ADVERTISEMENT

ADVERTISEMENT

കെപിസിസി നവോത്ഥാന സ്മൃതിയാത്ര ഇന്ന് ചങ്ങനാശേരിയില്‍

ചങ്ങനാശേരി: കെപിസിസിയുടെ നേതൃത്വത്തില്‍ വൈക്കം സത്യഗ്രഹത്തിന്‍റെ ശതാബ്ദി ആഘോഷങ്ങളോടനുബന്ധിച്ച് കെപിസിസി വര്‍ക്കിംഗ് പ്രസിഡന്‍റ് കൊടിക്കുന്നില്‍ സുരേഷ് എം പി നയിക്കുന്ന നവോത്ഥാന നായകന്മാരായ സമുദായ ആചാര്യന്‍ മന്നത്ത് പത്മനാഭന്‍, ശ്രീനാരായണഗുരു സ്വാമി, മഹാത്മാ അയ്യൻകാളി എന്നിവരുടെ ഛായാചിത്രവുമായി അരുവിപ്പുറത്തുനിന്നും വൈക്കത്തേക്കു നടത്തുന്ന നവോത്ഥാന സ്മൃതി യാത്രയയ്ക്കു ഇന്ന് ചങ്ങനാശേരിയില്‍ സ്വീകരണം നല്‍കും.
ഉച്ചകഴിഞ്ഞ് മൂന്നിന് പെരുന്ന ബസ് സ്റ്റാന്‍ഡില്‍ കോണ്‍ഗ്രസ് ബ്ലോക്ക് കമ്മിറ്റിയുടെ ആഭിമുഖ്യത്തിലാണ് സ്വീകരണം നല്‍കുന്നത്.
കെപിസിസി രാഷ്‌ട്രീയകാര്യസമിതി അംഗം കെ.സി. ജോസഫ് ഉദ്ഘാടനം ചെയ്യും.

ADVERTISEMENT

ചങ്ങനാശേരി കെഎസ്ആര്‍ടിസി ഡിപ്പോയുടെ പോക്ക് എങ്ങോട്ടാ? ആവശ്യത്തിന് ഡ്രൈവര്‍മാരും കണ്ടക്ടര്‍മാരുമില്ല; ഇന്നലെ റദ്ദാക്കിയത് ആറ് ഷെഡ്യൂളുകൾ

ചങ്ങനാശേരി: ചങ്ങനാശേരി കെഎസ്ആര്‍ടിസി ഡിപ്പോയില്‍ ഇന്നലെ ആറ് ഷെഡ്യൂളുകള്‍ റദ്ദു ചെയ്തു. 45 ഷെഡ്യൂളുകളില്‍ ഇന്നലെ 39 ഷെഡ്യൂളുകള്‍ മാത്രമാണ് ഓപ്പറേറ്റ് ചെയ്തത്. വിവിധ റൂട്ടുകളിലുള്ള വിദ്യാര്‍ഥികളടക്കം യാത്രക്കാര്‍ ദുരിതത്തില്‍. കഴിഞ്ഞ രണ്ടാഴ്ചക്കിടെ റദ്ദാക്കപ്പെട്ടത് പത്ത് ഷെഡ്യൂളുകളാണ്. ഡിപ്പോയിലെ വരുമാനവും അനുദിനം ഇടിയുകയാണ്. രാവിലെ 6.40നുള്ള കൊട്ടാരക്കര, 6.20 പാലക്കാട്, ആലപ്പുഴ, ചമ്പക്കുളം, പുളിങ്കുന്ന് റൂട്ടുകളിലുള്ള സര്‍വീസുകളാണ് ഇന്നലെ നടത്താതിരുന്നത്. ഈ സര്‍വീസുകള്‍ നടത്താതിരുന്നതുമൂലം എഴുപതിനായിരത്തോളം രൂപയുടെ കുറവ് ഡിപ്പോയില്‍ ഉണ്ടായതായാണ് കണക്കാക്കപ്പെടുന്നത്. കോവിഡിനുമുമ്പ് അറുപത് ഷെഡ്യൂളുകള്‍ ചങ്ങനാശേരിയില്‍നിന്ന് ഓപ്പറേറ്റ് ചെയ്തിരുന്നു. കോവിഡിനുശേഷം അത് അമ്പതായി കുറഞ്ഞിരുന്നു. ഇന്നലെ 39 ഷെഡ്യൂളായി. ഇനിയും കുറയുമെന്നാണ് ഉദ്യോഗസ്ഥര്‍ ചൂണ്ടിക്കാട്ടുന്നത്. കഴിഞ്ഞ നാലുമാസത്തിനിടെ ഈ ഡിപ്പോയിലെ രണ്ട് പളനി, കോയമ്പത്തൂര്‍, മുരിക്കാശേരി സര്‍വീസുകള്‍ നിര്‍ത്തലാക്കിയിരുന്നു. കോവിഡിനുശേഷം അമൃത സര്‍വീസ് പുനരാരംഭിച്ചിട്ടില്ല. ഗ്രാമീണ സര്‍വീസുകളായ പൂവം, മണിമല സ്റ്റേ സര്‍വീസുകളും അടുത്തിടെ നിര്‍ത്തലാക്കിയിരുന്നു. ചങ്ങനാശേരി ഡിപ്പോയ്ക്കുതന്നെ ഒരു എടിഒ ഇല്ലാത്തതും പ്രതിസന്ധിയാണ്.

ജനറല്‍ ആശുപത്രിയിൽ രാത്രി സെക്യൂരിറ്റി ജീവനക്കാരുടെ സേവനം ലഭ്യമല്ലെന്ന് വിമർശനം

ചങ്ങനാശേരി: ജനറല്‍ ആശുപത്രിയിലെ സെക്യൂരിറ്റി ജീവനക്കാരുടെ സേവനം രാത്രി പത്തിനുശേഷം ലഭിക്കുന്നില്ലെന്ന് ആശുപത്രി മാനേജ്‌മെന്‍റ് കമ്മിറ്റി യോഗത്തില്‍ വിമര്‍ശനം. ഡ്യൂട്ടി സമയങ്ങളില്‍ സെക്യൂരിറ്റി ജീവനക്കാര്‍ ഒപി കൗണ്ടറില്‍ ഇരിക്കുന്നതായും പരാതിയുയര്‍ന്നു. ആശുപത്രിയിലെ ഇലക്‌ട്രീഷന്‍, പ്ലംബര്‍, ഓക്‌സിജന്‍ പ്ലാന്‍റ് ജീവനക്കാരന്‍ എന്നിവര്‍ക്ക് യൂണിഫോമും നെയിംപ്ലേറ്റും നല്‍കണമെന്ന മാനേജ്‌മെന്‍റ് കമ്മിറ്റിയംഗം ജോസുകുട്ടി നെടുമുടിയുടെ നിര്‍ദേശം യോഗം അംഗീകരിച്ചു. ചില ജീവനക്കാര്‍ തങ്ങളുടെ ഡ്യൂട്ടി മുറികളില്‍ കൂട്ടംകൂടിയിരുന്ന് മദ്യപിക്കുന്നതായും അംഗങ്ങള്‍ ആക്ഷേപം ഉയര്‍ത്തി. കിടപ്പുരോഗികളുടെ വാര്‍ഡിലെ ശുചിമുറികളുടെ തകരാര്‍ പരിഹരിക്കാത്തത് രോഗികള്‍ക്കും കൂട്ടിരിപ്പുകാര്‍ക്കും ദുരിതമാകുന്നതായി പലതവണ ചൂണ്ടിക്കാട്ടിയിട്ടും പരിഹരിക്കപ്പെടാത്തതു തര്‍ക്കത്തിനും ബഹളത്തിനും ഇടയാക്കി. കഴിഞ്ഞ ഒരു വര്‍ഷമായി താന്‍ ഈ വിഷയം ഉന്നയിച്ചിട്ടും പരിഹരിച്ചില്ലെന്ന് ജയിംസ് കലാവടക്കന്‍ ആരോപിച്ചു. ആശുപത്രി കോമ്പൗണ്ടില്‍ അനധികൃതമായി കാര്‍ ടാക്‌സി സര്‍വീസ് നടത്തുന്നതിനെതിരേയും പ്രതിഷേധം ഉയര്‍ന്നു. സ്വകാര്യ ലാബുകളുടെ ലെറ്റര്‍പാഡുകളില്‍ ഡോക്ടര്‍മാര്‍ കുറിപ്പ് നല്‍കുന്നതായും പരാതി ഉയര്‍ന്നു. പി.എന്‍. നൗഷാദ്, ലാലിച്ചന്‍ കുന്നിപ്പറമ്പില്‍, പി.എച്ച്. നാസര്‍, കെ.സി. ജോസഫ്, കെ.ടി. തോമസ്, മുഹമ്മദ് സിയ, സാബു കോയിപ്പള്ളി തുടങ്ങിയവര്‍ വിവിധ വിഷയങ്ങള്‍ ഉന്നയിച്ചു. നഗരസഭാധ്യക്ഷ കൃഷ്ണകുമാരി രാജശേഖരന്‍ അധ്യക്ഷത വഹിച്ചു. ജോബ് മൈക്കിള്‍ എംഎല്‍എ, ആരോഗ്യ സ്ഥിരംസമിതി അധ്യക്ഷ എല്‍സമ്മ ജോബ്, ആശുപത്രി സൂപ്രണ്ട് ഡോ. പ്രസീദ എന്നിവര്‍ ചര്‍ച്ചകളില്‍ പങ്കെടുത്തു. കാരുണ്യ ഫാര്‍മസി ഇന്നു പുനരാരംഭിക്കും ചങ്ങനാശേരി: ജനറല്‍ ആശുപത്രിയിലെ കാരുണ്യ ഫാര്‍മസിയുടെ പ്രവര്‍ത്തനം ഇന്ന് പുനരാരംഭിക്കും. രാവിലെ 10ന് ജോബ് മൈക്കിള്‍ എംഎല്‍എ ഉദ്ഘാടനം ചെയ്യും. പഴയ കെട്ടിടം പൊളിച്ചതിനെത്തുടര്‍ന്നാണ് കാരുണ്യ ഫാര്‍മസിയുടെ പ്രവര്‍ത്തനം നിലച്ചത്. പേ വാര്‍ഡിലെ ഒരു മുറിയിലാണ് കാരുണ്യ ഫാര്‍മസി ഇന്നുമുതല്‍ പ്രവര്‍ത്തിക്കുന്നത്. കാരുണ്യ ഫാര്‍മസി നിര്‍ത്തിയത് പാവപ്പെട്ട രോഗികളോടുള്ള വെല്ലുവിളിയാണെന്ന് ദീപിക റിപ്പോര്‍ട്ട് ചെയ്തിരുന്നു.

പരിസ്ഥിതി ദിനത്തില്‍ മീഡിയ വില്ലേജിന്‍റെ ആയിരം അടുക്കളത്തോട്ടം പദ്ധതിക്കു തുടക്കം

ചങ്ങനാശേരി: മീഡിയ വില്ലേജ് കാമ്പസില്‍ നാഷണല്‍ സര്‍വീസ് സ്‌കീമിന്‍റെ ആഭിമുഖ്യത്തില്‍ നടത്തിയ പരിസ്ഥിതി ദിനാചരണത്തില്‍ ആയിരം അടുക്കളത്തോട്ടം പദ്ധതിക്കു തുടക്കമായി. മാടപ്പള്ളി ബ്ലോക്ക് പഞ്ചായത്ത് പ്രസിഡന്‍റ് എന്‍. രാജു ഉദ്ഘാടനം ചെയ്തു. മാടപ്പള്ളി അഗ്രി ഫാര്‍മേഴ്‌സ് പ്രൊഡ്യൂസര്‍ കമ്പനി (മാഫ്‌കോ), കുരിശുമൂട് സെന്‍റ് ജോസഫ് കോളജ് ഓഫ് കമ്യൂണിക്കേഷന്‍, കൂനന്താനം സങ്കേതം പ്രകൃതി ജീവന പരിശീലന കേന്ദ്രത്തിന്‍റെ നേതൃത്വത്തില്‍ പ്രവര്‍ത്തിക്കുന്ന മണ്ണറിവ് പ്രകൃതി കൃഷി കൂട്ടായ്മ, മാടപ്പള്ളി ബ്ലോക്ക് പഞ്ചായത്ത് എന്നിവര്‍ സംയുക്തമായി സംഘടിപ്പിച്ച പരിസ്ഥിതി ദിനാചരണത്തിലാണ് പദ്ധതിക്കു തുടക്കംകുറിച്ചത്. മീഡിയ വില്ലേജ് എക്‌സിക്യൂട്ടീവ് ഡയറക്ടര്‍ ഫാ. ജോഫി പുതുപ്പറമ്പ് വൃക്ഷത്തൈ നട്ടു. എസ്ബി കോളജ് റിട്ടയേർഡ് വൈസ്പ്രിന്‍സിപ്പല്‍ പ്രഫ. ജോസഫ് ടിറ്റോ, കൂനന്താനം സങ്കേതം പ്രകൃതി ജീവന പരിശീലന കേന്ദ്രം ഡയറക്ടര്‍ സിസ്റ്റര്‍ നവീന സിഎംസി, മാഫ്‌കോ ചെയര്‍മാന്‍ തോമസ് മാന്തറ, ബ്ലോക്ക് പഞ്ചായത്തംഗം മാത്തുക്കുട്ടി പ്ലാന്താനം, സെക്രട്ടറി നിഖിത ബിനു എന്നിവര്‍ പ്രസംഗിച്ചു.

കുറവിലങ്ങാട് അഗ്രി ഫെസ്റ്റിന് ഇന്നു തുടക്കം

കുറവിലങ്ങാട്: സ്വാശ്രയ സംഘത്തിന്‍റെ ആഭിമുഖ്യത്തിൽ പാലാ സോഷ്യൽ വെൽഫെയർ സൊസൈറ്റിയുടെ സഹകരണത്തോടെ അഗ്രി ഫെസ്റ്റ്-2025ന് ഇന്നു തുടക്കമാകും. പരിസ്ഥിതി വാരാചരണത്തിന്‍റെ ഭാഗമായാണ് ഫെസ്റ്റ് ഒരുക്കിയിരിക്കുന്നത്. സ്വദേശ-വിദേശ ഫലവൃക്ഷത്തൈകളുടെ പ്രദർശനവും വിപണനവും നടക്കും. കുറവിലങ്ങാട് മർത്ത്മറിയം പള്ളി മൈതാനിയിൽ ഒരുക്കുന്ന ഫെസ്റ്റിന്‍റെ ഉദ്ഘാടനം ആർച്ച്പ്രീസ്റ്റ് റവ. ഡോ. തോമസ് മേനാച്ചേരി നിർവഹിക്കും.പാലാ സോഷ്യൽ വെൽഫെയർ സൊസൈറ്റി ഡയറക്ടർ ഫാ. തോമസ് കിഴക്കേൽ പരിസ്ഥിതിദിന സന്ദേശം നൽകും. രൂപത അസിസ്റ്റന്‍റ് ഡയറക്ടർ ഫാ. ഇമ്മാനുവൽ കാഞ്ഞിരത്തിങ്കൽ, കുറവിലങ്ങാട് സ്വാശ്രയസംഘം ഡയറക്ടർ ഫാ. ജോസഫ് ചൂരക്കൽ, പ്രസിഡന്‍റ് എം.വി. ജോൺ എന്നിവർ പ്രസംഗിക്കും.

വീട്ടുമുറ്റത്തെ കിണര്‍ ഇടിഞ്ഞുതാഴ്ന്നു

മിഠായിക്കുന്നം: അയ്യന്‍കോവില്‍ ക്ഷേത്രത്തിനു സമീപം തൂമ്പുങ്കല്‍ താഴത്ത് അരുണ്‍കുമാറിന്‍റെ വീട്ടുമുറ്റത്തെ കിണര്‍ ഇടിഞ്ഞു താഴ്ന്നു. ബുധനാഴ്ച പെയ്ത ശക്തമായ മഴയെത്തുടർന്നാണ് കിണര്‍ ഇടിഞ്ഞുതാഴ്ന്നത്. കിണറ്റില്‍നിന്നും വെള്ളം പമ്പ് ചെയ്യാന്‍ സ്ഥാപിച്ചിരുന്ന മോട്ടര്‍ ഉള്‍പ്പെടെയാണ് താണത്. കിണറിനു ചുറ്റും വലിയ കുഴി രൂപപ്പെട്ട നിലയിലാണ്. ഏകദേശം 14 അടിയോളം താഴ്ചയുള്ള കിണറ്റിലെ വെള്ളമാണ് വീട്ടാവശ്യത്തിന് ഉപയോഗിച്ചിരുന്നത്. മണ്ണ് ഉള്‍പ്പെടെ ഇടിഞ്ഞുതാഴ്ന്നതോടെ കിണറ്റിലെ വെള്ളം മലിനമായി ഉപയോഗിക്കാന്‍ പറ്റാത്ത അവസ്ഥയിലാണെന്ന് അരുണ്‍കുമാര്‍ പറഞ്ഞു.

കേരള ആശാ ഹെല്‍ത്ത് വര്‍ക്കേഴ്സ് അസോ. രാപകല്‍ സമരയാത്രയ്ക്ക് സ്വീകരണം നല്കി

ക‌ടുത്തുരുത്തി: കേരളത്തിലെ ആശാപ്രവര്‍ത്തകര്‍ ഉന്നയിച്ചുവരുന്ന ന്യായമായ വിഷയങ്ങള്‍ ചര്‍ച്ച ചെയ്തു പരിഹരിക്കുന്നതിന് ദുര്‍വാശി ഉപേക്ഷിച്ച് ഉന്നതതലയോഗം വിളിച്ചുകൂട്ടാന്‍ മുഖ്യമന്ത്രി തയാറാകണമെന്ന് മോന്‍സ് ജോസഫ് എംഎല്‍എ. കേരള ആശാ ഹെല്‍ത്ത് വര്‍ക്കേഴ്സ് അസോസിയേഷന്‍ കാസര്‍ഗോഡുനിന്നും തിരുവനന്തപുരത്തേക്ക് നടത്തുന്ന രാപകല്‍ സമരയാത്രയ്ക്ക് കടുത്തുരുത്തി ടൗണില്‍ നല്‍കിയ സ്വീകരണ സമ്മേളനം ഉദ്ഘാടനം ചെയ്യുകയായിരുന്നു അദേഹം. കേരള ആശാ ഹെല്‍ത്ത് വര്‍ക്കേഴ്സ് അസോസിയേഷന്‍ സംസ്ഥാന ജനറല്‍ സെക്രട്ടറി കെ.വി. ബിന്ദു, വൈസ് ക്യാപ്റ്റന്‍ എസ്. മിനി എന്നിവര്‍ക്ക് സ്വീകരണം നല്‍കി. മഹിളാകോണ്‍ഗ്രസ് പ്രസിഡന്‍റ് ശ്രീലേഖ മണിലാല്‍ അധ്യക്ഷത വഹിച്ചു. യുഡിഎഫ് കടുത്തുരുത്തി നിയോജകമണ്ഡലം കണ്‍വീനര്‍ മാഞ്ഞൂര്‍ മോഹന്‍കുമാര്‍, കോണ്‍ഗ്രസ് ബ്ലോക്ക് പ്രസിഡന്‍റ് ജയിംസ് പുല്ലാപ്പള്ളി, കുറവിലങ്ങാട് പഞ്ചായത്ത് പ്രസിഡന്‍റ് മിനി മത്തായി, അര്‍ബന്‍ ബാങ്ക് ചെയര്‍മാന്‍ എം.കെ. സാംബജി, സ്റ്റീഫന്‍ പാറാവേലി, ബേബി തൊണ്ടാംകുഴി, ജോസ് വഞ്ചിപ്പുര, ടോമി മാത്യു പ്രാലടി, ജോണി കണിവേലി, നോബി മുണ്ടയ്ക്കന്‍, വാസുദേവന്‍ നമ്പൂതിരി, ടോമി നിരപ്പേല്‍, ജെയ്സണ്‍ മണലേല്‍, സെബാസ്റ്റ്യന്‍ കോച്ചേരി, കെ.പി. വിനോദ് തുടങ്ങിയവര്‍ പ്രസംഗിച്ചു.

അഞ്ച് ഇരട്ടകളുടെ തൈ നടീൽ; വ്യത്യസ്തമായ ഒരു പരിസ്ഥിതിദിനാഘോഷം

ളാക്കാട്ടൂര്‍: എന്‍എസ്എസ് ഇംഗ്ലീഷ് മീഡിയം എല്‍പി സ്‌കൂളിലെ ഹെഡ്മാസ്റ്ററായ കെ.ആര്‍. വിജയന്‍ നായരും പള്ളിക്കത്തോട് ആനിക്കാട് എന്‍എസ്എസ് ഹൈസ്‌കൂളിലെ ഹെഡ്മാസ്റ്റര്‍ ഇന്‍-ചാര്‍ജായ ളാക്കാട്ടൂര്‍കാരൻ അനീഷ് എ. നായരും പരിസ്ഥിതിദിനം അഞ്ച് ഇരട്ടിമധുരം കൊണ്ടു വേറിട്ടതാക്കി. രണ്ടു സ്‌കൂളുകളിലെയും ഇരട്ടക്കുട്ടികളെക്കൊണ്ട് മാവിന്‍തൈകള്‍ നടീക്കാന്‍ തീരുമാനിച്ചു. ളാക്കാട്ടൂര്‍ എന്‍എസ്എസ് ഇംഗ്ലീഷ് മീഡിയം എല്‍പിയിലെ ഇരട്ടകളായ എല്‍കെജിയിലെ ഗൗരിനന്ദ എം. മനീഷും ലക്ഷ്മിനന്ദ എം. മനീഷും രണ്ടാം ക്ലാസിലെ ഇരട്ടകളായ ജിഹാന ജിപ്‌സനും ജിയാന്ന ജിപ്‌സനും, മൂന്നാം ക്ലാസിലെ അദിത് പ്രശാന്തും അയോണ്‍ പ്രശാന്തും, നാലാം ക്ലാസിലെ ആദിശ്രീ മനോജും, ആരാധ്യ മനോജും ചേര്‍ന്നു മാവിന്‍തൈ വച്ചു. ചിത്രകലാ അധ്യാപകന്‍ ശ്രീകാന്ത്, സ്‌കൂള്‍ മാനേജര്‍ ആര്‍. രാമചന്ദ്രന്‍ നായര്‍ എന്നിവര്‍ പ്രസംഗിച്ചു. ആനിക്കാട് എന്‍എസ്എസ് ഹൈസ്‌കൂളിലെ ഇരട്ടക്കുട്ടികളായ എട്ടാം ക്ലാസിലെ ആദിത്യ അനീഷ്, ആദിത്യന്‍ അനീഷ് എന്നിവര്‍ ചേര്‍ന്ന് മാവിന്‍ തൈ നട്ടു. ചിത്രകലാ അധ്യാപകന്‍ ശ്രീകാന്ത് ളാക്കാട്ടൂര്‍ പരിസ്ഥിതി ചിത്രങ്ങള്‍ വരച്ചു ക്ലാസെടുത്തു. പച്ചക്കറി തോട്ടത്തിന്‍റെ മേല്‍നോട്ടം ജയപ്രിയ ടീച്ചര്‍ക്കാണ്. അനീഷ് എ. നായര്‍, ജയപ്രിയ, അമ്പിളി കൈമള്‍, വി. അശോക്, പി.എന്‍. പ്രഭാവതി, ആര്‍. ശ്രീകാന്ത്, ഉമേഷ് കൃഷ്ണന്‍ എന്നിവര്‍ പ്രസംഗിച്ചു. ഇരുസ്‌കൂളുകളിലും നടത്തിയ വിവിധ മത്സരങ്ങള്‍ക്ക് മാവിന്‍ തൈകളും സമ്മാനമായി നല്കി.

മോഡൽ എംസിഎഫിന്‍റെ നിർമാണോദ്ഘാടനം നടത്തി

അതിരമ്പുഴ: അജൈവ മാലിന്യങ്ങൾ ശേഖരിച്ച് വേർതിരിച്ചു സംസ്കരിക്കുന്നതിനാവശ്യമായ ആധുനിക സൗകര്യങ്ങളോടു കൂടിയ മാതൃകാ മെറ്റീരിയൽ കളക‌്ഷൻ ഫെസിലിറ്റി സെന്‍ററിന്‍റെ (മോഡൽ എംസിഎഫ്) നിർമാണോദ്ഘാടനം ഫ്രാൻസിസ് ജോർജ് എംപി നിർവഹിച്ചു. ചടങ്ങിൽ അതിരമ്പുഴ പഞ്ചായത്ത്‌ പ്രസിഡന്‍റ്‌ ജോസ് അമ്പലക്കുളം അധ്യക്ഷത വഹിച്ചു. ബ്ലോക്ക്‌ പഞ്ചായത്ത്‌ അംഗങ്ങളായ ജയിംസ് കുര്യൻ, അന്നമ്മ മാണി, പഞ്ചായത്ത്‌ വൈസ് പ്രസിഡന്‍റ് ഷിമി സജി, സ്റ്റാൻഡിംഗ് കമ്മിറ്റി ചെയർപേഴ്സൺമാരായ ഹരിപ്രകാശ്, ജയിംസ് തോമസ്, ഫസീന സുധീർ, മുൻ പഞ്ചായത്ത്‌ പ്രസിഡന്‍റ് ബിജു വലിയമല, മെംബർമാരായ അശ്വതിമോൾ കെ.എ., ജോഷി ഇലഞ്ഞിയിൽ, സെക്രട്ടറി നിസി ജോൺ എന്നിവർ പ്രസംഗിച്ചു.

ഓർമപ്പെരുനാൾ ആചരിക്കും

കോട്ടയം: മലങ്കര സുറിയാനി ക്‌നാനായ സമുദായത്തിന്‍റെ പ്രഥമ മെത്രാപ്പോലീത്ത ഗീവര്‍ഗീസ് മാര്‍ സേവേറിയോസിന്‍റെ 98-ാം ശ്രാദ്ധപ്പെരുന്നാളും അനുസ്മരണവും കബറടങ്ങിയിരിക്കുന്ന കോട്ടയം വലിയ പള്ളിയില്‍ എട്ട്, 10, 11 തീയതികളില്‍ ആചരിക്കും. ഒന്പതിനു വൈകുന്നേരം നാലിനു ജസ്റ്റീസ് സിറിയക് ജോസഫ് അനുസ്മരണ സമ്മേളനം ഉദ്ഘാടനം ചെയ്യും. ആര്‍ച്ച്ബിഷപ് കുര്യാക്കോസ് മാര്‍ സേവേറിയോസ് അധ്യക്ഷത വഹിക്കും. സിഎസ്‌ഐ മധ്യ കേരളാ മഹായിടവക ബിഷപ് റവ. ഡോ. മലയില്‍ സാബു കോശി ചെറിയാന്‍ അനുഗ്രഹപ്രഭാഷണം നടത്തും. തിരുവഞ്ചൂര്‍ രാധാകൃഷ്ണന്‍ എംഎല്‍എ മുഖ്യാതിഥിയായിരിക്കും. സമുദായ സെക്രട്ടറി ടി.ഒ. ഏബ്രഹാം, വികാരി ഫാ. സിജോ സ്‌കറിയ, സെന്‍റ് ജോര്‍ജ് കുരിശുപള്ളി പ്രീസ്റ്റ് ഇന്‍-ചാര്‍ജ് ഫാ. ബിബിന്‍ ബേബി, മുനിസിപ്പല്‍ കൗണ്‍സിലര്‍മാരായ ഡോ. പി.ആര്‍. സോന, ഷേബ മാര്‍ക്കോസ്, ട്രസ്റ്റി കെ.കെ. തോമസ്, സെക്രട്ടറി ജേക്കബ് സാജ്, ജനറല്‍ കണ്‍വീനര്‍ ജേക്കബ് പണിക്കര്‍ എന്നിവര്‍ അനുസ്മരണ പ്രസംഗങ്ങള്‍ നടത്തും. 10ന് 6.30ന് സന്ധ്യാപ്രാര്‍ഥന കബറിങ്കല്‍ ധൂപപ്രാര്‍ഥന, പ്രദക്ഷിണം ആശീര്‍വാദം. 11ന് 7.15ന് പ്രഭാത പ്രാര്‍ഥന 8ന് ആര്‍ച്ച്ബിഷപ് കുര്യാക്കോസ് മാര്‍ സേവേറിയോസിന്‍റെ മുഖ്യകാര്‍മികത്വത്തില്‍ വിശുദ്ധ മൂന്നിന്മേല്‍ കുര്‍ബാന, 10ന് നേര്‍ച്ചവിളമ്പ്, പ്രദക്ഷിണം.

ജനകീയ വികസനസമിതി

ഏറ്റുമാനൂര്‍: ജനകീയ വികസനസമിതിയുടെ മൂന്നാം വാര്‍ഷികവും എസ്.പി. പിള്ളയുടെ 40-ാം ചരമ വാര്‍ഷിക ദിനാചരണവും 11ന് ഏറ്റുമാനൂര്‍ നന്ദാവനം ഓഡിറ്റോറിയത്തില്‍ നടക്കും. ഉച്ചകഴിഞ്ഞു രണ്ടിനു വാര്‍ഷിക യോഗം. മൂന്നിനു ജില്ലയില്‍നിന്നുള്ള ഹൈസ്‌കൂള്‍ വിദ്യാര്‍ഥികളുടെ പഞ്ചാരിമേള മത്സരം. 4.15നു ചേരുന്ന സമാപന സമ്മേളനം മന്ത്രി കെ.ബി. ഗണേഷ് കുമാര്‍ ഉദ്ഘാടനം ചെയ്യും. ഫ്രാന്‍സിസ് ജോര്‍ജ് എംപി മുഖ്യാതിഥിയായിരിക്കും. ജനകീയ വികസനസമിതിയുടെ പ്രഥമ എസ്.പി. പിള്ള പുരസ്‌കാരം ജയരാജ് വാര്യര്‍ക്ക് നല്‍കും. സംവിധായകന്‍ ജോഷി മാത്യുവിനെ ആദരിക്കും. അമ്മ വൈസ് പ്രസിഡന്‍റ് ജയന്‍ ചേര്‍ത്തല, ആത്മ വൈസ് പ്രസിഡന്‍റ് മോഹന്‍ ഐരൂര്‍, ചങ്ങമ്പുഴ ഹരികുമാര്‍ തുടങ്ങിയവര്‍ പ്രസംഗിക്കും. ഹയര്‍ സെക്കന്‍ഡറി വിഭാഗത്തില്‍ ഉന്നത വിജയം നേടിയ 15 വിദ്യാര്‍ഥികളെ ആദരിക്കും. പത്രസമ്മേളനത്തില്‍ ജനകീയ വികസനസമിതി പ്രസിഡന്‍റ് ബി. രാജീവ്, സെക്രട്ടറി മോഹന്‍കുമാര്‍ മംഗലത്ത്, വൈസ് പ്രസിഡന്‍റ് രാജു ഇമ്മാനുവല്‍, എക്‌സിക്യൂട്ടീവ് അംഗങ്ങളായ വി.എം. തോമസ് വേമ്പനി, പ്രിയ ബിജോയ് എന്നിവര്‍ പങ്കെടുത്തു.

