും ചെയ്തു. അധ്യാപകര്‍ പാഠഭാഗം തീര്‍ക്കാന്‍ പാടുപെടുകയാണ്. ഇന്നലെ കുട്ടനാട് താലൂക്കില്‍ അവധി നല്‍കിയില്ലെങ്കിലും വെള്ളക്കെട്ടിലൂടെ ദുരിതം പേറിയാണ് വിദ്യാര്‍ഥികള്‍ സ്‌കൂളുകളില്‍ എത്തിയത്. സ്‌കൂളുകളില്‍ വിദ്യാര്‍ഥികളുടെ എണ്ണവും കുറവായിരുന്നു.

മെഡിക്കൽ കോളജുകൾ വെന്‍റിലേറ്ററിൽ: കൊടിക്കുന്നിൽ സുരേഷ് എംപി

ചാരുംമൂട്: സംസ്ഥാനത്തെ സർക്കാർ മെഡിക്കൽ കോളജുകൾ വെന്‍റിലേറ്ററിലാണെന്ന് കോൺഗ്രസ് പ്രവർത്തകസമിതി അംഗം കൊടിക്കുന്നിൽ സുരേഷ് എംപി കുറ്റപ്പെടുത്തി. ആരോഗ്യവകുപ്പിന്‍റെ വീഴ്ചയിൽ മുഖ്യമന്ത്രി മൗനം വെടിയണമെന്നും അദ്ദേഹം ആവശ്യപ്പെട്ടു. ആരോഗ്യവകുപ്പ് നയപരമായി തകർന്നു. ആരോഗ്യകേരളം പേരിൽ ഒതുങ്ങി. ചികിത്സ ലഭിക്കാത്തതിനാൽ രോഗികൾ പലവിധ ബുദ്ധിമുട്ടുകൾ അനുഭവിക്കുകയാണ്. ആരോഗ്യവകുപ്പ് മന്ത്രി തന്നെയാണ് ഈ തകർച്ചയുടെ മുഖ്യ ഉത്തരവാദി. എന്ത് അടിസ്ഥാനത്തിലാണ് മന്ത്രി ഇപ്പോഴും പദവിയിൽ തുടരുന്നതെന്ന് സർക്കാർ വ്യക്തമാക്കണമെന്നും കൊടിക്കുന്നിൽ ആവശ്യപ്പെട്ടു. ആലപ്പുഴ, കോഴിക്കോട്, പാലക്കാട്, ഇടുക്കി, തൃശൂർ തുടങ്ങിയ സർക്കാർ മെഡിക്കൽ കോളജുകളിൽ രോഗികൾക്ക് കിടക്കയും ശുചിമുറികളും ചികിത്സയ്ക്കാവശ്യമായ മരുന്നുകളും ലഭ്യമല്ല. ശസ്ത്രക്രിയകൾ മാസങ്ങൾ നീളുന്ന അവസ്ഥയിൽ രോഗികൾ സ്വകാര്യ ആശുപത്രികളിലേക്ക് പോകേണ്ടിവരുന്നത് അവരെ സാമ്പത്തികമായി തകർക്കുകയാണ്. മുൻകാലങ്ങളിൽ ആരോഗ്യരംഗത്ത് കേരളം മാതൃകയായിരുന്നു. ഇന്ന് കേരളത്തിന്‍റെ ആരോഗ്യമന്ത്രി ഈ വകുപ്പിന് അതീവ അപകടം ആണെന്ന് തെളിയിച്ചു കഴിഞ്ഞതായും കൊടിക്കുന്നിൽ പറഞ്ഞു.

എടത്വ ബോട്ട് ജെട്ടിയുടെ മുഖഛായ മാറുന്നു; പുനര്‍നിര്‍മിക്കുന്നതിനായി 50 ലക്ഷം രൂപ

എടത്വ: ഇറിഗേഷന്‍ ഇന്‍ലാന്‍ഡ് നാവിഗേഷന്‍ വകുപ്പ് കുട്ടനാട് പാക്കേജില്‍പ്പെടുത്തി പുനര്‍നിര്‍മിക്കുന്ന എടത്വ ബോട്ട് ജെട്ടിയുടെ നിര്‍മാണോദ്ഘാടനം നടന്നു. ജില്ലാ പഞ്ചായത്ത് വികസന സ്ഥിരസമിതി അധ്യക്ഷ ബിനു ഐസക് രാജു ഉദ്ഘാടനം നിര്‍വഹിച്ചു. ജനങ്ങളുടെ വര്‍ഷങ്ങളായുള്ള ആവശ്യമായിരുന്നു പതിറ്റാണ്ടുകളായി തകര്‍ന്നുകിടന്ന എടത്വ ബോട്ട് ജെട്ടി പുനര്‍നിര്‍മിക്കുക എന്നത്. വെള്ളപ്പൊക്ക സമയത്താണ് കൂടുതല്‍ ദുരിതം അനുഭവിക്കുന്നത്. ബോട്ട് അടുപ്പിച്ചശേഷം കെട്ടാന്‍ പോലും മാര്‍ഗമില്ലായിരുന്നു. മഴയത്തും വെയിലത്തും യാത്രക്കാര്‍ക്ക് നില്‍ക്കുന്നതിനുള്ള കാത്തിരിപ്പു പുരയും ഇല്ല. ചമ്പക്കുളം കഴിഞ്ഞാല്‍ ഏറ്റവും പ്രധാനപ്പെട്ട ജെട്ടിയാണ് എടത്വ. എടത്വ പള്ളിപ്പെരുന്നാള്‍ കാലത്ത് ഒട്ടേറെ ബോട്ടുകള്‍ എത്താറുണ്ട്. നൂറുകണക്കിനു തീര്‍ഥാടകര്‍ കായല്‍ യാത്രയ്ക്കായി ഈ ജെട്ടിയിലാണ് എത്തുന്നത്. നൂതന സാങ്കേതിക വിദ്യയില്‍ എടത്വ മെയിന്‍ ബോട്ട് ജെട്ടിയും ജെട്ടിയോടു ചേര്‍ന്ന് സംരക്ഷണഭിത്തിയും നിര്‍മിക്കാന്‍ മന്ത്രി റോഷി അഗസ്റ്റിന്‍ 47 ലക്ഷം രൂപ അനുവദിക്കുകയും ഇതേത്തുടര്‍ന്ന് നടപടികള്‍ പൂര്‍ത്തീകരിച്ചു പണി ആരംഭിക്കുന്നത്. ടി ഷേപ്പ്ഡ് ജെട്ടിയാണ് നിര്‍മിക്കുന്നത്. ഇതില്‍ മൂന്നു ഡെക്ക് സ്ലാബും ഉണ്ടാകും. കൂടാതെ 69 മീറ്റര്‍ നീളത്തില്‍ സംരക്ഷണഭിത്തിയും കടവും നിര്‍മിക്കും. പ്രധാന ബോട്ട് ജെട്ടിയോടു ചേര്‍ന്ന് കിഴക്ക് ഭാഗത്തുള്ള ജെട്ടിയുടെ അറ്റകുറ്റപ്പണിയും ഇതോടൊപ്പം നടത്തും. റൂഫിംഗ്, ഡക്ക് ടൈല്‍സ് പാകല്‍, ബെഞ്ച് സ്ളാബ് സ്ഥാപിക്കല്‍ എന്നിവക്കായി മൂന്നു ലക്ഷം രൂപ വേറെയും അനുവദിച്ചിട്ടുണ്ട്. 50 ലക്ഷം രൂപയുടെ പണി പൂര്‍ത്തിയാകുമ്പോള്‍ എടത്വ ബോട്ട് ജെട്ടിയുടെ മുഖഛായ മാറുമെന്നു കരുതുന്നു. പഞ്ചായത്ത് പ്രസിഡന്‍റ് ആന്‍സി ബിജോയി അധ്യക്ഷത വഹിച്ചു. ഇറിഗേഷന്‍ വകുപ്പ് മാവേലിക്കര സെക‌്ഷന്‍ അസി. എന്‍ജിനിയര്‍ കെ.വി. വിപിന്‍ പദ്ധതി വിശദീകരിച്ചു. എടത്വ ഫെറോനാ വികാരി ഫാ. ഫിലിപ്പ് വൈക്കത്തുകാരന്‍, പഞ്ചായത്ത് വൈസ് പ്രസിഡന്‍റ് രേഷ്മ ജോണ്‍സണ്‍, പഞ്ചായത്തംഗങ്ങളായ ജി. ജയചന്ദ്രന്‍, പി.സി. ജോസഫ്, ജീമോന്‍ ജോസഫ്, ബെറ്റി ജോസഫ്, ജെയിന്‍ മാത്യു ബിജു, ബാബു മണ്ണാംതുരുത്തില്‍, വിനിത ജോസഫ്, ജലഗതാഗതവകുപ്പ് എടത്വ സ്റ്റേഷന്‍ മാസ്റ്റര്‍ എം. മുജീബ്, ടി.എസ്. സുരേഷ്, ബിനോയി ഉലക്കപ്പാടി, മാത്യു സേവ്യര്‍ കൊച്ചുപറമ്പ്, മധു മംഗലപ്പള്ളി, ബാബു കണ്ണന്തറ, സിബിച്ചന്‍ തെക്കേടം എന്നിവര്‍ പ്രസംഗിച്ചു.

പനിയും ഛർദിയും ബാധിച്ച പത്താം ക്ലാസ് വിദ്യാർഥിയുടെ മരണകാരണം വ്യക്തമല്ല

മാവേലിക്കര: ചെട്ടികുളങ്ങരയിൽ പനിയും ഛർദിയും ബാധിച്ചു പത്താം ക്ലാസ് വിദ്യാർഥി മരിച്ചതിന്‍റെ കാരണം പ്രാഥമിക പോസ്റ്റ്മോർട്ടം റിപ്പോർട്ടിൽ വ്യക്‌തമല്ലെന്ന് അധികൃതർ. ചെട്ടികുളങ്ങര ഈരേഴ തെക്ക് കാങ്കാലിൽ കിഴക്കതിൽ സെൽവരാജ്-ലേഖ ദമ്പതികളുടെ മകൻ ചെട്ടികുളങ്ങര എച്ച്എസ്എസ് വിദ്യാർഥി നവീൻ രാജ് (15) ആണ് കഴിഞ്ഞദിവസം പനിയും ഛർദിയും ബാധിച്ചു മരിച്ചത്. ഇന്നലെ നടന്ന പോസ്റ്റ്മോർട്ടത്തിന്‍റെ പ്രാഥമിക പരിശോധനാ റിപ്പോർട്ടിൽ കാരണം വ്യക്‌തമല്ല എന്നാണ് ആരോഗ്യവകുപ്പ് അധികൃതർ പറയുന്നത്. എന്നാൽ, പനിയെത്തുടർന്നുണ്ടായ ഹൃദയാഘാതമാകാം മരണ കാരണമെന്നു സൂചനയുണ്ട്. ആന്തരിക അവയവങ്ങളുടെ പരിശോധനാ ഫലം ലഭിച്ചാൽ മാത്രമേ മരണകാരണം കൃത്യമാകു. പ്രാഥമിക പരിശോധനയിൽ മരണകാരണം കണ്ടെത്താനായിട്ടില്ലെന്നും അധികൃതർ പറഞ്ഞു. കഴിഞ്ഞദിവസം ഉച്ചയോടെയാണു നവീനെ ആശുപത്രിയിൽ എത്തിച്ചത്. പെട്ടെന്ന് ആരോഗ്യനില വഷളായതിനാൽ അത്യാഹിത വിഭാഗത്തിൽ പ്രവേശിപ്പിച്ചു ചികിത്സ നൽകുന്നതിനിടെയാണ് മരിച്ചത്. പരിശോധനയിൽ കുട്ടിക്ക് എച്ച്‌വൺ എൻവൺ, ഡെങ്കിപ്പനി, എലിപ്പനി എന്നിവയുടെ ലക്ഷണങ്ങൾ ഇല്ലായിരുന്നുവെന്നു സ്‌ഥിരീകരിച്ചു. പോസ്റ്റ്മോർട്ടത്തിനു ശേഷം ചെട്ടികുളങ്ങര എച്ച്എസ്എസിൽ പൊതുദർശനത്തിനു വച്ച മൃതദേഹം വിലാപയാത്രയായി വീട്ടിലെത്തിച്ചു സംസ്കാരം നടത്തി. ആരോഗ്യ വകുപ്പിന്‍റെ നേതൃത്വത്തിൽ ഇന്ന് സ്കൂ‌ളിൽ പനി സംബന്ധിച്ചു ബോധവത്കരണം ക്ലാസ് നടത്തും.

റീൽസ് ചിത്രീകരണം; പള്ളിപ്പുറത്തെ കുടിവെള്ളം മുടങ്ങിയത് മൂന്നു ദിവസം

പൂച്ചാക്കൽ: സോഷ്യൽ മീഡിയ യിൽ വൈറലാകാൻ റീൽസ് ചിത്രീകരിച്ചത് 23 മീറ്ററോളം ഉയരമുള്ള ശുദ്ധജല വിതരണ ടാങ്കിൽ. റീൽസ് കാരണം മൂന്നു ദിവസമായി മുടങ്ങിയിരുന്ന പള്ളിപ്പുറം പഞ്ചായത്തിൽ ശുദ്ധജലവിതരണം ഇന്നലെ ഉച്ചയോടെ പുനഃരാരംഭിച്ചു. ടാങ്കിൽ നിലവിലു ണ്ടായിരുന്ന കുടിവെള്ളം മുഴുവനായി കളഞ്ഞു. പിന്നീട് ടാങ്ക് അണുവിമുക്തമാക്കിയതിനുശേഷം വെള്ളം നിറച്ചു. വെള്ളത്തിന്‍റെ സാമ്പിൾ ശേഖരിച്ച് ജലവിതരണ വിഭാഗത്തിന്‍റെ ആലപ്പുഴയിലെ ക്വാളിറ്റി കൺട്രോൾ വിഭാഗം പരിശോധന നടത്തി മാലിന്യങ്ങൾ ഇല്ലെന്ന് ഉറപ്പുവരുത്തിയതിനു ശേഷമാണ് ശുദ്ധജല വിതരണം ആരംഭിച്ചത്. ചേർത്തല-അരൂക്കുറ്റി റോഡിൽ പള്ളിപ്പുറം മലബാർ സിമെന്‍റ് ഫാക്ടറിക്കു വടക്കുഭാഗത്തെ ജപ്പാൻശുദ്ധജല സംഭണിയിലാണ് കഴിഞ്ഞ 28ന് മൂന്നു യുവാക്കൾ ഇറങ്ങി കുളിച്ചും ടാങ്കിലേക്ക് ചാടിയും വീഡിയോ ചിത്രീകരിച്ചത്. സംഭവത്തിൽ അറസ്റ്റിലായ തൈക്കാട്ടുശേരി മണ്ണാർകാട് യദുകൃഷ്‌ണൻ (25), പുത്തൻനികർത്തിൽ അതുൽകൃഷ്‌ണ(27), പാണാവള്ളി കളരിത്തറ ജയരാജ് (27)എന്നിവരെ റിമാൻഡ് ചെയ്തിരുന്നു. ശുദ്ധജലം മലിനമാക്കൽ പൊതുമുതൽ നശിപ്പിക്കൽ, സർക്കാർ സ്ഥലത്ത് അതിക്രമിച്ചു കടക്കൽ, സംഘം ചേർന്നുള്ള കുറ്റകൃത്യം തുടങ്ങിയ കുറ്റങ്ങളാണ് ഇവർക്കെതിരേ ചുമത്തിയിരിക്കുന്നത്. ജല അഥോറിറ്റി ഉദ്യോഗസ്ഥ രുടെ പരാതിയും മൊഴിയും രേഖപ്പെടുത്തിയതിനുശേഷമാണ് മൂവരുടെയും അറസ്റ്റ് ചേർത്തല പോലീസ് രേഖപ്പെടുത്തിയത്. ശനിയാഴ്ച്ച വൈകിട്ട് ആറോടെയാണ് ഇവർ പിടിയിലായത്. പ്രതികളെ റിമാൻഡ് ചെയ്തു.16 ലക്ഷം ലീറ്റർ സംഭരണശേഷിയുള്ള ജലസംഭരണിയിലാണ് ഇവർ ഇറങ്ങിയത്. നിരപ്പിലെ കോവിണിപ്പടിയിലൂടെ ടവ്വറിനു മുകളിൽ കയറി ജലസംഭണിയിലെ കോവിണിയിലൂടെ ജലത്തിലേക്കിറങ്ങി. ഇറങ്ങിയപ്പോൾ പകുതിയോളം ഭാഗം ജലമുണ്ടായിരുന്നെന്നാണ് വിവരം. 23 മീറ്ററോളം ഉയരമുള്ളതാണ് ജലസംഭരണി. ടവ്വർ പരിസരം ചുറ്റുമതിൽ കെട്ടി സംരക്ഷിച്ചിരുന്നതിൽ അതിക്രമിച്ചു കടക്കുകയായിരുന്നു. വിവരം നാട്ടുകാർ പോലീസിനെ അറിയിക്കുകയുമായിരുന്നു. റീൽസ് ദൃശ്യങ്ങളെടുത്തെന്നും കുളിച്ചെന്നുമെല്ലാം പ്രചാരണമുണ്ടെങ്കിലും പോലീസ് സ്ഥിരീകരിച്ചിട്ടില്ല. സംഭരണിക്കു മുകളിൽ കയറുക എന്ന ലക്ഷ്യമിട്ട് ചെയ്തതാണെന്നാണ് പോലീസ് പറയുന്നത്. സംഭവം മൂലമുണ്ടായ മുഴുവം നഷ്‌ടവും കാരണക്കാരിൽനിന്നും ഈടാക്കണമെന്നും ജലഅഥോറിറ്റി ആവശ്യപ്പെട്ടിട്ടുണ്ട്. ഒന്നരലക്ഷത്തിൽപ്പരം രൂപ നഷ്ടമുണ്ടായതായാണ് പ്രാഥമിക കണക്ക്.

