ADVERTISEMENT

ADVERTISEMENT

കോതമംഗലം ബ്ലോക്ക് പഞ്ചായത്തിന് ബെസ്റ്റ് അവാർഡ്

കോതമംഗലം: എറണാകുളം ജില്ലാ ആസൂത്രണ സമിതിയുടെ ബെസ്റ്റ് അവാർഡ് കോതമംഗലം ബ്ലോക്ക് പഞ്ചായത്തിന് ലഭിച്ചു. സാന്പത്തിക വർഷത്തിൽ 109.88 ശതമാനം പദ്ധതി വിഹിതം ചെലവഴിച്ച് ജില്ലയിൽ ഒന്നാം സ്ഥാനം നേടിയാണ് കോതമംഗലം ബ്ലോക്ക് പഞ്ചായത്ത് ഈ നേട്ടം കരസ്ഥമാക്കിയത്.

ജില്ലാ കളക്ടർ എൻ.എസ്.കെ. ഉമേഷിൽനിന്ന് ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീർ, വൈസ് പ്രസിഡന്‍റ് ഡയാന നോബി, സ്ഥിരം സമിതി അധ്യക്ഷരായ ജോമി തെക്കേക്കര, ജെയിംസ് കോറന്പേൽ, ബ്ലോക്ക് പഞ്ചായത്തംഗങ്ങളായ നിസമോൾ ഇസ്മായിൽ, ടി.കെ കുഞ്ഞുമോൻ, ബിഡിഒ സി.ഒ. അമിത, ജനറൽ എക്സ്റ്റൻഷൻ ഓഫീസർ കെ.ആർ രാജേഷ് എന്നിവർ ചേർന്ന് പുരസ്കാരം ഏറ്റുവാങ്ങി. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ അധ്യക്ഷത വഹിച്ചു.

ADVERTISEMENT

ഇലഞ്ഞി-നെല്ലൂരുപാറ റോഡ് വികസനം; സർവകക്ഷിയോഗം ചേർന്നു

ഇലഞ്ഞി: ഇലഞ്ഞി-നെല്ലൂരുപാറ പിഡബ്ല്യുഡി റോഡിന്‍റെ വികസന പ്രവർത്തനവുമായി ബന്ധപ്പെട്ട് അനൂപ് ജേക്കബ് എംഎൽഎയുടെ അധ്യക്ഷതയിൽ ഇലഞ്ഞി പഞ്ചായത്തിൽ സർവകക്ഷിയോഗം ചേർന്നു. യോഗത്തിലുണ്ടായ ചർച്ചകളുടെയും അഭിപ്രായങ്ങളുടെയും അടിസ്ഥാനത്തിൽ കാലാനിമറ്റം ജംഗ്ഷന്‍റെ വികസനം ഉൾപ്പെടെയുള്ള പ്രവർത്തനങ്ങൾ ഉടനടി ആരംഭിക്കുവാൻ തീരുമാനമായി. റോഡിന്‍റെ വികസനവുമായി ബന്ധപ്പെട്ട് വീട് നഷ്ടപ്പെടുന്ന കുടുംബത്തിന് അനുയോജ്യമായി പുതിയ ഭവനം നിർമിച്ചു നൽകുവാനും ധാരണയായി. സ്വന്തമായി ഭൂമിയില്ലാത്ത നിരവധി പേർക്ക് ഭൂമി നൽകിയ ഇലഞ്ഞി സ്വദേശി വി.ജെ. ലൂക്കോസ് വെള്ളാമത്തടത്തിൽ സൗജന്യമായി നൽകുന്ന സ്ഥലം ഈയാഴ്ചതന്നെ വീട് നഷ്ടപ്പെടുന്ന കുടുംബത്തിന് എഴുതി നൽകുവാൻ സന്നദ്ധത അറിയിച്ചു. ലൂക്കോസിന്‍റെ സമൂഹത്തോടുളള പ്രതിബന്ധതയെ അനൂപ് ജേക്കബ് എംഎൽഎ അഭിനന്ദിച്ചു. പിഎംഎവൈ, ലയണ്‍സ് ക്ലഹിന്‍റെ സ്വപ്നഭവനം തുടങ്ങിയ പദ്ധതികൾ വീട് നിർമാണത്തിന് പ്രയോജനപ്പെടുത്തുവാനും ബാക്കി തുക സ്പോണ്‍സർഷിപ്പിലൂടെ കണ്ടെത്തി വീട് നിർമാണം പൂർത്തിയാക്കുവാനും യോഗത്തിൽ തീരുമാനമായി. വീട് നിർമാണം പൂർത്തിയായശേഷം മാത്രം ഈ കുടുംബം ഇവിടെനിന്ന് മാറിയാൽ മതിയെന്നും യോഗത്തിൽ തീരുമാനമായി. സംസ്ഥാന സർക്കാരിന്‍റെ അനുവാദം ലഭിക്കുന്ന മുറയ്ക്ക് മുത്തോലപുരം സഹകരണ ബാങ്കിന്‍റെ പൊതുനന്മ ഫണ്ടിൽനിന്നും വീട് നിർമാണത്തിന് സഹായം അനുവദിക്കാമെന്ന് ബാങ്ക് പ്രസിഡന്‍റ് ജോണി അരീക്കാട്ടേൽ സർവകക്ഷി യോഗത്തെ അറിയിച്ചു. പുനരധിവാസം സംബന്ധിച്ച് ധാരണയായതിന്‍റെ അടിസ്ഥാനത്തിൽ കാലാനിമറ്റം ജംഗ്ഷന്‍റെ വികസന പ്രവർത്തനങ്ങളും ടൈൽ വിരിക്കൽ അടക്കമുള്ള പ്രവർത്തികളും ഉടൻ ആരംഭിക്കുമെന്ന് യോഗത്തിൽ പൊതുമരാമത്ത് വകുപ്പ് അസിസ്റ്റന്‍റ് എക്സിക്യൂട്ടീവ് എൻജിനീയർ അറിയിച്ചു. വീട് നിലനിൽക്കുന്ന ഭാഗമൊഴിച്ച് ബാക്കി ഭാഗത്തെ നിർമാണ പ്രവർത്തനങ്ങൾ പൂർണമായും നടപ്പാക്കുമെന്നും കുടുംബം ഇവിടെനിന്ന് മാറുന്ന മുറയ്ക്ക് ആ ഭാഗവും റോഡിന്‍റെ ഭാഗമാക്കി മാറ്റുമെന്നും പിഡബ്ല്യുഡി അധികൃതർ യോഗത്തെ അറിയിച്ചു.

കാറുകൾ കൂട്ടിയിടിച്ചതിനെച്ചൊല്ലി കൈയേറ്റം

തിരുമാറാടി: റോഡരികിൽ നിർത്തിയിട്ടിരുന്ന കാറിൽ മറ്റൊരു കാറിടിച്ചു. ഓണക്കൂർ കരയോഗപ്പടിക്കു സമീപം തിങ്കളാഴ്ച രാത്രി 9.30ഓടെയായിരുന്നു അപകടം. സ്ത്രീകളും കുട്ടികളുമടങ്ങുന്ന കുടുംബം സഞ്ചരിച്ചിരുന്ന കാറാണ് റോഡരികിൽ നിർത്തിയിട്ടിരുന്നത്. ഇതിനിടെയാണ് കാക്കൂർ പാലച്ചുവട് പള്ളിയാൻ സുഗു (48), സുമേഷ് (44) എന്നിവർ സഞ്ചരിച്ചിരുന്ന കാർ നിർത്തിയിട്ടിരുന്ന കാറിൽ ഇടിച്ചത്. അപകടത്തെതുടർന്ന് കുടുംബാംഗങ്ങൾ ഇവരോട് വിവരങ്ങൾ ആരാഞ്ഞതോടെ അസഭ്യവർഷവും കൈയേറ്റവുമായി. സംഭവം കണ്ട് ഓടിക്കൂടിയ നാട്ടുകാരെയും സംഘം കൈയേറ്റം ചെയ്തു. ഇതിനിടെ സ്ഥലത്തെത്തിയ പിറവം പോലീസ് ഇവരെ വാഹനത്തിൽ പിടിച്ച് കയറ്റാൻ ശ്രമിക്കുന്നതിനിടെയും പരാക്രമം തുടർന്നു. ഇവരോടൊപ്പമുണ്ടായിരുന്ന മൂന്നാമതൊരാൾ ഓടി രക്ഷപ്പെട്ടതായും നാട്ടുകാർ പറഞ്ഞു. ഏറെ പണിപ്പെട്ടാണ് പോലീസ് ഇരുവരേയും ജീപ്പിൽ കയറ്റികൊണ്ടുപോയത്. ഇരുവരും മദ്യലഹരിയിലായിരുന്നുവെന്ന് നാട്ടുകാർ പറഞ്ഞു.

‘വെള്ളക്കെട്ട് പരിഹരിക്കണം’

കോലഞ്ചേരി: മീമ്പാറ കിഴക്കേ കവലയിലെ വെള്ളക്കെട്ടിന് അടിയന്തര പരിഹാരം കാണണമെന്ന് സിപിഐ മീമ്പാറ ബ്രാഞ്ച് കമ്മിറ്റി ആവശ്യപ്പെട്ടു. ചൂണ്ടി-രാമമംഗലം റോഡും മീമ്പാറ-മണീട് റോഡും സംഗമിക്കുന്ന മീമ്പാറ കിഴക്കേ കവലയിലെ വെള്ളക്കെട്ടിന് പരിഹാരം കാണണമെന്ന് നാട്ടുകാർ പലതവണ പഞ്ചായത്ത് മെമ്പറുടെ ശ്രദ്ധയിൽപ്പെടുത്തിയെങ്കിലും നാളിതുവരേയും ഒരു നടപടിയും സ്വീകരിച്ചിട്ടില്ല. മഴക്കാലം ആരംഭിച്ചതോടെ കാൽനട യാത്രക്കാരും ഇരുചക്ര വാഹനയാത്രക്കാരും ദുരിതത്തിലായിരിക്കുകയാണ്. സമീപ വീടുകളിലേക്കും ചെളിവെള്ളം ഒഴികി എത്തുകയാണ്. വികസത്തിന്‍റെ ഭാഗമായി ചൂണ്ടി - രാമമംഗലം റോഡ് ഉയർത്തിയതോടെയാണ് വെള്ളകെട്ട് ഉണ്ടായിട്ടുള്ളത്. സമീപത്തുള്ള തോടുകളും ഓടകളും അടഞ്ഞുകിടക്കുകയാണ്. റോഡിന്‍റെ ഓട നിർമാണം സമീപവാസി തടഞ്ഞതും വെള്ളക്കെട്ടിനു കാരണമായിട്ടുണ്ടെന്ന് നാട്ടുകാർ പറയുന്നു. അടിയന്തരമായി വെള്ളക്കെട്ടിന് പരിഹാരം കണ്ടില്ലെങ്കിൽ വൻ പ്രക്ഷോഭ പരിപാടികൾ ആരംഭിക്കുമെന്ന്ബ്രാഞ്ച് കമ്മിറ്റി യോഗം മുന്നറിയിപ്പ് നൽകി. യോഗത്തിൽ തമ്പി എം. തോമസ് അധ്യക്ഷത വഹിച്ചു.

ദിശാ ബോർഡുകളില്ല; അപകടങ്ങൾ പതിവ്

മൂവാറ്റുപുഴ: റോഡരികിൽ ദിശാ ബോർഡുകൾ സ്ഥാപിക്കാത്തത് അപകടങ്ങൾക്കു കാരണമാകുന്നു. മൂവാറ്റുപുഴ-കാവുങ്കര-ഇരുമലപ്പടി റോഡിലും കറുകടം-അന്പലംപടി-വീട്ടൂർ റോഡിലും ദിശാ ബോർഡുകൾ സ്ഥാപിക്കാത്തതുമൂലം അപകടങ്ങൾ പതിവാകുന്നതായി നാട്ടുകാർ പറയുന്നു. എട്ട് വർഷം മുന്പ് നിർമാണം പൂർത്തീകരിച്ച റോഡിൽ ഇതുവരെയും ദിശാ ബോർഡുകൾ സ്ഥാപിച്ചിട്ടില്ല. മൂവാറ്റുപുഴ - ഇരുമലപ്പടി റോഡിൽ വരുന്ന വാഹനങ്ങൾക്ക് കറുകടം - അന്പലംപടി - വീട്ടൂർ റോഡിൽ നിന്നുവരുന്ന വാഹനങ്ങളെ കാണാൻ സാധിക്കാത്തതാണ് ഇവിടെ അപകടങ്ങൾ പതിവാകാൻ കാരണം. കറുകടം - അന്പലംപടി റോഡിനേക്കാളും താഴ്ചയിലുള്ള മൂവാറ്റുപുഴ റോഡിൽ നിന്നുവരുന്ന വാഹനങ്ങൾ ഇരുറോഡിൽ നിന്നുവരുന്ന വാഹന ഡ്രൈവർമാർക്ക് കാണാൻ സാധിക്കുന്നില്ല. അതിനാൽ റോഡിൽ ദിശാ ബോർഡുകൾ സ്ഥാപിക്കണമെന്ന പ്രദേശവാസികളുടെ ആവശ്യം ശക്തമായിരിക്കുകയാണ്. ഇവിടെ വലിയ അപകടക്കെണിയാണ് പതിയിരിക്കുന്നതിന് അവസാനത്തെ ഉദാഹരണമാണ് ശനിയാഴ്ച മുളവൂർ ഇർഷാദിയ മസ്ജിദിന് സമീപമുണ്ടായ അപകടം. അപകടത്തിൽ തൊടുപുഴ സ്വദേശിയായ യുവാവ് മരിച്ചിരുന്നു. ഇതിന് മുന്പും ചെറുതും വലുതുമായ നിരവധി അപകടങ്ങൾക്ക് പ്രദേശവാസികൾ സാക്ഷ്യം വഹിച്ചിട്ടുണ്ട്. റോഡ് നിർമാണത്തിലെ അശാസ്ത്രീയതയും പ്രദേശവാസികൾ ചൂണ്ടിക്കാണിക്കുന്നു. 2019ൽ നിർമാണം പൂർത്തീകരിച്ച റോഡിൽ ദിശാ ബോർഡുകളോ ട്രാഫിക് ലൈനുകളോ ലൈറ്റുകളോ നാളിതുവരെ സ്ഥാപിച്ചിട്ടില്ല. അധികൃതർ നടപടി സ്വീകരിച്ച് അപകടങ്ങൾക്ക് ശാശ്വത പരിഹാരമുണ്ടാക്കണമെന്നാണ് നാട്ടുകാരുടെ ആവശ്യം.