ഭൂമിത്രസേനാ ക്ലബ്ബിനുള്ള അവാർഡ് കുമരകം ഗവ. എച്ച്എസ്എസിന്

കുമരകം: കഴിഞ്ഞ വർഷത്തെ മികച്ച ഭൂമിത്ര സേന ക്ലബ്ബിനുള്ള ഹയർ സെക്കൻഡറി വിഭാഗം അവാർഡ് കുമരകം ഗവൺമെന്‍റ് വൊക്കേഷണൽ ഹയർ സെക്കൻഡറി സ്കൂളിന് ലഭിച്ചു. മികച്ച പരിസ്ഥിതി സൗഹൃദ പ്രവർത്തനങ്ങൾക്ക് കേരള പരിസ്ഥിതി കാലാവസ്ഥാ വ്യതിയാന വകുപ്പ് കേരളത്തിലെ ഹയർ സെക്കൻഡറി സ്കൂളുകളിൽനിന്നും മികച്ച പ്രവർത്തനം കാഴ്ചവയ്ക്കുന്ന ക്ലബ്ബുകളെയാണ് തെരഞ്ഞെടുക്കുന്നത്. തിരുവനന്തപുരം മസ്കറ്റ് ഹോട്ടലിൽ നടന്ന ചടങ്ങിൽ ഐ.ബി. സതീഷ് എംഎൽഎ മികച്ച ക്ലബ്ബുകൾക്ക് അവാർഡ് വിതരണം ചെയ്തു. വിഎച്ച്എസ്എസ് വിഭാഗം ബയോളജി അധ്യാപിക ജി. ജയ, വിദ്യാർഥി കോ-ഓർഡിനേറ്റർ സാജൻ ജോർജ്, പ്രിൻസിപ്പൽ എം.എസ്. ബിജീഷ് എന്നിവരുടെ നേതൃത്വത്തിലാണ് പദ്ധതികൾ മുന്നേറുന്നത്.

പെണ്ണാർ തോടിന്‍റെ നവീകരണത്തിനു തുടക്കമായി

അതിരമ്പുഴ: അതിരമ്പുഴ ചന്തക്കുളത്തിന്‍റെയും പെണ്ണാർ താോടിന്‍റെയും പഴയകാല പ്രൗഢി വീണ്ടെടുക്കുന്നതിനായുള്ള ആദ്യഘട്ട നവീകരണ പ്രവർത്തനങ്ങൾക്കു തുടക്കമായി. 50 ലക്ഷം രൂപ ചെലവഴിച്ചു നടത്തുന്ന നവീകരണത്തിന്‍റെ പ്രവർത്തനോദ്ഘാടനം ഫ്രാൻസിസ് ജോർജ് എംപി നിർവഹിച്ചു. ചടങ്ങിൽ അതിരമ്പുഴ പഞ്ചായത്ത്‌ പ്രസിഡന്‍റ് ജോസ് അമ്പലക്കുളം അധ്യക്ഷത വഹിച്ചു. അതിരമ്പുഴ ഫൊറോനാ വികാരി റവ.ഡോ. ജോസഫ് മുണ്ടകത്തിൽ, അതിരമ്പുഴ ജുമാ മസ്ജിദ് ഇമാം അഫ്സൽ മനാനി, ലിസ്യു പള്ളി വികാരി ഫാ. മാർട്ടിൻ ഇലയ്ക്കാട്ട് നാലുപറയിൽ, അതിരമ്പുഴ മർച്ചന്‍റ്സ് അസോസിയേഷൻ പ്രസിഡന്‍റ് ജോയ്‌സ് ആൻഡ്രൂസ്, ബ്ലോക്ക്‌ പഞ്ചായത്തംഗങ്ങളായ ജയിംസ് കുര്യൻ, അന്നമ്മ മാണി, പഞ്ചായത്ത്‌ വൈസ് പ്രസിഡന്‍റ് ഷിമി സജി, സ്റ്റാൻഡിംഗ് കമ്മിറ്റി ചെയർപേഴ്സൺമാരായ ഹരിപ്രകാശ്, ജയിംസ് തോമസ്, ഫസീന സുധീർ, മുൻ പഞ്ചായത്ത്‌ പ്രസിഡന്‍റ് ബിജു വലിയമല, മെംബർ ജോഷി ഇലഞ്ഞിയിൽ, പഞ്ചായത്ത്‌ സെക്രട്ടറി നിസി ജോൺ എന്നിവർ പ്രസംഗിച്ചു.

വിക്ടോറിയൻ സര്‍ക്കാര്‍ പ്രതിനിധി സംഘം ഓര്‍ത്തഡോക്‌സ് സഭാധ്യക്ഷനുമായി കൂടിക്കാഴ്ച നടത്തി

കോട്ടയം: ഓസ്‌ട്രേലിയയിലെ വിക്ടോറിയയില്‍നിന്നുള്ള സര്‍ക്കാര്‍ പ്രതിനിധി സംഘം ഓര്‍ത്തഡോക്‌സ് സുറിയാനി സഭാധ്യക്ഷന്‍ ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാ ബാവായുമായി കൂടിക്കാഴ്ച നടത്തി. വിക്ടോറിയന്‍ സര്‍ക്കാരിലെ സഹമന്ത്രി ഷീന വാട്ട്, ഗവണ്‍മെന്‍റ് ചീഫ് വിപ്പ് ലീ ടാര്‍ലാമിസ് എന്നിവരാണ് സഭാ ആസ്ഥാനമായ ദേവലോകം കാതോലിക്കേറ്റ് അരമനയില്‍ കാതോലിക്കാ ബാവായെ സന്ദര്‍ശിച്ചത്. ഡോ. യൂഹാനോന്‍ മാര്‍ ദീയസ്‌കോറോസ് മെത്രാപ്പോലീത്ത, അരമന മാനേജര്‍ ഫാ. യാക്കോബ് തോമസ് റമ്പാന്‍ എന്നിവര്‍ ചേര്‍ന്ന് സര്‍ക്കാര്‍ സംഘത്തെ സ്വീകരിച്ചു. ഓസ്‌ട്രേലിയ സന്ദര്‍ശനവേളയില്‍ പാര്‍ലമെന്‍റിലേക്ക് സര്‍ക്കാര്‍ സംഘം കാതോലിക്കാബാവായെ ക്ഷണിച്ചു.

200 മിയാവാക്കി വനങ്ങളൊരുക്കി ചെറിയാന്‍ മാത്യു

റെജി ജോസഫ് കോട്ടയം: കേരളം, തമിഴ്നാട്, കര്‍ണാടക സംസ്ഥാനങ്ങളിലായി ഇരുനൂറ് മിയാവാക്കി ചെറുവനങ്ങളെ പച്ചപ്പണിയിച്ചതിന്‍റെ സംതൃപ്തിയിലാണ് കോട്ടയം കുറിച്ചി തിരുത്താമഠം ചെറിയാന്‍ മാത്യു. വെറും ഒന്നോ ഒന്നരയോ സെന്‍റ് സ്ഥലം മതി ഇദ്ദേഹത്തിന് നൂറിനം സസ്യജാലങ്ങളുള്ള ഒരു കുട്ടിവനമൊരുക്കാന്‍. വിഖ്യാത ജാപ്പനീസ് സസ്യശാസ്ത്രജ്ഞന്‍ അകിരാ മിയാവാക്കി വികസിപ്പിച്ച ചെറുവനവത്കരണം ഇക്കാലത്ത് ലോകമെമ്പാടും മാതൃകയാക്കിയിരിക്കുന്നു. ഓരോ മരവും ഓരോ ഓക്‌സിജന്‍ പാര്‍ലറാണെന്ന കരുതലിലാണ് ചെറിയാന്‍ ചെറുവനങ്ങളെ പരിപാലിക്കുന്നത്. മരങ്ങള്‍ നട്ടുവളര്‍ത്തുക മാത്രമല്ല ഓരോന്നിന്‍റെയും വര്‍ഗവും വംശവും ഗുണവുമൊക്കെ ചെറിയാനു മനഃപാഠം. കേരളത്തില്‍ കാണപ്പെടുന്ന അയ്യായിരം സസ്യങ്ങളില്‍ ആയിരത്തോളം ചെടികളെക്കുറിച്ച് ഇദ്ദേഹം ആധികാരികമായി പറയും. കൂടുതല്‍ സസ്യങ്ങളെ തിരിച്ചറിയാനുള്ള നിരീക്ഷണം തുടരുകയുമാണ്. വംശനാശത്തിലേക്കു നീങ്ങുന്ന സസ്യവര്‍ഗങ്ങളെ ചെറു വനങ്ങളില്‍ സംരക്ഷിക്കുകകൂടിയാണ് ലക്ഷ്യം.എവിടെയും ഓര്‍ഡര്‍ അനുസരിച്ച് ഇദ്ദേഹം മിയാവാക്കി വനം ഒരുക്കിക്കൊടുക്കും. ഒരു ചതുരശ്ര മീറ്ററില്‍ മിയാവാക്കി വനമൊരുക്കുന്നതിന് ഏകദേശം 390 രൂപയാകുമെന്ന് ചെറിയാന്‍ പറയുന്നു. ഓട്ടോമാറ്റിക് നന സംവിധാനവും സുരക്ഷിത വേലിയും ഉള്‍പ്പെടെയുള്ള ചെലവാണിത്. ചുറ്റുവേലിയില്ലെങ്കില്‍ മൃഗങ്ങളും മനുഷ്യരും സസ്യങ്ങൾ നശിപ്പിക്കും. ഫലവൃക്ഷങ്ങള്‍ മാത്രം നട്ടുവളര്‍ത്തണമെങ്കില്‍ കൂടുതല്‍ തുകയാകും. ഇതോടകം എത്രയേക്കര്‍ വനങ്ങള്‍ ഒരുക്കി വളര്‍ത്തിയെന്നതിന് ഇദ്ദേഹത്തിന് കൃത്യമായ കണക്കില്ല. ഒന്നര സെന്‍റ് മുതല്‍ 40 സെന്‍റ് വരെ സ്ഥലത്ത് മിയാവാക്കി തയാറാക്കിയിട്ടുണ്ട്. ഇതോടകം കുറഞ്ഞത് ഒരു ലക്ഷം മരങ്ങള്‍ നട്ടുവളര്‍ത്തിയുണ്ടാകും. എന്നാല്‍, മരത്തിന്‍റെ എണ്ണത്തെക്കാള്‍ കാടിന്‍റെ നിലവാരമാണ് പ്രധാനം. മിയാവാക്കി രീതിയില്‍ മരവും വനവും വളര്‍ത്താന്‍ ഏറെ ശ്രദ്ധിക്കണം. ആദ്യകാലത്ത് ചെറിയാന്‍ നട്ട മരങ്ങള്‍ 60 അടിയിലേറെ വളര്‍ന്നുകഴിഞ്ഞു. സാധാരണരീതിയില്‍ ഒരേക്കര്‍ സ്ഥലത്ത് 300 തൈകളിലേറെ നടാനാവില്ല. എന്നാല്‍ മിയാവാക്കിയില്‍ പതിനാറായിരം തൈകള്‍ നടാം. ഗ്രോബാഗുകളില്‍ മൂന്നു മാസം വളര്‍ത്തിയശേഷമാണ് ഇദ്ദേഹം മിയാവാക്കി കാടുണ്ടാക്കാന്‍ ചെടികള്‍ നടുന്നത്. വേരുകള്‍ക്ക് ഒന്നരയടി നീളം ഉറപ്പാക്കിയശേഷമാവും പറിച്ചുനടീല്‍. മരങ്ങളും കുറ്റിച്ചെടികളും ഇടകലര്‍ത്തി വേണം നടാന്‍. ഒരു മിയാവാക്കി കാട്ടില്‍ കുറഞ്ഞത് 30 സസ്യവര്‍ഗങ്ങള്‍ വേണമെന്നാണ് അകിരാ മിയാവാക്കി പറയുന്നത്. എന്നാന്‍ ചെറിയാന്‍റെ കാട്ടില്‍ കുറഞ്ഞത് 100 സ്പീഷീസുണ്ടാകും. കുറിച്ചിയില്‍ ചെറിയാന്‍റെ വീടിനോടു ചേര്‍ന്നുമുണ്ട് ചെറിയൊരു മിയാവാക്കി. നാട്ടകം ഗസ്റ്റ് ഹൗസില്‍ മിയാവാക്കി തയാറാക്കിയതും ഇദ്ദേഹമാണ്.

മീനച്ചിലാറ്റില്‍ അടിഞ്ഞുകൂടിയ എക്കലും മണ്ണും നീക്കം ചെയ്യുന്നു

കോട്ടയം: വെള്ളപ്പൊക്കത്തില്‍ മീനച്ചിലാറ്റില്‍ അടിഞ്ഞുകൂടിയിരിക്കുന്ന എക്കലും മണ്ണും നീക്കം ചെയ്യാന്‍ ജലസേചന വകുപ്പിനെ ചുമതലപ്പെടുത്തി ജില്ലാ ദുരന്ത നിവാരണ അഥോറിട്ടി. മീനച്ചിലാറ്റിലെ 11 ഇടങ്ങളിലെയും ആറിനോടു ചേര്‍ന്നുള്ള അഞ്ച് ചെക്ക് ഡാമുകളിലെയും മണ്ണും എക്കലും ചെളിയും മറ്റും ഖരവസ്തുക്കളും നിശ്ചിത തുകയ്ക്ക് നീക്കം ചെയ്യാനായി ജലസേചന വകുപ്പിലെ ഇറിഗേഷന്‍ വിഭാഗം ടെന്‍ഡര്‍ ക്ഷണിച്ചു. 2018 മുതലുണ്ടായ തുടര്‍ച്ചയായ വെള്ളപ്പൊക്കത്തില്‍ കേരളത്തിലെ നദികളില്‍ അടിഞ്ഞുകൂടിയിരിക്കുന്ന എക്കലും മണ്ണും നീക്കം ചെയ്യുന്നതിനായി ദുരന്തനിവാരണ അഥോറിട്ടിയെ സര്‍ക്കാര്‍ ചുമതലപ്പെടുത്തിയിരുന്നു. മണ്ണിന്‍റെയും എക്കലിന്‍റെയും വില നിശ്ചയിക്കുന്നതിനും ലേലം ചെയ്യുന്നതിനുമുള്ള അധികാരം ജില്ലാ ദുരന്ത നിവാരണ അഥോറിട്ടി ചെയര്‍മാന്‍ കൂടിയായ ജില്ലാ കളക്ടര്‍ക്കാണ് നല്‍കിയിരിക്കുന്നത്.‌ മുന്‍കാലങ്ങളില്‍ ജലസേചന വകുപ്പു മുഖാന്തരം മീനച്ചിലാറ്റില്‍നിന്നും നീക്കം ചെയ്ത് വിവിധ യാര്‍ഡുകളില്‍ സൂക്ഷിച്ചിരിക്കുന്ന മണ്ണ് പല തവണ ലേലം ചെയ്യാൻ തീരുമാനിച്ചെങ്കിലും ലേലത്തില്‍ ആരും പങ്കെടുത്തില്ല. ഇതിന്‍പ്രകാരം മണ്ണ് പലയിടത്തും കൂടിക്കിടക്കുകയാണ്. ഇത്തവണ നദികളിലെ എക്കല്‍ നീക്കുന്നതിനൊപ്പം ആറിനോടു ചേര്‍ന്നുള്ള ചെക്ക് ഡാമുകളിലെയും മണ്ണ് നീക്കംചെയ്യാനും ടെന്‍ഡര്‍ വിളിച്ചിട്ടുണ്ട്. പൂഞ്ഞാര്‍ തെക്കേക്കര പഞ്ചായത്തിലെ നത്തനാല്‍ ചെക്ക്ഡാമിനു മുകള്‍ഭാഗത്തെ മണ്ണ് നീക്കം ചെയ്യാനാണ് ഇതുവരെ ആളെത്തിയിരിക്കുന്നത്. സര്‍ക്കാരിലേക്ക് നല്‍കേണ്ട നികുതികളില്‍ ജിഎസ്ടി മാത്രം നല്‍കി എക്കലിന്‍റെയും മണ്ണിന്‍റെയും വിലയേക്കാള്‍ അധികരിച്ചു നില്‍ക്കുന്ന നികുതികള്‍ ഒഴിവാക്കി ലേലം നടത്താനാണ് ഇറിഗേഷന്‍ വിഭാഗം ശ്രമിക്കുന്നത്. അധിക നികുതികള്‍ ഒഴിച്ചുനിര്‍ത്തിയാല്‍ ലേലം വഴി ഏറ്റെടുക്കാന്‍ കരാറുകാര്‍ തയാറാകുമെന്നാണ് ഇറിഗേഷന്‍ വകുപ്പ് അസിസ്റ്റന്‍റ് എന്‍ജിനീയര്‍മാര്‍ നല്‍കിയ ലൊക്കേഷന്‍ റിപ്പോര്‍ട്ടില്‍ പറയുന്നത്. ഇ-ഓക്ഷന്‍ വഴി ലേലം നടന്നില്ലെങ്കില്‍ ജില്ലാ കളക്ടറുടെ അനുമതിയോടെ സ്‌പോട്ട് ലേലം നടത്താനാണ് തീരുമാനം. മീനച്ചിലാറ്റില്‍നിന്നു മണ്ണ് നീക്കം ചെയ്യാനുള്ള സ്ഥലങ്ങളും മണ്ണിന്‍റെ അളവും (മെട്രിക് ക്യൂബില്‍) തീക്കോയി അഞ്ഞിതുരുത്ത് - 5000 ദീപ്തി ഭാഗം - 5000 തിടനാട് ചിറ്റാര്‍പള്ളി ചപ്പാത്ത് - 3000 കിടങ്ങൂര്‍ കരുത്തമന്‍ കടവ് - 3000 കിടങ്ങൂര്‍ ആറ്റുവഞ്ചിക്കടവ് - 5000 ഭരണങ്ങാനം വിലങ്ങുപാറ പാലത്തിനു താഴെ - 630 ഏറ്റുമാനൂര്‍ പട്ടര്‍മഠം പാലത്തിനു മുകളില്‍ - 4000 പൂവത്തുമൂട് പാലത്തിനു മുകളില്‍ - 4000 ചെമ്പിളാവ് പാലത്തിനു താഴ് ഭാഗം - 1000 പുന്നത്തുറ ചര്‍ച്ച കടവ് - 1200 ചേര്‍പ്പുങ്കല്‍ പാലത്തിനു താഴെ - 1600 ചെക്ക്ഡാമുകള്‍ ആറാം മൈല്‍ ചെക്ക് ഡാം - 4300 പൂഞ്ഞാര്‍ നത്തനാല്‍ ചെക്ക് ഡാമിനു മുകളില്‍ - 3000 തിടനാട് ചെക്ക് ഡാമിനു മുകളിലും താഴെയും - 3000 പൂഞ്ഞാര്‍ പെരുനിലം ചെക്ക്ഡാം - 3000 പൂഞ്ഞാര്‍ പള്ളിവാതില്‍ ചെക്ക് ഡാം - 2000

എംഎല്‍എയുടെ മകനുള്‍പ്പെടെയുള്ളവരെ ഒഴിവാക്കി കഞ്ചാവ് കേസില്‍ കുറ്റപത്രം

ആലപ്പുഴ: കഞ്ചാവ് കേസില്‍ യു. പ്രതിഭ എംഎല്‍എയുടെ മകനുള്‍പ്പെടെ ഏഴു പേരെ ഒഴിവാക്കി എക്‌സൈസ് നര്‍കോട്ടിക് സ്പെഷല്‍ സ്‌ക്വാഡ് കുറ്റപത്രം സമര്‍പ്പിച്ചു. അമ്പലപ്പുഴ കോടതിയിലാണ് റിപ്പോര്‍ട്ട് സമര്‍പ്പിച്ചത്. ഇതോടെ കേസില്‍ രണ്ടു പ്രതികള്‍ മാത്രമായി. എംഎല്‍എയുടെ മകന്‍ കനിവിനെ അടക്കം പ്രതിയാക്കി എഫ്‌ഐആര്‍ ഇട്ട കേസിലാണ് മാറ്റം. തെളിവുകളുടെ അഭാവത്തില്‍ ഏഴുപേരെ പ്രതിപ്പട്ടികയില്‍നിന്ന് ഒഴിവാക്കിയതായി നേരത്തെ എക്‌സൈസ് ഇടക്കാല റിപ്പോര്‍ട്ട് സമര്‍പ്പിച്ചിരുന്നു. ഡിസംബര്‍ 28നാണ് കേസിനാസ്പദമായ സംഭവം. മൂന്നു ഗ്രാം കഞ്ചാവുമായി കനിവുള്‍പ്പെടെ ഒൻപതു പേരെ എക്‌സൈസ് സംഘം പിടികൂടുകയായിരുന്നു. ഒമ്പതാം പ്രതിയായിരുന്നു കനിവ്. ഒന്നാം പ്രതിയില്‍നിന്ന് കഞ്ചാവും രണ്ടാം പ്രതിയില്‍നിന്ന് കഞ്ചാവ് ഉപയോഗിക്കുന്ന ഉപകരണവും കണ്ടെത്തി. മറ്റുള്ളവര്‍ കഞ്ചാവ് ഉപയോഗിച്ചെന്നായിരുന്നു മഹസറിലുണ്ടായിരുന്നു. പിന്നീട് പ്രതികളെ ജാമ്യത്തില്‍ വിട്ടു. കുട്ടനാട് എക്‌സൈസാണ് കേസ് റജിസ്റ്റര്‍ ചെയ്തത്. ഇതിനു പിന്നാലെയാണ് മകനെതിരേ കേസെടുത്തില്ലെന്ന് പറഞ്ഞ് യു.പ്രതിഭ എംഎല്‍എ രംഗത്തെത്തിയത്. സംഭവം വിവാദമായതോടെ എക്‌സൈസ് നര്‍കോട്ടിക് സ്‌പെഷല്‍ സ്‌ക്വാഡ് അന്വേഷണം ഏറ്റെടുക്കുകയായിരുന്നു. എന്നാല്‍, വൈദ്യ പരിശോധന നടത്താത്തതിനാല്‍ പ്രതികള്‍ കഞ്ചാവ് ഉപയോഗിച്ചെന്ന് തെളിയിക്കാനായില്ല. കഞ്ചാവ് ഉപയോഗിക്കുന്നത് കണ്ടെന്ന് എക്‌സൈസ് ഉദ്യോഗസ്ഥര്‍ മൊഴി നല്‍കിയിട്ടുമില്ല. മറ്റു സാക്ഷികളും ഇല്ലാത്ത സാഹചര്യത്തിലാണ് ഏഴു പേരെ ഒഴിവാക്കി കുറ്റപത്രം സമര്‍പ്പിച്ചത്.

വിസ്മയക്കാഴ്ചയായി കോട്ടയം നഗരമധ്യത്തിലെ‍ ഡ്രാഗണ്‍ഫ്രൂട്ട് തോട്ടം

കോട്ടയം: ബേക്കര്‍ സ്‌കൂളിനു സമീപം സിഎസ്‌ഐ സഭയുടെ നാലരയേക്കര്‍ ഡ്രാഗണ്‍ കൃഷിത്തോട്ടം വിസ്മയക്കാഴ്ചയാണ്. മൂന്നു വര്‍ഷം പ്രായമായ ഓരോ ചെടിയിലും നിറയെ കായ്ഫലം. താങ്ങുതൂണുകള്‍ക്കു മുകളില്‍ കെട്ടിയ ഉപയോഗശൂന്യമായ ടയറില്‍ നിറയെ ഡ്രാഗണ്‍ വള്ളികള്‍. മുന്‍പ് പച്ചക്കറികൃഷി നടത്തിയിരുന്ന തോട്ടത്തില്‍ ഡ്രാഗണ്‍ ചെടികള്‍ ഒരു സാധ്യതയെന്നോണം നട്ടതാണ്. നല്ല പരിപാലനയും വളപ്രയോഗവും നല്‍കിയതോടെ ഒന്നാം വര്‍ഷംതന്നെ കായിട്ടു. മേയ് മുതല്‍ നവംബര്‍ വരെയാണ് പൂവിടല്‍ കാലം. ചെടിയില്‍ വേണ്ടതിലേറെ പൂക്കളുണ്ടെങ്കില്‍ കായ്കള്‍ ചെറുതാകും. അതിനാല്‍ ചെടിയുടെ ആരോഗ്യമനുസരിച്ച് മാത്രമേ പൂക്കള്‍ നിലനിര്‍ത്തുന്നുള്ളൂ. പൂവിടലും വിളവെടുപ്പും സെപ്റ്റംബര്‍, ഒക്ടോബര്‍ മാസത്തോടെ പൂര്‍ത്തിയാകും. തോട്ടത്തോടു ചേര്‍ന്ന ഔട്ട്‌ലെറ്റിലും കടകളിലും സിഎസ്‌ഐ പള്ളികളിലും അനുബന്ധ സ്ഥാപനങ്ങളിലുമാണ് വില്‍പന. ഒരു കിലോ ഡ്രാഗണ്‍ പഴം 250 രൂപ നിരക്കിലാണ് വില്‍ക്കുന്നത്. ശാസ്ത്രീയമായി കൃഷി നടത്തിയാല്‍ ഒരു ചെടിയില്‍ 20 വര്‍ഷത്തോളം വിളവെടുപ്പ് നടത്താം. ഡ്രാഗണ്‍ നടാന്‍ ഏറ്റവും മെച്ചം ഒക്ടോബര്‍-നവംബര്‍ മാസങ്ങളാണ്. എന്നാല്‍ നന കൊടുക്കാന്‍ സൗകര്യമുണ്ടെങ്കില്‍ ഏതു മാസവും നടാം. കനത്ത മഴയത്തുള്ള സമയത്ത് നടീല്‍ ഒഴിവാക്കുകയാണ് മെച്ചം. കള്ളിമുള്‍ച്ചെടിയുടെ വര്‍ഗമായതിനാല്‍ ഡ്രാഗണ്‍ ഫ്രൂട്ടിന് താരതമ്യേന വെള്ളം കുറച്ചുമതി.

വാഹനത്തിൽനിന്നു കഞ്ചാവ് കണ്ടെത്തിയ സംഭവത്തിൽ വാഹന ഉടമ അറസ്റ്റിൽ

പാലാ: കുറിഞ്ഞിയില്‍ കഴിഞ്ഞ ദിവസമുണ്ടായ വാഹനാപകടത്തില്‍ യുവതി മരിക്കുകയും മൂന്നു പേര്‍ക്ക് പരിക്കേല്‍ക്കുകയും ചെയ്ത സംഭവത്തില്‍ വാഹനം ഓടിച്ച കോട്ടയം വെല്ലൂര്‍ കൊച്ചുകാരേത്തറ കെ.ആര്‍. രഞ്ജിത്തിനെതിരേ പോലീസ് കേസെടുത്തു. ഇയാള്‍ സുഹൃത്തുക്കളുമൊത്ത് തൊടുപുഴ ഭാഗത്തുനിന്ന് ഓടിച്ചുവന്ന കാര്‍ കുറിഞ്ഞി ഭാഗത്തുവച്ച് അപകടത്തില്‍പ്പെടുകയായിരുന്നു. യാത്രയ്ക്കിടയില്‍ പരസ്പരമുണ്ടായ വാക്കുതര്‍ക്കത്തെത്തുടര്‍ന്ന് കാര്‍ മനഃപൂര്‍വം റോഡിന്‍റെ തിട്ടയിലേക്ക് ഇടിച്ചു കയറ്റുകയായിരുന്നുവെന്നു പരിക്കേറ്റവര്‍ പോലീസിന് മൊഴി നല്‍കിയിട്ടുണ്ട്. അപകടത്തില്‍ കാറില്‍ യാത്ര ചെയ്തിരുന്ന കോട്ടയം ആര്‍പ്പൂക്കര സ്വദേശിനി ജോസ്‌നയാണ് മരിച്ചത്. കൂടെയുണ്ടായിരുന്ന മറ്റൊരാള്‍ക്ക് ഗുരുതരമായി പരിക്കേല്‍ക്കുകയും ചെയ്തു. അപകടത്തിൽപ്പെട്ട കാറിൽനിന്ന് കഞ്ചാവ് കണ്ടെടുത്തതായും പ്രതി രഞ്ജിത്ത് മദ്യപിച്ചായിരുന്നു വാഹനം ഓടിച്ചിരുന്നതെന്നും പോലീസ് പറഞ്ഞു. വാഹനത്തിൽനിന്നു കഞ്ചാവ് കണ്ടെത്തിയ സംഭവത്തിൽ വാഹന ഉടമ കോട്ടയം അയ്മനം മാലിപ്പറമ്പിൽ ജോജോ ജോസഫിനെ പോലീസ് അറസ്റ്റ് ചെയ്തു. എൻഡിപിഎസ് നിയമപ്രകാരമാണ് രാമപുരം പോലീസ് കേസെടുത്ത് അറസ്റ്റ് ചെയ്തത്. നിരോധിത മയക്കുമരുന്ന് ഇനത്തിൽപ്പെട്ട ആറ് ഗ്രാം കഞ്ചാവ് കാറിന്‍റെ ഡാഷ്ബോർഡിൽ നിന്നാണ് കണ്ടെടുത്തത്. പ്രതിയെ കോടതിയിൽ ഹാജരാക്കി.

വെളിച്ചമില്ലാത്തതു രക്ഷാപ്രവര്‍ത്തനത്തിനു തടസമായി

പള്ളിക്കത്തോട്: അപകടമുണ്ടായ ചല്ലോലി കുളത്തിന്‍റെ കരയില്‍ ട്രാന്‍സ്ഫോര്‍മര്‍ ഉണ്ടെങ്കിലും തെരുവുവിളക്കില്ലാതിരുന്നത് രക്ഷാപ്രവര്‍ത്തനത്തെ ബാധിച്ചതായി നാട്ടുകാര്‍. രാത്രി, പകല്‍ ഭേദമില്ലാതെ നിരവധി വാഹനങ്ങള്‍ കടന്നുപോകുന്നതും രണ്ടു റോഡുകള്‍ സംഗമിക്കുന്നതുമായ ഇവിടെ തെരുവു വിളക്കുകളില്ല. നേരത്തെയുണ്ടായിരുന്നത് നാളുകളായി പ്രവര്‍ത്തിക്കുന്നില്ല. സമീപത്തെ പോസ്റ്റില്‍ ബള്‍ബുണ്ടെങ്കിലും പ്രകാശിച്ചിട്ട് മാസങ്ങളായെന്നും നാട്ടുകാര്‍ പറയുന്നു. വെളിച്ചമുണ്ടായിരുന്നുവെങ്കില്‍ കഴിഞ്ഞദിവസം രക്ഷാപ്രവര്‍ത്തനം വേഗത്തില്‍ നടത്താനും ജീവന്‍ രക്ഷിക്കാനും കഴിയുമായിരുന്നുവെന്നു നാട്ടുകാര്‍ പറയുന്നു. സംഭവമറിഞ്ഞും രക്ഷാപ്രവര്‍ത്തനത്തിന് ഓടിയെത്തിയ പലര്‍ക്കും വെളിച്ചത്തിന്‍റെ അഭാവത്തില്‍ തോട്ടിലും ഓടയിലും വീണു പരിക്കേല്‍ക്കുകയും ചെയ്തിരുന്നു.