കാവാലം ടെക്‌നിക്കൽ ഹൈസ്‌കൂൾ; സ്ഥലത്തിന്‍റെ രേഖകൾ കൈമാറി

മങ്കൊമ്പ്: നൽപ്പതു വർഷത്തെ കാത്തിരിപ്പിനു വിരാമമിട്ടു കാവാലം ടെക്‌നിക്കൽ ഹൈസ്‌കൂളിന് സ്വന്തമായി സ്ഥലം എന്ന സ്വപ്നം യഥാർഥ്യമായി. സർരക്കാർ ഏറ്റെടുത്ത സ്ഥലത്തിന്‍റെയും കെട്ടിടത്തിന്‍റെയും മഹസറും താക്കോലും കൈമൈറി. ലാൻഡ് അക്യുസിഷൻ തഹസീൽദാർ സൗമ്യ, ടെക്‌നിക്കൽ എഡ്യൂക്കേഷൻ ഡെപ്യൂട്ടി ഡയറക്ടർ ആർ.എസ്. ഷിബു എന്നിവരിൽനിന്നും ടെക്‌നിക്കൽ ഹൈസ്‌കൂൾ സൂപ്രണ്ട് കിരൺ രോഖകൾ ഏറ്റുവാങ്ങി. കഴിഞ്ഞ മുപ്പത്തിയഞ്ചു വർഷമായി ലിസ്യുവിലും പിന്നീട് കുന്നുമ്മയിലും വാടകക്കെട്ടിടത്തിലാണ് സ്‌കൂൾ പ്രവർത്തിച്ചുവന്നിരുന്നത്. സ്‌കൂൾ അധികൃതർ, പഞ്ചായത്ത്, പിടിഎ എന്നിവരുടെ നിരന്തരമായ പരിശ്രമങ്ങൾക്കൊടുവിലാണ് സ്വപ്‌നം യാഥാർഥ്യമാകുന്നത്. ഏറ്റെടുത്ത സ്ഥലത്ത് കെട്ടിടം നിർമിച്ചു സ്‌കൂളിന്‍റെ പ്രവർത്തനം അവിടേക്കു മാറ്റുക എന്നതാണ് അടുത്ത വെല്ലുവിളി. സ്‌കൂളിനായി ഏറ്റെടുത്ത സ്ഥലത്തു നടന്ന ചടങ്ങിൽ പഞ്ചായത്തംഗങ്ങളായ ടിനു കുര്യൻ, സന്ധ്യ രാജപ്പൻ, വൈസ് പ്രസിഡന്‍റ് ഒ.ജി. ഷാജി, സന്ധ്യ രമേശ്, പിടിഎ വൈസ് പ്രസിഡന്‍റ് ജോമോൻ ആന്‍റണി, മുൻ സ്‌കൂൾ സൂപ്രണ്ട് അബൂബക്കർ കുഞ്ഞ്, പി.എൻ. വിജയകുമാർ, സന്തോഷ് കുമാർ, പി.വി. സുനിൽകുമാർ തുടങ്ങിയവർ പ്രസംഗിച്ചു.

ആലപ്പുഴ മെഡിക്കല്‍ കോളജില്‍ സര്‍ജന്‍മാരുടെ ക്ഷാമം

ആലപ്പുഴ: ഗവ. മെഡിക്കല്‍ കോളജില്‍ ശസ്ത്രക്രിയാ ഉപകരണങ്ങള്‍ ഇല്ലാത്തതുകൊണ്ട് ശസ്ത്രക്രിയകള്‍ നിരന്തരം മാറ്റിവയ്ക്കുകയാണെന്ന യൂറോളജി വിഭാഗം മേധാവി ഡോ. ഹാരീസിന്‍റെ വെളിപ്പെടുത്തല്‍ കേട്ടു തലതാഴ്ത്തിരിയിരിക്കുകയാണു കേരളം. ആലപ്പുഴ ഗവ. മെഡിക്കല്‍ കോളജിലെ പ്രശ്‌നം ശസ്ത്രക്രിയ നടത്താനുള്ള ഡോക്ടര്‍മാരില്ല എന്നതാണ്. ജനറല്‍ സര്‍ജറി വിഭാഗത്തില്‍ 18 ഡോക്ടര്‍മാര്‍ വേണ്ടിടത്ത് എട്ടു പേര്‍ മാത്രം. ജനറല്‍ സര്‍ജറി വിഭാഗത്തില്‍ 18 ഡോക്ടര്‍ വേണ്ട സ്ഥാനത്ത് എട്ടു ഡോക്ടര്‍മാര്‍ മാത്രമാണുള്ളത്. അഞ്ചു സര്‍ജറി യൂണിറ്റുകളില്‍ ഒരു യൂണിറ്റിന്‍റെ മേധാവിയെ കഴിഞ്ഞദിവസം സ്ഥലം മാറ്റി. ഡോക്ടര്‍മാര്‍ കുറവായതില്‍ ഒരു യൂണിറ്റ് ഒഴിവാക്കേണ്ടി വരുമെന്ന് കഴിഞ്ഞദിവസം എച്ച്ഡിഎസ് യോഗത്തില്‍ സര്‍ജറി വിഭാഗം അറിയിച്ചു. ദിവസവും ശരാശരി മൂന്നു മേജര്‍ ശസ്ത്രക്രിയകളും പത്തോളം മൈനര്‍ ശസ്ത്രക്രിയകളും നടക്കുന്ന ആശുപത്രിയില്‍ ഡോക്ടര്‍മാരുടെ കുറവ് പ്രതിസന്ധി സൃഷ്ടിക്കുന്നു. ശസ്ത്രക്രിയയുടെ എണ്ണം കുറയ്ക്കാനുള്ള തീരുമാനം എടുക്കാന്‍ ഒരുങ്ങുകയാണ് ഡോക്ടര്‍മാര്‍. കാര്‍ഡിയോളജി വിഭാഗത്തില്‍ ബൈപാസ് ശസ്ത്രക്രിയയ്ക്കാവശ്യമായ ഒരു ഹാര്‍ട്ട് ലങ് യന്ത്രം മാത്രമാണ് നിലവിലുള്ളത്. 2021ല്‍ കേന്ദ്രസര്‍ക്കാര്‍ മറ്റൊരു ഹാര്‍ട്ട് ലങ് യന്ത്രം എത്തിച്ചെങ്കിലും ഇവിടെ സ്ഥലമില്ലെന്നു പറഞ്ഞ് തിരിച്ചയയ്ക്കുകയായിരുന്നു. 2024ല്‍ ഒക്ടോബര്‍, നവംബര്‍, ഡിസംബര്‍ മാസങ്ങളില്‍ ഒരു ശസ്ത്രക്രിയ പോലും നടന്നില്ല. രജിസ്റ്റര്‍ ചെയ്തിരുന്ന നാലു രോഗികളെ പിന്നീടു ശസ്ത്രക്രിയയ്ക്കു സമയം അനുവദിക്കാനായി ഫോണില്‍ വിളിച്ചപ്പോള്‍ അവര്‍ മരിച്ചെന്നു ബന്ധുക്കള്‍ അറിയിച്ചു. ആവശ്യത്തിനു ജീവനക്കാര്‍ ഇല്ലാത്തതിനാല്‍ ആഴ്ചയില്‍ രണ്ടു ബൈപാസ് ശസ്ത്രക്രിയ മാത്രമാണ് ഇവിടെ നടക്കുന്നത്. 10 നഴ്‌സുമാരെയും ഒരു പെര്‍ഫ്യൂഷനിസ്റ്റിനെയും നിയമിച്ചാല്‍ ആഴ്ചയില്‍ നാലും ബൈപാസ് സര്‍ജറി നടത്താം. എണ്‍പതോളം രോഗികളാണു ബൈപാസ് ശസ്ത്രക്രിയയ്ക്കായി കാത്തിരിക്കുന്നത്. ഉദരരോഗ വിഭാഗത്തില്‍ ഒരു സ്ഥിരം ഡോക്ടര്‍ പോലുമില്ല. ആരോഗ്യവകുപ്പില്‍ നിന്ന് വര്‍ക്കിംഗ് അറേഞ്ച്‌മെന്‍റ് അടിസ്ഥാനത്തില്‍ ഒരു അസി. പ്രഫസറെ നിയമിച്ചിരുന്നെങ്കിലും കാലാവധി നീട്ടിക്കൊടുത്തില്ല. തുടര്‍ന്ന് നാലുമാസം ഒപി അടച്ചിടേണ്ടിവന്നു. ഇതിനുശേഷം തിരുവനന്തപുരം മെഡിക്കല്‍ കോളജില്‍ ഒരു ഡോക്ടെ വര്‍ക്കിംഗ് അറേഞ്ച്‌മെന്‍റ് അടിസ്ഥാനത്തില്‍ നിയമിച്ചു. ഈ ഡോക്ടര്‍ ആഴ്ചയില്‍ ഒരു ദിവസമെത്തിയാണ് ഒപിയില്‍ രോഗികളെ നോക്കുന്നത്. ഈ ദിവസം ഇരുനൂറോളം രോഗികള്‍ ഒപിയില്‍ ഉണ്ടാകും. അടുത്തിടെ ഒപിയുള്ള ദിവസം ഈ ഡോക്ടര്‍ക്ക് എത്താനായില്ല. രോഗികള്‍ ബഹളം വച്ചതോടെ മെഡിക്കല്‍ കോളജ് പ്രിന്‍സിപ്പലും സൂപ്രണ്ടും മെഡിസിന്‍ വിഭാഗം മേധാവിയും എത്തിയാണു രോഗികളെ പരിശോധിച്ചത്. ജനറല്‍ മെഡിസിന്‍ ഡോക്ടറായ പ്രിന്‍സിപ്പലും അനസ്തീസിയ വിദഗ്ധനായ സൂപ്രണ്ടും ഉദരരോഗ ചികിത്സാവിഭാഗത്തിലെ രോഗികളെ നോക്കേണ്ടത്ര ദയനീയമാണ് ആലപ്പുഴ മെഡിക്കല്‍ കോളജിലെ ഡോക്ടര്‍ ക്ഷാമം.

മത്സ്യബന്ധന വള്ളം കടലിൽ തകർന്നു; കണ്ടെയ്നറിൽ തട്ടിയെന്ന് സംശയം

അമ്പലപ്പുഴ: മത്സ്യബന്ധന വള്ളം കടലിൽ തകർന്നു. നീർക്കുന്നം തെക്കാലിശേരിൽ വേണുവിന്‍റെ ഉടമസ്ഥതയിലുള്ള ഓണം എന്ന ലയ്‌ലാൻഡ് വള്ളത്തിനാണ് തകരാർ സംഭവിച്ചത്. കഴിഞ്ഞദിവസം രാവിലെ 45 തൊഴിലാളികളുമായി കായംകുളം തുറമുഖത്തുനിന്നാണ് വള്ളം പോയത്. മത്സ്യ ബന്ധനത്തിനിടെ ഉഗ്ര ശബ്ദം കേട്ടതിനുശേഷം വള്ളം ചലിക്കാതെയായി. പിന്നീട് തൊട്ടടുത്തുണ്ടായിരുന്ന മറ്റൊരു വള്ളത്തിന്‍റെ സഹായത്താൽ അപകടത്തിൽപ്പെട്ട വള്ളം കായംകുളം യാർഡിലെത്തിച്ച് പരിശോധിച്ചപ്പോഴാണ് വള്ളത്തിന്‍റെ അടിത്തട്ട് പൂർണമായും തകർന്നത് കണ്ടത്. ഏകദേശം എട്ട് ലക്ഷം രൂപയുടെ നഷ്ടം സംഭവിച്ചതായി വള്ളമുടമ പറഞ്ഞു. കപ്പലപകടത്തിനെത്തുടർന്ന് കടലിന് അടിത്തട്ടിലുള്ള കണ്ടെയ്നറിൽ തട്ടിയതാണ് അപകടകാരണമെന്നു കരുതുന്നു.

അനുഗ്രഹ നിമിഷത്തിന് സാക്ഷിയാകാൻ വിശ്വാസീസാഗരം

മാവേലിക്കര: ദൈവദാസൻ മാർ ഈവാനിയോസ് തിരുമേനിയുടെ ജന്മം കൊണ്ട് അനുഗ്രഹീതമായ മാവേലിക്കരയുടെ മണ്ണിൽ മലങ്കര സുറിയാനി കത്തോലിക്കാ സഭയുടെ മാവേലിക്കര ഭദ്രാസനത്തിന്‍റെ രണ്ടാമത്തെ മെത്രാപ്പോലീത്തയായി ഡോ. മാത്യൂസ് മാർ പോളിക്കോർപ്പസ് അഭിഷിക്തനാവുന്ന സ്ഥാനാരോഹണ ശുശ്രൂഷയിലും പ്രഥമ മെത്രാപ്പോലീത്ത ഡോ. ജോഷ്വാ മാർ ഇഗ്നാത്തിയോസിനു യാത്രയയപ്പ് നൽകാനുമുള്ള അനുഗ്രഹ നിമിഷത്തിൽ വിശ്വാസീ സാഗരം പുന്നമൂട് സെന്‍റ് മേരീസ് കത്തീഡ്രലിലേക്ക് ഒഴുകിയെത്തി. ബിഷപ് ഹൗസ് അങ്കണത്തിൽനിന്നും ഇന്നലെ ഉച്ചകഴിഞ്ഞ് സ്ഥാനാരോഹണ ശുശ്രൂഷയ്ക്കായി മേജർ ആർച്ച്ബിഷപ് കർദിനാൾ മാർ ബസേലിയോസ് ക്ലിമീസ് കാതോലിക്കാബാവയെയും വിവിധ ഭദ്രാസനത്തിൽനിന്നുള്ള ബിഷപുമാരേയും കത്തീഡ്രലിലേക്ക് സ്വീകരിച്ച് ആനയിച്ചു. അനുമോദന സമ്മേളനം കേന്ദ്ര ന്യൂനപക്ഷകാര്യ സഹമന്ത്രി ജോർജ് കുര്യൻ ഉദ്‌ഘാടനം ചെയ്തു. മേജർ ആർച്ച്ബിഷപ് കർദിനാൾ മാർ ബസേലിയോസ് ക്ലിമീസ് കാതോലിക്കാ ബാവ അധ്യക്ഷത വഹിച്ചു. മന്ത്രി സജി ചെറിയാൻ, കൊടിക്കുന്നിൽ സുരേഷ് എംപി, എംഎൽഎമാരായ രമേശ് ചെന്നിത്തല, എം.എസ്. അരുൺകുമാർ, യു. പ്രതിഭ, ചാണ്ടി ഉമ്മൻ, മുൻ കേന്ദ്രമന്ത്രി പ്രഫ. പി.ജെ. കുര്യൻ, അബ്ദുൽ സത്താർ മൗലവി അൽഖാസിമി, നഗരസഭാ ചെയർമാൻ നൈനാൻ സി. കുറ്റിശേരി, ഡി സിസി പ്രസിഡന്‍റ് ബി. ബാബുപ്രസാദ്‌, പന്തളം സുധാകരൻ, ഷോൺ ജോർജ്, ജോൺസൺ ഏബ്രഹാം, ജോസഫ് എം. പുതുശേരി, എബി കുര്യാക്കോസ്, കെ.ആർ. മുരളീധരൻ, അഡ്വ. കെ. കെ. അനൂപ്, സജി പായിക്കാട്ടേത്ത് തുടങ്ങിയ രാഷ്ട്രീയ സാമൂഹ്യ രംഗത്തെ പ്രമുഖർ, വൈദികർ, സന്യസ്തർ തുടങ്ങിയവരും പങ്കെടുത്തു.

നൂറ്റുവന്‍പാറ ടൂറിസം പദ്ധതിക്ക് ചിറകുമുളയ്ക്കുന്നു

ചെങ്ങന്നൂര്‍: പൗരാണിക ഐതിഹ്യപ്പെരുമയാല്‍ ശ്രധേയമായ പുലിയൂര്‍ പഞ്ചായത്തിലെ നൂറ്റുവന്‍പാറയെ കേന്ദ്രീകരിച്ച് ടൂറിസം പദ്ധതി നടപ്പാക്കാന്‍ സംസ്ഥാന ടൂറിസം വകുപ്പ് രണ്ടു കോടി 20 ലക്ഷം രൂപ അനുവദിച്ചു. മന്ത്രി സജി ചെറിയാന്‍റെ നിര്‍ദേശത്തെത്തുടര്‍ന്നാണ് തീരുമാനം. ചെങ്ങന്നൂരിന്‍റെ പാരമ്പര്യവും സാംസ്‌കാരിക പൈതൃകവും വിളിച്ചോതുന്ന പ്രദേശങ്ങളെ കൂട്ടിയിണക്കി പൈതൃക ടൂറിസം പദ്ധതി നടപ്പാക്കുന്നതിനുള്ള നിരന്തര പരിശ്രമങ്ങളുടെ ഭാഗമായാണ് നൂറ്റുവന്‍പാറ ടൂറിസം പദ്ധതിക്ക് ഇപ്പോള്‍ ഭരണാനുമതി ലഭിച്ചിരിക്കുന്നത്. പദ്ധതിയില്‍ വിഭാവനം ചെയ്യുന്ന പ്രധാന സൗകര്യങ്ങള്‍ പദ്ധതി യാഥാര്‍ഥ്യമാകുന്നതോടെ വിനോദസഞ്ചാരികള്‍ക്ക് നൂറ്റുവന്‍പാറയില്‍ മെച്ചപ്പെട്ട സൗകര്യങ്ങള്‍ ലഭ്യമാകും. വിശ്രമസ്ഥലം, റെയിന്‍ ഷെല്‍ട്ടര്‍, സുരക്ഷാ ഹാന്‍ഡ് റെയിലുകള്‍, കാന്‍റി ലിവര്‍ വ്യൂ പോയിന്‍റ്, സിസിടിവി നിരീക്ഷണം, ആധുനിക ശുചിമുറി സൗകര്യങ്ങള്‍, റോപ്പ് വേ, സുരക്ഷാ ഗാര്‍ഡുകള്‍, മറ്റ് സുരക്ഷാ സംവിധാനങ്ങള്‍ എന്നിവയാണ് ഇതില്‍ ഉള്‍പ്പെടുന്നത്. സന്ദര്‍ശകരുടെ എണ്ണം വര്‍ധിക്കുന്നതിനനുസരിച്ച് കൂടുതല്‍ സൗകര്യങ്ങള്‍ ഏര്‍പ്പെടുത്താനും പദ്ധതി ലക്ഷ്യമിടുന്നുണ്ട്. ചെങ്ങന്നൂരിന് പുതിയ ടൂറിസം സാധ്യതകള്‍ നൂറ്റുവന്‍പാറ ടൂറിസം പദ്ധതി യാഥാര്‍ഥ്യമാകുന്നതോടെ പാണ്ഡവന്‍ പാറ, ആലാ പൂമലച്ചാല്‍, കുതിരവട്ടം ചിറ അക്വാടൂറിസം തുടങ്ങിയ നിലവിലുള്ള പദ്ധതികളുമായി സംയോജിപ്പിച്ച് കൂടുതല്‍ ടൂറിസ്റ്റ് ഡെസ്റ്റിനേഷനുകള്‍ വികസിപ്പിക്കാന്‍ കഴിയും. ഇത് ചെങ്ങന്നൂരിന്‍റെ ടൂറിസം മേഖലയ്ക്ക് വലിയ ഉണര്‍വ് നല്‍കുമെന്ന് മന്ത്രി സജി ചെറിയാന്‍ പറഞ്ഞു. ഈ പദ്ധതി ചെങ്ങന്നൂരിന്‍റെ സാമ്പത്തിക, സാംസ്‌കാരിക രംഗങ്ങളില്‍ പുതിയ അധ്യായം കുറിക്കുമെന്ന പ്രതീക്ഷയിലാണ് പ്രദേശവാസികള്‍.

