നെടുങ്കണ്ടം: നെടുങ്കണ്ടം പഞ്ചായത്ത് യുപി സ്കൂളില് സ്റ്റാര്സ് പദ്ധതിപ്രകാരം നിര്മിച്ച പ്രീപ്രൈമറിയുടെ ഉദ്ഘാടനം നാളെ നടക്കും. സമഗ്ര ശിക്ഷാ അഭിയാന്റെ സ്റ്റാര്സ് പദ്ധതിയില്പ്പെടുത്തി 10 ലക്ഷം രൂപ വിനിയോഗിച്ചാണ് നെടുങ്കണ്ടം ബിആര്സിയുടെ മേല്നോട്ടത്തില് പ്രീപ്രൈമറി പൂര്ത്തീകരിച്ചത്. സ്കൂള് എസ്എംസി, പൂര്വവിദ്യാര്ഥീ സംഘടന, ഗ്രാമപഞ്ചായത്ത്, വ്യാപാര സ്ഥാപനങ്ങള് എന്നിവിടങ്ങളില്നിന്നായി ഏഴ് ലക്ഷം രൂപയും സമാഹരിച്ചു.
വ്യത്യസ്തമായ രീതിയിലാണ് സ്കൂളില് പ്രീപ്രൈമറി ക്രമീകരിച്ചിരിക്കുന്നത്. ശാസ്ത്ര സാങ്കേതിക കഴിവുകളെ പ്രയോജനപ്പെടുത്തുന്ന മ്യൂസിയങ്ങള്, കുട്ടികള്ക്കായി മുപ്പതോളം പഠന ഇടങ്ങള്, എണ്പതിലധികം പ്രവര്ത്തന ഇടങ്ങള്, തീയറ്റര് സമുച്ചയം, പോപ്സ് റേഡിയോ പദ്ധതി തുടങ്ങിയവ ഇവയില് ക്രമീകരിച്ചിട്ടുണ്ട്.
പ്രീപ്രൈമറിക്കായി നാല് ക്ലാസ് റൂമുകള് ഏര്പ്പെടുത്തിയിട്ടുണ്ട്. അഭിനയക്കളരി, ജൈവ ഉദ്യാനം, വാഹന മ്യൂസിയം തുടങ്ങി 16 ഇടങ്ങള് ഇതിനായും സജ്ജമാക്കിയിട്ടുണ്ട്.
നാളെ ഉച്ചകഴിഞ്ഞ് മൂന്നിന് പ്രീപ്രൈമറി പദ്ധതികളുടെ ഉദ്ഘാടനം എം.എം. മണി എംഎല്എ നിര്വഹിക്കും.
ജില്ലാ പഞ്ചായത്ത് പ്രസിഡന്റ് ജിജി കെ. ഫിലിപ്, ബ്ലോക്ക് പഞ്ചായത്ത് പ്രസിഡന്റ് കെ.ടി. കുഞ്ഞ്, ഗ്രാമപഞ്ചായത്ത് പ്രസിഡന്റ് ശോഭന വിജയന് തുടങ്ങിയവര് വിവിധ പദ്ധതികള് ഉദ്ഘാടനം ചെയ്യുമെന്ന് സ്കൂള് ഹെഡ്മാസ്റ്റര് സിബി പോള്, എം.എസ്. മഹേശ്വരന്, ബിന്ദു സഹദേവന്, പി.എസ്. ഭാനുകുമാര്, ധനേഷ് കുമാര്, എം.എസ്. ദീപേഷ് എന്നിവര് അറിയിച്ചു.