ADVERTISEMENT

ADVERTISEMENT

പീഡനക്കേസില്‍ യുവാവ് അറസ്റ്റില്‍

പള്ളിക്കത്തോട്: പെണ്‍കുട്ടിയെ പീഡിപ്പിച്ച കേസില്‍ യുവാവിനെ പോലീസ് അറസ്റ്റ് ചെയ്തു. ആനിക്കാട്, ചല്ലോലി തെക്കേതകടിക്കല്‍ ടി.ആര്‍. അനന്തുകൃഷ്ണനെ (29) യാണ് പള്ളിക്കത്തോട് പോലീസ് അറസ്റ്റ് ചെയ്തത്.

ഇയാള്‍ പള്ളിക്കത്തോട് സ്വദേശിനിയായ പെണ്‍കുട്ടിയെ ഇവരുടെ വീട്ടില്‍ അതിക്രമിച്ചു കയറി ലൈംഗികമായി പീഡിപ്പിക്കുകയായിരുന്നു. പരാതിയെ തുടര്‍ന്ന് പള്ളിക്കത്തോട് പോലീസ് കേസ് രജിസ്റ്റര്‍ ചെയ്യുകയും ഇയാളെ പിടികൂടുകയുമായിരുന്നു.

ADVERTISEMENT

കരയാന്‍പോലുമാകാതെ നിഷ; അബിജയുടെ തേങ്ങല്‍ കണ്ണീർക്കടലായി

തോട്ടയ്ക്കാട്: അബിത പാര്‍വതിയുടെ മൃതദേഹത്തിനരികിലിരുന്ന് അനുജത്തി അബിജ അമ്മ നിഷയെയും അച്ഛന്‍ രമേശനെയും ആശ്വസിപ്പിക്കുന്ന കാഴ്ച അബിതയെ ഒരുനോക്കു കാണാന്‍ തിങ്ങിക്കൂടിയവരെ കണ്ണീരണിയിച്ചു. അപകടത്തില്‍ ഗുരുതരമായി പരിക്കേറ്റ് കോട്ടയം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചിരുന്ന ജിഷയെ മകളുടെ സംസ്‌കാര ചടങ്ങിന്‍റെ നേരത്താണ് തോട്ടയ്ക്കാട് മാടത്താനിയിലുള്ള വീട്ടിലെത്തിച്ചത്. മുഖത്തും തലയിലും താടിയെല്ലിലും ഗുരുതരമായി മുറിവും പരിക്കുമുള്ളതിനാല്‍ ബാൻഡേജ് ചുറ്റി വേദനയില്‍ പുളയുന്ന ജിഷയ്ക്ക് മകള്‍ അബിതയുടെ ചേതനയറ്റ ശരീരം കണ്ട് ഒന്നു കരയാനോ അന്ത്യചുംബനം നല്‍കാനോ സാധിക്കാത്ത അവസ്ഥയായിരുന്നു. മകള്‍ അബിജ ജിഷയെ ആശ്വസിപ്പിച്ചു. അബിജയെ യാത്രയാക്കാന്‍ കോരിച്ചൊരിയുന്ന മഴയെ അവഗണിച്ച് വടക്കേമുണ്ടയ്ക്കല്‍ വീട്ടിലെത്തിയത് സഹപാഠികളും അധ്യാപകരും ബന്ധുക്കളും മിത്രങ്ങളും അടക്കം എണ്ണമറ്റ ജനാവലിയാണ്. ജിഷ കുറുമ്പനാടം സെന്‍റ് ആന്‍റണീസ് എല്‍പി സ്‌കൂളിലെ അധ്യാപികയും രമേശന്‍ പൈലിക്കവലയില് ട്യൂഷന്‍ അധ്യാപകനുമാണ്. ഏകസഹോദരി അബിജ കറുകച്ചാല്‍ എന്‍എസ്എസ് ഹൈസ്‌കൂള്‍ വിദ്യാര്‍ഥിനിയാണ്.

പഠിച്ചുയരാനുള്ള ആഗ്രഹങ്ങള്‍ ബാക്കിയാക്കി അബിത പാര്‍വതി യാത്രയായി

ചങ്ങനാശേരി: പഠിച്ചുയരാനുള്ള വലിയ ആഗ്രഹം ബാക്കിനില്‍ക്കേ അബിത പാര്‍വതി ദുരിതങ്ങളില്ലാത്ത ലോകത്തേക്ക് പറന്നകന്നു. വ്യാഴാഴ്ച ഉച്ചകഴിഞ്ഞ് 3.30നാണ് അബിതയുടെ ഹയര്‍സെക്കന്‍ഡറി പരീക്ഷാ ഫലം അറിഞ്ഞത്. അബിതയുടെ വിജയത്തില്‍ വീട്ടുകാരും നാട്ടുകാരും ആഹ്ലാദത്തിലായിരുന്നു. അന്നു രാത്രി ഏഴോടെ അബിത കാറിടിച്ചു മരണപ്പെടുകയായിരുന്നു. അബിതയുടെ സംസ്കാരം ഇന്നലെ വൈകുന്നേരം നാലിന് തോട്ടയ്ക്കാട് മാടത്താനി വടയ്‌ക്കേമുണ്ടക്കല്‍ വളപ്പിൽ നടന്നു. തോട്ടയ്ക്കാട് മാടത്താനി വടയ്‌ക്കേമുണ്ടക്കല്‍ വി.ടി. രമേശന്‍-കെ.ജി. നിഷ ദമ്പതികളുടെ മകളാണ് അബിത പാര്‍വതി(18). തൃക്കോതമംഗലം ഹയര്‍സെക്കന്‍ഡറി സ്‌കൂളിലെ വിദ്യാര്‍ഥിനിയായിരുന്ന അബിത പരീക്ഷയില്‍ ഉയര്‍ന്ന മാര്‍ക്കോടെയാണ് വിജയിച്ചത്. വിജയം ആഘോഷിക്കുന്നതിനും അനുജത്തി അബിജയ്ക്ക് സ്‌കൂള്‍ബാഗും മറ്റും വാങ്ങുന്നതിനുമാണ് അബിത അമ്മ നിഷയ്‌ക്കൊപ്പം കോട്ടയം മാര്‍ക്കറ്റിലെത്തിയത്. കോട്ടയം മാര്‍ക്കറ്റില്‍ റോഡ് കുറുകെ കടക്കുമ്പോള്‍ ഇരുവരെയും കാറിടിച്ചു വീഴ്ത്തി. റോഡില്‍വീണ ഇരുവരെയും നാട്ടുകാരും വ്യാപാരികളും ചേര്‍ന്ന് കോട്ടയം ജനറല്‍ ആശുപത്രിയില്‍ എത്തിച്ചെങ്കിലും അബിതയുടെ ജീവന്‍ രക്ഷിക്കാനായില്ല. കോട്ടയം മെഡിക്കല്‍ കോളജ് ആശുപത്രിയില്‍ പോസ്റ്റുമോര്‍ട്ടം നടത്തി മൃതദേഹം ബന്ധുക്കള്‍ക്ക് വിട്ടുകൊടുക്കുകയായിരുന്നു. അപകടത്തില്‍ നിഷയ്ക്ക് മുഖത്തും തലയ്ക്കും ഗുരുതരമായി പരിക്കേറ്റിട്ടുണ്ട്. കോട്ടയം മെഡിക്കല്‍ കോളജ് ആശുപത്രിയില്‍ ചികിത്സയില്‍ കഴിയുന്ന നിഷയെ അബിതയുടെ സംസ്‌കാര ചടങ്ങിനായി വീട്ടില്‍ എത്തിച്ചു. ചാണ്ടി ഉമ്മന്‍ എംഎല്‍എ, ജോബ് മൈക്കിള്‍ എംഎല്‍എ, സിപിഎം ജില്ലാ സെക്രട്ടറി ടി.ആര്‍. രഘുനാഥന്‍, കെ.എം. രാധാകൃഷ്ണന്‍, വാകത്താനം പഞ്ചായത്ത് പ്രസിഡന്‍റ് ഗീതാ രാധാകൃഷ്ണന്‍, ജില്ലാ പഞ്ചായത്തംഗം സുധാ കുര്യന്‍ തുടങ്ങി രാഷ്ട്രീയ, സാമൂഹ്യരംഗത്തെ നിരവധിപ്പേര്‍ സംസ്‌കാര ചടങ്ങില്‍ പങ്കെടുത്തു.

കാലവര്‍ഷം ഉടന്‍: ജില്ലയില്‍ മൂന്നുദിവസം ഓറഞ്ച് അലര്‍ട്ട്

കോട്ടയം: കേരളത്തില്‍ തെക്കുപടിഞ്ഞാറന്‍ കാലവര്‍ഷം രണ്ടുദിവസത്തിനുള്ളില്‍ എത്തിച്ചേരാന്‍ സാധ്യതയെന്ന് കേന്ദ്ര കാലാവസ്ഥാ വകുപ്പ് അറിയിച്ചു. ഇന്നു മുതല്‍ ഏഴു ദിവസം വടക്കുപടിഞ്ഞാറന്‍ കാറ്റ് ശക്തമാകും. അതിശക്തമായ മഴയ്ക്കു സാധ്യതയുള്ളതിനാല്‍ ജില്ലയില്‍ 24, 25, 26 തീയതികളില്‍ കേന്ദ്ര കാലാവസ്ഥാ വകുപ്പ് ഓറഞ്ച് അലര്‍ട്ട് പ്രഖ്യാപിച്ചതായി ജില്ലാ കളക്ടര്‍ ജോണ്‍ വി. സാമുവല്‍ അറിയിച്ചു. ശക്തമായ മഴയ്ക്ക് സാധ്യതയുള്ളതിനാല്‍ 27ന് മഞ്ഞ അലര്‍ട്ടും പ്രഖ്യാപിച്ചിട്ടുണ്ട്. മധ്യകിഴക്കന്‍ അറബിക്കടലില്‍ വടക്കന്‍ കര്‍ണാടക -ഗോവ തീരത്തിന് മുകളിലായി രൂപപ്പെട്ട ന്യൂനമര്‍ദം ശക്തി കൂടിയ ന്യൂനമര്‍ദമായി മാറി. വടക്കോട്ടു നീങ്ങുന്ന ന്യൂനമര്‍ദം തീവ്ര ന്യൂനമര്‍ദമായി ശക്തിപ്രാപിക്കാന്‍ സാധ്യതയുണ്ടെന്നും കേന്ദ്ര കാലാവസ്ഥാ വകുപ്പ് അറിയിച്ചു.

വിദ്യാര്‍ഥികളുടെ കണ്‍സഷന്‍ കാര്‍ഡുകള്‍ മൂന്നുമാസത്തിനകം വിതരണം ചെയ്യും

കോട്ടയം: വിദ്യാര്‍ഥികള്‍ക്ക് സ്വകാര്യബസുകളില്‍ യാത്ര ചെയ്യാനുള്ള കണ്‍സഷന്‍ കാര്‍ഡുകള്‍ മൂന്നുമാസത്തിനുള്ളില്‍ വിതരണം ചെയ്യാന്‍ സ്റ്റുഡന്‍റ്സ് ട്രാവല്‍ ഫെസിലിറ്റി കമ്മിറ്റി യോഗത്തില്‍ തീരുമാനം. കാര്‍ഡുകളുടെ വിതരണം പൂര്‍ത്തിയാകുന്നതുവരെ വിദ്യാഭ്യാസ സ്ഥാപനങ്ങളുടെ തിരിച്ചറിയല്‍ കാര്‍ഡ് ഉപയോഗിച്ച് കണ്‍സഷനോടെ യാത്ര ചെയ്യാം. യൂണിഫോമിട്ട വിദ്യാര്‍ഥികള്‍ക്കും കണ്‍സഷന്‍ കാര്‍ഡ് ലഭിക്കുന്നതുവരെ കണ്‍സഷന്‍ അനുവദിക്കും. രാവിലെ ഏഴുമുതല്‍ വൈകിട്ട് ഏഴുവരെയാണ് കണ്‍സഷന്‍ അനുവദിക്കുന്നത്. വൈകിട്ട് ഏഴിന് മുമ്പ് യാത്ര ആരംഭിക്കുന്നവര്‍ക്ക് കണ്‍സഷന് അര്‍ഹതയുണ്ട്. 27 വയസാണ് ഉയര്‍ന്ന പ്രായപരിധി. 40 കിലോമീറ്ററാണ് യാത്ര ചെയ്യാവുന്ന പരമാവധി ദൂരം. സര്‍ക്കാര്‍, എയ്ഡഡ് സ്ഥാപനങ്ങളില്‍ പഠിക്കുന്നവര്‍ക്കും സര്‍ക്കാര്‍ അംഗീകൃത സ്ഥാപനങ്ങളില്‍ പഠിക്കുന്നവര്‍ക്കും കണ്‍സഷന്‍ അനുവദിക്കും. കാര്‍ഡുകള്‍ ഡിജിറ്റൈസ് ചെയ്യുന്നതടക്കം വിദ്യാര്‍ഥി പ്രതിനിധികള്‍ ഉന്നയിച്ച കാര്യങ്ങള്‍ നടപ്പാക്കുന്ന കാര്യം പരിഗണിക്കുമെന്ന് ജില്ലാ കളക്ടര്‍ പറഞ്ഞു. ബസ് ജീവനക്കാരും വിദ്യാര്‍ഥികളും തമ്മില്‍ സൗഹാര്‍ദപരമായ അന്തരീക്ഷം ഉറപ്പുവരുത്താന്‍ ബസുടമകളും വിദ്യാര്‍ഥി യൂണിയന്‍ നേതാക്കളും ശ്രദ്ധിക്കണമെന്ന് കളക്ടര്‍ നിര്‍ദേശിച്ചു. ജില്ലാ കളക്ടര്‍ ജോണ്‍ വി. സാമുവല്‍ അധ്യക്ഷത വഹിച്ച യോഗത്തില്‍ ആര്‍ടിഒ കെ. അജിത്കുമാര്‍, ഡിവൈഎസ്പി സാജു വര്‍ഗീസ്, കെഎസ്ആര്‍ടിസി ഡിടിഒ പി. അനില്‍കുമാര്‍, പാലാ എഎംവിഐ ജിനു ജേക്കബ്, സ്വകാര്യ ബസ് ഉടമാ അസോസിയേഷനുകളുടെ ഭാരവാഹികൾ, വിദ്യാര്‍ഥി സംഘടനാ പ്രതിനിധികൾ എന്നിവര്‍ പങ്കെടുത്തു.

കോട്ടയം ഡിടിപിസി ഡിജിറ്റൈസ്ഡ് പേയ്‌മെന്‍റ് ഉദ്ഘാടനം

കോട്ടയം: ഡിടിപിസി കോട്ടയവും സൗത്ത് ഇന്ത്യൻ ബാങ്കും സഹകരിച്ച് ഇല്ലിക്കൽക്കല്ല്, അരുവിക്കുഴി തുടങ്ങി ജില്ലയിലെ എല്ലാ ഡിടിപിസി കേന്ദ്രങ്ങളിലും ഡിജിറ്റൈസ്ഡ് പേയ്‌മെന്‍റ് സംവിധാനം ജില്ലാ കളക്ടർ ജോൺ വി. സാമുവൽ ഉദ്ഘാടനം ചെയ്തു. ഡിടിപിസി കോട്ടയം സെക്രട്ടറി ആതിര, സൗത്ത് ഇന്ത്യൻ ബാങ്ക് കോട്ടയം റീജണൽ ഹെഡ് വി.എൻ. പ്രദീപ്, ക്ലസ്റ്റർ ഹെഡ് സുനിറ്റ് മാത്യു, ബ്രാഞ്ച് മാനേജർ സബിത മുരളി, സ്റ്റാഫ്‌ അംഗങ്ങളായ ജോർജ്, അഖിലേഷ്, ജിതിൻ, കരുൺ എന്നിവർ സംബന്ധിച്ചു.

റവ. ഡോ. മാത്യു കോയിക്കല്‍ രജത ജൂബിലി ആഘോഷം

കരിമ്പാനി: ഭാരതീയ കത്തോലിക്കാ മെത്രാന്‍ സമിതി (സിബിസിഐ) യുടെ ഡെപ്യൂട്ടി സെക്രട്ടറി ജനറല്‍ റവ. ഡോ. മാത്യു കോയിക്കലിന്‍റെ പൗരോഹിത്യ രജത ജൂബിലി ആഘോഷം കരിമ്പാനി ദിവ്യകാരുണ്യ ദേവാലയത്തില്‍ ഇന്ന് ആഘോഷിക്കും. രാവിലെ 10.30ന് വിശുദ്ധ കുര്‍ബാനയും തുടര്‍ന്ന് അനുമോദന സമ്മേളനവും നടക്കും. പാലാ രൂപതയിലെ മൂഴൂര്‍ ഇടവകയില്‍ കോയിക്കല്‍ ജോസഫ് - മേരി ദമ്പതികളുടെ മൂത്ത മകനായി ജനിച്ച ഇദ്ദേഹം 2000 മേയ് 31ന് വൈദികപട്ടം സ്വീകരിച്ചു. ഡല്‍ഹി അതിരൂപതയിലെ വിവിധ ഇടവകകളില്‍ വികാരിയായും അതിരൂപത ചാന്‍സലര്‍, അതിരൂപത ജുഡീഷല്‍ വികാര്‍, അതിരൂപത സെക്രട്ടറി, അതിരൂപത മെത്രാപ്പോലീത്തയുടെ ആലോചനാസമിതി അംഗം എന്നീ നിലകളില്‍ പ്രവര്‍ത്തിച്ചു. നിലവില്‍ ഭാരതീയ മെത്രാന്‍ സമിതിയുടെ ഡെപ്യൂട്ടി സെക്രട്ടറി ജനറലായി സേവനം ചെയ്യുന്നതോടൊപ്പം,ന്യൂഡല്‍ഹിയിലെ സിബിസിഐ സെന്‍റര്‍ ഡയറക്ടര്‍, കാരിത്താസ് ഇന്ത്യയുടെ ഇടക്കാല അഡ്മിനിസ്‌ട്രേറ്റര്‍, ഡല്‍ഹി അതിരൂപത കച്ചേരിയുടെ ജുഡീഷല്‍ വികാരി എന്നീ നിലകളിലും പ്രവര്‍ത്തിക്കുന്നു.

കോട്ടയത്ത് കോവിഡ് കേസുകൾ വർധിക്കുന്നു

കോട്ടയം: കോട്ടയം വിട്ടുപോകാതെ കോവിഡ് പിന്നെയും ഭീഷണി ഉയര്‍ത്തുന്നു. സംസ്ഥാനത്ത് ഈയിടെ റിപ്പോര്‍ട്ട് ചെയ്ത 182 കോവിഡ് കേസുകളില്‍ അറുപതും കോട്ടയത്താണ്. കിഴക്കന്‍ മലയോരങ്ങളില്‍ ഡെങ്കിപ്പനി ബാധിതരില്‍ കോവിഡും ബാധിച്ചതായി റിപ്പോർട്ട് ചെയ്തു. വാക്‌സിനേഷന്‍ എടുത്തവരില്‍ മൂന്നാം തവണയും കോവിഡ് ബാധയുണ്ടായി എന്നത് ആശങ്ക ഉയർത്തുന്നു. ഹോങ്കോംഗ്, സിംഗപ്പൂര്‍, തായ്‌ലാന്‍ഡ്, മലേഷ്യ ഉള്‍പ്പെടെ രാജ്യങ്ങളില്‍ കോവിഡ് കേസുകള്‍ വ്യാപകമായി റിപ്പോര്‍ട്ട് ചെയ്യുന്നതിനൊപ്പമാണ് കോട്ടയത്തും വ്യാപനം. ഇപ്പോള്‍ വ്യാപിച്ചിരിക്കുന്ന ഒമിക്രോണ്‍ ജെഎന്‍ 1 വകഭേദങ്ങളായ എല്‍എഫ് 7, എന്‍ബി 1.8 എന്നിവയ്ക്ക് രോഗവ്യാപന ശേഷി കൂടുതലാണ്. എന്നാല്‍ തീവ്രത കൂടുതലല്ലാത്തതിനാല്‍ ആശങ്ക വേണ്ടെന്നാണ് ആരോഗ്യവകുപ്പ് പറയുന്നത്. ജലദോഷം, തൊണ്ടവേദന, ചുമ, ശ്വാസതടസം തുടങ്ങിയവ ഉള്ളവര്‍ നിര്‍ബന്ധമായും മാസ്‌ക് ധരിക്കണം. പ്രായമായവരും ഗര്‍ഭിണികളും ഗുരുതര രോഗമുള്ളവരും പൊതു ഇടങ്ങളിലും യാത്രകളിലും മാസ്‌ക് ധരിക്കുന്നത് സുരക്ഷിതം. ആശുപത്രികളില്‍ മാസ്‌ക് നിര്‍ബന്ധമാക്കിയിട്ടുണ്ട്. ആരോഗ്യ പ്രവര്‍ത്തകരും മാസ്‌ക് ധരിക്കണം. അനാവശ്യ യാത്രകള്‍ ഒഴിവാക്കാനും ഇടയ്ക്കിടെ സോപ്പോ സാനിറ്റൈസറോ ഉപയോഗിച്ച് കൈ കഴുകാനും നിര്‍ദേശമുണ്ട്. രോഗലക്ഷണമുള്ളവര്‍ക്ക് കോവിഡ് പരിശോധന നടത്താനും ആര്‍ടിപിസിആര്‍ കിറ്റുകളും മറ്റ് സുരക്ഷാ ഉപകരണങ്ങളും ഉറപ്പാക്കാനും ആശുപത്രികള്‍ക്ക് നിര്‍ദേശമുണ്ട്.

മാര്‍ മാത്യു മാക്കീലിന്‍റെ ധന്യപദവി ചങ്ങനാശേരി അതിരൂപതയ്ക്കു ധന്യനിമിഷം: മാര്‍ തോമസ് തറയില്‍

ചങ്ങനാശേരി: ചങ്ങനാശേരി വികാരിയാത്തിന്‍റെ വികാരി അപ്പസ്‌തോലിക്കയായി 1896 മുതല്‍ 1911 വരെ അജപാലന ശുശ്രൂഷ നിര്‍വഹിച്ച മാര്‍ മാത്യു മാക്കീലിനെ ധന്യപദവിയിലേക്കുയര്‍ത്തുന്നത് വളരെ സന്തോഷത്തോടെയാണ് ശ്രവിച്ചതെന്നും ഇതു ചങ്ങനാശേരി അതിരൂപതയ്ക്കു ധന്യ നിമിഷമാണെന്നും ആര്‍ച്ച്ബിഷപ് മാര്‍ തോമസ് തറയില്‍. പുണ്യചരിതരായ പിതാക്കന്മാരാല്‍ നയിക്കപ്പെടാന്‍ ഭാഗ്യം സിദ്ധിച്ച രൂപതയാണ് ചങ്ങനാശേരി അതിരൂപത. അതിരൂപതയുടെ മുന്‍ അധ്യക്ഷന്മാരായ മാര്‍ തോമസ് കുര്യാളശേരി ധന്യപദവിയിലേക്കും മാര്‍ മാത്യു കാവുകാട്ട് ദൈവദാസപദവിയിലേക്കും ഉയര്‍ത്തപ്പെട്ടിട്ടുണ്ട്. മൂവരും വിശുദ്ധപദവിയിലേക്ക് ഉടന്‍ എത്തിച്ചേരട്ടെ എന്നു പ്രാര്‍ഥിക്കുന്നു. ആരാധനാ സന്യാസിനീ സമൂഹം, തിരുഹൃദയ സന്യാസിനീ സമൂഹം എന്നിവ രൂപമെടുത്തതും മാര്‍ മാക്കീലിന്‍റെ കാലത്തായിരുന്നു. വികാരിയാത്തിനു കൃത്യമായ നിയമാവലിയായ ദെക്രേത്തു പുസ്തകത്തിന്‍റെ രൂപീകരണം മാര്‍ മാക്കീലിന്‍റെ വലിയൊരു സംഭാവനയാണ്. ബാലാരിഷ്ടതകളുള്ള രണ്ടു വികാരിയാത്തുകളെ നയിക്കുകയെന്ന വളരെ ക്ലേശകരമായ ദൗത്യമാണ് അദ്ദേഹം നിര്‍വഹിച്ചതെന്നും ആര്‍ച്ച്ബിഷപ് അനുസ്മരിച്ചു.

പഞ്ചായത്ത്‍ വാര്‍ഡ് വിഭജനം പൂര്‍ത്തിയായി; അന്തിമ പട്ടിക പ്രസിദ്ധീകരിച്ചു

കോട്ടയം: തദ്ദേശ തെരഞ്ഞെടുപ്പിനു മുന്നോടിയായി വാര്‍ഡ് വിഭജനം പൂര്‍ത്തിയാക്കി ജില്ലയില്‍ അന്തിമ പട്ടിക പ്രസിദ്ധീകരിച്ചു. ജില്ലയിലെ 71 പഞ്ചായത്തുകളിലെ അന്തിമ വാര്‍ഡുപട്ടിക പ്രസിദ്ധീകരിച്ചപ്പോള്‍ 1223 വാര്‍ഡുകളാണ് പഞ്ചായത്തുകളിലുള്ളത്. 1140 വാര്‍ഡുകളില്‍ നിന്നാണ് 1223 വാര്‍ഡുകളായി വര്‍ധിച്ചത്. ഒരു വാര്‍ഡ് വീതം വര്‍ധിച്ച 53 പഞ്ചായത്തുകളും രണ്ടു വാര്‍ഡുകള്‍ വീതം കൂടിയ 15 പഞ്ചായത്തുകളും വാര്‍ഡുകളുടെ എണ്ണത്തില്‍ മാറ്റമില്ലാത്ത മൂന്നു പഞ്ചായത്തുകളുമാണുള്ളത്. പഞ്ചായത്തുകളുടെ അന്തിമ പട്ടിക പ്രസിദ്ധീകരിച്ചതോടെ ഈ മാസംതന്നെ നഗരസഭകളിലെ വാര്‍ഡു വിഭജനവും പൂര്‍ത്തിയാക്കി പട്ടിക പ്രസിദ്ധീകരിക്കും. രണ്ടാം ഘട്ടമായി ബ്ലോക്ക് പഞ്ചായത്തുകളുടെയും ജില്ലാ പഞ്ചായത്തിന്‍റെയും വാര്‍ഡ് വിഭജനം നടത്തും. ഇതു പൂര്‍ത്തിയാകണമെങ്കില്‍ ഒരു മാസം എടുക്കും. പഞ്ചായത്തുകളെ അപേക്ഷിച്ച് ബ്ലോക്ക്, ജില്ലാ പഞ്ചായത്തുകളില്‍ തര്‍ക്കം കുറവായിരിക്കും. പഞ്ചായത്ത് വാര്‍ഡുകള്‍ ബ്ലോക്കിലേക്കും ബ്ലോക്കിലെ വാര്‍ഡുകള്‍ ജില്ലയിലേക്കും ക്രമീകരിച്ചാണ് വിഭജനം നടത്തുക. തര്‍ക്കങ്ങളും പരാതികളും പരിഹരിച്ച് പഞ്ചായത്ത് വാര്‍ഡ് വിഭജനം പൂര്‍ത്തിയാക്കിയതിനാല്‍ ബ്ലോക്കിലും ജില്ലയിലും തര്‍ക്കമുണ്ടാകാനിടയില്ല. വിഭജനം പൂര്‍ത്തിയായാല്‍ വീടുകളുടെയും കെട്ടിടങ്ങളുടെയും നമ്പറുകളിലും മാറ്റമുണ്ടാകും. തുടര്‍ന്ന് പോളിംഗ് സ്‌റ്റേഷനുകള്‍ നിശ്ചയിച്ച് വോട്ടര്‍ പട്ടിക ക്രമീകരണത്തിലേക്ക് കടക്കുന്നതോടെ തെരഞ്ഞെടുപ്പ് നടപടികളിലേക്ക് കടക്കും. രണ്ടു വാര്‍ഡുകള്‍ വീതം കൂടിയ പഞ്ചായത്തുകള്‍-15 (പഞ്ചായത്ത്, ആകെ വാര്‍ഡ്, പുതിയ വാര്‍ഡിന്‍റെ പേര്, നമ്പര്‍ ക്രമത്തില്‍) അതിരമ്പുഴ-24, ചെത്തിത്തോട്-നാല്, അടിച്ചിറ-14 ചിറക്കടവ്-22, മണ്ണാര്‍ക്കയം ഏഴ്,20-ാംമൈല്‍ -22 കാണക്കാരി-17, ചാത്തമല-16, കാണക്കാരി-17 കരൂര്‍-17, വലവൂര്‍ സെന്‍ട്രല്‍ -15, ചെറുകര-12 കൂരോപ്പട-19, പങ്ങട-14, കൂരോപ്പട ടൗണ്‍-18 കുറിച്ചി-22, കല്ലുകടവ്-11, ഫ്രഞ്ചുമുക്ക്-17 മാടപ്പള്ളി-22, കരിക്കണ്ടം-14, വട്ടച്ചല്‍പടി-21 മണര്‍കാട്-19, ചേലക്കുന്ന്-അഞ്ച്, നരിമറ്റം-17 മുണ്ടക്കയം-23, വണ്ടന്‍പതാല്‍ ഈസ്റ്റ്-ഏഴ്, അസംബനി-09 പള്ളിക്കത്തോട്-15, പള്ളിക്കത്തോട് സെന്‍ട്രല്‍ -14, മന്ദിരം -09 പാറത്തോട്-21, ചിറ്റടി -അഞ്ച്, വണ്ടന്‍പാറ-19 തലയോലപ്പറമ്പ്-17, തലപ്പാറ-എട്ട്, സിയോന്‍കവല-ഒമ്പത് തിടനാട്-15, കാവുംകുളം-നാല്, പിണ്ണാക്കനാട്-10 തൃക്കൊടിത്താനം-22, ചാപ്രത്ത്പടി-ആറ്, ചാഞ്ഞോടി-15 വാഴൂര്‍-18, പാണപുഴ-മൂന്ന്, ഉള്ളായം-12 ഒരു വാര്‍ഡ് വീതം വര്‍ധിച്ച പഞ്ചായത്തുകള്‍-53 (പഞ്ചായത്ത്, ആകെ വാര്‍ഡ്, പുതിയ വാര്‍ഡിന്‍റെ പേര്, നമ്പര്‍ ക്രമത്തില്‍) അയ്മനം-21, കൊമ്പനാല്‍-12 ആര്‍പ്പൂക്കര-17, പഞ്ചായത്ത്- ഏഴ് അയര്‍ക്കുന്നം-21, പാറപ്പുറം-13 ഭരണങ്ങാനം -14, ചൂണ്ടച്ചേരി-ഏഴ് ചെമ്പ്-16, വേമ്പനാട് -16 എലിക്കുളം-17, മഹാത്മ നഗര്‍-13 എരുമേലി-24, മണിപ്പുഴ-20 കടനാട്-15, വാളികുളം- ഒമ്പത് കടപ്ലാമറ്റം-14, ഞരളപ്പുഴ-12 കടുത്തുരുത്തി-20, ഗവ. ഐടിഐ-13 കല്ലറ-14, കുരിശുപള്ളി ഭാഗം- ഏഴ് കങ്ങഴ-16, കാഞ്ഞിരപ്പാറ-രണ്ട് കാഞ്ഞിരപ്പള്ളി-24, കടമപ്പുഴ-22 കറുകച്ചാല്‍-17,കൊച്ചിക്കാല-11 കിടങ്ങൂര്‍-16, പുഞ്ചപ്പാടം-15 കൂട്ടിക്കല്‍-14, വെട്ടിക്കാനം-11 കോരുത്തോട്-14, അടുപ്പുകല്ലേല്‍ പടി- 05 കൊഴുവനാല്‍-14, മോനിപ്പള്ളി-നാല് കുറവിലങ്ങാട്-15, കാളിയാര്‍ തോട്ടം-15 മണിമല-16, കറിക്കാട്ടൂര്‍ നോര്‍ത്ത്-16 മാഞ്ഞൂര്‍-19, കോതനല്ലൂര്‍ ടൗണ്‍ -ഒമ്പത് മരങ്ങാട്ടുപള്ളി-15, മരങ്ങാട്ടുപള്ളി -ഒമ്പത് മറവന്‍തുരുത്ത്-16, വടക്കേക്കാട്-15 മീനച്ചില്‍ -14, വിലങ്ങുപാറ- നാല് മേലുകാവ്-14, കുരിശുങ്കല്‍-13 മൂന്നിലവ്-14, നരിമറ്റം- ഏഴ് മുളക്കുളം-18, മനയ്ക്കപടി-18 മുത്തോലി-14, മുത്തോലി സൗത്ത്-11 നെടുംകുന്നം-16, തൊട്ടിക്കല്‍-16 ഞീഴൂര്‍-15, പിഎച്ച്സി ഭാഗം-15 പായിപ്പാട്-17, സിഎംഎസ് എല്‍പിഎസ്- 07 പാമ്പാടി-21, കുന്നേല്‍പീടിക -മൂന്ന് പനച്ചിക്കാട്-24, സായിപ്പുകവല-17 പൂഞ്ഞാര്‍-14, പെരുനിലം വെസ്റ്റ്-14 പൂഞ്ഞാര്‍ തെക്കേക്കര-15, പാലത്തിങ്കല്‍-15 പുതുപ്പള്ളി-19, അങ്ങാടി-14 രാമപുരം-19, രാമപുരം ടൗണ്‍ ഈസ്റ്റ്-ഏഴ് ടിവിപുരം-15, സരസ്വതികുളം-13 തീക്കോയി-14, പഞ്ചായത്ത് ജംഗ്ഷന്‍-13 തലനാട്-14, തലനാട് സെന്‍ട്രല്‍ -14 തലപ്പലം-14, ഇടകളമറ്റം-ആറ് തലയാഴം-16, കരിയാര്‍ -14 തിരുവാര്‍പ്പ്19, ചെങ്ങളം കേളക്കരി-19 ഉദയനാപുരം-18, ആലിന്‍ചുവട്-15 ഉഴവൂര്‍-14, ചേറ്റുകുളം-11 വാകത്താനം-21, കറിക്കാട്ടുകുന്ന്-16, വാഴപ്പള്ളി-22, ലിസ്യു-10 വെച്ചൂര്‍-14, ബണ്ട് റോഡ് -12 വെളിയന്നൂര്‍-14, കീരിപ്പേല്‍മല-ഒമ്പത് വെള്ളാവൂര്‍-14, മൂങ്ങാനി -ഏഴ് വെള്ളൂര്‍-17, പയ്യപ്പള്ളി-17 വിജയപുരം-20, മക്രോണി-12 മീനടം-14, വാര്‍ഡ്-12