തെരുവുനായ ശല്യം: ഞാറക്കലിൽ യൂത്ത് കോൺഗ്രസ് പ്രതിഷേധം

വൈപ്പിൻ: തെരുവുനായ ശല്യം രൂക്ഷമായ ഞാറക്കലിൽ യൂത്ത് കോൺഗ്രസ് പ്രവർത്തകർ റാംബോ എന്ന വളർത്തു നായയുമായി എത്തി പഞ്ചായത്തിന് മുന്നിൽ പ്രതിഷേധ സമരം നടത്തി. മെയിൻ റോഡുകളും ഇടറോഡുകളും തെരുവ് നായ്ക്കൾ കൈയടക്കി വെച്ചിരിക്കുകയാണെന്നും ജനങ്ങൾക്ക് സുരക്ഷിതമായി പുറത്തിറങ്ങി നടക്കാൻ പറ്റാത്ത അവസ്ഥയാണ് ഞാറക്കലെന്നും സമരം ഉദ്ഘാടനം ചെയ്ത ഡിസിസി വൈസ് പ്രസിഡന്‍റ് ടിറ്റോ ആന്‍റണി ആരോപിച്ചു. യൂത്ത് കോൺഗ്രസ് മണ്ഡലം പ്രസിഡന്‍റ് സൗമ്യ തോമസ് അധ്യക്ഷയായി.

ചെട്ടിക്കാട് പള്ളിയിൽ പ്രഥമദിവ്യകാരുണ്യം സ്വീകരിച്ച കുട്ടികളുടെ കൂട്ടായ്മ ഭക്തിസാന്ദ്രമായി

പറവൂർ : പ്രമുഖ തീർഥാടന കേന്ദ്രമായ ചെട്ടിക്കാട് വിശുദ്ധ അന്തോണീസിന്‍റെ ദേവാലയത്തിൽ ഊട്ടു തിരുനാൾ എട്ടാമിടത്തോടനുബന്ധിച്ച് ഈ വർഷം പ്രഥമ ദിവ്യകാരുണ്യം സ്വീകരിച്ച കുട്ടികളുടെ കൂട്ടായ്മ സംഘടിപ്പിച്ചു. തീർഥാടകരുടെ ഭവനങ്ങളിൽ നിന്നും കുട്ടികൾ വെള്ള വസ്ത്രങ്ങളണിഞ്ഞ് പ്രദക്ഷിണമായി ദേവാലയത്തിലേക്ക് എത്തിച്ചേർന്നത് വിശ്വാസികൾക്ക് ഭക്തി സാന്ദ്രമായ അനുഭവമായി. ഇവർക്കായി നടത്തിയ പ്രാർഥനാ ശുശ്രൂഷയ്ക്ക് ഫാ. മിഥുൻ മെന്‍റസ് മുഖ്യകാർമികനായി. കുട്ടികൾക്ക് തീർഥാടന കേന്ദ്രത്തിന്‍റെ ഓർമ ഫലകം സമ്മാനിച്ചു. രാവിലെ 6.15 മുതൽ വൈകിട്ട് 6.30 വരെ തുടർച്ചയായിദിവ്യബലി, നൊവേന ആരാധന എന്നിവ നടന്നു. റെക്ടർ റവ. ഡോ. ബെന്നി വാഴക്കൂട്ടത്തിൽ, ഫാ. അജയ് ആന്‍റണി പുത്തൻ പറമ്പിൽ എന്നിവർ നേതൃത്വം നൽകി.

കളഞ്ഞുകിട്ടിയ പണം തിരികെ നൽകി യുവാവിന്‍റെ മാതൃക

കാലടി: വഴിയിൽ കിടന്നുകിട്ടിയ പണം തിരികെ ഉടമയെ ഏല്പിച്ചു യുവാവ് മാതൃകയായി. ഇന്നലെ രാവിലെ കാലടി ബസ് സ്റ്റാൻഡിന് മുന്നിൽ എംസി റോഡിൽ നിന്നുമാണ് എടവൂർ മന്നെകല മുഹമ്മദ് മകൻ ഷാനവാസിനാണ് ഒരു ലക്ഷം രൂപ കളഞ്ഞുകിട്ടിയത്. ഉടൻ തന്നെ ഇദ്ദേഹം കാലടി പോലീസ് സ്റ്റേഷനിൽ അറിയിക്കുകയായിരുന്നു. പണം നഷ്ടപ്പെട്ടയാൾ കാലടി സ്റ്റേഷനിൽ പരാതി നൽകിയിരുന്നു. തുടർന്ന് ഷാനവാസ് സ്റ്റേഷനിൽവച്ച് പണം നഷ്ടപ്പെട്ടയാൾക്ക് തുക തിരികെ നൽകി.

"വായനപ്പെട്ടി' ഹിറ്റ്

കൊച്ചി: പൊതുസ്ഥലങ്ങളിലും വായന പ്രോത്സാഹിപ്പിക്കുക എന്ന ലക്ഷ്യത്തോടെ കൊച്ചി കോര്‍പറേഷനും കൈറ്റ്‌സ് ഇന്ത്യയും ചേര്‍ന്ന് നടപ്പാക്കിയ "വായനപ്പെട്ടി' പദ്ധതി ഹിറ്റായി. പരീക്ഷണാടിസ്ഥാനത്തില്‍ പനമ്പിള്ളി നഗറിലെ കോയിത്തറ പാര്‍ക്കില്‍ ആരംഭിച്ച വായനാപ്പെട്ടിയില്‍നിന്ന് പുസ്തകമെടുത്ത് വായിക്കാനെത്തുന്നവരുടെ എണ്ണം പ്രതിദിനം വര്‍ധിക്കുകയാണ്. രാവിലെ ആറ് മുതല്‍ എട്ട് വരെയും വൈകുന്നേരം നാല് മുതല്‍ രാത്രി രാത്രി എട്ടു വരെയുമാണ് വായനപ്പെട്ടിയിൽ നിന്നു പുസ്തകം എടുക്കാവുന്നത്. പാര്‍ക്ക് തുറക്കുന്ന സമയങ്ങളില്‍ ആര്‍ക്കും ഇവിടെയെത്തി ഇഷ്ടമുള്ള പുസ്തകം എടുത്ത് മരത്തണലില്‍ ഇരുന്ന് വായിക്കാം. പദ്ധതി ഹിറ്റായതോടെ ആശുപത്രികള്‍ ഉള്‍പ്പെടെ 30ഓളം ഇടങ്ങളില്‍ കൂടി വായനപ്പെട്ടികള്‍ സ്ഥാപിക്കാനുള്ള ആലോചനയിലാണ് കോര്‍പറേഷന്‍. ചങ്ങമ്പുഴ പാര്‍ക്ക്, സുഭാഷ് പാര്‍ക്ക്, രാജേന്ദ്ര മൈതാനം, ജനറല്‍ ആശുപത്രി, ഫോര്‍ട്ട് കൊച്ചി വാസ്‌കോ ഡ ഗാമ സ്‌ക്വയര്‍ തുടങ്ങിയ സ്ഥലങ്ങളും പരിഗണനയിലുണ്ട്. പുസ്തകങ്ങളെ പറ്റി ചര്‍ച്ച ചെയ്യാനും എഴുത്തുകാരുമായി സംവദിക്കാനും വായനാക്കൂട്ടായ്മകളും സംഘടിപ്പിക്കും. ഇതിന്‍റെ ഭാഗമായുള്ള ആദ്യ റീഡിംഗ് സെക്ഷന്‍ ഇന്ന് വൈകുന്നേരം 4.30നു കൊയ്ത്തറ പാര്‍ക്കില്‍ നടക്കുമെന്ന് കൈറ്റ്‌സ് ഇന്ത്യ ചീഫ് എക്‌സിക്യൂട്ടീവ് ഓഫീസര്‍ അജ്മല്‍ ചക്കരപ്പാടം പറഞ്ഞു.

ലഹരി വിമുക്തമായ ഒരു തലമുറയെ സൃഷ്ടിക്കണം: ഡോ. ആന്‍റണി വാലുങ്കല്‍

കൊച്ചി: ലഹരി വിമുക്തമായ ഒരു തലമുറയേ സൃഷ്ടിക്കേണ്ടതിന് അവരിലെ സര്‍ഗാത്മകതയേ പ്രോത്സാഹിപ്പിക്കേണ്ടത് അനിവാര്യമാണെന്ന് വരാപ്പുഴ അതിരൂപത സഹായ മെത്രാന്‍ ഡോ. ആന്‍റണി വാലുങ്കല്‍. വല്ലാര്‍പാടം ഭാവന സ്‌പോര്‍ട്സ് ആന്‍ഡ് ആര്‍ട്ട്‌സ് ക്ലബ് സംഘടിപ്പിച്ച അഖില കേരള സെവന്‍സ് ഫുട്‌ബോള്‍ ടൂര്‍ണമെന്‍റിന്‍റെ ഫൈനല്‍ മത്സരങ്ങള്‍ ഉദ്ഘാടനം ചെയ്യുകയായിരുന്നു അദ്ദേഹം. വല്ലാര്‍പാടം ബസിലിക്ക റെക്ടര്‍ ഫാ. ജെറോം ചമ്മിണിക്കോടത്ത് മുഖ്യാതിഥിയായി. മുളവുകാട് പഞ്ചായത്ത് പ്രസിഡന്‍റ് വി.എസ്. അക്ബര്‍, സ്റ്റാന്‍ഡിംഗ് കമ്മിറ്റി ചെയര്‍മാന്‍മാരായ നിക്കോളാസ് ഡിക്കോത്ത്, പി.ആര്‍. ജോണ്‍, എറണാകുളം ജില്ലാ പഞ്ചായത്ത് വൈസ് പ്രസിഡന്‍റ് അഡ്വ. എല്‍സി ജോര്‍ജ്, മുളവുകാട് പോലീസ് സബ് ഇന്‍സ്പക്ടര്‍ ഷാജി, ടിവിന്‍ കെ. വര്‍ഗിസ്, പീറ്റര്‍ കൊറയ, യു.ടി. പോള്‍, ജെയ്‌സണ്‍ ജോസഫ്, ബോബി സാന്‍റസ് എന്നിവര്‍ പ്രസംഗിച്ചു. ഇടപ്പള്ളി അറേബ്യന്‍ പാലസ് വിജയികള്‍ക്കുള്ള ട്രോഫിയും 50,000 രൂപയുടെ ക്യാഷ് അവാര്‍ഡും സ്വന്തമാക്കി. റണ്ണേഴ്‌സ് അപ്പിനുള്ള ട്രോഫിയും 25,000 രൂപയുടെ ക്യാഷ് അവാര്‍ഡും സോക്കര്‍ സെവന്‍സ് ആലുവയും കരസ്ഥമാക്കി. ചെല്ലാനം എഫ്സി ടീമിലെ അച്ചു മികച്ച കളിക്കാരനായും, ആലുവ സോക്കര്‍ സെവന്‍സ് ക്ലബ്ബിലെ വിശ്വാസ് മികച്ച ഗോള്‍കീപ്പറായും തെരഞ്ഞെടുക്കപ്പെട്ടു. സഹാറ എഫ്സി പറമ്പയേല്‍ ടൂര്‍ണമെന്‍റിലെ ഏറ്റവും നല്ല ടീമിനുള്ള ട്രോഫിയും കരസ്ഥമാക്കി.

കളമശേരി നഗരസഭയുടെ ഫണ്ട് കാണാനില്ലെന്ന റിപ്പോർട്ട് ശരിയല്ലെന്ന്

കളമശേരി : കളമശേരി നഗരസഭയുടെ ഫണ്ട് കാണാനില്ലെന്നുള്ള റിപ്പോർട്ട് നഗരസഭയെ അപമാനിക്കുന്നതിനും കൗൺസിലർമാരെ അപകീർത്തിപ്പെടുത്തുന്നതിനുമാണെന്ന് ചെയർപേഴ്സൺ സീമാ കണ്ണനും നഗരസഭ കൗൺസിലറും ജില്ലാ ആസൂത്രണ സമിതി അംഗവുമായ ജമാൽ മണക്കാടനും വാർത്താസമ്മേളനത്തിൽ ആരോപിച്ചു. സർക്കാർ ഉത്തരവ് പ്രകാരം സംസ്ഥാനത്താകെ 2024 ഏപ്രിൽ ഒന്നു മുതൽ പുതിയ സോഫ്റ്റ്‌വെയറായ കെ-സ്മാർട്ട് നടപ്പാക്കിയിരുന്നു. എന്നാൽ ഉദ്യോഗസ്ഥർക്ക് ഇതിന് ആവശ്യമായ മുന്നൊരുക്കങ്ങളൊ പരിശീലനമൊ നൽകാതെയാണ് നടപ്പാക്കിയത്. 2023-24 വർഷത്തെ ഓഡിറ്റ് പരിശോധനയ്ക്ക് 2025 ജനുവരിയിൽ വന്നവർ 2023 ഏപ്രിൽ ഒന്ന് മുതൽ 2024 മാർച്ച് 31 വരെയുള്ള ബാങ്ക് സ്റ്റേറ്റ്മെന്‍റുുകളാണ് പരിശോധിച്ചത്. കെ-സ്മാർട്ട് ആപ്പ് മുഖാന്തരം ജനുവരി 2024 മുതൽ പൊതുജനങ്ങൾ വിവിധ ആവശ്യങ്ങൾക്കായി നഗരസഭയിൽ ഒടുക്കിയ തുകകൾ അതാത് ദിവസമോ തൊട്ടടുത്ത ദിവസമോ നഗരസഭാ അക്കൗണ്ടിലേക്ക് വരവ് വയ്ക്കപ്പെട്ടിരുന്നില്ല. ഈ തുകകൾ ഐ കെഎമ്മിന്‍റെ സോഫ്റ്റ്‌വെയറിൽ ഐകെഎം അക്കൗണ്ടിലേക്കാണ് 2024 ജനുവരി മുതൽ പോയിക്കൊണ്ടിരുന്നത്. 2024 ജനുവരി മുതലുള്ള ഓൺലൈൻ പെയ്മെന്‍റുകളുടെ തുകകൾ 2024 ഏപ്രിൽ മുതലുള്ള തുടർ മാസങ്ങളിൽ വിവിധ തീയതികളിലും വിവിധ ബാച്ചുകളിലുമായാണ് നഗരസഭ അക്കൗണ്ടിലേക്ക് വരവ് വയ്ക്കപ്പെട്ടിട്ടുള്ളത്. ഈ സാങ്കേതിക പ്രശ്നം പരിഹരിക്കുന്നതിന് ഉദ്യോഗസ്ഥ തലത്തിൽ പല പ്രാവശ്യം ആവശ്യപ്പെട്ടിരുന്നു. ഇക്കാര്യങ്ങൾ ഓഡിറ്റ് പരിശോധനാ വേളയിൽ ബോധ്യപ്പെടുത്തുകയും കെഎ സ്മാർട്ടിൽ പരിഹാരം ലഭിക്കുന്ന മുറയ്ക്ക് നഗരസഭ അക്കൗണ്ടിലെ വരവുകൾ സംബന്ധിച്ച് വിശദമായ റിപ്പോർട്ട് നൽകുന്നതാണെന്നും അറിയിച്ച് ഉദ്യോഗസ്ഥർക്ക് മറുപടിയും നൽകിയിരുന്നു. 2025 മെയിലാണ് 2024 ജനുവരി മുതലുള്ള ഓൺലൈൻ പെയ്മെന്‍റുകളുടെ വിശദ വിവരങ്ങൾ ലഭ്യമാക്കിയിട്ടുള്ളത്. പരിശോധനയിൽ കണക്കിലില്ലെന്ന് ആരോപിച്ചിട്ടുള്ള തുകയും നഗരസഭയുടെ ഫെഡറൽ ബാങ്ക് അക്കൗണ്ടിൽ നിക്ഷേപിക്കപ്പെട്ടിട്ടുള്ളതാണ്. ഐകെഎമ്മിന്‍റെ സോഫ്റ്റ്‌വെയറിൽ നിന്നും തുക നഗരസഭ ഫണ്ടിൽ എത്താത്തതിന്‍റെ ഉത്തരവാദിത്വം ഐകെഎമ്മിനാണെന്നും നഗരസഭയുടെ കണക്കകളും തുകയും കൃത്യമാണെന്നും ഒരു പൈസ പോലും നഷടപ്പെട്ടിട്ടില്ലെന്നും ജമാൽ മണക്കാടൻ പറഞ്ഞു.