അടിയന്തര ശസ്ത്രക്രിയ വേണ്ടത് മെഡി. കോളജുകള്‍ക്ക്: കെ.സി. വേണുഗോപാല്‍

അന്പലപ്പുഴ: അടിയന്തര ശസ്ത്രക്രിയ വേണ്ടത് മെഡിക്കല്‍ കോളജുകള്‍ക്കും സര്‍ക്കാര്‍ ആശുപത്രികള്‍ക്കുമെന്ന് കെ.സി. വേണുഗോപാല്‍ എംപി. ഡോ. ഹാരീസ് ഹസന്‍റെ വെളിപ്പെടുത്തല്‍ ചൂണ്ടിക്കാണിക്കുന്നത് കേരളത്തിലെ പൊതുജന ആരോഗ്യത്തിന്‍റെ ഏറ്റവും ദയനീയാവസ്ഥയാണ്. കേരളത്തിലെ പൊതുജന ആരോഗ്യത്തിന്‍റെ ഏറ്റവും ദയനീയാവസ്ഥയാണ് തിരുവനന്തപുരം മെഡിക്കല്‍ കോളജിലെ യുറോളജി വിഭാഗം മേധാവി ഡോ. ഹാരീസ് ഹസന്‍റെ വെളിപ്പെടുത്തലിലൂടെ ചൂണ്ടിക്കാണിക്കപ്പെട്ടതെന്നും ഗത്യന്തരമില്ലാതെയാണ് ഡോ. ഹാരീസ് ഇത്തരമൊരു സാഹസത്തിനു മുതിര്‍ന്നതെന്നും അദ്ദേഹം കൂട്ടിച്ചേര്‍ത്തു. പുന്നപ്രയില്‍ മാധ്യമങ്ങളുടെ ചോദ്യങ്ങളോട് പ്രതികരിക്കുകയായിരുന്നു അദ്ദേഹം. ഒരുകാലത്ത് കേരളത്തിലെ ചികിത്സാരംഗത്ത് അന്തിമവാക്ക് മെഡിക്കല്‍ കോളജുകളുടേതായിരുന്നു. ഇന്നതല്ലൊം നഷ്ടമായി. അതിനു കാരണം അവശ്യത്തിന് ഡോക്ടര്‍മാരില്ലാത്തതും ശസ്ത്രക്രിയ ഉപകരണങ്ങളും മരുന്നും ഇല്ലാത്തതുമാണ്. നമ്മുടെ ആരോഗ്യരംഗം മികച്ചതെന്ന് കൊട്ടിഘോഷിക്കുമ്പോഴാണ് നമ്മുടെ മെഡിക്കല്‍ കോളജുകള്‍ പരിതാപകരമായ അവസ്ഥ നേരിടുന്നത്. ഡോക്ടര്‍മാരുടെയും പാരമെഡിക്കല്‍ ജീവനക്കാരുടെയും നഴ്‌സുമാരുടെയും നിരവധി ഒഴിവുകളുണ്ട്. അത് നികത്താന്‍ സര്‍ക്കാര്‍ നടപടിയെടുക്കുന്നില്ല. ഒഴിവുകളിലേക്ക് ഡോക്ടര്‍മാരെ നിയമിച്ചാലും അവര്‍ ചുമതലയേറ്റെടുക്കാത്ത അവസ്ഥയുണ്ട്. അതെന്തുകൊണ്ടാണെന്ന് പഠിക്കാനോ പരിഹാര നടപടിയെടുക്കാനോ സര്‍ക്കാര്‍ തയാറാകുന്നില്ല. സര്‍ക്കാരിന്‍റെ ഇത്തരം സമീപനങ്ങള്‍ സ്വകാര്യ ആശുപത്രികളെ സഹായിക്കാനാണെന്നും കെ.സി. വേണുഗോപാല്‍ പറഞ്ഞു. മെഡിക്കല്‍ കോളജിലെ ഒഴിവുള്ള തസ്തികകള്‍ നികത്താന്‍ സര്‍ക്കാര്‍ തയാറാകുന്നില്ല. സൂപ്പര്‍ സ്‌പെഷാലിറ്റി സൗകര്യം ഇതുവരെ യാഥാര്‍ഥ്യമാക്കിയില്ല. അറ്റകുറ്റപ്പണി നടത്തുന്നതില്‍ പിഡബ്ല്യുഡിയും ആരോഗ്യവകുപ്പും തമ്മില്‍ ശീതസമരമാണ്. സര്‍ജറി വിഭാഗത്തില്‍ 16 അസി. പ്രഫസര്‍മാരുടെ ഒഴിവുണ്ട്. അതില്‍ പതിനൊന്നെണ്ണവും ഒഴിഞ്ഞുകിടക്കുകയാണ്. റോഡിയോളജി ഡിപ്പാര്‍ട്ടുമെന്‍റില്‍ 13 തസ്തകയില്‍ നാലു പേര്‍മാത്രമാണ് ജോലിയിലുള്ളത്. അതീവഗുരുതരമായ തകര്‍ച്ചയിലേക്കു കേരളത്തിന്‍റെ പൊതുജന ആരോഗ്യരംഗത്തെ നയിക്കുകയാണ് പിണറായി സര്‍ക്കാരെന്നും അതിന്‍റെ തെളിവാണ് ഡോ. ഹാരീസ് ഹസന്‍റെ തുറന്നുപറച്ചിലെന്നും കെ.സി. വേണുഗോപാല്‍ പറഞ്ഞു.

പഠിച്ച സ്കൂളിൽ തന്നെ പ്രഥമ അധ്യാപികയായി ചുമതലയേറ്റ് ക്രിസ്ജ

ത.ുറവൂര്‍: പഠിച്ച വിദ്യാലയത്തില്‍ തന്നെ പ്രഥമ അധ്യാപികയായി ചുമതലയേറ്റ് ക്രിസ്ജ നോര്‍ബര്‍ട്ട്. പള്ളിത്തോട് പുന്നയ്ക്കല്‍ നോര്‍ബര്‍ട്ടിന്‍റെയും ലീലാമ്മയുടെയും മൂത്തമകളും ഇപ്പോള്‍ അര്‍ത്തുങ്കല്‍ താമസക്കാരിയുമായ ക്രിസ്ജ നോര്‍ബര്‍ട്ട് ആണ് കഴിഞ്ഞദിവസം പള്ളിത്തോട് സെന്‍റ് സെബാസ്റ്റ്യന്‍ ഹൈസ്‌കൂളിന്‍റെ പ്രഥമാധ്യാപികയായി ചുമതലയേറ്റത്. പത്താം ക്ലാസ് വരെ പഠിച്ച പള്ളിത്തോട് സെന്‍റ് സെബാസ്റ്റ്യന്‍സ് ഹൈസ്‌കൂള്‍ പ്രഥമ അധ്യാപികയായി ചുമതലയേല്‍ക്കുമ്പോള്‍ ഇരട്ടിമധുരമാണ് ക്രിസ്ജാ ടീച്ചറിനു ലഭിക്കുന്നത്. നൂറുകണക്കിന് വിദ്യാര്‍ഥികള്‍ക്ക് അറിവ് പകര്‍ന്നു നല്‍കിയ തന്‍റെ അമ്മ ലീലാമ്മ നോര്‍ബര്‍ട്ട് പഠിപ്പിച്ച അതേ സ്‌കൂളില്‍തന്നെ പ്രഥമാധ്യാപികയായത് ദൈവാനുഗ്രമായാണ് ടീച്ചര്‍ കരുതുന്നത്. താന്‍ ജനിച്ചുവളര്‍ന്ന പള്ളിത്തോടെന്ന തീരദേശ ഗ്രാമത്തില്‍ ആയിരക്കണക്കിന് വിദ്യാര്‍ഥികള്‍ക്ക് അറിവിന്‍റെ വെളിച്ചമേകി തലയെടുപ്പോടെ ഉയര്‍ന്നുനില്‍ക്കുന്ന പള്ളിത്തോട് സെന്‍റ് സെബാസ്റ്റ്യന്‍സ് ഹൈസ്‌കൂളില്‍ ഭാരിച്ച ഉത്തരവാദിത്വത്തോടെയാണ് ചുമതലയേറ്റിരിക്കുന്നത്. മുമ്പ് ആലപ്പുഴ ലിയോ തേർട്ടീന്ത്, അര്‍ത്തുങ്കല്‍ സെന്‍റ് ആഡ്രൂസ് സ്‌കൂളുകളിലും ടീച്ചര്‍ പഠിപ്പിച്ചിട്ടുണ്ട്. പള്ളിത്തോട് സ്‌കൂളിനെ ഉന്നതിയില്‍ എത്തിക്കുക എന്നതാണ് പ്രഥമ ലക്ഷ്യമെന്ന് ടീച്ചര്‍ പറഞ്ഞു. അര്‍ത്തുങ്കല്‍ കുരിശുങ്കല്‍ കുടുംബാംഗമായ അഗസ്റ്റിനാണ് ഭര്‍ത്താവ്. എക്യുന്‍, എവിന്‍ എന്നിവരാണ് മക്കള്‍.

നിരണം തീര്‍ഥാടനം ആറിന്; സ്വാഗതസംഘം ഓഫീസ് തുറന്നു

ചങ്ങനാശേരി: അതിരൂപതാ യുവദീപ്തി-എസ്എംവൈഎമ്മിന്‍റെ ആഭിമുഖ്യത്തില്‍ ജൂലൈ ആറിന് സംഘടിപ്പിക്കുന്ന നിരണം തീര്‍ഥാടനത്തിനുള്ള സ്വാഗതസംഘം ഓഫീസ് പാസ്റ്ററല്‍ സെന്‍ററില്‍ തുറന്നു. അതിരൂപത ഡയറക്ടര്‍ ഫാ. സാവിയോ മാനാട്ട് ഉദ്ഘാടനം ചെയ്തു. അതിരൂപത പ്രസിഡന്‍റ് അരുണ്‍ ടോം അധ്യക്ഷത വഹിച്ചു. അസിസ്റ്റന്‍റ് ഡയറക്ടര്‍ ഫാ. ടോണി പുതുവീട്ടില്‍ക്കളം, ഡെപ്യൂട്ടി പ്രസിഡന്‍റ് എലിസബത്ത് വര്‍ഗീസ്, ജനറല്‍ സെക്രട്ടറി ക്രിസ്റ്റി കെ. കുഞ്ഞുമോന്‍, ട്രഷറര്‍ സെബാസ്റ്റ്യ ൻ മഞ്ഞുമ്മേല്‍, കണ്‍വീനര്‍മാരായ ക്രിസ്റ്റിന്‍ സേവ്യര്‍, ലൂസി ഫിലിപ്പോസ്, ഡെന്നി, റിയ റ്റോജി എന്നിവര്‍ പ്രസംഗിച്ചു.

കടലിൽ കാണാതായ മത്സ്യത്തൊഴിലാളിയുടെ മൃതദേഹം കണ്ടെത്തി

അമ്പലപ്പുഴ: പുന്നപ്ര പറവൂര്‍ സെന്‍റ് ആന്‍റണീസ് ചാപ്പലിന്‍റെ തീരത്തു നിന്ന് കടലില്‍ കാണാതായ മത്സ്യത്തൊഴിലാളിയുടെ മൃതദേഹം കണ്ടെത്തി. പൊന്തുവള്ളം മറിഞ്ഞ് കാണാതായപുന്നപ്ര വടക്ക് പഞ്ചായത്ത് 12-ാം വാര്‍ഡ് ചാണയില്‍ വീട്ടില്‍ സ്റ്റീഫ(റോക്കി-55)ന്‍റെ മൃതദേഹമാണ് ഇന്നലെ രാവിലെ പത്തോടെ തോട്ടപ്പള്ളി പൊഴി മുഖത്തടിഞ്ഞത്. പുലിമുരുകന്‍ എന്ന വള്ളത്തിലെ തൊഴിലാളികളാണ് മ്യതദേഹം കണ്ടെത്തിയത്. വെള്ളിയാഴ്ച പുലര്‍ച്ചെ പൊന്തു ഇറക്കുന്നതിനിടയില്‍ ശക്തമായ തിരയില്‍പ്പെട്ടാണ് റോക്കിയെ കാണാതായത്. തുടര്‍ന്ന് തീരദേശ പോലീസും, മത്സ്യത്തൊഴിലാളികളും തെരച്ചില്‍ നടത്തിയെങ്കിലും കണ്ടെത്താനായില്ല. മൃതദേഹം വണ്ടാനം മെഡിക്കല്‍ കോളജ് ആശുപത്രി മോര്‍ച്ചറിയിലേക്കു മാറ്റി. ഭാര്യ: മോളി. മക്കള്‍: പ്രിന്‍സി, റോബിന്‍, മരുമകന്‍: ഡിക്‌സണ്‍.

47 ലക്ഷം രൂപ തട്ടിയ പ്രതി റിമാൻഡിൽ

ചെങ്ങന്നൂര്‍: കുവൈറ്റ് ഓയില്‍ കമ്പനിയില്‍ ജോലി വാഗ്ദാനം ചെയ്ത് പണം തട്ടിയ പ്രതി റിമാന്‍ഡില്‍. വെണ്‍മണി സ്വദേശിയായ യുവതിയെ കുവൈറ്റ് ഓയില്‍ കമ്പനിയില്‍ സ്റ്റാഫ് നഴ്‌സ് ആയി ജോലി വാങ്ങി നല്‍കാമെന്ന് പറഞ്ഞ് കബളിപ്പിച്ച് 47 ലക്ഷത്തോളം രൂപ തട്ടിയെടുത്ത വെണ്‍ണി പടിഞ്ഞാറേ മുറിയില്‍ തെങ്ങുംതറയില്‍ എസ്. വില്ലയില്‍ സജു വര്‍ഗീസിനെ (49) ചെങ്ങന്നൂര്‍ ഒന്നാം ക്ലാസ് ജുഡിഷല്‍ മജിസ്‌ട്രേറ്റ് കോടതി 14 ദിവസത്തേക്ക് മാവേലിക്കര സബ് ജയിലിലേക്ക് റിമാന്‍ഡ് ചെയ്തു. 2023 മുതല്‍ പലതവണകളായി ഗൂഗിള്‍ പേവഴിയും ബാങ്ക് അക്കൗണ്ട് വഴിയും പ്രതി പരാതിക്കാരില്‍നിന്നു പണം തട്ടിയെടുത്തെന്നാണ് കേസ്. തട്ടിപ്പ് നടത്തിയിനുശേഷം പല സ്ഥലങ്ങളിലായി ഒളിവില്‍ കഴിഞ്ഞുവന്നിരുന്ന ഇയാളെ കണ്ടെത്തുന്നതിനായി ചെങ്ങന്നൂര്‍ ഡിവൈഎസ്പി ടി. ബിനുകുമാറിന്‍റെ നേതൃത്വത്തിലുള്ള പോലീസ് സംഘമാണ് ഡല്‍ഹിയില്‍നിന്ന് പ്രതിയെ അറസ്റ്റ് ചെയ്തത്.

ദേശീയപാത കൈയടക്കി തെരുവുനായ്ക്കൾ

അമ്പലപ്പുഴ: ദേശീയപാത ഇരട്ടക്കുളങ്ങര ഭാഗത്ത് യാത്രക്കാർക്കു ഭീക്ഷണിയായി തെരുവുനായ്ക്കൾ. കാക്കാഴം മേൽപ്പാലത്തിൽനിന്ന് അമ്പലപ്പുഴയിലേക്ക് ഏറെ വാഹനങ്ങൾ പോകുന്ന ഭാഗത്താണ് തെരുവുനായ് ക്കൂട്ടം ഭീതിപരത്തുന്നത്. സമീപത്തെ ഇറച്ചി, മത്സ്യവ്യാപാരശാലകളിൽനിന്നു പുറംതള്ളുന്ന അവശിഷ്ടങ്ങൾക്കായി കടിപിടികൂടുന്ന നായ്ക്കൾ ഇരുചക്രവാഹനങ്ങൾക്കും കാൽനടയാത്രക്കാർക്കുമാണ് ഭീഷണിയാകുന്നത്. റോഡിലൂടെ തലങ്ങും വിലങ്ങും പായുന്ന നായയെ തട്ടി വീണുള്ള അപകടങ്ങളും പതിവായി. സമീപത്തെ കാക്കാഴം മുഹ്ദ്ദീയൻപള്ളി, ഇരട്ടക്കുളങ്ങര ശിവക്ഷേത്രം, വിദ്യാഭ്യാസ സ്ഥാപനങ്ങളിലേക്ക് അടക്കം വിശ്വാസികളും വിദ്യാർഥികളും പോകുന്നതാണ്.