അധികൃതരുടെ അനാസ്ഥ:‍ ചല്ലോലി കുളത്തിൽ പൊലിഞ്ഞത് ഒരു കുടുംബത്തിന്‍റെ പ്രതീക്ഷ

പള്ളിക്കത്തോട്: ബുധനാഴ്ച കാര്‍ കുളത്തിലേക്കു മറിഞ്ഞ് ഒരാളുടെ ജീവന്‍ നഷ്ടമായ ചല്ലോലി കുളത്തിന് സംരക്ഷണഭിത്തി ഒരുക്കണമെന്ന ആവശ്യത്തിനു വര്‍ഷങ്ങളുടെ പഴക്കമുണ്ട്. ചെങ്ങളം ആശുപത്രിക്കുസമീപം താമസിക്കുന്ന പാലാ പ്രവിത്താനം ചന്ദ്രന്‍കുന്നേല്‍ ജയിംസിന്‍റെ മകന്‍ ജെറിന്‍റെ ജീവനാണ് അധികൃതരുടെ അനാസ്ഥയിൽ നഷ്ടമായത്. ബുധനാഴ്ച രാത്രി 7.30നായിരുന്നു അപകടം. പഞ്ചായത്തിലെ എട്ടാം വാര്‍ഡിലാണ് ജലസേചനത്തിനായി ഉപയോഗിക്കുന്ന ഈ കുളം. പതിറ്റാണ്ടുകളുടെ പഴക്കമുള്ള കുളം ഒരിക്കലും വറ്റാറില്ല. വേനല്‍ക്കാലത്ത് പഞ്ചായത്തിലെ നിരവധി വാര്‍ഡുകളിലെ ദാഹകമകറ്റുന്ന കുളമാണെങ്കിലും സംരക്ഷണമൊരുക്കുന്നതില്‍ അധികൃതര്‍ക്കു താത്പര്യമില്ല. നാട്ടുകാര്‍ പലതവണ ആവശ്യപ്പെട്ടിട്ടും സംരക്ഷണഭിത്തി നിര്‍മിക്കാതിരുന്നതാണ് ഒരു ജീവന്‍ പൊലിയാന്‍ ഇടയാക്കിയത്. ഇനിയെങ്കിലും അധികൃതരുടെ കണ്ണു തുറക്കുമോയെന്നാണ് നാട്ടുകാര്‍ കാത്തിരിക്കുന്നത്. ആനിക്കാട്-കയ്യൂരി റോഡിനോട് ചേര്‍ന്നാണ് ആഴമേറിയ കുളം സ്ഥിതി ചെയ്യുന്നത്. ശക്തമായ വേനല്‍ക്കാലത്തൊഴിച്ച് എപ്പോഴും കുളം നിറഞ്ഞു കിടക്കും. റോഡിന്‍റെ ഭാഗത്തുപോലും കുളത്തിനു സംരക്ഷണഭിത്തിയില്ല. നേരത്തേ, മാലിന്യം വീഴാതിരിക്കാന്‍ സ്ഥാപിച്ച വലകള്‍ ഉറപ്പിച്ചിരുന്ന ഏതാനും ഇരുമ്പുതൂണുകള്‍ മാത്രമാണ് ഇപ്പോഴുള്ളത്. ഒന്നിലേറെ വാഹനങ്ങള്‍ കടന്നുവന്നാല്‍ സ്‌കൂള്‍ വിദ്യാര്‍ഥികള്‍ ഉള്‍പ്പെടെ ഭയത്തോടെയാണ് ഇതുവഴി ‍സഞ്ചരിക്കുന്നത്. ഒരു വര്‍ഷം മുമ്പ് മോഷ്ടിച്ച ബൈക്കുമായെത്തിയ രണ്ടു പേര്‍ കുളത്തില്‍ വീണിരുന്നുവെങ്കിലും രക്ഷപ്പെട്ടിരുന്നു. ഇളംപള്ളി റോഡില്‍നിന്ന് ഇറക്കമിറങ്ങി എത്തുന്ന വാഹനങ്ങള്‍ കുളത്തിലേക്കു വീഴാനുള്ള സാധ്യതയേറെയാണ്. ഇതേ ഭാഗത്ത് കെഎസ്ഇബി ട്രാന്‍സ്ഫോര്‍മര്‍ സ്ഥിതി ചെയ്യുന്നതും അപകടസാധ്യത വര്‍ധിപ്പിക്കുന്നു. നൂറുകണക്കിനു കുടുംബങ്ങള്‍ വെള്ളം ഉപയോഗിക്കുന്ന കുളമാണെങ്കിലും മേല്‍മൂടി സംവിധാനവുമില്ല. രണ്ടു റോഡുകളില്‍നിന്നു ഒഴുകിയെത്തുന്ന മലിനജലവും കുളത്തിന്‍റെ ചുറ്റിലേക്കാണ് ഒഴുകിയിറങ്ങുന്നത്. അപകടത്തിന്‍റെ പശ്ചാത്തലത്തില്‍ അടിയന്തരമായി കുളത്തിനു സംരക്ഷണഭിത്തി നിര്‍മിക്കാന്‍ അധികൃതര്‍ തയാറാകണമെന്നാണ് നാട്ടുകാര്‍ ആവശ്യപ്പെടുന്നത്.

പ്ലസ്‌ വണ്‍ പ്രവേശനം: ഏകജാലകം വഴി പ്രവേശനം നേടിയത് 11,153 വിദ്യാര്‍ഥികള്‍

കോട്ടയം: പ്ലസ്‌ വണ്‍ പ്രവേശനത്തിനുള്ള ആദ്യ അലോട്ട്‌മെന്‍റ് പട്ടിക പുറത്തുവന്നപ്പോള്‍ ജില്ലയില്‍ ഏകജാലകം വഴി പ്രവേശനം നേടിയത് 11,153 വിദ്യാര്‍ഥികള്‍. സര്‍ക്കാര്‍, എയ്ഡഡ് സ്‌കൂളുകളിലായി ആദ്യ അലോട്ട്‌മെന്‍റിനുശേഷം 2571 സീറ്റുകള്‍ മാത്രമാണ് ഒഴിവുള്ളത്. വിവിധ സംവരണ വിഭാഗങ്ങളില്‍പെട്ടതാണ് ഇവയത്രയും. ജനറല്‍ സീറ്റുകളില്‍ അലോട്ട്‌മെന്‍റ് പൂര്‍ത്തിയായി. സാമ്പത്തിക പിന്നാക്കസംവരണത്തിനായി 510 സീറ്റുകളാണു മാറ്റിവച്ചിരുന്നത്. ഇതില്‍ 291 ല്‍ അലോട്ട്‌മെന്‍റ് ആയി. 219 എണ്ണം ബാക്കി. മറ്റു ജില്ലകളില്‍നിന്നുള്ള 2907 അടക്കം 21,852 അപേക്ഷകരാണ് ജില്ലയില്‍ ഉള്ളത്. ഭിന്നശേഷിക്കാരുടേതുള്‍പ്പെടെ സര്‍ക്കാര്‍, എയ്ഡഡ് സ്‌കൂളുകളിലുള്ള സീറ്റുകളാവട്ടെ 13,724 ഉം. സീറ്റുകളുടെ എണ്ണത്തേക്കാള്‍ 8128 അപേക്ഷകര്‍ കൂടുതലാണ് ജില്ലയില്‍. അതേസമയം, സര്‍ക്കാര്‍ കണക്കനുസരിച്ച് അണ്‍ എയ്ഡഡ് സ്‌കൂളുകളിലെ ഉള്‍പ്പെടെ ജില്ലയില്‍ 21,600 പ്ലസ് വണ്‍ സീറ്റുകളാണുള്ളത്. ജനറല്‍ വിഭാഗത്തില്‍ 7439 സീറ്റുകളുള്ളതില്‍ മുഴുവന്‍ സീറ്റുകളിലേക്കും ഒന്നാം അലോട്ട്‌മെന്‍റില്‍ പ്രവേശനമായിട്ടുണ്ട്. 391 മുസ്‌ലിം സംവരണ സീറ്റുകളില്‍ 351 എണ്ണം അലോട്ട്‌മെന്‍റ് ആയി. 40 സീറ്റുകള്‍ ഒഴിവുണ്ട്. 408 ഈഴവ/തീയ സംവരണ സീറ്റുകളില്‍ എല്ലാറ്റിലും അലോട്ട്‌മെന്‍റ് ആയി. എല്‍സി/ആംഗ്ലോ ഇന്ത്യന്‍ സംവരണ സീറ്റുകളില്‍ 187ല്‍ 66 എണ്ണത്തിലാണ് അലോട്ട്‌മെന്‍റ് ആയത്. ഒഴിവ് 121. 2268 എസ്‌സി സംവരണ സീറ്റുകളില്‍ 1824 എണ്ണത്തിലാണ് അലോട്ട്‌മെന്‍റ് നടന്നത്. 444 ഒഴിവുകളാണ് ഈ വിഭാഗത്തിലുള്ളത്. എസ്ടി സംവരണ സീറ്റുകളിലാകട്ടെ 1512 എണ്ണത്തില്‍ 202ല്‍ മാത്രമാണ് അലോട്ട്‌മെന്‍റ്. ഒഴിവുള്ളത് 1310 സീറ്റുകള്‍. ക്രിസ്ത്യന്‍ ഒബിസി സീറ്റുകളില്‍ ഒഴിവില്ല. 85 സീറ്റുകളിലും അലോട്ട്‌മെന്‍റായി. ഹിന്ദു ഒബിസി സീറ്റുകളില്‍ 187ല്‍ 179 എണ്ണം അലോട്ട്‌മെന്‍റ് ആയി. ബാക്കി എട്ട്. ഭിന്നശേഷി, കാഴ്ചപരിമിതി വിദ്യാര്‍ഥികള്‍ക്കുള്ള സംവരണ സീറ്റുകളില്‍ യഥാക്രമം 206, 31 വീതം ഒഴിവുകളുണ്ട്. സ്പോര്‍ട്സ് ക്വാട്ടയില്‍ 424ല്‍ 245 അലോട്ട്‌മെന്‍റ് ആയി. 179 സീറ്റുകളാണ് ഒഴിവുള്ളത്. മോഡല്‍ റസിഡന്‍ഷ്യല്‍ സ്‌കൂളുകളില്‍ 78 സീറ്റും പൂര്‍ണമായി.

ദുർബല വിഭാഗ വികസന പദ്ധതി: അപേക്ഷ ക്ഷണിച്ചു

കോട്ടയം: പട്ടികജാതി വിഭാഗത്തിൽത്തന്നെ അതിദുർബല വിഭാഗമായി പ്രത്യേകം പരിഗണിക്കുന്ന അരുന്ധതിയാർ, ചക്കിലിയൻ, വേടൻ, നായാടി, കള്ളാടി വിഭാഗക്കാർക്കായി പ്രത്യേകം നടപ്പാക്കുന്ന ദുർബല വിഭാഗ വികസന പദ്ധതിയുടെ ഭാഗമായി 2025-26 വർഷം നടപ്പാക്കുന്ന വിവിധ പദ്ധതികളിലേക്ക് പട്ടികജാതി വികസന വകുപ്പ് അപേക്ഷ ക്ഷണിച്ചു. ഭൂമിവാങ്ങൽ, ഭവനനിർമാണം, ഭവന പുനരുദ്ധാരണം, സ്വയം തൊഴിൽ, കൃഷി ഭൂമി, പഠനമുറി, ടോയ്‌ലറ്റ് നിർമാണം, സ്വയംതൊഴിൽ പരിശീലനം എന്നിങ്ങനെ വിവിധ പദ്ധതികളിലേക്കാണ് അപേക്ഷിക്കേണ്ടത്. ഭൂമിവാങ്ങൽ, ഭവനനിർമാണം എന്നീ പദ്ധതികൾക്ക് ലൈഫ് പട്ടികയിൽ ഉൾപ്പെട്ടവരാണ് അപേക്ഷിക്കേണ്ടത് . പഠനമുറി പദ്ധതിക്ക് അഞ്ചു മുതൽ 12-ാം ക്ലാസ് വരെ പഠിക്കുന്ന വിദ്യാർഥികളുടെ രക്ഷിതാക്കൾക്ക് അപേക്ഷിക്കാം. പഠനമുറി നിർമിക്കുന്നതിന് മൂന്നു ലക്ഷം രൂപ അനുവദിക്കും. ഭവന പുനരുദ്ധാരണത്തിന് 2.5 ലക്ഷം രൂപ അനുവദിക്കും. കഴിഞ്ഞ അഞ്ചു വർഷത്തിനുള്ളിൽ ഭവന നിർമാണം/ഭവന പുനരുദ്ധാരണം എന്നിവയ്ക്ക് ധനസഹായം ലഭിച്ചവർ ആകരുത്. സ്വയംതൊഴിൽ പദ്ധതിക്ക് പ്രോജക്റ്റ് റിപ്പോർട്ട് അടിസ്ഥാനത്തിൽ മൂന്നു ലക്ഷം രൂപ വരെ ഗ്രാന്‍റായി ലഭിക്കും. പ്രായപരിധി 18 മുതൽ 60 വരെ. ഈ പദ്ധതികളിലേക്ക് അപേക്ഷിക്കുന്നതിനുള്ള വരുമാന പരിധി ഒരു ലക്ഷം രൂപയാണ്. അപേക്ഷാ ഫോം ബ്ലോക്ക്/മുനിസിപ്പാലിറ്റി/കോർപറേഷൻ പട്ടികജാതി ഓഫീസിൽനിന്നു ലഭിക്കും. കൂടുതൽ വിവരങ്ങൾക്ക് അതാത് പട്ടികജാതി ഓഫീസുമായി ബന്ധപ്പെടണം. അപേക്ഷിക്കുന്നതിനുള്ള അവസാന തീയതി 30.

കാലാവസ്ഥാ പാര്‍ലമെന്‍റ് ഇന്നു സിഎംഎസില്‍

കോട്ടയം: കാലാവസ്ഥാ നീതിക്കായുള്ള വിദ്യാര്‍ഥികളുടെ പാര്‍ലമെന്‍റ് ഇന്നു സിഎംഎസ് കോളജില്‍ നടക്കും. ഈ വര്‍ഷം നവംബര്‍ 10 മുതല്‍ 21 വരെ ബ്രസീലില്‍ നടക്കുന്ന ഐക്യരാഷ്ട്ര സഭയുടെ കാലാവസ്ഥാ വ്യതിയാന കോണ്‍ഫറന്‍സായ സിഒപി-30ല്‍ തങ്ങളുടെ ശബ്ദംകൂടി ഉയരണമെന്ന ആഗ്രഹത്തിലാണ് സിഎസ്‌ഐ മധ്യകേരള മഹായിടവക പരിസ്ഥിതി വകുപ്പും സിഎംഎസ് കോളജും ചേര്‍ന്നു പാര്‍ലമെന്‍റ് സംഘടിപ്പിക്കുന്നത്. കാലാവസ്ഥാ വ്യതിയാനത്തിന്‍റെ കദനകഥകളുമായി ലോകത്തിലെ 17 സ്ഥലങ്ങളില്‍നിന്നുമുള്ള പാര്‍ലമെന്‍റംഗങ്ങളും മന്ത്രിമാരുമാണു വിദ്യാര്‍ഥി പാര്‍ലമെന്‍റില്‍ പ്രതിനിധീകരിക്കുക. അമേരിക്കന്‍, ഇന്ത്യന്‍ അംബാസഡര്‍മാര്‍ തങ്ങളുടെ നിലപാടുകള്‍ വ്യക്തമാക്കും. തുടര്‍ന്നു കാര്‍ബണ്‍ രഹിത സമ്പദ് വ്യവസ്ഥയ്ക്കും ആഗോള നടപടികള്‍ക്കുമുള്ള ഒരു പ്രമേയത്തോടെ പാര്‍ലമെന്‍റ് സമാപിക്കും. പാര്‍ലമെന്‍റ് സമ്മേളനത്തിനുശേഷം മഹായിടവക ബിഷപ് ഡോ. മലയില്‍ സാബു കോശി ചെറിയാന്‍റെ അധ്യക്ഷതയില്‍ നടക്കുന്ന പൊതുസമ്മേളനം മന്ത്രി വി.എന്‍. വാസവന്‍ ഉദ്ഘാടനം ചെയ്യും. തിരുവഞ്ചൂര്‍ രാധാകൃഷ്ണന്‍ എംഎല്‍എ, ജസ്റ്റീസ് കെ.ടി. തോമസ്, കെ. സുരേഷ് കുറുപ്പ്, ഡോ. റൂബിള്‍ രാജ് എന്നിവര്‍ പ്രസംഗിക്കും. സിഎംഎസ് കോളജ് പ്രിന്‍സിപ്പല്‍ പ്രഫ.ഡോ. അഞ്ജു സോസന്‍ ജോര്‍ജ് പാര്‍ലമെന്‍റിന് ആതിഥേയത്വം വഹിക്കും.

മണ്ണുമായി ബന്ധമില്ലാത്ത അന്ധസമൂഹം ബലപ്പെടുന്നു: ഡോ. ഗീവർഗീസ് മാർ കൂറിലോസ്

കോട്ടയം: പ്രകൃതിയെ നിഷ്കരുണം തകർത്ത് പാവപ്പെട്ട മനുഷ്യരെ ഇരകളാക്കുന്ന നയസമീപനങ്ങളും ഭരണനടപടികളുമാണ് നമ്മുടെ കാലം നേരിടുന്ന പ്രതിസന്ധിയെന്ന് ഡോ. ഗീവർഗീസ് മാർ കൂറിലോസ് മെത്രാപ്പോലീത്ത. ദേശീയ കർഷക ഫെഡറേഷൻ സംഘടിപ്പിക്കുന്ന ഡികെഎഫ് കാർഷികമേള 2025 വേദിയിൽ മുഖ്യപ്രഭാഷണം നിർവഹിക്കുകയായിരുന്നു അദ്ദേഹം. മണ്ണുമായി ബന്ധമില്ലാത്ത അന്ധ സമൂഹമായി നാം സങ്കോചിക്കുകയാണ്. ഗുരുതരമായ നയവൈകല്യങ്ങളുടെ പശ്ചാത്തലത്തിൽ പരിസ്ഥിതിദിനം ആഘോഷിച്ച് ആവർത്തനഘോഷത്തിലാണ് നമ്മളെന്നും മെത്രാപ്പോലീത്ത പറഞ്ഞു. ഡികെഎഫ് വൈസ് പ്രസിഡന്‍റ് വി.പി. മത്തായി അധ്യക്ഷത വഹിച്ചു. കാർഷിക മേഖലയിൽ സമഗ്ര സംഭാവനകൾ നല്കിയ ഫ്രാൻസിസ് ജോർജ് പട്ടിത്താനം, ജോർജ് ഗർവാസീസ്, എൻ.വി. ജോൺ പാലക്കാട് എന്നിവരെ ആദരിച്ചു. ഡോ. സെൽവി സേവ്യർ, പി.ടി. ജോൺ, ഡോ. മാനുവൽ അലക്സ്, സി.ജി. പ്രകാശൻ, വൈഎംസിഎ ജനറൽ സെക്രട്ടറി ഷൈജു വർഗീസ് , ഡോ. ബെന്നി ജോർജ്, ജില്ലാ പ്രസിഡന്‍റ് സജി പി. ഏബ്രഹാം എന്നിവർ പ്രസംഗിച്ചു.

ഭൂമിയെ പച്ചപ്പുള്ളതാക്കല്‍ കാലഘട്ടത്തിന്‍റെ ആവശ്യം: മന്ത്രി വി.എന്‍. വാസവന്‍

കോട്ടയം: ഭൂമിയെ പരമാവധി പച്ചപ്പുള്ളതാക്കുകയെന്നത് കാലഘട്ടത്തിന്‍റെ ആവശ്യമാണെന്ന് മന്ത്രി വി.എന്‍. വാസവന്‍. കോട്ടയം മെഡിക്കല്‍ കോളജ് ഗവ. വൊക്കേഷണല്‍ ഹയര്‍ സെക്കന്‍ഡറി സ്‌കൂള്‍ ഓഡിറ്റോറിയത്തില്‍ സഹകരണവകുപ്പും വിദ്യാഭ്യാസവകുപ്പും സംയുക്തമായി നടത്തിയ പരിസ്ഥിതി ദിനാചരണത്തിന്‍റെ സംസ്ഥാനതല ഉദ്ഘാടനം നിര്‍വഹിച്ച് പ്രസംഗിക്കുകയായിരുന്നു അദ്ദേഹം. സ്‌കൂള്‍ വളപ്പില്‍ മന്ത്രി ആര്യവേപ്പ്, ഞാവല്‍ തൈകള്‍ നട്ടു. സംസ്ഥാന സഹകരണ യൂണിയന്‍ ഡയറക്ടര്‍ കെ.എം. രാധാകൃഷ്ണന്‍ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, ജില്ലാ കളക്ടര്‍ ജോണ്‍ വി. സാമുവല്‍, സഹകരണ വകുപ്പ് അഡീഷണല്‍ രജിസ്ട്രാര്‍ എസ്. അഞ്ജന, വിദ്യാഭ്യാസ വകുപ്പ് ഡെപ്യൂട്ടി ഡയറക്ടര്‍ ഹണി ജി. അലക്‌സാണ്ടര്‍ തുടങ്ങിയവര്‍ പ്രസംഗിച്ചു. ഒരു ജില്ലയില്‍ 200 സ്‌കൂള്‍ എന്ന കണക്കില്‍ സംസ്ഥാനത്തെ 2800 സ്‌കൂളുകളില്‍ ഔഷധ സസ്യങ്ങള്‍ നട്ടുവളര്‍ത്തുകയെന്നതാണ് ഇത്തവണ സഹകരണവകുപ്പ് ലക്ഷ്യമിടുന്നത്.

ശബരി എയര്‍പോര്‍ട്ടും റെയില്‍വേയും മലയോരമേഖലയ്ക്ക് നേട്ടമാകും

കോട്ടയം: ശബരി എയര്‍പോര്‍ട്ടും റെയില്‍വേയും വരുന്നതോടെ വികസനത്തിന്‍റെ വന്‍സാധ്യതകളിലാണ് മലയോരമേഖല. നെടുമ്പാശേരി വിമാനത്താവളത്തിലെ 40 ശതമാനം യാത്രക്കാര്‍ നിലവില്‍ കോട്ടയം, പത്തനംതിട്ട, ഇടുക്കി ജില്ലകളില്‍നിന്നാണ്. എരുമേലിയില്‍ വിമാനത്താവളം വരുന്നതോടെ ലക്ഷക്കണക്കിന് പ്രവാസികള്‍ക്കും സ്വദേശികള്‍ക്കും നേട്ടമാകും. കേരളത്തില്‍ ഏറ്റവുമധികം പ്രവാസികളുള്ള ജില്ലകളിലൊന്നാണ് പത്തനംതിട്ട. സംസ്ഥാനത്തെ അഞ്ച് എയര്‍പോര്‍ട്ടുകളെയും ബന്ധിക്കുന്ന ചെറുവിമാനസര്‍വീസുകള്‍ക്കും സാധ്യതയേറെയുണ്ട്. നിലവില്‍ ശബരിമല തീര്‍ഥാടകള്‍ വിമാനങ്ങള്‍ ചാര്‍ട്ടര്‍ ചെയ്തും അല്ലാതെയും കൊച്ചിയിലെത്തി ടാക്‌സിയിലാണ് നാലു മണിക്കൂര്‍ റോഡ് മാര്‍ഗം എരുമേലിയിലെത്തുന്നത്. എയര്‍പോര്‍ട്ട് വരുന്നതോടെ പ്രദേശത്തെ എല്ലാ റോഡുകളും വികസിപ്പിക്കും. മൂവാറ്റുപുഴ-പുനലൂര്‍ സംസ്ഥാന പാത ദേശീയ പാതയായി ഉയരും. റോഡുകള്‍ക്കും വികസനം കെകെ റോഡിനും മുണ്ടക്കയം-എരുമേലി, കാഞ്ഞിരപ്പള്ളി-എരുമേലി, മണിമല-എരുമേലി, കാഞ്ഞിരപ്പള്ളി- മണിമല തുടങ്ങിയ റോഡുകള്‍ക്കും വികസനമുണ്ടാകും. വൈദ്യുതി, കുടിവെള്ളം തുടങ്ങിയ അടിസ്ഥാന സംവിധാനങ്ങളും ടൗണ്‍ഷിപ്പുമുണ്ടാകും. എരുമേലി, കാഞ്ഞിരപ്പള്ളി, മുണ്ടക്കയം, പൊന്‍കുന്നം, മണിമല, മുക്കൂട്ടുതറ പ്രദേശങ്ങളിലെ ബിസിനസ് മേഖലയിലും വലിയ കുതിപ്പുണ്ടാകും. സമീപപ്രദേശത്തെ സ്ഥലങ്ങള്‍ക്കും കെട്ടിടങ്ങള്‍ക്കും വില ഉയരും. എരുമേലിയെയും സമീപനഗരങ്ങളെയും ബന്ധിച്ച് ദീര്‍ഘദൂര ബസ് സര്‍വീസുകള്‍ വരും. റെയില്‍വേയുടെ വരവ് ശബരിമല തീര്‍ഥാടകര്‍ക്കും പ്രദേശവാസികള്‍ക്കും വലിയ നേട്ടമാകും. നിലവില്‍ ശബരിമല സീസണില്‍ കോട്ടയം സ്റ്റേഷനില്‍ വിവിധ സംസ്ഥാനങ്ങളില്‍നിന്ന് 300 സ്‌പെഷല്‍ ട്രെയിനുകള്‍ ഓരോ വര്‍ഷവും എത്തുന്നുണ്ട്. ഈ സ്‌പെഷല്‍ വണ്ടികള്‍ ഇനിമുതല്‍ അങ്കമാലിയില്‍നിന്ന് പുതിയ പാതയിലൂടെ രണ്ടു മണിക്കൂറിനുള്ളില്‍ നേരിട്ട് എരുമേലിയിലെത്തും. കോട്ടയത്തുനിന്നും എരുമേലിക്കുള്ള നിലവിലെ ടാക്‌സി ചെലവ് ഒഴിവാകും. കാഞ്ഞിരപ്പള്ളി, മീനച്ചില്‍ താലൂക്കിലെ യാത്രക്കാര്‍ക്ക് കോട്ടയം സ്‌റ്റേഷനില്‍ വരാതെ സ്വന്തം നാട്ടിലെ സ്‌റ്റേഷനുകളില്‍നിന്ന് വടക്കന്‍ മേഖലയിലേക്ക് യാത്ര ചെയ്യാം. ലോക്കല്‍ ട്രെയിനുകളില്‍ എറണാകുളത്തെത്തി ദീര്‍ഘദൂര ട്രെയിനുകളില്‍ യാത്ര തുടരാം. തെക്കോട്ടുള്ള യാത്രയ്ക്കു മാത്രം കോട്ടയം, ചങ്ങനാശേരി സ്‌റ്റേഷനുകളെ ആശ്രയിച്ചാല്‍ മതി. ചരക്കുനീക്കത്തിനു വേഗം കൂടും മലയോരമേഖലയിലെ കാര്‍ഷിക വിപണിക്കും ചരക്കുനീക്കത്തിനും വേഗം കൂടും. റബര്‍, കൈതച്ചക്ക തുടങ്ങിയവയുടെ ചരക്കുനീക്കത്തിന് ചെലവു കുറയും. വിവിധ സംസ്ഥാനങ്ങളില്‍ ഉപരിപഠനത്തിനും ജോലിക്കും പോകുന്നവര്‍ക്കും ഇത് പ്രയോജനപ്പെടും. ഭരണങ്ങാനം, അരുവിത്തുറ, ചേര്‍പ്പുങ്കല്‍, മലയാറ്റൂര്‍ ഉള്‍പ്പെടെ തീര്‍ഥാടനകേന്ദ്രങ്ങളിലേക്കും ആരാധനാലയങ്ങളിലേക്കും എത്താന്‍ ഏറെ പ്രയോജനകരമാണ് ശബരി റെയില്‍വേ. കൂടാതെ വാഗമണ്‍ ഉള്‍പ്പെടെ വിനോദസഞ്ചാരമേഖലയ്ക്കും നേട്ടമാകും.

നാൽപ്പതിൽപ്പരം കർമപരിപാടികളുമായി അരുവിത്തുറ കോളജ്

അരുവിത്തുറ: നാൽപ്പതിൽപരം കർമപരിപാടികൾ സംഘടിപ്പിച്ച് അരുവിത്തുറ സെന്‍റ് ജോർജ് കോളജ് പരിസ്ഥിതിദിനം വ്യത്യസ്തമാക്കി. പരിസ്ഥിതി ദിനാചരണങ്ങളുടെ ഔദ്യോഗിക ഉദ്ഘാടനം നാല്പാമര തൈകൾ നട്ട് പരിസ്ഥിതി പ്രവർത്തകൻ ജോൺ പെരുവന്താനം നിർവഹിച്ചു. കോളജ് ഐക്യുഎസിയുടെ ആഭിമുഖ്യത്തിൽ സംഘടിപ്പിച്ച ചടങ്ങിൽ കോളജ് മാനേജർ ഫാ. സെബാസ്റ്റ്യൻ വെട്ടുകല്ലേൽ, ബർസാർ ഫാ. ബിജു കുന്നക്കാട്ട്, വൈസ് പ്രിൻസിപ്പൽ ഡോ. ജിലു ആനി ജോൺ, ഐക്യുഎസി കോ-ഓർഡിനേറ്റർ ഡോ. സുമേഷ് ജോർജ്, എൻഎസ്എസ് പ്രോഗ്രാം ഓഫീസർ ഡോ. ഡെന്നി തോമസ് തുടങ്ങിയവർ പങ്കെടുത്തു. പിജി കെമിസ്ട്രി വിഭാഗത്തിന്‍റെ ആഭിമുഖ്യത്തിൽ പരിസ്ഥിതി സൗഹൃദ പേപ്പർ ബാഗുകളുടെ നിർമാണവും വിതരണവും പരിസ്ഥിതിപഠനയാത്രയും സംഘടിപ്പിച്ചു. പിജി ഫിസിക്സ് വിഭാഗത്തിന്‍റെ ആഭിമുഖ്യത്തിൽ അരുവിത്തുറ സെന്‍റ് മേരീസ് എൽപി സ്കൂളിലെ വിദ്യാർഥികൾക്ക് വിത്തുകൾ അടങ്ങിയ പേപ്പർ പേനകൾ വിതരണം ചെയ്തു. ഇക്കണോമിക്സ് വിഭാഗത്തിന്‍റെ ആഭിമുഖ്യത്തിൽ പരിസ്ഥിതി സെമിനാറും ഡോക്കുമെന്‍ററി പ്രദർശനവും സംഘടിപ്പിച്ചു. ഫുഡ് സയൻസ് വിഭാഗത്തിന്‍റെ ആഭിമുഖ്യത്തിൽ പരിസ്ഥിതി പ്രശ്നോത്തരി മത്സരവും സ്ലോഗൻ രചനാ മത്സരവും ഡോക്കുമെന്‍ററി പ്രദർശനവും സംഘടിപ്പിച്ചു. പൊളിറ്റിക്സ് വിഭാഗത്തിന്‍റെ ആഭിമുഖ്യത്തിൽ പരിസ്ഥിതിക്ക് ഗുരുതരമായ ദോഷം വരുത്തുന്ന ആഫ്രിക്കൻ ഒച്ചുകളെ ഉന്മൂലനം ചെയ്യുന്നതിനുള്ള കർമപരിപാടിയാണ് നടത്തിയത്. ഇംഗ്ലീഷ് വിഭാഗത്തിന്‍റെ ആഭിമുഖ്യത്തിൽ തീക്കോയി ഇല്ലിക്കുന്നിലേക്ക് പരിസ്ഥിതി പഠനയാത്രയും കൊമേഴ്സ് വിഭാഗത്തിന്‍റെ ആഭിമുഖ്യത്തിൽ പേപ്പർ ബാഗ് നിർമാണ പരിശീലന പരിപാടിയും നടത്തി. പിജി കൊമേഴ്സ് വിഭാഗത്തിന്‍റെ അഭിമുഖ്യത്തിൽ ഹരിതഭൂമി സദസും ബോട്ടണി വിഭാഗത്തിന്‍റെ ആഭിമുഖ്യത്തിൽ കാലംതെറ്റി പെയ്ത മഴ അപുഷ്പ സസ്യങ്ങളിൽ ഉണ്ടാക്കിയ വ്യതിയാനം സംബന്ധിച്ച പഠന സർവേയും സംഘടിപ്പിച്ചു. കോളജ് എൻസിസി യൂണിറ്റിന്‍റെ ആഭിമുഖ്യത്തിൽ വിവിധ പരിസ്ഥിതി സംരക്ഷണ പരിപാടികൾ നടത്തി.