സയൻസ് സിറ്റിക്ക് ബസ്‌ ബേ അനുവദിച്ച് ജോസ് കെ. മാണി എംപി

കുറവിലങ്ങാട്: സയൻസ് സിറ്റിയിലെത്തുന്ന യാത്രക്കാർക്ക് സൗകര്യമൊരുക്കി ബസ് ബേ അനുവദിച്ച് ജോസ് കെ. മാണി എംപി. സയൻസ് സിറ്റിക്ക് മുന്നിൽ ആധുനിക രീതിയിലുള്ള ബസ്‌ ബേയും കാത്തിരിപ്പുകേന്ദ്രവും നിർമിക്കാനാണ് എംപി ഫണ്ടിൽനിന്ന് 55 ലക്ഷം രൂപ അനുവദിച്ചത്. ഒരേസമയം മൂന്ന് ബസുകൾക്ക് ബസ്‌ബേയിൽ കയറിയിറങ്ങി പോകാവുന്ന രീതിയിലാണ് നിർമാണം. ആധുനിക രീതിയിലുള്ള ഒരു കാത്തിരിപ്പുകേന്ദ്രവും ഇതോടൊപ്പം നിർമിക്കും. സയൻസ് സിറ്റി പ്രവർത്തനമാരംഭിക്കുമ്പോൾ ഒട്ടേറെ സന്ദർശകർ എത്തുന്ന സാഹചര്യത്തിലാണ് നടപടി. സുഗമമായ യാത്രാസൗകര്യങ്ങൾ ലഭ്യമാക്കുന്നതിനാണ് ആധുനിക രീതിയിലുള്ള ബസ് കാത്തിരിപ്പുകേന്ദ്രവും തയാറാക്കുന്നത്. ബസ് ബേ നിർമാണത്തിനായി കെഎസ്ടിപി നടത്തിയ നിർമാണ പ്രവർത്തനങ്ങളുടെ ഫലമായി കൂടിക്കിടക്കുന്ന മണ്ണ് നീക്കം ചെയ്യുന്നതിന് നിർദേശം നൽകിയിട്ടുണ്ട്. ബസ്‌ ബേ നിർദേശിച്ച സ്ഥലത്ത് സ്ഥിതി ചെയ്യുന്ന കെഎസ്ഇബിയുടെ 11 കെവി ലൈനുകൾ അവിടെനിന്നു മാറ്റി സ്ഥാപിക്കുന്നതിനുമുള്ള നടപടികൾ സ്വീകരിച്ചതായും എംപി അറിയിച്ചു.

സ്പെഷൽ‌ സ്കൂൾ അധ്യാപകർക്ക് പരിശീലനം നല്‍കി

പാലാ: മാര്‍ സ്ലീവാ മെഡിസിറ്റിയുടെ നേതൃത്വത്തില്‍ പാലാ രൂപത കെയര്‍ ഹോംസുമായി സഹകരിച്ച് സ്‌പെഷല്‍ സ്‌കൂളിലെ അധ്യാപകര്‍ക്കും ജീവനക്കാര്‍ക്കും പരിശീലനം നല്‍കി. ആശുപത്രി മാനേജിംഗ് ഡയറക്ടര്‍ മോണ്‍. ജോസഫ് കണിയോടിക്കല്‍ ഉദ്ഘാടനം ചെയ്തു. കെയര്‍ ഹോംസ് ഡയറക്ടര്‍ ഫാ. ജോര്‍ജ് നെല്ലിക്കുന്നുചെരിവുപുരയിടം, സിസ്റ്റര്‍ ജോയല്‍ മാത്യു എസ്ആര്‍എ, കെയര്‍ ഹോംസ് പ്രസിഡന്‍റ് സിസ്റ്റര്‍ റീബ വേത്താനത്ത് എഫ്‌സിസി എന്നിവര്‍ പ്രസംഗിച്ചു. ഡോ. അനിറ്റ് കാതറിന്‍ ചാള്‍സ്, ഡോ. തോമസ് ഏബ്രഹാം, ഡോ. എയ്ഞ്ചല്‍ തോമസ്, ജേക്കബ് ടോമി, ലയാമോള്‍ മാത്യു എന്നിവര്‍ ക്ലാസെടുത്തു.

അരുവിത്തുറ കോളജിൽ ഹെൽപ്പ് ഡെസ്ക് ആരംഭിച്ചു

അരുവിത്തുറ: സെന്‍റ് ജോർജ് കോളജിൽ എംജി യൂണിവേഴ്സിറ്റി പിജി, യുജി കോഴ്സുകളിലേക്കുള്ള അഡ്മിഷൻ ഹെൽപ്പ് ഡെസ്ക് പ്രവർത്തനം ആരംഭിച്ചു. രാവിലെ 9.30 മുതൽ വൈകുന്നേരം നാലുവരെ ഹെൽപ്പ് ഡെസ്ക് പ്രവർത്തിക്കും. യുജി കോഴ്സുകൾക്ക് ചേർന്ന് പഠിക്കാൻ ആഗ്രഹിക്കുന്നവർ പ്ലസ് ടു സർട്ടിഫിക്കറ്റ്, എസ്എസ്എൽസി ബുക്ക്, ആധാർ കാർഡ് എന്നിവയുമായി എത്തണം. പിജി കോഴ്സുകളിൽ ചേർന്ന് പഠിക്കാൻ ആഗ്രഹിക്കുന്നവർ ഡിഗ്രി സർട്ടിഫിക്കറ്റ്, ആധാർ കാർഡ്, എസ്എസ്എൽസി ബുക്ക് എന്നിവയും ഹാജരാക്കണം. മേയ് 31 വരെ ഹെൽപ്പ് ഡെസ്ക് പ്രവർത്തിക്കും. ഫോൺ: 9447506724, 9447424310.

മരം വീണ് വൈദ്യുതിപോസ്റ്റ് ഒടിഞ്ഞു

കാഞ്ഞിരപ്പള്ളി: ശക്തമായ കാറ്റിൽ മരം വൈദ്യുതി ലൈനിലേക്ക് ഒടിഞ്ഞുവീണ് പോസ്റ്റ് ഒടിഞ്ഞു. ഇന്നലെ വൈകുന്നേരം അഞ്ചിനുണ്ടായ കാറ്റിലാണ് പാറക്കടവ് ജംഗ്ഷനിൽ തോട്ടിൽ നിന്ന ഉണങ്ങിയ പഞ്ഞിമരം ഒടിഞ്ഞ് വീണത്. ഈ സമയം ഇതുവഴി വീടുകളിൽ പാൽ കൊടുക്കാൻ പോയ പാറക്കടവ് മാമ്മൂട്ടിൽ എം.എ. ശശീന്ദ്രൻ ശബ്ദം കേട്ട് ഓടി മാറിയതിനാൽ അപകടത്തിൽനിന്ന് തലനാരിഴയ്ക്ക് രക്ഷപ്പെട്ടു. മരം വീണ് 11 കെവി ലൈൻ സ്ഥാപിച്ചിരുന്ന വൈദ്യുതിപോസ്റ്റ് ഒടിഞ്ഞതോടെ ഗതാഗതവും തടസപ്പെട്ടു. ഏറെ ജനസാന്ദ്രതയേറിയ പ്രദേശത്ത് ഈ സമയം മറ്റാരുമില്ലാതിരുന്നതിനാൽ വൻ അപകടമാണ് ഒഴിവായത്. കാഞ്ഞിരപ്പള്ളി ഫയർഫോഴ്സും നാട്ടുകാരും ചേർന്ന് മരം മുറിച്ചു മാറ്റി. കെഎസ്ഇബി ഉദ്യോഗസ്ഥർ എത്തി വൈദ്യുതി പുനഃസ്ഥാപിക്കുന്ന ജോലികൾ ആരംഭിച്ചു. ഇതിന് സമീപത്തായി നിൽക്കുന്ന മറ്റൊരു മരം അപകട ഭീഷണി ഉയർത്തുന്നതായും ഇത് മുറിച്ച് മാറ്റുന്നതിന്നുള്ള നടപടികൾ അധികൃതർ സ്വീകരിക്കണമെന്നും നാട്ടുകാർ ആവശ്യപ്പെട്ടു.

മൂന്നിരട്ടി മധുരത്തിൽ താഴത്തുതുണ്ടിയിൽ കുടുംബം

മണിമല: താഴത്തുതുണ്ടിയില്‍ വീട്ടില്‍ മൂന്നിരട്ടി മധുരം. ഒരുമിച്ച് ജനിച്ച സഹോദരിമാരായ അലീഷ അന്ന, അലോന ‌ട്രീസ, അനീറ്റ ക്ലാര എന്നിവർക്ക് പഠനത്തിലും മികച്ച വിജയം. അങ്കണവാടി മുതൽ പ്ലസ്ടു വരെ ഒരേ സ്കൂളിൽ പഠിച്ചുവന്ന മൂവർ സംഘം നെടുംകുന്നം സെന്‍റ് ജോൺസ് ഹയർ സെക്കൻഡറി സ്കൂളിൽ നിന്നാണ് പ്ലസ്ടു 70 ശതമാനം മാർക്കോടെ പാസായത്. അനീറ്റ ക്ലാരയും അലോന ട്രീസയും സയൻസ് ബാച്ചിലും അലീഷ അന്ന കൊമേഴ്സ് ബാച്ചിലുമായിരുന്നു. മൂത്ത സഹോദരി അലീന ഡിഗ്രി വിദ്യാർഥിനിയാണ്. കോത്തലപ്പടി താഴത്തുതുണ്ടിയിൽ ജിജു ജോസഫ് - ജെസി ജിജു ദന്പതികളുടെ മക്കളാണ്.

ചങ്ങനാശേരി അതിരൂപത മതാധ്യാപക നേതൃസംഗമം ഇന്ന്

ചങ്ങനാശേരി: അതിരൂപത മതബോധനകേന്ദ്രമായ സന്ദേശനിലയത്തിന്‍റെ ആഭിമുഖ്യത്തില്‍ മതാധ്യാപക നേതൃസംഗമം ഇന്ന് രാവിലെ ഒമ്പതുമുതല്‍ ആര്‍ച്ചബിഷപ് ഹൗസിലുള്ള മാര്‍ ജയിംസ് കാളാശേരി മെമ്മോറിയല്‍ ഇന്‍ഡോര്‍ സ്റ്റേഡിയത്തില്‍ നടക്കും. ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം നിര്‍വഹിക്കും. വികാരിജനറാള്‍ റവ.ഡോ. സ്‌കറിയാ കന്യാകോണില്‍ അധ്യക്ഷത വഹിക്കും. ഡയറക്ടര്‍ റവ.ഡോ. ആന്‍ഡ്രൂസ് പാണംപറമ്പില്‍, ഫാ. സെബാസ്റ്റ്യന്‍ മാമ്പറ, ഫാ. ജോസഫ് പൊന്നാറ്റില്‍, എസിസി കണ്‍വീനര്‍ ബോബി തോമസ്, പ്രിന്‍സി ആന്‍റണി എന്നിവര്‍ പ്രസംഗിക്കും. റവ.ഡോ. ജോസഫ് കൊല്ലാറ വിശ്വാസപരിശീലകര്‍ "പ്രത്യാശയുടെ സംവാഹകര്‍’ എന്ന വിഷയത്തെക്കുറിച്ച് ക്ലാസ് നയിക്കും.

ഗ്രാമീണ റോഡുകളുടെ പുനരുദ്ധാരണത്തിന് 40 ലക്ഷം അനുവദിച്ചു

മുണ്ടക്കയം: പൂഞ്ഞാർ നിയോജകമണ്ഡലത്തിൽ പ്രളയത്തിൽ തകർന്ന ഗ്രാമീണ റോഡുകൾ പുനരുദ്ധരിക്കുന്നതിനായി സംസ്ഥാന റവന്യു വകുപ്പ് മുഖേന വെള്ളപ്പൊക്ക ദുരിതാശ്വാസനിധിയിൽ നിന്നും 40 ലക്ഷം രൂപ ഫണ്ട് അനുവദിച്ചതായി സെബാസ്റ്റ്യൻ കുളത്തുങ്കൽ എംഎൽഎ അറിയിച്ചു. റോഡുകളുടെ റീടാറിംഗ്, റീകോൺക്രീറ്റിംഗ്, മറ്റ് പുനരുദ്ധാരണ പ്രവർത്തനങ്ങൾ എന്നിവയ്ക്കായാണ് തുക അനുവദിച്ചിരിക്കുന്നത്. മുണ്ടക്കയം പഞ്ചായത്ത് പതിനെട്ടാം വാർഡിൽ ഇഞ്ചിയാനി - വെള്ളനാടി-പുളിക്കൽകട റോഡ് (10 ലക്ഷം), എരുമേലി പഞ്ചായത്ത് പതിനെട്ടാം വാർഡിൽ എരുത്വാപ്പുഴ- വെണ്ടയ്ക്കൽ കോളനി-ചീനി മരം റോഡ് (അഞ്ചു ലക്ഷം), തീക്കോയി പഞ്ചായത്ത് പന്ത്രണ്ടാം വാർഡിൽ അറമത്ത് പടി-വളവനാർ ുഴി റോഡ് (നാലു ലക്ഷം), തിടനാട് പഞ്ചായത്ത് ഒമ്പതാം വാർഡിൽ കാവുംകുളം-അമ്പലം ആറാട്ടുകടവ് റോഡ് (ഒന്പതു ലക്ഷം), തീക്കോയി പഞ്ചായത്ത് മൂന്നാം വാർഡിൽ മംഗളഗിരി-ആച്ചുകാവ് അമ്പലം റോഡ് (അഞ്ചു ലക്ഷം), തിടനാട് പഞ്ചായത്ത് ഏഴാം വാർഡിൽ പിണ്ണാക്കനാട്-കരിപ്പാപ്പറമ്പ് റോഡ് (ഏഴു ലക്ഷം) എന്നിങ്ങനെയാണ് തുക അനുവദിച്ചത്.

സിവിൽ സർവീസ് റാങ്ക് ജേതാവ് സോണറ്റിന് സെന്‍റ് ആന്‍റണീസ് ഹൈസ്കൂളിൽ സ്വീകരണം

മുണ്ടക്കയം: സിവിൽ സർവീസ് പരീക്ഷയിൽ 54-ാം റാങ്ക് നേടിയ സോണറ്റ് ജോസിന് മാതൃ വിദ്യാലയമായ മുണ്ടക്കയം സെന്‍റ് ആന്‍റണീസ് ഹൈസ്കൂളിൽ പ്രവേശനോത്സവത്തോടനുബന്ധിച്ച് സ്വീകരണം നൽകും. ജൂൺ രണ്ടിന് സ്കൂൾ ഓഡിറ്റോറിയത്തിൽ നടക്കുന്ന സമ്മേളനത്തിൽ മാനേജർ റവ.ഡോ. ജയിംസ് മുത്തനാട്ട് അധ്യക്ഷത വഹിക്കും. വി.യു. കുര്യാക്കോസ് ഐപിഎസ് സമ്മേളനം ഉദ്ഘാടനം ചെയ്യും. അഴുത ബ്ലോക്ക് പഞ്ചായത്ത് മെംബർ കെ.ആർ. വിജയൻ, കൊക്കയാർ പഞ്ചായത്ത് മെംബർ സ്റ്റാൻലി സണ്ണി, എസ്പിസി പ്രൊജക്ട് ഇടുക്കി എഡിഎൻഒ എസ്.ആർ. സുരേഷ് ബാബു, പെരുവന്താനം എസ്എച്ച്ഒ ത്രിദീപ് ചന്ദ്രൻ, ഹെഡ്മാസ്റ്റർ സാജു കുര്യൻ, കായിക പരിശീലകൻ സന്തോഷ് ജോർജ്, അധ്യാപകരായ സുനിൽ സെബാസ്റ്റ്യൻ, ജിസ്ജോ എം. ജോസഫ്, ടി.വി.ജോയസ് തുടങ്ങിയവർ പ്രസംഗിക്കും. സമ്മേളനത്തിൽ കായിക പരിശീലകൻ സന്തോഷ് ജോർജിനെയും എസ്എസ്എൽസി പരീക്ഷയിൽ എല്ലാ വിഷയങ്ങൾക്കും എ പ്ലസ് നേടിയ 36 കുട്ടികളെയും എൻഎംഎംഎസ് സ്കോളർഷിപ്പ് നേടിയ 10 കുട്ടികളെയും ആദരിക്കും. സംസ്ഥാനത്ത് ആദ്യമായി സിവിൽ സർവീസ് റാങ്ക് നേടിയ സ്റ്റുഡന്‍റ് പോലീസ് കേഡറ്റ് എന്ന ബഹുമതി സ്കൂളിലെ പൂർവ വിദ്യാർഥിനിയായ സോണറ്റിന് സ്വന്തമാണ്. 1979ൽ ആരംഭിച്ച സ്കൂളിൽ ഇപ്പോൾ 700ൽ അധികം വിദ്യാർഥികൾ പഠിക്കുന്നുണ്ട്. കഴിഞ്ഞ 13 വർഷമായി എസ്എസ്എൽസി പരീക്ഷയിൽ 100 ശതമാനം വിജയം നേടുന്ന സ്കൂളിന് നാഷണൽ മീൻസ് കം മെറിറ്റ് സ്കോളർഷിപ്പ് മലബാറിന് തെക്ക് ഏറ്റവും കൂടുതൽ കുട്ടികൾ കരസ്ഥമാക്കുന്ന സ്ഥാപനമെന്ന ബഹുമതിയും ലഭിച്ചിട്ടുണ്ട്. സംസ്ഥാന കായികമേളയിലും കലോത്സവത്തിലും കിഴക്കൻ മേഖലയിൽനിന്ന് ഏറ്റവും കൂടുതൽ കുട്ടികൾ പങ്കെടുക്കുന്ന സ്കൂളും ഇടുക്കി ജില്ലയിലെ മികച്ച എസ്പിസി യൂണിറ്റും കട്ടപ്പന വിദ്യാഭ്യാസ ജില്ലയിലെ മികച്ച സ്കൂളായും സെന്‍റ് ആന്‍റണീസ് തെരഞ്ഞെടുക്കപ്പെട്ടിട്ടുണ്ട്.

വാഴൂരിലെ വിത്തുണ്ടകള്‍ വനത്തിലെ ഫലവൃക്ഷങ്ങളാകും

വാഴൂർ: മനുഷ്യ-വന്യജീവി സംഘര്‍ഷം ലഘൂകരണത്തിനായി വനംവകുപ്പ് നടപ്പാക്കുന്ന വിത്തൂണ് പദ്ധതിയുടെ ഭാഗമായി വാഴൂര്‍ ബ്ലോക്ക് പഞ്ചായത്തില്‍ നിര്‍മിച്ച വിത്തുണ്ടകള്‍ വനംവകുപ്പിന് കൈമാറി. സംസ്ഥാനത്ത് ഒരു ബ്ലോക്ക് പഞ്ചായത്തിനുകീഴില്‍ വിത്തൂണ് പദ്ധതി നടപ്പാക്കുന്നത് ഇതാദ്യമാണ്. വന്യമൃഗങ്ങള്‍ക്ക് ഇഷ്ടമുള്ള ഫലങ്ങളുടെ വിത്തുകള്‍ ജൂണ്‍, ജൂലൈ മാസങ്ങളില്‍ വനത്തിനുള്ളില്‍ വിതറുന്ന വനംവകുപ്പിന്‍റെ നൂതനപദ്ധതിയാണ് വിത്തൂണ്. ചക്കക്കുരു, കശുവണ്ടി, മാങ്ങാണ്ടി തുടങ്ങിയ വിത്തുകള്‍ ശേഖരിച്ച് മണ്ണ് അരിച്ചെടുത്ത് രണ്ടുചട്ടിക്ക് ഒരു ചട്ടി പച്ചച്ചാണകം എന്ന അനുപാതത്തില്‍ കുഴച്ചെടുത്ത് അതിനുള്ളില്‍ വിത്ത് നിക്ഷേപിച്ച് ഉണക്കി എടുക്കുന്നതാണ് വിത്തുണ്ട. വെയിലുകൊണ്ട് ഉണങ്ങാത്തതിനാല്‍ ഇത് വിത്തിനെ മുളപ്പിക്കും. കാടിറങ്ങാതെ വന്യമൃഗങ്ങള്‍ക്ക് വനത്തിനുള്ളില്‍ ഫലങ്ങള്‍ ലഭ്യമാക്കുകയാണ് ലക്ഷ്യം. പതിനായിരം വിത്തുണ്ടകളാണ് ബ്ലോക്ക് പഞ്ചായത്ത് വനം വകുപ്പിന് കൈമാറിയത്. ബ്ലോക്ക് പഞ്ചായത്ത് ഹാളില്‍ നടന്ന ചടങ്ങില്‍ ചീഫ് വിപ്പ് ഡോ. എന്‍. ജയരാജ് വിത്തുണ്ടകള്‍ വനം വകുപ്പ് മണിമല പ്ലാച്ചേരി റേഞ്ച് ഓഫീസര്‍ സുരേഷ് കുമാറിന് കൈമാറി. ലോക ജൈവവൈവിധ്യ ദിനാചരണത്തിന്‍റെ ഭാഗമായി ബ്ലോക്ക് പഞ്ചായത്ത് കമ്മിറ്റി പുറത്തിറക്കിയ ജൈവ വൈവിധ്യ രജിസ്റ്റർ "ജൈവജാലകം' പ്രകാശനവും സ്ഥലനാമവൃക്ഷ നടീൽ പരിപാടിയുടെ ഭാഗമായ തൈ വിതരണവും നടത്തി. വാഴൂർ ബ്ലോക്ക് പഞ്ചായത്തിന്‍റെ പരിധിയിൽ വരുന്ന ആറുപഞ്ചായത്തിലെ ജൈവ വൈവിധ്യം, അവ നേരിടുന്ന വെല്ലുവിളികൾ, ജൈവ വൈവിധ്യ സംരക്ഷണം എന്നിവ ലക്ഷ്യമാക്കി പ്രാദേശിക വിവരങ്ങൾ ഉൾപ്പെടുത്തിക്കൊണ്ടുള്ള ഹ്രസ്വരേഖയാണ് പ്രസിദ്ധീകരിച്ചത്. ബ്ലോക്ക് പഞ്ചായത്ത് പ്രസിഡന്‍റ് മുകേഷ് കെ. മണി അധ്യക്ഷത വഹിച്ചു. വൈസ് പ്രസിഡന്‍റ് ഗീത എസ്. പിള്ള, കറുകച്ചാല്‍ പഞ്ചായത്ത് പ്രസിഡന്‍റ് ശ്രീജിഷ കിരണ്‍, ഷാജി പാമ്പൂരി, പി.എം. ജോണ്‍, മിനി സേതുനാഥ്, വര്‍ഗീസ് ജോസഫ്, കെ.എസ്. ശ്രീജിത്ത് എന്നിവര്‍ പങ്കെടുത്തു.

മെഗാ മെരിറ്റ് ഡേ നിറവ് 2025 ഇന്ന്

ചങ്ങനാശേരി: നിയോജകമണ്ഡലത്തിലെ 10,12 ക്ലാസുകളില്‍ മുഴുവന്‍ വിഷയങ്ങളിലും എ പ്ലസ് നേടിയ വിദ്യാര്‍ഥികള്‍ക്ക് അവാര്‍ഡുകള്‍ നല്‍കുന്ന പൗരവേദിയുടെ മെഗാ മെരിറ്റ് ഡേ നിറവ് 2025 ഇന്ന് രാവിലെ 10ന് ക്രിസ്തുജ്യോതി ഓഡിറ്റോറിയത്തില്‍ നടക്കും. പൗരവേദി പ്രസിഡന്‍റ് വി.ജെ ലാലി യുടെ അധ്യക്ഷതയില്‍ മഹാത്മാ ഗാന്ധി സര്‍വകലാശാല മുന്‍ വൈസ് ചാന്‍സലര്‍ ഡോ. സിറിയക് തോമസ് ഉദ്ഘാടനം ചെയ്യും. എന്‍എസ്എസ് സെക്രട്ടറി ഹരികുമാര്‍ കോയിക്കല്‍ മുഖ്യപ്രസംഗം നടത്തും.

കോൺഗ്രസ് മണ്ഡലം കമ്മിറ്റി ധർണ നടത്തി

വൈക്കം: ജില്ലയിലെ മികച്ച ക്ഷീരോത്പാദക സംഘമായിരുന്ന വല്ലകം ക്ഷീരോത്പാദക സംഘം ഭരണസമിതിയുടെ കെടുകാര്യസ്ഥതയും ക്രമക്കേടുംമൂലം തകർച്ചയിലേക്ക് കൂപ്പുകുത്തുന്നതിൽ പ്രതിഷേധിച്ച് കോൺഗ്രസ് ഉദയനാപുരം മണ്ഡലം കമ്മിറ്റിയുടെ നേതൃത്വത്തിൽ മാർച്ചും ധർണയും നടത്തി. കോൺഗ്രസ് ബ്ലോക്ക് വൈസ് പ്രസിഡന്‍റ് വി.ബിൻസ് ഉദ്ഘാടനം ചെയ്തു.മണ്ഡലം പ്രസിഡൻ്റ് പി.ഡി.ജോർജ് അധ്യക്ഷത വഹിച്ചു. എം.കെ. ശ്രീരാമചന്ദ്രൻ, മോഹനൻ ചായപ്പള്ളി , കെ. എസ് സജീവ്, ടി.പി. രാജലക്ഷ്മി, മിനി തങ്കച്ചൻ,കെ.എം. ചെറിയാൻ, വി. മണിയപ്പൻ, ഗോപി തറയിൽ, കെ. ആർ. മോഹനൻ, സി.എൻ. പ്രസന്നകുമാർ, കെ.സി. സുനിൽ, കെ.കെ. അനിൽകുമാർ, സി.സി. വേണുഗോപാൽ, പി.കെ. മോഹനൻ, പൗലോസ്, പി.സി.ഷാജി, കെ. ആർ. ഷിബു എന്നിവർ പ്രസംഗിച്ചു.

റിട്ടയേർഡ് എസ്ഐ മാമ്മന്‍റെ കണ്ണുകൾ രണ്ടുപേർക്ക് വെളിച്ചമാകും

പെരുവ: കഴിഞ്ഞ ദിവസം അന്തരിച്ച റിട്ടയേർഡ് എസ്ഐ ശാന്തിപുരം പഴയമ്പള്ളിൽ പി.ജെ. മാമ്മൻ (70) യാത്രയാകുന്നത് രണ്ടു പേർക്ക് വെളിച്ചം നൽകി. മാമ്മൻ വിടവാങ്ങിയെങ്കിലും അദ്ദേഹത്തിന്‍റെ കണ്ണുകൾ അന്ധരായ രണ്ടുപേരുടെ ജീവിതത്തിൽ വെളിച്ചമേകും. പെരുവ ശാന്തിപുരം ചാരിറ്റബിൾ ട്രസ്റ്റ് നടത്തിയ നേത്രദാന കാമ്പയിന്‍റെ ഭാഗമായി 15 വർഷം മുൻപ് മാമ്മൻ കണ്ണ് ദാനം ചെയ്യുന്നതിനുള്ള സമ്മതപത്രം ഒപ്പിട്ട് നൽകിയിരുന്നു. ഹൃദയ സംബന്ധമായ അസുഖത്തെത്തുടർന്ന് കൊച്ചിയിലെ സ്വകാര്യ ആശുപത്രിയിൽ ചികിത്സയിലിരിക്കെ ബുധനാഴ്ച രാവിലെയാണ് മാമ്മൻ അന്തരിച്ചത്. തുടർന്ന് അങ്കമാലി ലിറ്റിൽ ഫ്ലവർ ആശുപത്രിയുമായി മക്കളായ കിഷോറും ജസ്‌വിനും ബന്ധപ്പെട്ടു. ആശുപത്രിയിലെ വിദഗ്ദ്ധ സംഘം നേരിട്ടെത്തി കണ്ണുകൾ എടുക്കുന്നതിനുള്ള നടപടിക്രമങ്ങൾ പൂർത്തിയാക്കി. വെള്ളിയാഴ്ച രാവിലെ പത്തിന് സംസ്കാര ശുശ്രൂഷകൾ വീട്ടിൽ ആരംഭിച്ച് 10.30 ന് ശാന്തിപുരം സെന്‍റ് സെബാസ്റ്റ്യൻ പള്ളിയിൽ നടക്കും. ഭാര്യ: ലില്ലി മാമ്മൻ.