അപ്പര്‍ കുട്ടനാട്ടില്‍ ജലനിരപ്പ് താഴുന്നില്ല; ഒട്ടുമിക്ക പ്രദേശങ്ങളും വെള്ളക്കെട്ടില്‍

എടത്വ: മഴയ്ക്ക് ശമനമായെങ്കിങ്കിലും അപ്പര്‍ കുട്ടനാട്ടില്‍ ജലനിരപ്പ് താഴുന്നില്ല. ഒട്ടുമിക്ക പ്രദേശങ്ങളും വെള്ളക്കെട്ടില്‍. കാലവര്‍ഷക്കെടുതിയുടെ ആരംഭഘട്ടത്തില്‍തന്നെ മൂന്നു വെള്ളപ്പൊക്കമാണ് കുട്ടനാട്ടുകാര്‍ നേരിട്ടത്. താഴ്ന്ന പ്രദേശങ്ങളിലെ റോഡുകള്‍ മുട്ടോളം വെള്ളത്തിലാണ്. കിഴക്കന്‍ വെള്ളത്തിന്‍റെ വരവിലും മഴ പെയ്തും ഉയര്‍ന്ന ജലനിരപ്പ് താഴുന്നില്ല. തലവടി, മുട്ടാര്‍, വീയപുരം, തകഴി, എടത്വ എന്നീ പഞ്ചായത്തില്‍ ജലനിരപ്പിന് മാറ്റമില്ലാതെ തുടരുകയാണ്. നിരവധി വീടുകളില്‍ വെള്ളം കയറിയിരുന്നു. വീടുകളില്‍നിന്ന് വെള്ളം ഇറങ്ങിത്തുടങ്ങിയിട്ടില്ല. ഒട്ടുമിക്ക റോഡുകളിലും യാത്രക്കാര്‍ക്ക് സഞ്ചരിക്കാന്‍ കഴിയാത്ത നിലയില്‍ വെള്ളം കെട്ടിക്കിടക്കുകയാണ്. തോട്ടപ്പള്ളി പൊഴിയിലൂടെ കടലിലേക്ക് വെള്ളം ഒഴുകി മാറുന്നുണ്ടെങ്കിലും കിഴക്കന്‍ വെള്ളത്തിന്‍റെ വരവ് തുടരുന്നതാണ് ജലനിരപ്പിന് കാര്യമായ മാറ്റം സംഭവിക്കുന്നില്ല. ഒരുമാസമായി കുട്ടനാട്, അപ്പര്‍ കുട്ടനാട് മേഖലയിലെ ജനങ്ങള്‍ കടുത്ത ദുരിതമാണ് അനുഭവിക്കുന്നത്. ഇതിനോടകം മൂന്നു തവണ വെള്ളം ഉയര്‍ന്ന് ജനജീവിതം സ്തംഭിച്ചിരുന്നു. നിരവധി വീടുകളും തകര്‍ന്നു. വിദ്യാര്‍ഥികളുടെ പഠനവും മുടങ്ങീരിക്കുകയാണ്. അധ്യായനം ആരംഭിച്ച് ഒരു മാസമായിട്ടും വിരലില്‍ എണ്ണാവുന്ന ക്ലാസുകളാണ് നടന്നത്. വിദ്യാര്‍ഥികളുടെ പഠനം മുടങ്ങുന്നതില്‍ രക്ഷിതാക്കള്‍ക്കും അധ്യാപകര്‍ക്കും ആശങ്കയാണ്. കുട്ടനാട്, അപ്പര്‍ കുട്ടനാട് മേഖലയിലെ ജനങ്ങളുടെ തിരാദുരിതത്തിന് സര്‍ക്കാര്‍ തലത്തില്‍ യാതൊരു നടപടിയും ചെയ്യുന്നില്ലന്ന് ആക്ഷേപമുണ്ട്. മഴക്കെടുതികള്‍ക്ക് മുന്‍പേ ജലാശയങ്ങളിലെ ആഴംകൂട്ടല്‍ ഉള്‍പ്പെടെയുള്ള പ്രവര്‍ത്തികള്‍ സമയബന്ധിതമായി നടത്തിയിരുന്നെങ്കില്‍ കുട്ടനാട്ടിലെ ജനങ്ങള്‍ക്ക് വെള്ളപ്പൊക്ക കെടുതിയില്‍നിന്ന് ഒരു പരിധിവരെ രക്ഷനേടാന്‍ കഴിയുമായിരുന്നു. ഇതിനായുള്ള ആസൂത്രണം സര്‍ക്കാര്‍ തലത്തിലോ പഞ്ചായത്ത് തലത്തിലോ ചെയ്തിരുന്നില്ല. തോട്ടപ്പള്ളി പൊഴി തുറക്കുന്നതുപോലും കുട്ടനാട് മുങ്ങിക്കഴിഞ്ഞാണ്. വര്‍ഷാവര്‍ഷം നേരിടുന്ന പ്രതിസന്ധിക്കു ശാശ്വത പരിഹാരം കാണാത്തതിനാല്‍ കുട്ടനാട് ഉപേക്ഷിച്ച് പോകുന്ന കുടുംബങ്ങളുടെ എണ്ണവും വര്‍ധിച്ചു വരുകയാണ്.

കേരള പ്രഫഷണല്‍ ഡ്രാമാ ചേമ്പറിന്‍റെ സംസ്ഥാന സമ്മേളനം

അമ്പലപ്പുഴ: കേരള പ്രഫഷണല്‍ ഡ്രാമാ ചേമ്പറിന്‍റെ ഇരുപത്തി രണ്ടാം സംസ്ഥാന സമ്മേളനം അമ്പലപ്പുഴ കോറല്‍ ഹൈറ്റ്‌സില്‍ നടന്നു. എച്ച്. സലാം എംഎല്‍എ സമ്മേളനം ഉദ്ഘാടനം ചെയ്തു. ചെയര്‍മാന്‍ അഡ്വ. നെയ്യാറ്റിന്‍കര പത്മകുമാര്‍ അധ്യക്ഷനായി. സഹീര്‍ അലി, പ്രമോദ് വെളിയനാട്, രാജേഷ് ഇരുളം, ഹേമന്ദ് കുമാര്‍, രമേശന്‍ ബ്രഹ്‌മ, രമേശന്‍ രംഗഭാഷ, വേണു രംഗഭാഷ, സുരീഷ്, മനേഷ്, സുദര്‍ശനന്‍ വര്‍ണം എന്നിവരെ കേരള സംഗീത നാടക അക്കാദമി സെക്രട്ടറി കരിവെള്ളൂര്‍ മുരളി ആദരിച്ചു. പയ്യന്നൂര്‍ മുരളി ആമുഖ പ്രഭാഷണം നടത്തി. സി.ആര്‍. മഹേഷ് എംഎല്‍എ, ചേമ്പര്‍ രക്ഷാധികാരി സി. രാധാകൃഷ്ണന്‍, വല്‍സന്‍ നിസരി, അപ്പു കുളനട, ധനന്‍ കെ. ചെട്ടിയാഞ്ചേരി, അഷ്‌റഫ് മുഹമ്മദ് എന്നിവര്‍ പ്രസംഗിച്ചു.

മത്സ്യത്തൊഴിലാളി ദിനാചരണവും പുരസ്‌കാര വിതരണവും

ആലപ്പുഴ: റേഡിയോ നെയ്തലും തിയോച്ചന്‍ ചാരിറ്റബിള്‍ ട്രസ്റ്റും ചേര്‍ന്ന് ആലപ്പുഴ പാം ബീച്ച് റിസോര്‍ട്ടില്‍ സംഘടിപ്പിച്ച ലോക മത്സ്യത്തൊഴിലാളി ദിനാഘോഷവും മത്സ്യത്തൊഴിലാളികള്‍ക്കുള്ള പുരസ്‌കാര വിതരണവും നടത്തി. സമ്മേളനോദ്ഘാടനവും പുരസ്‌കാര വിതരണവും മന്ത്രി സജി ചെറിയാന്‍ നിര്‍വഹിച്ചു. ആലപ്പുഴ എഡിഎം ആശാ ഏബ്രഹാം മുഖ്യ പ്രഭാഷണം നടത്തി. റോയി പി. തിയോച്ചന്‍ അധ്യക്ഷനായി. മത്സ്യത്തൊഴിലാളി വിഭാഗത്തില്‍നിന്നു ഏഴു മത്സ്യത്തൊഴിലാളികള്‍ക്ക് പുരസ്‌കാരം നല്‍കി ആദരിച്ചു. കെ.ജെ. സന്ധ്യാവ് പുന്നപ്ര, ഷംജി അമ്പലപ്പുഴ, അറയ്ക്കല്‍ ജേക്കബ്ബ്, പൊള്ളേത്തൈ ജാക്‌സണ്‍, കുഞ്ഞപ്പന്‍ അര്‍ത്തുങ്കല്‍, ബിനു പൊന്നന്‍, ഇമ്മാനുവേല്‍ ചെട്ടികാട്, ജോണി കാട്ടൂര്‍, മേരി ജാന്‍സി വില്‍സണ്‍ എന്നിവരെയാണ് ആദരിച്ചത്. ഫാ. സേവ്യര്‍ കുടിയാംശേരി, ഗര്‍ഷോം രാഹൂല്‍ എന്നിവർ പ്രസംഗിച്ചു.

കാര്‍മല്‍ പോളിടെക്‌നിക്കില്‍ ബിരുദദാനച്ചടങ്ങും റിക്രൂട്ട്‌മെന്‍റ് ഡ്രൈവും

ആലപ്പുഴ: ഹുണ്ടായ് മോട്ടോര്‍ ഇന്ത്യയും കാര്‍മല്‍ പോളിടെക്നിക് പുന്നപ്രയും സംയുക്തമായി നടത്തി വരുന്ന ഹുണ്ടായ് പ്രഫഷണല്‍ ഡെവലപ് സെന്‍ററിലെ രണ്ടാമത്തെ ബാച്ചായ 2022-2025 ലെ ഓട്ടോമൊബൈല്‍ എന്‍ജിനിയറിംഗ് വിദ്യാര്‍ഥികളുടെ ഗ്രാജുവേഷന്‍ സെറിമണിയും റിക്രൂട്ട്‌മെന്‍റ് ഡ്രൈവും ഹുണ്ടായ് മോട്ടോര്‍ ഇന്ത്യ റീജണല്‍ ട്രെയിനിംഗ് മാനേജര്‍ ഹെല്‍വിസ് പി. ക്ലീറ്റസ് ഉദ്ഘാടനം ചെയ്തു. കോളജ് പ്രിന്‍സിപ്പല്‍ ഫാ. ജയിംസ് ദേവസ്യ സിഎംഐ അധ്യക്ഷത വഹിച്ചു. ടെറിട്ടറി പാര്‍ട്‌സ് ആന്‍ഡ് സര്‍വീസ് മാനേജര്‍മാരായ രോഹിത് ജി. കര്‍ത്ത, സേറലതന്‍, ഓട്ടോമൊബൈല്‍ എച്ച്ഒഡി ജോനു ജോസഫ്, അധ്യാപകരായ അനീഷ് യു, ജോബിന്‍ ജോര്‍ജ്, അബിന്‍ പി.ജി, ദീപു വി. കുറുപ്പ് എന്നിവര്‍ പങ്കെടുത്തു. റിക്രൂട്ട്‌മെന്‍റ് ഡ്രൈവില്‍ പോപ്പുലര്‍ ഹ്യുണ്ടായ്, കേഷ്വിന്‍ ഹ്യുണ്ടായ്, ആപ്കോ മോട്ടോര്‍സ് എന്നീ കമ്പനികള്‍ പങ്കെടുത്തു.

പത്തനംതിട്ട എസ്പിക്കെതിരേ മുഖ്യമന്ത്രിക്ക് ആലപ്പുഴ ഡിവൈഎസ്പിയുടെ പരാതി

പത്തനംതിട്ട: എസ്പിക്കെതിരേ മുഖ്യമന്ത്രിക്ക് പരാതി നല്‍കി ഡിവൈഎസ്പി. പത്തനംതിട്ട എസ്പി വി.ജി. വിനോദ് കുമാറിനെതിരേ ആലപ്പുഴ ഡിവൈഎസ്പി എം.ആര്‍. മധുബാബുവാണ് പരാതി നല്‍കിയത്. റൗഡി ഹിസ്റ്ററി ലിസ്റ്റില്‍ ഉള്‍പ്പെട്ട അഭിഭാഷകനെ സ്പെഷല്‍ പബ്ലിക് പ്രോസിക്യൂട്ടര്‍ പട്ടികയില്‍ ഉള്‍പ്പെടുത്തി എസ്പി സര്‍ക്കാരിനെ തെറ്റിദ്ധരിപ്പിച്ചു എന്നാണ് പരാതി. അഭിഭാഷകനായ പത്തനംതിട്ട സ്വദേശി പ്രശാന്ത് വി. കുറുപ്പിനെ പട്ടികയില്‍ ഉള്‍പ്പെടുത്തിയതാണ് പരാതിക്ക് അടിസ്ഥാനം. വ്യക്തിവിരോധം തീര്‍ക്കുന്നതിന് എസ്പി പ്രശാന്ത് വി. കുറുപ്പിനെ സ്പെഷല്‍ പബ്ലിക് പ്രോസിക്യൂട്ടറുടെ പട്ടികയില്‍ ഉള്‍പ്പെടുത്തിയെന്നും പരാതിയില്‍ പറയുന്നു. എന്നാല്‍, തനിക്കെതിരെയുള്ളത് കള്ളക്കേസുകളാണെന്നാണ് പ്രശാന്ത് വി. കുറുപ്പ് പറയുന്നത്. താന്‍ നിരവധി ക്രിമിനല്‍ കേസുകള്‍ വാദിച്ച് പരിചയമുള്ള അഭിഭാഷകനാണെന്നും അദ്ദേഹം പറഞ്ഞു. കൊല്ലപ്പെട്ട ആളുടെ ബന്ധുക്കളുടെ താത്പര്യപ്രകാരം ഹൈക്കോടതിയാണ് തന്നെ സ്പെഷല്‍ പ്രോസിക്യൂട്ടറായി നിയമിച്ചതെന്നും ജില്ലാ പോലീസ് മേധാവിക്ക് തന്നോട് പ്രത്യേക താത്പര്യം ഇല്ലെന്നും പ്രശാന്ത് പറഞ്ഞു.

തീരദേശ റോഡ് കാടുകയറിയ നിലയിൽ; യാത ദുഷ്കരം

തുറവൂര്‍: തീരദേശ റോഡിന്‍റെ ഇരുവശവും കാടുകയറിയതിനെത്തുടര്‍ന്ന് യാത്ര ദുഷ്‌കരം. ചെല്ലാനം മുതല്‍ തൈക്കല്‍ വരെയുള്ള തീരദേശ റോഡാണ് കാടുകയറിയിരിക്കുന്നത്. കുറ്റിക്കാടുകളും മരങ്ങളും റോഡിലേക്ക് വീണുകിടക്കുകയാണ്. ചില സ്ഥലങ്ങളില്‍ റോഡിന്‍റെ മധ്യഭാഗം വരെ കാടുകയറിയ നിലയിലാണ്. കാല്‍നട യാത്രക്കാരാണ് ഏറ്റവും കൂടുതല്‍ ദുരിതമനുഭവിക്കുന്നത്. തീരദേശ റോഡിന്‍റെ വശങ്ങളില്‍ നിരവധി സ്‌കൂളുകളാണ് പ്രവര്‍ത്തിക്കുന്നത്. ഇവിടെ പഠിക്കുന്ന കുട്ടികളാണ് ദുരന്തമുഖത്തുകൂടി യാത്ര ചെയ്യുന്നത്. ദേശീയപാതയില്‍ വികസന പ്രവര്‍ത്തനങ്ങള്‍ നടക്കുന്നതിനാല്‍ കൂടുതല്‍ വാഹനങ്ങളും തീരദേശ റോഡിലൂടെയാണ് സഞ്ചരിക്കുന്നത്. വശങ്ങളിലെ കാടുമൂലം കുട്ടികള്‍ റോഡില്‍ ഇറങ്ങി നടക്കേണ്ട അവസ്ഥയാണ്. ഇത് അപകടങ്ങള്‍ക്ക് കാരണമാകുന്നു. വാഹന ഗതാഗതത്തെയും ഇത് സാരമായി ബാധിച്ചിരിക്കുകയാണ്. അന്ധകാരനഴി മുതല്‍ ചെല്ലാനം വരെയുള്ള ഭാഗം റോഡിന്‍റെ കുറെഭാഗം കാടു പിടിച്ചുകിടക്കുകയാണ്. ഈ ഭാഗങ്ങളില്‍ റോഡ് തകര്‍ന്നുകിടക്കുന്നതും അപകടങ്ങള്‍ വര്‍ധിക്കാന്‍ ഇടയാക്കുന്നു. മുന്‍വര്‍ഷങ്ങളില്‍ തൊഴിലുറപ്പു പദ്ധതിയില്‍പ്പെടുത്തി റോഡിന്‍റെ വശങ്ങളിലെ കാടുകള്‍ വെട്ടിക്കളയുമായിരുന്നു. എന്നാല്‍, ഇപ്പോള്‍ ഇതും നിലച്ചിരിക്കുകയാണ്. തീരദേശ റോഡിന്‍റെ ഇരുവശങ്ങളിലേയും കാട്ടുകള്‍ വെട്ടി തെളിക്കാനുള്ള അടിയന്തര നടപടി സ്വീകരിക്കണമെന്ന ആവശ്യം ശക്തമാകുന്നു.

ആടുകളെ തെരുവുനായ്ക്കള്‍ കടിച്ചുകൊന്നു

ചേര്‍ത്തല: വീടിനോടു ചേര്‍ന്നുള്ള തൊഴുത്തില്‍ കെട്ടിയിരുന്ന ആടുകളെ തെരുവുനായ്ക്കൾ കടിച്ചുകൊന്നു. ചേർത്തല നഗരസഭ എട്ടാം വാർഡ് മാന്നനാടിയിൽ സുനിതയുടെ നാലര വയസുള്ളതും ആറുമാസം പ്രായമുള്ളതുമായ രണ്ടു ആടുകളെയാണ് ഇന്നലെ രാത്രി തെരുവുനായ്ക്കൾ കടിച്ചുകൊന്നത്. ഭർത്താവ് മരണപ്പെട്ട ഈ കുടുംബത്തിന്‍റെ വരുമാന മാർഗമായിരുന്നു ആടുവളര്‍ത്തല്‍. ആടുകളുടെ കരച്ചില്‍ കേട്ട് വീട്ടുകാര്‍ പുറത്തിറങ്ങി നായക്കൂട്ടത്തെ വിരട്ടിയോടിക്കാന്‍ ശ്രമിച്ചെങ്കിലും നടന്നില്ല. പ്രദേശത്ത് തെരുവുനായ്ക്കളുടെ ശല്യം രൂക്ഷമാണ്. നഗരസഭാ അധികൃതര്‍ ഒരു നടപടിയും സ്വീകരിക്കുന്നില്ലെന്ന് നാട്ടുകാര്‍ക്കിടയില്‍ ആക്ഷേപം ഉയര്‍ന്നിട്ടുണ്ട്.