രാമപുരത്ത് വീണ്ടും തെരുവുനായ ആക്രമണം; രണ്ടു പേർക്കുകൂടി കടിയേറ്റു

രാമപുരം: കഴിഞ്ഞ ദിവസം പ്ലസ്ടു വിദ്യാര്‍ഥിനി ഉള്‍പ്പെടെ രണ്ടുപേരെ തെരുവുനായ ആക്രമിച്ചതിനു പിന്നാലെ വീണ്ടും തെരുവുനായ്ക്കളുടെ വിളയാട്ടം. പട്ടാപ്പകലുണ്ടായ ആക്രണത്തിനുശേഷം രാത്രിയില്‍ രണ്ടു പേര്‍ക്കു കൂടി തെരുവുനായ്ക്കളുടെ കടിയേറ്റു. കോലത്ത് അപ്പുവിന്‍റെ മകന്‍ മെബിന്‍ (എട്ട്), ആസാം സ്വദേശി അദാസ് (31)എന്നിവര്‍ക്കാണ് നായ്ക്കളുടെ കടിയേറ്റത്. രാത്രി 9.30 ഓടെയാണ് സംഭവം. പരിക്കേറ്റ മെബിനെ ചേര്‍പ്പുങ്കല്‍ മാര്‍ സ്ലീവാ മെഡിസിറ്റി ആശുപത്രിയിലും അദാസിനെ കോട്ടയം മെഡിക്കല്‍ കോളജ് ആശുപത്രിയിലും പ്രവേശിപ്പിച്ചു. മൈക്കിള്‍ പ്ലാസാ കണ്‍വന്‍ഷന്‍ സെന്‍ററിന് സമീപം ഹോട്ടല്‍ നടത്തുകയാണ് മെബിന്‍റെ പിതാവ്. ഈ ഹോട്ടലിന് മുന്‍പില്‍ നിന്നപ്പോഴാണ് രാത്രി തെരുവുനായ ഓടിയെത്തി മെബിനെ കടിച്ചത്. പഴയ മാര്‍ക്കറ്റിനടുത്ത് താമസിക്കുന്ന റൂമിന്‍റെ മുന്‍പില്‍ വച്ചാണ് രാത്രി പത്തിന് ആസാദിനെ നായ കടിച്ചത്. ഒരേ ദിവസം നാലുപേര്‍ക്ക് തെരുവുനായ്ക്കളുടെ കടിയേറ്റതോടെ രാമപുരത്തും പരിസരപ്രദേശത്തുമുള്ളവര്‍ ആശങ്കയിലാണ്. തെരുവനായ്ക്കളെ നിയന്ത്രിക്കണമെന്ന ആവശ്യം ശക്തമായി. ടൗണിലും ഗ്രാമങ്ങളിലും സഞ്ചരിക്കുന്നവരെ ഒരുപോലെ ഭീതിയിലാക്കുകയാണ് അലഞ്ഞുതിരിയുന്ന തെരുവുനായ്ക്കള്‍. രാത്രികാലങ്ങളിലും രാവിലെയും പ്രധാന വഴികളില്‍ സഞ്ചരിക്കാന്‍ എത്തുന്നവരാണ് ഇവരുടെ ആക്രമണങ്ങള്‍ക്ക് കൂടുതലും ഇരയാകുന്നത്. ഭക്ഷണാവശിഷ്ടങ്ങള്‍ ലഭ്യമാകുന്ന ഇടങ്ങളിലാണ് നായ്ക്കള്‍ കൂട്ടത്തോടെ തമ്പടിക്കുന്നത്. അവിടെ ചുറ്റിത്തിരിയുന്ന നായ്ക്കള്‍ സ്കൂൾ വിദ്യാര്‍ഥികള്‍ക്ക് വന്‍ ഭീഷണിയാണ് സൃഷ്ടിക്കുന്നത്. ടൗണുകളിലും മറ്റും മാലിന്യം ഇടുന്നിടത്തും ഇവ കൂട്ടമായി എത്തുന്നുണ്ട്. അന്യസംസ്ഥാന തൊഴിലാളികള്‍ താമസിക്കുന്ന ഇടങ്ങളില്‍ തെരുവുനായ്ക്കള്‍ക്ക് ഭക്ഷണം ഉണ്ടാക്കി നല്‍കുന്നതും ഇവ പെരുകാന്‍ കാരണമാകുന്നുണ്ട്. തെരുവുനായ്ക്കളിൽനിന്നു നാടിനെ രക്ഷിക്കാനുള്ള വഴികള്‍ അധികൃതർ കണ്ടെത്തണമെന്നാണ് നാട്ടുകാര്‍ ആവശ്യപ്പെടുന്നത്. നടപടി സ്വീകരിക്കും: പഞ്ചായത്ത് പ്രസിഡന്‍റ് തെരുവുനായ്ക്കളെ നിയന്ത്രിക്കാന്‍ പഞ്ചായത്തുതല നടപടികള്‍ സ്വീകരിക്കുമെന്ന് പഞ്ചായത്ത് പ്രസിഡന്‍റ് ലിസമ്മ മത്തച്ചന്‍ പറഞ്ഞു. വീടുകളില്‍ വളര്‍ത്തിക്കൊണ്ടിരിക്കുന്ന നായ്ക്കള്‍ക്ക് പ്രായമാകുമ്പോഴും താമസം മാറി മറ്റു സ്ഥലങ്ങളിലേക്കു പോകുമ്പോഴും ഉടമസ്ഥര്‍ വാഹനങ്ങളില്‍ ടൗണില്‍ കൊണ്ടുവിടുന്നത് നിത്യസംഭവമാണെന്നും ഇത് പ്രതിരോധിക്കുമെന്നും പ്രസിഡന്‍റ് പറഞ്ഞു.

പാലാ സെന്‍റ് തോമസ് കോളജിൽ കൊമേഴ്സ് ഫോറം പ്രവര്‍ത്തനവര്‍ഷോദ്ഘാടനം

പാലാ: സെന്‍റ് തോമസ് കോളജ് ഓട്ടോണമസില്‍ കൊമേഴ്‌സ് വിഭാഗത്തിന്‍റെ അഭിമുഖ്യത്തില്‍ പ്രവര്‍ത്തിക്കുന്ന കൊമേഴ്‌സ് ഫോറത്തിന്‍റെ 2025-26 അക്കാദമിക് വര്‍ഷത്തെ പ്രവര്‍ത്തനങ്ങളുടെ ഉദ്ഘാടനം നടത്തി. കോണ്‍ഫെഡറേഷന്‍ ഓഫ് ഇന്ത്യന്‍ ഇന്‍ഡസ്ട്രീസ് കോട്ടയം സോണിന്‍റെ വൈസ് ചെയര്‍പേഴ്‌സണും കേളച്ചന്ദ്ര പൈപ്പ് ഇന്‍ഡസ്ട്രീസ് മാനേജിംഗ് പാര്‍ട്‌ണറുമായ നികിത അച്ചു തോമസ് ഉദ്ഘാടനം നിര്‍വഹിച്ചു. ഫോറം പ്രസിഡന്‍റ് ആല്‍ബിന്‍ ജയന്‍ അധ്യക്ഷത വഹിച്ചു. കോളജ് പ്രിന്‍സിപ്പല്‍ ഡോ. സിബി ജയിംസ്, വൈസ് പ്രിന്‍സിപ്പല്‍ റവ. ഡോ. സാല്‍വിന്‍ കെ. തോമസ്, കൊമേഴ്‌സ് വകുപ്പധ്യക്ഷന്‍ ബോബി സൈമണ്‍, ഫോറം ഡയറക്ടര്‍ അലന്‍ ജോര്‍ജ് എന്നിവര്‍ പ്രസംഗിച്ചു.

ജീപ്പ് ഇടിച്ചുതെറിപ്പിച്ച വഴിയാത്രക്കാരി അദ്ഭുതകരമായി രക്ഷപ്പെട്ടു

കാഞ്ഞിരപ്പള്ളി: ജീപ്പിടിച്ച് തെറിപ്പിച്ച വഴിയാത്രക്കാരി അദ്ഭുതകരമായി രക്ഷപ്പെട്ടു. ഇടക്കുന്നം തടത്തിൽ സതി സന്തോഷിനെയാണ് റോഡ് മുറിച്ച് കടക്കുന്നതിനിടെ താർ ജീപ്പ് ഇടിച്ചുതെറിപ്പിച്ചത്. ഇന്നലെ ഉച്ചയ്ക്ക് 12ഓടെ കാഞ്ഞിരപ്പള്ളി-ഈരാറ്റുപേട്ട റോഡിൽ കാളകെട്ടിയിലാണ് സംഭവം. കാളകെട്ടി പ്രാഥമികാരോഗ്യ കേന്ദ്രത്തിന് സമീപം റോഡ് മുറിച്ച് കടക്കുകയായിരുന്ന സതിയെ ജീപ്പ് ഇടിച്ചുതെറിപ്പിക്കുകയായിരുന്നു. റോഡ് വക്കിലേക്ക് തെറിച്ചവീണ ഇവരെ സമീപത്തെ വ്യാപാരികളുടെ സഹായത്തോടെ പട്രോളിംഗ് ഡ്യൂട്ടിയിലുണ്ടായിരുന്ന പോലീസ് സംഘമാണ് പോലീസ് ജീപ്പിൽ കാഞ്ഞിരപ്പള്ളി ജനറൽ ആശുപത്രിയിൽ പ്രവേശിപ്പിച്ചത് . പിണ്ണാക്കനാട് ജോലി ചെയ്യുന്ന സതി കാളകെട്ടിയിൽ തയ്യൽക്കടയിൽ പോയി മടങ്ങുന്ന വഴിയാണ് അപകടമുണ്ടായത്. സതിയുടെ പരിക്ക് സാരമുള്ളതല്ലെന്ന് ആശുപത്രി വൃത്തങ്ങൾ അറിയിച്ചു. അപകടത്തിനിടയാക്കിയ ജീപ്പ് കാഞ്ഞിരപ്പള്ളി ഭാഗത്തേക്കു പോവുകയായിരുന്നു. യാത്രക്കാരിയെ ഇടിച്ചുതെറിപ്പിച്ചശേഷം വഴിവക്കിലെ വൈദ്യുതിപോസ്റ്റിൽ ഇടിച്ചാണ് ജീപ്പ് നിന്നത്.

റൈസിംഗ് പൂഞ്ഞാര്‍ നിക്ഷേപകസംഗമം ഒന്‍പതിന്; 2042 കോടി രൂപയുടെ നിക്ഷേപ വാഗ്ദാനം

കോട്ടയം: സംസ്ഥാന സര്‍ക്കാര്‍ കൊച്ചിയില്‍ നടത്തിയ ഇന്‍വെസ്റ്റ് കേരള ഗ്ലോബല്‍ സമ്മിറ്റിന്‍റെ മാതൃകയില്‍ വ്യവസായവകുപ്പിന്‍റെ നേതൃത്വത്തില്‍ ഒമ്പതിന് ഈരാറ്റുപേട്ട ബറകാത്ത് സ്‌ക്വയര്‍ ഓഡിറ്റോറിയത്തില്‍ റൈസിംഗ് പൂഞ്ഞാര്‍ ടുകെ 25 എന്ന പേരില്‍ നിക്ഷേപകസംഗമം സംഘടിപ്പിക്കുന്നു. 206 സംരംഭകര്‍ രജിസ്റ്റര്‍ ചെയ്തു. 2042 കോടി രൂപയുടെ നിക്ഷേപ വാഗ്ദാനം ലഭിച്ചു. 7381 പേര്‍ക്ക് തൊഴില്‍ ലഭ്യമാകുമെന്നാണു പ്രതീക്ഷ. പൂഞ്ഞാര്‍ നിയോജകമണ്ഡലത്തിലും സമീപപ്രദേശങ്ങളിലും നിരവധി നിക്ഷേപ പദ്ധതികള്‍ മീറ്റിലൂടെ പ്രതീക്ഷിക്കുന്നു. പൂഞ്ഞാര്‍ നിയോജകമണ്ഡലത്തിലെ ടൂറിസം സാധ്യതകള്‍, കാര്‍ഷികാധിഷ്ഠിത ഭക്ഷ്യ മൂല്യവര്‍ധിത ഉത്പന്നങ്ങള്‍, ഐടി/ഐടിഇഎസ് സാധ്യതകള്‍, റബര്‍ അധിഷ്ഠിത വ്യവസായങ്ങള്‍, മരഉത്പന്ന സംരംഭങ്ങള്‍, സുഗന്ധവ്യഞ്ജനാധിഷ്ഠിത സംരംഭങ്ങള്‍ തുടങ്ങിയ മേഖലകളിലെ നിരവധി സാധ്യതകളും സമീപഭാവിയില്‍ എരുമേലിയില്‍ ആരംഭിക്കുന്ന ശബരി ഗ്രീന്‍ഫീല്‍ഡ് രാജ്യാന്തര വിമാനത്താവളത്തിന്‍റെ സാധ്യതകളും മുന്നില്‍ക്കണ്ട് മണ്ഡലത്തില്‍ കൂടുതല്‍ വ്യവസായ, വാണിജ്യ സംരംഭങ്ങള്‍ ആരംഭിച്ച് ഉത്പാദനവും അതുവഴി ജനങ്ങളുടെ തൊഴിലും വരുമാനവും വര്‍ധിപ്പിക്കാനാണ് നിക്ഷേപകസംഗമം ലക്ഷ്യംവയ്ക്കുന്നത്. സംരംഭങ്ങള്‍ ആരംഭിക്കുന്നതിനാവശ്യമായ എല്ലാവിധ അനുമതികളും സാങ്കേതിക പിന്തുണയും ഉറപ്പുവരുത്താനും മൂലധന സമാഹരണത്തിനുള്ള അവസരങ്ങള്‍ ധനകാര്യ സ്ഥാപനങ്ങളുടെയും സര്‍ക്കാര്‍ ഏജന്‍സികളുടെയും ത്രിതല പഞ്ചായത്തുകളുടെയും സഹായത്തോടെ ലഭ്യമാക്കാനും നിക്ഷേപകസംഗമം ലക്ഷ്യമിടുന്നു. ഒൻപതിനു രാവിലെ ഒൻപതിനു രജിസ്ട്രേഷന്‍. 9.30 മുതല്‍ 10.30 വരെ സംരംഭങ്ങള്‍ തുടങ്ങുന്നതിനുള്ള നടപടിക്രമങ്ങള്‍, സര്‍ക്കാര്‍ പിന്തുണ-ആനുകൂല്യങ്ങള്‍ എന്നിവ സംബന്ധിച്ച പദ്ധതികള്‍, ബാങ്കുകള്‍-അംഗീകൃത ധനകാര്യസ്ഥാപനങ്ങള്‍ എന്നിവിടങ്ങളില്‍നിന്ന് മൂലധനം സ്വരൂപിക്കല്‍ എന്നിവ സംബന്ധിച്ചു വ്യവസായ, വാണിജ്യ വകുപ്പ് അഡീഷണല്‍ ഡയറക്ടര്‍ ജി. രാജീവും സംഘവും നയിക്കുന്ന പാനല്‍ സെഷന്‍ നടക്കും. 10.30ന് ഉദ്ഘാടന സമ്മേളനം. മന്ത്രി പി. രാജീവ് ഉദ്ഘാടനം ചെയ്യും. പ്രദര്‍ശന സ്റ്റാളുകളുടെ ഉദ്ഘാടനം മന്ത്രി റോഷി അഗസ്റ്റിൻ നിര്‍വഹിക്കും. സെബാസ്റ്റ്യന്‍ കുളത്തുങ്കല്‍ എംഎല്‍എ അധ്യക്ഷത വഹിക്കും. ആന്‍റോ ആന്‍റണി എംപി മുഖ്യപ്രഭാഷണം നടത്തും. പുതിയ അഗ്രോ ഇന്‍ഡസ്ട്രിയല്‍ പാര്‍ക്ക്, അഗ്രി ഫുഡ് പ്രോസസിംഗ് യൂണിറ്റ് എന്നിവയുടെ പ്രഖ്യാപനം ജോസ് കെ. മാണി എംപി നിര്‍വഹിക്കും. മുഖ്യാതിഥിയായി പങ്കെടുക്കുന്ന വ്യവസായവകുപ്പ് പ്രിന്‍സിപ്പല്‍ സെക്രട്ടറി എ.പി.എം. മുഹമ്മദ് ഹനീഷ് സന്ദേശം നല്‍കും. സംരംഭകവര്‍ഷവുമായി ബന്ധപ്പെട്ട ഐകെജിഎസ് പ്രോഗ്രസ് കാര്‍ഡ് അവതരണം വ്യവസായ ഡയറക്ടര്‍ പി. വിഷ്ണുരാജ് നിര്‍വഹിക്കും. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, ഈരാറ്റുപേട്ട നഗരസഭാധ്യക്ഷ സുഹ്റ അബ്ദുൾ ഖാദര്‍, ജില്ലാ കളക്ടര്‍ ജോണ്‍ വി. സാമുവല്‍, ജില്ലാ വ്യവസായകേന്ദ്രം ജനറല്‍ മാനേജര്‍ വി.ആര്‍. രാകേഷ് എന്നിവര്‍ പ്രസംഗിക്കും. 12.15 മുതല്‍ 1.15 വരെ മന്ത്രി പി. രാജീവ് പങ്കെടുക്കുന്ന ചര്‍ച്ച. 1.45 മുതല്‍ രണ്ടുവരെ സംരംഭകത്വത്തെപ്പറ്റിയുള്ള സെഷന്‍ നടക്കും. രണ്ടുമുതല്‍ 5.30 വരെ മുന്‍ അഡീഷണല്‍ ചീഫ് സെക്രട്ടറി ടി.കെ. ജോസ്, സ്റ്റാര്‍ട്ടപ്പ് മിഷന്‍ സിഇഒ അനൂപ് അംബിക, സന്തോഷ് ജോര്‍ജ് കുളങ്ങര എന്നിവര്‍ സെഷനുകള്‍ നയിക്കും. 5.30ന് സമാപനസമ്മേളനം മന്ത്രി വി.എന്‍. വാസവന്‍ ഉദ്ഘാടനം ചെയ്യും. സെബാസ്റ്റ്യന്‍ കുളത്തുങ്കല്‍ എംഎല്‍എ അധ്യക്ഷത വഹിക്കും. മുഖ്യപ്രഭാഷണവും താത്പര്യപത്രങ്ങളുടെ പ്രഖ്യാപനവും ചീഫ് സെക്രട്ടറി ഡോ. എ. ജയതിലക് നിര്‍വഹിക്കും. ഈരാറ്റുപേട്ട നഗരസഭാധ്യക്ഷ സുഹ്റ അബ്ദുൾ ഖാദര്‍, ഈരാറ്റുപേട്ട ബ്ലോക്ക് പഞ്ചായത്ത് പ്രസിഡന്‍റ് മറിയാമ്മ ഫെര്‍ണാണ്ടസ്, കാഞ്ഞിരപ്പള്ളി ബ്ലോക്ക് പഞ്ചായത്ത് പ്രസിഡന്‍റ് അജിത രജീഷ്, ജില്ലാ പഞ്ചായത്ത് അംഗങ്ങളായ പി.ആര്‍. അനുപമ, ഷോണ്‍ ജോര്‍ജ്, ശുഭേഷ് സുധാകരന്‍, പഞ്ചായത്ത് പ്രസിഡന്‍റുമാരായ ഗീത നോബിള്‍, ജോര്‍ജ് മാത്യു, കെ.സി. ജയിംസ്, സ്‌കറിയ ജോസഫ്, മറിയാമ്മ സണ്ണി, കെ.കെ. ശശികുമാര്‍, ബിജോയി ജോസ്, സി.എം. ജാന്‍സി, കെ.എം. രേഖ ദാസ്, ജില്ലാ വ്യവസായകേന്ദ്രം ജനറല്‍ മാനേജര്‍ വി.ആര്‍. രാകേഷ്, ജില്ലാ വ്യവസായകേന്ദ്രം മാനേജര്‍ എം. പ്രവീണ്‍ എന്നിവര്‍ പ്രസംഗിക്കും. തുടര്‍ന്ന് 6.30 മുതല്‍ 7.30 വരെ സാംസ്‌കാരിക പരിപാടികള്‍. പത്രസമ്മേളനത്തില്‍ സംഘാടക സമിതി ഭാരവാഹികളായ സെബാസ്റ്റ്യന്‍ കുളത്തുങ്കല്‍ എംഎല്‍എ, ജോയി ജോര്‍ജ്, പി.എസ്. സുനില്‍, സാജന്‍ കുന്നത്ത്, ദിലീപ് കുമാര്‍, ടോമി ജോസഫ്, ജില്ലാ വ്യവസായ കേന്ദ്രം മാനേജര്‍ വി.ആര്‍. രാകേഷ് എന്നിവര്‍ പങ്കെടുത്തു.

ഫലവൃക്ഷത്തൈകൾ വിതരണം ചെയ്ത് കാഞ്ഞിരപ്പള്ളി മേരിക്വീൻസ് മിഷൻ ആശുപത്രി

കാഞ്ഞിരപ്പള്ളി: ലോക പരിസ്ഥിതിദിനത്തോടനുബന്ധിച്ചു കാഞ്ഞിരപ്പളളി മേരിക്വീൻസ് മിഷൻ ആശുപത്രിയിൽ കഴിഞ്ഞ രണ്ടു ദിവസങ്ങളിലായി ജനിച്ച നവജാതശിശുക്കൾക്ക് ഫലവൃക്ഷത്തൈകൾ സമ്മാനമായി നൽകി. പരിസ്ഥിതി സൗഹാർദമായ ഒരു പുതിയ തലമുറയെ വാർത്തെടുക്കുന്നതിനായി 2019ൽ ആരംഭിച്ച തളിർ പദ്ധതിയുടെ നാലാം ഘട്ടമാണ് ഫലസമൃദ്ധി എന്ന പേരിൽ ഈ വർഷം നടപ്പിലാക്കുന്നതെന്ന് ആശുപത്രി അധികൃതർ അറിയിച്ചു. കൂടാതെ പരിസ്ഥിതിദിനത്തിൽ ചികിത്സ തേടി ആശുപത്രി സന്ദർശിച്ച വ്യക്തികൾക്കും വഴിയാത്രക്കാർക്കും വിവിധ ഫലവൃക്ഷത്തൈകൾ വിതരണം ചെയ്തു. നെറ്റ് സീറോ കാർബൺ പദ്ധതിയുടെ ഭാഗമായി ഇലക്‌ട്രിക് വാഹനങ്ങളിൽ ആശുപത്രി സന്ദർശിച്ച രോഗികൾക്ക് സൗജന്യ ഡോക്ടർ കൺസൾട്ടേഷൻ സൗകര്യവും സമ്മാനമായി ഫലവൃക്ഷത്തൈയും ലഭ്യമാക്കി. പേര, പാഷൻ ഫ്രൂട്ട്, കറുവാപ്പട്ട തുടങ്ങിയ തൈകളാണ് വിതരണം ചെയ്തത്. പദ്ധതിയുടെ ഉദ്‌ഘാടനം ആശുപത്രി ഫിനാൻഷ്യൽ അഡ്മിനിസ്ട്രേറ്റർ ഫാ. മാർട്ടിൻ മണ്ണനാൽ സിഎംഐ നിർവഹിച്ചു. ജോയിന്‍റ് ഡയറക്ടർമാരായ ഫാ. തോമസ് മതിലകത്ത് സിഎംഐ, ഫാ. സിറിൾ തളിയൻ സിഎംഐ, പാസ്റ്ററൽ കെയർ വിഭാഗം ഡയറക്ടർ ഫാ. ഇഗ്‌നേഷ്യസ് പ്ലാത്താനം സിഎംഐ എന്നിവർ തൈകൾ വിതരണം ചെയ്യുന്നതിന് നേതൃത്വം നൽകി.

നാൽപ്പതിൽപരം പരിസ്ഥിതി കർമപരിപാടികളുമായി അരുവിത്തുറ സെന്‍റ് ജോർജ്സ് കോളജ്

അരുവിത്തുറ: നാൽപ്പതിൽപരം കർമപരിപാടികൾ പരിസ്ഥിതി ദിനത്തിൽ സംഘടിപ്പിച്ച് അരുവിത്തുറ സെന്‍റ് ജോർജ്സ് കോളജ് പരിസ്ഥിതിദിനം ആഘോഷമാക്കി. ദിനാചരണങ്ങളുടെ ഔദ്യോഗിക ഉദ്ഘാടനം നാൽപ്പാമര തൈകൾ നട്ട് പ്രശസ്ത പരിസ്ഥിതി പ്രവർത്തകൻ ജോൺ പെരുവന്താനം നിർവഹിച്ചു. അരുവിത്തുറ സെന്‍റ് ജോർജസ് കോളജ് ഐക്യുഎസിയുടെ ആഭിമുഖ്യത്തിൽ സംഘടിപ്പിച്ച ചടങ്ങിൽ കോളജ് മാനേജർ വെരി റവ.ഫാ. സെബാസ്റ്റ്യൻ വെട്ടുകല്ലേൽ, ബർസാർ ഫാ. ബിജു കുന്നയ്ക്കാട്ട്, വൈസ് പ്രിൻസിപ്പൽ ഡോ. ജിലു ആനി ജോൺ, ഐക്യുഎസി കോഓർഡിനേറ്റർ ഡോ. സുമേഷ് ജോർജ്, എൻഎസ്എസ് പ്രോഗ്രാം ഓഫീസർ ഡോ. ഡെന്നി തോമസ് തുടങ്ങിയവർ പങ്കെടുത്തു. പരിസ്ഥിതി ദിനാചരണങ്ങളോട് അനുബന്ധിച്ച് കോളജിലെ വിവിധ ഡിപ്പാർട്ട്മെന്‍റുകളുടെ ആഭിമുഖ്യത്തിൽ വിപുലമായ പരിസ്ഥിതി ദിനാചരണ പരിപാടികളും കാമ്പസിൽ നടന്നു. പിജി കെമിസ്ട്രി വിഭാഗത്തിന്‍റെ ആഭിമുഖ്യത്തിൽ പരിസ്ഥിതി സൗഹൃദ പേപ്പർ ബാഗുകളുടെ നിർമാണവും വിതരണവും പരിസ്ഥിതിപഠനയാത്രയും സംഘടിപ്പിച്ചു. പിജി ഫിസിക്സ് വിഭാഗത്തിന്‍റെ ആഭിമുഖ്യത്തിൽ അരുവിത്തുറ സെന്‍റ് മേരീസ് എൽപി സ്കൂളിലെ വിദ്യാർഥികൾക്ക് വിത്തുകൾ അടങ്ങിയ പേപ്പർ പേനകൾ വിതരണം ചെയ്തു. ഒപ്പം പരിസ്ഥിതിദിന സെമിനാറും സംഘടിപ്പിച്ചു. ഇക്കണോമിക്സ് വിഭാഗത്തിന്‍റെ ആഭിമുഖ്യത്തിൽ പരിസ്ഥിതി സെമിനാറും ഡോക്യുമെന്‍ററി പ്രദർശനവും സംഘടിപ്പിച്ചു. കോളജിലെ ഫുഡ് സയൻസ് വിഭാഗത്തിന്‍റെ ആഭിമുഖ്യത്തിൽ പരിസ്ഥിതി പ്രശ്നോത്തരി മത്സരവും സ്ലോഗൻ രചനാമത്സരവും ഡോക്യുമെന്‍ററി പ്രദർശനവും സംഘടിപ്പിച്ചു. പൊളിറ്റിക്സ് വിഭാഗത്തിന്‍റെ ആഭിമുഖ്യത്തിൽ പരിസ്ഥിതിക്ക് ഗുരുതരമായ ദോഷം വരുത്തുന്ന ആഫ്രിക്കൻ ഒച്ചുകളെ ഉന്മൂലനം ചെയ്യുന്നതിനുള്ള കർമപരിപാടി സംഘടിപ്പിച്ചു. ഇംഗ്ലീഷ് വിഭാഗത്തിന്‍റെ ആഭിമുഖ്യത്തിൽ തീക്കോയി ഇല്ലിക്കുന്നിലേക്ക് പരിസ്ഥിതിപഠനയാത്ര സംഘടിപ്പിച്ചു. കോമേഴ്സ് വിഭാഗത്തിന്‍റെ ആഭിമുഖ്യത്തിൽ പേപ്പർ ബാഗ് നിർമാണ പരിശീലന പരിപാടി സംഘടിപ്പിച്ചു. പിജി കോമേഴ്സ് വിഭാഗത്തിന്‍റെ അഭിമുഖ്യത്തിൽ ഹരിത ഭൂമി സദസ് സംഘടിപ്പിച്ചു. പ്രശസ്ത പരിസ്ഥിതി പ്രവർത്തകൻ എബി ഇമ്മാനുവേൽ പൂണ്ടികുളം സംഗമം ഉദ്ഘാടനം ചെയ്തു. ബോട്ടണി വിഭാഗത്തിന്‍റെ ആഭിമുഖ്യത്തിൽ കാലം തെറ്റി പെയ്ത മഴ അപുഷ്പൃ സസ്യങ്ങളിൽ ഉണ്ടാക്കിയ വ്യതിയാനം സംബന്ധിച്ച പഠന സർവ്വേ സംഘടിപ്പിച്ചു. എൻസിസി യൂണിറ്റിന്‍റെ ആഭിമുഖ്യത്തിൽ വിവിധ പരിസ്ഥിതി സംരംക്ഷണ പരിപാടികൾ സംഘടിപ്പിച്ചു.

ലാപ്ടോപ്പ് വിതരണം ചെയ്തു

ചങ്ങനാശേരി: ജില്ലാ പഞ്ചായത്ത് 2024-25 വാര്‍ഷിക പദ്ധതിയില്‍ ഉള്‍പ്പെടുത്തി തൃക്കൊടിത്താനം ഗവൺമെന്‍റ് ഹയര്‍ സെക്കന്‍ഡറി സ്‌കൂളില്‍ ലാപ്‌ടോപ് വിതരണം ചെയ്തു. ആറ് ലക്ഷം രൂപ വകയിരുത്തി 12 ലാപ് ടോപ്പുകളാണ് നല്കിയത്. ലാപ്‌ടോപ് വിതരണം ജില്ലാ പഞ്ചായത്ത് സ്ഥിരംസമിതി അധ്യക്ഷ മഞ്ജു സുജിത്ത് ഉദ്ഘാടനം ചെയ്തു. തൃക്കൊടിത്താനം പഞ്ചായത്ത് വൈസ് പ്രസിഡന്‍റ് ബിനോയ് ജോസഫ് അധ്യക്ഷത വഹിച്ചു. പ്രിന്‍സിപ്പല്‍ എ. സജീന, ഹെഡ്മിസ്ട്രസ് ആര്‍.എസ്. രാജി, വി.കെ. സുനില്‍കുമാര്‍, അനിതാ ഓമനക്കുട്ടന്‍ എന്നിവര്‍ പ്രസംഗിച്ചു.