രാജഗിരി ആശുപത്രിയിലേക്ക് മെട്രോ ഫീഡർ ബസ് സർവീസ്

കൊച്ചി: കൊച്ചി മെട്രോയുടെ ഫീഡർ ബസ് സർവീസ് രാജഗിരി ആശുപത്രിയിലേക്കും. ആലുവ മെട്രോ സ്റ്റേഷനിൽ നിന്നും രാജഗിരി ആശുപത്രിയിലേക്ക് ആരംഭിച്ച പുതിയ ചാർട്ടേർഡ് ഫീഡർ സർവീസ് കെഎംആർഎൽ മാനേജിംഗ് ഡയറക്ടർ ലോക്നാഥ് ബെഹ്റ ഉദ്ഘാടനം ചെയ്തു. ആശുപത്രി എക്സിക്യൂട്ടിവ് ഡയറക്ടറും, സിഇഒയുമായ ഫാ. ജോൺസൺ വാഴപ്പിളളി അധ്യക്ഷത വഹിച്ചു. ആലുവ മെട്രോ സ്റ്റേഷനിൽ നിന്നും രാവിലെ 8.20 നാണ് ആദ്യ സർവീസ്. വൈകുന്നേരം 6.45 ന് രാജഗിരിയിൽ നിന്ന് അവസാന സർവീസ് നടത്തും. ആദ്യ ഘട്ടത്തിൽ ദിവസേന ഏഴു സർവീസുണ്ടാകും. കെഎംആർഎൽ സിസ്റ്റംസ് ഡയറക്ടർ സഞ്ജയ് കുമാർ, രാജഗിരി മെഡിക്കൽ ഡയറക്ടർ ഡോ. ജിജി കുരുട്ടുകുളം, മെഡിക്കൽ സൂപ്രണ്ട് ഡോ. സണ്ണി പി. ഓരത്തേൽ, നഴ്സിംഗ് ഡയറക്ടർ ലിമ മാത്യൂസ് എന്നിവർ ചടങ്ങിൽ പ്രസംഗിച്ചു.

കുസാറ്റിൽ മരം കടപുഴകി വീണ് ഓട്ടോറിക്ഷ തകർന്നു

കളമശേരി: കളമശേരി കുസാറ്റ് റോഡിൽ മരം ഓട്ടോയ്ക്കു മുകളിൽ വീണ് ഓട്ടോ തകർന്നു. കുസാറ്റ് ഗേറ്റിനോട് ചേർന്നുള്ള സെക്യൂരിറ്റി കാബിന് സമീപമുള്ള മരമാണ് കടപുഴകിയത്. അതുവഴി വന്ന ഓട്ടോറിക്ഷയുടെ മുകളിലേക്കാണ് മരംവീണത്. ഓട്ടോറിക്ഷ തകർന്നു. അതിൽ യാത്ര ചെയ്തിരുന്ന ആളും ഡ്രൈവറും അത്ഭുതകരമായി രക്ഷപ്പെട്ടു. ഫയർഫോഴ്സ് എത്തി മരം മുറിച്ചു മാറ്റി ഗതാഗതം പുനരാരംഭിച്ചു.

ആവാസവ്യവസ്ഥയുടെ നേര്‍ക്കാഴ്ചയായി കെഎസ്‌യുഎം പവലിയന്‍

കൊച്ചി: സംസ്ഥാന സര്‍ക്കാരിന്‍റെ നാലാം വാര്‍ഷികത്തോടനുബന്ധിച്ച് എറണാകുളത്ത് നടക്കുന്ന എന്‍റെ കേരളം പ്രദര്‍ശന വിപണന മേളയിൽ കേരള സ്റ്റാര്‍ട്ടപ്പ് മിഷന്‍റെ (കെഎസ്‌യുഎം) പവലിയന്‍. നിര്‍മിതബുദ്ധി, റോബോട്ടിക്‌സ്, മെഷീന്‍ ലേണിംഗ് തുടങ്ങിയ അത്യാധുനിക സാങ്കേതിക വിദ്യകളെ പൊതുജനങ്ങള്‍ക്ക് അനുഭവിച്ചറിയാവുന്ന വിധമാണ് മറൈന്‍ ഡ്രൈവില്‍ പവലിയന്‍ ഒരുക്കിയിട്ടുള്ളത്. നിര്‍മിത ബുദ്ധി, ഓഗ്മെന്‍റഡ് റിയാലിറ്റി, വെര്‍ച്വല്‍ റിയാലിറ്റി, ത്രിഡി പ്രിന്‍റിംഗ്, ഡ്രോണ്‍, റോബോട്ടിക്‌സ്, ഐഒടി തുടങ്ങിയ സാങ്കേതിക വിദ്യകളുടെ പ്രദര്‍ശനമാണ് ഇവിടെയുള്ളതെന്ന് കെഎസ്‌യുഎം സിഇഒ അനൂപ് അംബിക പറഞ്ഞു. ഇടുക്കി, കോട്ടയം, ആലപ്പുഴ, കണ്ണൂര്‍ എന്നിവിടങ്ങളില്‍ നടന്ന എന്‍റെ കേരളം 2025 പ്രദര്‍ശന വിപണന മേളയില്‍ കെഎസ്‌യുഎമ്മിന്‍റെ പവലിയനുകള്‍ വിവിധ പുരസ്‌കാരങ്ങള്‍ നേടിയിരുന്നു.

മഴക്കാല മുന്നൊരുക്കം: തീരസംരക്ഷണത്തിനു 1.83 കോടി

വൈപ്പിൻ: മഴക്കാല മുന്നൊരുക്കത്തിന്‍റെ ഭാഗമായി തീരത്ത് ജിയോ ട്യൂബ് സ്ഥാപിക്കാൻ വൈപ്പിൻ മണ്ഡലത്തിൽ 1.83 കോടി രൂപ അനുവദിച്ചതായി കെ. എൻ. ഉണ്ണിക്കൃഷ്ണൻ എംഎൽഎ അറിയിച്ചു. 13 ഇടങ്ങളിലാണ് താത്കാലിക സംരക്ഷണ ഭിത്തി നിർമിക്കുക. എടവനക്കാട് 9, 13 വാർഡുകൾ ( 64.8 ലക്ഷം), നായരമ്പലം പന്ത്രണ്ടാം വാർഡ് (39.60 ലക്ഷം), ഞാറക്കൽ ഒന്നാം വാർഡ് (37.60 ലക്ഷം ), കുഴുപ്പിള്ളി ഒന്ന്, 13 വാർഡുകൾ (20 ലക്ഷം ), പള്ളിപ്പുറം ഒന്ന്, 14 വാർഡുകൾ ( 24.53 ലക്ഷം) എന്നിവിടങ്ങളിലാണ് സംരക്ഷണ ഭിത്തികൾ തീർക്കുന്നത്. പ്രവൃത്തികൾക്ക് മൂന്നു ദിവസ ഷോർട്ട് ടെൻഡർ വിളിച്ചിട്ടുണ്ട്. ഈയാഴ്ച തന്നെ ടെൻഡർ ഓപ്പൺ ചെയ്യുമെന്നും എംഎൽഎ പറഞ്ഞു.

ആലുവയിലും നെട്ടൂരിലും തൃപ്പൂണിത്തുറയിലുമായി 15 കിലോ കഞ്ചാവ് പിടികൂടി

ആലുവ\മരട്\തൃപ്പൂണിത്തുറ: ആലുവ, നെട്ടൂർ, തൃപ്പൂണിത്തുറ എന്നിവിടങ്ങളിലായി 15 കിലോ കഞ്ചാവ് പോലീസ് പിടികൂടി. ആലുവയിൽ നിന്നു ഏഴു കിലോ കഞ്ചാവ് പിടികൂടിയതിനു പുറമേ സംഘം നട്ടുവളർത്തിയ കഞ്ചാവ് ചെടികളും പിടികൂടി. മരടിലെ ലോഡ്ജിൽ നിന്നും ഏഴു കിലോയും തൃപ്പൂണിത്തുറയിൽ നിന്നും ഒരു കിലോ കഞ്ചാവുമാണ് പിടികൂടിയത്. ആലുവയിൽ കഞ്ചാവും ചെടികളുമായി മൂന്നു പേർ പിടിയിൽ ആലുവ: ഏഴ് കിലോ കഞ്ചാവും നട്ടുവളർത്തിയ കഞ്ചാവു ചെടികളുമായി മൂന്ന് ഇതര സംസ്ഥാനത്തൊഴിലാളികൾ റൂറൽ ജില്ലാ ഡാൻസാഫ് ടീമിൻെറ പിടിയിലായി. ആസാം ഹോജായ് സ്വദേശി യഹിയ അഹമ്മദ് (21), എക്കോറാണി സ്വദേശി സ്വരാജ് ബോറ (19), നൗഗാവ് സ്വദേശി സിറാജുൾ ഹഖ് (28) എന്നിവരെയാണ് പിടികൂടിയത്. ജില്ലാ പോലീസ് മേധാവി എം.ഹേമലതക്ക് ലഭിച്ച രഹസ്യവിവരത്തിന്‍റെ അടിസ്ഥാനത്തിലായിരുന്നു ആലുവ പോലീസുമായി ചേർന്ന് ഡാൻസഫ് പരിശോധന നടത്തിയത്. ദേശീയ പാതയിൽ മുട്ടം ജംഗ്ഷന് സമീപം ഇവർ വാടകയ്ക്ക് താമസിക്കുന്നിടത്ത് നിന്നാണ് കഞ്ചാവു ചെടികൾ കണ്ടെത്തിയത്. മരടിൽ രണ്ടു യുവാക്കൾ പിടിയിൽ മരട്: ഏഴ് കിലോ കഞ്ചാവുമായി രണ്ടു യുവാക്കൾ നെട്ടൂരിൽ പിടിയിലായി. ഇടുക്കി കഞ്ഞിക്കുഴി സ്വദേശി അമൽ മാത്യു (35), മലപ്പുറം വഴിക്കടവ് സ്വദേശി രതീഷ് (31) എന്നിവരാണ് അറസ്റ്റിലായത്. നെട്ടൂരിലെ സ്വകാര്യ ലോഡ്ജിൽ നിന്നാണ് കഞ്ചാവുമായി യുവാക്കൾ പനങ്ങാട് പോലീസിന്‍റെ പിടിയിലായത്. വില്പനയ്ക്കായാണ് യുവാക്കൾ കഞ്ചാവെത്തിച്ചതെന്ന് പോലീസ് പറഞ്ഞു. ഒഡീഷ സ്വദേശി അറസ്റ്റിൽ തൃപ്പൂണിത്തുറ: ഒരു കിലോ കഞ്ചാവുമായി ഒഡീഷ സ്വദേശി അറസ്റ്റിൽ. ഒഡീഷ സ്വദേശി ഹരേകൃഷ്ണ നായിക്കി(26) നെയാണ് കഞ്ചാവുമായി സിറ്റി ഡാൻസാഫ് സംഘം പിടികൂടിയത്. രഹസ്യവിവരം ലഭിച്ചതിന്‍റെ അടിസ്ഥാനത്തിൽ മാത്തൂർ-വൈറ്റില റോഡിൽ കണിയാമ്പുഴ ഭാഗത്ത് പോലീസ് നടത്തിയ പരിശോധനയിലാണ് ഇയാൾ പിടിയിലായത്.