ബംഗ്ലാവിൽ-മംഗലത്ത് റോഡ് തകർന്നു: യാത്ര ദുരിതം

ഹരിപ്പാട്: മുതുകുളം തെക്ക് ബംഗ്ലാവിൽ-മംഗലത്ത് റോഡ് പൊട്ടിപ്പൊളിഞ്ഞു. ഇതുവഴി യാത്ര ചെയ്യുന്നവരും പ്രദേശവാസികളുമെല്ലാം വർഷങ്ങളായി ദുരിതം പേറുകയാണ്. ചുറ്റിക്കറങ്ങി പോകേണ്ടിവരുന്നുണ്ടെങ്കിലും നാട്ടുകാരിൽ പലരും യാത്രയ്ക്കായി ഇപ്പോൾ സമീപത്തെ മറ്റു റോഡുകളെയാണ് ആശ്രയിക്കുന്നത്. കായംകുളം-കാർത്തികപ്പളളി റോഡിൽ ബംഗ്ലാവിൽ ഭാഗത്തുനിന്നു കിഴക്കോട്ട് നൂറുമീറ്ററോളം ദൂരം റോഡ് നാമാവശേഷമായ നിലയിലാണ്. കുണ്ടും കുഴിയും വഴുവഴുപ്പ് ചെളിയും നിറഞ്ഞ ഈ ഭാഗം കടക്കണമെങ്കിൽ യാത്രക്കാർ പെടാപ്പാടുപെടണം. കൂടാതെ, മഴക്കാലത്ത് ഇവിടം വെള്ളത്തിൽ മുങ്ങും. മഴ കടുത്താൽ വീടുകളുടെ പരസരങ്ങളിലേക്കും വെള്ളം കയറുന്ന അവസ്ഥയുണ്ടാകും. കിഴക്കുനിന്നുള്ള വെള്ളവും ഇവിടേക്കാണെത്തുന്നത്. ജനങ്ങൾ തിങ്ങിപ്പാർക്കുന്ന പ്രദേശമാണിവിടം. ജലനിരപ്പുയരുമ്പോൾ ഇവിടങ്ങളിലെ താമസക്കാരുടെ ദുരിതം ഇരിട്ടിയാകും. കഴിഞ്ഞയാഴ്ച മഴ കനത്തപ്പോൾ മണ്ണുമാന്തി യന്ത്രം ഉപയോഗിച്ച് വെള്ളം കായംകുളം-കാർത്തികപ്പള്ളി റോഡിലെ ഓടയിലേക്ക് ഒഴുക്കിവിടുകയായിരുന്നു.റോഡിന്‍റെ തെക്കുവശം മാന്തിയതോടെ അപകടാവസ്ഥയുമുണ്ട്. കിഴക്കു ഭാഗത്തുള്ള വളവിന്‍റെ ഭാഗത്ത് വലിയ കുഴിയും രൂപപ്പെട്ടു. ഇത് യാത്രക്കാർക്ക് വലിയ ഭീഷണിയാണ്. ഇവിടെ വാഹനങ്ങൾ കുഴിയിൽ അകപ്പെടാനുള്ള സാധ്യതയേറെയാണ്. വളവായതിനാൽ കുഴികണ്ട് വെട്ടിക്കുമ്പോൾ വാഹനങ്ങൾ കൂട്ടിമുട്ടിയും അപകടമുണ്ടാ കാം. അപായസൂചനയായി നാട്ടുകാർ ഇവിടെ കൊടി വെച്ചിട്ടുണ്ട്. മതിയായ ജലനിർഗമന മാർഗത്തോടുകൂടി റോഡ് ഉയർത്തി പുനർനിർമിക്കണമെന്നാണ് നാട്ടുകാർ ആവശ്യപ്പെടുന്നത്.

ചെങ്ങന്നൂർ കെഎസ്ആർടിസി സ്റ്റാൻഡിൽ കാത്തിരിപ്പുകേന്ദ്രമില്ല: യാത്രക്കാർ വലയുന്നു

ചെങ്ങന്നൂർ: ചെങ്ങന്നൂർ കെഎസ്ആർടിസി ബസ് സ്റ്റാൻഡ് നവീകരണത്തിന്‍റെ പേരിൽ പൊളിച്ചുമാറ്റി നാലു മാസത്തിലേറെയായിട്ടും യാത്രക്കാരുടെ ദുരിതം തുടരുന്നു. മഴയും വെയിലുമേറ്റ് വലയുന്ന യാത്രക്കാർക്ക് ഒരു താത്കാലിക കാത്തിരിപ്പുകേന്ദ്രം പോലുമില്ലാത്ത അവസ്ഥയാണ് ഇവിടെ. അടിസ്ഥാന സൗകര്യങ്ങളായ ശുചിമുറി പോലും ഇല്ലാത്തത് യാത്രക്കാരുടെ ദുരിതം വർധിപ്പിക്കുകയാണ്. അഭയമില്ലാതെ കനത്ത മഴയോ വെയിലോ വരുമ്പോൾ സാധനങ്ങളുമായി സമീപത്തെ കടത്തിണ്ണകളിലേക്കും കെഎസ്ആർടിസിയുടെ ഗാരേജിലേക്കും ഓടിക്കയറേണ്ട അവസ്ഥയാണ്. കൈക്കുഞ്ഞുങ്ങളുമായി യാത്ര ചെയ്യുന്നവരാണ് ഏറെ ബുദ്ധിമുട്ട് അനുഭവിക്കുന്നത്. ബസ് സ്റ്റാൻഡിൽനിന്ന് വെയിലും മഴയുമേല്ക്കാതെ യാത്രക്കാർ മാറി നില്ക്കുന്നതുമൂലം ബസ് സ്റ്റാൻഡിൽ വരുമ്പോൾ ബസുകൾക്ക് പിന്നാലെ ഓടേണ്ടി വരുന്നുണ്ട്; ഇത് അപകടങ്ങൾക്കു കാരണമാകാനുള്ള സാധ്യതയും യാത്രക്കാർ ചൂണ്ടിക്കാണിക്കുന്നു. ചെളിക്കുണ്ടായി കെട്ടിടം പൊളിച്ചുമാറ്റിയ സ്ഥലം പൂർണമായും ചെളിക്കുണ്ടായി മാറിയിരിക്കുകയാണ്. യാത്രക്കാർക്ക് വെയിലിൽനിന്ന് രക്ഷപ്പെടാൻ ആകെയുള്ളത് ഒരു തണൽമരം മാത്രമാണ്. ഇത് ഏതുനിമിഷവും നിലംപൊത്താവുന്ന അവസ്ഥയിലാണെന്നും യാത്രക്കാർ ആശങ്കപ്പെടുന്നു. അപര്യാപ്തമായ താത്കാലിക ഷെഡാണുള്ളത്. നിലവിൽ ടാർപോളിൻ വലിച്ചുകെട്ടിയ ഒരു ചെറിയ ഷെഡ് മാത്രമാണുള്ളത്. ഇതിൽ നാലു പേർക്കു പോലും നിൽക്കാൻ കഴിയില്ല. മുൻപുണ്ടായിരുന്ന ഇരിപ്പിടങ്ങൾ പൊട്ടിപ്പൊളിഞ്ഞ നിലയിൽ തുറന്ന സ്ഥലത്താണ് കിടക്കുന്നത്.

അധികൃതരുടെ വാഗ്ദാനങ്ങൾ പാഴ്‌വാക്കായി. കെട്ടിടം പൊളിച്ചു തീർന്നാലുടൻ ദിവസങ്ങൾക്കുള്ളിൽ താത്കാലിക ഷെഡ് നിർമിക്കുമെന്ന അധികൃതരുടെ വാഗ്ദാനവും പാഴ് വാക്കായി മാറിയിരിക്കുകയാണ്. വകുപ്പു മന്ത്രിക്ക് ഉൾപ്പെടെ നിരവധി പരാതികൾ അയച്ചിട്ടും പരിഹാരമുണ്ടായില്ല. വിവിധ രാഷ്ട്രീയ സംഘടനകളുടെ നേതൃത്വത്തിൽ സമരപരിപാടികളും നടന്നിരുന്നു. പുതിയ പ്രതീക്ഷ യാത്രക്കാർക്ക് താത്കാലിക ഷെഡ് നിർമിക്കുന്നതിനായി ചെങ്ങന്നൂർ എംഎൽഎയും മന്ത്രിയുമായ സജി ചെറിയാന്‍റെ ഫണ്ടിൽ 4.4 ലക്ഷം അനുവദിച്ചിട്ടുണ്ടെന്ന് അസിസ്റ്റന്‍റ് ട്രാൻസ്പോർട്ട് ഓഫീസർ കെ.ആർ. അജീഷ് കുമാർ പറഞ്ഞു. അന്താരാഷ്ട്ര നിലവാരത്തിൽ 32,000 ചതുരശ്ര അടി വിസ്തീർണത്തിൽ 11.5 കോടി രൂപ ചെലവഴിച്ച് പുതിയ കെട്ടിടം നിർമിക്കാനാണ് പദ്ധതി. കെട്ടിടത്തിന്‍റെ നിർമാണം പൂർത്തിയാകുന്നതു വരെ യാത്രക്കാർക്കായി താത്കാലിക കാത്തിരപ്പു കേന്ദ്രം, ശുചിമുറി, പോലീസ് സേവനം എന്നിവ അടിയന്തരമായി ഏർപ്പെടുത്തണമെന്നാണ് യാത്രക്കാരുടെ പ്രധാന ആവശ്യം. 43 ബസുകളും രണ്ട് സിഫ്റ്റ് ബസുകളുമായി 45 ഷെഡ്യൂളുകൾ ഇവിടെനിന്ന് ഓപ്പറേറ്റ് ചെയ്യുന്നുണ്ട്. തിങ്കൾ, ശനി ദിവസങ്ങളിൽ രണ്ട് അഡീഷണൽ സർവീസും ഓപ്പറേറ്റ് ചെയ്യുന്നു.

അയൽവാസിയെ വെട്ടിപ്പരിക്കേൽപ്പിച്ച കേസ്: പ്രതിക്ക് ഏഴു വർഷവും ഏഴു മാസവും തടവ്

ചെങ്ങന്നൂർ: അയൽവാസിയെ ആക്രമിച്ച കേസിൽ പ്രതിക്ക് ഏഴു വർഷവും ഏഴു മാസവും തടവും 20,000 രൂപ പിഴയും ശിക്ഷ വിധിച്ച് ചെങ്ങന്നൂർ അസിസ്റ്റന്‍റ് സെഷൻസ് കോടതി. ചെറിയനാട് മണ്ഡപരിയാരം പുന്നവട്ടത്ത് പുത്തൻവീട്ടിൽ ജോണി (60) യാണ് ശിക്ഷിക്കപ്പെട്ടത്. ചെങ്ങന്നൂർ അസിസ്റ്റന്‍റ് സെഷൻസ് കോടതി ജഡ്ജി വി.എസ്. വീണയാണ് വിധി പ്രസ്താവിച്ചത്. 2022-ലാണ് കേസിനാസ്പദമായ സംഭവം. ജോണിയുടെ ബന്ധുവിന്‍റെ സ്ഥലം വാങ്ങി വീടുവച്ചതിലുള്ള വൈരാഗ്യമാണ് ആക്രമണത്തിൽ കലാശിച്ചത്. അയൽവാസിയായ പട്ടത്താനത്ത് ജിനു രാജേഷിനെ (33) യാണ് ഇയാൾ വീട്ടിൽക്കയറി വെട്ടിപ്പരിക്കേൽപ്പിച്ചത്. കേസിലെ രണ്ടാം പ്രതിയായിരുന്ന ജോണിയുടെ ഭാര്യ ജോളിയെ കോടതി കുറ്റവിമുക്തയാക്കി. പ്രോസിക്യൂഷനു വേണ്ടി അഡീഷണൽ പബ്ലിക് പ്രോസിക്യൂട്ടർ അഡ്വ. ദിവ്യാ ഉണ്ണിക്കൃഷ്ണൻ ഹാജരായി. അന്നത്തെ ചെങ്ങന്നൂർ എസ്ഐ ആയിരുന്ന എസ്. നിധീഷാണ് കേസിൽ കുറ്റപത്രം സമർപ്പിച്ചത്.

പിണറായി ഭരണത്തിൽ സ്ത്രീകൾക്ക് ദുരിതവും സുരക്ഷിതത്വമില്ലായ്മയും: ജെബി മേത്തർ

കായംകുളം: സ്ത്രീകൾക്ക് വളരെയേറെ ദുരിതവും സുരക്ഷിതത്വം ഇല്ലായ്മയും അനുഭവിക്കേണ്ടിവന്ന ഒരു കാലഘട്ടമാണ് കഴിഞ്ഞ ഒമ്പതു വർഷത്തെ പിണറായി വിജയന്‍റെ ഭരണത്തിലൂടെ സംസ്ഥാനത്ത് സംജാതമായതെന്ന് മഹിളാ കോൺഗ്രസ് സംസ്ഥാന പ്രസിഡന്‍റ് ജെബി മേത്തർ എംപി. മഹിളാ സാഹസ് കേരളയാത്രയുടെ കായംകുളം നിയോജകമണ്ഡലത്തിലെ സ്വീകരണ പരിപാടിയിൽ പങ്കെടുത്ത് സംസാരിക്കുകയായിരുന്നു അവർ. പുല്ലുകുളങ്ങര ജംഗ്ഷനിൽനിന്ന് ആരംഭിച്ച സ്വീകരണ പരിപാടി കെപിസിസി സെക്രട്ടറി ഇ. സമീർ ഉദ്ഘാടനം ചെയ്തു. മഹിളാ കോൺഗ്രസ് മണ്ഡലം പ്രസിഡന്‍റ് രമ്യ അധ്യക്ഷത വഹിച്ചു. മുൻ എംപി രമ്യാ ഹരിദാസ്, കെപിസിസി ജനറൽ സെക്രട്ടറി കെ.പി. ശ്രീകുമാർ, എ. ത്രിവിക്രമൻ തമ്പി, മഹിളാ കോൺഗ്രസ് ജില്ലാ പ്രസിഡന്‍റ് ബബിത ജയൻ, ബ്ലോക്ക് കോൺഗ്രസ് പ്രസിഡന്‍റ് ടി. സൈനുലാബ്ദീൻ, ഡിസിസി ഭാരവാഹികളായ വേലഞ്ചിറ സുകുമാരൻ, എ.ജെ.ഷാജഹാൻ, എൽ വേലായുധൻ പിള്ള, എൻ. രാജഗോപാൽ, മഹിളകോൺഗ്രസ് ബ്ലോക്ക് പ്രസിഡന്‍റ് പത്മകുമാരി, ആർ. ബിന്ദു, തയ്യിൽ പ്രസന്നകുമാരി, പ്രശോഭ എന്നിവർ പ്രസംഗിച്ചു.

സര്‍ക്കാര്‍ നെല്‍കര്‍ഷകരോട് നീതിപുലര്‍ത്തണം: ‌ഫാ. ഫിലിപ്പ് വൈക്കത്തുകാരന്‍

എടത്വ: സര്‍ക്കാര്‍ നെല്‍കര്‍ഷകരോട് നീതിപുലര്‍ത്തണമെന്ന് എടത്വ ഫൊറോന പള്ളി വികാരി ഫാ. ഫിലിപ്പ് വൈക്കത്തുകാരന്‍. നെല്‍കര്‍ഷക സംരക്ഷണസമിതിയുടെ നേതൃത്വത്തിലുള്ള പ്രതിഷേധാഗ്‌നി "ആഗ്' ഉദ്ഘാടനം ചെയ്തു സംസാരിക്കുകയായിരുന്നു അദേഹം. വ്യത്യസ്തങ്ങളായിട്ടുള്ള വെല്ലുവിളികളെ അതിജീവിച്ച് കേരളത്തിനുവേണ്ടി അന്നം ഉത്പാദിപ്പിക്കുന്ന നെല്‍കര്‍ഷകന്‍റെ ആത്മവീര്യം നഷ്ടപ്പെടാതെ അവനെ ചേര്‍ത്തുപിടിച്ചു അവനോടു നീതിപുലര്‍ത്തണം, കര്‍ഷകരുടെ പിആര്‍എസിന്‍റെ തുക അടിയന്തരമായി വിതരണം ചെയ്യണമെന്നും അദേഹം ആവശ്യപ്പെട്ടു. സംഭരിച്ച നെല്ലിന്‍റെ വില പൂര്‍ണമായി നല്‍കുക, പിആര്‍എസ് വായ്പയിലെ മെല്ലെപ്പോക്ക് അവസാനിപ്പിക്കുക, രണ്ടാംകൃഷിക്കും പുഞ്ചകൃഷിക്കുള്ള നെല്‍വിത്തിന്‍റെ ലഭ്യത ഉറപ്പുവരുത്തുക, തോട്ടപ്പള്ളി സ്പില്‍വേ, തണ്ണീര്‍മുക്കം ഷട്ടറുകളുടെ അറ്റകുറ്റപ്പണികള്‍ കാലേക്കൂട്ടി പൂര്‍ത്തീകരിച്ച് വൃശ്ചികവേലിയേറ്റത്തെ ചെറുക്കത്തക്കരീതില്‍ റഗുലേറ്റ് ചെയ്യാനുള്ള നടപടി സ്വീകരിക്കുക, ഓരുമുട്ടുകള്‍ ശാസ്ത്രീയമായി സ്ഥാപിക്കുക, തുടങ്ങിയ വിഷയങ്ങള്‍ ഉന്നയിച്ചു നടത്തിയ യോഗത്തില്‍ നെല്‍കര്‍ഷക സംരക്ഷണസമിതി വൈസ് പ്രസിഡന്‍റ് കറിയാച്ചന്‍ ചേന്നുകര അധ്യക്ഷത വഹിച്ചു. വി.ജെ. ലാലി, റജീന അഷറഫ്, സോണിച്ചന്‍ പുളിങ്കുന്ന്, പി.ആര്‍. സതീശന്‍, ജോസ് കാവനാട്, പി. വേലായുധന്‍ നായര്‍, ലാലിച്ചന്‍ പള്ളിവാതുക്കല്‍, റോയി ഊരാംവേലി, ഇ.ആര്‍. രാധാകൃഷ്ണപിള്ള, തോമാച്ചന്‍ ഇല്ലിമുറി, സുനു പി. ജോര്‍ജ്, മാത്യു തോമസ്, ജോമോന്‍ തായങ്കരി, പി.സി. ജോസഫ്, ബൈജു ജോസ് എന്നിവര്‍ പ്രസംഗിച്ചു.

തെരുവുനായ ആക്രമണത്തിൽ നാലരവയസുകാരനു പരിക്ക്

ഹരിപ്പാട്: തെരുവുനായ ആക്രമണത്തിൽ നാലര വയസുകാരന് പരിക്ക്. മുതുകുളം വടക്ക് നമ്പാട്ട് വീട്ടിൽ അനിൽകുമാറിന്‍റെയും ദീപയുടെയും മകൻ ധ്രുവിനാണ് കടിയേറ്റത്. ഇന്നലെ രാവിലെ പത്തോടെയാണ് സംഭവം. ഇടതുകൈക്ക് ആഴത്തിൽ മുറിവേറ്റ ധ്രുവിനെ വീടിന് തൊട്ടടുത്തുതന്നെയുളള മുതുകുളം സാമൂഹികാരോഗ്യ കേന്ദ്രത്തിൽ എത്തിച്ച് പ്രാഥമിക ചികിത്സ നൽകി. പിന്നീട് ആലപ്പുഴ മെഡിക്കൽ കോളജിലും ചികിത്സ തേടി. അക്രമകാരിയായ നായ അടുത്ത് വാടകയ്ക്കു താമസിക്കുന്നയാളുടെ ആടിനെയാണ് ആദ്യം കടിച്ചത്. അവിടെനിന്നെത്തിയാണ് കുട്ടിയെ ആക്രമിക്കുന്നത്. നാലു ദിവസം മുമ്പും തെരുവുനായയുടെ ആക്രമണത്തിൽ പ്രദേശവാസിയായ സ്ത്രീക്ക് പരിക്കേറ്റു. ഏതാനം ദിവസം മുമ്പ് ഷാപ്പുമുക്കു ഭാഗത്തുവച്ച് സൈക്കിളിൽ പോകുകയായിരുന്ന മറ്റൊരു കുട്ടിക്കു നേരേ നായ്ക്കൂട്ടം പാഞ്ഞടുത്തിരുന്നു. നാട്ടുകാരുടെ സമയോചിതമായ ഇടപെടൽ കാരണമാണ് ഈ കുട്ടി കടിയേൽക്കാതെ രക്ഷപ്പെട്ടത്. അക്രമകാരിയായ നായകൾക്ക് പേവിഷ ബാധയേറ്റിരിക്കാമെന്നാണ് സംശയിക്കുന്നത്. ഇവിടെ പാണ്ഡവർകാവ്, ആശുപത്രി ജംഗ്ഷൻ, ശാന്തിമുക്ക്, ഷാപ്പുമുക്ക്, പുത്തൻചന്ത, മുലേത്തറ ഭാഗങ്ങളിൽ തെരുവുനായ ക്രമാതീതമായി പെരുകിയിട്ടുണ്ട്. സ്ത്രീയെയും കുട്ടിയെയും കടിച്ച നായ ഇവിടെയെല്ലാമെത്തി മറ്റു തെരുവുനായ്ക്കളെയും കടിച്ചതായി പറയുന്നു. ഇതുകാരണം ഇവിടങ്ങളിലുളളവർ പുറത്തേക്കിറങ്ങാൻ പോലും ഭയപ്പെടുകയാണ്.