ചാസില്‍ പരിസ്ഥിതി ദിനാചരണം

ചങ്ങനാശേരി: പരിസ്ഥിതിദിനാചരണത്തിന്‍റെ ഭാഗമായി ചാസ് ഓഫീസ് അങ്കണത്തില്‍ വൃക്ഷത്തൈ നട്ടു. മുനിസിപ്പല്‍ ചെയര്‍പേഴ്‌സണ്‍ കൃഷ്ണകുമാരി രാജശേഖന്‍ ഉദ്ഘാടനം ചെയ്തു. ഡയറക്ടര്‍ ഫാ. ജോര്‍ജ് പനക്കേഴം, അസിസ്റ്റന്‍റ് ഡയറക്ടര്‍മാരായ ഫാ. സെബാസ്റ്റ്യന്‍ കണ്ണാടിപ്പാറ, ഫാ. ജോസഫ് ചോരേട്ട്ചാമക്കാല എന്നിവര്‍ പ്രസംഗിച്ചു.

പാലാത്രച്ചിറ ബൈപാസ് ജംഗ്ഷന് ചാരുത പകര്‍ന്ന് പൂന്തോട്ടം

ചങ്ങനാശേരി: എല്ലാ വര്‍ഷവും പരിസ്ഥിതിദിനം വരും, പോകും. വിവിധ സംഘടനകള്‍ നിരവധി മരങ്ങളും ചെടികളും നട്ടുപിടിപ്പിക്കും. പിന്നീട് ആരും തിരിഞ്ഞുനോക്കാതെ ഇവ ചൂടും വെയിലുമേറ്റ് നശിക്കും. എന്‍എച്ച്-183(എംസി റോഡ്), ചങ്ങനാശേരി ബൈപാസ് റോഡുകള്‍ സംഗമിക്കുന്ന പാലാത്രച്ചിറ ജംഗ്ഷനിലെ പൂന്തോട്ടം ഇതിലെ കടന്നുപോകുന്ന നൂറുകണക്കിനു യാത്രക്കാരുടെ മനംകവരുന്ന കാഴ്ചയാണ്. കഴിഞ്ഞ പത്തുവര്‍ഷക്കാലമായാണ് ഈ ജംഗ്ഷനിലും ബൈപാസ് റോഡിന്‍റെ മോര്‍ക്കുളങ്ങര വരെയുള്ള ഭാഗത്തും പൂക്കളുടെ സൗന്ദര്യം യാത്രക്കാരുടെ കണ്ണുകൾക്ക് കുളിർമയേകുന്നു. ചങ്ങനാശേരിയുടെ സാമൂഹിക, സാംസ്‌കാരിക രംഗങ്ങളില്‍ മികച്ച സേവനം കാഴ്ചവയ്ക്കുന്ന ചങ്ങനാശേരി ക്ലബാണ് പാലാത്ര ജംഗ്ഷനിലും ബൈപാസ് റോഡരികിലും ലക്ഷക്കണക്കിനു രൂപ ചെലവഴിച്ച് ചെടികള്‍ നട്ടുപിടിപ്പിച്ച് പരിപാലിച്ചു പൂക്കളുടെ വര്‍ണക്കാഴ്ച സമ്മാനിക്കുന്നത്. മാലിന്യം കുന്നുകൂടിക്കിടന്ന സ്ഥലം ഒരുക്കിയാണ് ഇവിടെ ചെടികള്‍ വച്ചുപിടിപ്പിച്ചത്. പൂന്തോട്ട പരിപാലനത്തിനായി ക്ലബ് രണ്ടു തൊഴിലാളികളേയും നിയോഗിച്ചിട്ടുണ്ട്. ചങ്ങനാശേരി നഗരസഭ ബൈപാസിന്‍റെ വിവിധ സ്ഥലങ്ങളില്‍ സജ്ജമാക്കിയിരിക്കുന്ന ഉദ്യാനങ്ങളില്‍ വേനല്‍ക്കാലത്ത് വേണ്ടുന്ന പരിചരണത്തിനുള്ള സഹകരണവും ചങ്ങനാശേരി ക്ലബ് നല്‍കുന്നുണ്ട്. ബൈപാസിലെ പ്രഭാത സായാഹ്ന സവാരിക്കാര്‍ക്കും പൂന്തോട്ടം മനസിന് ആനന്ദം പകരുന്ന കാഴ്ചയാണ്.

യാത്രക്കാര്‍ക്ക് കെഎസ്ആര്‍ടിസിയുടെ ഇരുട്ടടി : പൂവം പള്ളി, മണിമല സ്റ്റേ സര്‍വീസുകള്‍ നിര്‍ത്തി

ചങ്ങനാശേരി: യാത്രക്കാര്‍ക്ക് കെഎസ്ആര്‍ടിസിയുടെ പ്രഹരം. പൂവം പള്ളി, മണിമല സ്റ്റേ സര്‍വീസുകള്‍ നിര്‍ത്തലാക്കി. ഗതാഗതസൗകര്യം അപര്യാപ്തമായതും ഒരു കെഎസ്ആര്‍ടിസി മാത്രം സര്‍വീസ് നടത്തിയിരുന്നതുമായ പൂവത്തേക്കുള്ള ബസ് ഒരു മാസം മുമ്പാണ് നിര്‍ത്തലാക്കിയത്. സാധാരണക്കാരും തൊഴിലാളികളും തിങ്ങിവസിക്കുന്ന പൂവത്തേക്കുള്ള ബസ് നിര്‍ത്തലാക്കിയതോടെ നാട്ടുകാര്‍ വലിയ ദുരിതമാണ് നേരിടുന്നത്. ചങ്ങനാശേരി മാര്‍ക്കറ്റിലും ടെക്‌സ്റ്റൈല്‍സുകളിലുമടക്കം വിവിധ സ്ഥാപനങ്ങളിൽ ചുരുങ്ങിയ വേതനത്തില്‍ ജോലി ചെയ്യുന്നവരാണ് ബസ് സര്‍വീസ് നിര്‍ത്തിയതുമൂലം ദുരിതപ്പെടുന്നത്. വിദ്യാര്‍ഥികളടക്കം യാത്രക്കാര്‍ക്ക് രാവിലെയും വൈകുന്നേരങ്ങളിലും ഓട്ടോറിക്ഷകളില്‍ സഞ്ചരിക്കേണ്ട അവസ്ഥയാണ്. രണ്ടുമാസം മുമ്പ് പുനരാരംഭിച്ച രാത്രി 9.45നുള്ള മണിമല സ്റ്റേ സര്‍വീസും ചങ്ങനാശേരി ഡിപ്പോ അധികൃതര്‍ നിര്‍ത്തലാക്കി. കോവിഡ് കാലത്ത് നിര്‍ത്തലാക്കിയ മണിമല സര്‍വീസ് യാത്രക്കാരുടെ ആവശ്യത്തെത്തുടര്‍ന്ന് ജോബ് മൈക്കിള്‍ എംഎല്‍എയും സര്‍ക്കാര്‍ ചീഫ് വിപ്പ് ഡോ.എന്‍. ജയരാജും ഗതാഗതമന്ത്രി കെ.ബി. ഗണേഷ്‌കുമാറുമായി ബന്ധപ്പെട്ടാണ് സര്‍വീസ് പുനരാരംഭിച്ചത്. രാത്രി 9.45ന് ചങ്ങനാശേരിയില്‍നിന്നു പുറപ്പെടുന്ന ബസ് 10.50ന് മണിമലയില്‍ എത്തും. പിറ്റേന്ന് 5.30ന് മണിമലയില്‍നിന്നു പുറപ്പെട്ട് 6.25ന് ചങ്ങനാശേരിയില്‍ എത്തുംവിധമാണ് ഈ സര്‍വീസ്. ട്രെയിന്‍ യാത്രക്കാര്‍ക്കടക്കം ഏറെ ഉപകാരപ്പെടുന്ന സര്‍വീസാണിത്. ബസ് ജീവനക്കാര്‍ക്ക് താമസത്തിനുള്ള സജ്ജീകരണങ്ങളും മണിമലയില്‍ ഏര്‍പ്പെടുത്തിയിരുന്നു. ജീവനക്കാരുടെ കുറവും വരുമാനക്കുറവും പറഞ്ഞാണ് ഈ രണ്ടു സര്‍വീസുകളും നിര്‍ത്തലാക്കിയത്. പൂവം, മണിമല സര്‍വീസുകള്‍ പുനരാരംഭിച്ചില്ലെങ്കില്‍ പ്രതിഷേധ പരിപാടികള്‍ സംഘടിപ്പിക്കുമെന്ന് പാസഞ്ചേഴ്‌സ് അസോസിയേഷന്‍ ഭാരവാഹികള്‍ പറഞ്ഞു. ചങ്ങനാശേരി ഡിപ്പോയില്‍നിന്നു ഡ്രൈവര്‍മാരെയും കണ്ടക്ടര്‍മാരെയും സ്ഥലംമാറ്റി; സര്‍വീസുകള്‍ പ്രതിസന്ധിയില്‍ ചങ്ങനാശേരി: ചങ്ങനാശേരി ഡിപ്പോയില്‍ സര്‍വീസുകള്‍ ഓപ്പറേറ്റു ചെയ്യാന്‍ ആവശ്യത്തിനു ഡ്രൈവര്‍മാര്‍ ഇല്ലെന്നിരിക്കെ ഇന്നലെ നാലു ഡ്രൈവര്‍മാരെ സ്ഥലംമാറ്റി. 102 ഡ്രൈവര്‍മാരുടെ തസ്തികയുള്ള ഈ ഡിപ്പോയില്‍ ഏഴുപേരുടെ കുറവുണ്ടായിരുന്നു. അപ്പോഴാണ് നാലു പേരെക്കൂടി സ്ഥലം മാറ്റിയത്. 103 കണ്ടക്ടര്‍മാരാണ് ഈ ഡിപ്പോയിലുണ്ടായിരുന്നത്. ഇന്നലെ 10 കണ്ടക്ടര്‍മാരെയാണ് മാറ്റിയത്. ജീവനക്കാരുടെ കുറവുമൂലം പ്രതിസന്ധിയിലായിരുന്ന ഡിപ്പോയുടെ അവസ്ഥ ജീവനക്കാരുടെ സ്ഥലം മാറ്റത്തോടെ വീണ്ടും പ്രതിസന്ധിയിലായി.

ടേക്ക് എ ബ്രേക്ക് പൂട്ടിയതിനെതിരേ യൂത്ത് കോണ്‍ഗ്രസ് പ്രതിഷേധം ഇന്ന്

ചങ്ങനാശേരി: 50 ലക്ഷത്തോളം രൂപ ചെലവഴിച്ച് പെരുന്ന ബസ്‌സ്റ്റാന്‍ഡില്‍ നഗരസഭ നിര്‍മിച്ച ടേക്ക് എ ബ്രേക്ക് അടച്ചുപൂട്ടി ജനങ്ങളെ ദുരിതത്തിലാക്കിയ നഗരസഭയുടെ ജനവിരുദ്ധ നിലപാടില്‍ പ്രതിഷേധിച്ച് യൂത്ത് കോണ്‍ഗ്രസ് നിയോജകമണ്ഡലം കമ്മിറ്റിയുടെ നേതൃത്വത്തില്‍ ഇന്നു നാലിന് പെരുന്ന ബസ് സ്റ്റാന്‍ഡിലേക്ക് പ്രതിഷേധ മാര്‍ച്ചും ധര്‍ണയും നടത്തുമെന്നു നിയോജകമണ്ഡലം പ്രസിഡന്‍റ് അഡ്വ. ഡെന്നീസ് ജോസഫ് അറിയിച്ചു.

ചെമ്മനാകരി - മണപ്പുറം ജങ്കാർ സർവീസ് സമയക്രമം പാലിക്കുന്നില്ലെന്ന്

വൈക്കം:വൈക്കം ചെമ്മനാകരി-മണപ്പുറം ജങ്കാർ സർവീസ് സമയക്രമം പാലിക്കുന്നില്ലെന്നു പരാതി. കോട്ടയം ജില്ലയിലെ മറവൻതുരു ത്ത്, ആലപ്പുഴ ജില്ലയിലെ തൈക്കാട്ടുശേരി പഞ്ചായത്തുകളെ ബന്ധിപ്പിച്ച് വേമ്പനാട്ടുകായ ലിനു കുറുകെയാണ് സർവീസ്. പ്രധാന റോഡിൽ നിന്ന് ഒരുകിലോമീറ്റർ ദൂരം യാത്ര ചെയ്തുവേണം ജെട്ടിയിൽ എത്താൻ. ഇവിടെ എത്തിയാൽ സമയത്തിന് ജങ്കാർ കിട്ടാത്ത സാഹചര്യമാണ്. കരാർ പ്രകാരമുള്ള സമയത്തിനു സർവീസ് നടത്താത്തതിനാൽ ജോലിക്കു പോകുന്നവർക്ക് സമയത്ത് സ്ഥാപനങ്ങളിൽ എത്താൻ പറ്റാത്ത സാഹചര്യമാണെന്നാണ് യാത്രക്കാരുടെ പരാതി. രണ്ട് ജങ്കാർ ഉണ്ടെങ്കിലും ഒരെണ്ണം മാത്രമാണ് പലപ്പോഴും സർവീസ് നടത്തുന്നതെന്നു യാത്രക്കാർ ആരോപിച്ചു. സമയക്രമം പാലിക്കാൻ അധികൃതർ അടിയന്തര നടപടി സ്വീകരിക്കണമെന്ന് യാത്രക്കാർ ആവശ്യപ്പെട്ടു.

അറസ്റ്റ് ചെയ്തു

കുറവിലങ്ങാട്: സുഹൃത്തിന്‍റെ ഭാര്യയുടെ ചെക്ക് തട്ടിയെടുത്ത് 25 ലക്ഷം രൂപ കൈപ്പറ്റാന്‍ ശ്രമിച്ചയാളെ കുറവിലങ്ങാട് പോലീസ് പിടികൂടി. കാണക്കാരി കുളത്തൂര്‍ കുടിലില്‍ ടോമി ജോസഫിനെയാണ് (52) അറസ്റ്റ് ചെയ്തത്. കഴിഞ്ഞ ജൂണിലാണ് കേസിനാസ്പദമായ സംഭവം. പരാതിക്കാരിയും ഭര്‍ത്താവും ഏറ്റുമാനൂര്‍ ഭാഗത്ത് ഹോട്ടല്‍ നടത്തുകയായിരുന്നു. ഭര്‍ത്താവ് മരിച്ചശേഷം ഇവരുടെ സുഹൃത്തായ ടോമി പരാതിക്കാരിയുടെ പേരിലുള്ള സൗത്ത് ഇന്ത്യന്‍ ബാങ്കിന്‍റെ ചെക്ക് കൈക്കലാക്കി 25 ലക്ഷം രൂപ തുകയെഴുതി വ്യാജ ഒപ്പിട്ട് കളക്‌ഷന് തിരുവനന്തപുരം ബ്രാഞ്ചിലേക്ക് അയച്ചു. ബാങ്കില്‍നിന്നാണ് വിവരം പരാതിക്കാരി അറിഞ്ഞത്. പ്രതിയെ കോടതിയില്‍ ഹാജരാക്കി.

രാപകൽ സമര യാത്രയ്ക്ക് സ്വീകരണം നൽകി

വൈക്കം: കേരള ആശാ ഹെൽത്ത് വർക്കേഴ്സ് അസോസിയേഷന്‍റെ നേതൃത്വത്തിൽ നടത്തുന്ന രാപകൽ സമര യാത്രയ്ക്ക് വൈക്കത്ത് സ്വീകരണം നൽകി.വൈക്കം ബോട്ടുജെട്ടി മൈതാനിയിൽ നടന്ന സ്വീകരണ സമ്മേളനം ഡോ.കെ.എസ്. മനോജ് ഉദ്ഘാടനം ചെയ്തു. രാജൻ അക്കരപ്പാടം അധ്യക്ഷത വഹിച്ചു. കേരള ഹെൽത്ത് വർക്കേഴ്സ് അസോസിയേഷൻ സംസ്ഥാന സെക്രട്ടറി എം.എ.ബിന്ദു എസ്.മിനി എന്നിവർക്ക് യോഗത്തിൽ സ്വീകരണം നൽകി. നഗരസഭാ ചെയർപേഴ്സൺ പ്രീതാ രാജേഷ്, എ.സനീഷ്കമാർ, പഞ്ചായത്തു പ്രസിഡൻ്റുമാരായ കെ.ആർ.ഷൈലകമാർ, രമേഷ് പി. ദാസ്, പി.ടി.സുഭാഷ്, എം.കെ. ഷിബു എന്നിവർ പ്രസംഗിച്ചു.

ശ്രീമൂലം മാർക്കറ്റിന്‍റെ പ്രവർത്തനം കാര്യക്ഷമമാക്കണമെന്ന്

വൈക്കം: വൈക്കം തോട്ടുവക്കത്ത് കെവി കനാലിന്‍റെ ഓരത്തെ ശ്രീമൂലം മാർക്കറ്റിന്‍റെ പ്രവർത്തനം ഊർജിതമാക്കണമെന്ന ആവശ്യം ശക്തമായി. നഗരസഭ ലക്ഷങ്ങൾ മുടക്കി മാർക്കറ്റ് നവീകരിച്ചെങ്കിലും പ്രവർത്തനം ആരംഭിച്ചില്ല. തെരുവുനായ്ക്കളുടെ വിഹാരകേന്ദ്രമായി മാറിയ മാർക്കറ്റ് പരിസരം വാഹനങ്ങൾ പാർക്ക് ചെയ്യുന്നിടമായി മാറിയിട്ട് മാസങ്ങളായി. മാർക്കറ്റിലെ വ്യാപാരസമുച്ചയത്തിൽ ആറ് കടമുറികൾ ഉണ്ടെങ്കിലും രണ്ടു മുറികൾ മാത്രമാണ് വാടകയ്ക്ക് നൽകാനായത്. റോഡുമാർഗവും ജലമാർഗവും എത്തിച്ചേരാൻ കഴിയുന്ന മാർക്കറ്റ് രാജഭരണ കാലത്താണ് ആരംഭിച്ചത്. ശ്രീമൂലം മാർക്കറ്റ് പതിറ്റാണ്ടുകളോളം വൈക്കത്തെ പ്രധാന വാണിജ്യ കേന്ദ്രമായിരുന്നു. ജലമാർഗവും കരമാർഗവും സാധന സാമഗ്രികൾ എത്തിച്ചിരുന്ന ചന്തയുടെ പോയകാലപ്രതാപം വീണ്ടെടുക്കാൻ നഗരസഭ പത്തുലക്ഷം രൂപ വിനിയോഗിച്ചാണ് കടമുറികൾ നവീകരിച്ചത്. മൽസ്യവും മാംസവും പച്ചക്കറിയടക്കമുള്ള ഭക്ഷ്യവസ്തുക്കളും മറ്റ് കാർഷിക-കാർഷികേതര ഉത്പന്നങ്ങളും ലഭിക്കുന്ന ഇടമാക്കി ചന്തയെ മാറ്റുന്നതിനാണ് അധികൃതർ പദ്ധതി തയാറാക്കിയത്. സാമ്പത്തിക പരാധീനത ഏറെയുള്ള നഗരസഭ വരുമാനമാർജിക്കാനാണ് ചന്തയിലെ സ്റ്റാളുകൾ നവീകരിച്ചത്. മാർക്കറ്റിലെ സ്റ്റാളുകൾ ഇളവുകളോട വ്യാപാരത്തിന് നൽകി ചന്തയുടെ പ്രവർത്തനം കൂടുതൽ കാര്യക്ഷമമാക്കാൻ അധികൃതർ നടപടി സ്വീകരിക്കണമെന്നാണ് നാട്ടുകാരുടെ ആവശ്യം.

പതിനാറുകാരിയെ പീഡിപ്പിച്ച യുവാവ് അറസ്റ്റിൽ

തലയോലപ്പറമ്പ്: ഇൻസ്റ്റഗ്രാം വഴി പരിചയപ്പെട്ട ശേഷം വിവാഹ വാഗ്ദാനം നൽകി തലയോലപ്പറമ്പ് സ്വദേശിയായ 16 കാരിയെ പീഡിപ്പിച്ച കേസിൽ 22 കാരൻ പിടിയിൽ. തിരുവനന്തപുരം വട്ടിയൂർകാവ് സ്വദേശി വിനീഷി(22)നെയാണ് തലയോലപ്പറമ്പ് പോലീസ് പിടികൂടിയത്. ഇൻസ്റ്റഗ്രാം വഴി പരിചയപ്പെട്ട ശേഷം 16 കാരിയെ വിവാഹ വാഗ്ദാനം നല്കി വീട്ടിൽ എത്തിച്ച് കഴിഞ്ഞ ജനുവരി മുതൽ നിരവധി തവണ ഇയാൾ പീഡിപ്പിക്കുകയായിരുന്നു. തുടർന്ന് ഈ വിവരം പുറത്ത് പറയുമെന്നു പറഞ്ഞ് പെൺകുട്ടിയെ ഭീഷണിപ്പെടുത്തുകയായിരുന്നു. പരാതിയെ തുടർന്ന് തലയോലപ്പറമ്പ് പോലീസ് കേസ് രജിസ്റ്റർ ചെയ്ത് നടത്തിയ അന്വേഷണത്തിലാണ് പ്രതിയെ പിടികൂടിയത്. കോടതിയിൽ ഹാജരാക്കിയ പ്രതിയെ റിമാൻ്റ് ചെയ്തു.

സര്‍ഗക്ഷേത്ര എഫ്എമ്മിന്‍റെ ഫ്രീക്വന്‍സ് ട്രീ മൂന്നാം സീസണ്‍

കോട്ടയം: പരിസ്ഥിതി ദിനത്തോടനുബന്ധിച്ച് സ്‌കൂള്‍ വിദ്യാര്‍ഥികള്‍ക്കായി സര്‍ഗക്ഷേത്ര എഫ്എം ഒരുക്കുന്ന ഫ്രീക്വന്‍സ് ട്രീയുടെ മൂന്നാം സീസണ്‍ ഇന്നു നടത്തും. ഗിരിദീപം, ഹോളി ക്രോസ് എച്ച്എസ്എസ് തെള്ളകം, ഹോളിക്രോസ് വിദ്യാസദന്‍ സീനിയര്‍ സെക്കന്‍ഡറി സ്‌കൂള്‍ തെള്ളകം, കീംസ്, സെന്‍റ് മേരീസ് എല്‍പി, അതിരമ്പുഴ, സെന്‍റ് ജോസഫ് മാന്നാനം തുടങ്ങിയ സ്‌കൂളുകള്‍ കേന്ദ്രീകരിച്ചാണ് പരിപാടി നടത്തുന്നത്. ഒന്നാം ക്ലാസില്‍ പഠിക്കുന്ന 896 കുട്ടികള്‍ക്കാണ് വൃക്ഷത്തൈ വിതരണം ചെയ്യുന്നത്. കുട്ടികള്‍ക്കിടയില്‍ പ്രകൃതി പരിപാലനം വളര്‍ത്തുക, അതിന്‍റെ വളര്‍ച്ചാഘട്ടം കുട്ടികള്‍ സ്വയം അനുഭവിച്ചറിയുക എന്നീ ലക്ഷ്യത്തോടെയാണ് സര്‍ഗക്ഷേത്ര ഈ പരിപാടി നടത്തുന്നത്. വൃക്ഷത്തൈ വിതരണത്തോടൊപ്പം ഓരോ മാസം കൂടുമ്പോള്‍ അതിന്‍റെ വളര്‍ച്ചാപുരോഗതി എഫ്എംമിന്‍റെ പ്രതിനിധികള്‍ നേരിട്ടെത്തി ഉറപ്പുവരുത്തും.

ശാസ്ത്രജ്ഞരാകാന്‍ അവസരം

കോട്ടയം: പാമ്പാടി ശ്രീനിവാസ രാമാനുജന്‍ ഇന്‍സ്റ്റിറ്റ്യൂട്ട് ഓഫ് ബേസിക് സയന്‍സിൽ പിഎച്ച്ഡി ഉള്ളവരില്‍ നിന്ന് തിയററ്റിക്കല്‍ ആന്‍ഡ് കംപ്യൂട്ടേഷണല്‍ റിസര്‍ച്ചില്‍ ശാസ്ത്രജ്ഞര്‍ക്കുള്ള അപേക്ഷ ക്ഷണിച്ചു. കംപ്യൂട്ടേഷണല്‍ മോഡലിംഗ്, സിമുലേഷന്‍, ഡാറ്റാധിഷ്ഠിത ഗവേഷണം എന്നിവയിലേതിലെങ്കിലും മുന്‍പരിചയമുള്ളവര്‍ക്ക് അപേക്ഷിക്കാം. ഉദ്യോഗാര്‍ഥികള്‍ അപേക്ഷയോടൊപ്പം വിശദമായ ബയോഡാറ്റ, പ്രസിദ്ധീകരിച്ച ഗവേഷണ പ്രബന്ധങ്ങളുടെ പട്ടിക, വിവരങ്ങളുടെ ഒരു സംക്ഷിപ്ത പ്രസ്താവന (ഫോണ്‍ നമ്പര്‍, ഇമെയില്‍ ഐഡി എന്നിവ സഹിതം) sribs.kscste@gmail.com എന്ന ഇ-മെയില്‍ വിലാസത്തില്‍ ജൂലൈ അഞ്ചിനു മുന്‍പായി അപേക്ഷിക്കണം. https://sribs. kerala.giv.in. എന്ന വെബ്സൈറ്റില്‍ അപേക്ഷ ഫോം ലഭ്യമാണ്. 0481 2500200.

പെണ്ണാർതോട് നവീകരണത്തിന് ഇന്നു തുടക്കം

അതിരമ്പുഴ: പെണ്ണാർ തോടിന്‍റെ പ്രാധാന്യവും പഴയകാല പ്രൗഢിയും വീണ്ടെടുക്കുക എന്ന ലക്ഷ്യത്തോടെയുള്ള നവീകരണ പ്രവർത്തനങ്ങൾക്ക് ഇന്നു തുടക്കമാകും. 50 ലക്ഷം രൂപ ചെലവഴിച്ചു നടത്തുന്ന ഒന്നാംഘട്ട നവീകരണ പ്രവർത്തനങ്ങളുടെ ഉദ്ഘാടനം ചന്തക്കുളത്തിനു സമീപം രാവിലെ 10നു നടക്കുന്ന ചടങ്ങിൽ ഫ്രാൻസിസ് ജോർജ് എംപി നിർവഹിക്കും. പഞ്ചായത്ത് പ്രസിഡന്‍റ് ജോസ് അമ്പലക്കുളം അധ്യക്ഷത വഹിക്കും. മേജർ ഇറിഗേഷൻ വകുപ്പ് അസിസ്റ്റന്‍റ് എക്സിക്യൂട്ടീവ് എൻജിനിയർ സാം പോൾ ഏബ്രഹാം പദ്ധതി വിശദീകരണം നടത്തും. ജില്ലാ പഞ്ചായത്ത് അംഗം ഡോ. റോസമ്മ സോണി, ബ്ലോക്ക് പഞ്ചായത്ത് അംഗങ്ങളായ ആൻസ് വർഗീസ്, ജയിംസ് കുര്യൻ, അന്നമ്മ മാണി, അതിരമ്പുഴ സെന്‍റ് മേരീസ് ഫൊറോനാ പള്ളി വികാരി റവ.ഡോ. ജോസഫ് മുണ്ടകത്തിൽ, ലിസ്യു പള്ളി വികാരി ഫാ. മാർട്ടിൻ ഇലയ്ക്കാട്ട് നാലുപറയിൽ, അതിരമ്പുഴ ജുമാ മസ്ജിദ് ഇമാം അഫ്സൽ മനാനി, അതിരമ്പുഴ മർച്ചന്‍റസ് അസോസിയേഷൻ പ്രസിഡന്‍റ് ജോയിസ് ആൻഡ്രൂസ് തുടങ്ങി യവർ പ്രസംഗിക്കും.

സംഗീതവിദ്വാന്‍ കെ.എ. അനീഷിന് ഓണററി ഡോക്ടറേറ്റ്

കോട്ടയം: കര്‍ണാടക സംഗീത ലോകത്തിനു പുതിയ രാഗങ്ങള്‍ ആവിഷ്‌കരിച്ച സംഗീത വിദ്വാന്‍ കെ.എ. അനീഷിന് ഓണററി ഡോക്ടറേറ്റ്. കോണ്‍കോര്‍ഡിയ ഇന്‍റര്‍നാഷണല്‍ യൂണിവേഴ്സിറ്റിയുടെ ഓണററി ഡോക്ടറേറ്റാണ് അനീഷിന് ലഭിച്ചത്. 16 ശ്രുതികള്‍ ചേര്‍ന്ന ഷോഡശ സ്വരങ്ങളാണ് നിലവില്‍ കര്‍ണാടക സംഗീതത്തിന് ആധാരമായിട്ടുള്ളത്. 16ൽനിന്നു 18 സ്വരങ്ങളിലേക്കു വികസിപ്പിച്ചാണു പുതിയ മേളകര്‍ത്താ രാഗങ്ങള്‍ സൃഷ്ടിച്ചിരിക്കുന്നത്. ഇതിനുവേണ്ടിയുള്ള നിരന്തര പരിശ്രമത്തെ പരിഗണിച്ചാണു കോണ്‍കോര്‍ഡിയ ഇന്‍റര്‍നാഷണല്‍ യൂണിവേഴ്സിറ്റി കെ.എ. അനീഷിന് ഓണററി ഡോക്ടറേറ്റ് നല്‍കിയിരിക്കുന്നത്. 72 മേളകര്‍ത്താ രാഗങ്ങളില്‍ ഉള്‍പ്പെടാത്ത 27 മേളകര്‍ത്താ രാഗങ്ങളും അവയുടെ ജന്യരാഗങ്ങളും ചേര്‍ന്ന് 13581 രാഗങ്ങളും മുന്‍പേ കണ്ടെത്തിയ 33 രാഗങ്ങളും ചേര്‍ന്ന് 13614 രാഗങ്ങളാണു കണ്ടെത്തിയിട്ടുള്ളത്. പത്രസമ്മേളനത്തില്‍ കേന്ദ്ര ഫിലിം സെന്‍സര്‍ ബോര്‍ഡ് അംഗം പി.ജി. ഗോപാലകൃഷ്ണന്‍, കര്‍ണാടക സംഗീതജ്ഞ എസ്. സരിത എന്നിവര്‍ പങ്കെടുത്തു.

കുറിച്ചി ഹോമിയോ മെഡിക്കല്‍ കോളജില്‍ ന്യൂറോളജി, ത്വക് രോഗ ഒപി ആരംഭിച്ചു

കുറിച്ചി: ഹോമിയോ മെഡിക്കല്‍ കോളജില്‍ ന്യൂറോളജി, ത്വക്് രോഗ ഒപികള്‍ പ്രവര്‍ത്തനമാരംഭിച്ചു. എല്ലാ തിങ്കളാഴ്ചകളിലും രാവിലെ ഒന്‍പതു മുതല്‍ ഉച്ചകഴിഞ്ഞു രണ്ടു വരെയാണ് ഒപി പ്രവര്‍ത്തിക്കുന്നത്. പള്ളം ബ്ലോക്ക് പഞ്ചായത്ത് പ്രസിഡന്‍റ് ടോമിച്ചന്‍ ജോസഫ് ഉദ്ഘാടനം ചെയ്തു. കുറിച്ചി പഞ്ചായത്ത് പ്രസിഡന്‍റ് സുജാത സുശീലന്‍ അധ്യക്ഷത വഹിച്ചു.

