റോഡുകൾ പുനർനിർമിക്കണം: യൂത്ത് കോൺഗ്രസ്‌ മാർച്ചിൽ പ്രതിഷേധമിരമ്പി : Deepika.com Nattu Visesham

KOTTAYAM

റോഡുകൾ പുനർനിർമിക്കണം: യൂത്ത് കോൺഗ്രസ്‌ മാർച്ചിൽ പ്രതിഷേധമിരമ്പി

Sunday, May 26, 2024 6:01 AM IST

ചങ്ങനാശേരി: വിവിധ പദ്ധതികൾക്കായി ജലസേചനവകുപ്പ് പൊളിച്ചിട്ടിരുക്കുന്ന നൂറുകണക്കിന് റോഡുകൾ അടിയന്തരമായി പുനർനിർമിക്കണമെന്ന് ആവശ്യപ്പെട്ട് യൂത്ത് കോൺഗ്രസ്‌ ചങ്ങനാശേരി നിയോജകമണ്ഡലം കമ്മിറ്റി നടത്തിയ വാട്ടർ അഥോറിറ്റി ഓഫീസ് മാർച്ചിൽ പ്രതിഷേധമിരമ്പി.

അപകടഭീഷണിയായി റോഡുകളിലുള്ള കൂറ്റൻ പൈപ്പുകൾ അധ്യയന വർഷം ആരംഭിക്കുന്നതിനുമുമ്പ് മാറ്റി സ്ഥാപിക്കുക, ജലജീവൻ പദ്ധതിയുടെ നിലവിലെ അവസ്ഥയും ജലസ്രോതസും ജനങ്ങളെ ബോധ്യപ്പെടുത്തുക, നിയോജകമണ്ഡലത്തിലെ ശുദ്ധജലക്ഷാമം പരിഹരിക്കുക എന്നീ ആവശ്യങ്ങളും ഉന്നയിച്ചാണ് യൂത്ത് കോൺഗ്രസ് പ്രതിഷേധമാർച്ച് സംഘടിപ്പിച്ചത്.

ഡിസിസി ജനറൽ സെക്രട്ടറി ജോബിൻ ജേക്കബ് ഉദ്ഘാടനം ചെയ്‌തു. യൂത്ത് കോൺഗ്രസ്‌ നിയോജകമണ്ഡലം പ്രസിഡന്‍റ് ഡെന്നിസ് ജോസഫ് അധ്യക്ഷത വഹിച്ചു. കോൺഗ്രസ് ഈസ്റ്റ് ബ്ലോക്ക് കമ്മിറ്റി പ്രസിഡന്‍റ് കെ. എ. ജോസഫ് മുഖ്യപ്രഭാഷണം നടത്തി.

കോൺഗ്രസ്‌ കുറിച്ചി മണ്ഡലം പ്രസിഡന്‍റ് അരുൺ ബാബു, യൂത്ത് കോൺഗ്രസ് ജില്ലാ ജനറൽ സെക്രട്ടറിമാരായ സോബിച്ചൻ കണ്ണമ്പള്ളി, ബിബിൻ വർഗീസ്, അർജുൻ രമേശ്‌, യൂത്ത് കോൺഗ്രസ്‌ ബ്ലോക്ക്‌ ജനറൽ സെക്രട്ടറിമാരായ ബി. അജിത്കുമാർ, ടോണി കുട്ടമ്പേരൂർ, എബിൻ ആന്‍റണി, യൂത്ത് കോൺഗ്രസ് മണ്ഡലം പ്രസിഡന്‍റുമാരായ ബിബിൻ ജോസഫ്,

അശ്വിൻ ജിയോ ഏബ്രഹാം, ആന്‍റോ ആന്‍റണി, ജോമോൻ ലോബോ, സന്ദീപ് മോസ്ക്കോ, റിസ്‌വാൻ നൗഷാദ്, ടിബി തോമസ്, ഷിജിൻ കെ. രാജ്. എഡ്വിൻ ബാബു, റിറ്റു എഴുവന്താനം, സിനോയ് മാത്യു എന്നിവർ പ്രസംഗിച്ചു. യൂത്ത് കോൺഗ്രസ്‌ പ്രവർത്തകരും പോലീസും തമ്മിൽ വാട്ടർ അഥോറിറ്റി ഓഫീസിനു മുൻപിൽ ഉന്തും തള്ളുമുണ്ടായി.

എംഎൽഎയെ വഴിയിൽ തടഞ്ഞിടും: യൂത്ത് കോൺഗ്രസ്‌

എംഎൽഎയുടെ നേതൃത്വത്തിൽ വകുപ്പുകളുടെ ഏകോപനമില്ലായ്മയാണ്‌ പ്രശ്നങ്ങൾക്ക് കാരണമെന്നും ജനങ്ങളാകെ ദുരിതം അനുഭവിക്കുന്ന വിഷയത്തിൽ അടിയന്തര പരിഹാരം ഉണ്ടായില്ലെങ്കിൽ എംഎൽഎയെ വഴിയിൽ തടഞ്ഞിടുമെന്ന് യൂത്ത് കോൺഗ്രസ്‌ നിയോജകമണ്ഡലം പ്രസിഡന്‍റ് ഡെന്നിസ് ജോസഫ് പറഞ്ഞു.