കേരള കോൺഗ്രസ് ജില്ലാ സമ്മേളനത്തിന് ഇന്നു തുടക്കം

കൊച്ചി: കേരള കോൺഗ്രസ് ജില്ലാ സമ്മേളനം ഇന്ന് ആരംഭിക്കും. മൂന്നു ദിവസങ്ങളിലായി എറണാകുളം ടൗൺഹാളിലാണു സമ്മേളനം. ഉച്ചയ്ക്കു രണ്ടിനു മൂവാറ്റുപുഴയിൽ നിന്നാരംഭിക്കുന്ന കെ.എം. ജോർജ് ഛായാചിത്ര പ്രയാണം പാർട്ടി ഉന്നതാധികാര സമിതി അംഗം ഷൈസൺ പി. മാങ്കുഴ നയിക്കും. പാർട്ടി ഡപ്യൂട്ടി ചെയർമാൻ ഫ്രാൻസിസ് ജോർജ് എംപി ഉദ്ഘാടനം ചെയ്യും. അങ്കമാലിയിൽ നിന്നാരംഭിക്കുന്ന പതാകജാഥ ഉന്നതാധികാര സമിതി അംഗം ബേബി മുണ്ടാടൻ നയിക്കും. ചീഫ് കോ ഓർഡിനേറ്റർ അപു ജോൺ ജോസഫ് ഉദ്ഘാടനം ചെയ്യും. ഇരു ജാഥകൾക്കും നാലിന് കലൂർ അന്താരാഷ്ട്ര സ്റ്റേഡിയത്തിനു സമീപം സ്വീകരണം. അഞ്ചിന് ടൗൺഹാളിൽ ജില്ലാ പ്രസിഡന്‍റ് ഷിബു തെക്കുംപുറം പതാക ഉയർത്തും. തുടർന്നു നേതൃയോഗം പാർട്ടി വർക്കിംഗ് ചെയർമാൻ പി.സി. തോമസ് ഉദ്ഘാടനം ചെയ്യും.

ഹെറോയിനുമായി മൂന്ന് ഇതരസംസ്ഥാന തൊഴിലാളികൾ അറസ്റ്റിൽ

പെരുമ്പാവൂർ: 65 ഗ്രാം ഹെറോയിനുമായി മൂന്ന് ഇതര സംസ്ഥാനത്തൊഴിലാളികൾ പിടിയിൽ. അസം നൗഗാവ് സ്വദേശികളായ അബ്ദുൽ ബഷർ (30), ബിച്ച് മിലൻ (58), റുസ്തം അലി (22) എന്നിവരെയാണ് പെരുമ്പാവൂർ എഎസ്പിയുടെ പ്രത്യേക അന്വേഷണസംഘം പിടികൂടിയത്. ജില്ലാ പോലീസ് മേധാവി എം. ഹേമലതയ്ക്ക് ലഭിച്ച രഹസ്യവിവരത്തിന്‍റെ അടിസ്ഥാനത്തിൽ നടത്തിയ പരിശോധനയിൽ നെടുംതോട് ജംഗ്ഷനിൽ വച്ചാണ് മയക്കുമരുന്ന് കടത്തിയവരെ കസ്റ്റഡിയിലെടുത്തത്. ആസാമിൽ നിന്ന് ട്രെയിൻ മാർഗം ആലുവയിലെത്തി അവിടെ നിന്ന് ഓട്ടോയിൽ ഹെറോയിനുമായി അല്ലപ്ര ഒർണ ഭാഗത്തേക്ക് വരികയായിരുന്നു. സോപ്പുപെട്ടികളിൽ സൂക്ഷിച്ച നിലയിൽ ആറ് ബോക്സ് ഹെറോയിനാണ് പിടികൂടിയത്. പെരുമ്പാവൂർ എഎസ്പി ശക്തിസിംഗ് ആര്യ, ഇൻസ്പെക്ടർ ടി.എം. സൂഫി, എസ്ഐമാരായ റിൻസ് എം. തോമസ് സുഭാഷ് തങ്കപ്പൻ, എഎസ്ഐ പി.എ. അബ്ദുൽ മനാഫ്, സീനിയർ സിപിഒമാരായ വർഗീസ് വേണാട്ട്, ടി.എ. അഫ്സൽ, ബെന്നി ഐസക്, രമേശ്, അജിത്ത് മോഹൻ സിപിഒമാരായ സിബിൻ സണ്ണി, നിസാമുദ്ദീൻ, ടി.എ. ഫസൽ എന്നിവരാണ് അന്വേഷണ സംഘത്തിലുണ്ടായിരുന്നത്.

യുഡിഎഫ് ജില്ലയില്‍ കരിദിനം ആചരിച്ചു

കൊച്ചി: സര്‍ക്കാരിന്‍റെ നാലാം വാര്‍ഷികം കരിദിനമായി ജില്ലയില്‍ യുഡിഎഫ് ആചരിച്ചു. 100 കോടി രൂപ ചെലവഴിച്ച് ധൂര്‍ത്തും ആര്‍ഭാടവും നടത്തുന്നതില്‍ പ്രതിഷേധിച്ചാണ് കരിദിനം ആചരിച്ചതെന്ന് ചെയര്‍മാന്‍ ഡൊമിനിക് പ്രസന്‍റേഷന്‍, കണ്‍വീനര്‍ ഷിബു തെക്കുംപുറം എന്നിവര്‍ അറിയിച്ചു. 14 നിയോജക മണ്ഡലങ്ങളിലും കരിങ്കൊടി പിടിച്ച് പ്രകടനങ്ങളും പ്രതിഷേധ യോഗങ്ങളും നടത്തി. തൃക്കാക്കരയില്‍ മുഹമ്മദ് ഷിയാസ് ഉദ്ഘാടനം ചെയ്തു. കൊച്ചിയിൽ ഡൊമിനിക് പ്രസന്‍റേഷന്‍, എറണാകുളത്ത് ടി.ജെ. വിനോദ് എംഎല്‍എ, വൈപ്പിനിൽ എം.ജെ.ടോമി, കളമശേരിയിൽ അബ്ദുള്‍ ഗഫൂര്‍, ആലുവയിൽ അന്‍വര്‍ സാദത്ത് എംഎല്‍എ, പിറവത്ത് അനൂപ് ജേക്കബ് എംഎല്‍എ, കോതമംഗലത്ത് ഷിബു തെക്കുംപുറം, പറവൂരിൽ കെ.പി. ധനപാലന്‍, മൂവാറ്റുപുഴയിൽ വര്‍ഗീസ് മാത്യു, അങ്കമാലിയിൽ റോജി എം ജോണ്‍ എംഎല്‍എ, പെരുമ്പാവൂരിൽ ബെന്നി ബഹന്നാന്‍ എംപി, തൃപ്പൂണിത്തുറയിൽ കെ. ബാബു എംഎല്‍എ, കുന്നത്തുനാട് വി.പി.സജീന്ദ്രന്‍ എന്നിവര്‍ നിയോജകമണ്ഡലങ്ങളില്‍ നടന്ന പ്രതിഷേധ യോഗങ്ങള്‍ ഉദ്ഘാടനം ചെയ്തു.