ആശാ വർക്കർമാരുടെ സമരയാത്രയ്ക്ക് ഏറ്റുമാനൂരിൽ സ്വീകരണം നൽകി

ഏറ്റുമാനൂർ: മേയ് അഞ്ചിന് കാസർഗോഡ് നിന്നാരംഭിച്ച രാപകൽ സമരയാത്രയ്ക്ക് ഏറ്റുമാനൂരിൽ സ്വീകരണം നൽകി. ക്യാപ്റ്റൻ കേരള ആശാ ഹെൽത്ത് വർക്കേഴ്സ് അസോസിയേഷൻ സംസ്ഥാന സെക്രട്ടറി എം.എ. ബിന്ദുവിനെ സാമൂഹ്യ - സാംസ്കാരിക - രാഷ്‌ട്രീയ മേഖലയിലെ പ്രമുഖർ ഹാരമണിയിച്ചു. യുഡിഎഫ് നിയോജകമണ്ഡലം കൺവീനർ ബിനു ചെങ്ങളം അധ്യക്ഷത വഹിച്ച സ്വീകരണ സമ്മേളനം നഗരസഭാ ചെയർപേഴ്സൺ ലൗലി ജോർജ് ഉദ്ഘാടനം ചെയ്തു. സമരയാത്രാ വൈസ് ക്യാപ്റ്റൻ എസ്. മിനി, കെഎച്ച്എഡബ്ല്യുഎ ജില്ലാ വൈസ് പ്രസിഡന്‍റ് തങ്കമ്മ ലൂക്കോസ്, സംസ്ഥാന കമ്മിറ്റിയംഗം ഐഷ പണിക്കർ, കേരള കോൺഗ്രസ് ജില്ലാ പ്രസിഡന്‍റ് ജയ്സൺ ജോസഫ്, നീണ്ടൂർ മുരളി, ജോറോയ് പൊന്നാറ്റിൽ, പ്രിൻസ് ലൂക്കോസ്, അഭിലാഷ് കുര്യൻ, സാബു പീടിയേക്കൽ എന്നിവർ പ്രസംഗിച്ചു.

ഇന്ന് ലോക പരിസ്ഥിതിദിനം : കൈപ്പുഴ കാറ്റിൽ കാഴ്ചയുടെ വൈവിധ്യമൊരുക്കി മഹാഗണിവനം

കൈപ്പുഴ: നാലുവശവും വെള്ളത്താല്‍ ചുറ്റപ്പെട്ട തുരുത്തും അവിടെ ഒരു പച്ചമരക്കാടും. തുരുത്ത് നിറയെ കൂറ്റന്‍ മഹാഗണി മരങ്ങള്‍. കൈപ്പുഴയിലാണ് തണല്‍ വിരിച്ചു നില്‍ക്കുന്ന വശ്യമായ മഹാഗണിക്കാട് പച്ചവിരിച്ചു നിൽക്കുന്നത്. കൈപ്പുഴ ശാസ്താങ്കല്‍ ജംഗ്ഷനില്‍നിന്നു പാലത്തുരുത്ത് പള്ളിയിലേക്കുള്ള റോഡ് ചെന്നെത്തുന്നത് പടിഞ്ഞാറന്‍ പാടശേഖരങ്ങളിലേക്കാണ്. ഇവിടെ മാക്കോത്തറ പാടശേഖരത്തിന് നടുവിലൂടെയാണ് റോഡ് കടന്നു പോകുന്നത്. കൈപ്പുഴ കാറ്റ് എന്ന് അറിയപ്പെടുന്ന ഈ സ്ഥലത്ത് കാറ്റു കൊള്ളുന്നതിനും അസ്തമയം കാണുന്നതിനും ചൂണ്ടയിടുന്നതിനുമൊക്കെ ദിവസേന നിരവധിപ്പേരാണ് എത്തുന്നത്. വിദേശികളും എത്താറുണ്ട്. വയലുകളും പുഴകളും കാറ്റും അന്തിവെയിലും അസ്തമയവുമൊക്കെ ആസ്വദിക്കാന്‍ എത്തുന്നവര്‍ക്ക് ആസ്വാദ്യത പകരുന്നതാണ് കൈപ്പുഴ കാറ്റിനോടു ചേര്‍ന്നുള്ള സ്ഥലത്ത് തണല്‍ വിരിച്ച് നില്‍ക്കുന്ന മഹാഗണിക്കാട്. സ്വകാര്യവ്യക്തിയുടെ സ്ഥലമാണിത്. ഈ കാടിനു ചുറ്റും മാക്കോത്തറ പാടശേഖരമാണ്. കൊയ്ത്ത് കഴിഞ്ഞ പാടത്ത് വെള്ളം കയറി കിടക്കുകയാണ്. കാടിനു ചുറ്റും വെള്ളമാണ്. പാടത്ത് കൃഷിയിറക്കിക്കഴിഞ്ഞാല്‍ കാടിനു ചുറ്റും നെല്‍ക്കതിരുകള്‍ പച്ചവിരിക്കും. മഹാഗണി മരങ്ങള്‍ ഇടതിങ്ങി വളര്‍ന്നു നില്‍ക്കുകയാണ്. ഇടയ്ക്ക് ഓരോ ആഞ്ഞിലി മരവും കാണാം. കൈപ്പുഴ കാറ്റിലെത്തുന്നവര്‍ കാടിന്‍റെ ഭംഗി കണ്ട് കാറ്റു കൊള്ളാന്‍ കാടിനുള്ളില്‍ നടക്കുകയും ഇരിക്കുകയും ചെയ്യും. എത്ര നേരം ഇവിടെ ചെലവഴിക്കുന്നുവോ അത്രയും നേരം ആനന്ദകരമായിരിക്കും. വൈകുന്നേരം വിവിധ തരത്തിലും നിറത്തിലുമുള്ള പക്ഷികളാണ് മഹാഗണിയുടെ കമ്പില്‍ ചേക്കേറാനെത്തുന്നത്. പിന്നെ ഇവിടം പക്ഷികളുടെ ലോകമാകും. വ്യത്യസ്ത സ്വരങ്ങളിലുള്ള കലപില ശബ്ദമുയരും. ഇതൊക്കെ ആസ്വാദനത്തിന്‍റെ അതിരുകളില്ലാതാക്കും. ഈ മരക്കൂട്ടം വെട്ടിമാറ്റരുതെന്നാണ് സ്ഥലം ഉടമയോട് കൈപ്പുഴ കാറ്റിലെത്തുന്നവര്‍ക്ക് പറയാനുള്ളത്.

ഹണിട്രാപ്പ് : 60 ലക്ഷവും 61 പവനും തട്ടിയ യുവതി അറസ്റ്റിൽ

ഗാന്ധിനഗർ: ഹണി ട്രാപ്പിലൂടെ യുവാവിന്‍റെ 60 ലക്ഷവും 61 പവന്‍റെ സ്വർണാഭരണങ്ങളും അപഹരിച്ച കേസിലെ മുഖ്യപ്രതി അറസ്റ്റിൽ. അതിരമ്പുഴ അമ്മഞ്ചേരി കുമ്മണ്ണൂർ അർജുന്‍റെ ഭാര്യ ധന്യ (37) ആണ് അറസ്റ്റിലായത്. കഴിഞ്ഞ ഏപ്രിൽ മൂന്നിനാണ് ഗാന്ധിനഗർ പോലീസ് കേസ് രജിസ്റ്റർ ചെയ്തത്. കേസിലെ മറ്റു പ്രതികളായ അലൻ തോമസ്, അർജുൻ ഗോപി എന്നിവർ ഒളിവിലാണ്. 2022 മാർച്ച് മാസം മുതൽ 2024 ഡിസംബർ വരെയുള്ള കാലയളവിലാണ് കേസിനാസ്പദമായ സംഭവം. പ്രതിയുടെ വീടിനടുത്ത് വാടകയ്ക്ക് താമസിച്ചിരുന്ന യുവാവുമായി സൗഹൃദം സ്ഥാപിച്ച ശേഷം ഇയാളുമൊത്തുള്ള ചിത്രങ്ങളെടുക്കുകയും ഇതുപയോഗിച്ച് ഭീഷണിപ്പെടുത്തി പരാതിക്കാരനിൽനിന്ന് 60 ലക്ഷം രൂപയും 61 പവൻ സ്വർണവും തട്ടിയെടുക്കുകയുമായിരുന്നു. പ്രധാന പ്രതിയായ ധന്യ ഹൈക്കോടതി മുമ്പാകെ മുൻകൂർ ജാമ്യത്തിന് അപേക്ഷ നൽകിയിരുന്നെങ്കിലും കോടതി ജാമ്യാപേക്ഷ നിരസിച്ച് അന്വേഷണ ഉദ്യോഗസ്ഥന്‍റെ മുമ്പാകെ കീഴടങ്ങാനുത്തരവിട്ടതിന്‍റെ അടിസ്ഥാനത്തിലാണ് പ്രതിയെ അറസ്റ്റ് ചെയ്തത്. കോടതിയിൽ ഹാജരാക്കിയ പ്രതി ഗർഭിണിയാണെന്ന പരിഗണനയിൽ കോടതി ജാമ്യത്തിൽ വിട്ടു.

രാമപുരത്ത് തെരുവുനായ ആക്രമണം; വിദ്യാര്‍ഥിനിക്കടക്കം രണ്ടു പേര്‍ക്ക് കടിയേറ്റു

രാമപുരം: രാമപുരത്ത് പ്ലസ് ടു വിദ്യാര്‍ഥിനിയടക്കം രണ്ടു പേര്‍ക്കു തെരുവുനായയുടെ ആക്രമണത്തില്‍ പരിക്കേറ്റു. രാമപുരം ടൗണില്‍ ഇന്നലെ വൈകുന്നേരം നാലോടെയാണ് സംഭവം. സ്‌കൂള്‍വിട്ട് വീടുകളിലേക്ക് മടങ്ങുകയായിരുന്ന വിദ്യാര്‍ഥികളെയാണ് തെരുവുനായ ആക്രമിച്ചത്. ആദ്യം കടിയേറ്റത് രാമപുരം ടൗണിനു തൊട്ടുസമീപം മരച്ചീനിത്തോട്ടത്തില്‍ ജോലി ചെയ്തു കൊണ്ടിരുന്ന തൊഴിലാളി അംബി(57)ക്കാണ്. തെരുവുനായ് അംബിയെ ഓടിച്ചിട്ട് കടിക്കുകയായിരുന്നു. ജോലി ചെയ്തുകൊണ്ടിരുന്ന അംബി തെരുവുനായ് വരുന്നത് കണ്ട് പറമ്പുടമയുടെ വീടിന്‍റെ തിണ്ണയില്‍ ഓടിക്കയറി. എന്നാല്‍ തെരുവുനായ പിന്നാലെയെത്തി ആക്രമിക്കുകയായിരുന്നു. കാലിന് ഗുരുതരമായ പരിക്കേറ്റ ഇയാളെ ആദ്യം രാമപുരം ഗവ. ആശുപത്രിയിലും പിന്നീട് കോട്ടയം മെഡിക്കല്‍ കോളജ് ആശുപത്രിയിലും പ്രവേശിപ്പിച്ചു. ഇയാളെ കടിച്ചതിനു ശേഷം സെന്‍ട്രല്‍ ജംഗ്ഷനിലേയ്ക്ക് ഓടിയ നായ സ്‌കൂള്‍വിട്ടു വന്ന പ്ലസ് ടൂ വിദ്യാര്‍ഥികള്‍ക്ക് നേരേ പാഞ്ഞടുത്തു. കുട്ടികള്‍ ചിതറി ഓടിയെങ്കിലും കൂടപ്പലം തൊഴുത്തുങ്കല്‍ ജോമോന്‍റെ മകൾ ഏയ്ഞ്ചലീനയെ നായ ആക്രമിച്ചു. കടിയേറ്റ് ഓടിയ കുട്ടി നിലത്തുവീണതോടെ വീണ്ടും തെരുവുനായ ആക്രമിക്കുകയായിരുന്നു. ഓടിക്കൂടിയ നാട്ടുകാര്‍ കുട്ടിയെ രക്ഷിച്ച് രാമപുരം ഗവ. ആശുപത്രിയിലും പിന്നീട് കോട്ടയം മെഡിക്കല്‍ കോളജിലും എത്തിച്ചു.

ശബരി റെയില്‍വേ: ആശങ്കയൊഴിയാതെ മലയോര ജനത

കോട്ടയം: ശബരി റെയില്‍വേ നിര്‍മാണത്തിന് അടുത്തമാസം സ്ഥലം ഏറ്റെടുത്തു തുടങ്ങും എന്ന് പ്രഖ്യാപനം വരുമ്പോള്‍ ആശങ്കയൊഴിയാത്ത അയ്യായിരത്തോളം കുടുംബങ്ങള്‍ വ്യക്തമായ ഉത്തരം തേടുന്നു. നഷ്ടപരിഹാരം എത്ര?, പുനരധിവാസം എവിടെ‍?തുടങ്ങിയവയാണ് അവരുടെ ചോദ്യങ്ങൾ. അങ്കമാലി മുതല്‍ കാലടിവരെ നഷ്ടപരിഹാരം നല്‍കി സ്ഥലം എടുത്ത് ഏഴു കി.മീ. പാളവും കാലടിയില്‍ പെരിയാറിനു കുറകെ പാലവും നിര്‍മിച്ചു. കാലടി, പെരുമ്പാവൂര്‍, ഓടക്കാലി, കോതമംഗലം, മൂവാറ്റുപുഴ, വാഴക്കുളം, തൊടുപുഴ, കരിങ്കുന്നം, രാമപുരം (പിഴക്) വരെ സര്‍വേ നടത്തി കല്ലിട്ടിട്ട് മുപ്പത് വര്‍ഷമായി. ഇതോടകം ഭൂമി വിട്ടുകൊടുത്ത 2,862 കുടുംബങ്ങള്‍ നഷ്ടപരിഹാരം ലഭിക്കാതെയും വികസനപ്രവര്‍ത്തനങ്ങള്‍ മുടങ്ങിയും പ്രതിസന്ധിയിലാണ്. സ്ഥലവും ഇതില്‍പ്പെട്ട നിര്‍മിതികളും വില്‍ക്കാനോ വാങ്ങാനോ വീതം നല്‍കാനോ സാധിച്ചിട്ടില്ല. ഭാവി വികസനത്തിന് ഇരുവശത്തുമായി 75 മീറ്റര്‍ വീതം റെയില്‍വേയുടേതായി തീരുമെന്നിരിക്കെ അനേകം പേരാണ് ആശങ്കയില്‍ കഴിയുന്നത്. മതിപ്പുവിലയുടെ മൂന്നോ നാലോ ഇരട്ടി നഷ്ടപരിഹാരം നല്‍കുമെന്നായിരുന്നു മുന്‍ പ്രഖ്യാപനം. ഇവിടങ്ങളില്‍ നിര്‍മാണം നടത്താന്‍ പഞ്ചായത്തോ മറ്റ് തദ്ദേശസ്ഥാപനങ്ങളോ പെര്‍മിറ്റ് നല്‍കുന്നുമില്ല. കാലപ്പഴക്കം ചെന്ന കെട്ടിടങ്ങള്‍ ബലപ്പെടുത്താനും സാധിക്കുന്നില്ല. മറ്റൊരു കൊങ്കണ്‍ ഇടുക്കി ജില്ലയില്‍ പാത കടന്നുപോകുന്ന തൊടുപുഴ, കരിങ്കുന്നം പ്രദേശങ്ങളില്‍ വലിയ മലയും ചെരിവും പാടവും പുഴയുമുണ്ട്. ഇവിടെ മലകള്‍ നിരത്തിയോ തുരങ്കം നിര്‍മിച്ചോ വേണം നിര്‍മാണം. ഇതിന് പരിസ്ഥിതി മന്ത്രാലയത്തിന്‍റെ അനുമതി തേടണം. നെല്ലാപ്പാറയിലാണ് പാത കോട്ടയം ജില്ലയിലേക്ക് കടക്കുന്നത്. അങ്കമാലി മുതല്‍ കോട്ടയം ജില്ലയിലെ രാമപുരം വരെ 70 കിലോമീറ്ററിലാണ് സര്‍വേക്കല്ലുകളുള്ളത്. അവശേഷിക്കുന്ന സ്ഥലമെടുപ്പിന് വര്‍ഷങ്ങളുടെ താസമുണ്ടാകും. പദ്ധതിക്ക് ആകെ വേണ്ട 303.58 ഹെക്ടറില്‍ ഇതുവരെ 24.40 ഹെക്ടറാണ് ഏറ്റെടുത്തിരിക്കുന്നത്. കാലടിയില്‍നിന്നു തൊടുപുഴ വരെ 48 കിലോമീറ്ററാണ്. ഇത്രയും നിര്‍മാണത്തിന് കുറഞ്ഞത് 700 കോടി രൂപ വേണ്ടിവരും. കോട്ടയം ജില്ലയില്‍ രാമപുരം, പിഴക്, പ്രവിത്താനം, ഭരണങ്ങാനം, ചെമ്മലമറ്റം, തിടനാട്, പാറത്തോട്, കൊരട്ടി വഴിയാണ് എരുമേലിയില്‍ എത്തേണ്ടത്. രാമപുരം മുതല്‍ എരുമേലി സ്റ്റേഷന്‍ വരെ ഏരിയല്‍ സര്‍വേ മാത്രാണ് നടത്തിയത്. സ്ഥലമെടുപ്പ് നിയമമനുസരിച്ച് സാമൂഹിക ആഘാത പഠനവും ഹിയറിംഗും നടത്തിയേ ഇനിയുള്ള സ്ഥലമെടുപ്പ് സാധിക്കൂ. അതിനും വര്‍ഷങ്ങളുടെ കാലതാമസം വരും. രാമപുരം, ഭരണങ്ങാനം, ചെമ്മലമറ്റം, കാഞ്ഞിരപ്പള്ളി റോഡ്, എരുമേലി എന്നിങ്ങനെ അഞ്ചു സ്റ്റേഷനുകളാണ് ജില്ലയില്‍ നിര്‍ദേശിച്ചിരിക്കുന്നത്. നിര്‍ദിഷ്ട സ്റ്റേഷനുകള്‍ നഗരത്തില്‍നിന്ന് ആറും ഏഴും കിലോമീറ്റര്‍ മാറിയാണ്. അവിടേക്ക് അപ്രോച്ച് റോഡുകള്‍ നിര്‍മിക്കേണ്ടിവരും. പദ്ധതിയുടെ അനിശ്ചിതാവസ്ഥയ്ക്കെതിരേ പ്രതിഷേധിച്ച് 11 കര്‍മസമിതികളും അവയുടെ അപ്പെക്സ് കമ്മിറ്റികളും നിലവിലുണ്ട്.

നാലംഗ കുടുംബം സഞ്ചരിച്ച കാർ കുളത്തിലേക്ക് മറിഞ്ഞു; വിദ്യാർഥി മരിച്ചു

പള്ളിക്കത്തോട്: ആനിക്കാട് കൈയ്യൂരി ചല്ലോലിയിൽ കാർ കുളത്തിലേക്ക് മറിഞ്ഞുണ്ടായ അപകടത്തിൽ ഒരാൾ മരിച്ചു. പാലാ പ്രവിത്താനം ചന്ദ്രൻകുന്നേൽ ജെയിംസിന്‍റെ മകൻ ജെറിലാണ്(19) മരിച്ചത്. നിലവിൽ പള്ളിക്കത്തോട് ചെങ്ങളം ഈസ്റ്റിൽ വാടകയ്ക്ക് താമസിക്കുകയാണ് ജെറിലും കുടുംബവും. ഇന്നലെ വൈകുന്നേരം 8.15 ഓടെ പള്ളിക്കത്തോട് ആനിക്കാട് ചല്ലോലിയിലായിരുന്നു സംഭവം. പള്ളിക്കത്തോട് ഭാഗത്തുനിന്നെത്തിയ കാർ റോഡരികിലെ വെള്ളം നിറഞ്ഞ് കിടക്കുന്ന കുളത്തിലേയ്ക്ക് നിയന്ത്രണംവിട്ട് മറിയുകയായിരുന്നു. ജെറിലിന്‍റെ സഹോദരനെ റാന്നിയിലെ ഹോസ്റ്റലിൽ കൊണ്ടാക്കിയ ശേഷം മടങ്ങിവരവെയാണ് സംഭവം. വാഹനത്തിൽ ആകെ നാലു പേരുണ്ടായിരുന്നു. ഇതിൽ മൂന്ന് പേരെ പോലീസും ഫയർഫോഴ്സും ചേർന്ന് രക്ഷപ്പെടുത്തി. ജെറിലിന്‍റെ അച്ഛനും അമ്മയും ഡ്രൈവറായ രതീഷുമാണ് രക്ഷപ്പെട്ടത്. കാറിനുള്ളിൽ ജെറിൽ കുടുങ്ങിക്കിടക്കുന്നതായുള്ള വിവരത്തെത്തുടർന്ന് ഫയർഫോഴ്സും പോലീസും നടത്തിയ തെരച്ചിലിലാണ് മൃതദേഹം കണ്ടെടുത്തത്. ജർമൻ ഭാഷാ പഠനം നടത്തുകയായിരുന്നു ജെറിൽ. മൃതദേഹം കാഞ്ഞിരപ്പള്ളി താലൂക്ക് ആശുപത്രി മോർച്ചറിയിൽ. മാതാവ്: ബീന. ജസ്റ്റിൻ സഹോദരനാണ്.

ഒരു തൈ നടാം ജനകീയ കാമ്പയിൻ; ഏഴരലക്ഷം വൃക്ഷത്തൈകള്‍ നടും

കോട്ടയം: ഹരിത കേരളം മിഷന്‍റെ ഏകോപനത്തില്‍ തദ്ദേശ സ്വയംഭരണ സ്ഥാപനങ്ങളുടെ നേതൃത്വത്തില്‍ നടപ്പാക്കുന്ന ഒരു തൈ നടാം ജനകീയ കാമ്പയിന്‍റെ ഭാഗമായി ജില്ലയില്‍ ഏഴരലക്ഷം വൃക്ഷത്തൈകള്‍ നട്ടു പിടിപ്പിക്കും. ജില്ലയില്‍ സാമൂഹ്യവനവത്കരണവകുപ്പ്, മഹാത്മാഗാന്ധി തൊഴിലുറപ്പ് പദ്ധതി എന്നിവ ഒന്നരലക്ഷം വീതം തൈകള്‍ തയാറാക്കും. ഓരോ തദ്ദേശ സ്വയംഭരണവാര്‍ഡില്‍നിന്നും കുറഞ്ഞത് 350 തൈകള്‍ ജനകീയ ഇടപെടലിലൂടെ പ്രാദേശികമായി തയാറാക്കും. സ്‌കൂള്‍ വിദ്യാര്‍ഥികള്‍, കുടുംബശ്രീ, തൊഴിലുറപ്പു തൊഴിലാളികള്‍, ഹരിതകര്‍മസേന, അധ്യാപക, സര്‍വീസ് സംഘടനകള്‍, സന്നദ്ധസംഘടനകള്‍, ഗ്രന്ഥശാലകള്‍ തുടങ്ങിയവയുടെ നേതൃത്വത്തില്‍ തൈകള്‍ തയാറാക്കലും നടീലും നടത്തും. തൈകള്‍ വളര്‍ച്ച എത്തുംവരെ പരിചരണം ഉറപ്പാക്കാന്‍ പ്രാദേശികമായി പരിചരണ സമിതികള്‍ രൂപീകരിക്കും. എല്ലാ സ്‌കൂളുകളിലും പരിസ്ഥിതി സംരക്ഷണ പ്രതിജ്ഞചൊല്ലും. വിദ്യാര്‍ഥികള്‍ തങ്ങളുടെ കൂട്ടുകാര്‍ക്കു വൃക്ഷത്തൈകള്‍ പരസ്പരം കൈമാറുന്ന ‘ചങ്ങാതിക്കൊരുമരം’ പരിപാടി 25നു ടത്തും. ഒന്നുമുതല്‍ പ്ലസ് ടു വരെയുള്ള കുട്ടികളെ ഈ പരിപാടിയില്‍ പങ്കാളികളാക്കി രണ്ട് ലക്ഷം വൃക്ഷ തൈകള്‍ പൊതുവിദ്യാഭ്യാസ വകുപ്പിന്‍റെ ചുമതലയില്‍ നടും. ഒരു തൈനടാം കാമ്പയനുമായി ബന്ധപ്പെട്ട് ജില്ലയിലെ വിദ്യാര്‍ഥികള്‍ക്കായി റീല്‍സ് മത്സരം സംഘടിപ്പിക്കും. വൃക്ഷത്തൈ തയാറാക്കല്‍, കൈമാറല്‍, നടീല്‍, പരിപാലനം എന്നിവയുമായി ബന്ധപ്പെട്ടു കുട്ടി നടത്തിയ പ്രവര്‍ത്തനങ്ങളുടെ ദൃശ്യങ്ങള്‍ പശ്ചാത്തലമാക്കി പരിസ്ഥിതി സംരക്ഷണം ഉള്‍ക്കൊള്ളുന്നതാകണം റീല്‍സ്. പരമാവധി ദൈര്‍ഘ്യം 45 സെക്കന്‍ഡ്. കാലാവധി പൂര്‍ത്തിയാക്കുന്ന തദ്ദേശ സ്ഥാപനപ്രതിനിധികള്‍ കാമ്പയിന്‍റെ ഭാഗമായി തങ്ങളുടെ സേവനകാലത്തിന്‍റെ സ്മരണ നിലനിര്‍ത്താന്‍ പ്രതിനിധാനം ചെയ്ത വാര്‍ഡിലെ പൊതുസ്ഥലങ്ങളില്‍ മൂന്നു വൃക്ഷതൈകള്‍ വീതംവച്ച് പിടിപ്പിക്കും.

ജോജോ ജോർജിന്‍റെ ഇച്ഛാശക്തിയിൽ അതിരമ്പുഴയിൽ ഒരു വനം

രാജു കുടിലിൽ ഏറ്റുമാനൂർ: അഞ്ചരയേക്കർ വിസ്തൃതിയിൽ അതിരമ്പുഴയിൽ ഒരു വനം. വൈവിധ്യമാർന്ന 1500 ലേറെ വൃക്ഷങ്ങൾ. ഇടതൂർന്ന വൃക്ഷങ്ങൾ കാനനപ്രതീതിയിൽ പടർന്നു നിൽക്കുന്നത് അതിരമ്പുഴ പഞ്ചായത്ത് ഒന്നാം വാർഡ് മെംബർ ജോജോ ജോർജ് ആട്ടേലിന്‍റെ നിശ്ചയ ദാർഢ്യവും ഇച്ഛാശക്തിയും കൊണ്ടു മാത്രമാണ്. വേദവ്യാസ ഗിരി എന്നറിയപ്പെടുന്ന വേദഗിരി കുന്നിലെ അഞ്ചര ഏക്കർ വരുന്ന സ്ഥലത്താണ് ജോജോയുടെ നേതൃത്വത്തിൽ അഞ്ചു വർഷം മുമ്പ് മരങ്ങൾ വച്ചുപിടിപ്പിച്ചത്. ഈ സ്ഥലത്തിന്‍റെ മൂലാധാരം സോഷ്യൽ ഫോറസ്ട്രി വകുപ്പിന്‍റെ പേരിലാണെന്നു മനസിലാക്കിയ ഇദ്ദേഹം പദ്ധതിയുമായി സോഷ്യൽ ഫോറസ്ട്രി വകുപ്പിനെ സമീപിക്കുകയായിരുന്നു. രണ്ടായിരത്തിലേറെ വൃക്ഷത്തൈകൾ അവർ സ്ഥലത്തെത്തിച്ചു നൽകി. കാടു വെട്ടിത്തെളിച്ച്, ജെസിബി ഉപയോഗിച്ച് കുഴിയെടുത്ത് തൈകൾ നടാൻ ഏറെ അധ്വാനം വേണ്ടിവന്നു. ആയിരത്തി അഞ്ഞൂറോളം തൈകൾ പിടിച്ചു. പക്ഷേ പ്രദേശത്ത് തമ്പടിച്ച ലഹരി സംഘങ്ങൾ അഞ്ഞൂറോളം തൈകൾ പിഴുതുകളഞ്ഞു. അവയ്ക്ക് പകരം വീണ്ടും തൈകൾ വച്ചുപിടിപ്പിച്ചു. നിരന്തരമായ പരിചരണവും ശ്രദ്ധയും ആവശ്യമായിരുന്നു. ഇപ്പോൾ 1500 ലേറെ വൃക്ഷങ്ങൾ വളർന്നു പന്തലിച്ചു നിൽക്കുന്നു. അവയിൽ അരയാൽ, ചന്ദനം, രക്തചന്ദനം, ആര്യവേപ്പ്, ഇലഞ്ഞി, പ്ലാവ്, മാവ്, മന്ദാരം, മഞ്ചാടി, ഞാവൽ, വാക, പേര, തമ്പകം, വാളംപുളി, ദന്തപാല, ചോരപാല, നീർമരുത്, പലക പയ്യാനി, തേൻപുളി, ആനച്ചെവിയൻ, പുത്രജീവ, വെട്ടി, കറുവാപ്പട്ട, കരിമരം, ചേരത്താലി, അടയ്ക്കാ പൈൻ, പൂമല മരം, മുള്ളുവേങ്ങ, വെട്ടി, മരവെട്ടി, കരിഞ്ഞാവൽ, കാഞ്ഞിരം, വെള്ളാങ്കിൽ, ചേരത്താലി തുടങ്ങിയവയെല്ലാമുണ്ട്. വനവത്കരണ പദ്ധതിയുടെ പേരിൽ സംസ്ഥാന സർക്കാരിന്‍റെ വനംമിത്ര അവാർഡ് ജോജോയ്ക്ക് ലഭിച്ചിട്ടുണ്ട്. പരിസ്ഥിതിക്ക് കരുതലാണ് പൂഞ്ഞാര്‍ ഭൂമികയുടെ വിത്തുകുട്ട കോട്ടയം: പന്ത്രണ്ടു മാസവും പരിസ്ഥിതി പോഷണത്തിലാണ് പൂഞ്ഞാര്‍ ഭൂമിക. വിത്തുകളും തൈകളും നാട്ടുകൂട്ടത്തില്‍ കൈമാറുന്ന കൂട്ടായ്മയാണിത്. ഓരോരോ സ്ഥലങ്ങളില്‍ ഭൂമിക തൈകളും കായ്കളും കൈമാറ്റം ചെയ്യാനുള്ള ക്രമീകരണമൊരുക്കും. അവരവര്‍ കൊണ്ടുവന്ന തൈകളും വിത്തുകളും കൂട്ടായ്മയില്‍ നിരത്തും. ആവശ്യമുള്ളവര്‍ക്ക് ആവശ്യമുള്ളതൊക്കെ സൗജന്യമായി എടുക്കാം. പ്രതിഫലമില്ലാത്ത കരുതല്‍ കൈമാറ്റം ഇതോടകം 160 സംഗമങ്ങള്‍ നടത്തിക്കഴിഞ്ഞു. പച്ചക്കറി, ഫലവര്‍ഗങ്ങള്‍, കിഴങ്ങ് വര്‍ഗങ്ങള്‍, ഔഷധങ്ങള്‍ തുടങ്ങിയവയുടെ വിത്തുകളും തൈകളുമാണ് പരസ്പരം കൈമാറുന്നത്. ഒന്നും കൈമാറാന്‍ ഇല്ലാത്തവര്‍ക്കും വിത്തുകുട്ടയില്‍നിന്നെടുക്കാം. കൊണ്ടുവരുന്നവയൊക്കെ ഓരോരുത്തരും നിരത്തി അതിന്‍റെ വിശേഷങ്ങളും കൃഷിരീതിയും പൊതുവായി പറയും. പാവല്‍, കോവല്‍, പയര്‍, പാവല്‍, മുളക്, അടതാപ്പ്, കാച്ചില്‍, ചേന, ചേമ്പ്, ചീനി, ചീര, തുവര, നനകിഴങ്ങ്, ചക്കക്കുരു വരെ ഫലവൈവിധ്യം. ചിലര്‍ കപ്പത്തടിയും മുരിങ്ങക്കമ്പും, കടച്ചക്ക തൈയും കാപ്പിത്തൈയുമൊക്കെ കൊണ്ടുവരും. ചിലര്‍ തൈകള്‍ കിളിര്‍പ്പിച്ചു കൊണ്ടുവരും. കമണ്ഡലു, കസ്തൂരിമഞ്ഞള്‍, ബ്രഹ്മി, വയമ്പ്, മുള്ളമൃത്, ചിറ്റമൃത്, രാമച്ചം, കച്ചോലം, വാതക്കൊല്ലി, പഴുതാരക്കൊല്ലി തുടങ്ങി ഒട്ടേറെ ഔഷധങ്ങളൊക്കെ ഇതിലുണ്ടാകും. വീട്ടമ്മമാരും കുട്ടികളുമൊക്കെ വിത്തുകുട്ട കൂട്ടായ്മയില്‍ എത്തുന്നു, പരിസ്ഥിതി പോഷണത്തിനായി കൈ കോര്‍ക്കുന്നു. പ്രകൃതിയെ പോഷിപ്പിക്കാനും പരിസ്ഥിതിക്ക് കരുതലാകാനും ഈ കൂട്ടായ്മയ്ക്ക് സാധിക്കുന്നതായി ഭൂമിക സെക്രട്ടറി എബി ഇമ്മാനുവല്‍ പൂണ്ടിക്കുളം പറഞ്ഞു. സൗജന്യ വൃക്ഷത്തൈ വിതരണം സോഷ്യല്‍ ഫോറസ്ട്രി ഉപേക്ഷിച്ചു കോട്ടയം: എല്ലാ വര്‍ഷവും ലോക പരിസ്ഥിതി ദിനമായ ജൂണ്‍ അഞ്ചിനു നല്‍കിയിരുന്ന സൗജന്യ വൃക്ഷത്തൈ വിതരണം സോഷ്യല്‍ ഫോറസ്ട്രി ഉപേക്ഷിച്ചു. സാമ്പത്തിക പ്രതിസന്ധിയെത്തുടര്‍ന്നാണ് സാമൂഹ്യ വനവത്കരണത്തിന് ഉന്നല്‍ നല്‍കുന്ന പദ്ധതി വേണ്ടെന്നുവച്ചത്. കഴിഞ്ഞവര്‍ഷം വരെ 1.5 ലക്ഷം വൃക്ഷത്തൈകള്‍ ജില്ലകളില്‍ വിതരണം ചെയ്തിരുന്നു. ഏതാനും ജില്ലകളില്‍ നേരത്തെ തയാറാക്കിയ പതിനായിരത്തില്‍ താഴെ തൈകള്‍ പഞ്ചായത്തുകള്‍വഴി ഈവര്‍ഷം വിതരണം ചെയ്യും. മുന്‍വര്‍ഷങ്ങളില്‍ സന്നദ്ധ സംഘടനകള്‍, ക്ലബുകള്‍, സൊസൈറ്റികള്‍, ത്രിതല പഞ്ചായത്തുകള്‍, സര്‍ക്കാര്‍ സ്ഥാപനങ്ങള്‍, വിദ്യാഭ്യാസ സ്ഥാപനങ്ങള്‍, സര്‍ക്കാര്‍ ഇതര സംഘടനകള്‍ വഴി വിതരണം ചെയ്തിരുന്നു.