വൈക്കം താലൂക്ക് ആശുപത്രി കെട്ടിടത്തിന്‍റെ നിർമാണം അവസാന ഘട്ടത്തിൽ

വൈക്കം: 85 കോടി രൂപ ചെലവഴിച്ച് നിർമ്മിക്കുന്ന വൈക്കം താലൂക്ക് ഹെഡ്ക്വാർട്ടേഴ്സ് ആശുപത്രി നിർമ്മാണം അന്തിമ ഘട്ടത്തിലേക്ക്. 80ശതമാനം നിർമാണം പൂർത്തീകരിച്ച ആശുപത്രികെട്ടിടത്തിന്‍റെ ഇലക്‌ട്രിക്,പ്ലംബിംഗ് ജോലികളും ഫ്ലോറിംഗ് ജോലികളുമാണ് പുരോഗമിച്ചുവരുന്നത്. താലൂക്ക് ആശുപത്രിയുടെ പ്രവർത്തനം ഇപ്പോൾ അമ്മയുംകുഞ്ഞും ആശുപത്രി സമുച്ചയത്തിലാണ്. ആശുപത്രിയിലെ പഴയ ഒപി കെട്ടിടത്തിന്‍റെ അറ്റകുറ്റപ്പണികളും ദ്രുതഗതിയിൽ നടന്നുവരികയാണ്.ജനുവരിയോടെ പുതിയ ആശുപത്രി കെട്ടിട സമുച്ചയത്തിലേക്ക് താലൂക്ക് ആശുപത്രിയുടെ പ്രവർത്തനം മാറ്റാനാകുമെന്നാണ് കരുതുന്നത്.

വീട്ടമ്മ കുത്തേറ്റു മരിച്ചു; ഭർത്താവ് അറസ്റ്റിൽ

മങ്കൊമ്പ്: കുടുംബപ്രശ്‌നങ്ങളെത്തുടർന്ന് ഭർത്താവിന്‍റെ കുത്തേറ്റ് വീട്ടമ്മ മരിച്ചു. രാമങ്കരി പഞ്ചായത്ത് വേഴപ്ര ചിറയിൽ അകത്തേപ്പറമ്പിൽ മിതിമോളാ(വിദ്യ-42)ണ് മരിച്ചത്. ബുധനാഴ്ച രാത്രി പത്തരയോടെ വീടിനു സമീപത്താണ് സംഭവം. ഭർത്താവ് വിനോദിനെ (50) പോലീസ് കസ്റ്റഡിയിലെടുത്തു. ഭാര്യയോടുള്ള സംശയമാണ് കൊലപാതകത്തിലേക്കു നയിച്ചതെന്നാണ് സൂചന. സംഭവത്തെപ്പറ്റി പോലീസും നാട്ടുകാരും പറയുന്നതിങ്ങനെ. രാമങ്കരി ജംഗ്ഷനിൽ ഇരുവരും ചേർന്ന് ചായക്കട വാടകയ്‌ക്കെടുത്തു നടത്തുകയാണ്. ബുധനാഴ്ചയും പതിവുപോലെ കട പ്രവർത്തിച്ചിരുന്നു. ഉച്ചയോടെ കടയടച്ച് ഇരുവരും സമീപത്തെ ക്ഷേത്രച്ചടങ്ങുകളിൽ പങ്കെടുത്തിരുന്നു. വൈകുന്നേരം 5.45ന് മൂത്ത സഹോദരിക്കും സഹോദരി പുത്രനുമൊപ്പം വിദ്യ കോട്ടയം മെഡിക്കൽ കോളജ് ആശുപത്രിയിൽ ചികിത്സയിൽ കഴിയുന്ന ബന്ധുവിനെ കാണാൻ പോയി. മടങ്ങിയെത്താൻ വൈകിയതോടെ വിനോദ് വിദ്യയെ ഫോണിൽ ബന്ധപ്പെടുകയും ഇരുവരും തമ്മിൽ സംസാരിക്കുകയും ചെയ്തിരുന്നു. രാത്രി 10.30ഓടെ ഓട്ടോറിക്ഷയിൽ വീടിനു സമീപത്തു വന്നിറങ്ങിയ വിദ്യയുമായി വൈകിയെത്തിയതു സംബന്ധിച്ചു തർക്കമുണ്ടായി. വാക്കേറ്റത്തിനൊടുവിൽ കൈയിൽ കരുതിയിരുന്ന കത്തിയുപയോഗിച്ചു വിനോദ് ഭാര്യയെ കുത്തിവീഴ്ത്തി. കഴുത്തിലും തലയ്ക്കും മുതുകിലും കുത്തേറ്റ വിദ്യ സംഭവസ്ഥലത്തുതന്നെ മരിച്ചു. മരണം ഉറപ്പാക്കിയ വിനോദ് ബന്ധുക്കളെ വിവരമറിയിച്ചു. തുടർന്ന് പോലീസ് സ്ഥലത്തെത്തി ഇയാളെ കസ്റ്റഡിയിലെടുത്തു. വണ്ടാനം മെഡിക്കൽ കോളജ് ആശുപത്രിയിൽ പോസ്റ്റ്മോർട്ടത്തിനുശേഷം ബന്ധുക്കൾക്കു വിട്ടുകൊടുത്ത മൃതദേഹം ഇന്നലെ വൈകുന്നേരം സംസ്‌കരിച്ചു. മക്കൾ : ഭഗവത്, വൈഗ.

യൂട്യൂബ് വ്ലോഗര്‍ക്ക് എതിരേ കേസ്

ആലപ്പുഴ: സ്വര്‍ണാഭരണങ്ങള്‍ നല്‍കാത്തതിന്‍റെ പേരില്‍ സഹോദരിയെ മര്‍ദിക്കുകയും അപകീര്‍ത്തിപ്പെടുത്തുകയും ചെയ്ത യൂട്യൂബ് വ്‌ലോഗര്‍ക്കെതിരേ ആലപ്പുഴ വനിത പോലീസ് കേസെടുത്തു. മണ്ണഞ്ചേരി തിരുവാതിര വീട്ടില്‍ താമസിച്ചുവരുന്ന കുതിരപ്പന്തി പുത്തന്‍വീട്ടില്‍ ഗ്രീന്‍ഹൗസ് രോഹിത്തിന് (27) എതിരെയാണ് പരാതി. സഹോദരിയായ റോഷ്‌നിക്ക് അച്ഛന്‍ നല്‍കിയ സ്വര്‍ണാഭരണങ്ങള്‍ പ്രതി വില്‍ക്കാന്‍ ശ്രമിച്ചത് തടഞ്ഞതിലുള്ള വൈരാഗ്യമാണ് മര്‍ദനത്തിനു കാരണമെന്ന് പോലീസ് പറഞ്ഞു. കഴിഞ്ഞ മൂന്നിനാണ് കേസിനാസ്പദമായ സംഭവം. ആഭരണം വില്‍ക്കുന്നതിനെപ്പറ്റി തര്‍ക്കമുണ്ടാവുകയും പ്രതി സഹോദരിയെ ദേഹോപദ്രവം ഏല്‍പ്പിക്കുകയുമായിരുന്നു. ഇതിനുശേഷം അമ്മയെയും സഹോദരിയെയും അപകീര്‍ത്തിപ്പെടുത്തുന്ന തരത്തിലുള്ള വിഡിയോ പ്രതിയുടെ ഗ്രീന്‍ ഹൗസ് ക്ലീനിംഗ് സര്‍വീസ് എന്ന യുട്യൂബ് ചാനല്‍ വഴിയും മറ്റ് സമൂഹ മാധ്യമങ്ങള്‍ വഴിയും പ്രചരിപ്പിക്കുക ആയിരുന്നുവെന്ന് പോലീസ് പറഞ്ഞു.

റോഡ് തകർന്നിട്ട് പത്തു വർഷം; യാതൊരു നടപടിയുമില്ല

പെരുവ: പത്തുവര്‍ഷമായി തകര്‍ന്നുകിടക്കുന്ന റോഡ് നന്നാക്കണമെന്ന ആവശ്യം ശക്തമായി. മുളക്കുളം പഞ്ചായത്തിലെ കുന്നപ്പിള്ളി-പാറശേരി ലിങ്ക് റോഡാണ് കാല്‍നടയാത്ര പോലും സാധ്യമാകാത്തവിധം തകര്‍ന്നത്. റോഡ് നന്നാക്കണമെന്ന് ആവശ്യപ്പെട്ട് പലതവണ എംഎല്‍എയെയും ബന്ധപ്പെട്ട അധികൃതരെയും സമീപിച്ചെങ്കിലും യാതൊരു നടപടിയും ഉണ്ടായില്ലെന്ന് നാട്ടുകാര്‍ ആരോപിക്കുന്നു. പൊതുമരാമത്ത് വകുപ്പിന്റെ കീഴിലുള്ള റോഡായതിനാല്‍ പഞ്ചായത്ത് ഫണ്ട് ഉപയോഗിച്ചു റോഡ് ടാര്‍ ചെയ്യാന്‍ കഴിയില്ലെന്ന് മുന്‍ പഞ്ചായത്തംഗം എം.സി. സുരേഷ് പറഞ്ഞു. ദിവസവും സ്‌കൂള്‍ വാഹനങ്ങള്‍ ഉള്‍പ്പെടെ നൂറുകണക്കിന് വാഹനങ്ങള്‍ സഞ്ചരിക്കുന്ന റോഡാണിത്. ഞീഴൂരില്‍നിന്നു പെരുവയിലേക്ക് വരാനുള്ള എളുപ്പവഴിയായി ജനങ്ങള്‍ ഉപയോഗിക്കുന്ന വഴികൂടിയാണിത്. റോഡിന് ഇരുവശവും നിരവധി വീട്ടുകാരും താമസിക്കുന്നുണ്ട്. എത്രയും വേഗം റോഡ് ടാര്‍ ചെയ്യാന്‍ നടപടി സ്വീകരിക്കണമെന്നാണ് നാട്ടുകാരുടെ ആവശ്യം.

മാന്നാര്‍ സെന്‍റ് മേരീസ് മൗണ്ട് ദേവാലയത്തില്‍ തിരുനാള്‍

ആപ്പാഞ്ചിറ: മാന്നാര്‍ സെന്‍റ് മേരീസ് മൗണ്ട് ദേവാലയത്തില്‍ ക്രിസ്ത്യാനികളുടെ സഹായമായ മാതാവിന്‍റെ തിരുനാള്‍ ഇന്നു മുതല്‍ 26 വരെ ആഘോഷിക്കും. ഇന്ന് വൈകുന്നേരം 4.45 ന് കൊടിയേറ്റ്, ലദീഞ്ഞ്, വിശുദ്ധ കുര്‍ബാന: വികാരി ഫാ.സിറിയക് കൊച്ചുകൈപ്പെട്ടിയില്‍, 7.15 ന് ജപമാല പ്രദക്ഷിണം, 7.45 ന് വിശുദ്ധ കുര്‍ബാനയുടെ ആശീര്‍വാദം, പാച്ചോര്‍ നേര്‍ച്ച, എട്ടിന് സാമൂഹ്യനാടകം. നാളെ വൈകൂന്നേരം അഞ്ചിന് പാട്ടുകുര്‍ബാന: ഫാ.നൈജിന്‍ പുല്ലുകാലായില്‍ എംസിബിഎസ്, തിരുനാള്‍ സന്ദേശം: ഫാ.ജോര്‍ജ് കാട്ടൂര്‍ എംസിബിഎസ്, ഏഴിന് പ്രദക്ഷിണം, എട്ടിന് സമാപനാശീര്‍വാദം. 25നു രാവിലെ 6.45 ന് തിരുസ്വരൂപ പ്രതിഷ്ഠ, ലദീഞ്ഞ്, വിശുദ്ധ കുര്‍ബാന, പത്തിന് തിരുനാള്‍ റാസ: ഫാ.ജീവന്‍ കദളിക്കാട്ടില്‍, തിരുനാള്‍ സന്ദേശം: മോണ്‍.ജോസഫ് കണിയോടിക്കല്‍, 11.30 ന് പ്രദക്ഷിണം, 12,30 ന് സമാപനാശീ ര്‍വാദം, സ്‌നേഹവിരുന്ന്, ഏഴിന് മാജിക് ഷോ. 26ന് ഇടവകക്കാരുടെ തിരുനാള്‍ രാവിലെ ആറിന് ജപമാല, 6.30ന് വിശുദ്ധ കുര്‍ബാന, 7.30 ന് സെമിത്തേരി സന്ദര്‍ശനം, എട്ടിന് കൊടിയിറക്ക്.

പ്ലസ്ടു പരീക്ഷയിൽ നീർപ്പാറ ബധിര വിദ്യാലയത്തിന് 100 ശതമാനം വിജയം

തലയോലപ്പറമ്പ്: നീർപ്പാറ ഹയർസെക്കൻഡറി ബധിരവിദ്യാലയത്തിൽപ ്ലസ്‌ടു പരീക്ഷ എഴുതിയ 19 വിദ്യാർഥികളും മികച്ച വിജയം നേടി. പത്ത് ആൺകുട്ടികളും ഒൻപത് പെൺകുട്ടികളും പരീക്ഷ എഴുതിയതിൽ 90 ശതമാനത്തിനു മുകളിൽ മാർക്ക് നേടിയ എസ്. കാവ്യ ടോപ് സ്കോററായി. പഠനത്തോടൊപ്പം പാഠ്യേതര വിഷയങ്ങളിലും ഇവർ മികവ് തെളിയിച്ചിരുന്നു. സംസ്ഥാന സ്പെഷൽ സ്‌കൂൾകലോത്സവത്തിൽ ഓവറോൾരണ്ടാംസ്ഥാനവും സംസ്ഥാന പ്രവൃത്തിപരിചയമേളയിലും ദേശീയ ബധിര കായികമേളയിലും ഈ വിദ്യാർഥികൾ മികച്ച വിജയം കരസ്ഥമാക്കി.ശാരീരിക-മാനസിക ഉല്ലാസത്തിനുതകുന്നനീന്തൽ പരിശീലനവും വിവിധ കായിക പരിശീലനങ്ങളും അധ്യാപകരുടെനേതൃത്വത്തിൽ സ്കൂളിൽ നൽകിവരുന്നു. ഓരോ ടേമിലെയും പരീക്ഷ കഴിയുമ്പോൾതന്നെ മൂല്യനിർണയം നടത്തുകയും ക്ലാസ് പിടിഎ വിളിച്ചുകൂട്ടി കുട്ടികളുടെ പഠനപുരോഗതി വിലയിരുത്തി പോരായ്മകൾ ചർച്ച ചെയ്തു പരിഹരിക്കുന്ന രീതിയാണ് ഇവിടെ നടത്തിവരുന്നതെന്ന് പ്രിൻസിപ്പൽ സിസ്റ്റർ റെനി പറഞ്ഞു. വൈകുന്നേരങ്ങളിലുംരാത്രികളിലുമുള്ള തീവ്ര പരിശീലനവും ആവർത്തന പരീക്ഷകളും കുട്ടികളെ പൊതുപരീക്ഷയ്ക്ക് സജ്ജരാക്കുന്നു. പ്ലസ്‌ടുപഠനത്തിനു ശേഷമുള്ള തുടർ പഠനത്തിനും ജോലി ലഭിക്കുന്നതിനും ആവശ്യമായ മാർഗനിർദേശങ്ങളും പി എസ്‌സി പരിശീലനവും നൽകി ഇവരെ തൊഴിൽ ലഭിക്കുന്നതിന് പ്രാപ്തരാക്കുന്നതിനു നൂതന പദ്ധതികളും ഈ വിദ്യാലയത്തിൽ വിജയകരമായി നടത്തിവരുന്നു. അധ്യാപകരുടെയും വിദ്യാർഥികളുടെയും മാതാപിതാക്കളുടെയും ക ൂട്ടായ പരിശ്രമവും ഈശ്വരാനുഗ്രഹവുമാണ് ഉജ്വലവിജയം നേടാൻ സഹായിച്ചതെന്ന് അധ്യാപകർ പറഞ്ഞു.

കൂവേലി, കാട്ടാന്പാക്ക് മേഖലകളിൽ വ്യാപക മോഷണം

കുര്യന്തടത്തിൽ തോമസ് ദേവസ്യയുടെ 35 ഏത്തക്കുലകൾ മോഷ്‌ടിച്ചു കടുത്തുരുത്തി: കഷ്ടപ്പെട്ട് ഉണ്ടാക്കിയെടുത്ത വാഴക്കുലകള്‍ മോഷ്ടിച്ചു കടത്തുന്നത് കണ്ടെത്തി നടപടി സ്വീകരിക്കണമെന്ന് ആവശ്യപ്പെട്ട് കടുത്തുരുത്തി പോലീസിന് 50 ഓളം കര്‍ഷകര്‍ ഒപ്പിട്ട പരാതി. കാട്ടാമ്പാക്ക് സ്വാശ്രയ കര്‍ഷക സമിതിയിലെ കര്‍ഷകരാണ് മോഷ്ടാക്കളില്‍ നിന്നും സംരക്ഷണം ആവശ്യപ്പെട്ട് പോലീസില്‍ കൂട്ടപരാതി നല്‍കിയത്. കൂവേലി, കാട്ടാമ്പാക്ക് മേഖലയില്‍ മോഷ്ടാക്കളെ കൊണ്ട് നാട്ടുകാര്‍ പൊറുതിമുട്ടിയിരിക്കുകയാണ്. കൃഷിയിടങ്ങളില്‍നിന്നു വാഴക്കുലകളും കാര്‍ഷികോപകരണങ്ങളും മോഷ്ടിക്കുക, ആള്‍ത്താമസമില്ലാത്ത വീടുകള്‍ കുത്തിത്തുറന്ന് മോഷണം നടത്തുക എന്നിങ്ങനെ മോഷണം വ്യാപകമായിരിക്കുകയാണ്. കൂവേലി തൊണ്ടന്നി പാടത്ത് കുര്യന്തടത്തില്‍ തോമസ് ദേവസ്യാ പാട്ടത്തിനെടുത്ത് കൃഷി ചെയ്തിരുന്ന പാടത്തുനിന്ന് 15നു രാത്രി 25 ഏത്തവാഴക്കുലകള്‍ മോഷ്ടിച്ചിരുന്നു. ഇതേ കൃഷിയിടത്തില്‍നിന്നു കഴിഞ്ഞദിവസം രാത്രി വീണ്ടും പത്ത് വാഴക്കുലകള്‍ മോഷ്ടിച്ചു. വാഴ വെട്ടാതെ കുലകള്‍ മാത്രം തോട്ടി ഉപയോഗിച്ചു വെട്ടിയാണ് രണ്ടു തവണയും മോഷണം നടത്തിയത്. 500 വാഴകളാണ് തോമസ് കൃഷി ചെയ്തിരിക്കുന്നത്. ആദ്യ മോഷണം നടന്നപ്പോള്‍ത്തന്നെ തോമസ് കടുത്തുരുത്തി പോലീസില്‍ പരാതി നല്‍കിയിരുന്നു. കൃഷിയിടത്തില്‍ ഉപയോഗിക്കുന്ന മോട്ടോറുകളും മോഷണം പോകുന്നത് പതിവായിരിക്കുകയാണ്. മോഷ്ടാക്കളെ പിടിക്കാന്‍ പോലീസ് ശക്തമായ നടപടി സ്വീകരിക്കണമെന്നതാണ് നാട്ടുകാരുടെയും കര്‍ഷകരുടെയും ആവശ്യം.

അപകടകരമായി നിൽക്കുന്ന വൃക്ഷങ്ങൾ മുറിച്ചു നീക്കണം

ഏറ്റുമാനൂർ: നഗരസഭയിലെ മഴക്കാലപൂർവ മുന്നൊരുക്ക പ്രവർത്തനങ്ങളുടെ ഭാഗമായി നഗരപ്രദേശത്തെ സ്വകാര്യ വ്യക്തികളുടെ പുരയിടങ്ങളിൽ അപകടകരമായി നിൽക്കുന്ന വൃക്ഷങ്ങളും വൃക്ഷ ശിഖരങ്ങളും അടിയന്തരമായി മുറിച്ച് നീക്കം ചെയ്യേണ്ടതാണെന്നും അല്ലാത്തപക്ഷം ഉണ്ടായേക്കാവുന്ന അപകടങ്ങൾക്ക് വൃക്ഷത്തിന്‍റെ ഉടമകൾ ഉത്തരവാദിയായിരിക്കുമെന്നും കാടുപിടിച്ച് ഇഴജന്തുക്കളും മറ്റും കയറി പൊതുജനാരോഗ്യ പ്രശ്നങ്ങൾ ഉണ്ടാകാനിടയുള്ള പുരയിടങ്ങൾ കാടു വെട്ടിത്തെളിച്ച് വൃത്തിയാക്കേണ്ടതാണെന്ന് 1994 ലെ കേരള മുനിസിപ്പാലിറ്റി നിയമം വകുപ്പ് 412, 427 എന്നിവ പ്രകാരവും നഗരസഭാധികൃതർ അറിയിച്ചു.

പങ്ങട മർത്ത്മറിയം യാക്കോബായ സുറിയാനി പള്ളിയിൽ പെരുന്നാൾ

പങ്ങട: വിശുദ്ധ മര്‍ത്ത്മറിയം യാക്കോബായ സുറിയാനി പള്ളിയില്‍ മര്‍ക്കോസ് മാര്‍ കൂറിലോസ് മെത്രാപ്പോലീത്തായുടെ 20-ാം ദുഖ്‌റോനോ പെരുന്നാള്‍ 25നു തുടങ്ങും. രാവിലെ 9.30ന് ഫാ. ജേക്കബ് ചെറിയാന്‍ മണ്ണൂര്‍ കൊടിയേറ്റും. തുടര്‍ന്ന് അരി ശേഖരണത്തിനുള്ള ചെമ്പ് സമര്‍പ്പണം. രാത്രി ഏഴിന് വചനശുശ്രൂഷ. 28നു രാവിലെ പത്തിന് ആയൂര്‍വേദ മെഡിക്കല്‍ ക്യാമ്പും അരിവിതരണവും നടക്കും. ക്യാമ്പ് ഉദ്ഘാടനം ടി.ജി. മോഹനന്‍ നിര്‍വഹിക്കും. ഷീല മാത്യു, ഡോ. ജോജി സെബാസ്റ്റ്യന്‍, ഫാ. എബി കെ. ജോണ്‍, ഫാ. മത്ഥ്യാസ് കാവുങ്കല്‍ എന്നിവര്‍ പ്രസംഗിക്കും. 29നു വൈകുന്നേരം ആറിനു വെള്ളൂര്‍ സെന്‍റ് സൈമണ്‍സ് പള്ളിയില്‍നിന്നു കബറിങ്കലേക്ക് കാല്‍നട തീര്‍ഥയാത്ര. രാത്രി ഏഴിനു പങ്ങട പള്ളിയില്‍ സ്വീകരണം, 7.15ന് സന്ധ്യാപ്രാര്‍ഥന. തോമസ് മാര്‍ അലക്‌സന്ത്രയോസ് മെത്രോപ്പോലീത്ത കാര്‍മികത്വം വഹിക്കും. 30നു രാവിലെ 8.30നു മൂന്നിന്മേല്‍ കുര്‍ബാന തോമസ് മാര്‍ അലക്‌സന്ത്രയോസ് മെത്രാപ്പോലീത്തയുടെ കാര്‍മികത്വത്തില്‍ നടക്കും. പത്തിന് അനുസ്മരണം, 10.15ന് കബറിങ്കല്‍ ധൂപപ്രാര്‍ഥന, ചാരിറ്റബിള്‍ ട്രസ്റ്റില്‍നിന്നുള്ള സഹായധന വിതരണം, 11ന് നേര്‍ച്ചസദ്യ, ഒന്നിന് കൊടിയിറക്ക്.

പാറമ്പുഴയും അയർക്കുന്നവും ജേതാക്കൾ

പാറമ്പുഴ: പാറമ്പുഴ ഹോളി ഫാമിലി ഹൈസ്കൂൾ റൂബി ജൂബിലി കപ്പ് ഫുട്ബോളിൽ അണ്ടർ 15ൽ പാറമ്പുഴ ഹോളി ഫാമിലിയും അണ്ടർ 17ൽ അയർക്കുന്നം സെന്‍റ് സെബാസ്റ്റ്യൻസ് ഹയർ സെക്കൻഡറി സ്കൂളും ജേതാക്കളായി. കുടമാളൂർ സെൻ്റ് മേരീസ് യുപി സ്കൂൾ, പരിപ്പ് ഹൈസ്കൂൾ എന്നിവർ റണ്ണറപ്പുകളായി. ഒരു മാസക്കാലം നീണ്ടുനിന്ന പരിശീലന ക്യാമ്പിനു സമാപനം കുറിച്ചാണ് ടൂർണമെന്‍റ് നടത്തിയത്. വിജയികൾക്ക് സ്കൂൾ അസിസ്റ്റന്‍റ് മാനേജർ ഫാ. സിറിയക് കാഞ്ഞിരത്തുമ്മൂട്ടിൽ സമ്മാനങ്ങൾ നൽകി. ഹെഡ്മിസ്ട്രസ് ജാൻസിമോൾ അഗസ്റ്റിൻ, കമ്യൂണിറ്റി പോലീസ് ഓഫീസർ ബിജു ചെറിയാൻ, ഫുട്ബോൾ പരിശീലകൻ അജിൻ മാത്തച്ചൻ എന്നിവർ പ്രസംഗിച്ചു.

ഡിജിറ്റല്‍ കാര്‍ഷിക വിപണി ഉദ്ഘാടനം ഇന്ന്

അകലക്കുന്നം: പഞ്ചായത്തിന്‍റെ നേതൃത്വത്തില്‍ ആരംഭിക്കുന്ന ഡിജിറ്റല്‍ കാര്‍ഷിക വിപണിയുടെ ഉദ്ഘാടനം ഇന്ന് ഉച്ചകഴിഞ്ഞ് 2.30ന് പൂവത്തിളപ്പ് പഞ്ചായത്ത് ഓഡിറ്റോറിയത്തില്‍ മന്ത്രി പി. പ്രസാദ് നിര്‍വഹിക്കും. കര്‍ഷകര്‍ ഉത്പാദിപ്പിക്കുന്ന കാര്‍ഷിക/കാര്‍ഷിക അനുബന്ധ ഉത്പന്നങ്ങള്‍ വില്‍ക്കുന്നതിനും വാങ്ങുന്നതിനും സഹായകമാകുന്ന ഫാം കാര്‍ട്ട് എന്ന മൊബൈല്‍ ആപ്ലിക്കേഷന്‍റെ ഉദ്ഘാടനമാണ് നിര്‍വഹിക്കുന്നത്. ചാണ്ടി ഉമ്മന്‍ എംഎൽഎ അധ്യക്ഷത വഹിക്കും. ഫ്രാന്‍സിസ് ജോര്‍ജ് എംപി, ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയ്, അകലക്കുന്നം പഞ്ചായത്ത് പ്രസിഡന്‍റ് സിന്ധു അനില്‍കുമാര്‍ തുടങ്ങിയവര്‍ പ്രസംഗിക്കും.

ടോറസുകള്‍ക്ക് നിയന്ത്രണമില്ല; റോഡുകൾ തകർച്ചയിൽ

കോട്ടയം: അനുവദനീയമായതിലും ഇരട്ടിയിലധികം ചരക്കുമായി ഓടുന്ന ടോറസ്, ടിപ്പര്‍ ലോറികളുടെ പാച്ചിൽ റോഡുകളുടെ തകര്‍ച്ചയ്ക്ക് ആക്കം കൂട്ടുന്നു. പാറകളും തടികളും കയറ്റുന്ന കൂറ്റന്‍ ടോറസുകള്‍ ഗ്രാമീണ റോഡുകളുടെ തകര്‍ച്ചയ്ക്ക് പ്രധാന കാരണമായിട്ടും പോലീസും മോട്ടോര്‍വാഹന വകുപ്പും ഇടപെടല്‍ നടത്തുന്നില്ല. ഇത്തരം ലോറികള്‍ക്ക് നിയന്ത്രണം ഏർപ്പെടുത്താന്‍ പോലീസും ജാഗ്രത പുലര്‍ത്തുന്നില്ല. പാറമടകള്‍ പ്രവര്‍ത്തിക്കുന്ന മിക്കയിടങ്ങളിലും പോലീസിന് ക്വാറികളില്‍നിന്നു പതിവായി പടി കിട്ടുന്നതായി ആരോപണമുണ്ട്. പാറമടകള്‍ക്കു സമീപമുള്ള എല്ലാ ഗ്രാമീണ റോഡുകളും തകര്‍ച്ചയിലാണ്. രാത്രി തടി കയറ്റിപ്പോകുന്ന ലോറികളും സമാനമായ സാഹചര്യമാണുണ്ടാക്കുന്നത്. 20 ടണ്‍ ഭാരത്തിന് അനുമതിയുള്ള ടോറസുകളില്‍ നാല്‍പത് ടണ്ണിലേറെ ഭാരമാണ് കയറ്റിപ്പോകുന്നത്. ജില്ലയില്‍ അടുത്തയിടെ നിർമാണം പൂർത്തിയാക്കിയ മിക്ക റോഡുകളും ടോറസ് ലോറികളുടെ പാച്ചിലിൽ തകര്‍ന്നുകഴിഞ്ഞു. റോഡുകള്‍ക്ക് വിള്ളല്‍ വീഴുന്നതും താഴ്ന്നുപോകുന്നതും സാധാരണ കാഴ്ചയായിരിക്കുകയാണ്. മഴക്കാലമാകുന്നതോടെ പ്രതിസന്ധി കൂടുതല്‍ രൂക്ഷമാകും. അമിതഭാരം കയറുമ്പോള്‍ പൈപ്പ് പൊട്ടി ജലവിതരണവും നിലയ്ക്കുന്നു. ഓട്ടത്തി നിടെ ടോറസുകളിള്‍ നിന്ന് കല്ലുകള്‍ റോഡിലേക്കു വീഴുന്നതിനാല്‍ ഭയപ്പാടോടെയാണ് ചെറുവാഹനങ്ങള്‍ ഇത്തരം പാതകളില്‍ ഓടുന്നത്.

കാന്‍സര്‍ ബോധവത്കരണ പരിപാടികളുടെ സമാപനം

കുറിച്ചിത്താനം: പാലാ രൂപതയുടെ പ്ലാറ്റിനം ജൂബിലി, മാര്‍ സ്ലീവാ മെഡിസിറ്റിയുടെ അഞ്ചാം വാര്‍ഷികം എന്നിവയോടനുബന്ധിച്ച് നടപ്പാക്കുന്ന സാമൂഹിക പദ്ധതികളുടെ ഭാഗമായി വിവിധ പള്ളികളില്‍ മാതൃവേദിയുമായി സഹകരിച്ച് നടത്തിയ സൗജന്യ കാന്‍സര്‍ ബോധവത്കരണ ക്ലാസുകളുടെയും സ്തനാര്‍ബുദ പരിശോധനയുടെയും സമാപനം നടത്തി. കുറിച്ചിത്താനം സെന്‍റ് തോമസ് പള്ളിയില്‍ നടത്തിയ സമാപന സമ്മേളനം മാര്‍ സ്ലീവാ മെഡിസിറ്റി മാനേജിംഗ് ഡയറക്ടര്‍ മോണ്‍. ജോസഫ് കണിയോടിക്കല്‍ ഉദ്ഘാടനം ചെയ്തു. പാലാ രൂപത മാതൃവേദി പ്രസിഡന്‍റ് ഷേര്‍ളി ചെറിയാന്‍ അധ്യക്ഷത വഹിച്ചു. കുറിച്ചിത്താനം പള്ളി വികാരി ഫാ. ഇഗ്‌നേഷ്യസ് നടുവിലേക്കൂറ്റ്, പാലാ രൂപത മാതൃവേദി ഡയറക്ടര്‍ ഫാ. ജോസഫ് നരിതൂക്കില്‍, കുറവിലങ്ങാട് മേഖലാ ജോയിന്‍റ് ഡയറക്ടര്‍ സിസ്റ്റര്‍ ആന്‍സില, മാര്‍ സ്ലീവാ മെഡിസിറ്റി ഓങ്കോളജി വിഭാഗം മേധാവി ഡോ. റോണി ബെന്‍സണ്‍, മാതൃവേദി കുറവിലങ്ങാട് മേഖലാ പ്രസിഡന്‍റ് ജോമി ഷൈജു, മാതൃവേദി ഗ്ലോബല്‍ സെക്രട്ടറി സിജി ലൂക്‌സണ്‍ എന്നിവര്‍ പ്രസംഗിച്ചു. എസ്‌എംവൈഎമ്മിന്‍റെ നേതൃത്വത്തില്‍ ഫ്‌ളാഷ് മൊബും അവതരിപ്പിച്ചു.

