ച​ങ്ങ​നാ​ശേ​രി: നാ​ലു​ന്നാ​ക്ക​ല്‍ പാ​ല​ത്തി​നു​സ​മീ​പം തോ​ട്ടി​ലെ ചീ​പ്പി​ല്‍ മാ​ലി​ന്യം അ​ടി​ഞ്ഞു​കൂ​ടി ഒ​ഴു​ക്ക് ത​ട​സ​പ്പെ​ടു​ന്നു. മ​ഴ​ക്കാ​ല​ത്ത് തോ​ട്ടി​ലെ വെ​ള്ളം സ​മീ​പ​പു​ര​യി​ട​ങ്ങ​ളി​ല്‍ ക​യ​റു​ന്ന​താ​യും പ​രാ​തി. വെ​ളി​യം നാ​ലു​ന്നാ​ക്ക​ല്‍ തോ​ട്ടി​ല്‍ നാ​ലു​ന്നാ​ക്ക​ല്‍ പാ​ല​ത്തി​ന് ഇ​രു​നൂ​റ് മീ​റ്റ​ര്‍ അ​ക​ലെ​യാ​ണ് നാ​ല്പ​തു​വ​ര്‍ഷ​ത്തി​നു മു​മ്പ് സ്ഥാ​പി​ച്ച ചീ​പ്പും ഇ​തി​നു​മു​ക​ളി​ല്‍ ജീ​ര്‍ണി​ച്ച നി​ല​യി​ലു​ള്ള ന​ട​പ്പാ​ല​വും സ്ഥി​തി ചെ​യ്യു​ന്ന​ത്.

പ്ലാ​സ്റ്റി​ക് കു​പ്പി​ക​ള്‍, ച​പ്പു​ച​വ​റു​ക​ള്‍, ക​ട​പു​ഴ​കി​യ മ​ര​ങ്ങ​ള്‍, വൃ​ക്ഷ​ശി​ഖ​ര​ങ്ങ​ള്‍, ഓ​ല​മ​ട​ലു​ക​ള്‍ തു​ട​ങ്ങി​യ​വ​യാ​ണ് ചീ​പ്പി​ല്‍ കു​ടു​ങ്ങി​ക്കി​ട​ക്കു​ന്ന​ത്. ചി​ല സ​മ​യ​ങ്ങ​ളി​ല്‍ മാ​ലി​ന്യ​ത്തി​ല്‍നി​ന്നു​ള്ള ദു​ര്‍ഗ​ന്ധ​വും ദു​രി​ത​മാ​ണ്. മാ​മ്മൂ​ട് വെ​ളി​യം ഭാ​ഗ​ത്തു​നി​ന്നാ​രം​ഭി​ക്കു​ന്ന തോ​ട്ടി​ല്‍നി​ന്നു​ള്ള മാ​ലി​ന്യ​ങ്ങ​ളാ​ണ് ഈ ​ഭാ​ഗ​ത്തു​കൂ​ടി ഒ​ഴു​കി​കൂ​ടു​ന്ന​ത്.

ചീ​പ്പും പാ​ല​വും കൃ​ഷി ആ​വ​ശ്യ​ത്തി​നാ​യി ഇ​റി​ഗേ​ഷ​ന്‍ നി​ർമി​ച്ചതാ​ണ്. മാ​ട​പ്പ​ള്ളി പ​ഞ്ചാ​യ​ത്ത് 19-ാം വാ​ര്‍ഡി​ലാ​ണ് ചീ​പ്പ് ഒ​ഴു​ക്കി​നു വി​ഘാ​ത​മാ​യി നി​ല​കൊ​ള്ളു​ന്ന​ത്.

ഇ​പ്പോ​ള്‍ സ​മീ​പ​ങ്ങ​ളി​ല്‍ നെ​ല്‍കൃ​ഷി​യി​ല്ലെ​ന്നു മാ​ത്ര​മ​ല്ല, നി​ല​ങ്ങ​ൾ പ​ല​തും നി​ക​ത്ത​പ്പെ​ട്ട നി​ല​യി​ലു​മാ​ണ്. ചീ​പ്പ് കാ​ല​ഹ​ര​ണ​പ്പെ​ടു​ക​യും പാ​ലം പൊ​ളി​ഞ്ഞു​വീ​ഴാ​റു​മാ​യ സാ​ഹ​ച​ര്യ​ത്തി​ല്‍ ഇ​വ ര​ണ്ടും പൊ​ളി​ച്ചു​മാ​റ്റി തോ​ട്ടി​ലെ ഒ​ഴു​ക്കു ത​ട​സം പ​രി​ഹ​രി​ക്ക​ണ​മെ​ന്ന ആ​വ​ശ്യ​മാ​ണ് ഉ​യ​ര്‍ന്നി​രി​ക്കു​ന്ന​ത്.