നോവായി കല്യാണി : മൂന്നു വയസുകാരിയുടെ നടുക്കുന്ന വേർപാടിൽ കണ്ണീരണിഞ്ഞു ഗ്രാമം

കൊച്ചി: വെള്ള നിറത്തിലുള്ള കുഞ്ഞുടപ്പിട്ട്, കാലില്‍ വെളുത്ത സോക്‌സുകള്‍ അണിഞ്ഞ് അവളൊരു കുഞ്ഞ് മാലാഖയെപ്പോലെ ഉറങ്ങുകയായിരുന്നു. ചേട്ടൻ കുഞ്ഞനുജത്തിയെ പല തവണ വിളിച്ചിട്ടും അവള്‍ കേട്ടില്ല. കൂട്ടുകാരും ടീച്ചര്‍മാരും വീട്ടിലെത്തിയതും കല്യാണി അറിഞ്ഞതേയില്ല. കളിചിരികളുമായി കല്യാണി ഓടിക്കളിച്ച തിരുവാണിയൂർ മറ്റക്കുഴി കീഴ്പിള്ളിൽ വീട്ടിലേക്ക് ചേതനയറ്റ ആ കുരുന്നു ശരീരം അവസാനമായി എത്തിച്ചപ്പോള്‍ ഒരുനാടു മുഴുവന്‍ അവളുടെ ഓര്‍മയില്‍ വിതുന്പി. എല്ലാവരുടെയും പ്രിയപ്പെട്ടവളായിരുന്നു കല്യാണി. അതുകൊണ്ടുതന്നെ വികാരനിര്‍ഭരമായ രംഗങ്ങൾക്കാണ് കുഞ്ഞിന്‍റെ മൃതദേഹം എത്തിച്ചപ്പോള്‍ സുഭാഷിന്‍റെ വീട് സാക്ഷ്യം വഹിച്ചത്. നാട്ടുകാരും ഉറ്റവരും ഉടയവരും കല്യാണിയുടെ കൊച്ചുകൂട്ടുകാരുമടക്കം നൂറു കണക്കിനാളുകളാണ് അവസാനമായി ഒരു നോക്ക് കാണാന്‍ തടിച്ചുകൂടിയത്. നിര്‍വികാരനായി പിതാവ് സുഭാഷും ആറാം ക്ലാസ് വിദ്യാര്‍ഥിയായ ജ്യേഷ്ഠന്‍ കാശിനാഥും മൃതദേഹത്തിന് സമീപം നില്‍ക്കുന്നുണ്ടായിരുന്നു. തങ്ങളോടൊപ്പം മണിക്കൂറുകള്‍ക്ക് മുമ്പ് വരെ ഉണ്ടായിരുന്ന കുഞ്ഞിന്‍റെ ചേതനയറ്റ ശരീരം കണ്ട് വിശ്വസിക്കാനാകാത ടീച്ചറുള്‍പ്പെടുന്ന അങ്കണവാടി കുടുംബവും ഹൃദയവേദനയോടെ പ്രിയപ്പെട്ട കല്യാണിക്കുട്ടിക്ക് അന്തിമോപചാരം അര്‍പ്പിക്കാന്‍ അരികത്തുണ്ടായിരുന്നു. മൃതദേഹം കളമശേരി മെഡിക്കല്‍ കോളജിലെ പോസ്റ്റ്‌മോര്‍ട്ടം നടപടികളെല്ലാം പൂര്‍ത്തിയാക്കി ഇന്നലെ ഉച്ചകഴിഞ്ഞ് മൂന്നരയോടെയാണ് മറ്റക്കുഴിയിലെത്തിച്ചത്. ബെന്നി ബഹനാന്‍ എംപി, മുന്‍ എംഎല്‍എ വി.പി. സജീന്ദ്രന്‍ എന്നിവരും വീട്ടിലെത്തി അന്തിമോപചാരം അര്‍പ്പിച്ചു. മധുരം കഴിച്ച് മടക്കം ‘തിങ്കളാഴ്ച വൈകിട്ട് അമ്മ സന്ധ്യ കൂട്ടിക്കൊണ്ടു പോകാന്‍ അങ്കണവാടിയിൽ എത്തുമ്പോള്‍ അവള്‍ ഭക്ഷണം കഴിക്കുകയായിരുന്നു. ഒരു കുട്ടിയുടെ പിതാവിന്‍റെ പിറന്നാളിനോടനുബന്ധിച്ച് ലഡു കൊണ്ടുവന്നിരുന്നു. അതും പാലും കഴിക്കുന്നതിനിടെയാണ് സന്ധ്യ കുഞ്ഞിനെ കൊണ്ടു പോകാനായി വന്നത്. വളരെ സന്തോഷത്തോടെയാണ് കല്യാണി അമ്മയ്‌ക്കൊപ്പം പോയത്. എനിക്ക് ടാറ്റാ തന്നു പോയ കുഞ്ഞിനെ പിറ്റേന്ന് ഈ അവസ്ഥയില്‍ കാണേണ്ടിവന്നത് താങ്ങാനാകുന്നില്ല'- തിരുവാണിയൂര്‍ പഞ്ചായത്തിലെ പണിക്കരുപടിയിലുള്ള 69-ാം നമ്പര്‍ അങ്കണവാടിയിലെ കല്യാണിയുടെ അധ്യാപികയായ സൗമ്യയുടെ വാക്കുകള്‍ ഇടറി. ആയ സിന്ധു ഇല്ലാതിരുന്നതിനാല്‍ തിങ്കളാഴ്ച സൗമ്യ ടീച്ചര്‍ തന്നെയായിരുന്നു കുട്ടികള്‍ക്കൊപ്പം ഉണ്ടായിരുന്നത്. ' ഉച്ചയ്ക്ക് ചോറു കൊടുത്തപ്പോള്‍ കുഞ്ഞ് വളരെ പതുക്കെയാണ് കഴിച്ചത്. കൈ നിറച്ച് വാരിക്കഴിക്കണമെന്നു പറഞ്ഞു ഞാന്‍ തന്നെ അടുത്തിരുത്തി മുഴുവന്‍ കഴിപ്പിച്ചു. അമ്മ അവളെ കൂട്ടിക്കൊണ്ടുപോകാന്‍ വന്നപ്പോള്‍ ഭക്ഷണം കഴിച്ച് തീര്‍ത്തിട്ടാണ് അവളെ വിട്ടത്. ഒരുപക്ഷേ അവൾ കഴിച്ച അവസാന ഭക്ഷണം അതായിരിക്കാം'- സൗമ്യയുടെ കണ്ണുകള്‍ നിറഞ്ഞൊഴുകി. നേരത്തെയും സന്ധ്യ കുഞ്ഞിനെ ഉപദ്രവിച്ചിട്ടുണ്ടെന്ന് ഭര്‍ത്താവ് കൊച്ചി: കുഞ്ഞിനെ സന്ധ്യ മുന്പും മർദിച്ചെന്നാണ് ഭര്‍ത്താവ് സുഭാഷ് പറയുന്നത്. തിങ്കളാഴ്ച കുഞ്ഞ് അങ്കണവാടിയില്‍ പോകില്ലെന്ന് പറഞ്ഞതാണ്. താന്‍ നിര്‍ബന്ധിച്ച് വിടുകയായിരുന്നു. സന്ധ്യയാണ് കുഞ്ഞിനെ അങ്കണവാടിയിലാക്കിയത്. താന്‍ ജോലിക്കും പോയി. സന്ധ്യയുടെ അമ്മയ്ക്കും സഹോദരിക്കും ഈ സംഭവത്തില്‍ പങ്കുണ്ടോയെന്ന് സംശയമുണ്ട്. സന്ധ്യ നേരത്തെയും കുഞ്ഞിനെ ഉപദ്രവിച്ചിട്ടുണ്ട്. ടോര്‍ച്ച് വച്ച് കുഞ്ഞിന്‍റെ തലയ്ക്ക് അടിക്കുകയായിരുന്നു. ഇതോടെ സന്ധ്യയെ സ്വന്തം വീട്ടില്‍ കൊണ്ടുവിട്ടു. രണ്ടു മാസം മുന്പാണ് അമ്മയും സഹോദരിയും ചേര്‍ന്ന് പ്രശ്‌നങ്ങള്‍ പരിഹരിച്ച് സന്ധ്യയെ തിരികെ വിട്ടത്. അമ്മയും സഹോദരിയും പറയുന്നത് മാത്രമേ സന്ധ്യ അനുസരിക്കാറുള്ളൂ. തിങ്കളാഴ്ച വൈകിട്ട് താന്‍ സന്ധ്യയെ വിളിച്ചിരുന്നു. മൂന്നരയ്ക്ക് വിളിച്ചപ്പോള്‍ കുക്കറിന്‍റെ വാഷര്‍ വാങ്ങണമെന്ന് പറഞ്ഞു. വീട്ടിലെത്തിയപ്പോള്‍ സന്ധ്യയെ കണ്ടില്ല. വിളിച്ചപ്പോള്‍ മൂഴിക്കുളത്താണെന്ന് പറഞ്ഞു. അവളുടെ വീട്ടിലേക്ക് വിളിച്ചപ്പോള്‍ അവിടെ എത്തിയില്ലെന്ന് പറഞ്ഞു. രാത്രിയോടെയാണ് കുഞ്ഞിനെ കാണാനില്ലെന്ന് പറഞ്ഞ് വിളി വന്നത്. സന്ധ്യയ്ക്ക് മറ്റ് മാനസിക പ്രശ്‌നങ്ങളൊന്നും ഉണ്ടായിരുന്നില്ലെന്നും സുഭാഷ് പറഞ്ഞു. മകളും ഭര്‍ത്താവുമായി പ്രശ്നങ്ങൾ ഉണ്ടായിരുന്നു: സന്ധ്യയുടെ അമ്മ കൊച്ചി:സന്ധ്യയും ഭര്‍ത്താവുമായി പ്രശ്‌നങ്ങള്‍ ഉണ്ടായിരുന്നതായി സന്ധ്യയുടെ അമ്മ അല്ലി പറഞ്ഞു. സന്ധ്യയും ഭര്‍ത്താവ് സുഭാഷും തമ്മില്‍ വഴക്ക് പതിവാണെന്നും മകളെ മർദിക്കാറുണ്ടെന്നുമാണ് സന്ധ്യയുടെ അമ്മയുടെ ആരോപണം. 'തിങ്കളാഴ്ച രാത്രി ഏഴിന് സന്ധ്യ വീട്ടിലേക്ക് വന്നിരുന്നു. കുഞ്ഞ് എന്‍റെ കൈയില്‍ നിന്ന് പോയി എന്ന് ഒരു കൂസലും ഇല്ലാതെ പറഞ്ഞു. കുഞ്ഞ് എവിടെയെന്ന് വീണ്ടും ചോദിച്ചിട്ടും ഒന്നും പറഞ്ഞില്ല. സന്ധ്യ ഇവിടെ വന്നുനില്‍ക്കാറില്ല. അതിന് ഭര്‍ത്താവിന്‍റെ വീട്ടുകാര്‍ അനുവദിക്കില്ല. സന്ധ്യയും ഭര്‍ത്താവുമായി തര്‍ക്കം പതിവാണ്. സുഭാഷ് മര്‍ദിക്കാറുണ്ടെന്ന് സന്ധ്യ പറഞ്ഞിട്ടുണ്ട്. കാര്യങ്ങള്‍ പെട്ടെന്ന് മനസിലാകുന്നയാളല്ല സന്ധ്യ. എന്‍റെ മൂത്ത മകളുടെയത്ര കാര്യശേഷി അവള്‍ക്കില്ല. വീട്ടുജോലി ചെയ്യുന്നതിലൊക്കെ മടിയാണ്. അത് പറഞ്ഞ് ഭര്‍ത്താവുമായി വഴക്ക് പതിവാണ്. കുട്ടികളെ ഇവിടെ നിര്‍ത്താന്‍ ഭര്‍ത്താവിന്‍റെ വീട്ടുകാര്‍ക്ക് താത്പര്യമില്ല. മകള്‍ക്ക് മാനസിക പ്രശ്‌നമില്ലെന്ന് തെളിയിക്കുന്ന സര്‍ട്ടിഫിക്കറ്റ് ഭര്‍ത്താവിന്‍റെ വീട്ടുകാര്‍ കഴിഞ്ഞ മാസം ആവശ്യപ്പെട്ടു. അതു പ്രകാരം അങ്കമാലിയിലെ സ്വകാര്യ ആശുപത്രിയില്‍ എത്തിച്ച് സൈക്യാട്രിസ്റ്റിനെ കാണിച്ച് പ്രയാസങ്ങളില്ലെന്ന് ഉറപ്പാക്കി. 35 വയസ് ഉണ്ടെങ്കിലും 18- 19 വയസിന്‍റെ ബുദ്ധിയേ അവള്‍ക്കുള്ളൂ'- അല്ലി പറഞ്ഞു. കല്യാണിയെ കാണാതായത് തിങ്കളാഴ്ച വൈകുന്നേരം കൊച്ചി: തിങ്കളാഴ്ച വൈകുന്നേരം മൂന്നരയോടെയാണ് തിരുവാണിയൂര്‍ പഞ്ചായത്തിലെ 69ാം നമ്പര്‍ അങ്കണവാടിയില്‍ നിന്ന് അമ്മ സന്ധ്യ കല്യാണിയെ കുറുമശേരിയിലെ വീട്ടിലേക്ക് കൂട്ടിക്കൊണ്ടുപോയത്. രാത്രി ഏഴോടെ സന്ധ്യ കുറുമശേരിയിലെ വീട്ടിലെത്തി. ഈ സമയത്ത് സന്ധ്യക്കൊപ്പം കുഞ്ഞില്ലായിരുന്നു. സന്ധ്യയുടെ അമ്മ ചോദിച്ച പ്പോള്‍ ആദ്യം ഒന്നും പറഞ്ഞില്ല. ആവർത്തിച്ചു ചോദിച്ചപ്പോൾ ആലുവയില്‍ വച്ച് കുഞ്ഞിനെ നഷ്ടപ്പെട്ടെന്നായിരുന്നു ആദ്യ മറുപടി. പിന്നീട് ബസില്‍ വച്ച് നഷ്ടപ്പെട്ടെന്നും തന്‍റെ കൈയില്‍ നിന്നു പോയെന്നും പരസ്പര വിരുദ്ധ മറുപടി നല്‍കിയതോടെ സന്ധ്യയുടെ വീട്ടുകാര്‍ പോലീസില്‍ വിവരമറിയിക്കുകയായിരുന്നു. ഭര്‍ത്താവിന്‍റെ വീട്ടുകാര്‍ വിവരമറിഞ്ഞതോടെ പുത്തന്‍കുരിശ് പോലീസില്‍ ഇവരും പരാതി നല്‍കി. തുടര്‍ന്ന് സന്ധ്യയെ ചെങ്ങമനാട് പോലീസ് കസ്റ്റഡിയിലെടുത്ത് സ്‌റ്റേഷനിലേക്ക് കൊണ്ടുപോയി. കുഞ്ഞിനെ കാണാതായത് സംബന്ധിച്ച് പോലീസിനോടും പരസ്പരവിരുദ്ധമായാണ് സന്ധ്യ തുടക്കത്തില്‍ സംസാരിച്ചത്. സിസിടിവി ദൃശ്യങ്ങളുടെ സഹായത്തോടെ സന്ധ്യ യാത്ര ചെയ്ത വഴികള്‍ പരിശോധിച്ചായിരുന്നു പോലീസിന്‍റെ ചോദ്യം ചെയ്യല്‍. ഇതോടെ സന്ധ്യക്ക് പിടിച്ചുനില്‍ക്കാനായില്ല. മൂഴിക്കുളം പാലത്തിന് മധ്യഭാഗത്ത് വച്ച് കുട്ടിയെ ഉപേക്ഷിച്ചുവെന്ന് മൊഴി നല്‍കി. തുടര്‍ന്ന് നടത്തിയ തെരച്ചിലിലാണ് മൃതദേഹം കണ്ടെത്തിയത്. കനത്ത മഴയെ അവഗ ണിച്ചാണ് പോലീസും സ്‌കൂബാ സംഘവും പുഴയില്‍ തെരച്ചില്‍ നടത്തിയത്. നാലാം റൗണ്ട് തെരച്ചിലിനൊടുവിലാണ് മൃതദേഹം ലഭിച്ചത്. ഇതിനു ശേഷമാണ് മകളെ പുഴയിലെറിഞ്ഞ് കൊന്നതാണെന്ന കാര്യം സന്ധ്യ സമ്മതിച്ചത്. എന്നാല്‍ ഒന്നും സംഭവിച്ചില്ലെന്ന മട്ടായിരുന്നു സന്ധ്യ. സംഭവത്തിനു ശേഷവും യാതൊരു കൂസലുമില്ലാതെയായിരുന്നു സന്ധ്യയുടെ പെരുമാറ്റം. താനാണിത് ചെയ്തതെന്നും ഇക്കാര്യത്തില്‍ മറ്റൊന്നും പറയാനില്ലെന്നുമായിരുന്നു അവർ പോലീസിനോട് പറഞ്ഞത്. കൊലപാതകത്തിന്‍റെ കാരണം വ്യക്തമാകാനുണ്ടെന്ന് എസ്പി ആലുവ: സന്ധ്യ മകളെ കൊല്ലാനുള്ള കാരണം വ്യക്തമാകാനുണ്ടെന്ന് എറണാകുളം റൂറല്‍ പോലീസ് മേധാവി എം.ഹേമലത പറഞ്ഞു. ചോദ്യം ചെയ്യലിനോട് സന്ധ്യ സഹകരിക്കുന്നുണ്ടെങ്കിലും മൊഴികള്‍ പൂര്‍ണമായും വിശ്വാസത്തിലെടുക്കാന്‍ സാധിക്കുന്നതല്ലെന്നും ഹേമലത വ്യക്തമാക്കി. മകളെ പുഴയിലെറിഞ്ഞ് കൊലപ്പെടുത്തിയ കേസില്‍ കൂടുതല്‍ വിവരങ്ങള്‍ ശേഖരിക്കാന്‍ അടുത്ത ബന്ധുക്കളേയും ചോദ്യം ചെയ്യും. കുട്ടിയുമായി സന്ധ്യ പാലത്തിലേക്ക് വന്നതും കുട്ടിയില്ലാതെ പോകുന്ന ദൃശ്യങ്ങൾ പോലീസിന് ലഭിച്ചിട്ടുണ്ട്. വീട്ടിലുള്ള പ്രശ്‌നങ്ങളെ സംബന്ധിച്ചും അന്വേഷിച്ചുകൊണ്ടിരിക്കുകയാണ്. കുറ്റകൃത്യത്തില്‍ സന്ധ്യയെ ആരും സഹായിച്ചിട്ടില്ല. സന്ധ്യയെ മെഡിക്കല്‍ പരിശോധനയ്ക്ക് വിധേയമാക്കിയിട്ടുണ്ട്. ആവശ്യമെങ്കില്‍ അന്വേഷണ ഘട്ടങ്ങളില്‍ മാനസിക വിദഗ്ധരെ കൂടി ഉള്‍പ്പെടുത്തുമെന്നും അവർ വ്യക്തമാക്കി. എം. ഹേമലതയുടെ നേതൃത്വത്തില്‍ ആലുവ ഡിവൈഎസ്പി ടി.ആര്‍. രാജേഷ്, ഇന്‍സ്‌പെക്ടര്‍ സോണി മത്തായി തുടങ്ങിയവരാണ് അന്വേഷണ സംഘത്തിലുള്ളത്. അവസാനയാത്ര കൊച്ചച്ഛൻ വാങ്ങിയ പുത്തനുടുപ്പണിഞ്ഞ് കോലഞ്ചേരി: തനിക്ക് പുത്തൻ ഉടുപ്പ് വേണമെന്ന് ദിവസങ്ങള്‍ക്ക് മുമ്പ് കല്യാണി കൊച്ചച്ഛന്‍ സുമേഷിനോട് (പിതാവ് സുഭാഷിന്‍റെ സഹോദരൻ) ആവശ്യപ്പെട്ടിരുന്നു. ഇതു പ്രകാരം സുമേഷ് നല്കിയ പൈസ ഉപയോഗിച്ച് സുഭാഷ് പുത്തനുടുപ്പ് വാങ്ങി നല്കി. ഈ പുത്തനുടുപ്പ് കല്യാണിയുടെ മൃതദേഹത്തില്‍ അണിയിച്ച് കൊച്ചപ്പൻ ക ണ്ണീരോടെ അവളെ അന്ത്യ യാത്രയാക്ക യപ്പോൾ കണ്ടു നിന്നവർക്കും ദുഖം അട‌ക്കാനായില്ല.