പാലാ രൂപത പ്ലാറ്റിനം ജൂബിലി സമ്മേളനവും സിമ്പോസിയവും

പാലാ: രൂപത പ്ലാറ്റിനം ജൂബിലി സമ്മേളനവും നിഖ്യാ സൂനഹദോസിന്‍റെ 1700- ാം വാര്‍ഷികവും 25ന് ഉച്ചകഴിഞ്ഞു രണ്ടിന് കത്തീഡ്രല്‍ പള്ളിഹാളില്‍ നടത്തും. വിശ്വാസ പരിശീലന കേന്ദ്രത്തിന്‍റെയും കത്തോലിക്കാ കോണ്‍ഗ്രസിന്‍റെയും സംയുക്താഭിമുഖ്യത്തില്‍ നടത്തപ്പെടുന്ന സമ്മേളനം ബിഷപ് മാര്‍ ജോസഫ് കല്ലറങ്ങാട്ട് ഉദ്ഘാടനം ചെയ്യും. കത്തോലിക്കാ കോണ്‍ഗ്രസ് രൂപത പ്രസിഡന്‍റ് എമ്മാനുവല്‍ നിധീരി അധ്യക്ഷത വഹിക്കും. റവ.ഡോ. ജോണ്‍ കണ്ണന്താനം, ഡോ. പ്രിന്‍സ്‌മോന്‍ മണിയങ്ങാട്ട്, സിസ്റ്റര്‍. ഡോ. സ്റ്റെല്ല എസ്എച്ച് എന്നിവര്‍ പ്രബന്ധങ്ങള്‍ അവതരിപ്പിക്കും. രൂപത ഡയറക്ടര്‍ റവ. ഡോ. ജോര്‍ജ് ഞാറക്കുന്നേല്‍, കത്തീഡ്രല്‍ പള്ളി വികാരി ഫാ. ജോസ് കാക്കല്ലില്‍, ജനറല്‍ സെക്രട്ടറി ജോസ് വട്ടുകുളം, ആന്‍സമ്മ സാബു, ജോയി കണിപറമ്പില്‍ എന്നിവര്‍ പ്രസംഗിക്കും.

തീക്കോയി പള്ളിവാതിൽ ചെക്ക് ഡാമിലെ മണലും എക്കലും ചെളിയും നീക്കം ചെയ്യാൻ നടപടി

തീക്കോയി: പഞ്ചായത്തിലെ പള്ളിവാതിൽ ചെക്ക് ഡാമിലെ മണലും എക്കലും ചെളിയും നീക്കം ചെയ്യുന്നതിന് നടപടിയായി. പഞ്ചായത്ത് ജില്ലാ ദുരന്തനിവാരണ അഥോറിറ്റി അധ്യക്ഷനായ ജില്ലാ കളക്ടർക്ക് നൽകിയ കത്തിന്‍റെ അടിസ്ഥാനത്തിലാണ് മൈനർ ഇറിഗേഷൻ മണൽ ലേലം ചെയ്തത്. 2003ല്‍ മൈനർ ഇറിഗേഷൻ നിർമിച്ചതാണ് ചെക്ക് ഡാം. മണലും ചെളിയും നിറഞ്ഞതോടുകൂടി ചെക്ക് ഡാമിന്‍റെ ജലസംഭരണശേഷി വലിയതോതിൽ കുറഞ്ഞിരുന്നു. തീക്കോയിലെ പ്രധാന കുടിവെള്ള സ്രോതസായ ചെക്ക് ഡാമിനോട് അനുബന്ധിച്ച് ജലനിധി പദ്ധതികളും സ്ഥിതി ചെയ്യുന്നു. ചെക്ക് ഡാം നിർമിച്ചതിനുശേഷം നാളിതുവരെയും മണലും ചെളിയും നീക്കം ചെയ്യാതിരുന്നതിനാൽ മഴക്കാലത്ത് വെള്ളപ്പൊക്ക ഭീഷണിയും ഉണ്ട്. കാലപ്പഴക്കത്താൽ പൊട്ടിപ്പൊളിഞ്ഞ ചെക്ക് ഡാം മെയിന്‍റനൻസ് ചെയ്യുന്നതിന് പഞ്ചായത്ത് ആറുലക്ഷം രൂപ അനുവദിക്കുകയും ജോലികൾ ഭാഗികമായി പൂർത്തീകരിക്കുകയും ചെയ്തിട്ടുണ്ട്. മഴ നേരത്തേ തുടങ്ങിയതുകൊണ്ട് ആറ്റിൽ ജലനിരപ്പ് ഉയർന്നതിനാൽ ആണ് ചെക്ക് ഡാമിന്‍റെ മെയിന്‍റനൻസ് ജോലികൾ പൂർത്തിയാക്കുവാൻ സാധിക്കാത്തത്. ജലനിരപ്പ് കുറയുന്ന സമയത്ത് മെയിന്‍റനൻസ് ജോലികൾ പൂർത്തീകരിക്കുമെന്നും പ്രസിഡണ്ട് കെ.സി. ജയിംസ് അറിയിച്ചു.

ധന്യന്‍ കദളിക്കാട്ടില്‍ മത്തായി അച്ചന്‍ വേദനിക്കുന്നവരിലേക്ക് ഇറങ്ങിച്ചെന്നു-റവ.ഡോ.വര്‍ഗീസ് കുറ്റിയില്‍

പാലാ: ധന്യന്‍ കദളിക്കാട്ടില്‍ മത്തായി അച്ചന്‍റെ കണ്ണുകള്‍ അദ്ദേഹത്തിലേക്ക് ആയിരുന്നില്ലെന്നും മറിച്ച് മറ്റുള്ളവരിലേക്കും പുറം ലോകത്തേക്കും നോക്കുന്നതിന് തന്‍റെ കണ്ണുകള്‍ വിനിയോഗിച്ചുവെന്നും വേദനിക്കുന്നവരിലേക്ക് ഇറങ്ങിച്ചെന്നുവെന്നും കോട്ടയം ബഥനി ആശ്രമം സുപ്പീരിയര്‍ റവ. ഡോ. വര്‍ഗീസ് കുറ്റിയില്‍. കദളിക്കാട്ടിലച്ചന്‍റെ ചരമവാര്‍ഷികാചരണത്തോടനുബന്ധിച്ച് പാലാ എസ്‌എച്ച് പ്രൊവിന്‍ഷ്യല്‍ ഹൗസ് കപ്പേളയില്‍ നടത്തുന്ന നവനാളില്‍ വിശുദ്ധ കുര്‍ബാന അര്‍പ്പിച്ച് സന്ദേശം നല്‍കുകയായിരുന്നു അദ്ദേഹം. 1901 ല്‍ പുരോഹിതനായി അഭിഷിക്തനായ കദളിക്കാട്ടില്‍ മത്തായി അച്ചന്‍ പത്തുവര്‍ഷം പിന്നിട്ടപ്പോള്‍ ഒരു സന്യാസ സമൂഹത്തിനു രൂപം കൊടുത്തു എന്നത് അദ്ഭുതമാണെന്ന് മാത്രമല്ല ദൈവികമായ പ്രചോദനത്തിന്‍റെ പിന്‍ബലത്തിലും ആയിരുന്നു. ഓരോ ദിവസവും അള്‍ത്താരയില്‍ ആരംഭിച്ച് അവിടെനിന്ന് ശക്തി സംഭരിച്ച് ഇതാണ് ഒരു വിശുദ്ധന്‍റെ ജീവിതം എന്ന് അദ്ദേഹം ഓര്‍മപ്പെടുത്തിയെന്നും അദ്ദേഹം പറഞ്ഞു.

രാജീവ്‌ഗാന്ധി അനുസ്മരണം

എരുമേലി: മുൻ പ്രധാന മന്ത്രി രാജീവ്‌ ഗാന്ധിയുടെ രക്തസാക്ഷിത്വ ദിനത്തിൽ കോൺഗ്രസ്‌ എരുമേലി മണ്ഡലം കമ്മിറ്റി ടൗണിൽ നടത്തിയ അനുസ്മരണം കെപിസിസി ജനറൽ സെക്രട്ടറി പി.എ. സലിം ഉദ്ഘാടനം ചെയ്തു. പ്രകാശ് പുളിക്കൻ, ബിനു മറ്റക്കര, ടി.വി. ജോസഫ്, ഫസിം ചുടുകാട്ടിൽ, സാറാമ്മ എബ്രഹാം, ആശ ജോയി, അനസ് ഷുക്കൂർ, റ്റെഡി ചേനപ്പാടി തുടങ്ങിയവർ പ്രസംഗിച്ചു. പാണപിലാവ് ബൂത്ത്‌ കമ്മിറ്റി നടത്തിയ അനുസ്മരണം ബിനു മറ്റക്കര ഉദ്ഘാടനം ചെയ്തു. വാർഡ് അംഗം ജിജിമോൾ സജി, മാത്യു വെമ്പാല, സജി വയലുങ്കൽ, റെജി ചാരക്കുന്നേൽ, സുനിൽ പന്നാംകുഴിയിൽ, ബിൻസ് കുഴിക്കാട്ട്, സന്തോഷ് ചാത്തൻകുഴിയിൽ, ജേക്കബ് ഇടയാടിയിൽ, ഷാജി നെടും തകിടിയിൽ തുടങ്ങിയവർ പ്രസംഗിച്ചു. പൊൻകുന്നം: രാജീവ്ഗാന്ധിയുടെ 34-ാമത് രക്തസാക്ഷിത്വദിനാചരണത്തിന്‍റെ ഭാഗമായി കോൺഗ്രസ് ചിറക്കടവ് മണ്ഡലം കമ്മിറ്റി നടത്തിയ സമ്മേളനം പ്രസിഡന്‍റ് സേവ്യർ മൂലകുന്ന് ഉദ്ഘാടനം ചെയ്തു. വൈസ്പ്രസിഡന്‍റ് ടി.പി. രവീന്ദ്രൻപിള്ള അധ്യക്ഷത വഹിച്ചു. സനോജ് പനക്കൽ, ഹരിലാൽ കോയിപ്പുറത്ത്, ശ്യാംബാബു, ചാക്കോച്ചൻ മഞ്ഞാക്കൽ, ടി.ആർ. ബിനേഷ്, എസ്. ഇന്ദുകല, അനിലകുമാരി തുളസിദാസ്, കെ. രാജേന്ദ്രൻ തുടങ്ങിയവർ പ്രസംഗിച്ചു.

പുലർമഞ്ഞ് 2025; കെസിവൈഎം മലയോര ക്യാമ്പ്

കുട്ടിക്കാനം: കേരളത്തിലെ 32 രൂപതകളിലെ യുവജന പ്രതിനിധികൾ ഒത്തുചേരുന്ന പുലർ മഞ്ഞ് -2025 മലയോര ക്യാമ്പിന് കുട്ടിക്കാനം മരിയൻ കോളജ് കാമ്പസിൽ ഇന്ന് ദീപം തെളിയും. കെസിവൈഎം സംസ്ഥാന സമിതി നേതൃത്വം നൽകുന്ന ക്യാമ്പ് കാഞ്ഞിരപ്പള്ളി രൂപതയിൽ ഇന്നു മുതൽ 25 വരെയാണ് നടക്കുന്നത്. കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ ക്യാന്പ് ഉദ്ഘാടനം ചെയ്യും. കെസിവൈഎം സംസ്ഥാന പ്രസിഡന്‍റ് എബിൻ കണിവയലിൽ അധ്യക്ഷത വഹിക്കും. കെസിവൈഎം സംസ്ഥാന ഡയറക്ടർ ഫാ. ഡിറ്റോ കൂള ആമുഖ പ്രഭാഷണവും കോവിൽമല രാജാവ് ശ്രീരാമൻ രാജമന്നൻ മുഖ്യപ്രഭാഷണവും നടത്തും. കാഞ്ഞിരപ്പള്ളി രൂപത എസ്എംവൈഎം - യുവദീപ്തി ഡയറക്ടർ ഫാ. തോമസ് നരിപ്പാറയിൽ, കെസിവൈഎം സംസ്ഥാന സമിതി ജനറൽ സെക്രട്ടറി ജോബിൻ ജോസ്, രൂപത എസ്എംവൈഎം - യുവദീപ്തി പ്രസിഡന്‍റ് അലൻ കല്ലൂരാത്ത്, സംസ്ഥാന സമിതി കോ-ഓർഡിനേറ്ററും ട്രഷററുമായ ജിബി ഏലിയാസ് എന്നിവർ പ്രസംഗിക്കും. ക്യാന്പിന്‍റെ ഭാഗമായി നല്ലതണ്ണി, പാഞ്ചാലിമേട് എന്നീ സ്ഥലങ്ങൾ സന്ദർശിക്കും.

അനീഷയുടെ വിജയത്തിന് ഇരട്ടി മധുരം

അതിരമ്പുഴ: പ്ലസ് ടു പരീക്ഷയിൽ എല്ലാ വിഷയങ്ങൾക്കും മുഴുവൻ മാർക്കും നേടിയ അതിരമ്പുഴ സെന്‍റ് അലോഷ്യസ് ഹയർ സെക്കൻഡറി സ്കൂൾ വിദ്യാർഥിനി അനീഷ ജോഷിക്ക് കളക്ടറാകാൻ മോഹം. സയൻസ് ഗ്രൂപ്പിൽ ഗ്രേസ് മാർക്കില്ലാതെ എല്ലാ വിഷയങ്ങൾക്കും മുഴുവൻ മാർക്ക് നേടിയ അനീഷയുടെ വിജയത്തിന് ഇരട്ടി മധുരമാണ്. സ്കൂളിന്‍റെ ജൂബിലി വർഷത്തിലാണ് ഈ മിന്നും നേട്ടം. ട്യൂഷൻ ഇല്ലാതെയാണ് പഠിച്ചത്. അധ്യാപകർ നൽകിയ പിന്തുണയിലാണ് മികച്ച വിജയം നേടാനായതെന്ന് അനീഷ പറഞ്ഞു. എസ്എസ്എൽസിക്ക് എല്ലാ വിഷയങ്ങൾക്കും എ പ്ലസ് ലഭിച്ചിരുന്നു. അതിരമ്പുഴ കോട്ടമുറി വാരികാട്ട് ജോഷി തോമസിന്‍റെ മകളാണ്. കൃഷിക്കാരനാണ് ജോഷി. അമ്മ ബെസി കിടങ്ങൂർ എൽഎൽഎം ആശുപത്രിയിൽ നഴ്സാണ്. സഹോദരിമാരായ അനീറ്റയും, അഞ്ജലീനയും നഴ്സിംഗ് വിദ്യാർഥിനികളാണ്.

ദൈവദാസി മദർ ഷന്താളിന്‍റെ ചരമവാർഷികാചരണം ഇന്ന്

അതിരമ്പുഴ: വിശുദ്ധ കുർബാനയുടെ ആരാധനാ സന്യാസിനീ സമൂഹത്തിന്‍റെ സഹസ്ഥാപകയും പ്രഥമ അംഗവുമായ ദൈവദാസി മദർ മേരി ഫ്രാൻസിസ്ക ദ് ഷന്താളിന്‍റെ 53-ാം ചരമവാർഷികാചരണം ഇന്ന്. മദറിന്‍റെ ചരമവാർഷികദിനം 25നാണ്. ചരമവാർഷിക ദിനാചരണത്തോടനുബന്ധിച്ച് മദർ ഷന്താളിന്‍റെ കബറിടം സ്ഥിതി ചെയ്യുന്ന അതിരമ്പുഴ ആരാധനമഠം ചാപ്പലിൽ നടന്നുവന്ന നാല്പതുമണി ആരാധന ഇന്നലെ വൈകുന്നേരം സമാപിച്ചു. ഇന്നു രാവിലെ 10.30ന് മഠം ചാപ്പലിൽ മദർ ഷന്താളിന്‍റെ കബറിടത്തിങ്കൽ ഒപ്പീസ് നടത്തും. തുടർന്ന് സെന്‍റ് മേരീസ് ഫൊറോനാ പള്ളിയിൽ ഇടുക്കി മെത്രാൻ മാർ ജോൺ നെല്ലിക്കുന്നേലിന്‍റെ മുഖ്യകാർമികത്വത്തിൽ വിശുദ്ധ കുർബാന അർപ്പിക്കും. മദർ ഷന്താളിന്‍റെ നാമകരണ നടപടികളുടെ ബിഷപ് ഡെലഗേറ്റും വികാരി ജനറാളുമായ മോൺ. സ്കറിയ കന്യാകോണിൽ, പോസ്റ്റുലേറ്റർ റവ.ഡോ. ജോസ് കൊല്ലാറ, പ്രൊമോട്ടർ ഓഫ് ജസ്റ്റീസ് റവ.ഡോ. ടോം പുത്തൻകളം, നോട്ടറി ഫാ. തോമസ് പ്ലാപ്പറമ്പിൽ, നിരണം മാർത്തോമ്മാ ശ്ലീഹാ സെമിനാരി സ്പിരിച്ച്വൽ ഫാദർ ഫാ. ജോർജ് വല്ലയിൽ, അതിരമ്പുഴ ലിസ്യു മൈനർ സെമിനാരി റെക്ടർ ഫാ. ജോർജ് വള്ളിയാംതടം എംസിബിഎസ്, തെള്ളകം ചെറുപുഷ്പാശ്രമം പ്രിയോർ ഫാ. ജോസഫ് ചാലിച്ചിറ ഒസിഡി എന്നിവർ സഹകാർമികരാകും. വിശുദ്ധ കുർബാനയെത്തുടർന്ന് സെന്‍റ് മേരീസ് പാരീഷ് ഹാളിൽ ശ്രാദ്ധവിരുന്ന് നടത്തും. ആരാധന സന്യാസിനീ സമൂഹത്തിന്‍റെ സുപ്പീരിയർ ജനറൽ മദർ റോസിലി ഒഴുകയിൽ, അതിരമ്പുഴ ഫൊറോനാ പള്ളി വികാരി റവ.ഡോ. ജോസഫ് മുണ്ടകത്തിൽ, നാമകരണ നടപടികളുടെ പോസ്റ്റുലേറ്റർ റവ.ഡോ. ജോസഫ് കൊല്ലാറ, വൈസ് പോസ്റ്റുലേറ്റർമാരായ സിസ്റ്റർ തെക്ല എസ്എബിഎസ്, സിസ്റ്റർ എൽസ പൈകട എസ്എബിഎസ് എന്നിവർ നേതൃത്വം നൽകും.

ഹയര്‍ സെക്കന്‍ഡറി പരീക്ഷ: ജില്ലയില്‍ 79.39 ശതമാനം വിജയം

കോട്ടയം: ഹയര്‍സെക്കന്‍ഡറി പരീക്ഷയില്‍ ജില്ലയില്‍ 79.39 ശതമാനം വിജയം. റഗുലര്‍ വിഭാഗത്തില്‍ 130 സ്‌കൂളുകളില്‍ നിന്നായി 18,690 പേര്‍ പരീക്ഷയെഴുതിയതില്‍ 14,838 പേര്‍ ഉപരിപഠനത്തിന് യോഗ്യത നേടി. 1,899 പേര്‍ എല്ലാ വിഷയങ്ങള്‍ക്കും എ പ്ലസ് നേടി. ടെക്നിക്കല്‍ സ്‌കൂള്‍ വിഭാഗത്തില്‍ 53.66 ശതമാനവും ഓപ്പണ്‍ സ്‌കൂള്‍ വിഭാഗത്തില്‍ 63.2 ശതമാനം വിദ്യാര്‍ഥികളും ഉപരിപഠനത്തിനുള്ള യോഗ്യത നേടി. ടെക്‌നിക്കല്‍ സ്‌കൂളില്‍ 123 പേര്‍ പരീക്ഷ എഴുതിയപ്പോള്‍ 66 പേര്‍ ഉപരിപഠനത്തിന് അര്‍ഹരായി. 231 പേര്‍ പരീക്ഷ എഴുതിയ ഓപ്പണ്‍ സ്‌കൂള്‍ വിഭാഗത്തില്‍ 146 പേര്‍ ഉപരിപഠനത്തിന് അര്‍ഹരായി. മൂന്നു വിദ്യാര്‍ഥികള്‍ എല്ലാ വിഷയത്തിലും എ പ്ലസ് നേടി.

ഇടയ്ക്കാട്ടു പള്ളിക്ക് ധന്യനിമിഷം

കോട്ടയം: മാര്‍ മാത്യു മാക്കീല്‍ പിതാവിന്‍റെ പുണ്യ കബറിടം സ്ഥിതി ചെയ്യുന്ന ഇടയ്ക്കാട്ട് സെന്‍റ് ജോര്‍ജ് ക്‌നാനായ കത്തോലിക്ക ഫൊറോന പള്ളിക്കും ധന്യനിമിഷം. കോട്ടയം വികാരിയത്തിന്‍റെ പ്രഥമ മെത്രാനായിരുന്ന മാര്‍ മാത്യു മാക്കില്‍ തന്‍റെ ഭദ്രാസനമായി തെരഞ്ഞെടുത്തതും അദ്ദേഹം ഏറെ സ്‌നേഹിച്ച ഇടയ്ക്കാട്ടു പള്ളിയായിരുന്നു. അദ്ദേഹത്തിന്‍റെ കബറിടം സ്ഥിതിചെയ്യുന്നതുകൊണ്ടുതന്നെ ഈ ദേവാലയം ഇന്നു വിശുദ്ധിയുടെ പരിമളത്തിലാണ്. ഒരു നിയോഗംപോലെ പിതാവിന്‍റെ കബറിടത്തില്‍ സ്ഥിരമായി പ്രാര്‍ഥന നടത്താൻ തുടക്കംകുറിച്ചത് വിസിറ്റേഷന്‍ സന്യാസിനി സമൂഹത്തിലെ സിസ്റ്റേഴ്‌സായിരുന്നു. തുടര്‍ന്ന് നാടിന്‍റെ നാനാഭാഗത്തുനിന്ന് ആളുകള്‍ പ്രാര്‍ഥിക്കാനായിയെത്തി. പ്രാര്‍ഥനകള്‍ ഫലമണിയുന്ന നൂറു നൂറു ഉദാഹരണങ്ങളാണ് ഇവിടെ ഒരോ ദിവസവും ഉണ്ടാകുന്നത്. അനുഭവ സാക്ഷ്യങ്ങള്‍ പറയുന്നതിനായി ധാരാളം പേരെത്തുന്നു. അസാധ്യ കാര്യങ്ങളുടെ ഫലപ്രാപ്തിക്കായിട്ടാണ് പലരും പിതാവിന്‍റെ കബറിടത്തിങ്കല്‍ എത്തുന്നത്. ചരമദിനമായ ജനുവരി 26ന് പിതാക്കന്മാരുടെ നേതൃത്വത്തില്‍ പ്രത്യേക പ്രാര്‍ഥനകളും മാക്കീല്‍ കുടുംബത്തിന്‍റെ നേതൃത്വത്തില്‍ ശ്രാദ്ധ സദ്യയും നടത്തിവരുന്നു. മാര്‍ മാത്യൂ മാക്കീൽ മ്യൂസിയവും പള്ളിയോടു ചേർന്നുണ്ട്. ധന്യപദവി പ്രഖ്യാപനത്തെ ഇടയ്ക്കാട്ട് പള്ളിയും വിസിറ്റേഷന്‍ സന്യാസിനി സമൂഹവും വലിയ ആഹ്‌ളാദത്തോടെയും പ്രാര്‍ഥനയോടെയുമാണ് സ്വീകരിച്ചത്. പ്രഖ്യാപനം വന്നയുടന്‍ ഇടയ്ക്കാട്ട് ഫൊറോന വികാരി ഫാ. സൈമണ്‍ പുല്ലാട്ടിന്‍റെയും രൂപതാതല നാമകരണ നടപടികളുടെ വൈസ് പോസ്റ്റുലേറ്റര്‍ സിസ്റ്റര്‍ മേഴ്‌സിലിറ്റിന്‍റെയും നേതൃത്വത്തില്‍ സിസ്‌റ്റേഴ്‌സും ഇടവക ജനങ്ങളും കബറിടത്തിങ്കലെത്തി പുഷ്പചക്രം അര്‍പ്പിക്കുകയും പ്രാര്‍ഥനകള്‍ നടത്തുകയും ചെയ്തു. ധന്യന്‍ പദവി പ്രഖ്യാപനത്തിന്‍റെ സമ്മേളനം നടത്താനുളള തയാറെടുപ്പിലാണ് കോട്ടയം അതിരൂപതയും വിസിറ്റേഷന്‍ സന്യാസിനി സമൂഹവും.

ആത്മീയതയിൽ വളർന്ന മത്തായിക്കുഞ്ഞ്

കോട്ടയം: ചെറുപ്പം മുതലേ പൗരോഹിത്യ ജീവിതത്തോട് വലിയ ആകര്‍ഷണമുള്ള വ്യക്തിയായിരുന്നു മത്തായിക്കുഞ്ഞ് എന്ന മാക്കീല്‍ മാത്യു. പിതൃസഹോദരനായ മാക്കീല്‍ യൗസേപ്പച്ചനോടും മറ്റു വൈദികരോടുമുള്ള സഹവാസം ദൈവവിളി ശക്തമാകാന്‍ കാരണമായി. പിതൃസഹോദരന്‍ ബലി അര്‍പ്പിക്കുമ്പോള്‍ കുര്‍ബാനയില്‍ സഹായിച്ചിരുന്നത് മത്തായിക്കുഞ്ഞായിരുന്നു. 1865ൽ മാന്നാനം സെമിനാരിയില്‍ വൈദിക പഠനത്തിനായും 1866ല്‍ വരാപ്പുഴ മേജര്‍ സെമിനാരിയില്‍ ഉപരിപഠനത്തിനായും ചേര്‍ന്നു. 1874 മേയ് 20ന് വൈദികനായി. പുത്തന്‍പള്ളി സെമിനാരിയിലും ബ്രഹ്മമംഗലം സെമിനാരിയിലും അധ്യാപകനായി സേവനം ചെയ്തു. കൈപ്പുഴ, ഇടയ്ക്കാട്, കടുത്തുരുത്തി, ബ്രഹ്മമംഗലം പള്ളികളില്‍ വികാരി, ബിഷപ് മര്‍സെല്ലിനോസ് ബരാര്‍ദിയുടെ സെക്രട്ടറി എന്നീ നിലകളിലും പ്രവര്‍ത്തിച്ചു. 1889ല്‍ ബിഷപ് ചാൾസ് ലവീഞ്ഞ് തെക്കുംഭാഗര്‍ക്കായുള്ള വികാരി ജനറാളാക്കി. ക്‌നാനായ സമുദായത്തിലെ സ്ത്രീജനങ്ങളുടെ ആധ്യാത്മികവും വിദ്യാഭ്യാസപരവുമായ സമുദ്ധാരണം ആവശ്യമാണെന്ന് മനസിലാക്കിയ ഇദ്ദേഹം 1892 ജൂണ്‍ 24നു വിസിറ്റേഷന്‍ സന്യാസിനി സമൂഹത്തിനു തുടക്കം കുറിച്ചു. 1896ല്‍ ചങ്ങനാശേരി വികാരിയത്തിന്‍റെ വികാരി അപ്പസ്‌തോലിക്കയായി. 1911 ഓഗ്‌സറ്റ് 29നു തെക്കുംഭാഗര്‍ക്കുള്ള കോട്ടയം വികാരിയത്തിന്‍റെ വികാരി അപ്പസ്‌തോലിക്കയായി.1914 ജനുവരി 26നു മാര്‍ മാത്യു മാക്കീല്‍ നിത്യതയിലേക്ക് വിളിക്കപ്പെട്ടു. കൃതജ്ഞതയുടെ പുണ്യനിമിഷങ്ങള്‍: മാര്‍ മാത്യു മൂലക്കാട്ട് കോട്ടയം: ചങ്ങനാശേരി വികാരിയത്തിന്‍റെയും കോട്ടയം വികാരിയത്തിന്‍റെയും പ്രമ വികാരി അപ്പസ്‌തോലിക്കയും വിസിറ്റേഷന്‍ സന്യാസിനി സമൂഹത്തിന്‍റെ സ്ഥാപകനുമായ ദൈവദാസന്‍ മാര്‍ മാത്യു മാക്കീലിന്‍റെ ധന്യന്‍ പദവി കോട്ടയം അതിരൂപതയ്ക്ക് ആഹ്ളാദത്തിന്‍റെയും പ്രാര്‍ഥനയുടെയും കൃതജ്ഞതയുടെയും പുണ്യനിമിഷങ്ങള്‍. ഇടയനടുത്ത അജപാലന നൈപുണ്യവും ജീവിത വിശുദ്ധിയും ഒന്നുപോലെ സമ്മേളിച്ച അനുപമ വ്യക്തിത്വത്തിന്‍റെ ഉടമയായിരുന്നു യുഗപ്രഭാവനായ ദൈവദാസന്‍ മാര്‍ മാത്യു മാക്കീലെന്ന് കോട്ടയം ആര്‍ച്ച്ബിഷപ് മാര്‍ മാത്യു മൂലക്കാട്ട് പറഞ്ഞു. പരിശുദ്ധ സിംഹാസനത്തിന്‍റെ ധന്യപദവി പ്രഖ്യാപനത്തെ വലിയ കൃതജ്ഞതയോടെ ദൈവത്തോടു നന്ദിപറയാനുള്ള പ്രാര്‍ഥനാവേളയായി കാണുന്നതായും ആര്‍ച്ച്ബിഷപ് പറഞ്ഞു. വിദേശ മിഷനറിമാരുടെ ഭരണത്തില്‍നിന്നു നാട്ടു മെത്രാന്‍മാരുടെ കൈകളിലേക്ക് സീറോ മലബാര്‍ സഭ എല്‍പ്പിക്കപ്പെട്ട അവസരത്തില്‍ വ്യക്തമായ ഉള്‍ക്കാഴ്ചയോടെ സഭാ പൈതൃകത്തെ പരിപാലിച്ചു വലിയ പുരോഗതിയിലേക്ക് സഭയെ നയിക്കുന്നതിനു നേതൃത്വം നല്‍കാന്‍ മാക്കീല്‍ പിതാവിനു സാധിച്ചതായും ആര്‍ച്ച്ബിഷപ് മാര്‍ മാത്യു മൂലക്കാട്ട് അനുസ്മരിച്ചു.

