വീടുകയറി ആക്രമണം: യുവാവ് അറസ്റ്റിൽ
1430646
Friday, June 21, 2024 6:52 AM IST
ഏറ്റുമാനൂര്: പേരൂർ സ്വദേശിയായ യുവാവിനെ വീടുകയറി ആക്രമിച്ചു കൊലപ്പെടുത്താന് ശ്രമിച്ച കേസില് യുവാവിനെ പോലീസ് അറസ്റ്റ് ചെയ്തു. ഏറ്റുമാനൂര് പേരൂര് ഇടിവെട്ട് കാരക്കാട്ട് ശ്രീജേഷിനെ (34)യാണ് ഏറ്റുമാനൂര് പോലീസ് അറസ്റ്റു ചെയ്തത്.
ഇയാളും സുഹൃത്തും 19ന് രാത്രി 8.30ന് പേരൂര് സ്വദേശിയായ യുവാവിന്റെ വീട്ടില് അതിക്രമിച്ചുകയറി യുവാവിനെ ചീത്തവിളിക്കുകയും മര്ദിക്കുകയും കയ്യില് കരുതിയിരുന്ന വടിവാള് കൊണ്ട് ആക്രമിക്കുകയുമായിരുന്നു.
ഇതുകണ്ട് തടയാന് ശ്രമിച്ച പേരൂർ സ്വദേശിയുടെ സുഹൃത്തിനെയും ഇവര് ആക്രമിച്ചു. യുവാവ് ശ്രീജേഷിന്റെ സുഹൃത്തിന്റെ കയ്യില്നിന്ന് പണം കടം വാങ്ങിയത് തിരികെ കൊടുക്കാത്തതിലുള്ള വിരോധം മൂലമാണ് ഇവര് യുവാവിനെ വീടുകയറി ആക്രമിച്ചത്. തുടര്ന്ന് ഇവര് സംഭവസ്ഥലത്തുനിന്നു കടന്നുകളയുകയും ചെയ്തു.
കേസെടുത്ത ഏറ്റുമാനൂര് പോലീസ് നടത്തിയ ശക്തമായ തെരച്ചിലിനൊടുവില് ശ്രീജേഷിനെ പിടികൂടുകയായിരുന്നു. കോടതിയില് ഹാജരാക്കിയ ഇയാളെ റിമാന്ഡ് ചെയ്തു. കൂട്ടുപ്രതിക്കായി തെരച്ചില് ശക്തമാക്കി.