അവധിക്കാലത്ത് യാത്രക്കാരെ പിഴിഞ്ഞ് വാട്ടര്‍ മെട്രോ

കൊച്ചി: മുന്‍പ് അവധി ദിവസങ്ങളില്‍ മാത്രം ഈടാക്കിയിരുന്ന അമിത നിരക്ക് അവധിക്കാലത്തും യാത്രക്കാര്‍ക്ക് മേല്‍ അടിച്ചേല്‍പ്പിച്ച് വാട്ടര്‍ മെട്രോ. അവധിക്കാലത്ത് വാട്ടര്‍മെട്രോയില്‍ സഞ്ചരിക്കുന്നവര്‍ അധികവും വിനോദസഞ്ചാരികളാണെന്ന വാദം ഉന്നയിച്ചാണ് സാധാരണ യാത്രക്കാരില്‍ നിന്ന് പോലും കൂടുതല്‍ നിരക്ക് ഇടാക്കുന്നത്. നിരക്ക് വര്‍ധനയ്ക്കെതിരെ പ്രതിഷേധം വ്യാപകമായെങ്കിലും ജൂണ്‍ ഒന്നു വരെ കൂട്ടിയ നിരക്ക് തുടരുമെന്ന നിലപാടിലാണ് വാട്ടര്‍ മെട്രോ അധികൃതര്‍. ശനി, ഞായര്‍ ദിവസങ്ങളിലും പൊതുഅവധി ദിവസങ്ങളിലും സാധാരണ നിരക്കിനേക്കാള്‍ 10 രൂപ അധികം ടിക്കറ്റ് നിരക്കില്‍ വര്‍ധിപ്പിക്കുന്ന രീതി വാട്ടര്‍മെട്രോയ്ക്കുണ്ട്. ഈ ദിവസങ്ങളില്‍ കൂടുതലും യാത്ര ചെയ്യുന്നത് വിനോദസഞ്ചാരികളാണെന്ന കാരണം നിരത്തിയാണ് നിരക്ക് വര്‍ധനയെ ന്യായീകരിച്ച് അധികൃതര്‍ പറഞ്ഞിരുന്നത്. എന്നാൽ ഏപ്രില്‍, മേയ് മാസങ്ങളില്‍ മധ്യവേനല്‍ അവധിക്കാലമായതിനാല്‍ എല്ലാ ദിവസങ്ങളിലും നിരക്ക് വര്‍ധന പ്രാബല്യത്തിലാക്കി. ഇതിനെതിരെ ബോട്ട് യാത്രക്കാരുടെ സംഘടനകളടക്കം രംഗത്തെത്തി. അവധിക്കാലമാണെങ്കിലും സാധാരണ യാത്രക്കാരും സ്ഥിരമായി മെട്രോയില്‍ സഞ്ചരിക്കുന്നവരാണെന്നും നിരക്ക് വര്‍ധന താങ്ങാനാകുന്നതല്ലെന്നും കൊച്ചി വണ്‍ സംഘടന ചെയര്‍മാന്‍ ഹാരിസ് അബു പറഞ്ഞു. എറണാകുളം ടെര്‍മിനലില്‍ നിന്ന് ഫോര്‍ട്ട്‌കൊച്ചിയിലേക്ക് യാത്ര ചെയ്യാന്‍ മുന്‍പ് 40 രൂപ നല്‍കിയിരുന്നിടത്ത് ഇപ്പോള്‍ 50 രൂപയായി വര്‍ധിപ്പിച്ചു. അതേസമയം ജലഗതാഗത വകുപ്പിന്‍റെ ബോട്ടില്‍ ആറു രൂപ മാത്രമേ നിരക്കൂള്ളൂ എന്നും അദ്ദേഹം പറഞ്ഞു. "ജൂണ്‍ ഒന്ന് മുതല്‍ നിരക്ക് കുറയും' കൊച്ചി: ശനി, ഞായര്‍ ദിവസങ്ങളിലും പൊതു അവധി ദിവസങ്ങളിലും ടിക്കറ്റ് നിരക്കില്‍ 10 രൂപ അധികം ഈടാക്കുന്ന രീതി 2024 ഡിസംബര്‍ മുതല്‍ നടപ്പാക്കി വരുന്നതാണെന്ന് വാട്ടര്‍ മെട്രോ അധികൃതര്‍ പറയുന്നു. ഏപ്രില്‍ മുതല്‍ മധ്യവേനല്‍ അവധി ആരംഭിച്ചതിനാല്‍ അവധിക്കാല നിരക്ക് വര്‍ധന വാട്ടര്‍മെട്രോയിലും പ്രാബല്യത്തില്‍ വരികയായിരുന്നു. ഈ സമയങ്ങളില്‍ വാട്ടര്‍ മെട്രോയെ ആശ്രയിക്കുന്നത് കൂടുതലും വിനോദ സഞ്ചാരികളായതിനാലാണ് നിരക്കില്‍ അല്പം വര്‍ധന വരുത്താന്‍ തീരുമാനിച്ചത്. സ്ഥിരം യാത്രക്കാര്‍ക്ക് കുറഞ്ഞ നിരക്കില്‍ സ്‌പെഷല്‍ പാസുകളുണ്ടെന്നും ജൂണ്‍ ഒന്ന് മുതല്‍ ടിക്കറ്റ് നിരക്ക് പഴയ നിലയിലാകുമെന്നും വാട്ടര്‍ മെട്രോ അധികൃതര്‍ അറിയിച്ചു. സ്ഥിരം യാത്രക്കാര്‍ക്ക് കുറഞ്ഞ നിരക്കില്‍ ആഴ്ച്ച പാസും മാസ പാസും ഉണ്ട്. ആഴ്ച പാസിന് 180 രൂപയാണ് നിരക്ക്. ഏതു സ്‌റ്റേഷനിലേക്കും ആഴ്ചയില്‍ 12 യാത്ര ചെയ്യാം. ഒരു യാത്രയ്ക്ക് 15 രൂപയേ ആകുന്നുള്ളൂ. പ്രതിമാസ പാസിന് 600 രൂപയാണ് നിരക്ക്. 50 യാത്രകള്‍ ചെയ്യാം. ഒരു യാത്രയ്ക്ക് 12 രൂപ മാത്രം. മൂന്നു മാസത്തെ ത്രൈമാസ പാസിന് 1500 രൂപയാണ് നിരക്ക്. 150 യാത്ര ചെയ്യാം. ഒരു യാത്രയ്ക്ക് 10 രൂപയേ ആകുന്നുള്ളൂ. സാധാരണക്കാരായ സ്ഥിരം യാത്രക്കാര്‍ക്ക് വളരെ കുറഞ്ഞ നിരക്കേ വാട്ടര്‍ മെട്രോ ഈടാക്കുന്നുള്ളൂ. മാത്രമല്ല, തിരക്കുണ്ടാകുന്ന സന്ദര്‍ഭങ്ങളില്‍ സ്ഥിരം യാത്രക്കാര്‍ക്കാണ് പ്രവേശനത്തിന് മുന്‍ഗണന നല്‍കുന്നതെന്നും അധികൃതര്‍ പറഞ്ഞു.

മനക്കരുത്തിന്‍റെ ഐഎഎസ് വിജയഗാഥ

കാക്കനാട്: വിധിയുടെ പരീക്ഷണങ്ങളെ മനക്കരുത്തുകൊണ്ട് അതിജീവിച്ചതിന്‍റെ വിജയകഥയാണ്, എറണാകുളം അസി. കളക്ടറായി ഇന്നലെ ചുമതലയേറ്റ അമ്പലപ്പുഴക്കാരി പാർവതി ഗോപകുമാറിന്‍റെ ഐഎഎസ് നേട്ടത്തിനു പിന്നിൽ. പന്ത്രണ്ടാം വയസിൽ പിതാവിനോടൊപ്പം ആലപ്പുഴ മുല്ലക്കൽ ക്ഷേത്രത്തിലെ ചിറപ്പുത്സവത്തിനു പോകുംവഴി ഉണ്ടായ വാഹനാപകടത്തിൽ പാർവതിക്കു നഷ്ടമായത് തന്‍റെ വലതുകരമായിരുന്നു. വിധിയെ പഴിക്കാതെ വിജയങ്ങൾ സ്വപ്നം കാണാൻ പിന്നീട് പാർവതിയെ പഠിപ്പിച്ചത് മാതാപിതാക്കളായ കെ. എസ്. ഗോപകുമാറും ശ്രീകല എസ്. നായരും. കുറവുകളെപ്പറ്റി ചിന്തിക്കാതെ കഴിവുകൾ വളർത്താൻ പാർവതി ശ്രദ്ധ മുഴുവൻ പഠനത്തിൽ കേന്ദ്രീകരിച്ചു. മഹാവിജയങ്ങൾ സ്വപ്നം കണ്ടു. ഹ്യുമാനിറ്റീസിൽ ഉന്നത മാർക്കോടെ പ്ലസ്ടു പാസായശേഷം ബംഗളൂരുവിലെ നാഷണൽ ലോ സ്കൂളിൽ നിന്ന് 2021 ൽ എൽഎൽബി സ്വന്തമാക്കി. ഇന്‍റേൺഷിപ്പ് ആലപ്പുഴ കളക്ടറേറ്റിൽ ആയിരുന്നു. അന്ന് കളക്ടറായിരുന്നത് ഇപ്പോഴത്തെ സിയാൽ മാനേജിംഗ് ഡയറക്ടർ എസ്. സുഹാസും. ഇക്കാലയളവിലാണ് പാർവതി സിവിൽ സർവീസ് സ്വപ്നം കാണാൻ തുടങ്ങിയത്. സുഹാസും പ്രോത്സാഹിപ്പിച്ചതോടെ കളക്ടറേറ്റ് റവന്യൂ വിഭാഗം ഉദ്യോഗസ്ഥനായ പിതാവ് ഗോപകുമാറും കക്കാഴം ഹയർ സെക്കൻഡറി സ്കൂൾ അധ്യാപികയായ മാതാവ് ശ്രീകലയും പാർവതിക്ക് കരുത്ത് പകർന്ന് ഒപ്പം നിന്നു. ആത്മവിശ്വാസവും, നിശ്ചയദാർഢ്യവും ലക്ഷ്യബോധവും കൂടിച്ചേർന്നതോടെ 2024 ലെ സിവിൽ സർവീസ് പരീക്ഷയിൽ 282-ാം റാങ്ക് സ്വന്തമാക്കി. ഏക സഹോദരി രേവതി ഗോപകുമാർ തിരുവനന്തപുരം ഐസറിൽ വിദ്യാർഥിനി. ഇന്നലെ അസിസ്റ്റന്‍റ് കളക്ടറായി ചുമതലയേൽക്കാനെത്തിയ പാർവതിയെ പൂച്ചെണ്ട് നൽകിയാണ് ജില്ലാ കളക്ടർ എൻ.എസ്. കെ. ഉമേഷ് സ്വീകരിച്ചത്. പാർവതി ഗോപകുമാർ ചുമതലയേൽക്കുന്നതിനു സാക്ഷ്യം വഹിക്കാൻ കുടുംബാഗങ്ങളും കളക്ടറേറ്റിൽ എത്തിയിരുന്നു.

അന്വേഷണം ഒഴിവാക്കാന്‍ കൈക്കൂലി: ഇഡിക്കെതിരെ കൂടുതല്‍ പരാതികള്‍

കൊച്ചി: എന്‍ഫോഴ്‌സ്‌മെന്‍റ് ഡയറക്ടറേറ്റിന്‍റെ(ഇഡി) കേസ് അന്വേഷണം ഒഴിവാക്കാന്‍ കശുവണ്ടി വ്യവസായിയില്‍ നിന്ന് രണ്ടു കോടി രൂപ കൈക്കൂലി ആവശ്യപ്പെട്ട കേസില്‍ ഇഡിക്കെതിരെ ഉയര്‍ന്ന ആരോപണങ്ങള്‍ക്കു പിന്നാലെ കൂടുതല്‍ പേര്‍ പരാതിയുമായി രംഗത്ത്. വിജിലന്‍സിനു മുമ്പാകെ ഫോണ്‍ മുഖേനെയും മറ്റുമാണ് പരാതികള്‍ എത്തിയിരിക്കുന്നത്. അറസ്റ്റിലായ മൂന്നു പേരുടെയും മൊഴിയെടുത്തുവരുന്നതായും കൂടുതല്‍ അറസ്റ്റ് ഉണ്ടായേക്കുമെന്നും വിജിലന്‍സ് മധ്യമേഖല എസ്പി എസ്. ശശിധരന്‍ പറഞ്ഞു. രഞ്ജിത് വാര്യരുടെ വീട്ടില്‍നിന്ന് ലഭിച്ചത് നിര്‍ണായക രേഖകള്‍ അറസ്റ്റിലായ ചാര്‍ട്ടേഡ് അക്കൗണ്ടന്‍റ് രഞ്ജിത് വാര്യരുടെ വീട്ടിലും ഓഫീസിലും വിജിലന്‍സ് നടത്തിയ പരിശോധനയില്‍ ഇഡി സമന്‍സ് അയച്ച മുപ്പതോളം പേരുടെ വിവരങ്ങള്‍ കണ്ടെത്തിയെന്നാണ് വിവരം. ഇലക്ട്രോണിക് ഉപകരണങ്ങളും ഇവിടെനിന്നു പിടിച്ചെടുത്തിട്ടുണ്ട്. ഇതിലെ വിവരങ്ങള്‍ പരിശോധിച്ചുവരികയാണ്. വ്യവസായികള്‍ അടക്കം ഒട്ടേറെ സന്പന്നരുടെ അക്കൗണ്ടുകള്‍ കൈകാര്യം ചെയ്യുന്ന രഞ്ജിത് വാര്യര്‍ക്ക് രാഷ്ട്രീയ, ബിസിനസ് ബന്ധങ്ങളുണ്ടെന്നാണ് വിവരം. രഞ്ജിത് ഇഡി ഓഫീസിലെ നിത്യസന്ദര്‍ശകനാണെന്നും കേരളത്തിലും പുറത്തുമുളള ഉന്നത ഇഡി ഉദ്യോഗസ്ഥരുമായും രഞ്ജിത്തിന് അടുത്ത സൗഹൃദമുണ്ടെന്നും അന്വേഷണത്തില്‍ വ്യക്തമായിട്ടുണ്ട്. ഫോണുകള്‍ ശാസ്ത്രീയ പരിശോധനയ്ക്ക് അറസ്റ്റിലായ മൂന്നു പ്രതികളെയും ഒന്നിച്ചിരുത്തിയുളള ചോദ്യം ചെയ്യല്‍ അന്വേഷണ സംഘം തുടരുകയാണ്. ഒന്നാം പ്രതിയായ ഇഡി ഉദ്യോഗസ്ഥന്‍ ശേഖര്‍ കുമാറിനെതിരെ കൂടുതല്‍ തെളിവുകള്‍ സമാഹരിക്കാനാണ് വിജിലന്‍സിന്‍റെ ശ്രമം. അറസ്റ്റിലായ പ്രതികളുടെ ഫോണുകള്‍ ഉടന്‍ ശാസ്ത്രീയ പരിശോധനയ്ക്ക് അയയ്ക്കും. അതേസമയം വിജിലന്‍സില്‍ നിന്ന് കേസ് സംബന്ധമായ വിവരങ്ങള്‍ ഇഡി ഇതുവരെ തേടിയിട്ടില്ലെന്നാണ് അറിയുന്നത്. അപകീര്‍ത്തിപ്പെടുത്താന്‍ ശ്രമമെന്ന് ഇഡി കൊച്ചി: ഇഡി ഉദ്യോഗസ്ഥനെ പ്രതിയാക്കിയുള്ള വിജിലന്‍സ് കേസില്‍ ഔദ്യോഗിക പ്രതികരണവുമായി എന്‍ഫോഴ്‌സ്‌മെന്‍റ് ഡയറക്ടറേറ്റ് (ഇഡി). പരാതിക്കാരനായ അനീഷ് ബാബു ഇഡിയെ അപകീര്‍ത്തിപ്പെടുത്താനുള്ള ശ്രമങ്ങളാണ് നടത്തുന്നതെന്ന് ഇഡി പ്രതികരിച്ചു. ആരോപണങ്ങള്‍ അടിസ്ഥാനരഹിതമാണ്. ഇയാള്‍ക്കെതിരെ കള്ളപ്പണം വെളുപ്പിക്കല്‍ നിരോധന നിയമപ്രകാരമുള്ള (പിഎംഎല്‍എ) കേസ് അന്വേഷണം അട്ടിമറിക്കാന്‍ വേണ്ടിയാണിത്. അന്വേഷണത്തില്‍ നിന്നും നിയമനടപടികളില്‍ നിന്നും ശ്രദ്ധതിരിക്കാന്‍ വേണ്ടി അനീഷ് ബാബു മാധ്യമങ്ങളെ ഉപയോഗിക്കുകയാണെന്നും ഇഡി പുറത്തിറക്കിയ പത്രക്കുറിപ്പില്‍ വ്യക്തമാക്കി. പരസ്പരവിരുദ്ധമായ കാര്യങ്ങളാണ് ഇയാള്‍ മാധ്യമങ്ങളിലൂടെ പറയുന്നത്. ഇഡി രജസ്റ്റര്‍ ചെയ്ത കള്ളപ്പണ കേസിലെ പ്രതിയാണ് അനീഷ് ബാബു. ഇയാളെ കൂടാതെ ഇയാളുടെ അച്ഛനും അമ്മയും കേസില്‍ പ്രതികളാണ്. അനീഷ് ബാബുവിനും മാതാപിതാക്കള്‍ക്കുമെതിരെ കൊട്ടാരക്കര പോലീസ് രജിസ്റ്റര്‍ ചെയ്ത അഞ്ചോളം വ്യത്യസ്ത കേസുകളുടെ തുടര്‍ച്ചയായാണ് ഇഡിയും അന്വേഷണം ആരംഭിച്ചത്. കൊട്ടാരക്കരയിലെ വാഴവിള കാഷ്യൂസ് എന്ന സ്ഥാപനം വഴി വിദേശത്തുനിന്ന് കുറഞ്ഞ വിലയ്ക്ക് കശുവണ്ടി ഇറക്കുമതി ചെയ്യാമെന്ന് വാഗ്ദാനം ചെയ്ത് നിരവധിയാളുകളെ വഞ്ചിച്ചതായാണ് കേസ്. 2021ലാണ് ഇഡി പ്രാഥമിക അന്വേഷണം ആരംഭിച്ചത്. ഇവര്‍ തട്ടിപ്പ് നടത്തിയിട്ടുണ്ടെന്ന് തിരിച്ചറിഞ്ഞതിനെ തുടര്‍ന്ന് ഇഡി മുമ്പാകെ ഹാജരാകാന്‍ രണ്ടു തവണ സമന്‍സ് അയച്ചെങ്കിലും ഇവര്‍ എത്തിയില്ല. മൂന്നാം തവണ ഇവര്‍ ഇഡി മുമ്പാകെ ഹാജരായെങ്കിലും തങ്ങളോട് സഹകരിക്കാതിരിക്കുകയും ആവശ്യപ്പെട്ട രേഖകള്‍ നല്‍കാതിരിക്കുകയുമായിരുന്നു. ഈ കേസിലുള്‍പ്പെടെ ഹൈക്കോടതിയിലും സുപ്രീം കോടതിയിലും അനീഷ് ബാബു മുന്‍കൂര്‍ ജാമ്യഹര്‍ജികള്‍ സമര്‍പ്പിച്ചെങ്കിലും അവയെല്ലാം കോടതികള്‍ നിരസിച്ചു. ഇതോടെയാണ് ഇയാള്‍ ഇഡിയെ അപകീര്‍ത്തിപ്പെടുത്താന്‍ കൈക്കൂലി ആരോപണവുമായി രംഗത്തെത്തിയതെന്നും നീതിയുക്തവും നിഷ്പക്ഷവുമായ ഏതൊരു അന്വേഷണത്തെയും സ്വാഗതം ചെയ്യുന്നുവെന്നും ഇഡി വ്യക്തമാക്കി.