വനം സംരക്ഷിക്കേണ്ട വനംവകുപ്പ് ഓഫീസിനു സമീപം മാലിന്യക്കൂന

മുണ്ടക്കയം: പ്രകൃതിയുടെ വരദാനമാണ് മരവും വനങ്ങളും. അവയെ സംരക്ഷിക്കേണ്ടത് ഓരോ വ്യക്തിയുടെയും കടമയാണ്. എന്നാൽ, വനമേഖല മാലിന്യക്കൂമ്പാരമായി മാറുന്ന കാഴ്ചയാണ് മുണ്ടക്കയം വണ്ടൻപതാലിൽ കാണാനാവുന്നത്. മുണ്ടക്കയം - കോരുത്തോട് റോഡിൽ വണ്ടൻപതാൽ ഫോറസ്റ്റ് സ്റ്റേഷൻ മുതൽ പനയ്ക്കച്ചിറ വരെയുള്ള തേക്കിൻകൂപ്പ് ഭാഗത്തെ പല പ്രദേശങ്ങളിലും മാലിന്യംതള്ളൽ വ്യാപകമായിരിക്കുകയാണ്. വനംവകുപ്പ് ഓഫീസിന് 100 മീറ്റർ മാത്രം ദൂരത്തിൽവരെ വലിയ തോതിലാണ് മാലിന്യം തള്ളിയിരിക്കുന്നത്. രാത്രികാലങ്ങളിൽ വാഹനങ്ങളിൽ കൊണ്ടുവന്നു വനമേഖലയിൽ മാലിന്യം തള്ളുകയാണ്. പ്ലാസ്റ്റിക് കവറുകളിലും ചാക്കിലും കെട്ടിയ ജൈവ, അജൈവ മാലിന്യങ്ങളും പ്ലാസ്റ്റിക്കും എന്നുവേണ്ട വീട്ടിലെ ഉപയോഗശൂന്യമായ വസ്തുക്കൾവരെ വലിയതോതിൽ കൂട്ടിയിട്ടിരിക്കുകയാണ്. മഴ പെയ്യുമ്പോൾ ഈ മാലിന്യങ്ങൾ സമീപത്തെ തോട്ടിലേക്ക് ഒഴുകിയെത്തുകയും ഇത് ജലാശയങ്ങൾ മാലിന്യപൂരിതമാക്കുകയും ചെയ്യുകയാണ്. കൂടാതെ പ്രദേശത്ത് കാട്ടുപന്നി, കാട്ടുപോത്ത് അടക്കമുള്ള വന്യമൃഗങ്ങളുടെ ശല്യവും രൂക്ഷമാണ്. ഏതാനും മാസങ്ങൾക്കു മുമ്പ് ഇതിന് സമീപത്താണ് റോഡ് മുറിച്ചു കടന്ന കാട്ടുപോത്ത് വാഹനമിടിച്ച് ചത്തത്. മുന്പും പലതവണ കാട്ടുപന്നി അടക്കമുള്ള വന്യമൃഗങ്ങൾ വാഹനത്തിന് മുന്നിൽ ചാടി അപകടമുണ്ടാക്കിയ സംഭവം ഉണ്ടായിട്ടുണ്ട്. വനവിസ്തൃതി വർധിപ്പിക്കാനും വന്യമൃഗങ്ങളെ സംരക്ഷിക്കാനും അതിയായ വ്യഗ്രത കാണിക്കുന്ന വനംവകുപ്പ് ഉദ്യോഗസ്ഥർ സ്വന്തം ഓഫീസിനു സമീപംവരെ വലിയതോതിൽ മാലിന്യം തള്ളിയിട്ടും യാതൊരു നടപടിയും സ്വീകരിക്കുന്നില്ലെന്നും ആക്ഷേപം ശക്തമാണ്. കാമറ സ്ഥാപിച്ചും രാത്രികാലങ്ങളിൽ പരിശോധന ശക്തമാക്കിയും ഇത് തടയാമെന്നും നാട്ടുകാർ പറയുന്നു. വീണ്ടുമൊരു പരിസ്ഥിതിദിനംകൂടി കടന്നുപോകുമ്പോൾ വണ്ടൻപതാൽ വനമേഖലയിലൂടെ മൂക്കുപൊത്തി കടന്നുപോകേണ്ട സാഹചര്യം ഒഴിവാക്കാൻ ഉദ്യോഗസ്ഥരും പൊതുസമൂഹവും മുന്നിട്ടിറങ്ങണമെന്ന് ആവശ്യവും ശക്തമാവുകയാണ്.

സുരക്ഷിതമായി അന്തിയുറങ്ങാൻ വീടില്ലാതെ സ്ത്രീകൾ മാത്രമുള്ള നിർധന കുടുംബം

മുണ്ടക്കയം: വയോധികയായ അമ്മയോടും വിദ്യാർഥിനിയായ മകളോടുമൊപ്പം സുരക്ഷിതമായി അന്തിയുറങ്ങാൻ കൂരയില്ലാതെ ബുദ്ധിമുട്ടുകയാണ് വിധവയായ വീട്ടമ്മ. പനയ്ക്കച്ചിറ കൊല്ലിപ്പറമ്പിൽ സോഫിയ സുബി (51) ആണ് 89 വയസായ അമ്മ മറിയക്കുട്ടിയോടും മകളോടുമൊപ്പം അടച്ചുറപ്പില്ലാത്ത നനയുന്ന കൂരയിൽ താമസിക്കുന്നത്. കോരുത്തോട് പഞ്ചായത്തിൽ പനയ്ക്കച്ചിറ ഒന്നാം വാർഡിലാണ് ഈ നിർധന കുടുംബം കഴിയുന്നത്. ഏതാനും ദിവസങ്ങൾക്കു മുമ്പുണ്ടായ ശക്തമായ കാറ്റിൽ ഇവർക്ക് ഉണ്ടായിരുന്ന ചെറിയ വീടിന്‍റെ മുകളിലേക്ക് മരം വീണതോടെ കൂടുതൽ ദുരിതത്തിലായി. സംസ്ഥാന സർക്കാരിന്‍റെ ഭവനനിർമാണ പദ്ധതിയിൽ പഞ്ചായത്ത് ലിസ്റ്റിൽ ഉൾപ്പെട്ടിട്ടുണ്ടെങ്കിലും ഇതിന്‍റെ നടപടിക്രമങ്ങൾ പൂർത്തിയായി വരുമ്പോഴേക്കും മാസങ്ങൾ പിന്നിടും. അതുവരെ എങ്ങനെ കഴിച്ചുകൂട്ടുമെന്നറിയാതെ ബുദ്ധിമുട്ടുകയാണ് ഈ കുടുംബം. ഇവർ താമസിക്കുന്ന വീട്ടിലേക്ക് എത്തുവാൻ വഴിസൗകര്യം പോലും പരിമിതമാണ്. പുതിയ വീട് നിർമിക്കണമെങ്കിൽത്തന്നെ സാധനങ്ങൾ തലച്ചുമടായി എത്തിക്കേണ്ട ഗതികേടിലാണ്. ഇതിന് ഭാരിച്ച തുകയും ചെലവ് വരും. ഈ കുടുംബത്തെ സഹായിക്കുകയെന്ന ലക്ഷ്യത്തോടെ മുണ്ടക്കയം സെന്‍റ് മേരീസ് ലത്തീൻ പള്ളിയുടെ നേതൃത്വത്തിൽ ധനസമാഹരണം നടത്താൻ തീരുമാനിച്ചതായി ഇടവക വികാരി ഫാ. ടോം ജോസ് അറിയിച്ചു. വെള്ളിയാഴ്ച ഉച്ചകഴിഞ്ഞ് മൂന്നിന് മുണ്ടക്കയം ടൗണിൽ യുവജനങ്ങളുടെ നേതൃത്വത്തിൽ ധനസമാഹരണം നടത്തുവാനാണ് തീരുമാനിച്ചിരിക്കുന്നത്. സുമനസുകളുടെ സഹായത്തോടെ ഒരു തുക കണ്ടെത്തി ഈ കുടുംബത്തെ സഹായിക്കുകയാണ് ലക്ഷ്യം. ഒപ്പം അധികാരികളുടെയും അകമഴിഞ്ഞ സഹായം ഈ കുടുംബം പ്രതീക്ഷിക്കുകയാണ്.

ഡ്രീം ലാൻഡ് അങ്കണവാടി കെട്ടിടം ഉദ്ഘാടനം

പാറത്തോട്: പഞ്ചായത്തിലെ പാലമ്പ്ര വാർഡിൽ നിർമാണം പൂർത്തിയാക്കിയ ഡ്രീം ലാൻഡ് അങ്കണവാടിക്കെട്ടിടത്തിന്‍റെ ഉദ്ഘാടനം സെബാസ്റ്റ്യൻ കുളത്തുങ്കൽ എംഎൽഎ നിർവഹിച്ചു. പാറത്തോട് പഞ്ചായത്ത് പ്രസിഡന്‍റ് കെ.കെ. ശശികുമാർ അധ്യക്ഷത വഹിച്ചു. ജില്ലാ പഞ്ചായത്തംഗം പി.ആർ. അനുപമ, കാഞ്ഞിരപ്പള്ളി ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ്, വൈസ് പ്രസിഡന്‍റ് ജോളി മടുക്കക്കുഴി, ബ്ലോക്ക് പഞ്ചായത്തംഗങ്ങളായ ടി.ജെ. മോഹനൻ, ഷക്കീല നസീർ, സാജൻ കുന്നത്ത്, പാറത്തോട് പഞ്ചായത്ത് വൈസ് പ്രസിഡന്‍റ് സോഫി ജോസഫ്, പഞ്ചായത്തംഗങ്ങളായ സിന്ധു മോഹനൻ, ഡയസ് കോക്കാട്ട്, ആന്‍റണി മുട്ടത്തുകുന്നേൽ, ഏലിയാമ്മ വാന്തിയിൽ, ഷാലിമ്മ ജയിംസ്, ബീനാ ജോസഫ്, ജോൺസി, സിഡിപിഒ പങ്കജാക്ഷി കോടൂർ, റവ.ഡോ. ജിയോ കണ്ണംകുളം, സോണി, വിവിധ രാഷ്‌ട്രീയ പാർട്ടി പ്രതിനിധികൾ എന്നിവർ പ്രസംഗിച്ചു. ഐസിഡിഎസ്, എംജിഎൻആർഇജിഎസ്, ബ്ലോക്ക് പഞ്ചായത്ത്, പഞ്ചായത്ത് എന്നിവയുടെ സംയുക്ത പദ്ധതികളിലൂടെ 16 ലക്ഷം രൂപ വിനിയോഗിച്ചാണ് കെട്ടിടം പൂർത്തീകരിച്ചത്.

റൈസിംഗ് പൂഞ്ഞാർ: മുന്നൊരുക്ക സെമിനാർ നടത്തി

മുണ്ടക്കയം: സംസ്ഥാന വ്യവസായ വകുപ്പിന്‍റെ സംരംഭക വർഷാചരണത്തിന്‍റെ ഭാഗമായി പൂഞ്ഞാർ നിയോജക മണ്ഡലത്തിൽ നടക്കുന്ന റൈസിംഗ് പൂഞ്ഞാർ നിക്ഷേപക സംഗമത്തിന്‍റെ മുന്നോടിയായി കാഞ്ഞിരപ്പള്ളി താലൂക്ക് വ്യവസായ ഓഫീസിന്‍റെ നേതൃത്വത്തിൽ മുന്നൊരുക്ക സെമിനാർ നടത്തി. മുണ്ടക്കയം പഞ്ചായത്ത് കോൺഫറൻസ് ഹാളിൽ നടന്ന സമ്മേളനം സെബാസ്റ്റ്യൻ കുളത്തുങ്കൽ എംഎൽഎ ഉദ്ഘാടനം ചെയ്തു. കാഞ്ഞിരപ്പള്ളി ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ് അധ്യക്ഷത വഹിച്ചു. മുണ്ടക്കയം പഞ്ചായത്ത് പ്രസിഡന്‍റ് രേഖ ദാസ്, കൂട്ടിക്കൽ പഞ്ചായത്ത് പ്രസിഡന്‍റ് ബിജോയ് ജോസ്, കാഞ്ഞിരപ്പള്ളി ബ്ലോക്ക് പഞ്ചായത്ത് വൈസ് പ്രസിഡന്‍റ് ജോളി മടുക്കക്കുഴി, ബ്ലോക്ക് പഞ്ചായത്തംഗങ്ങളായ ടി.എസ്. കൃഷ്ണകുമാർ, പി.കെ. പ്രദീപ്, ടി.ജെ. മോഹനൻ, ജോഷി മംഗലം, ജൂബി അഷറഫ്, മുണ്ടക്കയം പഞ്ചായത്ത് വൈസ് പ്രസിഡന്‍റ് ഷീലമ്മ ഡൊമിനിക്, പഞ്ചായത്തംഗങ്ങളായ സി.വി. അനിൽകുമാർ, സുലോചന സുരേഷ്, ഷിജി ഷാജി തുടങ്ങിയവർ പ്രസംഗിച്ചു. വനിതാ സംരംഭകരെ പ്രോത്സാഹിപ്പിക്കുന്നത് ലക്ഷ്യം വച്ചും ഭക്ഷ്യോപാധികളായ കാർഷിക ഉത്പന്നങ്ങൾ മൂല്യ വർധിത ഉത്പന്നങ്ങളാക്കി അധിക വരുമാനം നേടുന്നത് സംബന്ധിച്ചുമാണ് സെമിനാർ നടത്തിയത്. ഇതോടൊപ്പം കാഞ്ഞിരപ്പള്ളി ബ്ലോക്ക് പഞ്ചായത്തിന്‍റെ നേതൃത്വത്തിൽ ബേക്കറി ഉത്പന്നങ്ങൾ നിർമിക്കുന്നതിലും ബ്യൂട്ടീഷൻ കോഴ്സിലും പരിശീലനം നേടിയവർക്കുള്ള സർട്ടിഫിക്കറ്റ് വിതരണവും നടത്തി. ഒന്പതിന് ഈരാറ്റുപേട്ടയിൽ നടക്കുന്ന നിക്ഷേപക സംഗമത്തിലൂടെ ആയിരം കോടി രൂപയിൽ കുറയാത്ത നിക്ഷേപം ഉറപ്പുവരുത്തുകയും അതിലൂടെ പതിനായിരത്തിൽ കുറയാതെ പുതിയ തൊഴിൽ അവസരങ്ങൾ സൃഷ്ടിക്കുന്നതിനും ലക്ഷ്യംവച്ച് വിഷൻ 2030 എന്ന കാഴ്ചപ്പാടോടെയാണ് റൈസിംഗ് പൂഞ്ഞാർ ഇൻവെസ്റ്റേഴ്സ് മീറ്റ് നടത്തുന്നതെന്നും സെബാസ്റ്റ്യൻ കുളത്തുങ്കൽ എംഎൽഎ പറഞ്ഞു. ടൂറിസം, ഐടി, റബർ, ഭക്ഷ്യോപാധികളുടെ മൂല്യവർധിത ഉത്പാദന സംസ്കരണ യൂണിറ്റുകൾ, സുഗന്ധവ്യഞ്ജനാധിഷ്ഠിത ഉത്പന്ന നിർമാണങ്ങൾ, തടി വ്യവസായങ്ങൾ എന്നീ മേഖലകളിലെ സാധ്യതകൾ ഉപയോഗപ്പെടുത്തി സംരംഭകത്വ മേഖല വികസിപ്പിച്ച് മികച്ച വരുമാനസ്രോതസുകൾ ജനങ്ങളിലേക്ക് എത്തിക്കുക എന്നിവ ലക്ഷ്യം വച്ചാണ് ഇത്തരമൊരു മീറ്റ് സംഘടിപ്പിച്ചിരിക്കുന്നതെന്നും എംഎൽഎ പറഞ്ഞു.

സെന്‍റ് ജോസഫ്സ് സെൻട്രൽ സ്കൂളിൽ പരിസ്ഥിതിപാഠങ്ങൾ ചുവർചിത്രങ്ങളിലൂടെ

മുണ്ടക്കയം: പരിസ്ഥിതി സംരക്ഷണ സന്ദേശങ്ങൾ ചുവർ ചിത്രങ്ങളിലൂടെ പ്രൈമറിതലം മുതൽ വിദ്യാർഥികൾക്ക് പാഠ്യപദ്ധതിയായി നൽകി മുണ്ടക്കയം സെന്‍റ് ജോസഫ്സ് സെൻട്രൽ സ്കൂളിന്‍റെ പരിസ്ഥിതി ദിനാഘോഷങ്ങൾക്ക് തുടക്കമായി. പഞ്ചായത്ത് പ്രസിഡന്‍റ് രേഖാ ദാസ് ഉദ്ഘാടനം ചെയ്തു. സ്കൂൾ മാനേജർ ഫാ. മത്തായി മണ്ണൂർവടക്കേതിൽ അധ്യക്ഷത വഹിച്ചു. പ്രിൻസിപ്പൽ ഫാ. തോമസ് നാലന്നടിയിൽ, സിസ്റ്റർ ജിജി പുല്ലത്തിൽ എഒ, വാർഡ് മെംബർ ലിസി ജിജി, ക്ലബ് കൺവീനർ സിന്ധു മോൾ കോശി എന്നിവർ പ്രസംഗിച്ചു. വിദ്യാർഥികൾ ബൈപാസ് റോഡ് വൃത്തിയാക്കുകയും ബൈപാസിനോട്‌ ചേർന്നുള്ള സ്കൂളിന്‍റെ മുൻവശത്ത് പൂന്തോട്ടം നട്ടുപിടിപ്പിക്കുകയും ചെയ്തു. മുണ്ടക്കയം പഞ്ചായത്തിലെ മികച്ച ഹരിത സ്വകാര്യ സ്ഥാപനമായി തെരഞ്ഞെടുക്കപ്പെട്ട സെന്‍റ് ജോസഫ് സ്കൂളിൽ ഭക്ഷണത്തിലൂടെയും ജലത്തിലൂടെയും ശരീരത്തിലെത്തുന്ന പ്ലാസ്റ്റിക്കിനെ നിരോധിക്കുവാൻ പ്ലാസ്റ്റിക് ഫ്രീ ലഞ്ച് ഡേ, എക്കോബ്രിക്സ് നിർമാണം തുടങ്ങിയ വ്യത്യസ്തമായ പ്രവർത്തനങ്ങൾ ഈ വർഷം ആവിഷ്കരിച്ച് നടപ്പിലാക്കാൻ തീരുമാനിച്ചു.

കഞ്ചാവുചെടി നശിപ്പിച്ചു

മുണ്ടക്കയം: പൊൻകുന്നം എക്സൈസിന്‍റെ നേതൃത്വത്തിൽ നടത്തിയ പരിശോധനയിൽ മുണ്ടക്കയം ഇളംപ്രാമലയ്ക്ക് സമീപം പൊതുസ്ഥലത്ത് കഞ്ചാവുചെടി നട്ടുവളർത്തിയ നിലയിൽ കണ്ടെത്തി. ചെടി നശിപ്പിച്ച എക്സൈസ് ഉദ്യോഗസ്ഥർ സംഭവത്തിൽ കേസെടുത്ത് അന്വേഷണം ആരംഭിച്ചു. എക്സൈസ് സർക്കിൾ ഇൻസ്പെക്ടർ കെ.ബി. ബിനുവിന്‍റെ നേതൃത്വത്തിൽ അസിസ്റ്റന്‍റ് എക്സൈസ് ഇൻസ്പെക്ടർ പി.എ. നജീബ്, സിവിൽ എക്സൈസ് ഓഫീസർ ഡ്രൈവർ കെ.ആർ. മധു എന്നിവർ റെയ്‌ഡിൽ പങ്കെടുത്തു. ഇത്തരം കുറ്റകൃത്യങ്ങൾ ശ്രദ്ധയിൽപ്പെട്ടാൽ 9447927927, 9400069510, 9400069518, 9496499299 എന്നീ ഫോൺ നമ്പറുകളിൽ അറിയിക്കണമെന്ന് എക്സൈസ് ഉദ്യോഗസ്ഥർ അറിയിച്ചു.

മിനി മാസ്റ്റ് ലൈറ്റ് ഉദ്ഘാടനം

കാഞ്ഞിരപ്പള്ളി: ആന്‍റോ ആന്‍റണി എംപിയുടെ പ്രാദേശിക വികസന ഫണ്ടിൽനിന്നു 2.5 ലക്ഷം രൂപ ചെലവഴിച്ച് കാഞ്ഞിരപ്പള്ളി പഞ്ചായത്ത് 11-ാം വാർഡ് ഇരുപത്താറാംമൈൽ ജംഗ്ഷനിൽ സ്ഥാപിച്ച മിനി മാസ്റ്റ് ലൈറ്റിന്‍റെ ഉദ്ഘാടനം ആന്‍റോ ആന്‍റണി എംപി നിർവഹിച്ചു. പഞ്ചായത്തംഗം പി.എ. ഷെമീർ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് കെ.ആർ. തങ്കപ്പൻ മുഖ്യപ്രഭാഷണം നടത്തി.

എലിക്കുളത്ത് ഓപ്പണ്‍ ജിം തുറന്നു

എലിക്കുളം: വയോജനങ്ങള്‍ക്കായി നിറവ് @ 60 പ്ലസ് ഓപ്പണ്‍ ജിം ഒരുക്കി ആരോഗ്യ സംരക്ഷണം ഉറപ്പാക്കുകയാണ് എലിക്കുളം പഞ്ചായത്ത്. പഞ്ചായത്തിന്‍റെ വാര്‍ഷിക പദ്ധതിയില്‍ ഉള്‍പ്പെടുത്തി രണ്ട് ലക്ഷം രൂപ വിനിയോഗിച്ചാണ് ഓപ്പണ്‍ ജിംനേഷ്യം സജ്ജമാക്കിയത്. ഇളങ്ങുളത്തെ നാലാംമൈല്‍ വഴിയോര വിശ്രമ കേന്ദ്രത്തിനടുത്ത് സ്ഥിതി ചെയ്യുന്ന ഹാപ്പിനസ് പാര്‍ക്കിലാണ് ഓപ്പണ്‍ ജിം തുറന്നത്. രണ്ട് ഫിറ്റ്നസ് എക്സര്‍സൈസ് സൈക്കിളുകള്‍, രണ്ട് മാനുവല്‍ ലെഗ് പ്രസ് റോവര്‍ മെഷീനുകള്‍, ഒരു ഔട്ട്ഡോര്‍ എയര്‍ വാക്കര്‍, ഡബിള്‍ വീല്‍ ഷോള്‍ഡര്‍, ക്രോസ് വാക്കര്‍, ട്രിപ്പിള്‍ വാക്കര്‍ എന്നീ ഉപകരണങ്ങളാണ് സ്ഥാപിച്ചിട്ടുള്ളത്. ഓപ്പണ്‍ ജിമ്മിന്‍റെ ഉദ്ഘാടനം ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ നിര്‍വഹിച്ചു. പഞ്ചായത്ത് പ്രസിഡന്‍റ് ജിമ്മി ഈറ്റത്തോട്ട് അധ്യക്ഷത വഹിച്ചു. മെംബർമാരായ അഖില്‍ അപ്പുക്കുട്ടന്‍, ഷേര്‍ലി അന്ത്യാംകുളം, സെല്‍വി വിന്‍സണ്‍, മാത്യൂസ് മാത്യു, സിനി ജോയി, ആശാമോള്‍, ദീപ ശ്രീജേഷ്, ജയിംസ് ചാക്കോ, പഞ്ചായത്ത് സെക്രട്ടറി മാര്‍ട്ടിന്‍ ജോര്‍ജ്, ഐസിഡിഎസ് സൂപ്പര്‍വൈസര്‍ ചിന്തു ടി. കുട്ടപ്പന്‍, നിറവ് @ 60 പ്ലസ് സംഘടനാ പ്രസിഡന്‍റ് കെ.എന്‍. രാധാകൃഷ്ണപിള്ള, സെക്രട്ടറി പി. വിജയന്‍ എന്നിവര്‍ പങ്കെടുത്തു.

ആശുപത്രി മാലിന്യങ്ങള്‍ റോഡരികില്‍ തള്ളുന്നു

പാലാ: ആശുപത്രി മാലിന്യങ്ങള്‍ റോഡരികില്‍ തള്ളി കടന്നുകളയുന്ന സംഘം നാട്ടുകാരെ ആശങ്കയിലാക്കുന്നു. പകര്‍ച്ചവ്യാധികള്‍ വര്‍ധിക്കുന്ന സാഹചര്യത്തിലാണ് ഇത്തരം പ്രവൃത്തികള്‍ നാട്ടുകാരുടെ ഉറക്കം കെടുത്തുന്നത്. കരൂര്‍ പഞ്ചായത്തിലെ നെടുമ്പാറ-കരൂര്‍ പള്ളി റോഡരികിലാണ് ആശുപത്രി മാലിന്യങ്ങള്‍ തള്ളപ്പെട്ട നിലയില്‍ കണ്ടെത്തിയത്. ഇത് മൂന്നാം തവണയാണ് മാലിന്യക്കെട്ടുകള്‍ തള്ളപ്പെട്ട നിലയില്‍ കാണപ്പെട്ടത്. രാത്രികാലങ്ങളില്‍ വാഹനങ്ങളിലെത്തിച്ച് മാലിന്യങ്ങള്‍ തള്ളി കടന്നുകളയുകയാണ് ചെയ്യുന്നത്. ആശുപത്രികളിലും ലാബുകളിലും ക്ലിനിക്കുകളിലും ഉപയോഗിക്കുന്ന സിറിഞ്ച്, കോട്ടണ്‍ വേസ്റ്റ്, സൂചികള്‍ ഉള്‍പ്പെടെയുള്ളവയാണ് കാണപ്പെട്ടത്. ഈ റോഡിനു സമീപമുള്ള ചെറുതോട്ടിലാണ് ഇവ തള്ളിയിരിക്കുന്നത്. ഇവിടെനിന്നുള്ള വെള്ളം ളാലം തോട്ടിലാണ് ഒഴുകിയെത്തുന്നത്. നൂറുകണക്കിന് ആളുകളുടെ ആശ്രയമായ കരൂര്‍ കുടിവെള്ള പദ്ധതിയുടെ കിണര്‍ സ്ഥിതി ചെയ്യുന്നത് ഇവിടെനിന്ന് അര കിലോമീറ്റര്‍ മാത്രം അകലെയാണ്. ജലസ്രോതസിനു സമീപവും പൊതുസ്ഥലത്തും മാലിന്യങ്ങള്‍ തള്ളിയവരെ ഉടന്‍ കണ്ടെത്തണമെന്നും കര്‍ശന നടപടി സ്വീകരിക്കണമെന്നും നാട്ടുകാര്‍ ആവശ്യപ്പെട്ടു. സമീപവാസികളായ മുപ്പതിലധികം ആളുകള്‍ ഒപ്പിട്ട പരാതി പോലീസ്, പഞ്ചായത്ത് അധികൃതര്‍ക്ക് നല്‍കിയിട്ടുണ്ട്.

ചെക്ക് തട്ടിയെടുത്ത് 25 ലക്ഷം രൂപ കൈപ്പറ്റാൻ ശ്രമിച്ചയാൾ പോലീസ് പിടിയിൽ

കുറവിലങ്ങാട്: സുഹൃത്തിന്‍റെ ഭാര്യയുടെ ചെക്ക് തട്ടിയെടുത്ത് 25 ലക്ഷം രൂപ കൈപ്പറ്റാന്‍ ശ്രമിച്ചയാളെ കുറവിലങ്ങാട് പോലീസ് പിടികൂടി. കാണക്കാരി കുളത്തൂര്‍ കുടിലില്‍ ടോമി ജോസഫിനെയാണ് (52) അറസ്റ്റ് ചെയ്തത്. 2024 ജൂണിലായിരുന്നു കേസിനാസ്പദമായ സംഭവം. പരാതിക്കാരിയും ഭര്‍ത്താവും ഏറ്റുമാനൂര്‍ ഭാഗത്ത് ഹോട്ടല്‍ ബിസിനസ് നടത്തുകയായിരുന്നു. ഭര്‍ത്താവ് മരിച്ചശേഷം ഇവരുടെ സുഹൃത്തായ ടോമി പരാതിക്കാരിയുടെ പേരിലുള്ള സൗത്ത് ഇന്ത്യന്‍ ബാങ്കിന്‍റെ ഒരു ചെക്ക് കൈക്കലാക്കിയശേഷം 25 ലക്ഷം രൂപ തുകയെഴുതി വ്യാജമായി ഒപ്പിട്ട് കളക്‌ഷന് തിരുവനന്തപുരം ബ്രാഞ്ചിലേക്ക് അയച്ചു. ബാങ്കില്‍നിന്നാണ് വിവരം പരാതിക്കാരി അറിഞ്ഞത്. തുടര്‍ന്ന് കുറവിലങ്ങാട് പോലീസ് കേസ് രജിസ്റ്റര്‍ ചെയ്ത് ഇയാളെ പിടികൂടുകയായിരുന്നു. പ്രതിയെ കോടതിയില്‍ ഹാജരാക്കി.