രാജ്യം ഭരിക്കുന്നത് ഫാസിസ്റ്റ് സർക്കാർ: ബിനോയ് വിശ്വം

കായംകുളം: ഫാസിസ്റ്റ് സർക്കാരാണ് രാജ്യം ഭരിക്കുന്നതെന്നും ഫാസിസ്റ്റ് അതിന്‍റെ മുഖഛായ ഒറ്റയടിക്ക് കാണിക്കാറില്ലെന്നും സിപിഐ സംസ്ഥാന സെക്രട്ടറി ബിനോയ് വിശ്വം പറഞ്ഞു. സിപിഐ ആലപ്പുഴ ജില്ലാ സമ്മേളനത്തിന്‍റെ പ്രതിനിധി സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഹിറ്റ്‌ലര്‍ തെരഞ്ഞെടുപ്പിലൂടെയാണ് കടന്നുവന്നത്. കേന്ദ്രസര്‍ക്കാരിന്‍റെ നീക്കം ഹിറ്റ്‌ലറിന്‍റെ സ്വഭാവരീതിക്കു സമാനമായിട്ടാണ്. അടിമുടി ഫാസിസ്റ്റായ ബിജെപി, ആര്‍എസ്എസ് സര്‍ക്കാരാണ് രാജ്യത്തുള്ളത്. മോദിയേക്കാൾ വാചാലമായിരുന്നു ഹിറ്റ്‌ലറിന്‍റെ ആദ്യപ്രസംഗങ്ങൾ. എല്ലാം കൈപ്പിടിയില്‍ ഒതുങ്ങിയപ്പോള്‍ ഹിറ്റ‌്‌ലർ‍ ഫാസിസ്റ്റായി എന്നും അദേഹം പറഞ്ഞു. മോദി സര്‍ക്കാര്‍ മുതലാളിത്വ പാര്‍ട്ടിയാണ്. കമ്മ്യൂണിസ്റ്റ് പാര്‍ട്ടിക്ക് അകത്ത് ചര്‍ച്ചയും സംവാദവും നടക്കുന്നത് പാര്‍ട്ടിക്കുവേണ്ടി മാത്രമാണ്. സ്വന്തം താത്പര്യങ്ങളെക്കാള്‍ തൊഴിലാളികളുടേയും നാടിന്‍റെയും സേവകരാണ് കമ്മ്യൂണിസ്റ്റുകാര്‍. മൈക്കും കാമറയും വഴിയല്ല പാര്‍ട്ടി ഉണ്ടാക്കേണ്ടതെന്നും അദേഹം കൂട്ടിച്ചേര്‍ത്തു. പ്രതിനിധി സമ്മേളനത്തിനു മുന്നോടിയായി വിപ്ലവ ഗായിക പി.കെ. മേദിനി പതാക ഉയർത്തി. സ്വാഗതസംഘം ചെയർമാൻ എസ്. സോളമൻ, ദീപ്തി അജയകുമാർ, എം.കെ. ഉത്തമൻ, സി.എ. അരുൺകുമാർ, ബൈരഞ്ജിത്ത്, അജയ് കൃഷ്ണൻ എന്നിവരടങ്ങിയ പ്രിസീഡിയമാണ് സമ്മേളനം നിയന്ത്രിക്കുന്നത്. ദേശീയ കൗണ്‍സില്‍ അംഗം ടി.ടി. ജിസ്മോന്‍ രക്തസാക്ഷി പ്രമേയവും ജില്ലാ എക്സിക്യൂട്ടീവ് അംഗം കെ.ജി. സന്തോഷ് അനുശോചന പ്രമേയവും അവതരിപ്പിച്ചു. സിപിഐ ദേശീയ എക്സിക്യൂട്ടീവ് അംഗം കെ.പി. രാജേന്ദ്രൻ, സംസ്ഥാന അസിസ്റ്റന്‍റ് സെക്രട്ടറി ഇ. ചന്ദ്രശേഖരൻ, മന്ത്രിമാരായ കെ. രാജൻ, പി. പ്രസാദ്, ജെ. ചിഞ്ചുറാണി തുടങ്ങിയവർ സംസാരിച്ചു.

ജില്ലാ കൃഷിത്തോട്ടത്തിലെ ഉരുളി മോഷണം: ട്രാക്ടർ ഡ്രൈവർ അറസ്റ്റിൽ

മാങ്കാംകുഴി: തഴക്കര പഞ്ചായത്തിലെ കോട്ടമുക്കിലെ നൂറേക്കർ ജില്ലാ കൃഷിത്തോട്ടത്തിൽനിന്ന് ഉരുളി മോഷണംപോയ സംഭവത്തിൽ ട്രാക്ടർ ഡ്രൈവറായ സ്ഥിരം ജീവനക്കാരനെ പോലീസ് അറസ്റ്റ് ചെയ്തു. തിരുവനന്തപുരം സ്വദേശി സന്തുവിനെ (39) യാണ് മാവേലിക്കര പോലീസ് അറസ്റ്റ് ചെയ്തത്. മാവേലിക്കര കോടതിയിൽ ഹാജരാക്കിയതിനെത്തുടർന്ന് ഇയാളെ കോടതി പതിനാലു ദിവസത്തേക്ക് റിമാൻഡ് ചെയ്തു. 2018 ൽ പിഎസ്‌സി നിയമനത്തെത്തുടർന്നാണ് ഇയാൾ ജില്ലാ കൃഷിത്തോട്ടത്തിൽ ട്രാക്ടർ ഡ്രൈവറായി ജോലിയിൽ പ്രവേശിച്ചത്. ഇയാളെയും ഒരു താത്കാലിക ജീവനക്കാരിയെയും നിർണായക വിവരങ്ങളുടെ അടിസ്ഥാനത്തിൽ കഴിഞ്ഞ ദിവസം ഉച്ചയ്ക്ക് മാവേലിക്കര പോലീസ് കസ്റ്റഡിയിൽ എടുത്ത് വിശദമായി ചോദ്യം ചെയ്തിരുന്നു. ഇതിൽ സന്തു കുറ്റം സമ്മതിക്കുകയായിരുന്നു. താത്കാലിക ജീവനക്കാരിയെ ചോദ്യം ചെയ്ത് മൊഴി രേഖപ്പെടുത്തിയ ശേഷം പോലീസ് വിട്ടയച്ചു. അന്വേഷണത്തോട് സഹകരിക്കണമെന്നും വിളിച്ചാൽ സ്റ്റേഷനിൽ ഹാജരാകണമെന്നുമുള്ള നിർദേശം നൽകിയാണ് ഇവരെ വിട്ടയച്ചതെന്ന് പോലീസ് പറഞ്ഞു. മാന്നാറിലെ ഒരു കടയിൽനിന്നു സന്തു പുതിയ ഉരുളി വാങ്ങിയതിന്‍റെ സിസിടിവി ദൃശ്യം പോലീസിന് ലഭിച്ചിരുന്നു. ഏകദേശം അരലക്ഷം രൂപ വിലവരുന്ന 38 കിലോ തൂക്കമുള്ള ഹിന്‍റാലിയത്തിന്‍റെ വലിയ ഉരുളിയാണ് കഴിഞ്ഞ ദിവസം ജില്ലാ കൃഷിത്തോട്ടത്തിൽനിന്നു മോഷണം പോയത്. മാവേലിക്കര പോലീസിൽ സൂപ്രണ്ട് പരാതി നൽകിയതിനെ തുടർന്നാണ് പോലീസ് അന്വേഷണം ആരംഭിച്ചത്. പോലീസിൽ പരാതി നൽകിയതിന് പിന്നാലെ ജില്ലാ കൃഷിത്തോട്ടത്തിന്‍റെ പടിഞ്ഞാറു ഭാഗത്തെ കാടു നിറഞ്ഞ പ്രദേശത്തുനിന്ന് ഒരു പുതിയ ഉരുളി കണ്ടെത്തിയിരുന്നു. മെഷീൻ ഉപയോഗിച്ച് പുല്ലുവെട്ടുന്ന തൊഴിലാളികളാണ് പുതിയ ഉരുളി കണ്ടെത്തിയത്. ഈ പുതിയ ഉരുളി വാങ്ങിയ കടകൾ കേന്ദ്രീകരിച്ച് നടത്തിയ അന്വേഷണത്തിലാണ് പോലീസിന് പ്രതിയെ കണ്ടെത്താൻ സഹായകമായത്.

വീണ്ടും കുഴി നിറഞ്ഞ് തുറവൂർ കുമ്പളങ്ങി റോഡ്

തുറവൂർ: കഴിഞ്ഞ ദിവസം അടച്ച കുഴികൾ വീണ്ടും തുറന്ന് തുറവൂർ കുമ്പളങ്ങി റോഡ്. തുറവൂർ മുതൽ കുമ്പളങ്ങി വരെ നൂറുകണക്കിന് കുഴികളാണ് നിലവിൽ രൂപപ്പെട്ടിരിക്കുന്നത്. രണ്ടു ദിവസം മുൻപ് മെറ്റലും ടാറുമിട്ട് അടച്ച കുഴികളാണ് ഒറ്റ മഴയിൽ മെറ്റൽ പോയി കുഴികൾ രൂപപ്പെട്ടിരിക്കുന്നത്. തുറവൂർ കവലയ്ക്കു പടിഞ്ഞാറു വശമുള്ള വളവിൽ വൻ ഗർത്തങ്ങളാണ് രൂപപ്പെട്ടിരിക്കുന്നത്. ഇതുമൂലം ഇരുചക്രവാഹനങ്ങൾക്കു പോലും കടന്നുപോകാൻ സാധിക്കാത്ത അവസ്ഥയാണ്. അപകടങ്ങൾ ഇവിടെ തുടർകഥയായിരിക്കുകയാണ്. റോഡിൽ വൻ കുഴികൾ രൂപപ്പെട്ടത് പ്രദേശത്ത് ശക്തമായ പ്രതിഷേധത്തിന് കാരണമായിട്ടുണ്ട്. ഉയര പ്പാത നിർമാണം നടക്കുന്നതിനെത്തുടർന്ന് ചെറുതും വലുതുമായ വാഹനങ്ങൾ മുഴുവൻ ഈ റോഡിലൂടെയാണ് വഴി തിരിച്ചുവിട്ടിരിക്കുന്നത്. ഇതുമൂലം വൻ വാഹനത്തിരക്കാണ് ഏതുനിമിഷവും ഈ റോഡിൽ അനുഭവപ്പെടുന്നത്. റോഡിൽ കുഴികൾ നിറഞ്ഞതോടുകൂടി വൻ ഗതാഗതക്കുരുക്കും ഈ റോഡിൽ അനുഭവപ്പെടുകയാണ്. അടിയന്തരമായി തുറവൂർ മുതൽ കുമ്പളങ്ങി വരെയുള്ള റോഡ് നല്ല രീതിയിൽ ടാർ ചെയ്തു ഗതാഗതയോഗ്യമാക്കണമെന്ന ആവശ്യം ശക്തമാകുന്നു.

ഇന്‍റര്‍ലോക്ക് ചെയ്തിരുന്ന നടപ്പാത ലോറി കയറി താഴ്ന്നു

എടത്വ: സംസ്ഥാന പാതയില്‍ ഇന്‍റര്‍ലോക്ക്’ചെയ്തിരുന്ന നടപ്പാത താഴ്ന്നു. എടത്വ-തകഴി സംസ്ഥാന പാതയില്‍ കോഴിമുക്ക് ക്ഷേത്രത്തിനു സമീപത്താണ് നടപ്പാതയും ടാറിംഗും താഴ്ന്നത്. ഇന്നലെ ഉച്ചയോടെ പൊടിയാടി ഭാഗത്തേക്കു പോയ കണ്ടയ്നര്‍ ലോറി റോഡിനു സമീപത്തു പാര്‍ക്ക് ചെയ്യാന്‍ നിര്‍ത്തിയതായിരുന്നു. ലോറിയുടെ പിന്നിലെ ടയര്‍ കയറിയ സ്ഥലമാണ് താഴ്ന്നത്. നാട്ടുകാരുടെ സഹകരണത്തോടെ ഏറെ ബുദ്ധിമുട്ടിയാണ് ലോറി മാറ്റിയത്. അമ്പലപ്പുഴ-നിരേറ്റുപുറം സംസ്ഥാന പാതയില്‍ പല സ്ഥലങ്ങളിലും സമാന അവസ്ഥയുണ്ട്. ഭാരവാഹനങ്ങള്‍ പാര്‍ക്ക് ചെയ്യാനായി നിര്‍ത്തിയിട്ടുന്ന സ്ഥലത്തെ നടപ്പാത താഴ്ന്ന് കുഴി രൂപപ്പെടുകയും യാത്രക്കാര്‍ക്ക് ബുദ്ധിമുട്ട് നേരിടുകയും ചെയ്യുന്നുണ്ട്. വെള്ളം പൊങ്ങിയതോടെ പാതയുടെ ഇരുവശങ്ങളും താഴ്ന്ന് വെള്ളക്കെട്ട് രൂപപെടുന്നതും പതിവാണ്.

പ്രകൃതിവിരുദ്ധ പീഡനം: പോക്സോ കേസ് പ്രതിക്ക് അമ്പതു വർഷം കഠിനതടവ്

കായംകുളം: ചൂണ്ടയിടാനെന്ന വ്യാജേന പ്രായപൂർത്തിയാകാത്ത ആൺകുട്ടിയെ കൂട്ടിക്കൊണ്ടു പോയി നിരവധിതവണ പ്രകൃതിവിരുദ്ധ പീഡനത്തിനിരയാക്കിയ പോക്സോ കേസ് പ്രതിയെ അമ്പതു വർഷം കഠിന തടവിന് ശിക്ഷിച്ചു. കായംകുളം പോലീസ് സ്റ്റേഷനിൽ 2001ൽ രജിസ്റ്റർ ചെയ്ത പോക്സോകേസിലെ പ്രതി കായംകുളം ചേരാവള്ളി വലിയപറമ്പിൽ ഷാജഹാനെ (ഷാജി)യാണ് ഹരിപ്പാട് അതിവേഗ പോക്സോ കോടതി ജഡ്ജി ഹരീഷ് ജി. വിവിധ വകുപ്പുകളിലായി അമ്പതു വർഷം കഠിനതടവിനും തൊണ്ണൂറ്റി അയ്യായിരം രൂപ പിഴ ഒടുക്കാനും പിഴ അടക്കാത്ത പക്ഷം രണ്ടു വർഷം അധികതടവിനും ശിക്ഷ വിധിച്ചത്. പ്രോസിക്യൂഷനു വേണ്ടി പബ്ലിക് പ്രോസിക്യൂട്ടർ അഡ്വ. രഘു ഹാജരായി. കായംകുളം പോലീസ് ഇൻസ്പെക്ടറായിരുന്ന വൈ. ഷാഫിയാണ് കേസ് രജിസ്റ്റർ ചെയ്ത് അന്വേഷണം നടത്തി കുറ്റപത്രം സമർപ്പിച്ചത്. കായംകുളംമുൻ ഡിവൈഎസ്പി അലക്സ് ബേബി. എഎസ്ഐമാരായ റജി, വാണി പീതാംബരൻ, സീനിയർ സിവിൽ പോലീസ് ഓഫീസർ സതീഷ് കെ.സി., ദിലീപ്, പ്രശാന്ത് ശിവരാമൻ എന്നിവർ പ്രോസിക്യൂഷൻ നടപടികളെ സഹായിച്ചു.

ഗൂഗിൾ-പേ വഴി കൈക്കൂലി: വില്ലേജ് ഓഫീസർ വിജിലൻസ് പിടിയിൽ

ഹരിപ്പാട്: ഗൂഗിൾ പേ വഴി കൈക്കൂലി വാങ്ങിയ വില്ലേജ് ഓഫീസർ വിജിലൻസ് പിടിയിൽ. കൃഷി ആനുകൂല്യം ലഭിക്കുന്നതിന് പഴയ സർവേ നമ്പർ ആവശ്യപ്പെട്ട പരാതിക്കാരനിൽനിന്നു ഗൂഗിൾ പേ വഴി ആയിരം രൂപ കൈക്കൂലി വാങ്ങിയ ഹരിപ്പാട് വില്ലേജ് ഓഫീസർ പി.കെ. പ്രീതയെയാണ് വിജിലൻസ് പിടികൂടിയത്. കേന്ദ്രസർക്കാരിന്‍റെ ആഗ്രി സ്റ്റാക്ക് പോർട്ടലിൽ രജിസ്റ്റർ ചെയ്യുന്ന ആവശ്യത്തിനായി പരാതിക്കാരൻ വസ്തുവിന്‍റെ പഴയ സർവേ നമ്പർ ആവശ്യപ്പെട്ട് വില്ലേജ് ഓഫീസറുടെ ഔദ്യോഗിക ഫോണിലേക്ക് വിളിച്ചപ്പോൾ തിരക്കായതിനാൽ അടുത്ത ദിവസം വിളിക്കാൻ പറഞ്ഞു. ഇതനുസരിച്ച് പരാതിക്കാരൻ പിന്നീട് വില്ലേജ് ഓഫീസറെ ഫോണിൽ വിളിച്ചപ്പോൾ വാട്ട്സ് ആപ്പ് നമ്പർ നൽകിയ ശേഷം വസ്തുവിന്‍റെ വിവരം അയയ്ക്കാൻ പറയുകയും ഇതിലേക്ക് ഒരു ഫീസ് അടയ്ക്കണമെന്നും തുക വാട്ട്സ് ആപ്പ് വഴി അറിയിക്കാമെന്നും പറയുകയും ഗൂഗിൾ പേ നമ്പർ അയച്ചുകൊടുത്തതിനുശേഷം ആയിരം രൂപ അയയ്ക്കണമെന്ന് ആവശ്യപ്പെടുകയുമായിരുന്നു. പരാതിക്കാരൻ ആലപ്പുഴ വിജിലൻസ് ഡിവൈഎസ്പിയെ അറിയിച്ചതിനെത്തുടർന്ന് സ്ഥലത്തെത്തിയ വിജിലൻസ് സംഘം നിരീക്ഷണത്തിനൊടുവിൽ ഗൂഗിൾ പേ വഴി പണം കൈപ്പറ്റിയ ശേഷം ഇന്നലെ ഉച്ചയ്ക്ക് രണ്ടു മണിയോടെ വില്ലേജ് ഓഫീസിന്‍റെ സമീപമുള്ള പാർക്കിംഗ് ഗ്രൗണ്ടിൽനിന്നു പ്രതിയെ പിടികൂടുകയായിരുന്നു. പ്രതിയെ കോട്ടയം വിജിലൻസ് കോടതിയിൽ ഹാജരാക്കി.