എരുമേലിക്ക് ഇനി 24 വാർഡ്: പുതിയ പഞ്ചായത്തില്ല

എരുമേലി: തദ്ദേശ തെരഞ്ഞെടുപ്പ് അടുത്തിരിക്കെ വാർഡുകളുടെ നിർണയത്തിൽ അന്തിമ വിജ്ഞാപനമായതോടെ ഒരു വാർഡ് കൂടി വർധിച്ച് 24 വാർഡുകളായി എരുമേലി. ജില്ലയിൽ ഏറ്റവും വിസ്തൃതിയുള്ള പഞ്ചായത്ത്‌ എന്ന സ്ഥാനം ഇതോടെ വീണ്ടും എരുമേലിക്ക് തന്നെ. വിസ്തൃതിയിലും വാർഡുകളുടെ എണ്ണത്തിലും മുമ്പും എരുമേലിയായിരുന്നു മുന്നിൽ. പുതിയ പഞ്ചായത്ത്‌ രൂപീകരണം നടന്നിരുന്നുവെങ്കിൽ എരുമേലി രണ്ട് പഞ്ചായത്തായി മാറുമായിരുന്നു. ഇതിന് എല്ലാ നടപടികളും പൂർത്തിയായി വന്നപ്പോഴാണ് ഒടുവിൽ പ്രളയം മൂലം സംസ്ഥാനം നേരിട്ട സാമ്പത്തിക പ്രതിസന്ധിയിൽ പുതിയ പഞ്ചായത്തുകളുടെ രൂപീകരണം ഒഴിവാക്കപ്പെട്ടത്. ഇക്കഴിഞ്ഞ നവംബറിലാണ് വാർഡ് നിർണയം നടന്നത്. തുടർന്ന് ആക്ഷേപങ്ങൾ സ്വീകരിച്ചു ഹിയറിംഗ് നടത്തിയ ശേഷമാണ് അന്തിമ നിർണയമായി ഇപ്പോൾ വിജ്ഞാപനമായിരിക്കുന്നത്. നിലവിലുണ്ടായിരുന്ന 23 വാർഡുകളിൽ പലതിന്‍റെയും അതിരുകളും വോട്ടർമാരുടെ എണ്ണവും കുറച്ചും കൂട്ടിച്ചേർത്തുമാണ് 24 വാർഡുകളാക്കി ഇപ്പോൾ പുനർ നിർണയിക്കപ്പെട്ടിരിക്കുന്നത്. അതുകൊണ്ട് തന്നെ പഴയ അതിരുകൾ പ്രകാരമല്ല വാർഡുകൾ. ഒന്ന് മുതൽ മൂന്ന് വരെ പഴയ വാർഡുകൾ ആണ്. നാലാമത്തെ വാർഡായിരുന്ന ചെറുവള്ളി എസ്റ്റേറ്റ് ഏറ്റവും അവസാനത്തെ (24) വാർഡായി മാറി. ഇതോടെ നാല് മുതൽ വാർഡുകളുടെ പഴയ നമ്പർ മാറി. പുതിയ വാർഡ് രൂപീകരിച്ചത് മണിപ്പുഴ ആണ്. പ്രപ്പോസ്, എരുമേലി ടൗൺ, ശ്രീനിപുരം വാർഡുകളുടെ അതിർത്തികളിൽ മാറ്റം വരുത്തിയാണ് ഈ പുതിയ വാർഡിന്‍റെ രൂപീകരണം. 20 ആണ് മണിപ്പുഴ വാർഡിന്‍റെ നമ്പർ. പുതിയ മണിപ്പുഴ വാർഡിന്‍റെ ജനസംഖ്യ 1971 ആണ്. അതിർത്തി ഇങ്ങനെ - വടക്ക് നെടുങ്കാവുവയൽ ഐടിസി മുതൽ മറ്റന്നൂർക്കര റോഡ്, കിഴക്ക് കരിങ്കല്ലുമ്മുഴി മുതൽ മറ്റന്നൂർക്കര റോഡ്, തെക്ക് കരിങ്കല്ലുമ്മുഴി മുതൽ ചെമ്പകപ്പാറ വെയ്റ്റിംഗ് ഷെഡ് ഗേറ്റ് റോഡ്, പടിഞ്ഞാറ് ചെമ്പകപ്പാറ വെയ്റ്റിംഗ് ഷെഡ് ഗേറ്റ് റോഡ് മുതൽ മണിപ്പുഴ ജംഗ്ഷനും തുടർന്ന് മണിപ്പുഴ ദ്വീപും തോടും. ജനസംഖ്യയിൽ മുന്നിൽ ഉമ്മിക്കുപ്പ വാർഡാണ്. 2004 ആണ് ജനസംഖ്യ. തൊട്ടടുത്ത് 2001 ജനസംഖ്യയുമായി മുക്കൂട്ടുതറ വാർഡ് രണ്ടാം സ്ഥാനത്തുണ്ട്. ഏറ്റവും കുറവ് ഏറ്റവും അവസാനത്തെ വാർഡായി മാറിയ ചെറുവള്ളി എസ്റ്റേറ്റ് ആണ്. ഇവിടുത്തെ ജനസംഖ്യ 1206 ആണ്. ജനസംഖ്യയിൽ ഇതിന്‍റെ പിന്നിൽ 1233 പേരുള്ള എയ്ഞ്ചൽവാലി വാർഡാണ്. വാർഡുകൾ മാറി മറിയുകയും വോട്ടർമാരുടെ എണ്ണത്തിൽ മാറ്റങ്ങളും ആയതോടെ ആശയക്കുഴപ്പത്തിലാണ് ഇടതു വലതു മുന്നണികൾ. രസ്യമായി പ്രതികൂല അഭിപ്രായം ഇടതുപക്ഷത്ത് നിന്നുമുയർന്നിട്ടില്ലെങ്കിലും അനുകൂല അഭിപ്രായം ശക്തവുമല്ല. അതേസമയം തികച്ചും അശാസ്ത്രീയമായാണ് പുനർ നിർണയം നടത്തിയിട്ടുള്ളതെന്ന് കോൺഗ്രസ്‌ നേതൃത്വം ആരോപിക്കുന്നു. അതേസമയം ബിജെപിയുടെ ഭാഗത്ത്‌ നിന്നു പ്രതികരണമുണ്ടായിട്ടില്ല. വിശദമായി പഠിക്കട്ടെ എന്ന് ബിജെപി നേതൃത്വം പറയുന്നു.

കാർഷിക സെമിനാർ

ചിറക്കടവ്: ചിറക്കടവ് സർവീസ് സഹകരണ ബാങ്കിന്‍റെ ആഭിമുഖ്യത്തിൽ ചിറക്കടവ് കൃഷിഭവന്‍റെ സഹകരണത്തോടെ ബാങ്ക് ആസ്ഥാന മന്ദിരത്തിൽ കാർഷിക സെമിനാർ നടത്തി. ബാങ്ക് പ്രസിഡന്‍റ് അഭിലാഷ് ചന്ദ്രൻ സെമിനാർ ഉദ്ഘാടനം ചെയ്തു. ചിറക്കടവ് കൃഷി ഓഫീസർ പ്രജിത പ്രകാശ് , അസിസ്റ്റന്‍റ് കൃഷി ഓഫീസർ ശ്രീജ മോഹൻ, ബാങ്ക് വൈസ് പ്രസിഡന്‍റ് ലാജി മാടത്താനിക്കുന്നേൽ, ബാബുരാജ് വലിയേടത്ത്, ജോർജുകുട്ടി പൂതക്കുഴി, എം.ജി. ഗോപാലകൃഷ്ണൻ നായർ, മോളി ജേക്കബ്, സെക്രട്ടറി ലേഖാകുമാരി തുടങ്ങിയവർ പ്രസംഗിച്ചു. കർഷകർക്ക് ഹൈബ്രിഡ് പച്ചക്കറി വിത്തുകളും തൈകളും നൽകി.

രാജീവ് ഗാന്ധി അനുസ്മരണം

ചങ്ങനാശേരി: മുന്‍ പ്രധാനമന്ത്രി രാജീവ് ഗാന്ധിയുടെ ചരമവാര്‍ഷികാചരണം കോണ്‍ഗ്രസ് വാഴപ്പള്ളി മണ്ഡലം കമ്മിറ്റിയുടെ നേതൃത്വത്തില്‍ നടത്തി. മണ്ഡലം പ്രസിഡന്‍റ് റോജി ആന്‍റണി അധ്യക്ഷത വഹിച്ചു. ഡിസിസി ജനറല്‍ സെക്രട്ടറി പി.എച്ച്. നാസര്‍ ഉദ്ഘാടനം ചെയ്തു. മാടപ്പള്ളി ബ്ലോക്ക് പഞ്ചായത്ത് മെംബര്‍ വര്‍ഗീസ് ആന്‍റണി, പഞ്ചായത്ത് മെംബര്‍ ലാലിമ്മ ടോമി, ബിജു പുല്ലുകാട്, എം.ഡി. ദേവരാജന്‍, മനോജ് വര്‍ഗീസ്, പി.എം. തോമസ്, സാബു കളരിക്കല്‍, ബിജി മൂലയില്‍, മണിവാസന്‍ തോപ്പില്‍, സുരേഷ് രാജു, ടോമി കാലായില്‍, ജോസഫ് കുഞ്ഞ് തേവലക്കര, പാപ്പച്ചന്‍ നേര്യംപറമ്പില്‍ എന്നിവര്‍ പ്രസംഗിച്ചു. ചങ്ങനാശേരി: ഇന്ത്യന്‍ നാഷണല്‍ കോണ്‍ഗ്രസ് ടൗണ്‍ മണ്ഡലത്തിന്‍റെ ആഭിമുഖ്യത്തില്‍ നഗരസഭാ കവാടത്തില്‍ മുന്‍ പ്രധാനമന്ത്രി രാജീവ് ഗാന്ധി അനുസ്മരണവും പുഷ്പാര്‍ച്ചനയും നടത്തി. ടൗണ്‍ വെസ്റ്റ് മണ്ഡലംപ്രസിഡന്‍റ് തോമസ് അക്കര അധ്യക്ഷത വഹിച്ചു. ഡിസിസി ജനറല്‍ സെക്രട്ടറി പി.എച്ച്. നാസര്‍ ഉദ്ഘാടനം ചെയ്തു. പി.എന്‍. നൗഷാദ്, സിയാദ് അബ്ദുള്‍ റഹ്‌മാന്‍, പി. സുരേഷ്, ഫ്രാന്‍സിസ് ആന്‍റോസ്, മജീദ് ഖാന്‍, ഷാജഹാന്‍, കെ.എം. ഷാജി, ശ്രീദേവി അജയകുമാര്‍, അന്‍സാരി ബാപ്പു, റെഫീഖ് പുതുപ്പറമ്പ്, ജോബ് വിരിത്തിക്കരി എന്നിവര്‍ പ്രസംഗിച്ചു. മാടപ്പള്ളി മണ്ഡലം കോണ്‍ഗ്രസ് കമ്മിറ്റിയുടെ ആഭിമുഖ്യത്തില്‍ മുന്‍ പ്രധാനമന്ത്രി രാജീവ് ഗാന്ധിയുടെ രക്തസാക്ഷിത്വ ദിനാചരണം തെങ്ങണയില്‍ നടത്തി. ജില്ല കോണ്‍ഗ്രസ് കമ്മിറ്റി നിര്‍വാഹസമിതിയംഗം ആന്‍റണി കുന്നുംപുറം ഉദ്ഘാടനം ചെയ്തു. മണ്ഡലം പ്രസിഡന്‍റ് ബാബു കുരീത്ര അധ്യക്ഷത വഹിച്ചു. പി.എം. മോഹനന്‍പിള്ള, ജയശ്രീ പ്രഹ്ലാദന്‍, പി.എം. ഷെഫീക്, ജോര്‍ജുകുട്ടി കൊഴുപ്പക്കളം, ജസ്റ്റിന്‍ പാറുകണ്ണില്‍, റോസിലിന്‍ ഫിലിപ്പ്, സി.എസ്. രമേശ്, ജോര്‍ജ് പുരയ്ക്കല്‍, ടി.എസ്. ബാലചന്ദ്രന്‍, എ.എസ്. രവീന്ദ്രന്‍ മാഷ്, ഗോപാലകൃഷ്ണന്‍ നായര്‍, ജി. ശിവരാജ്, ജയ്‌മോന്‍ തോയക്കളം തുടങ്ങിയവര്‍ പ്രസംഗിച്ചു.

മേഴ്സി ഹോം എംആര്‍ടി ഇന്‍സ്റ്റിറ്റ്യൂട്ട് 25-ാമത് വാര്‍ഷികത്തിനു തുടക്കം

ചങ്ങനാശേരി: ഭിന്നശേഷി അല്ലെങ്കില്‍ വേറിട്ട കഴിവുകളുള്ള കുട്ടികളെ അംഗീകരിക്കാനും മനസിലാക്കാനും വളര്‍ത്താനും എസ്ഡി സന്യാസിനീ സമൂഹം നല്‍കുന്ന സേവനം വിലപ്പെട്ടതാണെന്നും സമൂഹത്തിന് ഇതിലൂടെ സുവിശേഷത്തിന്‍റെ സന്ദേശമാണ് നല്‍കുന്നതെന്നും ആര്‍ച്ച്ബിഷപ് മാര്‍ തോമസ് തറയില്‍. മേഴ്സി ഹോം എംആര്‍ടി ഇന്‍സ്റ്റിറ്റ്യൂട്ടിന്‍റെ 25-ാം വാര്‍ഷികം (എന്‍.വിഷന്‍ 2025) ഉദ്ഘാടനം ചെയ്തു പ്രസംഗിക്കുകയായിരുന്നു ആര്‍ച്ച്ബിഷപ്. ചെത്തിപ്പുഴപള്ളി തിരുഹൃദയ പാരിഷ് ഹാളില്‍ നടന്ന സമ്മേളനത്തില്‍ എസ്ഡി പ്രൊവിന്‍ഷ്യല്‍ സുപ്പീരിയര്‍ സിസ്റ്റര്‍ ഡോ. ദീപ്തി ജോസ് അധ്യക്ഷത വഹിച്ചു. ചാണ്ടി ഉമ്മന്‍ എംഎല്‍എ മുഖ്യപ്രഭാഷണം നടത്തി. ഫാ. തോമസ് കല്ലുകുളം സിഎംഐ, ചങ്ങനാശേരി ജുഡീഷല്‍ ഫസ്റ്റ് ക്ലാസ് മജിസ്ട്രേറ്റ് സരിഗ എ.ആര്‍., ഡയറക്ടര്‍ അഡ്വ. സിസ്റ്റര്‍ ജ്യോതിസ് എസ്ഡി, പ്രിന്‍സിപ്പല്‍ സിസ്റ്റര്‍ ആന്‍ ജോസ് എസ്ഡി, സിസ്റ്റര്‍ റാണിറ്റ് എസ്ഡി, സാനിയ ജോസഫ് എന്നിവര്‍ പ്രസംഗിച്ചു.

സഹോദരന്‍റെ വിശപ്പു മാറ്റുന്നതില്‍നിന്ന് ഒഴിഞ്ഞുമാറരുത്: മാര്‍ തോമസ് തറയില്‍

ചങ്ങനാശേരി: സഹോദരന്‍റെ ഭൗതികവും ആത്മീയവുമായ വിശപ്പ് മാറ്റാനുള്ള ഉത്തരവാദിത്വത്തില്‍നിന്നും വിന്‍സെന്‍റ് ഡി പോള്‍ പ്രവര്‍ത്തകര്‍ ഒഴിഞ്ഞു മാറരുതെന്ന് ആര്‍ച്ച്ബിഷപ് മാര്‍ തോമസ് തറയില്‍. സൊസൈറ്റി ഓഫ് സെന്‍റ് വിന്‍സെന്‍റ് ഡി പോള്‍ ചങ്ങനാശേരി അതിരൂപത 71-ാമത് വാര്‍ഷികം തുരുത്തി മര്‍ത്ത്മറിയം ഫൊറോനാ പള്ളിയില്‍ ഉദ്ഘാടനം ചെയ്യുകയായിരുന്നു ആര്‍ച്ച്ബിഷപ്. സഹായങ്ങള്‍ നല്‍കുന്നതോടൊപ്പം സാമ്പത്തിക അച്ചടക്കം ശീലിക്കാനുള്ള പരിശീലനം നല്‍കാനും സുവിശേഷം പ്രസംഗിക്കാനും ഉദാരമായി കൊടുക്കാനുമുള്ള പരിശീലനം വളരുന്ന തലമുറയ്ക്ക് നല്‍കണമെന്നും ആര്‍ച്ച്ബിഷപ് ഉദ്‌ബോധിപ്പിച്ചു. തുരുത്തി ഏരിയ കൗണ്‍സില്‍ പ്രസിഡന്‍റ് എം.എം. മാത്യു പതാക ഉയര്‍ത്തി. സെന്‍ട്രല്‍ കൗണ്‍സില്‍ പ്രസിഡന്‍റ് തോമസ് ടി. മൂലയില്‍ അധ്യക്ഷത വഹിച്ചു. വരാപ്പുഴ സെന്‍ട്രല്‍ കൗണ്‍സില്‍ പ്രസിഡന്‍റ് ജോര്‍ജ് ജോസഫ് മുഖ്യപ്രഭാഷണം നടത്തി. ആയിരത്തോളം വിന്‍സെന്‍ഷ്യന്‍ പ്രവർത്തകർ പങ്കെടുത്തു. ഫാ. ജോസഫ് പനക്കേഴം, ഫാ. ജോസ് വരിക്കപ്പള്ളി എന്നിവര്‍ സന്ദേശങ്ങള്‍ നല്‍കി. വിശുദ്ധ കുര്‍ബാനയ്ക്ക് ഫാ. ജോബന്‍ നെടുംപറമ്പില്‍ കപ്പൂച്ചിന്‍ കാര്‍മികത്വം വഹിച്ചു. വിഒസിസി കോഴ്‌സ് പൂര്‍ത്തിയാക്കിയവര്‍ക്ക് ആര്‍ച്ച്ബിഷപ് സര്‍ട്ടിഫിക്കറ്റുകള്‍ വിതരണം ചെയ്തു.

"എസി കനാലിലെ കടകലും പോളയും നീക്കംചെയ്ത് ഒഴുക്ക് സുഗമമാക്കണം'

ചങ്ങനാശേരി: മനയ്ക്കച്ചിറ, പൂവം, ടെംകോ പാലം തുടങ്ങിയ ഭാഗങ്ങളില്‍ മണ്‍സൂണ്‍ കാലയളവില്‍ അടിക്കടിയുണ്ടാകുന്ന വെള്ളക്കെട്ട് ഒഴിവാക്കാന്‍ എസി റോഡില്‍ പുതുതായി നിര്‍മിച്ചിരിക്കുന്ന കലുങ്കുകള്‍ തുറക്കുന്നതുള്‍പ്പടെയുള്ള പ്രവര്‍ത്തനങ്ങള്‍ അടിയന്തരമായി ചെയ്യാന്‍ സര്‍ക്കാര്‍ തയാറാകണമെന്ന് എസി കനാല്‍ സംരക്ഷണ സമിതി ആവശ്യപ്പെട്ടു. എസി റോഡിന് തെക്കുവശത്ത് അടിക്കടിയുണ്ടാകുന്ന വെള്ളക്കെട്ട് ഒഴിവാക്കാന്‍ എസി കനാല്‍ മണിമല ആറ്റിലേക്ക് സംയോജിക്കുന്ന ഒന്നാംകര കനാല്‍ മുഖത്തെ എക്കല്‍ നീക്കി കനാലിലെ ഒഴുക്ക് വര്‍ധിപ്പിക്കണം. അതിവര്‍ഷം ശക്തമാകുന്നതിന് മുന്പ് കനാലിലെ കടകലും പോളയും നീക്കം ചെയ്ത് മാലിന്യമുക്തമാക്കണം. റെയില്‍വേ തോടുവഴി ആവണിത്തോട്ടിലൂടെ മനയ്ക്കച്ചിറ പുത്തന്‍ തോട്ടിലേക്ക് ഒഴുകുന്ന മലിനജലം ശാസ്ത്രീയമായി ഫില്‍റ്റര്‍ ചെയ്യണം. കനാലില്‍ അടിഞ്ഞുകൂടിയിരിക്കുന്ന എക്കല്‍ കോരിമാറ്റി സ്വഭാവിക നീരൊഴുക്ക് സുഗമമാക്കണം. കനാല്‍ സൗന്ദര്യവത്കരിച്ച് ടൂറിസ്റ്റുകളെ ആകര്‍ഷിക്കാന്‍ നടപടികള്‍ സ്വീകരിക്കണം. വെള്ളപ്പൊക്ക നിയന്ത്രണത്തിനും മലിനീകരണം തടയുന്നതിനും കനാല്‍ പള്ളാത്തുരുത്തിയിലേക്ക് തുറക്കണമെന്നും എസി കനാല്‍ സംരക്ഷണ സമിതി നടത്തിയ മണ്‍സൂണ്‍ ചര്‍ച്ചാ സമ്മേളനം ആവശ്യപ്പെട്ടു. സമിതി ചെയര്‍മാന്‍ നൈനാന്‍ മുളപ്പാംമഠം ഉദ്ഘാടനം ചെയ്തു. സമിതി ജനറല്‍ കണ്‍വീനര്‍ എ.സി. വിജയപ്പന്‍ അധ്യക്ഷത വഹിച്ചു. അലക്‌സാണ്ടര്‍ പുത്തന്‍പുര, കെ.ജെ. ജയിംസ് മുട്ടാര്‍ സുരേന്ദ്രന്‍, പൂവം വിശ്വപ്പന്‍, റോണി കുരിശുംമൂട്ടില്‍ തുടങ്ങിയവര്‍ പ്രസംഗിച്ചു.

മെഗാ വിദ്യാഭ്യാസ പ്രദര്‍ശനമേള 24ന്

പാലാ: പാലാ രൂപത എസ്എംവൈഎമ്മിന്‍റെ ആഭിമുഖ്യത്തില്‍ മെഗാ വിദ്യാഭ്യാസ പ്രദര്‍ശനമേള സംഘടിപ്പിക്കും. എഡ്യുഫെയര്‍ എന്ന പേരില്‍ 24നു രാവിലെ എട്ടുമുതല്‍ വൈകുന്നേരം അഞ്ചുവരെ ചൂണ്ടച്ചേരി സെന്‍റ് ജോസഫ്സ് എന്‍ജിനിയറിംഗ് കോളജിലാണ് എക്‌സ്‌പോ. ഇന്ത്യക്ക് അകത്തും പുറത്തുമുള്ള വിവിധ യൂണിവേഴ്‌സിറ്റികളും കോളജുകളും വിവിധ കോഴ്‌സുകളും തൊഴില്‍ സാധ്യതകളും പരിചയപ്പെടുത്തും. ആർട്‌സ്, എന്‍ജിനിയറിംഗ്, എംബിബിഎസ്, മെഡിക്കല്‍, പാരാമെഡിക്കല്‍, പ്രഫഷണല്‍ കോഴ്‌സുകള്‍ തുടങ്ങിയവ പരിചയപ്പെടുന്നതിനും അഡ്മിഷന്‍ നേടുന്നതിനും മേളയില്‍ അവസരമുണ്ട്. രജിസ്‌ട്രേഷന്‍ സൗജന്യമാണ്. രാവിലെ പത്തിന് കരിയര്‍ ഗൈഡന്‍സ് സെഷന്‍, ആപ്റ്റിറ്റ്യൂഡ് ടെസ്റ്റ് എന്നിവ നടത്തും.

അഴിമതിയിൽ മുങ്ങിക്കുളിച്ച ഇടതുസർക്കാർ രാജിവയ്ക്കണം: മോൻസ്

കടുത്തുരുത്തി: സമസ്ത മേഖലയിലും അഴിമതിയില്‍ മുങ്ങിക്കുളിച്ച ഇടതുപക്ഷ സര്‍ക്കാര്‍ കേരള ജനതയുടെ പ്രതിഷേധം കണക്കിലെടുത്ത് രാജിവച്ചു പുറത്ത് പോകണമെന്ന് കേരളാ കോണ്‍ഗ്രസ് എക്സിക്യൂട്ടീവ് ചെയര്‍മാന്‍ മോന്‍സ് ജോസഫ് എംഎല്‍എ. എല്‍ഡിഎഫ് സര്‍ക്കാര്‍ കോടികള്‍ ചെലവഴിച്ചു നടത്തുന്ന മന്ത്രിസഭാ വാര്‍ഷികാഘോഷത്തില്‍ പ്രതിഷേധിച്ചു യുഡിഎഫ് നിയോജക മണ്ഡലം കമ്മിറ്റി കടുത്തുരുത്തി ടൗണില്‍ നടത്തിയ റാലിയും പ്രതിഷേധ സമ്മേളനവും ഉദ്ഘാടനം ചെയ്യുകയായിരുന്നു അദ്ദേഹം. യുഡിഎഫ് നിയോജക മണ്ഡലം ചെയര്‍മാന്‍ ലൂക്കോസ് മാക്കീല്‍ അധ്യക്ഷത വഹിച്ചു. ടി.ജോസഫ്, മാഞ്ഞൂര്‍ മോഹന്‍കുമാര്‍, സുനു ജോര്‍ജ്, തോമസ് കണ്ണംതറ, എം.എന്‍. ദിവാകരന്‍ നായര്‍, സ്റ്റീഫന്‍ പാറാവേലി, ജെയിംസ് പുല്ലാപ്പള്ളി, എം.കെ. സംബജി, പ്രമോദ് കടന്തേരി തുടങ്ങിയവര്‍ പ്രസംഗിച്ചു.

അല്‍ഫോന്‍സ തീര്‍ഥാടന കേന്ദ്രത്തില്‍ മേയ് ഫ്‌ളവര്‍ പ്രോഗ്രാം 25 മുതല്‌

ഭരണങ്ങാനം: വിശുദ്ധ അല്‍ഫോന്‍സ തീര്‍ഥാടന കേന്ദ്രത്തില്‍ ഒരാഴ്ച നീണ്ടുനില്‍ക്കുന്ന ആത്മീയ വിരുന്ന് മേയ് ഫ്‌ളവര്‍ 2025 എന്ന പേരില്‍ വിവിധ പരിപാടികളോടെ നടത്തും. 25 മുതല്‍ 31 വരെയാണ് പ്രോഗ്രാം. വിപരീത സാഹചര്യങ്ങളില്‍ ഫലം ചൂടുന്ന മേയ് ഫ്‌ളവര്‍ വിശുദ്ധ അല്‍ഫോന്‍സായുടെ പ്രതീകമാണ്. ഏഴു വയസിനു താഴെ പ്രായമുള്ള കുഞ്ഞുങ്ങള്‍ക്കും അവരുടെ മാതാപിതാക്കള്‍ക്കുമായുള്ള ആത്മീയ ശുശ്രൂഷ 25ന് ഉച്ചകഴിഞ്ഞ് മൂന്നുമുതല്‍ 4.30 വരെ നടത്തും. ജിന്‍സി ജോസഫ് സന്ദേശം നല്‍കും. കുഞ്ഞുങ്ങള്‍ക്കു വേണ്ടി പ്രത്യേക സമര്‍പ്പണ പ്രാര്‍ഥനയും അഭിഷേക ശൂശ്രൂഷയും ഉണ്ടായിരിക്കും. 26ന് ഉച്ചകഴിഞ്ഞ് മൂന്നുമുതല്‍ അഞ്ചുവരെ അല്‍ഫോന്‍സിയന്‍ കുടുംബ സമ്മേളനം നടത്തും. അല്‍ഫോന്‍സിയന്‍ ആത്മീയതയില്‍ ജീവിക്കുന്ന കുടുംബങ്ങളുടെ കൂട്ടായ്മയാണിത്. ഫാ. ആന്‍റണി തോണക്കര സന്ദേശം നല്‍കും. 27ന് അല്‍ഫോന്‍സിയന്‍ വോളണ്ടിയേഴ്‌സിന്‍റെ കുടുംബസമ്മേളനം നടക്കും. ഷ്‌റൈനില്‍ സജീവ ശുശ്രൂഷ നിര്‍വഹിക്കുന്ന 101 വോളണ്ടിയേഴ്‌സിന്‍റെയും അവരുടെ കുടുംബങ്ങളുടെയും ഒത്തുചേരലാണിത്. ഫാ. തോമസ് കാഞ്ഞിരക്കോണം ഒഎഫ്എം ക്ലാസെടുക്കും. 28നു രാവിലെ 9.30 മുതല്‍ ഉച്ചയ്ക്ക് 12 വരെ സീനിയര്‍ സിസ്റ്റേഴ്‌സിനുള്ള ആത്മീയ ശുശ്രൂഷ നടക്കും. 60 വയസിനു മുകളില്‍ പ്രായമുള്ള സമര്‍പ്പിതര്‍ക്കു വേണ്ടിയുള്ള പ്രോഗ്രാമാണിത്. ഫാ. ജോസഫ് കൈതോലില്‍ സന്ദേശം നല്‍കും. ആരാധന, അഭിഷേക പ്രാര്‍ഥന, വിശുദ്ധ കുര്‍ബാന, സ്‌നേഹവിരുന്ന് എന്നിവയുണ്ടായിരിക്കും. 29ന് ജൂണിയര്‍ സമര്‍പ്പിതര്‍ക്കുള്ള ശുശ്രൂഷ രാവിലെ 9.30നു ജപമാലയോടെ ആരംഭിക്കും. ഫാ. ജോസഫ് പറമ്പിത്തടത്തില്‍ സന്ദേശം നല്‍കും. 30ന് ഉച്ചകഴിഞ്ഞ് നാലുമുതല്‍ ആറുവരെ അല്‍ഫോന്‍സിയന്‍ അധ്യാപക കൂട്ടായ്മ നടക്കും. ഡോ. സണ്ണി കുര്യാക്കോസ് ക്ലാസെടുക്കും. ക്ലാസുമുറികളിലെ അധ്യയനം അനുഭവമാക്കുന്നതിന് ആവശ്യമായ കര്‍മപദ്ധതികളെ സംബന്ധിച്ച ചര്‍ച്ചയും സമ്മേളനത്തില്‍ നടത്തും. 31നു രാവിലെ 9.30 മുതല്‍ 11.30 വരെ വിദ്യാലയ വര്‍ഷാരംഭ പ്രാര്‍ഥന നടത്തും. കുട്ടികള്‍ക്കുവേണ്ടി പ്രത്യേക അഭിഷേക ശുശ്രൂഷയുമുണ്ടായിരിക്കും. ഒരാഴ്ച നീണ്ടു നില്‍ക്കുന്ന ഈ ആത്മീയ വിരുന്നിന് ഭരണങ്ങാനം അല്‍ഫോന്‍സ ഷ്‌റൈന്‍ റെക്‌ടര്‍ റവ. ഡോ. അഗസ്റ്റിന്‍ പാലയ്ക്കപ്പറമ്പില്‍, വൈസ് റെക്‌ടര്‍മാരായ ഫാ. ആന്‍റണി തോണക്കര, ഫാ. ജോസഫ് ജോസഫ് അമ്പാട്ട് എന്നിവരും ഫാ. ഏബ്രഹാം കണിയാംപടിക്കല്‍, ഫാ. അലക്‌സ് മൂലക്കുന്നേല്‍, ഫാ. ഏബ്രഹാം ഏരിമറ്റം, ഫാ. സെബാസ്റ്റ്യന്‍ നടുത്തടം, ഫാ. ജോര്‍ജ് ചീരാകുഴി, ഫാ. കുരുവിള തുടിയന്‍പ്ലാക്കല്‍, ഫാ. തോമസ് തോട്ടുങ്കല്‍ എന്നിവരും ഷ്‌റൈനിലെ വോളണ്ടിയേഴ്‌സും നേതൃത്വം നല്‍കും. ഫോണ്‍: 8301065244.

ബിരുദപ്രവേശനത്തിന് മുഖാമുഖം പരിപാടിയുമായി ദേവമാതാ കോളജ്

കുറവിലങ്ങാട്: എം.ജി സർവകലാശാലാ ബിരുദ ഓണേഴ്‌സ് പാഠ്യപദ്ധതിയെ പരിചയപ്പെടുത്താനായി മുഖാമുഖം പരിപാടിയുമായി ദേവമാതാ കോളജ്. നാളെ 10 മുതൽ 11.30 വരെയാണ് പരിപാടി. ബിരുദ ഓണേഴ്സ് പാഠ്യപദ്ധതിയെ പരിചയപ്പെടുത്തുകയാണ് ലക്ഷ്യം. പുതിയ പാഠ്യ പദ്ധതിയെക്കുറിച്ചുള്ള സംശയനിവാരണങ്ങൾക്കും അവസരം നൽകും. എം.ജി സർവകലാശാല മാസ്റ്റർ ട്രെയിനർ ലഫ്. ഡോ. ജി ഹരിനാരായണൻ ക്ലാസിന് നേതൃത്വം നൽകും. ബിരുദപ്രവേശനം ലക്ഷ്യമിടുന്നവർക്കും രക്ഷിതാക്കൾക്കുമൊപ്പം പൊതുജനങ്ങൾക്കും പങ്കെടുക്കാം. ബിരുദ ഏകജാലക പ്രവേശനത്തിനുള്ള ഹെൽപ് ഡെസ്‌ക് സൗകര്യവും കോളജിൽ ഒരുക്കിയിട്ടുണ്ട്. കോളേജിലെ വിവിധ ഡിപ്പാർട്ട്‌മെന്‍റുകൾ, ലാബ്, ലൈബ്രറി എന്നിവ സന്ദർശിക്കുന്നതിനുള്ള അവസരവും നൽകും. വിവരങ്ങൾക്ക് ഫോൺ: 9895602191, 9447143659.