മെട്രോ തൂണുകള്‍ക്കിടയിലെ പച്ചപ്പ് നിലനിര്‍ത്താന്‍ കഴിയുമോയെന്ന് പരിശോധിക്കണം: മന്ത്രി പി. രാജീവ്

കൊച്ചി: വിവിധ ഏജന്‍സികളുമായി ചേര്‍ന്ന് കൂട്ടായ പരിശ്രമത്തിലൂടെ മെട്രോയുടെ തൂണുകള്‍ക്കിടയിലെ പച്ചപ്പ് നിലനിര്‍ത്താനാകുമോയെന്ന് കെഎംആര്‍എല്‍ പരിശോധിക്കണമെന്ന് മന്ത്രി പി. രാജീവ്. കൊച്ചി മെട്രോ കളമശേരിയില്‍ ബിപിസിഎലുമായി ചേര്‍ന്ന് ആരംഭിച്ച ഫ്യൂവല്‍ സ്റ്റേഷന്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. രാജ്യത്തെ വിവിധ കേന്ദ്രങ്ങളില്‍ വാട്ടര്‍ മെട്രോ ആരംഭിക്കുന്നതിനുള്ള പഠനം നടത്താന്‍ കെഎംആര്‍എലിനെയാണ് ഏല്‍പ്പിച്ചിരിക്കുന്നത് എന്നത് കേരളത്തിനാകെ അഭിമാനകരമാണെന്നും കൊച്ചി മെട്രോ ടീമിനെ അഭിനന്ദിക്കുന്നുവെന്നും അദ്ദേഹം പറഞ്ഞു. രാജ്യത്തെ മിക്ക മെട്രോകളും സാമ്പത്തികമായി ലാഭത്തിലല്ലെന്നും കൊച്ചി മെട്രോ ലാഭം വര്‍ധിപ്പിക്കാന്‍ ബഹുവിധ ശ്രമങ്ങളാണ് നടത്തുന്നതെന്നും അതിന്‍റെ ഒടുവിലത്തെ ഉദാഹരണമാണ് ഫ്യവല്‍ സ്റ്റേഷനെന്നും ഇതൊരു നല്ല മാതൃകയാണ് എന്നും ചടങ്ങില്‍ അധ്യക്ഷത വഹിച്ച ഹൈബി ഈഡന്‍ എംപി പറഞ്ഞു. മെട്രോ ലൈനിലെ മീഡിയനിലിലെ പച്ചപ്പ് നിലനിര്‍ത്താനാവശ്യമായ നടപടികള്‍ സ്വീകരിക്കണമെന്നും അദ്ദേഹം അഭ്യര്‍ഥിച്ചു. കെഎംആർഎൽ എംഡി ലോക്‌നാഥ് ബെഹ്‌റ, കളമശേരി നഗരസഭാ കൗണ്‍സിലര്‍ നഷീദ സലാം, കെഎംആര്‍എല്‍ ഡയറക്ടര്‍മാരായ ഡോ. എം.പി. രാംനവാസ്, സഞ്ജയ് കുമാര്‍, കൊച്ചി റിഫൈനറി എക്‌സിക്യൂട്ടീവ് ഡയറക്ടര്‍ (ഐ/സി) എം. ശങ്കര്‍, ബിപിസിഎല്‍ ഹെഡ് റീട്ടെയ്ല്‍ സൗത്ത് രവി ആര്‍. സഹായ്, സ്റ്റേറ്റ് ഹെഡ് (റീറ്റെയ്‌ൽ) കേരള, വി.ആര്‍. ഹരി കിഷന്‍ എന്നിവര്‍ പ്രസംഗിച്ചു. കളമശേരി മെട്രോ സ്റ്റേഷനു സമീപം പ്രവര്‍ത്തിക്കുന്ന ഫ്യൂവല്‍ സ്റ്റേഷന്‍ 24 മണിക്കൂറും പ്രവര്‍ത്തിക്കും.

കൃത്രിമ മുടി വച്ചുപിടിപ്പിക്കൽ; യുവാവ് ഗുരുതരാവസ്ഥയിൽ

വൈപ്പിൻ: എറണാകുളം പനമ്പിള്ളിനഗറിലെ ഒരു സ്ഥാപനത്തിൽ തലയിൽ കൃത്രിമമുടി പിടിപ്പിക്കുന്നതിന് വിധേയനായ യുവാവ് അണുബാധയെ തുടർന്ന് ഗുരുതരാവസ്ഥയിൽ. യുവാവ് എറണാകുളത്തെ സ്വകാര്യ ആശുപത്രിയിൽ 13 തവണ ശസ്ത്രക്രിയയ്ക്ക് വിധേയനായി. ചെറായി സ്വദേശിയും എളമക്കര കീർത്തി നഗറിൽ താമസക്കാരനുമായ ചെറുപറമ്പിൽ സനിലാണ് മൂന്ന് മാസം മുമ്പ് ഹെയർ ട്രാൻസ്പ്ലാന്‍റേഷനു വിധേയനായത്. 54500 രൂപ വാങ്ങിയ സ്ഥാപനം 3500 മുടിയാണ് വച്ചു പിടിപ്പിച്ചത്. ഹൈദരാബാദുകാരനായ ഒരു ഡോക്ടറാണ് ഹെയർ ട്രാൻസ്പ്ലാന്‍റേഷൻ നടത്തിയത്. ദിവസങ്ങൾക്കുള്ളിൽ അസഹനീയമായ തലവേദന ഉണ്ടായതിനെ തുടർന്ന് സ്ഥാപനവുമായി ബന്ധപ്പെട്ടപ്പോൾ വേദന സംഹാരി കഴിക്കാനായിരുന്നു നിർദേശം. സ്ഥിതി ഗുരുതരമായതിനെ തുടർന്നാണ് എറണാകുളത്തെ ആശുപത്രിയിൽ ചികിത്സ തേടിയതും മുടിവച്ചുപിടിച്ച ഭാഗത്ത് ഗുരുതരമായ അണുബാധ കണ്ടെത്തിയതും. ഇതിനുശേഷമാണ് തലയിൽ അടിയന്തര ശസ്ത്രക്രിയകൾ നടത്തിയത്. ചികിത്സയ്ക്ക് ഇതുവരെ കുടുംബം 10 ലക്ഷം രൂപയോളം ചെലവിട്ടു കഴിഞ്ഞു. ഇപ്പോൾ തലയിലെ പഴുപ്പ് വലിച്ച് എടുക്കുന്നതിനായി ഘടിപ്പിച്ചിട്ടുള്ള ഉപകരണം ഇല്ലാതെ സനിലിന് എങ്ങോട്ടും പോകാൻ കഴിയാത്ത സ്ഥിതിയാണ്. ഇനിയും ശസ്ത്രക്രിയകൾ വേണ്ടിവന്നേക്കാം. സ്ഥാപനത്തിനെതിരെ നിയമനടപടികൾ സ്വീകരിക്കാനാണ് സനിലിന്‍റെ നീക്കം. ഇതിനു മുന്നോടിയായി തേവര സിഐക്ക് സനിൽ പരാതി നൽകിയിട്ടുണ്ട്.

പ്ലാസ്റ്റിക് പുനരുപയോഗത്തില്‍ മികവാര്‍ന്ന മാതൃകയായി "എന്‍റെ കേരളം' പ്രദര്‍ശനം

കൊച്ചി: സംസ്ഥാന സര്‍ക്കാറിന്‍റെ നാലാം വാര്‍ഷികാഘോഷത്തിന്‍റെ ഭാഗമായി മറൈന്‍ഡ്രൈവില്‍ നടക്കുന്ന "എന്‍റെ കേരളം' പ്രദര്‍ശനത്തില്‍ പ്ലാസ്റ്റിക് പുനരുപയോഗത്തിന്‍റെ സാധ്യതകള്‍ പരിചയപ്പെടുത്തുന്ന പ്രദര്‍ശനം ശ്രദ്ധേയമാകുന്നു. പ്ലാസ്റ്റിക് മാലിന്യങ്ങള്‍ക്ക് പുതുജീവിതം നല്‍കി അതിനെ മനോഹരമായ ഒരു സ്റ്റില്‍ മോഡലാക്കിയാണ് മേളയില്‍ പ്രദര്‍ശിപ്പിച്ചിരിക്കുന്നത്. ജില്ലാ ഹരിത കേരളം മിഷന്‍റേതാണ് സ്റ്റാള്‍. പ്ലാസ്റ്റിക് പ്രകൃതിയുടെ ശാപമല്ല, അതിനെ ഉപയോഗിക്കുന്ന രീതിയാണ് പ്രധാന്യം എന്ന സന്ദേശമാണ് പ്രദര്‍ശനത്തിലൂടെ നല്‍കുന്നത്. പരിസ്ഥിതി സൗഹൃദ സാധ്യതയിലെക്ക് ജനങ്ങളെ ബോധവത്കരിക്കുകയാണ് ലക്ഷ്യമിടുന്നതെന്ന് സംഘാടകര്‍ പറഞ്ഞു.

നാലര കിലോഗ്രാം കഞ്ചാവുമായി ആസാം സ്വദേശി പിടിയിൽ

മൂവാറ്റുപുഴ: വില്പനയ്ക്കായി എത്തിച്ച നാലരകിലോ കഞ്ചാവുമായി ആസാം സ്വദേശി പിടിയിൽ. ആസാം നൗഗാവ് സ്വദേശി സഞ്ജിത്ത് ബിശ്വാസി (26)നെയാണ് മുവാറ്റുപുഴ ഇൻസ്പെക്ടർ ബേസിൽ തോമസിന്‍റെ നേതൃത്വത്തിൽ അറസ്റ്റ് ചെയ്തത്. കഞ്ചാവ് പായിപ്ര എസ്റ്റേറ്റ് പടിയിൽ ഇതരസം സ്ഥാന തൊഴിലാളികൾക്കിടയിൽ വില്പനയ്ക്കായി എത്തിച്ചപ്പോഴാണ് പിടികൂടിയത്. മുവാറ്റുപുഴ ഡിവൈഎസ്പി പി.എം. ബൈജുവിന്‍റെ മേൽനോട്ടത്തിൽ പ്രതിയെ പിടികൂടിയ സ്ക്വാഡിൽ എസ്ഐമാരായ എസ്.എൻ. സുമിത, പി.സി. ജയകുമാർ, കെ.കെ. രാജേഷ്, അസിസ്റ്റന്‍റ് സബ് ഇൻസ്പെക്ടർ വി.എം ജമാൽ, സി.കെ. മീരാൻ, സീനിയർ സിപിമാരായ ബിബിൽ മോഹൻ, ധനേഷ് ബി. നായർ, ഷാൻ മുഹമ്മദ്, മഹേഷ് കുമാർ, സന്ദീപ് ടി. പ്രഭാകർ എന്നിവരാണുണ്ടായിരുന്നത്.