35 വർഷത്തിനുശേഷം മോഷണക്കേസ് പ്രതി അറസ്റ്റിൽ

മാന്നാർ: മോഷണ കേസ് പ്രതി 35 വർഷത്തിനുശേഷം പിടിയിലായി. കായംകുളം പുതുപള്ളി ഗോവിന്ദമുട്ടം കടക്കൽകാവ് വീട്ടിൽ ശശിധരൻ (65)നെയാണ് മാന്നാർ പോലീസ് അറസ്റ്റ് ചെയ്തത്. 1990 ൽ മാന്നാർ പോലീസ് രജിസ്റ്റർ ചെയ്ത മോഷണ കേസുകളിലെ പ്രതിയായ ശശിധരനെ അന്ന് അറസ്റ്റ് ചെയ്ത് റിമാൻഡ് ചെയ്തിരുന്നു. ജാമ്യത്തിൽ ഇറങ്ങിയ ഇയാൾ വിചാരണ നേരിടാതെ മുങ്ങുകയായിരുന്നു. ശശിധരന് എതിരേ ചെങ്ങന്നൂർ ഫസ്റ്റ് ക്ലാസ് ജുഡീഷ്യൽ മജിസ്ട്രേറ്റ് കോടതി എൽപി വാറണ്ട് പുറപ്പെടുവിച്ചിരുന്നു. ഇതേത്തുടർന്ന് മാന്നാർ പോലീസ് നടത്തിയ അന്വേഷണത്തിലാണ് ഇയാൾ പിടിയിലായത്. എറണാകുളം ഭാഗത്ത് ഇയാൾ ഒളിവിൽ താമസിക്കുന്നുണ്ടെന്ന വിവരം ലഭിച്ചതിനെ തുടർന്ന് പോലീസ് സംഘം അന്വേഷണം എറണാകുളത്തേക്കും വ്യാപിപ്പിച്ചു. ഇവിടെ നടത്തിയ അന്വേഷണത്തിലാണ് ശശിധരനെ കണ്ടെത്തിയത്. മാന്നാർ പോലീസ് ഇൻസ്പെക്ടർ ഡി.രജീഷ് കുമാർ, എസ്ഐ ശരത്ചന്ദ്രബോസ്, സിവിൽ പോലീസ് ഓഫീസർ മാരായ അൻസർ, റിയാസ് എന്നിവരടങ്ങിയ പോലീസ് സംഘം നടത്തിയ അന്വേഷണത്തിലാണ് ഇയാളെ കണ്ടെത്തി അറസ്റ്റ് ചെയ്തത്. ഇയാളെ കോടതിയിൽ ഹാജരാക്കി റിമാൻഡ് ചെയ്തു.

കെഎംസി ആശുപത്രിയിൽ അത്യാധുനിക ലേസർ ഹൃദ്രോഗചികിത്സാ സെന്‍റർ

ചെങ്ങന്നൂർ: ഡോ. കെ.എം. ചെറിയാൻ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിലെ അത്യാധുനിക ലേസർ ഹൃദ്രോഗ ചികിത്സാ കേന്ദ്രം കേന്ദ്രമന്ത്രി ജോർജ് കുര്യൻ ഉദ്ഘാടനം ചെയ്തു. ഉന്നത നിലവാരം പുലർത്തുന്നതിനു ക്വാളിറ്റി കൗൺസിൽ ഓഫ് ഇന്ത്യ ആശുപത്രിക്കു നൽകിയ എൻഎബിഎച്ച് സർട്ടിഫിക്കറ്റിന്‍റെ പ്രകാശനവും അദ്ദേഹം നിർവഹിച്ചു. ആശുപത്രി മാനേജിംഗ് ഡയറക്ടർ റവ. ഡോ. അലക്സാണ്ടർ കൂടാരത്തിൽ അധ്യക്ഷനായി. ഹൃദയം മാറ്റിവയ്ക്കൽ ശസ്ത്രക്രിയയ്ക്കുള്ള എല്ലാവിധ സജീകരണങ്ങളും പൂർത്തിയായതായും കേരളത്തിലെ ഹൃദ്രോഗ ചികിത്സാ ഗവേഷണത്തിനായി ആശുപത്രി നടത്തുന്ന പഠനങ്ങളെക്കുറിച്ചും അദ്ദേഹം അധ്യക്ഷ പ്രസംഗത്തിൽ പറഞ്ഞു. കുറഞ്ഞ നിരക്കിൽ പുതിയ കാർഡിയാക് ചെക്കപ്പ് പാക്കേജുകളും ചടങ്ങിൽ അവതരിപ്പിച്ചു. സീനിയർ കാർഡിയോളോജിസ്റ്റുകളായ ഡോ. മധു പൗലോസ്, ഡോ. ആനന്ദ് ശ്രീനിവാസൻ, ഡോ. കെ.എ. ദേവരാജൻ, ഡോ.ആർ. സെന്തിൽ കുമാർ, തിരുവൻവണ്ടൂർ പഞ്ചായത്ത് പ്രസിഡന്‍റ് പി.വി. സജൻ, ജോജി ചെറിയാൻ, പഞ്ചായത്ത് അംഗങ്ങളായ സജീവ് വള്ളിയിൽ, സജു എടക്കല്ലേൽ എന്നിവർ പങ്കെടുത്തു.

ദേശീയപാത നിർമാണം: ഗതാഗതക്കുരുക്കിനും അപകടങ്ങൾക്കും അടിയന്തര പരിഹാരം വേണമെന്ന് ജില്ലാ വികസനസമിതി

ആലപ്പുഴ: ദേശീയപാത നിർമാണം മൂലം ജില്ലയിലെ വിവിധ മേഖലകളിലുണ്ടാകുന്ന ഗതാഗതക്കുരുക്കിനും അപകടങ്ങൾക്കും അടിയന്തര പരിഹാരം വേണമെന്ന് ജില്ലാ വികസനസമിതി. ദേശീയപാത നിർമാണത്തിനായി ആര്യാട് പഞ്ചായത്തിനു കിഴക്ക് വേമ്പനാട് കായലിൽനിന്ന് മണലെടുക്കുന്നത് നിശ്ചയിച്ച ഭാഗത്തുനിന്ന് പടിഞ്ഞാറോട്ടു മാറിയാണെന്നും മണലുമായി വാഹനങ്ങൾ അമിതവേഗത്തിൽ ചീറിപ്പായുന്നതിനാൽ റോഡുകൾ തകരുന്നതായും അപകടങ്ങൾ ഉണ്ടാകുന്നതായും ചൂണ്ടിക്കാട്ടി. വിഷയത്തിൽ ദേശീയ പാത അഥോറിറ്റി അടിയന്തര നടപടി സ്വീകരിക്കണം. ആലപ്പുഴ കൈതവന ജംഗ്ഷനിൽ സ്ഥാപിച്ച ട്രാഫിക് സിഗ്‌നൽ പകൽ സമയത്ത് ഓഫ് ചെയ്തിട്ടിരിക്കുകയാണെന്നും ഇത് അടിയന്തരമായി പ്രവർത്തിപ്പിക്കണമെന്നും ആവശ്യമുയർന്നു. ദേശീയപാത നിർമാണം മൂലം അരൂർ മേഖലയിൽ കടുത്ത ഗതാഗതക്കുരുക്ക് നേരിടുകയാണെന്നും സമാന്തര പാതകൾ അറ്റകുറ്റപ്പണി നടത്താൻ ഏഴു കോടി രൂപ അനുവദിച്ചിട്ടും ഫലവത്താകുന്നില്ലെന്നും കെ.സി. വേണുഗോപാൽ എംപിയുടെ പ്രതിനിധി മുൻ എംഎൽഎ എ. ഷുക്കൂർ പറഞ്ഞു. ഈ പശ്ചാത്തലത്തിൽ വിഷയത്തിൽ അടിയന്തര നടപടി സ്വീകരിക്കുകയും നിർമാണപ്രവർത്തനം പൂർത്തിയാവുന്നതുവരെ ടോൾപിരിവ് നിർത്തിവയ്ക്കണമെന്നും എംപിയുടെ പ്രതിനിധി പ്രമേയത്തിൽ ആവശ്യപ്പെട്ടു. ദേശീയപാതയിൽ നാരകത്തറയിൽ അണ്ടർപാസ് അനുവദിക്കണമെന്നും ദേശീയപാത നിർമാണവുമായി ബന്ധപ്പെട്ട ജനങ്ങളുടെ ആവശ്യങ്ങൾ പരിഗണിക്കണമെന്നും രമേശ് ചെന്നിത്തല എംഎൽഎയുടെ പ്രതിനിധി ആവശ്യപ്പെട്ടു. ആലപ്പുഴ റെയിൽവേ സ്റ്റേഷൻ റോഡിലെ യാത്രാക്ലേശം, വർധിച്ചുവരുന്ന തെരുവുനായ ശല്യം, പ്രകൃതിക്ഷോഭം നഷ്ടപരിഹാരത്തുക വേഗത്തിൽ ലഭ്യമാകുന്നില്ല തുടങ്ങിയ പ്രശ്‌നങ്ങളും പി.പി. ചിത്തരഞ്ജൻ എംഎൽഎ ഉന്നയിച്ചു. ജില്ലാ കോടതിപ്പാലം നിർമാണവുമായി ബന്ധപ്പെട്ട് മത്സ്യകന്യകയുടെ ശിൽപം നീക്കുന്നതു സംബന്ധിച്ച എല്ലാ സാധ്യതകളും പരിശോധിച്ച് വികസനസമിതി തീരുമാനമെടുക്കണമെന്ന് എച്ച്. സലാം എം എൽഎ ആവശ്യപ്പെട്ടു. മുൻ യോഗത്തിൽ ജനപ്രതിനിധികൾ ഉന്നയിച്ച പ്രശ്‌നങ്ങളിൽ സ്വീകരിച്ച നടപടികളും യോഗം ചർച്ച ചെയ്തു. പുനർഗേഹം പദ്ധതി ഗുണഭോക്താക്കൾക്കായി പുറക്കാട് വില്ലേജിൽ നിർമിക്കുന്ന ഫ്‌ളാറ്റുകളുടെ നിർമാണത്തിൽ ഫേസ് രണ്ടും മൂന്നും സിവിൽ ജോലി പൂർത്തീകരിച്ചതായും ഫേസ് നാലും അഞ്ചും പ്ലാസ്റ്ററിങ് പൂർത്തീകരിച്ചതായും ഫിഷറീസ് ഡെ. ഡയറക്ടർ അറിയിച്ചു. തറയിൽക്കടവ് ഫിഷറീസ് ആശുപത്രി പുതിയ കെട്ടിടത്തിന്‍റെ ഫിനിഷിംഗ് ജോലി പുരോഗമിക്കുന്നതായി നിർമിതി കേന്ദ്രം പ്രൊജക്ട് ഡയറക്ടർ അറിയിച്ചു. കുട്ടനാട് പ്രദേശത്തെ ഉച്ച വേലിയേറ്റം സംബന്ധിച്ച വിഷയത്തിൽ കൃഷിവകുപ്പുമായി ചേർന്ന് സംയുക്ത പരിശോധന നടത്തി നടപടി സ്വീകരിക്കുമെന്ന് ചെറുകിട ജലസേചന വകുപ്പ് എക്‌സിക്യൂട്ടീവ് എൻജിനിയർ അറിയിച്ചു. കപ്പലപകടത്തെത്തുടർന്ന് തീരമേഖലക്ക് അനുവദിച്ച ആറു കിലോ സൗജന്യ റേഷൻ വിതരണം തുടങ്ങിയതായി ജില്ലാ സപ്ലൈ ഓഫീസർ അറിയിച്ചു. ദേശീയപാത നിർമാണത്തെ ത്തുടർന്ന് വാഹനങ്ങൾ വഴിതിരിച്ചുവിട്ടതുമൂലം തകർന്ന തുറവൂർ കുമ്പളങ്ങി റോഡ്, മാക്കിത്തറ റോഡ് എന്നിവയുടെ അറ്റകുറ്റപ്പണികൾ ഒരാഴ്ചയ്ക്കുള്ളിൽ തുടങ്ങുമെന്ന് പൊതുമരാമത്ത് വകുപ്പ് അറിയിച്ചു. യോഗത്തിൽ ജില്ലാ പ്ലാനിംഗ് ഓഫീസർ ലിറ്റി മാത്യു, ജില്ലാതല ഉദ്യോഗസ്ഥർ തുടങ്ങിയവർ പങ്കെടുത്തു.

ഡിജിറ്റൽ സർവേ :ഇതര സംസ്ഥാനങ്ങളിൽനിന്നുള്ള ഉന്നതതല സംഘം ജില്ല സന്ദർശിച്ചു

ആലപ്പുഴ: സംസ്ഥാന സർക്കാരിന്‍റെ എന്‍റെ ഭൂമി ഡിജിറ്റൽ സർവേ പ്രവർത്തനങ്ങൾ നേരിട്ട് കാണാനും മനസിലാക്കാനും എത്തിയ ഇതരസംസ്ഥാനങ്ങളിൽനിന്നുള്ള 13 അംഗ ഉന്നതതല ഉദ്യോഗസ്ഥ സംഘം ജില്ല സന്ദർശിച്ചു. ഐഎഎസ് ഉദ്യോഗസ്ഥരായ ലഡാക്കിൽനിന്നുള്ള തുഷാർ ആനന്ദ്, പശ്ചിമ ബംഗാളിൽനിന്നുള്ള പവൻ കട്യാൻ എന്നിവരടങ്ങുന്ന വിവിധ സംസ്ഥാനങ്ങളിലെ ഉദ്യോഗസ്ഥ സംഘമാണ് രാവിലെ കളക്ടറേറ്റിലെത്തിയ ശേഷം സർവേ നടക്കുന്ന സ്ഥലങ്ങളിലേക്കു പോയത്. രാജ്യത്ത് ആദ്യമായി ഡിജിറ്റൽ സർവേ വിജയകരമായി നടപ്പിലാക്കിവരുന്ന സംസ്ഥാനത്തെ റവന്യു വകുപ്പിന്‍റെ പ്രവർത്തനങ്ങളെക്കുറിച്ച് പഠിക്കുന്നതിനും സർവേയുടെ സാങ്കേതികവശങ്ങൾ മനസിലാക്കുന്നതിനുമാണ് സംഘം വിവിധ ജില്ലകളിലായി സന്ദർശനം നടത്തുന്നത്. സംഘം ജില്ലാ കളക്ടർ അലക്‌സ് വർഗീസുമായി കൂടിക്കാഴ്ച നടത്തി. ജില്ലയിൽ പുരോഗമിക്കുന്ന ഡിജിറ്റൽ സർവേയെക്കുറിച്ചും ജില്ലയുടെ ഭൗമശാസ്ത്രപരമായ സവിശേഷതകളെക്കുറിച്ചും കളക്ടർ സംഘാംഗങ്ങൾക്ക് വിശദീകരിച്ചു നൽകി. കളക്ടറേറ്റിലെ യോഗത്തിനു ശേഷം ആര്യാട് തെക്ക് വില്ലേജിലെ ഡിജിറ്റൽ സർവേയുമായി ബന്ധപ്പെട്ട മിനി സിവിൽ സ്റ്റേഷനിൽ പ്രവർത്തിക്കുന്ന ക്യാമ്പ് ഓഫീസ് സംഘം സന്ദർശിച്ചു. അവിടെ ഡിജിറ്റൽ സർവേ പൂർത്തിയാക്കാൻ വേണ്ട കാലയളവ്, സർവേ നടത്താൻ നിയോഗിച്ചിരിക്കുന്ന ഉദ്യോഗസ്ഥരുടെ എണ്ണം എന്നിവയെക്കുറിച്ചുള്ള ചോദ്യങ്ങൾക്കു മറുപടി കൊടുത്തു. എഡിഎം ആശാ സി. ഏബ്രഹാം, സബ് കളക്ടർ സമീർ കിഷൻ, സർവേ ആൻഡ് ലാൻഡ് റിക്കാർഡ്‌സ് വകുപ്പ് ഡിഡി വി. പ്രകാശ്, ഡെപ്യൂട്ടി കളക്ടർമാരായ ജെ. മോബി, അതുൽ എസ്. നാഥ് എന്നിവരും സംഘാംഗങ്ങൾക്കൊപ്പം ഉണ്ടായിരുന്നു.