ധന്യന്‍ കദളിക്കാട്ടിലച്ചന്‍ കരുണാര്‍ദ്ര സ്‌നേഹത്തിന്‍റെ പ്രേഷിതന്‍: റവ.ഡോ. ഡൊമിനിക് വെച്ചൂര്‍

പാലാ: തിരുഹൃദയ ഭക്തനായ ധന്യന്‍ കദളിക്കാട്ടില്‍ മത്തായിയച്ചന്‍ ഈശോയുടെ തുറക്കപ്പെട്ട ഹൃദയത്തിലൂടെ ഒഴുക്കപ്പെട്ട കരുണാര്‍ദ്ര സ്‌നേഹത്തിന്‍റെ പ്രേഷിതനെന്ന് വടവാതൂര്‍ സെമിനാരി റെക്ടര്‍ റവ.ഡോ. ഡോമിനിക് വെച്ചൂര്‍. ധന്യന്‍ കദളിക്കാട്ടില്‍ മത്തായിയച്ചന്‍റെ ചരമവാര്‍ഷികത്തോടനുബന്ധിച്ചുള്ള നവനാളിന്‍റെഎട്ടാം ദിനമായ ഇന്നലെ പാലാ എസ്എച്ച് പ്രൊവിന്‍ഷ്യല്‍ ഹൗസ് കപ്പേളയില്‍ വിശുദ്ധ കുര്‍ബാന അര്‍പ്പിച്ച് സന്ദേശം നല്‍കുകയായിരുന്നു അദ്ദേഹം. തുറക്കപ്പെട്ട ഈശോയുടെ പാര്‍ശ്വത്തിലേക്ക് മത്തായി അച്ചന്‍ അനേകരെ നയിച്ചു. അതിന് അദ്ദേഹത്തിന് ബലം പകര്‍ന്നത് ദിവ്യകാരുണ്യ സന്നിധിയിലെ നിശബ്ദ പ്രാര്‍ഥനയാണ്. ദൈവത്തിന്‍റെ മനസ് കൂട്ടിവായിക്കാനും അത് മറ്റുള്ളവര്‍ക്ക് പങ്കുവച്ചു കൊടുക്കാനും ആ ധന്യജീവിതത്തിന് സാധിച്ചു. സുവിശേഷത്തിലെ ചെറിയ കടുകുമണി വളര്‍ന്നു പന്തലിച്ച് പക്ഷികള്‍ അതില്‍ വസിച്ചു. അതുപോലെതന്നെയാണ് മത്തായി അച്ചന്‍റെ ജീവിതവും. വിശുദ്ധരുടെ കബറിടം എപ്പോഴും പുണ്യകുടീരങ്ങളാണെന്നും വിശ്വാസജീവിത വഴികളില്‍ മരുഭൂമിയിലെ മരുപ്പച്ചപോലെയാണ് വിശുദ്ധരുടെ കബറിടത്തിലെ സാന്നിധ്യമെന്നും അദ്ദേഹം പറഞ്ഞു. ഇന്ന് ഉച്ചകഴിഞ്ഞ് മൂന്നിന് വിശുദ്ധ കുര്‍ബാന, നവനാള്‍ പ്രാര്‍ഥന: റവ. ഡോ.വര്‍ഗീസ് കുറ്റിയില്‍ ഒഐസി . ചരമവാര്‍ഷിക ദിനമായ നാളെ രാവിലെ പത്തിന് സമൂഹബലി. കൂരിയ ബിഷപ്പ് മാര്‍ സെബാസ്റ്റ്യന്‍ വാണിയപ്പുരയ്ക്കല്‍ മുഖ്യകാര്‍മികത്വം വഹിക്കും. 11.45ന് കബറിടത്തിങ്കല്‍ ചരമവാര്‍ഷികാചരണ പ്രാര്‍ഥനകള്‍. 12ന് ശ്രാദ്ധ നേര്‍ച്ച വെഞ്ചരിപ്പ്: മാര്‍ ജോസഫ് കല്ലറങ്ങാട്ട്.

തെരുവുനായശല്യം രൂക്ഷം : നായ്ക്കളുടെ ആക്രമണത്തിൽ ഒരാട് ചത്തു, മറ്റൊന്നിന് പരിക്ക്

തലയാഴം: വൈക്കത്തിന്‍റെ ഉൾപ്രദേശങ്ങളിൽ തെരുവുനായശല്യം രൂക്ഷമായി.ആൾത്താമസമില്ലാത്ത വീടുകളിലും ഒഴിഞ്ഞ പുരയിടങ്ങളിലും കൂട്ടമായി കടിപിടികൂടുന്ന നായ്ക്കൾ ജനജീവിതത്തിന് കടുത്ത ഭീഷണിയാകുകയാണ്. ഉൾപ്രദേശത്തെ നാട്ടുവഴികളിലൂടെ നടന്നുപോകുന്ന സ്ത്രീകളും കുട്ടികളും വയോധികരും ഏതു നിമിഷവും നായ്ക്കളുടെ ആക്രമണമുണ്ടാകാമെന്ന ഭയപ്പാടിലാണ്. വടിയുമായാണ് ഗ്രാമീണർ വഴിയിലൂടെ പോകുന്നത്. കുപ്പേടിക്കാവ് ഭഗവതി ക്ഷേത്രത്തിനു സമീപത്തെ പുഴയോരത്തും സമീപ പുരയിടങ്ങളിലും മൂപ്പതോളം നായ്ക്കൾ കൂട്ടമായാണ് കടിപിടികൂടി ചുറ്റിത്തിരിയുന്നത്. സ്കൂൾ തുറക്കാൻ ദിവസങ്ങൾ മാത്രം ശേഷിക്കെ തെരുവുനായ്ക്കളുടെ ശല്യംമൂലം കുട്ടികളെ വീടിനു പുറത്തിറക്കാൻ ഭയക്കുകയാണ്. ജനജീവിതത്തിന് കടുത്ത ഭീഷണിയായ തെരുവുനായ്ക്കളെ പിടികൂടുന്നതിന് പഞ്ചായത്ത് അധികൃതർ നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു. തോട്ടകത്ത് തെരുവുനായ്ക്കളുടെ ആക്രമണത്തിൽ ഒരാട് ചത്തു. മറ്റൊരാടിന് ഗുരുതരമായി പരിക്കേറ്റു. തലയാഴംതോട്ടകം നീലാംബരിയിൽ മഞ്ജുവിന്‍റെ ഒന്നരവയസ് പ്രായമുള്ള ആടാണ് ചത്തത്. ആടിനെ ആക്രമിക്കുന്നത് കണ്ട് വഴിയിലൂടെ പോയവർ ബഹളം വച്ചതിനാൽ ഇവരുടെ മറ്റു മൂന്ന് ആടുകൾ ആക്രമണത്തിൽ നിന്നു രക്ഷപ്പെട്ടു.കൂട്ടമായെത്തിയ തെരുവുനായ്ക്കൾ ആടിനെ വളഞ്ഞിട്ട് ആക്രമിച്ചു നിമിഷങ്ങൾക്കകം കടിച്ചുകൊല്ലുകയായിരുന്നു. തോട്ടകം ചിറയിൽപറമ്പ് ലതയുടെ മൂന്ന് ആടുകളിൽ ഒന്നിനെ തെരുവുനായ്ക്കൾ കടിച്ചു പരിക്കേൽപിച്ചു. ഇന്നലെ ഉച്ചകഴിഞ്ഞ് നാലോടെ തെരുവുനായ്ക്കൾ കൂട്ടമായെത്തി ആടിനെ കടിച്ചു ഗുരുതരമായി പരിക്കേൽപ്പിക്കുക യായിരുന്നു. ആടിന്‍റെ കരച്ചിൽ കേട്ട് ലത വടിയുമായി ഓടിച്ചെന്നപ്പോൾ നായ്ക്കൾ ഓടിമറഞ്ഞു. ഗുരുരമായി പരിക്കേറ്റതിനാൽ കുത്തിവച്ച് രക്ഷപ്പെടുത്താനുള്ള ശ്രമത്തിലാണ് ലത. നിർധന കുടുംബങ്ങൾ അധികവരുമാനത്തിനായി വളർത്തുന്ന കോഴികൾ, താറാവുകൾ ആടുകൾ തുടങ്ങിയവ തെരുവുനായ്ക്കളുടെ ആക്രമണത്തിൽ കൊല്ലപ്പെടുന്നതിനാൽ പലരും ആടുകോഴിവളർത്തലിൽനിന്നു പിൻവാങ്ങാൻ നിർബന്ധിതരാകുകയാണ്.

സർക്കാരിന്‍റെ നാലാം വാർഷികം യുഡിഎഫ് കരിദിനമായി ആചരിച്ചു

ഏറ്റുമാനൂർ: യുഡിഎഫ് നിയോജകമണ്ഡലം കമ്മിറ്റി സംസ്ഥാന സർക്കാരിന്‍റെ നാലാം വാർഷികം കരിദിനമായി ആചരിച്ചു. നിയോജകമണ്ഡലം ചെയർമാൻ ടോമി പുളിമാൻതുണ്ടം അധ്യക്ഷത വഹിച്ച യോഗം ഡിസിസി പ്രസിഡന്‍റ് നാട്ടകം സുരേഷ് ഉദ്ഘാടനം ചെയ്തു. യുഡിഎഫ് ജയ്സൺ ജോസഫ്, ഫിലിപ്പ് ജോസഫ്, ബിനു ചെങ്ങളം, പ്രിൻസ് ലൂക്കോസ്, അഡ്വ. ജി. ഗോപകുമാർ, മുഹമ്മദ് ജലീൽ, മൈക്കിൾ ജയിംസ്, നീണ്ടൂർ മുരളി, ജോബിൻ ജേക്കബ്, ജോറോയ് പൊന്നാറ്റിൽ, സോബിൻ തെക്കേടം തുടങ്ങിയവർ പ്രസംഗിച്ചു.

രാജീവ്ഗാന്ധി രക്തസാക്ഷിത്വ ദിനം ആചരിച്ചു

അതിരമ്പുഴ: കോൺഗ്രസ് അതിരമ്പുഴ മണ്ഡലം കമ്മിറ്റിയുടെ നേത്യത്വത്തിൽ മുൻ പ്രധാനമന്ത്രി രാജീവ് ഗാന്ധിയുടെ 34-ാമത് രക്‌തസാക്ഷിത്വ ദിനം ആചരിച്ചു. മണ്ഡലം പ്രസിഡന്‍റ് ജൂബി ഐക്കരക്കുഴി അധ്യക്ഷത വഹിച്ച യോഗം കോൺഗ്രസ് ബ്ലോക്ക് പ്രസിഡന്‍റ് ജോറോയി പൊന്നാറ്റിൽ ഉദ്ഘാടനം ചെയ്തു. പി.വി. മെക്കിൾ, കെ.ജി. ഹരിദാസ്, ബിജു വലിയമല, ടോം പണ്ടാരക്കളം, ജോസഫ് എട്ടുകാട്ടിൽ, ടോമി മണ്ഡപത്തിൽ, ജോയി വേങ്ങച്ചുവട്ടിൽ, ജസ്റ്റിൻ പാറശേരി, ജോജോ പുന്നക്കാപ്പള്ളി, ബെന്നി പാറയിൽ, ബാബു ഒതളമറ്റം, ഏബ്രഹാം കാട്ടുപാറ, ബേബി മ്ലാംകുഴി എന്നിവർ പ്രസംഗിച്ചു. കോട്ടയം: വിവര സാങ്കേതികതയുടെ വിപ്ലവത്തിന് ഭാരതത്തിൽ തുടക്കംകുറിച്ചത് രാജീവ് ഗാന്ധി ആയിരുന്നുവെന്ന് തിരുവഞ്ചൂർ രാധാകൃഷ്ണൻ എംഎൽഎ. ജില്ലാ കോൺഗ്രസ് കമ്മിറ്റിയുടെ ആഭിമുഖ്യത്തിൽ രാജീവ് ഗാന്ധി രക്തസാക്ഷിത്വ ദിനാചരണത്തിന്‍റെ ജില്ലാതല ഉദ്ഘാടനം നിർവഹിച്ച് പ്രസംഗിക്കുകയായിരുന്നു അദ്ദേഹം. ഡിസിസി പ്രസിഡന്‍റ് നാട്ടകം സുരേഷ് അധ്യക്ഷത വഹിച്ചു. കെപിസിസി രാഷ്‌ട്രീയ കാര്യ സമിതി അംഗം കെ.സി. ജോസഫ്, കുര്യൻ ജോയ്, കുഞ്ഞ് ഇല്ലംപള്ളി, പ്രദീപ് കുമാർ, സുധാ കുര്യൻ, മോഹൻ കെ. നായർ, ജി. ഗോപകുമാർ, ജെയ്ജി പാലയ്ക്കലോടി, യൂജിൻ തോമസ് എന്നിവർ പ്രസംഗിച്ചു. കൂരോപ്പട: മുൻ പ്രധാനമന്ത്രി രാജീവ് ഗാന്ധിയുടെ രക്തസാക്ഷിത്വ ദിനാചരണം കൂരോപ്പട മണ്ഡലം ജനശ്രീ കമ്മിറ്റിയുടെ നേതൃത്വത്തിൽ ആചരിച്ചു. ജനശ്രീ ഭവനിൽ ഛായാചിത്രത്തിൽ പുഷ്പാർച്ചന നടത്തി. ബ്ലോക്ക് കോ-ഓർഡിനേറ്റർ ഗോപൻ വെള്ളമറ്റം അധ്യക്ഷത വഹിച്ചു. ജനശ്രീ ബ്ലോക്ക് ചെയർമാൻ അനിൽ കൂരോപ്പട ഉദ്ഘാടനം ചെയ്തു. നേതാക്കളായ എം.പി ഗോപാലകൃഷ്ണൻ നായർ, അഭിലാഷ് ളാക്കാട്ടൂർ, രാജേന്ദ്രൻ തേരേട്ട്, കെ.കെ തോമസ്, ബിജു ജോസഫ് തുടങ്ങിയവർ പ്രസംഗിച്ചു.

ചെളിക്കുളമായ റോഡ് സഞ്ചാരയോഗ്യമാക്കി കന്യാസ്ത്രീകൾ

ഏറ്റുമാനൂർ: വർഷങ്ങളായി തകർന്നടിഞ്ഞ റോഡ് നന്നാക്കാൻ നഗരസഭാധികൃതർ തയാറായില്ല. മഴയിൽ ചെളിക്കുളമായി മാറിയ റോഡിലൂടെ സഞ്ചാരം അസാധ്യമായി. ഒടുവിൽ റോഡ് സഞ്ചാര യോഗ്യമാക്കാനും നഗരസഭാധികൃതരുടെ മനസു മാറാനും കന്യാസ്ത്രീകൾ രംഗത്തിറങ്ങി. കട്ടച്ചിറ പള്ളി റോഡാണ് തകർന്ന് ചെളിക്കുളമായത്. പള്ളിയും കോൺവന്‍റും എൽപി സ്കൂളും ക്ഷേത്രവുമൊക്കെയുള്ള റോഡാണിത്. സ്കൂൾ തുറക്കാൻ ദിവസങ്ങൾ മാത്രം. റോഡിലൂടെ നടന്നാൽ ചെളിയിൽ തെന്നി വീഴും. റോഡ് നന്നാക്കണമെന്ന് വർഷങ്ങളായി നാട്ടുകാർ ആവശ്യപ്പെടുന്നതാണെങ്കിലും നഗരസഭാധികൃതർ തിരിഞ്ഞു നോക്കിയില്ലെന്ന് നാട്ടുകാർ പറയുന്നു. റോഡിലൂടെ നടക്കാൻ തീർത്തും ബുദ്ധിമുട്ടായതോടെ നിവൃത്തിയില്ലാതെ ഇന്നലെ വിസിറ്റേഷൻ കോൺവന്‍റിലെ കന്യാസ്ത്രീകളും നാട്ടുകാരിൽ ചിലരും രംഗത്തിറങ്ങി. റോഡ്സൈഡിൽ കരിങ്കൽ ചീളുകൾ വിരിച്ച് തെന്നിവീഴാതെ നടന്നു പോകാനുള്ള സാഹചര്യമൊരുക്കി. എൽപി സ്കൂളിൽ പഠിക്കുന്ന കൊച്ചു കുട്ടികളെ ഓർത്തെങ്കിലും റോഡ് നന്നാക്കാൻ നഗരസഭാധികൃതർ അടിയന്തര നടപടി സ്വീകരിക്കണമെന്നാണ് നാട്ടുകാരുടെ ആവശ്യം.

ചെത്തിപ്പുഴ ആശുപത്രിയില്‍ പ്ലാസ്റ്റിക് സര്‍ജറി ക്യാമ്പ്

ചങ്ങനാശേരി: ചെത്തിപ്പുഴ സെന്‍റ് തോമസ് ഹോസ്പിറ്റല്‍ പ്ലാസ്റ്റിക് ആന്‍ഡ് റീകണ്‍സ്ട്രക്റ്റീവ് സര്‍ജറി വിഭാഗത്തിന്‍റെ നേതൃത്വത്തില്‍ ഹെയര്‍ ട്രാന്‍സ്പ്ലാന്‍റേഷന്‍ മെഡിക്കല്‍ ക്യാമ്പ് 26 മുതല്‍ 31 വരെ സംഘടിപ്പിക്കുന്നു. രാവിലെ ഒമ്പതു മുതല്‍ ഉച്ചയ്ക്ക് ഒന്നുവരെ നടക്കുന്ന ക്യാമ്പിന് ഹോസ്പിറ്റല്‍ പ്ലാസ്റ്റിക് ആന്‍ഡ് റീകണ്‍സ്ട്രക്റ്റീവ് സര്‍ജറി വിഭാഗം കണ്‍സള്‍ട്ടന്‍റ് പ്ലാസ്റ്റിക് സര്‍ജന്‍ ഡോ. പരിമളാ ദേവി എസ്. നേതൃത്വം നല്‍കും. രോഗികളുടെ സുരക്ഷയും ചികിത്സയുടെ ഫലപ്രാപ്തിയും ഉറപ്പാക്കുന്നതിനായി ഹെയര്‍ ട്രാന്‍സ്പ്ലാന്‍റേഷന്‍ പ്രൊസീജിയര്‍ വിദഗ്ധ പ്ലാസ്റ്റിക് സര്‍ജന്‍മാരുടെ നേരിട്ടുള്ള നേതൃത്വത്തിലാണ് ചെത്തിപ്പുഴ ആശുപത്രിയില്‍ നിര്‍വഹിക്കപ്പെടുന്നത്. കുറഞ്ഞ ചെലവില്‍ ഏറ്റവും മികച്ച സേവനം ഉറപ്പാക്കാന്‍ ഹോസ്പിറ്റലിലെ പ്ലാസ്റ്റിക് സര്‍ജറി വിഭാഗം പൂര്‍ണസജ്ജമാണെന്ന് ഹോസ്പിറ്റല്‍ എക്‌സിക്യൂട്ടീവ് ഡയറക്ടര്‍ ഫാ. ജയിംസ് പി. കുന്നത്ത് അറിയിച്ചു. ക്യാമ്പില്‍ പങ്കെടുക്കാൻ രജിസ്റ്റര്‍ ചെയ്യുന്നതിനുള്ള ഫോണ്‍ നമ്പര്‍: 0481 272 2100.

ചങ്ങനാശേരി അതിരൂപതയില്‍ മൈ പാരിഷ് ഡിജിറ്റല്‍ സോഫ്റ്റ്‌വേര്‍ സജ്ജമായി

ചങ്ങനാശേരി: അഞ്ച് ജില്ലകളിലായി വ്യാപിച്ചുകിടക്കുന്ന അതിരൂപതയിലെ 247 ഇടവകകളെയും 80,000 കുടുംബങ്ങളെയും അഞ്ചു ലക്ഷത്തോളമുള്ള ഇടവകാംഗങ്ങളെയും കോര്‍ത്തിണക്കുന്ന മൈ പാരീഷ് എന്ന സോഫ്റ്റ്‌വേറിന്‍റെ അവസാനഘട്ട ഉദ്ഘാടനം ആര്‍ച്ച്ബിഷപ് മാര്‍ തോമസ് തറയില്‍ മീഡിയ വില്ലേജില്‍ നിര്‍വഹിച്ചു. നൂതന വിവര സങ്കേതിക വിദ്യ സഭയുടെ സമഗ്ര വളര്‍ച്ചയ്ക്കും സുതാര്യമായ പ്രവര്‍ത്തനത്തിനും ഉതകുന്ന രീതിയിലാണ് മൈ പാരിഷ് സോഫ്റ്റ്‌വേര്‍ രൂപകല്പന ചെയ്തിരിക്കുന്നതെന്നും മാറി വരുന്ന സാഹചര്യത്തില്‍ രൂപതയുടെ പ്രവര്‍ത്തനങ്ങള്‍ ഏകോപിപ്പിക്കുന്നതിനും വിഭവശേഷി കാര്യക്ഷമമായി എല്ലാവര്‍ക്കും പ്രയാജനപ്പെടുത്തുന്നതിനും പുതിയ സോഫ്റ്റ്‌വേര്‍ ഉപകരിക്കുമെന്നും ആര്‍ച്ച്ബിഷപ് പറഞ്ഞു. അതിരൂപത മുഖ്യവികാരി ജനറാള്‍ മോണ്‍. ആന്‍റണി എത്തയ്ക്കാട് അധ്യക്ഷത വഹിച്ചു. മോണ്‍. സ്‌കറിയാ കന്യാകോണില്‍, കോഓര്‍ഡിനേറ്റര്‍ ഫാ. ആന്‍റണി കാച്ചാംകോട്, വിവിധ ഇടവകകളിലെ വികാരിമാര്‍ എന്നിവര്‍ സന്നിഹിതരായിരുന്നു. ഇടവകയുടെ വിവരങ്ങള്‍ അടങ്ങുന്ന പാരിഷ് രജിസ്റ്റര്‍, കണക്കുകള്‍ കൈകാര്യം ചെയ്യുന്ന അക്കൗണ്ടിംഗ് സോഫ്റ്റ്‌വേര്‍, മൊബൈല്‍ ആപ്ലിക്കേഷന്‍, ഇടവക വെബ്‌സൈറ്റ് എന്നിങ്ങനെ പ്രധാനമായും നാലു പ്രധാന ഭാഗങ്ങളാണ് മൈ പാരിഷ് പദ്ധതിയില്‍ ഉള്‍പ്പെടുത്തിയിരിക്കുന്നത്.

സ്കൂട്ടർ യാത്രികയെ ഇടിച്ചിട്ട കാർ നിർത്താതെപോയി

കുമരകം: കോട്ടയം ചാലുകുന്ന് ജംഗ്ഷനിൽ സ്കൂട്ടർ യാത്രക്കാരിയായ വീട്ടമ്മയെ ഇടിച്ചിട്ട കാർ നിർത്താതെ പോയി. ഇന്നലെ രാവിലെ പത്തിനായിരുന്നു അപകടം. കാലിന് സാരമായി പരുക്കേറ്റ കുമരകം വെന്നലശേരി ജേബുവിന്‍റെ ഭാര്യ മിലാ(50)നെ ഓട്ടോ ജീവനക്കാർ ചേർന്ന് ജില്ലാ ആശുപത്രിയിൽ എത്തിച്ചു. കോട്ടയത്തുനിന്നു കുമരകത്തേക്ക് പോകുകയായിരുന്നു വീട്ടമ്മ.

ആത്മഹത്യാഭീഷണി മുഴക്കി ഇതര സംസ്ഥാന തൊഴിലാളി

കോട്ടയം: കോട്ടയം മെഡിക്കല്‍ കോളജില്‍ ആശുപത്രിയില്‍ കത്തിയുമായി ആത്മഹത്യാ ഭീഷണി മുഴക്കി ഇതരസംസ്ഥാന തൊഴിലാളി. ഇയാളെ തടയാന്‍ ശ്രമിച്ച രണ്ടു പോലീസുകാര്‍ക്കു പരിക്കേറ്റു. ഒഡീഷ സ്വദേശി ഭാരത്ചന്ദ്ര ആദി ആണ് ആത്മഹത്യാ ഭീഷണി മുഴക്കിയത്. ഗാന്ധിനഗര്‍ സ്റ്റേഷനിലെ പോലീസുകാരായ ദിലീപ് വര്‍മ, ലിബിന്‍ എന്നിവര്‍ക്കാണ് പരിക്കേറ്റത്. ചൊവാഴ്ച രാത്രി 9.30നാണു സംഭവം. മെഡിക്കല്‍ കോളജ് ഗൈനക്കോളജി വിഭാഗത്തില്‍ അഡ്മിറ്റാക്കിയ ഭാര്യയെ ഡിസ്ചാര്‍ജ് ചെയ്തു കിട്ടണമെന്ന് ആവശ്യപ്പെട്ടാണ് ഭാരത്ചന്ദ്ര ആദി ഭീഷണി മുഴക്കിയത്. ആരോഗ്യം മോശമായതിനാല്‍ ഇപ്പോള്‍ ഡിസ്ചാര്‍ജ് ചെയ്യാന്‍ കഴിയില്ലെന്ന് ആശുപത്രി അധികൃതര്‍ അറിയിച്ചു. തുടര്‍ന്ന് കൈയിലുണ്ടായിരുന്ന കത്തികൊണ്ട് സ്വയം പരിക്കേല്പിച്ച് ആത്മഹത്യാ ഭീഷണി മുഴക്കി. അക്രമാ സക്തനായ യുവാവിനെ പിന്തിരിപ്പിക്കാന്‍ ഗാന്ധിനഗര്‍ സ്റ്റേഷനില്‍ നിന്നും എസ്ഐ പ്രദീപ് ലാല്‍, സീനിയര്‍ സിപിഒ ദിലീപ് വര്‍മ, സിപിഒമാരായ ശ്രീനിഷ്, ലിബിന്‍ എന്നിവര്‍ സംഭവസ്ഥലത്തെത്തി. ആത്മഹത്യാഭീഷണി മുഴക്കി നിന്ന യുവാവിനെ പിന്തിരിപ്പിക്കാന്‍ പോലീസ് ശ്രമിച്ചെങ്കിലും അയാള്‍ കൂടുതല്‍ അക്രമാസക്തനാവുകയായിരുന്നു. തുടര്‍ന്ന് പോലീസ് ഇയാളെ ബലപ്രയോഗത്തിലൂടെ കീഴടക്കി കത്തിപിടിച്ചുവാങ്ങുകയായിരുന്നു. ഈ സമയമാണ് ദിലീപിനും ലിബിനും പരിക്കേറ്റത്. തുടര്‍ന്ന് യുവാവിനെ മെഡിക്കല്‍ കോളജ് കാഷ്വാലിറ്റിയില്‍ പ്രവേശിപ്പിച്ചു ചികിത്സ നല്‍കി. പരിക്കേറ്റ ഉദ്യോഗസ്ഥരും കാഷ്വാലിറ്റിയില്‍ ചികിത്സ തേടി.

സൗത്ത് പാമ്പാടിയിൽ കൂറ്റൻ പെരുമ്പാമ്പിനെ പിടികൂടി

പാന്പാടി: സൗത്ത് പാമ്പാടി ഇല്ലിമറ്റം വെയിറ്റിംഗ്ഷെഡിന് പടിഞ്ഞാറുവശത്ത് കുരുവിക്കാട്ടുപടിയിൽനിന്ന് എട്ട് അടി നീളവും 15 കിലോ തൂക്കവും വരുന്ന പെരുമ്പാമ്പിനെ പിടികൂടി. ചൊവ്വാഴ്ച രാത്രിയാണ് സംഭവം. ഇല്ലിമറ്റം ചപ്പാത്ത് റോഡിലൂടെ വന്ന ഇരുചക്ര വാഹനക്കാരനാണ് റോഡിനു കുറുകെ കിടന്ന പാമ്പിനെ കണ്ടത്. അയൽവാസിയായ കല്ലുപുരയിൽ സന്തോഷിനെ വിവരം അറിയിച്ചു. പെരുമ്പാമ്പിനെ പിടിച്ച് പരിചയമുള്ള പാമ്പാടി പഞ്ചായത്ത് മുൻ വൈസ് പ്രസിഡന്‍റ് അഡ്വ. സിജു കെ. ഐസക്കിനെ സന്തോഷ് വിവരം അറിയിച്ചു. സിജുവാണ് പാമ്പിനെ പിടിച്ചു ചാക്കിലാക്കിയത്. ഇന്നലെ രാവിലെ പാമ്പിനെ എരുമേലിഫോറസ്റ്റ് ഡിവിഷൻ ഉദ്യോഗസ്ഥർക്ക് കൈമാറി.

