ഇടുക്കി രൂപത: ജോർജ് കോയിക്കൽ കത്തോലിക്ക കോൺഗ്രസ് പ്രസിഡന്റ്
1425503
Tuesday, May 28, 2024 6:27 AM IST
ചെറുതോണി: ഇടുക്കി രൂപത കത്തോലിക്ക കോൺഗ്രസ് പ്രതിനിധി സമ്മേളനവും തെരഞ്ഞെടുപ്പും വാഴത്തോപ്പ് സെന്റ്് ജോർജ് പാരീഷ് ഹാളിൽ നടന്നു. രൂപതയിലെ വിവിധ യൂണിറ്റുകളിൽനിന്നും തെരഞ്ഞെടുക്കപ്പെട്ട പ്രതിനിധികൾ സമ്മേളനത്തിൽ പങ്കെടുത്തു. സമ്മേളനം ഡയറക്ടർ ഫാ. ജോസഫ് പാലക്കുടി ഉദ്ഘാടനം ചെയ്തു. കത്തോലിക്ക കോൺഗ്രസ് രൂപത പ്രസിഡന്റ് ജോർജ് കോയിക്കൽ അധ്യക്ഷത വഹിച്ചു. സംഘടനയുടെ വാർഷിക റിപ്പോർട്ടും വരവ് ചെലവ് കണക്കുകളും യോഗം ഐകകണ്ഠ്യേന പാസാക്കി.
ദീർഘകാലം സംഘടനയുടെ ഡയറക്ടറായി സേവനമനുഷ്ഠിച്ച ശേഷം സ്ഥാനമൊഴിയുന്ന ഫാ. ഫ്രാൻസിസ് ഇടവകണ്ടത്തിന് യാത്രയയപ്പ് നൽകി.
ജസ്റ്റിസ് ജെ.ബി. കോശി കമ്മീഷൻ റിപ്പോർട്ട് നിർദേശങ്ങൾ അടിയന്തരമായി നടപ്പിലാക്കണമെന്ന് ആവശ്യപ്പെട്ടുള്ള പ്രമേയം റിൻസി ടോമിയും ദുരിതമനുഭവിക്കുന്ന കർഷകരെ സംരക്ഷിക്കുന്നതിനുള്ള അടിയന്തര നടപടികൾ സർക്കാർ സ്വീകരിക്കണമെന്ന് ആവശ്യപ്പെട്ടുകൊണ്ടുള്ള പ്രമേയം ജോസ് തോമസ് ഒഴുകയിലും അവതരിപ്പിച്ചു.
തുടർന്ന് പുതിയ ഭരണസമിതിയുടെ തെരഞ്ഞെടുപ്പിന് വരണാധികാരിയായ ചുമ്മാർ മാത്യു നേതൃത്വം നൽകി. പ്രസിഡന്റായി ജോർജ് കോയിക്കൽ, ജനറൽ സെക്രട്ടറിയായി സിജോ ഇലന്തൂർ, ട്രഷററായി ജോസഫ് ചാണ്ടി തേവർപറമ്പിൽ, വൈസ് പ്രസിഡണ്ടുമാരായിജോസ് തോമസ് ഒഴുകയിൽ, സാബു കുന്നുംപുറം, ആഗ്നസ് ബേബി, ജോളി ജോൺ എന്നിവരെയും തെരഞ്ഞെടുത്തു.
തുടർന്ന് നടന്ന ചർച്ചയിൽ സമുദായ ശാക്തീകരണ പ്രവർത്തനങ്ങൾക്കൊപ്പം കാർഷിക മേഖലയിലെ പ്രതിസന്ധികളും ഭൂപ്രശ്നങ്ങളും പരിഹരിക്കുംവരെ തുടർ സമരങ്ങളുമായി മുന്നേറുവാൻ തീരുമാനിച്ചതായി ഭാരവാഹികൾ അറിയിച്ചു.