വിദ്യാർഥികൾക്ക് അനുമോദനം

മുഹമ്മ: വിദ്യാർഥികളിൽ അന്തർലീനമായ കഴിവുകൾ സമൂഹ നന്മയ്ക്കായി പ്രയോജനപ്പെടുത്തുന്നതാകണം വിദ്യാഭ്യാസത്തിന്‍റെ ലക്ഷ്യമെന്ന് ആലപ്പുഴ ഡെപ്യൂട്ടി ഡെവലപ്പ്മെന്‍റ് കമ്മീഷണർ ഫിലിപ്പ് ജോസഫ് പറഞ്ഞു. സാമൂഹ്യ പ്രതിബദ്ധതയും മൂല്യബോധവുമുള്ള തലമുറയാണ് നാടിന്‍റെ സമ്പത്ത് - അദ്ദേഹം പറഞ്ഞു. മുഹമ്മ മദർ തെരേസ ഹൈസ്കൂളിലെ മെറിറ്റ് ഡേ ആഘോഷം ഉദ്ഘാടനം ചെയ്യുകയായിരുന്നു. ഭാരതം ലോകശക്തിയാകുമെന്ന മുൻ രാഷ്ട്രപതി എപിജെ അബ്ദുൾ കലാമിന്‍റെ സ്വപ്നം സാക്ഷാത്കരിക്കാൻ വിദ്യാലയങ്ങൾക്ക് ഏറെ പങ്കുവഹിക്കാൻ കഴിയുമെന്ന് കോർപറേറ്റ് മാനേജർ റവ.ഡോ. ജയിംസ് മുല്ലശേരി പറഞ്ഞു. ഉന്നത മൂല്യമുള്ള തലമുറയെ വാർത്തെടുക്കാൻ നമുക്കു കഴിയണം. സഭയുടെ കീഴിലുള്ള സ്കൂളുകളിൽ മുന്നിൽ നിൽക്കുന്ന സ്കൂളാണ് മുഹമ്മ മദർ തെരേസ ഹൈസ്കൂളെന്നും പറഞ്ഞു. എസ്എസ്എൽസി പരീക്ഷയിൽ ഫുൾ എ പ്ലസ് നേടിയ 24 വിദ്യാർഥികളെയും എൻഎംഎംഎസ് സ്കോളർഷിപ്പിന് അർഹരായവരെയും അനുമോദിച്ചു. കെഇ കാർമൽ സ്കൂൾ ഓഡിറ്റോറിയത്തിൽ നടന്ന പരിപാടിയിൽ എറണാകുളം റൂറൽ ഡിവൈഎസ്പി വി ടി ഷാജൻ മുഖ്യാഥിതിയായി. മാനേജർ ഫാ. പോൾ തുണ്ടുപറമ്പിൽ, വാർഡ് മെംബർ വി. വിഷ്ണു , പിടിഎ പ്രസിഡന്‍റ് സി.പി. ദിലീപ്, ത്രേസ്യാമ്മ ആന്‍റണി, മദർ തെരേസ ഹൈസ്കൂൾ അഡ്മിനിസ്ട്രേറ്റർ റവ.ഡോ. ഷാജി ഏനേക്കാട്ട്, കെഇ കാർമൽ സ്കൂൾ പ്രിൻസിപ്പൽ ഫാ. സാംജി വടക്കേടം, ഫാ. സനീഷ് മാവേലിൽ, സ്കൂൾ ബർസാർ ഫാ. സനു വലിയവീട്, മുൻ ഹെഡ്മാസ്റ്റർ ജയിംസ്കുട്ടി പി.എ. എന്നിവർ പ്രസംഗിച്ചു. തുടർന്ന് കുട്ടികളുടെ കലാപ്രകടനങ്ങൾ നടന്നു.

കേരള പ്രഫഷണൽ ഡ്രാമാ ചേംബർ സംസ്ഥാന സമ്മേളനം ഇന്ന്

അമ്പലപ്പുഴ: മലയാള പ്രഫഷണൽ നാടക സംഘാടകരുടെ ഏക സംഘടനയായ കേരള പ്രഫഷണൽ ഡ്രാമാ ചേംബറിന്‍റെ 22-ാം സംസ്ഥാന സമ്മേളനം ഇന്ന് അമ്പലപ്പുഴ കോറൽ ഹൈറ്റ്സിൽ നടക്കുമെന്ന് മുഖ്യ രക്ഷാധികാരി അമ്പലപ്പുഴ സി. രാധാകൃഷ്ണൻ, പ്രസിഡന്‍റ് അഡ്വ. കെ.ആർ. പത്മകുമാർ, ജനറൽ സെക്രട്ടറി ദിലീപ് സിത്താര, വഞ്ചിയൂർ സൈജു, മനോജ് ചന്ദ്രകാന്ത, കൊച്ചനിയൻ ആത്മമിത്ര എന്നിവർ പറഞ്ഞു. 45ഓളം സമിതികളുടെ പ്രതിനിധികൾ സമ്മേളനത്തിൽ പങ്കെടുക്കും. രാവിലെ 9.30ന് എച്ച്. സലാം എംഎൽഎ ഉദ്ഘാടനം നിർവഹിക്കും. അഡ്വ. നെയ്യാറ്റിൻകര പത്മകുമാർ അധ്യക്ഷനാകും. സംഗീത നാടക അക്കാദമി സെക്രട്ടറി കരിവെള്ളൂർ മുരളി മുഖ്യാതിഥിയാകും. സഹീർ അലി, പ്രമോദ് വെളിയനാട്, രാജേഷ് ഇരുളം, ഹേമന്ദ് കുമാർ, രമേശൻ ബ്രഹ്മ, രമേശൻ രംഗഭാഷ, വേണു രംഗഭാഷ, സുരീഷ്, മനേഷ്, സുദർശനൻ വർണം എന്നിവരെ സി.ആർ. മഹേഷ് എംഎൽഎ ആദരിക്കും. തുടർന്ന് പ്രതിനിധി സമ്മേളനവും സംഘടനാ തെരഞ്ഞെടുപ്പും നടക്കുമെന്ന് ഭാരവാഹികൾ പറഞ്ഞു.

കാർ നിയന്ത്രണം തെറ്റി തോട്ടിൽ വീണു

അമ്പലപ്പുഴ: കാർ നിയന്ത്രണംതെറ്റി തോട്ടിൽ വീണു. ആർക്കും പരിക്കില്ല. കോട്ടയം ആനിക്കാട് സ്വദേശി അഭിലാഷ് ഓടിച്ചിരുന്ന കാറാണ് തകഴി പടഹാരത്തിനു സമീപം നിയന്ത്രണംതെറ്റി തോട്ടിൽ വീണത്. കാറിൽ ഇദ്ദേഹം മാത്രമേ ഉണ്ടായിരുന്നുള്ളൂ. പിന്നീട് തകഴിയിൽനിന്ന് ഫയർഫോഴ്സ് സംഘമെത്തി ക്രെയിനിന്‍റെ സഹായത്തോടെ കാർ കരയ്ക്കുകയറ്റി.

സൗജന്യ മെഡിക്കല്‍ ക്യാമ്പും അനുമോദനവും

എടത്വ: കളങ്ങരയിലെ വിളക്കുമരം സംസ്‌കാരിക സംഘടനയുടെ ആഭിമുഖ്യത്തില്‍ വെള്ളക്കിണര്‍ ഡോ. പ്‌ളസ് ഹോസ്പ്പിറ്റലിന്‍റെ നേതൃത്വത്തില്‍ സൗജന്യ മെഡിക്കല്‍ ക്യാമ്പ് ഇന്നു രാവിലെ ഒന്പതു മുതല്‍ കളങ്ങര ദേശാഭിമാനി വായനശാല ഹാളില്‍ നടക്കും. ക്യാമ്പില്‍ ഇസിജി, പ്രഷര്‍, ഷുഗര്‍, കൊളസ്‌ട്രോള്‍ എന്നിവ പരിശോധിക്കുന്നതും ഡോക്ടറുടെ സേവനവും ജനറല്‍ മെഡിസിനും ലഭിക്കുന്നതുമാണ്. വൈകുന്നേരം നാലിന് 2025ലെ നീറ്റ്, എസ്എസ്എല്‍സി, പ്ലസ് ടു പരിക്ഷകളില്‍ ഉന്നതവിജയം നേടിയ വിദ്യാര്‍ഥികളെ ആദരിക്കുന്നതിനായി അനുമോദന സമ്മേളനവും നടക്കും. എടത്വ സെന്‍റ് മേരിസ് ഹൈസ്‌കൂള്‍ പ്രധാന അധ്യാപിക പ്രിയ ഫിലിപ്പ് ഉദ്ഘാടനം നിര്‍വഹിക്കും. പ്രസിഡന്‍റ് സി.വി. അനീഷ് കുമാര്‍ അധ്യക്ഷത വഹിക്കും. തലവടി മര്‍ത്തോമ്മ ഇംഗ്ലീഷ് മിഡിയം സ്‌കൂള്‍ മുന്‍ പ്രധാന അധ്യാപിക ബെറ്റി എം. ദാനിയല്‍ മുഖ്യപ്രഭാഷണം നടത്തും. നീറ്റ് പരീക്ഷയില്‍ ഉന്നതവിജയം നേടിയ സി.ജെ. അഞ്ജലി വിശിഷ്ടാതിഥിയായിരിക്കും.

വിദ്യാർഥികളെ അനുമോദിച്ചു

അമ്പലപ്പുഴ: പൊളിറ്റിക്കൽ സയൻസിൽ മികച്ച വിജയം നേടിയ വിദ്യാർഥികളെ അനുമോദിച്ചു. പൊളിറ്റിക്കൽ സയൻസ് ടീച്ചേഴ്സ് അസോസിയേഷൻ ജില്ലാ കമ്മിറ്റി ജില്ലയിലെ വിവിധ സ്കൂളുകളിൽനിന്ന് ഒന്നാം വർഷവും രണ്ടാം വർഷവും മുഴുവൻ മാർക്കും വാങ്ങിയ വിദ്യാർഥികളെയാണ് അനുമോദിച്ചത്. പ്രതിഭാ പുരസ്കാരം എന്ന പേരിൽ സംഘടിപ്പിച്ച പരിപാടി എച്ച്. സലാം എംഎൽഎ ഉദ്ഘാടനം ചെയ്തു. അറവുകാട് സ്കൂൾ ഓഡിറ്റോറിയത്തിൽ നടത്തിയ പരിപാടിയിൽ എൻ.ജി. രാധേഷ് കുമാർ അധ്യക്ഷനായി. കെ.കെ. നഹാർ, പ്രദീപ്കുമാർ, ധന്യ ആർ. ആനന്ദ്, ആർ. ബിന്ദു, സ്മിതാ ഭാനു, മുഹമ്മദ് ഫൈസൽ, അജി എസ്. നായർ എന്നിവർ പ്രസംഗിച്ചു. ഹരിപ്പാട്: മുട്ടം സാന്ത്വനം ചാരിറ്റബിൾ സൊസൈറ്റിയുടെയും സാന്ത്വനം വനിതാവേദിയുടെയും സംയുക്താഭിമുഖ്യത്തിൽ എസ്എസ്എൽസി, പ്ലസ് ടു ക്ലാസുകളിൽ മികച്ച വിജയം നേടിയ വിദ്യാർഥികളെ വിദ്യാകിരണം പരിപാടിയിൽ അനുമോദിച്ചു. കായംകുളം ഡിവൈഎസ്പി എൻ. ബാബുക്കുട്ടൻ ഉദ്ഘാടനം ചെയ്തു. കഴിഞ്ഞ അധ്യയനവർഷം സാന്ത്വനം സ്പോൺസർ ചെയ്ത വിദ്യാർഥികൾക്ക്‌ തുടർപഠനത്തിന് സഹായവും പഠനോപകരണങ്ങളും റിട്ട. പ്രഫസർ ആർ. ശിവദാസൻ പിള്ള വിതരണം ചെയ്തു. എം.കെ. ശ്രീനിവാസൻ അധ്യക്ഷത വഹിച്ചു. ജില്ലാപഞ്ചായത്തംഗം ജോൺ തോമസ്, ചേപ്പാട് പഞ്ചായത്ത് സ്ഥിരംസമിതി അധ്യക്ഷൻ കെ. വിശ്വപ്രസാദ്, സുമാശാങ്കൻ, അജയകുമാർ, ടി.വി. വിനോബ്, ജയരഘുനാഥ്, ബി. രഘു കളത്തിൽ, പഞ്ചായത്തംഗം മണിലേഖ എന്നിവർ പ്രസംഗിച്ചു.

50-ാം വാര്‍ഷികദിനം ആചരിച്ചു

ആലപ്പുഴ: ഇന്ത്യയില്‍ ആഭ്യന്തര അടിയന്തിരാവസ്ഥ പ്രഖ്യാപിച്ചതിന്‍റെ 50-ാം വാര്‍ഷികവും മുന്‍ പ്രധാനമന്ത്രിയും ജനതാ പാര്‍ട്ടി ദേശീയ അധ്യക്ഷനുമായിരുന്ന ചന്ദ്രശേഖര്‍ നടത്തിയ ഭാരത യാത്ര എന്ന ദേശീയ പദയാത്രയുടെ 43-ാം വാര്‍ഷികവും സോഷ്യലിസ്റ്റ് പഠന കേന്ദ്രം ജില്ലാ കമ്മിറ്റിയുടെ ആഭിമുഖ്യത്തില്‍ ആചരിച്ചു. ഭാരതയാത്രയില്‍ കന്യാകുമാരി മുതല്‍ കേരള - തമിഴ്‌നാട് അതിര്‍ത്തിയായ വേലന്താവളം വരെ മുഴുവന്‍ സമയവും പങ്കെടുത്ത അഡ്വ. ബിജിലി ജോസഫ്, ജോസഫ് പാട്രിക്ക്, എൻ. റാം എന്നിവരെ ചടങ്ങില്‍ ആദരിച്ചു. പഠനകേന്ദ്രം ജില്ലാ വൈസ് പ്രസിഡന്‍റ് പി.ജെ. കുര്യന്‍ അധ്യക്ഷത വഹിച്ചു. സംസ്ഥാന ചെയര്‍മാന്‍ ടി.പി. ജോസഫ്, സി.കെ. ദാമോദരന്‍, കെ.ജെ. ടോമിച്ചന്‍, വി.എസ്. ജോഷി, കെ.ജെ. ജയിംസ് എന്നിവര്‍ പ്രസംഗിച്ചു.

ചക്കുളത്തുകാവില്‍ നവരാത്രി സംഗീതോത്സവം സെപ്റ്റംബര്‍ 20ന്

എടത്വ: ചക്കുളത്തുകാവ് ശ്രീഭഗവതി ക്ഷേത്രത്തിലെ നവരാത്രിയോടനുബന്ധിച്ച് നടത്തിവരാറുള്ള ചക്കുളത്തമ്മ നൃത്ത സംഗീതോത്സവം സെപ്റ്റംബര്‍ 20ന് ആരംഭിച്ച് ഒക്ടോബര്‍ രണ്ടിന് സമാപിക്കും. സെപ്റ്റംബര്‍ 20ന് രാവിലെ ഒന്പതിന് ക്ഷേത്ര കാര്യദര്‍ശി മണിക്കുട്ടന്‍ നമ്പൂതിരിയുടെ അധ്യക്ഷതയില്‍ കൂടുന്ന യോഗത്തില്‍ ക്ഷേത്ര മുഖ്യകാര്യദര്‍ശി രാധകൃഷ്ണന്‍ നമ്പൂതിരി ഭദ്രദീപം കൊളുത്തി ചക്കുളത്തമ്മ നൃത്തസംഗീതോത്സവ ചടങ്ങുകള്‍ക്ക് തുടക്കം കുറിക്കും. സംഗീതാരാധനക്കു പുറമേ ഭരതനാട്യം, ഡാന്‍സ്, കഥകളി, തിരുവാതിര ഓട്ടന്‍തുള്ളല്‍, ചാക്യര്‍കൂത്ത്, പാഠകം, കുച്ചുപ്പുടി, ഉപകരണ സംഗീതം, തുടങ്ങി ക്ഷേത്രകലാരൂപങ്ങള്‍ അരങ്ങേറും. എല്ലാ ദിവസവും വൈകുന്നേരം കേരളത്തിന് അകത്തും പുറത്തുനിന്നുമുള്ള പ്രഗത്ഭ സംഗീതഞ്ജരുടെ സംഗീതാരാധന നടക്കും. ദീപാരാധനക്കു ശേഷം നൃത്തപരിപാടിയും ഉണ്ടായിരിക്കുന്നതാണ്. പങ്കെടുക്കുന്ന എല്ലാ പ്രതിഭകള്‍ക്കും ചക്കുളത്തുകാവ് ട്രസ്റ്റ് വക സര്‍ട്ടിഫിക്കറ്റും നല്‍കുന്നതാണെന്ന് ക്ഷേത്ര കാര്യദര്‍ശി മണിക്കുട്ടന്‍ നമ്പൂതിരി അറിയിച്ചു. സംഗീതാര്‍ച്ചനയിലും നൃത്തപരിപാടിയിലും മറ്റു ക്ഷേത്ര കലകളിലും പങ്കെടുക്കാന്‍ താത്പര്യമുള്ളവര്‍ ക്ഷേത്ര ഓഫീസുമായി നേരിട്ടോ ഫോണ്‍ മുഖേനയോ വാട്സ് ആപ്പ് വഴി ബന്ധപ്പെട്ട് പേരുകള്‍ മുന്‍കൂട്ടി രജിസ്റ്റര്‍ ചെയ്യേണ്ടതാണ്. ജൂലൈ ഒന്നു മുതല്‍ ഓഗസ്റ്റ് 25 വരെ മാത്രമാണ് രജിസ്‌ട്രേഷന്‍. ഫോണ്‍: 0477-2213550, 9188311000, 7012994843, 919447104242, 9526132243.

ഭരണഘടന ഭേദഗതി ചെയ്ത് ഗവർണർ പദവി ഇല്ലാതാക്കണം: സിപിഐ

കായംകുളം: ഭരണഘടന ഭേദഗതി ചെയ്ത് ഗവർണർ പദവി ഇല്ലാതാക്കണമെന്ന് സിപിഐ ആലപ്പുഴ ജില്ലാ സമ്മേളനം പ്രമേയത്തിലൂടെ ആവശ്യപ്പെട്ടു. ബിജെപി ഇതരസർക്കാരുകൾ യോജിച്ച് ഇത്തരം നിലപാടിൽ എത്തണം. കേന്ദ്രസർക്കാർ ഗവർണർമാരെ ദുരുപയോഗം ചെയ്ത് രാജ്ഭവനുകൾ രാഷ്ട്രീയ പ്രചാരണവേദികളാക്കുകയാണ്. ഭരണഘടനാ മൂല്യങ്ങളെയും ധാർമികതയെയും വെല്ലുവിളിക്കുന്ന ഗവർണർമാർ രാഷ്ട്രീയ അടിമകളാകുന്നു. ബിജെപി ഇതര സർക്കാരുകളെ അട്ടിമറിക്കാനും ഹിന്ദു വർഗിയത വളർത്താനുമുള്ള പരിശ്രമത്തിന്‍റെ പ്രകടമായ ഉദാഹരണമാണ് ഭാരതാംബ വിഷയമെന്നും സമ്മേളനം വിലയിരുത്തി. ജനങ്ങൾ തെരഞ്ഞെടുക്കുന്ന നിയമസഭകൾ പാസ്സാക്കുന്ന നിയമങ്ങളെ ഭരണഘടനാ നിർദേശങ്ങൾക്കു വിരുദ്ധമായി രാഷ്ട്രപതിക്ക് അയക്കുക വഴി സംസ്ഥാന ഭരണത്തിനും ഭരണഘടനയ്ക്കും പ്രതിസന്ധി സൃഷ്ടിടിക്കുന്ന നീക്കം ഒഴിവാക്കണമെന്നും സമ്മേളനം ആവശ്യപ്പെട്ടു. കമ്മിറ്റി കൺവീനർ അഡ്വ.വി. മോഹൻദാസ് പ്രമേയം അവതരിപ്പിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]