ജീവനക്കാരുടെ കുറവ്, അമിത വാടക, കച്ചവടം കുറവ് : കോട്ടയം വൈഎംസിഎ കോഫിഹൗസ് പൂട്ടുന്നു

കോട്ടയം: കോട്ടയം നിവാസികളുടെ ഒത്തുചേരലിന്‍റെയും രുചിഭേദങ്ങളുടെയും ഇടമായ കോട്ടയം വൈഎംസിഎ കോഫി ഹൗസിനു പൂട്ടുവീഴുന്നു. ഈ മാസം 30ന് പ്രവര്‍ത്തനം അവസാനിപ്പിക്കാന്‍ ഇന്ത്യാ കോഫി ബോര്‍ഡ് വര്‍ക്കേഴ്‌സ് കോ-ഓപ്പറേറ്റീവ് സൊസൈറ്റി ബ്രാഞ്ച് അധികൃതര്‍ക്ക് നിര്‍ദേശം നല്‍കി. ജീവനക്കാരുടെ കുറവും അമിത വാടകയും കച്ചവടം കുറഞ്ഞതുമാണ് അടച്ചുപൂട്ടാന്‍ കാരണമെന്നാണ് അധികൃതര്‍ പറയുന്നത്. 2009 ഫെബ്രുവരി 15നാണ് നഗരമധ്യത്തില്‍ മുനിസിപ്പാലിറ്റി ഓഫീസ് കെട്ടിടത്തിനു സമീപമുള്ള വൈഎംസിഎ കെട്ടിടത്തില്‍ കോഫി ഹൗസ് പ്രവര്‍ത്തനമാരംഭിക്കുന്നത്. ആരംഭകാലത്ത് നല്ല രീതിയില്‍ പ്രവര്‍ത്തിക്കുകയും ഒരു ലക്ഷത്തിനു മുകളില്‍ കച്ചവടം ലഭിക്കുകയും ചെയ്തിരുന്ന ബ്രാഞ്ചുകളിലൊന്നായിരുന്നു. കക്ഷി രാഷ്‌ട്രീയം മറന്ന് എല്ലാവരും ഒത്തുചേരാനും സംസാരിക്കാനുമായി എത്തിയിരുന്നതും ഇവിടെയായിരുന്നു. സായാഹ്നത്തില്‍ ഇവിടെ ഒത്തുകൂടുന്നവര്‍ ചേര്‍ന്ന് കോഫി ഹൗസ് കൂട്ടായ്മയും ഉണ്ടായിരുന്നു. ജീവനക്കാരുടെ കുറവാണ് പൂട്ടാന്‍ പ്രധാന കാരണങ്ങളിലൊന്ന്. ഇന്ത്യാ കോഫി ബോര്‍ഡ് വര്‍ക്കേഴ്‌സ് സംഘത്തില്‍ പുതിയ ആളുകളെ നിയമിക്കാന്‍ സംഘത്തിന്‍റെ രജിസ്ട്രാര്‍ കൂടിയായ വാണിജ്യ വ്യവസായ വകുപ്പ് ഡയറക്ടര്‍ അനുമതി നല്‍കുന്നില്ല. ശമ്പളം ഉള്‍പ്പെടെയുള്ള കാര്യങ്ങള്‍ സംഘമാണ് നല്‍കുന്നത്. സര്‍ക്കാരിനു യാതൊരു ബാധ്യതയുമില്ല. എന്നിട്ടും നിയമനം നടത്താന്‍ അധികാരം തരുന്നില്ലെന്നാണ് സംഘം അധികൃതര്‍ പറയുന്നത്. 2015നു ശേഷം സംഘത്തില്‍ പുതിയ നിയമനം നടന്നിട്ടില്ല. 2015 മുതല്‍ 2025 വരെ സംഘത്തില്‍ നിന്നും 1400 പേര്‍ വിരമിച്ചു. ഇവര്‍ക്കു പകരം ആളുകളെ നിയമിച്ചിട്ടില്ല. പല ബ്രാഞ്ചുകളിലും റിട്ടയര്‍ ചെയ്തവരെയും മറ്റും ദിവസക്കൂലിക്ക് നിയമിച്ചിരിക്കുകയാണ്. സംഘത്തിന്‍റെ നിലവിലെ 47 ബ്രാഞ്ചുകളില്‍ ഏറ്റവും കൂടുതല്‍ വാടകയും ഏറ്റവും കുറവ് കച്ചവടവുമുള്ള ബ്രാഞ്ചാണ് വൈഎംസിഎ ബ്രാഞ്ച്. ഒരു ലക്ഷത്തിനു മുകളില്‍ വാടകയാണ് നല്‍കുന്നത്. ഇപ്പോള്‍ ഒരു ദിവസത്തെ കച്ചവടം 20,000-25,000 രൂപ മാത്രമാണ്. എസി ഹാളും ഉച്ചയൂണും ഉള്‍പ്പെടെ തുടങ്ങിയിട്ടും കച്ചവടത്തില്‍ മാറ്റമുണ്ടായില്ല. തൃശൂര്‍ പൂരവുമായി ബന്ധപ്പെട്ട് തൃശൂരിലെ കടകളില്‍ കച്ചവടവും തിരക്കും വര്‍ധിച്ച സാഹചര്യത്തില്‍ 15 ദിവസത്തേക്ക് വൈഎംസിഎ ബ്രാഞ്ച് അടച്ചിടുകയും ഇവിടുത്തെ ജീവനക്കാരെ തൃശൂരിലെ കടകളിലേക്ക് വിടുകയും ചെയ്തിരുന്നു. കഴിഞ്ഞയാഴ്ചയാണ് വീണ്ടും പ്രവര്‍ത്തനം തുടങ്ങിയത്. ബ്രാഞ്ച് അടച്ചു പൂട്ടാന്‍ തീരുമാനിച്ചതോടെ സംഘം അധികൃതരും ജീവനക്കാരും ചേര്‍ന്ന് നഗരം വിട്ടു പുതിയ ബ്രാഞ്ച് തുടങ്ങാനുള്ള ശ്രമവും തുടങ്ങി. ഇതിന്‍റെ ഭാഗമായി മണര്‍കാട്, കഞ്ഞിക്കുഴി ഭാഗം, ചുങ്കം, കുമരകം റോഡ് എന്നിവിടങ്ങളില്‍ സ്ഥലവും കെട്ടിടവും അന്വേഷിച്ചിരുന്നു. പാര്‍ക്കിംഗ്, മാലിന്യസംസ്‌കരണം എന്നിവയാണ് പലയിടത്തും വെല്ലുവിളി. അനുയോജ്യമായ കെട്ടിടം കണ്ടെത്തിയതോടെ മണര്‍കാട് പുതിയ ബ്രാഞ്ച് തുടങ്ങാനുള്ള ശ്രമത്തിലാണ് അധികൃതര്‍. പുതിയ ജീവനക്കാരെ നിയമിച്ചെങ്കില്‍ മാത്രമേ പുതിയ ബ്രാഞ്ച് തുടങ്ങാനും സാധിക്കുകയുള്ളു. നിലവില്‍ കോട്ടയത്ത് മെഡിക്കല്‍ കോളജ്, തിരുനക്കര തെക്കുംഗോപുരം, ടിബി റോഡ്, എംസി റോഡില്‍ എസ്എച്ച് മൗണ്ട് എന്നിവിടങ്ങളിലാണ് കോഫി ഹൗസ് പ്രവര്‍ത്തിക്കുന്നത്. വൈഎംസിഎ ബ്രാഞ്ച് പൂട്ടുമ്പോള്‍ ഇവിടുത്തെ ജീവനക്കാരെ സമീപത്തെ ബ്രാഞ്ചുകളിലേക്ക് പുനര്‍വിന്യസിപ്പിക്കും. ഇതിനിടയില്‍ കോഫി ഹൗസ്‌ കൂട്ടായ്മയുടെ നേതൃത്വത്തില്‍ കോഫി ഹൗസ് ടൗണില്‍ത്തന്നെ നിലനിര്‍ത്താനുള്ള ശ്രമങ്ങളും നടക്കുന്നുണ്ട്.

പ്രൗഢഗംഭീരമായി പാലാ രൂപതാംഗങ്ങളുടെ കുവൈറ്റ് കുടുംബസംഗമം

കുവൈറ്റ്: പാലായുടെ പൈതൃകവും വിശ്വാസ പാരമ്പര്യവും പ്രവാസിലോകത്തെ പുതുതലമുറയിലേക്കു പകര്‍ന്നു നല്‍കുക എന്ന ലക്ഷ്യത്തോടെ പ്രവര്‍ത്തിക്കുന്ന പാലാ രൂപതാംഗങ്ങളുടെ കൂട്ടായ്മയായ പാലാ രൂപത പ്രവാസി അപ്പൊസ്തലേറ്റ് കുവൈറ്റ് ഘടകം രണ്ടാമത് കുടുംബസംഗമം അബാസിയ ആസ്‌പെയര്‍ ഇന്ത്യന്‍ ഇന്‍റര്‍നാഷണല്‍ സ്‌കൂളില്‍ സംഘടിപ്പിച്ചു. രൂപതാംഗങ്ങളായ എഴുനൂറോളം കുടുംബാംഗങ്ങള്‍ കൂട്ടായ്മയുടെ ഭാഗമായി. പാലാ രൂപത പ്രോട്ടോ സിഞ്ചെല്ലുസ് മോണ്‍. ജോസഫ് തടത്തില്‍ ഉദ്ഘാടനം ചെയ്തു. പിഡിഎംഎ ഡയറക്ടര്‍ ഫാ. കുര്യാക്കോസ് വെള്ളച്ചാലില്‍, അസിസ്റ്റന്‍റ് ഡയറക്ടര്‍ ഫാ. മാണി കൊഴുപ്പന്‍കുറ്റി, കുവൈറ്റ് അബാസിയ ഇടവക വികാരി ഫാ. സോജന്‍ പോള്‍ എന്നിവര്‍ സന്ദേശം നല്‍കി. ജനറല്‍ കോ-ഓര്‍ഡിനേറ്റര്‍ ജോബിന്‍സ് ജോണ്‍ പാലേട്ട് അധ്യക്ഷത വഹിച്ച യോഗത്തില്‍ ഐ.വി. അലക്‌സ് സ്വാഗതവും സുനില്‍ തൊടുക നന്ദിയും പറഞ്ഞു.

ധന്യന്‍ കദളിക്കാട്ടിലച്ചന്‍ കരുണാര്‍ദ്ര സ്‌നേഹത്തിന്‍റെ പ്രേഷിതന്‍: റവ.ഡോ. ഡൊമിനിക് വെച്ചൂര്‍

പാലാ: തിരുഹൃദയ ഭക്തനായ ധന്യന്‍ കദളിക്കാട്ടില്‍ മത്തായി അച്ചന്‍ ഈശോയുടെ തുറക്കപ്പെട്ട ഹൃദയത്തിലൂടെ ഒഴുക്കപ്പെട്ട കരുണാര്‍ദ്ര സ്‌നേഹത്തിന്‍റെ പ്രേഷിതനായിരുന്നുവെന്ന് വടവാതൂര്‍ സെമിനാരി റെക്‌ടര്‍ റവ.ഡോ. ഡൊമിനിക് വെച്ചൂര്‍. ധന്യന്‍ കദളിക്കാട്ടില്‍ മത്തായി അച്ചന്‍റെ ചരമവാര്‍ഷികത്തോടനുബന്ധിച്ചുള്ള നവനാളിന്‍റെ എട്ടാം ദിനമായ ഇന്നലെ പാലാ എസ്എച്ച് പ്രൊവിന്‍ഷ്യല്‍ ഹൗസ് കപ്പേളയില്‍ വിശുദ്ധ കുര്‍ബാന അര്‍പ്പിച്ച് സന്ദേശം നല്‍കുകയായിരുന്നു അദ്ദേഹം. തുറക്കപ്പെട്ട ഈശോയുടെ പാര്‍ശ്വത്തിലേക്ക് മത്തായി അച്ചന്‍ അനേകരെ നയിച്ചു. അതിന് അദ്ദേഹത്തിന് ബലം പകര്‍ന്നത് ദിവ്യകാരുണ്യ സന്നിധിയിലെ നിശബ്ദമായ പ്രാര്‍ഥനയാണ്. ദൈവത്തിന്‍റെ മനസ് കൂട്ടി വായിക്കാനും അത് മറ്റുള്ളവര്‍ക്ക് പങ്കുവച്ചു കൊടുക്കാനും ആ ധന്യജീവിതത്തിന് സാധിച്ചു.സുവിശേഷത്തിലെ ചെറിയ കടുകുമണി വളര്‍ന്നുപന്തലിച്ച് പക്ഷികള്‍ അതില്‍ വസിച്ചു. അതുപോലെ തന്നെയാണ് മത്തായി അച്ചന്‍റെ ജീവിതവും. വിശുദ്ധരുടെ കബറിടം എപ്പോഴും പുണ്യകുടീരങ്ങളാണെന്നും വിശ്വാസജീവിത വഴികളില്‍ മരുഭൂമിയിലെ മരുപ്പച്ച പോലെയാണ് വിശുദ്ധരുടെ കബറിടത്തിലെ സാന്നിധ്യമെന്നും അദ്ദേഹം പറഞ്ഞു. ഇന്ന് ഉച്ചകഴിഞ്ഞ് മൂന്നിന് വിശുദ്ധ കുര്‍ബാന, നവനാള്‍ പ്രാര്‍ഥന - റവ. ഡോ. വര്‍ഗീസ് കുറ്റിയില്‍ (ഒഐസി സുപ്പീരിയര്‍ ജനറല്‍ ബദനി ആശ്രമം, കോട്ടയം). ചരമവാര്‍ഷിക ദിനമായ നാളെ രാവിലെ പത്തിന് സമൂഹബലി. കൂരിയ ബിഷപ് മാര്‍ സെബാസ്റ്റ്യന്‍ വാണിയപ്പുരയ്ക്കല്‍ മുഖ്യകാര്‍മികത്വം വഹിക്കും. 11.45ന് കബറിടത്തിങ്കല്‍ ചരമവാര്‍ഷികാചരണ പ്രാര്‍ഥനകള്‍. 12ന് ശ്രാദ്ധ നേര്‍ച്ച വെഞ്ചരിപ്പ് - മാര്‍ ജോസഫ് കല്ലറങ്ങാട്ട്.

കാഞ്ഞിരമറ്റം അഗ്രിഫെസ്റ്റ് 25ന്

പാലാ: പാലാ സോഷ്യല്‍ വെല്‍ഫെയര്‍ സൊസൈറ്റിയുടെ നേതൃത്വത്തില്‍ പാലാ അഗ്രിമ കാര്‍ഷിക നഴ്‌സറിയുടെ സഹകരണത്തോടെ കാഞ്ഞിരമറ്റം മാര്‍ സ്ലീവാ പള്ളി പാരിഷ് ഹാളില്‍ കാഞ്ഞിരമറ്റം അഗ്രി ഫെസ്റ്റ് എന്ന പേരില്‍ കാര്‍ഷികമേള സംഘടിപ്പിക്കും. 25നു രാവിലെ 6.30ന് ആരംഭിക്കുന്ന കാര്‍ഷിക മേളയില്‍ ഹൈബ്രിഡ് പച്ചക്കറിത്തൈകള്‍, നാടന്‍, വിദേശ ഫലവൃക്ഷ തൈകള്‍, പുതിയ ഇനം പച്ചക്കറി വിത്തുകള്‍, കാര്‍ഷിക മൂല്യവര്‍ധിത ഉത്പന്നങ്ങള്‍, കാര്‍ഷിക വിഭവങ്ങള്‍, കാര്‍ഷിക വിളകള്‍ എന്നിവയുടെ പ്രദര്‍ശനവും വിപണനവും ഉണ്ടായിരിക്കും. ജൈവവളങ്ങള്‍, കീടനാശിനികള്‍, ചെടിച്ചട്ടികള്‍, കൃഷി ഉപകരണങ്ങള്‍ തുടങ്ങിയവ മേളയില്‍ ലഭ്യമാണ്. കാഞ്ഞിരമറ്റം അഗ്രോ പ്രൊഡ്യൂസര്‍ കമ്പനിയുടെ സഹകരണത്തോടെ കാഞ്ഞിരമറ്റം കര്‍ഷക ദള ഫെഡറേഷന്‍ സംഘടിപ്പിക്കുന്ന അഗ്രി ഫെസ്റ്റിന്‍റെ ഉദ്ഘാടനം വികാരിയും ഫെഡറേഷന്‍ രക്ഷാധികാരിയുമായ ഫാ. ജോസഫ് മണ്ണനാല്‍ നിര്‍വഹിക്കും. സഹവികാരിയും ഡയറക്ടറുമായ ഫാ. ജോസഫ് മഠത്തിപ്പറമ്പില്‍ അധ്യക്ഷത വഹിക്കും. പിഎസ്ഡബ്ല്യുഎസ് ഡയറക്ടര്‍ ഫാ. തോമസ് കിഴക്കേല്‍ ആദ്യ വില്പന നിര്‍വഹിക്കും. റീജണ്‍, സോണ്‍ കോ-ഓര്‍ഡിനേറ്റര്‍മാരായ സിബി കണിയാംപടി, ജിജി സിന്‍റോ, കാപ്‌കോയുടെയും ഫെഡറേഷന്‍റെയും ഭാരവാഹികളായ സണ്ണി കളരിക്കല്‍, ടോം ജേക്കബ് ആലയ്ക്കല്‍, ഡാന്‍റീസ് കൂനാനിക്കല്‍, ജയ്‌മോന്‍ പുത്തന്‍പുരയ്ക്കല്‍, മാത്തുക്കുട്ടി ഞായര്‍കുളം, ജോര്‍ജുകുട്ടി കുന്നപ്പള്ളി, തോമസ് മാത്യു, ജോസഫ് തോമസ്, ടോമി മുടന്തിയാനി, സെബാസ്റ്റ്യന്‍ ആരുശേരില്‍, ഷേര്‍ളി ടോം, മിനി ജോസ്, മേരി മാത്യു, മിനി ജോണി തുടങ്ങിയവര്‍ നേതൃത്വം നല്‍കും.

അല്‍ഫോന്‍സ തീര്‍ഥാടന കേന്ദ്രത്തില്‍ മേയ് ഫ്‌ളവര്‍ പ്രോഗ്രാം 25 മുതല്‌

ഭരണങ്ങാനം: വിശുദ്ധ അല്‍ഫോന്‍സ തീര്‍ഥാടന കേന്ദ്രത്തില്‍ ഒരാഴ്ച നീണ്ടുനില്‍ക്കുന്ന ആത്മീയ വിരുന്ന് മേയ് ഫ്‌ളവര്‍ 2025 എന്ന പേരില്‍ വിവിധ പരിപാടികളോടെ നടത്തും. 25 മുതല്‍ 31 വരെയാണ് പ്രോഗ്രാം. വിപരീത സാഹചര്യങ്ങളില്‍ ഫലം ചൂടുന്ന മേയ് ഫ്‌ളവര്‍ വിശുദ്ധ അല്‍ഫോന്‍സായുടെ പ്രതീകമാണ്. ഏഴു വയസിനു താഴെ പ്രായമുള്ള കുഞ്ഞുങ്ങള്‍ക്കും അവരുടെ മാതാപിതാക്കള്‍ക്കുമായുള്ള ആത്മീയ ശുശ്രൂഷ 25ന് ഉച്ചകഴിഞ്ഞ് മൂന്നുമുതല്‍ 4.30 വരെ നടത്തും. ജിന്‍സി ജോസഫ് സന്ദേശം നല്‍കും. കുഞ്ഞുങ്ങള്‍ക്കു വേണ്ടി പ്രത്യേക സമര്‍പ്പണ പ്രാര്‍ഥനയും അഭിഷേക ശൂശ്രൂഷയും ഉണ്ടായിരിക്കും. 26ന് ഉച്ചകഴിഞ്ഞ് മൂന്നുമുതല്‍ അഞ്ചുവരെ അല്‍ഫോന്‍സിയന്‍ കുടുംബ സമ്മേളനം നടത്തും. അല്‍ഫോന്‍സിയന്‍ ആത്മീയതയില്‍ ജീവിക്കുന്ന കുടുംബങ്ങളുടെ കൂട്ടായ്മയാണിത്. ഫാ. ആന്‍റണി തോണക്കര സന്ദേശം നല്‍കും. 27ന് അല്‍ഫോന്‍സിയന്‍ വോളണ്ടിയേഴ്‌സിന്‍റെ കുടുംബസമ്മേളനം നടക്കും. ഷ്‌റൈനില്‍ സജീവ ശുശ്രൂഷ നിര്‍വഹിക്കുന്ന 101 വോളണ്ടിയേഴ്‌സിന്‍റെയും അവരുടെ കുടുംബങ്ങളുടെയും ഒത്തുചേരലാണിത്. ഫാ. തോമസ് കാഞ്ഞിരക്കോണം ഒഎഫ്എം ക്ലാസെടുക്കും. 28നു രാവിലെ 9.30 മുതല്‍ ഉച്ചയ്ക്ക് 12 വരെ സീനിയര്‍ സിസ്റ്റേഴ്‌സിനുള്ള ആത്മീയ ശുശ്രൂഷ നടക്കും. 60 വയസിനു മുകളില്‍ പ്രായമുള്ള സമര്‍പ്പിതര്‍ക്കു വേണ്ടിയുള്ള പ്രോഗ്രാമാണിത്. ഫാ. ജോസഫ് കൈതോലില്‍ സന്ദേശം നല്‍കും. ആരാധന, അഭിഷേക പ്രാര്‍ഥന, വിശുദ്ധ കുര്‍ബാന, സ്‌നേഹവിരുന്ന് എന്നിവയുണ്ടായിരിക്കും. 29ന് ജൂണിയര്‍ സമര്‍പ്പിതര്‍ക്കുള്ള ശുശ്രൂഷ രാവിലെ 9.30നു ജപമാലയോടെ ആരംഭിക്കും. ഫാ. ജോസഫ് പറമ്പിത്തടത്തില്‍ സന്ദേശം നല്‍കും. 30ന് ഉച്ചകഴിഞ്ഞ് നാലുമുതല്‍ ആറുവരെ അല്‍ഫോന്‍സിയന്‍ അധ്യാപക കൂട്ടായ്മ നടക്കും. ഡോ. സണ്ണി കുര്യാക്കോസ് ക്ലാസെടുക്കും. ക്ലാസുമുറികളിലെ അധ്യയനം അനുഭവമാക്കുന്നതിന് ആവശ്യമായ കര്‍മപദ്ധതികളെ സംബന്ധിച്ച ചര്‍ച്ചയും സമ്മേളനത്തില്‍ നടത്തും. 31നു രാവിലെ 9.30 മുതല്‍ 11.30 വരെ വിദ്യാലയ വര്‍ഷാരംഭ പ്രാര്‍ഥന നടത്തും. കുട്ടികള്‍ക്കുവേണ്ടി പ്രത്യേക അഭിഷേക ശുശ്രൂഷയുമുണ്ടായിരിക്കും. ഒരാഴ്ച നീണ്ടു നില്‍ക്കുന്ന ഈ ആത്മീയ വിരുന്നിന് ഭരണങ്ങാനം അല്‍ഫോന്‍സ ഷ്‌റൈന്‍ റെക്‌ടര്‍ റവ. ഡോ. അഗസ്റ്റിന്‍ പാലയ്ക്കപ്പറമ്പില്‍, വൈസ് റെക്‌ടര്‍മാരായ ഫാ. ആന്‍റണി തോണക്കര, ഫാ. ജോസഫ് ജോസഫ് അമ്പാട്ട് എന്നിവരും ഫാ. ഏബ്രഹാം കണിയാംപടിക്കല്‍, ഫാ. അലക്‌സ് മൂലക്കുന്നേല്‍, ഫാ. ഏബ്രഹാം ഏരിമറ്റം, ഫാ. സെബാസ്റ്റ്യന്‍ നടുത്തടം, ഫാ. ജോര്‍ജ് ചീരാകുഴി, ഫാ. കുരുവിള തുടിയന്‍പ്ലാക്കല്‍, ഫാ. തോമസ് തോട്ടുങ്കല്‍ എന്നിവരും ഷ്‌റൈനിലെ വോളണ്ടിയേഴ്‌സും നേതൃത്വം നല്‍കും. ഫോണ്‍: 8301065244.

വയോജനസംരക്ഷണ ബോധവത്കരണ സെമിനാർ

ചിറക്കടവ് ഈസ്റ്റ്: വയോജനസംരക്ഷണത്തിന് കേരളത്തിൽ നിരവധി നിയമങ്ങളുണ്ടെങ്കിലും അവയെക്കുറിച്ചുള്ള അറിവില്ലായ്മയാണ് പ്രശ്‌നമെന്ന് ചൂണ്ടിക്കാട്ടി സെമിനാർ നടത്തി. ഗ്രാമദീപം വായനശാലയിൽ വയോജനസംരക്ഷണ നിയമങ്ങളെക്കുറിച്ച് നടത്തിയ ക്ലാസ് പത്തനംതിട്ട ജില്ലാ ഉപഭോക്തൃഫോറം മുൻ പ്രസിഡന്‍റ് പി. സതീഷ്ചന്ദ്രൻ നായർ ഉദ്ഘാടനം ചെയ്തു. പാലാ ആർഡിഒ ഓഫീസ് മെയ്ന്‍റനൻസ് ട്രൈബ്യൂണൽ കൺസിലിയേഷൻ ഓഫീസർ കെ.എസ്. ഗോപിനാഥൻനായർ ക്ലാസ് നയിച്ചു. പ്രശ്‌നപരിഹാരത്തിനുള്ള വഴികളെക്കുറിച്ച് വിശദീകരിച്ചു. വായനശാലാ പ്രസിഡന്‍റ് ടി.പി. രവീന്ദ്രൻപിള്ള അധ്യക്ഷത വഹിച്ചു. ബ്ലോക്ക് പഞ്ചായത്തംഗം മിനി സേതുനാഥ്, പി.എൻ. സോജൻ, ടി.പി. ശ്രീലാൽ തുടങ്ങിയവർ പ്രസംഗിച്ചു. ഗുരുജനവേദിയും രൂപവത്കരിച്ചു. ഭാരവാഹികളായി കെ. ബാലകൃഷ്ണപിള്ള-പ്രസിഡന്‍റ്, പി.ജി. ബാലകൃഷ്ണൻനായർ-സെക്രട്ടറി എന്നിവരെ തെരഞ്ഞെടുത്തു.

രാജീവ് ഗാന്ധി അനുസ്മരണം

കോരുത്തോട്: കോണ്‍ഗ്രസ് കോരുത്തോട് മണ്ഡലം കമ്മിറ്റിയുടെ നേതൃത്വത്തില്‍ രാജീവ് ഗാന്ധി അനുസ്മരണം നടത്തി. മണ്ഡലം പ്രസിഡന്‍റ് സി.എ. തോമസ് ഉദ്ഘാടനം ചെയ്തു. നെജീബ് കട്ടപ്ലാക്കല്‍ അധ്യക്ഷത വഹിച്ചു. ജോസ് മാക്കല്‍, കെ.ഡി. ജോസഫ്, മോനിച്ചന്‍ കടുപ്പില്‍, ജേക്കബ് സ്‌കറിയ, രാജു കൈതകൂട്ടം എന്നിവര്‍ പ്രസംഗിച്ചു. പെരുവന്താനം: കോൺഗ്രസ് പെരുവന്താനം മണ്ഡലം കമ്മിറ്റിയുടെ നേതൃത്വത്തിൽ രാജീവ് ഗാന്ധി അനുസ്മരണ സമ്മേളനവും പുഷ്പാർച്ചനയും നടത്തി. ഏലപ്പാറ മുൻ ബ്ലോക്ക് കോൺഗ്രസ് പ്രസിഡന്‍റ് ഷാജഹാൻ മഠത്തിൽ ഉദ്ഘാടനം ചെയതു. കെ.ആർ. വിജയൻ, ഷിയാസ് മൂത്തേടത്ത്, കുട്ടിച്ചൻ വട്ടോത്തുകുന്നേൽ, സജി ജേക്കബ്, എൻ.എ. വഹാബ്, ഡോമിന സജി തുടങ്ങിയവർ പ്രസംഗിച്ചു. മുണ്ടക്കയം: കോൺഗ്രസ്‌ മുണ്ടക്കയം മണ്ഡലം കമ്മിറ്റിയുടെ നേതൃത്വത്തിൽ രാജീവ്‌ ഗാന്ധി അനുസ്മരണവും പുഷ്പാർച്ചനയും നടത്തി. മണ്ഡലം പ്രസിഡന്‍റ് കെ.എസ്. രാജു അധ്യക്ഷത വഹിച്ചു. ഡിസിസി എക്സിക്യൂട്ടീവ് അംഗം റോയി കപ്പലുമാക്കൽ, വി.ടി. അയൂബ്ഖാൻ, ടി.ടി. സാബു, കെ.കെ. ജനാർദ്ദനൻ, റെജി കളത്തുകുളങ്ങര, ബി. ജയചന്ദ്രൻ, എന്നിവർ പ്രസംഗിച്ചു. മുണ്ടക്കയം ഈസ്റ്റ്: കോൺഗ്രസ് ഏലപ്പാറ ബ്ലോക്ക് കമ്മിറ്റിയുടെ നേതൃത്വത്തിൽ രാജീവ് ഗാന്ധി അനുസ്മരണം മുപ്പത്തഞ്ചാംമൈൽ ഉമ്മൻ ചാണ്ടി ഭവനിൽ നടത്തി. ഇടുക്കി ഡിസിസി അംഗം വി.സി. ജോസഫ് ഉദ്ഘാടനം ചെയ്തു. കോൺഗ്രസ് കൊക്കയാർ മണ്ഡലം പ്രസിഡന്‍റ് സണ്ണി തുരുത്തിപ്പള്ളി അധ്യക്ഷത വഹിച്ചു. സി.ടി. മാത്യു, നൗഷാദ് വെംബ്ലി, ഷാജി പുല്ലാട്ട്, സണ്ണി തട്ടുങ്കൽ, കെ.കെ. ജനാർദനൻ, കെ.ആർ. വിജയൻ, ഡോമിന സജി, ടി.എൻ. മധുസുദനൻ, ശരത് ഒറ്റപ്ലാക്കൽ എന്നിവർ പ്രസംഗിച്ചു.

ദേശീയപാതയോരങ്ങളിൽ മാലിന്യംതള്ളൽ വ്യാപകമാകുന്നു

കാഞ്ഞിരപ്പള്ളി: ദേശീയപാതയോരങ്ങളിൽ മാലിന്യംതള്ളൽ വ്യാപകമാകുന്നു. കൊല്ലം-ദിണ്ടിഗൽ ദേശീയപാതയിൽ കുന്നുംഭാഗത്താണ് ചാക്കിൽക്കെട്ടി പ്ലാസ്റ്റിക് മാലിന്യങ്ങളും കേടായ ഭക്ഷണവും വീട്ടിലെ മാലിന്യങ്ങളുമെല്ലാം തള്ളിയിരിക്കുന്നത്. ഇവിടെ കാടുപിടിച്ചു കിടക്കുന്നതിനാൽ രാത്രികാലങ്ങളിലാണ് മാലിന്യം നിക്ഷേപിക്കുന്നത്. മുന്പ് ഈ ഭാഗങ്ങളിൽ മൃഗങ്ങളുടെ മാംസാവിഷ്ടങ്ങളുൾപ്പെടെ തള്ളുന്നതു പതിവായിരുന്നു. അധികൃതർ കാട് വെട്ടിത്തെളിച്ചതോടെ മാലിന്യം തള്ളുന്നത് കുറഞ്ഞിരുന്നു. കാഞ്ഞിരപ്പള്ളി-എരുമേലി, കാഞ്ഞിരപ്പള്ളി-തന്പലക്കാട് റോഡുകളുടെ ഇരുവശവും മാലിന്യം തള്ളുന്നത് പതിവാണ്. മഴക്കാലമെത്തിയതോടെ റോഡരികിലെ മാലിന്യങ്ങൾ നീക്കം ചെയ്തില്ലെങ്കിൽ പകർച്ചവ്യാധി ഭീഷണിയുണ്ടാകാനും സാധ്യതയേറെയാണ്. മാലിന്യം തള്ളുന്നവർക്കെതിരേ കർശന നടപടി സ്വീകരിക്കണമെന്നും അല്ലാത്തപക്ഷം മാലിന്യങ്ങൾ തള്ളുന്നത് ഇനിയും വ്യാപകമാകുമെന്നും നാട്ടുകാർ പറഞ്ഞു.

സംരക്ഷണഭിത്തി നാടിനു സമർപ്പിച്ചു

മുണ്ടക്കയം: പൈങ്ങന സെന്‍റ് തോമസ് ഓർത്തഡോക്സ് പള്ളിക്കു മുന്നിലെ പൈങ്ങന തോടിന്‍റെ വശത്ത്‌ പുതിയതായി നിർമിച്ച സംരക്ഷണഭിത്തി നാടിന് സമർപ്പിച്ചു. പ്രളയത്തെത്തുടർന്നാണ് തോടിന്‍റെ സംരക്ഷണഭിത്തി തകർന്നത്. ഇതോടെ പള്ളിയും പ്രീസ്റ്റ് ഹോമിലേക്കുള്ള വഴിയും ഉൾപ്പെടെയുള്ള ഭാഗങ്ങൾ അപകടാവസ്ഥയിലായിരുന്നു. പള്ളി അധികൃതരും പ്രദേശവാസികളും സെബാസ്റ്റ്യൻ കുളത്തുങ്കൽ എംഎൽഎയ്ക്ക് നൽകിയ നിവേദനത്തിന്‍റെ അടിസ്ഥാനത്തിൽ ജലവിഭവ വകുപ്പ് മുഖേന അനുവദിച്ച 16 ലക്ഷം രൂപ മുടക്കിയാണ് സംരക്ഷണഭിത്തി നിർമിച്ചത്. പൂർത്തീകരിച്ച സംരക്ഷണ ഭിത്തിയുടെ ഉദ്ഘാടനം സെബാസ്റ്റ്യൻ കുളത്തുങ്കൽ എംഎൽഎ നിർവഹിച്ചു. വാർഡ് മെംബർ സൂസമ്മ മാത്യു അധ്യക്ഷത വഹിച്ചു. വികാരി ഫാ. പൗലോസ് നൈനാൻ, ടി.കെ. ജോർജ് കോർ എപ്പിസ്കോപ്പ, എം.ജെ. കുരുവിള മുണ്ടമറ്റം തുടങ്ങിയവർ പ്രസംഗിച്ചു.