മണ്ണയ്ക്കനാട് സ്‌പെഷൽ സ്‌കൂളിൽ ഡിജിറ്റൽ വിദ്യാഭ്യാസ പദ്ധതിക്കു തുടക്കം

കുറവിലങ്ങാട്: മണ്ണയ്ക്കനാട് ഹോളിക്രോസ് സ്‌പെഷൽ സ്‌കൂൾ വിദ്യാർഥികൾക്ക് ഇനി ഡിജിറ്റൽ വിദ്യാഭ്യാസവും. വെർജ് ടാബ് ഉയോഗപ്പെടുത്തി ഡിജിറ്റൽ വിദ്യാഭ്യാസ പദ്ധതിക്കാണ് തുടക്കമിട്ടത്. പ്രവേശനോത്സവവേളയിൽ മോൻസ് ജോസഫ് എംഎൽഎ പദ്ധതി ഉദ്ഘാടനം ചെയ്തു. ഹോളിക്രോസ് അങ്കമാലി പ്രൊവിൻഷ്യാൾ സിസ്റ്റർ എൽസി ജോർജ് അധ്യക്ഷത വഹിച്ചു. ഹോളിക്രോസ് പള്ളി വികാരി ഫാ. തോമസ് പഴവക്കാട്ടിൽ, പഞ്ചായത്ത് പ്രസിഡന്‍റ് മിനി മത്തായി, മരങ്ങാട്ടുപിള്ളി പഞ്ചായത്തംഗം തുളസിദാസ്, സാന്താക്രൂസ് എൽപി സ്‌കൂൾ ഹെഡ്മിസ്ട്രസ് എൽസി സക്കറിയ, സ്‌കൂൾ മാനേജർ സിസ്റ്റർ ഫബി ജോസഫ്, പിടിഎ പ്രസിഡന്‍റ് സുനിൽ സിറിയക്, പ്രിൻസിപ്പൽ സിസ്റ്റർ ബോബി പോൾ, ഡോ. ജിനോ എന്നിവർ പ്രസംഗിച്ചു.

മാന്തോപ്പ്, പേരമരം, പൂന്തോപ്പ് പദ്ധതികളുമായി ബാപ്പുജി സംഘം

കുറവിലങ്ങാട്: പരിസ്ഥിതി സംരക്ഷണത്തിന്‍റെ ഭാഗമായി റോഡരികിൽ ഫലവൃക്ഷത്തൈകൾ നട്ട് ബാപ്പുജി സ്വാശ്രയസംഘം. പള്ളിത്താഴെ-മുണ്ടൻവരമ്പ് റോഡരികലാണ് ഫലവൃക്ഷത്തൈകളും ചെടികളും നട്ട് സംഘം ശ്രദ്ധ നേടുന്നത്. ആദ്യഘട്ടത്തിൽ ചെടികൾ പൂന്തോപ്പ് എന്ന പേരിൽ നട്ടുവളർത്തി. രണ്ടാം ഘട്ടത്തിൽ മാന്തോപ്പ് എന്ന പേരിൽ വിവിധയിനം മാവുകൾ നട്ടുവളർത്തി. ഈ വർഷം വ്യത്യസ്തയിനം പേരത്തൈകൾ പേരമരം പദ്ധതി എന്ന പേരിൽ നട്ടുവളർത്തുന്ന പദ്ധതിക്ക് തുടക്കമിട്ടു. പാലാ സോഷ്യൽ വെൽഫെയർ സൊസൈറ്റിയുടെ കീഴിലാണ് സംഘത്തിന്‍റെ പ്രവർത്തനം. ഷൈജു പാവുത്തിയേൽ പ്രസിഡന്‍റും ബോബിച്ചൻ നിധീരി സെക്രട്ടറിയുമായാണ് പ്രവർത്തനങ്ങൾ നടത്തുന്നത്.

കാഞ്ഞിരപ്പള്ളി-കാഞ്ഞിരംകവല ഹൈവേയിലെ ടാറിംഗിന് വിള്ളൽ

തിടനാട്: കാഞ്ഞിരപ്പള്ളി-കാഞ്ഞിരംകവല ഹൈവേയിൽ തിടനാട് എട്ടാംമൈൽ വളവിൽ രണ്ടിടങ്ങളിൽ റോഡിൽ വിള്ളൽ വീണു. വാഹനങ്ങൾ ശ്രദ്ധിച്ചില്ലെങ്കിൽ അപകടസാധ്യതയേറെയാണ്. വാഹനം ബ്രേക്ക് ചെയ്യുമ്പോൾ നിരങ്ങിനീങ്ങി അപകടമുണ്ടാകാൻ സാധ്യതയേറെയാണ്. അധികൃതർ അടിയന്തര നടപടി സ്വീകരിക്കണമെന്ന് കർഷകവേദി തിടനാട് പഞ്ചായത്ത് കമ്മിറ്റി പ്രസിഡന്‍റ് ടോമിച്ചൻ ഐക്കര ആവശ്യപ്പെട്ടു.

മികവിന്‍റെ മാറ്റ് തെളിയിച്ച് പാലാ അല്‍ഫോന്‍സ കോളജ്

പാലാ: എംജി യൂണിവേഴ്‌സിറ്റിയില്‍ ഡിഗ്രി വിഭാഗത്തില്‍ 29 റാങ്കുകളും ഒരു എസ് ഗ്രേഡും 51 എ പ്ലസുകളും 41 എ ഗ്രേഡുകളും നേടി മികച്ച വിജയം കരസ്ഥമാക്കിയ പാലാ അല്‍ഫോന്‍സ കോളജിലെ മിടുക്കികള്‍ക്ക് അഭിനന്ദനപ്രവാഹം. ഇന്നലെ കോളജ് ഓഡിറ്റോറിയത്തില്‍ നടന്ന ടോപ്പേഴ്സ് ഡേയില്‍ എന്‍എസിഐഎന്‍ മുന്‍ പ്രിന്‍സിപ്പല്‍ ഡയറക്ടര്‍ ജനറല്‍ ഡോ. കെ.എന്‍. രാഘവന്‍ മുഖ്യാതിഥിയായി. പുതിയ മാറ്റങ്ങളെ ഉള്‍ക്കൊള്ളാനും ജീവിതത്തിന്‍റെ ശീതളഛായകളില്‍നിന്ന് പുറത്തുവന്ന് മികച്ച നേട്ടങ്ങള്‍ കൈവരിക്കുവാനും ഉത്സാഹിക്കണമെന്ന് അദ്ദേഹം വിദ്യാര്‍ഥിനികളെ ഉദ്‌ബോധിപ്പിച്ചു. കോളജ് മാനേജര്‍ റവ.ഡോ. ജോസഫ് തടത്തില്‍ അധ്യക്ഷത വഹിച്ചു. എംജി യൂണിവേഴ്‌സിറ്റി സിന്‍ഡിക്കറ്റ് മെംബര്‍ ഡോ. ജോജി അലക്‌സ്, പ്രിന്‍സിപ്പല്‍ സിസ്റ്റര്‍ ഡോ. മിനിമോള്‍ മാത്യു, വൈസ് പ്രിന്‍സിപ്പല്‍ സിസ്റ്റര്‍ ഡോ. മഞ്ജു എലിസബത്ത് കുരുവിള, മഞ്ജു ജോസ്, കോളജ് ബര്‍സാര്‍ ഫാ. കുര്യാക്കോസ് വെള്ളച്ചാലില്‍ എന്നിവര്‍ പ്രസംഗിച്ചു.

ആഗോള താപനത്തിനെതിരേ പോരാടാന്‍ ഇന്‍ഫാമിന്‍റെ നേതൃത്വത്തില്‍ ടാക്‌സി ഡ്രൈവര്‍മാരും

പാറത്തോട്: ആഗോള താപനത്തിനെതിരേ പോരാടാന്‍ ഇന്‍ഫാമിന്‍റെ നേതൃത്വത്തില്‍ ടാക്‌സി ഡ്രൈവര്‍മാരും ഒത്തുചേരുന്നു. തങ്ങളുടെ ജീവിതമാർഗ മായി വാഹനങ്ങള്‍ ഓടിക്കേണ്ടി വരുന്നവരാണ് ടാക്‌സി ഡ്രൈവര്‍മാര്‍. ഇതുമൂലമുണ്ടാകുന്ന കാര്‍ബണ്‍ ഡൈ ഓക്‌സൈഡ് ബഹിര്‍ഗമനത്തെ ഒരു പരിധിവരെ പരിഹരിക്കാന്‍ ഫലവൃക്ഷത്തൈകളും പച്ചക്കറിത്തൈകളും വച്ചുപിടിപ്പിക്കുന്നതിലൂടെ സാധിക്കും. അതിനാലാണ് പാറത്തോട്ടിലെ ടാക്‌സി ഡ്രൈവര്‍മാര്‍ക്കു പരിസ്ഥിതി ദിനത്തോടനുബന്ധിച്ച് തൈകള്‍ വിതരണം ചെയ്യുന്നതെന്നും ആഗോള താപനം നേരിടാനുള്ള പോരാട്ടത്തില്‍ ഇന്‍ഫാമിനൊപ്പം ഇവരും പങ്കാളികളാകുകയാണെന്നും ഇന്‍ഫാം ദേശീയ ചെയര്‍മാന്‍ ഫാ. തോമസ് മറ്റമുണ്ടയില്‍ പറഞ്ഞു.

ചെമ്മലമറ്റം പള്ളിയിൽ പന്ത്രണ്ട് ശ്ലീഹന്മാരുടെ തിരുനാൾ

ചെമ്മലമറ്റം: പന്ത്രണ്ട് ശ്ലീഹൻമാരുടെ പള്ളിയിൽ വിശുദ്ധ ശ്ലീഹന്മാരുടെ തിരുനാൾ തുടങ്ങി. ഒൻപതിനു സമാപിക്കും. തിരുനാളിനൊരുക്കമായി പത്ത് ദിവസത്തെ നൊവേന ആരംഭിച്ചു. നാളെ രാവിലെ ആറിന് വിശുദ്ധ കുർബാന, നൊവേന. തുടർന്ന് തിരുനാൾ കൊടിയേറ്റ് - വികാരി ഫാ. സെബാസ്റ്റ്യൻ കൊല്ലംപറമ്പിൽ. വൈകുന്നേരം അഞ്ചിന് വിശുദ്ധ കുർബാന - ഫാ. ജേക്കബ് കടുതോടിൽ, ജപമാല പ്രദക്ഷിണം, നെയ്യപ്പംനേർച്ച. തുടർന്ന് നാടകം. ഏഴിനു രാവിലെ ആറിന് വിശുദ്ധ കുർബാന. വൈകുന്നേരം 4.30ന് റാസ കുർബാന. ഫാ. ജോസഫ് നിരവത്ത് മുഖ്യകാർമികത്വം വഹിക്കും. ഫാ. ജോസഫ് വെട്ടുകല്ലുംപുറത്ത്, ഫാ. മാത്യു തെരുവൻകുന്നേൽ, ഫാ. സെബാസ്റ്റ്യൻ പെട്ടപ്പുഴ എന്നിവർ സഹകാർമികത്വം വഹിക്കും. തുടർന്ന് ആകാശവിസ്മയം. 7.30ന് ഇടവകയിലെ നൂറിൽപരം കലാ പ്രതിഭകൾ അണിനിരക്കുന്ന കലാസന്ധ്യ. പ്രധാന തിരുനാൾ ദിവസമായ എട്ടിനു രാവിലെ ആറിന് വിശുദ്ധ കുർബാന, 7.30ന് ആദ്യാക്ഷരം കുറിക്കൽ. പത്തിന് തിരുനാൾ കുർബാന. പന്ത്രണ്ട് വൈദികർക്കൊപ്പം കൂരിയ ബിഷപ് മാർ സെബാസ്റ്റ്യൻ വാണിയപ്പുരയ്ക്കൽ കാർമികത്വം വഹിക്കും. 12ന് പ്രദക്ഷിണം. തുടർന്ന് അപ്പവും മീനും നേർച്ചസദ്യ. ഒൻപതിനു രാവിലെ ആറിന് വിശുദ്ധ കുർബാന, സെമിത്തേരി സന്ദർശനം. മുണ്ടുപാലം കുരിശുപള്ളിയില്‍ പാലാ: മുണ്ടുപാലം കുരിശുപള്ളിയില്‍ വിശുദ്ധ അന്തോനീസിന്‍റെ തിരുനാളിന് ളാലം പഴയ പള്ളി വികാരി ഫാ. ജോസഫ് തടത്തില്‍ കൊടിയേറ്റി. 13 വരെ നവനാള്‍ നൊവേന നടത്തും. 13നാണ് പ്രധാന തിരുനാള്‍. ഞായറാഴ്ചകളില്‍ ഒഴികെ എല്ലാ ദിവസവും വൈകുന്നേരം അഞ്ചിന് ലദീഞ്ഞും വിശുദ്ധ കുര്‍ബാനയും നൊവേനയും ഉണ്ടായിരിക്കും.

സൗജന്യ മെഡിക്കല്‍ ക്യാമ്പ് ഇന്ന്

പൂവരണി: എസ്എംവൈഎം പാലാ രൂപതയും മാര്‍ സ്ലീവാ മെഡിസിറ്റിയും ചേര്‍ന്ന് പൂവരണി യൂണിറ്റിന്‍റെ ആഭിമുഖ്യത്തില്‍ പൊതുജനങ്ങള്‍ക്കായി പിഎഫ്ടി, ബ്ലഡ് ഗ്രൂപ്പിംഗ്, ഫൈബ്രോ സ്‌കാന്‍ എന്നീ ക്യാമ്പുകള്‍ നടത്തും. ഇന്നു രാവിലെ 9.30 മുതല്‍ ഉച്ചകഴിഞ്ഞ് 1.30 വരെ പൂവരണി പള്ളി പാരിഷ് ഹാളിലാണ് ക്യാമ്പ്. മാര്‍ സ്ലീവാ മെഡിസിറ്റിയിലെ പള്‍മണറി മെഡിസിന്‍, ഗാസ്‌ട്രോ എന്‍ററോളജി വിഭാഗങ്ങളിലെ വിദഗ്ധ ഡോക്ടര്‍മാര്‍ നേതൃത്വം നല്‍കും. ഫോൺ: 6282121879, 94461 87648. സൗജന്യ നേത്രചികിത്സാ ക്യാമ്പ് പൈക: ലയൺസ് ക്ലബ് പൈക സെൻട്രലിന്‍റെയും ഫാത്തിമ കണ്ണാശുപത്രിയുടെയും സംയുക്ത ആഭിമുഖ്യത്തിൽ നാളെ രാവിലെ 9.30ന് പൈക സെന്‍റ് ജോസഫ് പാരീഷ് ഹാളിൽ സൗജന്യ നേത്രചികിത്സാ ക്യാമ്പ് നടക്കും. പാലാ സർക്കിൾ ഇൻസ്പെക്ടർ പ്രിൻസ് ജോസഫ് ഉദ്ഘാടനം ചെയ്യും. ഫാ. മാത്യു വാഴക്കാപ്പാറയിൽ മുഖ്യപ്രഭാഷണം നടത്തും.

ഇന്‍ഡസ്ട്രി ഓണ്‍ കാമ്പസ് പദ്ധതി ഉദ്ഘാടനവും പരിസ്ഥിതി ദിനാഘോഷവും

പൂഞ്ഞാര്‍: പൂഞ്ഞാർ എൻജിനിയറിംഗ് കോളജിൽ കാമ്പസുകളെ വ്യവസായ യൂണിറ്റുകളുമായി ബന്ധിപ്പിക്കുന്നതിനായി ഐഎച്ച്ആര്‍ഡി വിഭാവനം ചെയ്തു നടത്തിവരുന്ന പദ്ധതിയായ ഇന്‍ഡസ്ട്രി ഓണ്‍ കാമ്പസ് പദ്ധതിയുടെ ഉദ്ഘാടനവും ജില്ലാതല പരിസ്ഥിതി ദിനാഘോഷവും ഇന്നു വൈകുന്നേരം നാലിന് കോളജ് സെമിനാര്‍ ഹാളില്‍ നടത്തും. മന്ത്രി വി.എന്‍. വാസവന്‍ ഇന്‍ഡസ്ട്രി ഓണ്‍ കാമ്പസിന്‍റെ ഉദ്ഘാടനം നിര്‍വഹിക്കും. സെബാസ്റ്റ്യന്‍ കുളത്തുങ്കല്‍ എംഎല്‍എ, ഐഎച്ച്ആര്‍ഡി ഡയറക്ടര്‍ ഡോ. വി.എ. അരുണ്‍ കുമാര്‍, ബ്ലോക്ക് പഞ്ചായത്ത് മെംബര്‍ അഡ്വ. അക്ഷയ് ഹരി, പൂഞ്ഞാര്‍ തെക്കേക്കര പഞ്ചായത്ത് പ്രസിഡന്‍റ് ജോര്‍ജ് മാത്യു അത്യാലില്‍, വാര്‍ഡ് മെംബര്‍ സജി സിബി, ഹരിത കേരളം മിഷന്‍ സംസ്ഥാന അസി. കോ-ഓര്‍ഡിനേറ്റര്‍ എസ്.യു. സഞ്ജീവ് തുടങ്ങിയവര്‍ പ്രസംഗിക്കും.

കേരള എൻജിഒ യൂണിയൻ മിയാവാക്കി വനം രൂപപ്പെടുത്തുന്നു

കോട്ടയം: എൻജിഒ യൂണിയൻ ജില്ലാ കമ്മിറ്റിയുടെ ആഭിമുഖ്യത്തിൽ ഇന്ന് പരിസ്ഥിതി ദിനത്തോടനുബന്ധിച്ച് കളത്തൂർ ഗവ. യുപി സ്കൂളിൽ മിയാവാക്കി വനം രൂപപ്പെടുത്തുന്നു. ഉഴവൂർ ബ്ലോക്ക് പഞ്ചായത്ത് പ്രസിഡന്‍റ് രാജു ജോൺ പരിപാടി ഉദ്ഘാടനം ചെയ്യും. കുറവിലങ്ങാട് പഞ്ചായത്ത് പ്രസിഡന്‍റ് മിനി മത്തായി വൃക്ഷത്തൈ നടും. കോട്ടയം കളക്ടറേറ്റിൽ ജില്ലാ കളക്ടർ പരിസ്ഥിതിദിന പരിപാടികൾ ഉദ്ഘാടനം ചെയ്യും.

കാർ റോഡരികിലെ ഓടയിലേക്ക് മറിഞ്ഞ് യുവതി മരിച്ചു

രാമപുരം: പാലാ-തൊടുപുഴ റോഡില്‍ കുറിഞ്ഞിക്ക് സമീപം ചൂരപ്പട്ട വളവിനും കുഴിവേലി വളവിനും ഇടയില്‍ നിയന്ത്രണംവിട്ട കാർ ഓടയിലേയ്ക്ക് വീണ് യുവതി മരിച്ചു. ആർപ്പൂക്കര കരിപ്പൂത്തട്ട് കൊട്ടാരത്തിൽ ജോസ്‌ന(37) യാണ് മരിച്ചത്. ഡ്രൈവര്‍ അയ്മനം ചിദംബരം വീട്ടിൽ രഞ്‌ജിത്ത്(35), ആർപ്പൂക്കര കുന്നുകാലയിൽ നീതു സനീഷ് (36), വാഹന ഉടമ കാണക്കാരി എസ്ബിഐക്ക് സമീപം മാലിപ്പറമ്പ് വീട്ടിൽ ജോജോ (32) എന്നിവരെ പരിക്കുകളോടെ തൊടുപുഴയിലുള്ള സ്വകാര്യ ആശുപത്രിയില്‍ പ്രവേശിപ്പിച്ചു. ഡ്രൈവറടക്കം നാല് പേരാണ് വാഹനത്തില്‍ ഉണ്ടായിരുന്നത്. നീതുവിന്‍റെ നില ഗുരുതരമായതിനാല്‍ ഐസിയുവിലാണ്. തൊടുപുഴ ഭാഗത്തുനിന്നു പാലാ ഭാഗത്തേക്ക് പോവുകയായിരുന്ന കാറാണ് ഇന്നലെ വൈകുന്നേരം ആറിന് അപകടത്തില്‍പ്പെട്ടത്. അമിത വേഗത്തിലെത്തിയ കാര്‍ റോഡിന് സൈഡിലെ ഓടയിലേയ്ക്ക് വീണ് ഓടയിലൂടെ 100 മീറ്ററോളം തെന്നി ഇടിച്ച് നില്‍ക്കുകയായിരുന്നു. ജെസിബി ഉപയോഗിച്ച് കാര്‍ പുറത്തെടുത്ത ശേഷമാണ് കാറില്‍ കുടുങ്ങിക്കിടന്ന ജോസ്‌നയെ പുറത്തേയ്ക്ക് എടുത്തത്. നാലുപേരും മെഡിക്കൽ റെപ്രസെൻറേറ്റീവ്മാരാണ്. പ്രവിത്താനത്തും തൊടുപുഴയിലുമുള്ള സ്വകാര്യ ആശുപത്രികളിൽ ജോലി കഴിഞ്ഞതിന് ശേഷം തിരികെ പോകുമ്പോഴായിരുന്നു അപകടം.

ആശാ വര്‍ക്കര്‍മാരോട് സര്‍ക്കാര്‍ കാട്ടുന്നത് കടുത്ത അനീതി: ജോസഫ് എം. പുതുശേരി

ചങ്ങനാശേരി: മര്യാദയോ മനുഷ്യപ്പറ്റോ ലവലേശം പോലുമില്ലാതെ വൈരനിര്യാതന ബുദ്ധിയോടുകൂടിയാണ് സര്‍ക്കാര്‍ ആശവര്‍ക്കര്‍മാരോട് പെരുമാറുന്നതെന്നും അതിന്‍റെ ഒടുവിലത്തെ ഉദാഹരണമാണ് പരിമിതമായ ഓണറേറിയം പോലും വെട്ടിക്കുറയ്ക്കുന്നതരത്തിലുള്ള നിബന്ധനകളെന്നും കേരള കോണ്‍ഗ്രസ് വൈസ് ചെയര്‍മാന്‍ ജോസഫ് എം. പുതുശേരി. ആശ ഹെല്‍ത്ത് വര്‍ക്കേഴ്‌സ് അസോസിയേഷന്‍ ജനറല്‍ സെക്രട്ടറി എം.എ. ബിന്ദു നയിക്കുന്ന രാപകല്‍ സമര യാത്രയ്ക്ക് ചങ്ങനാശേരിയില്‍ നല്‍കിയ സ്വീകരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. സ്വാഗത സംഘം ചെയര്‍മാന്‍ ബാബു കുട്ടന്‍ചിറ അധ്യക്ഷത വഹിച്ചു. കെഎസ്ആര്‍ടിസി ജംഗ്ഷനില്‍നിന്നാരംഭിച്ച റാലി കേരള കോണ്‍ഗ്രസ് ഉന്നതാധികാരിസമിതി അംഗം വി.ജെ. ലാലി ഉദ്ഘാടനം ചെയ്തു. ബി. രാധാകൃഷ്ണമേനോന്‍, സലിം പി. മാത്യു, പി.എച്ച്. നാസര്‍, പി.എന്‍. നൗഷാദ്, സാബു മുല്ലശേരി, പ്രഫ. ഗോപാലകൃഷ്ണപണിക്കര്‍, തോമസ് അക്കര, തോമസ് കെ. മാറാട്ടുകളം എന്നിവര്‍ പ്രസംഗിച്ചു.

മാടപ്പള്ളിയില്‍ വീട്ടമ്മ മുറിയില്‍ മരിച്ചനിലയില്‍ കാണപ്പെട്ട സംഭവം കൊലപാതകം; ഭര്‍ത്താവ് അറസ്റ്റില്‍

മാടപ്പള്ളി: മാടപ്പള്ളി അഴകാത്തുപടി ഭാഗത്ത് കാലായില്‍ കണ്ണമ്പള്ളില്‍ മല്ലിക (45)യെ മുറിയില്‍ മരിച്ചനിലയില്‍ കാണപ്പെട്ട സംഭവം പോലീസ് അന്വേഷണത്തില്‍ കൊലപാതകമെന്ന് തെളിഞ്ഞു. ഭര്‍ത്താവ് അനീഷ് (41) അറസ്റ്റിലായി. കഴിഞ്ഞ ഏപ്രില്‍ 28നാണ് മല്ലികയെ വീടിന്‍റെ മുറിക്കുള്ളില്‍ മരിച്ച നിലയില്‍ കാണപ്പെട്ടത്. അന്ന് തൃക്കൊടിത്താനം പോലീസ് അസ്വാഭാവിക മരണത്തിനു കേസെടുത്തിരുന്നു. മൃതദേഹത്തിന്‍റെ ഇന്‍ക്വസ്റ്റ് സമയത്ത് അന്വേഷണ ഉദ്യോഗസ്ഥനായ തൃക്കൊടിത്താനം പോലീസ് ഇന്‍സ്‌പെക്ടര്‍ എം.ജെ. അരുണിനു തോന്നിയ സംശയങ്ങള്‍ മൃതശരീരം പോസ്റ്റ്‌മോര്‍ട്ടം നടത്തിയ ഫോറന്‍സിക് സര്‍ജനുമായി പങ്കുവച്ചിരുന്നു. അന്നുതന്നെ ഭര്‍ത്താവ് അനിലിനെ കസ്റ്റഡിയില്‍ എടുത്ത് ചോദ്യം ചെയ്തിരുന്നെങ്കിലും ഭാര്യ ആത്മഹത്യ ചെയ്തതാണെന്ന വാദത്തില്‍ ഇയാള്‍ ഉറച്ചുനിന്നു. താനും ഭാര്യയുമായി സാമ്പത്തിക കാര്യങ്ങളെ ചൊല്ലി വഴക്കുണ്ടാകാറുണ്ടെന്ന് ഇയാള്‍ സമ്മതിച്ചിരുന്നു. തുടര്‍ന്ന് പോസ്റ്റ്‌മോര്‍ട്ടം റിപ്പോര്‍ട്ടില്‍ കഴുത്തിനു ചുറ്റും ഏല്‍പ്പിച്ച ശക്തമായ ബലപ്രയോഗമാണ് മരണകാരണമെന്ന് ഡോ. നീതു എം. ബാബുവിന്‍റെ കണ്ടെത്തലിനെത്തുടര്‍ന്ന് അനീഷിനെ വീണ്ടും കസ്റ്റഡിയിലെടുത്തു. വിശദമായ ചോദ്യം ചെയ്യലില്‍ താനും ഭാര്യയുമായി അന്നേ ദിവസം വഴക്കുണ്ടായെന്നും നിലത്തുവീണ ഭാര്യയുടെ കഴുത്തു ഞെരിച്ചു കൊലപ്പെടുത്തിയെന്നും പോലീസിനെ തെറ്റിധരിപ്പിക്കാന്‍ കഴുത്തില്‍ മുറിവുണ്ടാക്കിയെന്നും പ്രതി സമ്മതിച്ചു. പ്രതിയെ റിമാന്‍ഡ് ചെയ്തു.

പറാല്‍ പ്രദേശങ്ങളിലെ ജനങ്ങളും ബുദ്ധിമുട്ടില്‍

വണ്ടിപ്പേട്ട- പറാല്‍-കുമരങ്കരി റോഡിന്‍റെ വാഴപ്പള്ളി പടിഞ്ഞാറ് കൃഷിഭവന്‍, കുമരങ്കരി ശ്മശാനം, കള്ളുഷാപ്പ് ഭാഗങ്ങളില്‍ വെള്ളക്കെട്ട് ഒഴിഞ്ഞിട്ടില്ല. നിര്‍ത്തിവച്ചിരുന്ന കെഎസ്ആര്‍ടിസി ബസ് സര്‍വീസ് പുനരാരംഭിച്ചിട്ടുണ്ട്. ഓട്ടോറിക്ഷയും ഇരുചക്രവാഹനങ്ങളും സഞ്ചാരം നടത്തുന്നില്ല. കുമരങ്കരി-കിടങ്ങറ റൂട്ടിലെ വെള്ളം നേരിയതോതില്‍ ഇറങ്ങിയിട്ടുണ്ട്. നൂറുകണത്തിനു കുടുംബങ്ങളാണ് ഈ മേഖലകളില്‍ ദുരിതത്തില്‍ കഴിയുന്നുത്. എസി റോഡ്- മേപ്രാല്‍ തിരുവല്ല റോഡിൽ ഗതാഗതം നിലച്ചിട്ട് ഒരാഴ്ച എസി റോഡിനെ മേപ്രാല്‍ വഴി തിരുവല്ലയുമായി ബന്ധിപ്പിക്കുന്ന റോഡിലെ ഗതാഗതം നിശ്ചലമായിട്ട് ഒരാഴ്ച പിന്നിടുന്നു. നാല് കിലോമീറ്ററോളം ദൂരംവരുന്ന റോഡിന്‍റെ ഭൂരിഭാഗവും വെള്ളത്തിലാണ്. 2005 കാലഘട്ടത്തില്‍ നിര്‍മാണം പൂര്‍ത്തിയാക്കിയ റോഡിന്‍റെ ഒരു കിലോമീറ്റര്‍ ദൂരം ഉയര്‍ത്തി നിര്‍മിച്ചിരുന്നു. ഈ റോഡില്‍ ഇപ്പോഴും അരയറ്റം വെള്ളമുണ്ടെന്നാണ് നാട്ടുകാര്‍ ചൂണ്ടിക്കാട്ടുന്നത്. റോഡിന്‍റെ പലഭാഗങ്ങളിലും പോളയും അടിഞ്ഞുകൂടിയിട്ടുണ്ട്. വെള്ളം ഇറങ്ങിത്തുടങ്ങിയെങ്കിലും പായിപ്പാട് പഞ്ചായത്ത് ഒന്നാംവാര്‍ഡില്‍പ്പെട്ട അറുനൂറില്‍ പുതുവല്‍, മൂലേല്‍ പുതുവല്‍, നക്രാല്‍ ഭാഗങ്ങളിലെ ദുരിതത്തിനു കുറവില്ല. റോഡിലും വീടുകളിലും വെള്ളക്കെട്ടായതിനാല്‍ കുട്ടികള്‍ക്ക് സ്‌കൂളുകലിലും മുതിർന്നവര്‍ക്ക് ജോലിക്കും പോകാന്‍ പറ്റാത്ത അവസ്ഥയാണ്. വള്ളമുള്ളവര്‍ മാത്രമാണ് പാടശേഖരങ്ങളും തോടുകളും കടന്ന് എസി റോഡിലെത്തി വിവിധ സ്ഥലങ്ങളിലേക്കു പോകുന്നത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact editor@deepika.com