കരിദിന പ്രതിഷേധ പ്രകടനവും പൊതുയോഗവും നടത്തി

കാഞ്ഞിരപ്പള്ളി: എൽഡിഎഫ് സർക്കാരിന്‍റെ നാലാം വാർഷികം യുഡിഎഫ് സംസ്ഥാന വ്യാപകമായി കരിദിനമായി ആചരിക്കുന്നതിന്‍റെ ഭാഗമായി യുഡിഎഫ് കാഞ്ഞിരപ്പള്ളി നിയോജക മണ്ഡലം കമ്മിറ്റിയുടെ നേതൃത്വത്തിൽ ടൗണിൽ കരിദിന പ്രതിഷേധ പ്രകടനവും പൊതുയോഗവും നടത്തി. കുരിശുങ്കൽ ജംഗ്ഷനിൽനിന്ന് ആരംഭിച്ച പ്രതിഷേധ പ്രകടനം പേട്ടക്കവലയിൽ സമാപിച്ചു. കെപിസിസി ജനറൽ സെക്രട്ടറി പി.എ. സലിം ഉദ്ഘാടനം ചെയ്തു. യുഡിഎഫ് നിയോജകമണ്ഡലം ചെയർമാൻ സി.വി. തോമസുകുട്ടി അധ്യക്ഷത വഹിച്ചു. യുഡിഎഫ് നിയോജകമണ്ഡലം കൺവീനർ ജിജി അഞ്ചാനി, നേതാക്കളായ വി.എസ്. അജ്മൽ ഖാൻ, തോമസ് കുന്നപ്പള്ളി, പി.എ. ഷെമീർ, പ്രഫ. റോണി കെ. ബേബി, പി. ജീരാജ്, അഭിലാഷ് ചന്ദ്രൻ, പി.എസ്. സലീം, മുണ്ടക്കയം സോമൻ, ലാജി തോമസ് തുടങ്ങിയവർ പ്രസംഗിച്ചു. മുണ്ടക്കയം: പൂഞ്ഞാർ നിയോജകമണ്ഡലം കമ്മിറ്റിയുടെ നേതൃത്വത്തിൽ ഈരാറ്റുപേട്ടയിൽ കരിങ്കൊടി പ്രതിഷേധ പ്രകടനവും പ്രതിഷേധ യോഗവും നടത്തി. കേരള കോൺഗ്രസ് സെക്രട്ടറി ജനറൽ ജോയി ഏബ്രഹാം ഉദ്ഘാടനം ചെയ്തു. നിയോജകമണ്ഡലം കമ്മിറ്റി ചെയർമാൻ മജു പുളിക്കൻ അധ്യക്ഷത വഹിച്ചു. അസീസ് ബഡായിൽ, പ്രകാശ് പുളിക്കൻ, ജോമോൻ ഐക്കര, സുഹ്റ അബ്ദുൾ ഖാദർ, സാബു പ്ലാത്തോട്ടം, പി.കെ. റസാക്ക്, തോമസുകുട്ടി മൂന്നാനപ്പള്ളിൽ, റാസി ചെറിയവല്ലം, മറിയാമ്മ ജോസഫ് തുടങ്ങിയവർ പ്രസംഗിച്ചു.

ചങ്ങനാശേരി അതിരൂപതയില്‍ മൈ പാരിഷ് ഡിജിറ്റല്‍ സോഫ്റ്റ്‌വേര്‍ സജ്ജമായി

ചങ്ങനാശേരി: അഞ്ച് ജില്ലകളിലായി വ്യാപിച്ചുകിടക്കുന്ന അതിരൂപതയിലെ 247 ഇടവകകളെയും 80,000 കുടുംബങ്ങളെയും അഞ്ചു ലക്ഷത്തോളമുള്ള ഇടവകാംഗങ്ങളെയും കോര്‍ത്തിണക്കുന്ന മൈ പാരീഷ് എന്ന സോഫ്റ്റ്‌വേറിന്‍റെ അവസാനഘട്ട ഉദ്ഘാടനം ആര്‍ച്ച്ബിഷപ് മാര്‍ തോമസ് തറയില്‍ മീഡിയ വില്ലേജില്‍ നിര്‍വഹിച്ചു. നൂതന വിവര സങ്കേതിക വിദ്യ സഭയുടെ സമഗ്ര വളര്‍ച്ചയ്ക്കും സുതാര്യമായ പ്രവര്‍ത്തനത്തിനും ഉതകുന്ന രീതിയിലാണ് മൈ പാരിഷ് സോഫ്റ്റ്‌വേര്‍ രൂപകല്പന ചെയ്തിരിക്കുന്നതെന്നും മാറി വരുന്ന സാഹചര്യത്തില്‍ രൂപതയുടെ പ്രവര്‍ത്തനങ്ങള്‍ ഏകോപിപ്പിക്കുന്നതിനും വിഭവശേഷി കാര്യക്ഷമമായി എല്ലാവര്‍ക്കും പ്രയാജനപ്പെടുത്തുന്നതിനും പുതിയ സോഫ്റ്റ്‌വേര്‍ ഉപകരിക്കുമെന്നും ആര്‍ച്ച്ബിഷപ് പറഞ്ഞു. അതിരൂപത മുഖ്യവികാരി ജനറാള്‍ മോണ്‍. ആന്‍റണി എത്തയ്ക്കാട് അധ്യക്ഷത വഹിച്ചു. മോണ്‍. സ്‌കറിയ കന്യാകോണില്‍, കോ-ര്‍ഡിനേറ്റര്‍ ഫാ. ആന്‍റണി കാച്ചാംകോട്, വിവിധ ഇടവകകളിലെ വികാരിമാര്‍ എന്നിവര്‍ സന്നിഹിതരായിരുന്നു. ഇടവകയുടെ വിവരങ്ങള്‍ അടങ്ങുന്ന പാരിഷ് രജിസ്റ്റര്‍, കണക്കുകള്‍ കൈകാര്യം ചെയ്യുന്ന അക്കൗണ്ടിംഗ് സോഫ്റ്റ്‌വേര്‍, മൊബൈല്‍ ആപ്ലിക്കേഷന്‍, ഇടവക വെബ്‌സൈറ്റ് എന്നിങ്ങനെ പ്രധാനമായും നാലു പ്രധാന ഭാഗങ്ങളാണ് മൈ പാരിഷ് പദ്ധതിയില്‍ ഉള്‍പ്പെടുത്തിയിരിക്കുന്നത്.

സ്‌നേഹക്കുടകൾ വിപണിയിലിറക്കി ഹോളിക്രോസ് സ്‌പെഷൽ സ്‌കൂൾ

കുറവിലങ്ങാട്: കാലവർഷവും സ്‌കൂൾ തുറക്കലും എത്തും മുമ്പേ സ്‌നേഹക്കുടകൾ വിപണിയിലിറക്കി ഹോളിക്രോസ് സ്‌പെഷൽ സ്‌കൂൾ. സ്‌നേഹത്തിന്‍റെ കരുത്തും കരുതലും ചേർത്തൊരുക്കിയാണ് കുടകൾ വിപണിയിലെത്തിച്ചിട്ടുള്ളത്. പതിറ്റാണ്ടുകളായി ഭിന്നശേഷിക്കാരായ വിദ്യാർഥികളെ സമൂഹത്തിന്‍റെ മുഖ്യധാരയിലെത്തിക്കാൻ പരിശ്രമിക്കുന്ന ഹോളിഫാമിലി സന്യാസിനീ സമൂഹമാണ് സ്‌പെഷൽ സ്‌കൂളിലെ വിദ്യാർഥികളുടെ തൊഴിൽ പരീശീലനത്തിന്‍റെ ഭാഗമായി കുടകൾ നിർമിച്ച് വിതരണത്തിനൊരുക്കിയിട്ടുള്ളത്. കുട നിർമാണത്തിനുള്ള വിവിധ വസ്തുക്കൾ വാങ്ങിയശേഷം വിദ്യാർഥികൾ അത് ക്രമീകരിച്ച് മനോഹരമായ കുടയാക്കി മാറ്റുകയായിരുന്നു. മൂന്നായി മടക്കാവുന്ന കുടയാണ് നിർമിച്ചിട്ടുള്ളത്. വിദ്യാർഥികൾക്ക് പിന്തുണയും പ്രോത്സാഹനവും ഉറപ്പാക്കി പലരും സമ്മാനങ്ങളായി നൽകാൻ ഈ കുടകൾ വാങ്ങുന്നുണ്ട്. ആവശ്യക്കാർ കൂടുതലെത്തിയാൽ അത് സ്‌കൂളിനും വിദ്യാർഥികൾക്കും കരുത്തും പ്രോത്സാഹനവുമായി മാറും. പുതിയ അധ്യയനവർഷത്തേക്ക് ഈ കുടകൾ വാങ്ങി വിദ്യാർഥികൾക്ക് നൽകുന്നതോടെ പുതിയൊരു സ്‌നേഹസംസ്‌കാരം സമ്മാനിക്കാൻ മാതാപിതാക്കൾക്കും കഴിയുന്നു. പ്രിൻസിപ്പൽ സിസ്റ്റർ ബോബിയുടെ നേതൃത്വത്തിലാണ് വിദ്യാർഥികളുടെ തൊഴിൽ പരിശീലനം.

വെളിയന്നൂരിന്‍റെ സ്‌നേഹസ്പര്‍ശം ഇതള്‍ നോട്ടുബുക്കുകള്‍

കോട്ടയം: അധ്യയന വര്‍ഷം ആരംഭിക്കാന്‍ ദിവസങ്ങള്‍ ബാക്കിനില്‍ക്കെ പുത്തനുടുപ്പും ബാഗും ഒക്കെ വാങ്ങുന്ന കുട്ടികള്‍ക്ക് പഠനാവശ്യങ്ങള്‍ക്കായി ഇതള്‍ നോട്ടുബുക്കുകളും. ഭിന്നശേഷിക്കാരായ കുട്ടികളുടെയും മാതാപിതാക്കളുടെയും കനിവാര്‍ന്ന സ്‌നേഹസ്പര്‍ശമാണ് ഇതള്‍ നോട്ടുബുക്കുകള്‍. വെളിയന്നൂര്‍ പഞ്ചായത്തിന്‍റെ ബഡ്‌സ് സ്‌കൂളിലെ ഭിന്നശേഷിക്കാരായ കുട്ടികളുടെ അമ്മമാര്‍ക്കും സ്‌കൂളിലെ 18 വയസിനു മുകളിലുള്ള കുട്ടികള്‍ക്കും വരുമാനമാര്‍ഗം ഉണ്ടാക്കുന്നതിനാണ് പഞ്ചായത്ത് കനിവ് എന്ന പേരില്‍ പേപ്പര്‍ പ്രൊഡക്ട്സ് യൂണിറ്റ് നിര്‍മിച്ചത്. ഭിന്നശേഷിക്കാരായ കുട്ടികളെ എത്തിക്കുന്ന അമ്മമാര്‍ അവരെ തിരിച്ചുകൊണ്ടുപോകുന്ന സമയം വരെ സ്‌കൂളില്‍ സമയം ചെലവഴിക്കുകയായിരുന്നു. ഇങ്ങനെ വെറുതെയിരിക്കുന്ന അമ്മമാര്‍ക്ക് ഒരു വരുമാനമാര്‍ഗമായും 18 വയസിനു മുകളിലുള്ള കുട്ടികള്‍ക്ക് പഠനത്തോടൊപ്പം ഒരു ജോലി എന്ന നിലയിലുമാണ് പഞ്ചായത്ത് ഭരണസമിതി പേപ്പര്‍ പ്രൊഡക്ട്‌സ് എന്ന ആശയം ഒരു വര്‍ഷം മുമ്പ് ആവിഷ്‌കരിക്കുന്നത്. ജില്ലാ പഞ്ചായത്തിന്‍റെ സഹകരണത്തോടെ കുടുംബശ്രീയുമായി ചേര്‍ന്നാണ് പേപ്പര്‍ പ്രൊഡക്ട്സ് യൂണിറ്റ് സ്ഥാപിച്ചത്. ഇന്നു ജില്ലയില്‍നിന്നും പുറത്തുനിന്നുമായി നിരവധി ഓര്‍ഡറുകളാണ് യൂണിറ്റിനു ലഭിക്കുന്നത്. മാതാപിതാക്കളും കുട്ടികളുമായി 22 പേര്‍ യൂണിറ്റില്‍ ജോലി ചെയ്യുന്നു. വരയിട്ട ബുക്കുകള്‍, പ്ലെയിന്‍, ഇരട്ടവര, നാലുവര, ചെക്ക് ബുക്ക് തുടങ്ങി എല്ലാത്തരം ബുക്കുകളും ഹോള്‍ സെയില്‍ വിലയിലാണ് നല്‍കുന്നത്. ആധുനിക സാങ്കേതികവിദ്യയിലാണ് നിര്‍മാണം. നുല്‍കൊണ്ടുള്ള തുന്നലോ, സ്റ്റാപ്പര്‍ പിന്നുകളോ അല്ല ഓരോ പേജും പശ ഉപയോഗിച്ച് ഒട്ടിച്ചേര്‍ക്കുന്നതാണ് രീതി. വെളിയന്നൂര്‍ സ്വദേശിയും നാഷണല്‍ ഹെറിറ്റേജ് ആര്‍ട്ട് ഫെസ്റ്റിവല്‍ ഗോള്‍ഡ് പുരസ്‌കാര ജേതാവുമായ പി. ബി. സന്തോഷ്‌കുമാറാണ് ഇതള്‍ നോട്ടു ബുക്കിന്‍റെ കവര്‍ ചിത്രം തയാറാക്കിയിരിക്കുന്നത്. നോട്ടു ബുക്കിനു പുറമേ, പേപ്പര്‍ പേന, നോട്ട് പാഡ്, ഓഫീസ് ഫയല്‍ എന്നിവയും നിര്‍മിക്കുന്നുണ്ട്.

ഫിറ്റ്‌നസ് സര്‍ട്ടിഫിക്കറ്റ് നിർബന്ധം; സ്‌കൂൾ അധികൃതർ നെട്ടോട്ടത്തിൽ

കോട്ടയം: അധ്യയന വര്‍ഷം ആരംഭിക്കുന്നതിനു മുമ്പു സ്‌കൂളിനു ഫിറ്റ്‌നസ് സര്‍ട്ടിഫിക്കറ്റ് ലഭിച്ചില്ലെങ്കില്‍ തുറന്നു പ്രവര്‍ത്തിക്കാന്‍ അനുവദിക്കില്ലെന്നു വിദ്യാഭ്യാസ വകുപ്പിന്‍റെ കര്‍ശന നിര്‍ദേശം വന്നതോടെ സ്‌കൂളുകള്‍ ഫിറ്റ്‌നസ് നേടാനുളള നെട്ടോട്ടത്തിൽ. കുട്ടികളുടെ സുരക്ഷയെ മുന്‍നിര്‍ത്തി കെട്ടിടത്തിന്‍റെ ഫിറ്റ്‌നസ് വളരെ പ്രധാനപ്പെട്ടതാണെന്നാണ് ജില്ലാ വിദ്യാഭ്യാസ ഓഫീസര്‍മാര്‍ക്കു നല്‍കിയിരിക്കുന്ന സര്‍ക്കുലറില്‍ പൊതുവിദ്യാഭ്യാസ ഡയറക്ടര്‍ പറഞ്ഞിരിക്കുന്നത്. പുതിയതായി നിര്‍മിച്ച കെട്ടിടങ്ങള്‍ക്കും ഫിറ്റ്‌നസ് അനിവാര്യമാണ്. ഇതോടെ ജില്ലയിലെ സ്‌കൂളുകൾ ഫിറ്റ്‌നസ് പരിശോധനയുടെ ഒരുക്കത്തിലാണ്. ബന്ധപ്പെട്ട തദ്ദേശ സ്വയംഭരണ സ്ഥാപനത്തില്‍നിന്നാണ് ഫിറ്റ്‌നസ് സര്‍ട്ടിഫിക്കറ്റ് വാങ്ങേണ്ടത്. മുന്‍കാലത്ത് പൊതുമരാമത്ത് കെട്ടിട വിഭാഗമായിരുന്നു ഫിറ്റ്‌നസ് നല്‍കിയിരുന്നത്. ഇപ്പോള്‍ സ്‌കൂളുകളുടെ ചുമതല തദ്ദേശ സ്ഥാപനങ്ങളെ ഏല്‍പ്പിച്ചതോടെ തദ്ദേശ സ്ഥാപനങ്ങളിലെ എന്‍ജിനിയറിംഗ് വിഭാഗത്തിനാണ് ഫിറ്റ്‌നസ് നല്‍കേണ്ട ചുമതല. അതാതു തദ്ദേശ സ്ഥാപനങ്ങളില്‍ ഇതിനായി സ്‌കൂളുകള്‍ അപേക്ഷ നല്‍കണം. പല പഞ്ചായത്തുകളിലും എന്‍ജിനിയറിംഗ് വിഭാഗത്തില്‍ ആളില്ല. നഗരസഭകളിലും ജില്ലാ പഞ്ചായത്തിലും എന്‍ജിനിയറിംഗ് വിഭാഗം ഉണ്ടെങ്കിലും ഇവര്‍ക്ക് ആവശ്യത്തിനേറെ ജോലിയും തിരക്കുമുണ്ട്. വിവിധ പ്രോജക്ടുകളുടെയും പദ്ധതികളുടെയും സൈറ്റുകളും മറ്റും നേരിട്ടു സന്ദര്‍ശിച്ച് അനുമതി നല്‍കേണ്ടത് എന്‍ജിനിയറിംഗ് വിഭാഗമാണ്. ഇതിനിടയിലാണു വിദ്യാഭ്യാസ വകുപ്പിന്‍റെ നിര്‍ദേശ പ്രകാരം സ്‌കൂളുകള്‍ പരിശോധിക്കാന്‍ പോകേണ്ടത്. സ്‌കൂളുകളുടെ അറ്റകുറ്റപ്പണികൾ 27നകം പൂര്‍ത്തിയാക്കണമെന്ന വിദ്യാഭ്യാസവകുപ്പിന്‍റെ നിര്‍ദേശത്തെ തുടര്‍ന്ന് എല്ലാ സ്‌കൂളുകളിലും തിരക്കുപിടിച്ച് നിര്‍മാണ ജോലികള്‍ നടന്നുവരികയാണ്. വാടകക്കെട്ടിടത്തിലോ മറ്റു സ്ഥാപനങ്ങളിലോ ക്ലാസുകള്‍ പ്രവര്‍ത്തിക്കുന്നുണ്ടെങ്കില്‍ ഈ കെട്ടിടങ്ങളും പരിശോധിച്ച് ഫിറ്റ്‌നസ് സര്‍ട്ടിഫിക്കറ്റ് തദ്ദേശ സ്വയംഭരണ എന്‍ജിനിയറിംഗ് വിഭാഗത്തില്‍ ലഭ്യമാക്കിയെന്ന് ഉറപ്പു വരുത്തിയശേഷം മാത്രമേ സ്‌കൂള്‍ പ്രവര്‍ത്തിക്കാന്‍ പറ്റുകയുള്ളൂ. ഫിറ്റ്‌നസിനായി ചെയ്യേണ്ടത് ഫിറ്റ്‌നസ് സര്‍ട്ടിഫിക്കറ്റിനായി ചെറുതും വലുതുമായ നിരവധി കാര്യങ്ങള്‍ സ്‌കൂളുകള്‍ക്ക് ചെയ്യേണ്ടതുണ്ട്. നിര്‍മാണ പ്രവര്‍ത്തനങ്ങള്‍ നടന്നുകൊണ്ടിരിക്കുന്ന സ്‌കൂളുകളില്‍ കുട്ടികള്‍ക്ക് പൂര്‍ണ സുരക്ഷിതത്വം ഉറപ്പാക്കുന്ന രീതിയില്‍ പണി നടക്കുന്ന സ്ഥലം മറച്ചുകെട്ടണം. ഈ ഭാഗത്തേക്ക് പ്രവേശനം നിഷേധിച്ചുള്ള ബോര്‍ഡ് സ്ഥാപിക്കണം. നിര്‍മാണത്തിനുള്ള സാധന സാമഗ്രികള്‍ കുട്ടികളുടെ സുരക്ഷിതവും സുഗമവുമായ യാത്രയെ തടസപ്പെടുത്താന്‍ പാടില്ല. കൊടിതോരണങ്ങള്‍, ബോര്‍ഡുകള്‍, ഹോര്‍ഡിംഗ്‌സ് എന്നിവ സ്‌കൂള്‍ പരിസരത്തുനിന്നും നീക്കം ചെയ്യണം. മുന്നറിയിപ്പ് ബോര്‍ഡുകള്‍, ട്രാഫിക് സൈന്‍ ബോര്‍ഡുകള്‍ എന്നിവ ട്രാഫിക് പോലീസിന്‍റെ സഹകരണത്തോടെ സ്ഥാപിക്കണം. സ്‌കൂളിനു സമീപമുള്ള വെള്ളക്കെട്ടുകള്‍, കുളങ്ങള്‍, കിണറുകള്‍ എന്നിവയ്ക്ക് സുരക്ഷാഭിത്തികള്‍ നിര്‍മിക്കണം. ഇവിടങ്ങളില്‍ അപകട സാധ്യതാ ബോര്‍ഡുകളും സ്ഥാപിക്കണം. സ്‌കൂള്‍ പരിസരത്തുള്ള അപകടകരമായ മരങ്ങളും മരച്ചില്ലകളും മുറിച്ചുമാറ്റണം. സ്‌കൂളിലേക്കുള്ള വഴി, പരിസരം, കോമ്പൗണ്ട് എന്നിവിടങ്ങളിലുള്ള വൈദ്യുതി പോസ്റ്റ്, ഇലക്ട്രിക് ലൈന്‍, സ്‌റ്റേ വയര്‍, സുരക്ഷാവേലി ഇല്ലാതെയുള്ള ട്രാന്‍സ്‌ഫോര്‍മറുകള്‍ മുതലായവ അപകടകരമാംവിധമാണെങ്കില്‍ കെഎസ്ഇബി അധികൃതരെ അറിയിച്ച് സുരക്ഷിതത്വം ഉറപ്പാക്കണം. സ്‌കൂളിലും പരിസരത്തും ഇഴജന്തുക്കള്‍ കയറിയിരിക്കാന്‍ സാധ്യതയുള്ള ഇടങ്ങള്‍ സൂക്ഷ്മമായി പരിശോധിക്കുകയും ഇഴജന്തുക്കള്‍ കയറിയിരിക്കാതിരിക്കാനുള്ള സാഹചര്യം ഒരുക്കുകയും വേണം. സ്‌കൂള്‍ ഹെഡ്മാസ്റ്റര്‍മാര്‍ക്കും പ്രിന്‍സിപ്പലിനുമാണ് ഫിറ്റ്‌നസ് സര്‍ട്ടിഫിക്കറ്റ് വാങ്ങേണ്ടതിന്‍റെ പൂര്‍ണ ഉത്തരവാദിത്വം.

നിർമിതബുദ്ധിയുടെ സഹായത്തോടെ ഡിജിറ്റൽ കണ്ടുപിടിത്തവുമായി ജെറിറ്റ് ബൈജു

പീരുമേട്: വെബ്സൈറ്റുകളിൽ ഡിജിറ്റൽ സമത്വം ഉറപ്പാക്കുന്നതിനായി വെബ് ഈസ് എന്ന പുതിയ കണ്ടുപിടിത്തം നടത്തി മലയാളി വിദ്യാർഥി ജെറിറ്റ് ബൈജു. ലോകം മുഴുവൻ സാങ്കേതിക വിപ്ലവത്തിന്‍റെ ഫലങ്ങൾ അനുഭവിക്കുന്പോൾ വിവിധ തരത്തിലുള്ള അസമത്വങ്ങളും അതോടൊപ്പം ഉണ്ടാകുന്നുണ്ട്. എല്ലാ സേവനങ്ങളും ഡിജിറ്റൽ മേഖലയിലേക്ക് മാറുന്പോൾ വിവിധ തരം ശാരീരിക, മാനസിക ബൗദ്ധിക വെല്ലുവിളികൾ നേരിടുന്നവർക്ക് ഇത്തരം സേവനങ്ങൾ ഉപയോഗപ്രദമാകുന്നില്ല. ഡിജിറ്റൽ മേഖലയിലെ പ്രവേശനക്ഷമത ഉറപ്പാക്കുന്നതിന് ചെലവേറിയ ഉപകരണങ്ങൾ ഉണ്ടെങ്കിലും പല വെബ്സൈറ്റുകളിലും അത്തരം സേവനങ്ങൾ ലഭ്യമല്ല. ഈ പ്രശ്നത്തിനാണ് പുതിയ കണ്ടെത്തലിലൂടെ ജെറിറ്റ് ബൈജു പരിഹാരം കണ്ടെത്തിയിരിക്കുന്നത്. മോസില്ല ഫൗണ്ടേഷന്‍റെ റെസ്പോണ്‍സിബിൾ കംപ്യൂട്ടിംഗ് ചലഞ്ചിന്‍റെ ഭാഗമായി കുട്ടിക്കാനം മരിയൻ കോളേജ് നടത്തിയ പദ്ധതിയിൽ സർട്ടിഫിക്കറ്റ് കോഴ്സിൽ പങ്കെടുത്താണ് ഒന്നാം വർഷ ബിസിഎ വിദ്യാർഥിയായ ജെറിറ്റ് ഈ നേട്ടം കൈവരിച്ചത്. വിവിധ വൈകല്യങ്ങൾ നേരിടുന്നവർക്ക് വെബ്സൈറ്റുകൾ പ്രവേശനക്ഷമമാക്കുന്ന, നിർമിത ബുദ്ധിയുടെ സഹായത്തോടെ പ്രവർത്തിക്കുന്ന, തികച്ചും സൗജന്യമായി ഇൻസ്റ്റാൾ ചെയ്യാവുന്ന ലോകത്തിലെ തന്നെ ഏക ആപ്ലിക്കേഷനാണ് ഇടുക്കി ജില്ലയിലെ വണ്ടിപ്പെരിയാറിൽ നിന്നുള്ള ഈ വിദ്യാർഥി വികസിപ്പിച്ചത്. ഡിജിറ്റൽ പ്രവേശനക്ഷമത എന്ന വിഷയത്തിൽ ഈ പദ്ധതിയുടെ ഭാഗമായി മരിയൻ കോളേജിൽ സംഘടിപ്പിച്ച ദേശീയ കോണ്‍ഫറൻസിൽ അവതരിപ്പിക്കപ്പെട്ട വെബ് ഈസ് എന്ന ഈ കണ്ടുപിടിത്തം ഒന്നാം സമ്മാനം നേടിയതിനെതുടർന്ന് മോസില്ല റെസ്പോണ്‍സിസിബിൾ കംപ്യൂട്ടിംഗ് ചലഞ്ച് ഇന്ത്യ തലവൻ ജിബു ഏലിയാസ് അടുത്ത അന്തർദേശീയ സമ്മേളനത്തിലേക്ക് ജെറിറ്റിനെ നോമിനേറ്റ് ചെയ്തു. കേന്ദ്ര സർക്കാരിന്‍റെ പേറ്റന്‍റ് ലഭിച്ച ഈ കണ്ടുപിടിത്തം ലോകത്തിന്‍റെ വിവിധ ഭാഗങ്ങളിലുള്ള സ്ഥാപനങ്ങൾ അവരുടെ വെബ്സൈറ്റുകളിൽ ഉപയോഗിച്ച് തുടങ്ങിയിട്ടുണ്ട്. മരിയൻ കോളജ് അധ്യാപകരായ പ്രഫ.ബിനു തോമസ്, അജേഷ് പി. ജോസഫ് എന്നിവരാണ് ഈ പദ്ധതിക്ക് മാർഗനിർദേശം നൽകുന്നത്. ഇടുക്കി വണ്ടിപ്പെരിയാർ അറുപത്തിരണ്ടാം മൈൽ ആലുങ്കൽ ബൈജു-സിന്ധു ദന്പതികളുടെ മകനാണ് ജെറിറ്റ്.

ട്രെയിനുകള്‍ക്കുള്ളിലും ടിക്കറ്റ് കൗണ്ടറിലും ഒരേ ദുരിതം

കോട്ടയം: റെയില്‍വേ അപ്പാടെ ഓണ്‍ലൈന്‍ സംവിധാനത്തിലേക്ക് പുരോഗമിക്കുമ്പോള്‍ യാത്രക്കാര്‍ വലയുന്നത് ടിക്കറ്റ് കൗണ്ടറുകളിലാണ്. ജീവനക്കാരുടെ എണ്ണം റെയില്‍വേ കുറച്ചുകൊണ്ടിരിക്കെ ജനറല്‍ കംപാര്‍ട്ടുമെന്‍റിലേക്ക് ടിക്കറ്റ് കൊടുക്കുന്ന കൗണ്ടറില്‍ ജീവനക്കാര്‍ ഒരാള്‍ മാത്രമായി. രാവിലെയും വൈകുന്നേരവും യാത്രക്കാരുടെ വന്‍ക്യൂവാണ് ഒറ്റയാള്‍ കൗണ്ടറിനു മുന്നിലുണ്ടാകുക. ട്രെയിന്‍ എത്താറാകുന്ന വേളയില്‍ ഓടിയെത്തുന്ന യാത്രക്കാര്‍ ടിക്കറ്റെടുക്കാന്‍ പെടാപ്പാടു പെടുന്ന സാഹചര്യമാണ്. ക്യൂവില്‍ ഏറ്റവും മുന്നിലുള്ളവരോട് ഒരു ടിക്കറ്റ് എടുത്തുതരണമെന്നും യാത്ര മുടങ്ങുമെന്നും യാചിക്കുന്ന യാത്രക്കാരുമുണ്ട്. ജീവനക്കാരെ എത്ര കുറച്ചാലും യാത്രക്കാരുടെ ക്ഷേമം ഉറപ്പാക്കുന്നതില്‍ റെയില്‍വേ വീഴ്ച വരുത്തരുതെന്നാണ് യാത്രക്കാര്‍ പറയുന്നത്. രാവിലെ ആറു മുതല്‍ പത്തുവരെയും വൈകുന്നേരം മൂന്നു മുതല്‍ എട്ടുവരെയും കുറഞ്ഞത് രണ്ടു കൗണ്ടറുകളില്‍ ടിക്കറ്റ് നല്‍കാന്‍ ജീവനക്കാരുണ്ടാകണം. ജനറല്‍ ടിക്കറ്റ് കൗണ്ടറുകളില്‍ മുന്‍പ് മൂന്നു പേരും രാത്രി രണ്ടുപേരും ഡ്യൂട്ടിയിലുണ്ടായിരുന്നു. ജനറല്‍ കംപാര്‍ട്ടുമെന്‍റുകളിലേക്കുള്ള ടിക്കറ്റ് ഓണ്‍ ലൈനില്‍ എടുക്കാനാവില്ലെന്നിരിക്കെ തിരക്കേറിയ ട്രെയിനുകളിലെ യാത്രപോലെ ദുഷ്‌കരമായിരിക്കുന്നു ടിക്കറ്റെടുക്കുന്നതും. കോട്ടയം, ചങ്ങനാശേരി സ്‌റ്റേഷനുകളിലാണ് യാത്രക്കാരുടെ വലിയ തിരക്കുള്ളത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]