പ്രകൃതിവിരുദ്ധ പീഡനം: പ്രതിക്ക് 20 വർഷം കഠിന തടവ്

ആലുവ: പ്രായപൂർത്തിയാകാത്ത ആൺകുട്ടിയെ പ്രകൃതിവിരുദ്ധ ലൈംഗിക പീഡനത്തിന് ഇരയാക്കിയ കേസിൽ പ്രതിക്ക് 20 വർഷം കഠിന തടവും അമ്പതിനായിരം രൂപ പിഴയും ശിക്ഷ വിധിച്ചു. ഇടുക്കി കരിങ്കുന്നം വലിയ കോളനി തെക്കേടത്തിൽ വീട്ടിൽ സുരേഷിനാണ് (കൊച്ചു സുരേഷ്, തൊപ്പി സുരേഷ് -54) ആലുവ ഫാസ്റ്റ് ട്രാക്ക് കോടതി തടവും പിഴയും വിധിച്ചത്. പിഴ അടച്ചില്ലെങ്കിൽ ആറു മാസം കൂടി തടവ് അനുഭവിക്കണം. 2023 ഫെബ്രുവരിയിലാണ് സംഭവം നടന്നത്. ആലുവ ഈസ്റ്റ് പോലീസ് സ്റ്റേഷനിൽ രജിസ്റ്റർ ചെയ്ത കേസ് ഇൻസ്പെക്ടർ എം.എം.മഞ്ജുദാസിന്‍റെ നേതൃത്വത്തിലാണ് അന്വേഷിച്ചത്. പ്രോസിക്യൂഷനു വേണ്ടി സ്‌പെഷൽ പബ്ലിക് പ്രോസിക്യൂട്ടർ പി.ജി.യമുന ഹാജരായി.

സിഐഎസ്എഫ് വാട്സ്ആപ് ഗ്രൂപ്പുകളിൽ ഐവിൻ ജിജോയ്ക്കെതിരെ വ്യാപക വ്യാജപ്രചാരണം

നെടുമ്പാശേരി : റോഡിൽ വാഹനം ഉരസിയതുമായി ബന്ധപ്പെട്ട തർക്കത്തെ തുടർന്ന് സിഐഎസ്എഫ് ഉദ്യോഗസ്ഥർ കാറിടിപ്പിച്ച് കൊലപ്പെടുത്തിയ അങ്കമാലി തുറവൂർ അരിശേരി വീട്ടിൽ ജിജോ ജയിംസിന്‍റെ മകൻ ഐവിൻ ജിജോ(24)യ്ക്കെതിരെ വ്യാപകമായ വ്യാജ പ്രചാരണം. സിഐഎസ്എഫ് ഉദ്യോഗസ്ഥരുടെ വാട്സ്ആപ് ഗ്രൂപ്പുകളിലാണ് ഇതു സംബന്ധിച്ച് ശബ്ദ സന്ദേശം പ്രചരിക്കുന്നത്. റോഡിലെ തർക്കത്തെ തുടർന്ന് സിഐഎസ്എഫ് എസ്ഐ വിനയകുമാർ ദാസ്, കോൺസ്റ്റബിൾ മോഹൻകുമാർ എന്നിവരാണ് അർധരാത്രിയിൽ ഐവിനെ കാറിടിപ്പിച്ച് ദാരുണമായി കൊലപ്പെടുത്തിയത്. ഐവിനൊപ്പം മറ്റു നാല് പേർ കൂടി ഉണ്ടായിരുന്നുവെന്നും ഉദ്യോഗസ്ഥർ പെട്ടെന്ന് വണ്ടിയെടുത്തപ്പോൾ നാലു പേരും സൈഡിലേക്ക് മാറിയെന്നും ഒരുത്തൻ മാത്രം ബോണറ്റിൽ കയറി കിടന്നെന്നും ശബ്ദ സന്ദേശത്തിൽ പറയുന്നു. അങ്ങനെ കിടന്ന ഐവിൻ അഞ്ചോളം കേസുകളിൽ പ്രതിയായിട്ടുള്ള ഗുണ്ടയാണെന്നാണ് വ്യാജ പ്രചാരണം. മറ്റ് മാർഗമില്ലാതെയാണ് ഐവിനെ കൊലപ്പെടുത്തിയതെന്നാണ് ശബ്ദ സന്ദേശം. ഐവിനും സിഐഎസ്.എഫ് ഉദ്യോഗസ്ഥരും തമ്മിലുള്ള വാക്ക് തർക്കം ഉൾപ്പെടെയുള്ള ദൃശ്യങ്ങൾ അടക്കം ഇതിനിടെ പുറത്തുവന്നിരുന്നു. ഈ സാഹചര്യത്തിലും സ്വന്തം ഉദ്യോഗസ്ഥരെ ന്യായീകരിക്കാൻ നടക്കുന്ന ശ്രമം പ്രതികളെ ജോലിയിൽ നിന്നു പിരിച്ചുവിടുന്നത് അടക്കമുള്ള നടപടികൾ തടയുന്നതിന്‍റെ ഭാഗമാണെന്നാണ് സംശയിക്കപ്പെടുന്നത്. പ്രതികൾക്ക് സംരക്ഷണം ഒരുക്കാൻ ആദ്യ ഘട്ടത്തിൽ തന്നെ ചില ഉദ്യോഗസ്ഥർ രംഗത്തു വന്നതും വിവാദമായിരുന്നു. ഇതിനിടെ പ്രതികളെ കസ്റ്റഡിയിൽ വാങ്ങുന്നതിന് പോലീസ് കോടതിയിൽ അപേക്ഷ സമർപ്പിച്ചിട്ടുണ്ടെങ്കിലും കൂടുതൽ ശാസ്ത്രീയമായ തെളിവുകൾ ശേഖരിച്ച ശേഷം അടുത്തയാഴ്ച കസ്റ്റഡിയിൽ വാങ്ങി തെളിവെടുപ്പ് നടത്താനാണ് അന്വേഷണ സംഘത്തിന്‍റെ തീരുമാനം.

ആലുവയിലെ മാർക്കറ്റ് സമുച്ചയം പദ്ധതി പ്രദേശം ഒഴിയാൻ വ്യാപാരികളോടു കോടതി

ആലുവ: നിർദിഷ്ട മാർക്കറ്റ് കെട്ടിട സമുച്ചയ പദ്ധതി പ്രദേശത്തുനിന്ന് 51 കച്ചവടക്കാരെ ഒഴിവാക്കുന്നതിനെതിരേ ഹൈക്കോടതിയിൽ നൽകിയ ഹർജി വ്യാപാരികൾ പിൻവലിച്ചു. ഒരാൾക്ക് 1,000 രൂപ വീതം പിഴ ഈടാക്കുമെന്ന മുന്നറിയിപ്പിനെ തുടർന്നാണ് വ്യാപാരികൾക്കു വേണ്ടി ഹാജരായ അഭിഭാഷകൻ അപ്പീൽ പിൻവലിച്ചത്. പദ്ധതി പ്രദേശത്തുനിന്ന് അടിയന്തരമായി ഒഴിയാനും കോടതി നിർദേശം നൽകിയിട്ടുണ്ട്. ഇതോടെ 27ന് നടക്കുന്ന മുഖ്യമന്ത്രിയുടെ നിർമാണോദ്ഘാടനം തടസങ്ങളില്ലാതെ നടക്കുമെന്നുറപ്പായി. കേന്ദ്ര-സംസ്ഥാന സഹായത്താൽ പുതിയ ആലുവ മാർക്കറ്റ് കെട്ടിടം നിർമിക്കുന്നതിനായി വ്യാപാരികളെ ഒഴിവാക്കുന്നതിനെതിരെ സിഐടിയു നേതൃത്വത്തിൽ ആറു മാസത്തോളമായി പ്രതിഷേധങ്ങൾ നടക്കുകയാണ്. പോലീസ് സന്നാഹത്തോടെ വന്നിട്ടും മൂന്നുവട്ടവും വ്യാപാരികളെ ഒഴിപ്പിക്കാനുള്ള ശ്രമം പരാജയപ്പെട്ടു. കഴിഞ്ഞ ദിവസം ജില്ലാ കളക്ടറുടെ നേതൃത്വത്തിൽ ചർച്ച നടത്തിയിട്ടും വിജയിച്ചില്ല. ഇതിനിടയിൽ വ്യാപാരികൾ ഹൈക്കോടതിയിൽ പോയെങ്കിലും രണ്ടാഴ്ചയ്ക്കകം മാറാനാണ് ഉത്തരവ് ലഭിച്ചത്. പകരം സ്ഥലം നൽകാനും നഗരസഭയോട് ആവശ്യപ്പെട്ടു. ഇതിനെതിരേ അപ്പീലുമായി വ്യാപാരികൾ ഡിവിഷൻ ബഞ്ചിനെ സമീപിച്ചപ്പോഴാണ് പിഴ ഈടാക്കുമെന്ന മുന്നറിയിപ്പ് ലഭിച്ചതും ഹർജി സ്വമേധയാ പിൻവലിച്ചതും. പതിനൊന്നു വർഷമായ പദ്ധതി പതിനൊന്നു വർഷം മുമ്പ് തറക്കല്ലിട്ടപ്പോൾ പഴയ കെട്ടിടത്തിൽ നിന്ന് ഒഴിവാക്കിയ വ്യാപാരികളാണ് കോടതിയെ സമീപിച്ചത്. പദ്ധതി നീണ്ടു പോയപ്പോൾ ദേശീയപാത ബൈപ്പാസ് മേൽപ്പാലത്തിനടിയിലും, പിന്നീട് പഴയ കെട്ടിടം പൊളിച്ച് മാറ്റിയ സ്ഥലത്തേക്കും പലരും മാറി. ഈ വ്യാപാരികളാണ് സ്ഥലത്ത് നിന്ന് മാറാൻ തയാറാകാത്തത്. പുതിയ കെട്ടിടത്തിൽ വലിയ വാടക വാങ്ങാനാണ് ഒഴിവാക്കുന്നതെന്നാണ് വ്യാപാരികൾ കുറ്റപ്പെടുത്തുന്നത്. നഗരസഭയ്ക്ക് കോടികളുടെ നഷ്ടം പ്രഖ്യാപിക്കപ്പെട്ട ആലുവ മാർക്കറ്റ് കെട്ടിട സമുച്ചയ പദ്ധതി 11 വർഷം പല കാരണങ്ങളാൽ വൈകിയപ്പോൾ നഗരസഭയ്ക്ക് വാടകയിനത്തിൽ നഷ്ടപ്പെട്ടത് കോടിക്കണക്കിന് രൂപ. മാർക്കറ്റിൽ ഷെഡ് കെട്ടി പ്രവർത്തിക്കുന്ന 51 വ്യാപാരികളിൽ 15 വ്യാപാരികൾ മാത്രമേ നഗരസഭയ്ക്ക് നിലവിൽ വാടകതുക നൽകുന്നുള്ളൂ. പുതിയ കെട്ടിടത്തിൽ കടമുറി ലഭിക്കാനായി മുൻകൂർ തുക നൽകിയതിനാൽ വാടക നൽകാനാവില്ലെന്ന നിലപാടാണ് ഈ വ്യാപാരികൾ എടുത്തത്. പലരും രണ്ടായിരം രൂപ ദിവസ വാടകയ്ക്ക് ഷെഡുകൾ മറിച്ചു നൽകിയതായും ആരോപണമുണ്ട്.

വീരൻപുഴയിൽ മത്സ്യത്തൊഴിലാളികൾ വാഴ നട്ട് പ്രതിഷേധിച്ചു

വൈപ്പിൻ: എക്കലും മണ്ണും അടിഞ്ഞ് നികന്നു കിടക്കുന്ന പുഴയിൽ മത്സ്യത്തൊഴിലാളികൾ വാഴ നട്ട് പ്രതിഷേധിച്ചു. കൊല്ലം, കോട്ടപ്പുറം ജലപാത കടന്നുപോകുന്ന നെടുങ്ങാട് വീരൻ പുഴയിലാണ് മത്സ്യത്തൊഴിലാളികൾ വ്യത്യസ്ഥമായ സമരം നടത്തിയത്. 2018 പ്രളയത്തിനു മുന്നേ വീരൻപുഴയിൽ എക്കലും മണ്ണുമടിഞ്ഞ് നികന്ന് മത്സ്യത്തൊഴിലാളികൾക്ക് പലയിടത്തും മത്സ്യബന്ധനം നടത്താൻ പറ്റാത്ത സാഹചര്യമായിരുന്നു. എന്നാൽ പ്രളയശേഷം സ്ഥിതി കൂടുതൽ ഗുരുതരമായി. എക്കൽ മൂടിയതിനാൽ 26 ഇനം മത്സ്യങ്ങൾ വീരൻപുഴയിൽ നിന്നും പാലായനം ചെയ്യപ്പെട്ടുവെന്നും മത്സ്യത്തൊഴിലാളികൾ പറയുന്നു. ഇതിനിടെ എക്കൽ അടിഞ്ഞ് ആഴം കുറഞ്ഞതോടെ തീരത്ത് വെള്ളപ്പൊക്കവും പതിവായി. തുടർന്ന് വിവിധ മേഖലകളിൽനിന്ന് എക്കൽ നീക്കം ചെയ്യണമെന്ന് ആവശ്യമുയർന്നെങ്കിലും നടപടിയായില്ല. ഇതിനിടയിലാണ് എക്കൽ നീക്കം ചെയ്യണമെന്നാവശ്യപ്പെട്ട് മത്സ്യത്തൊഴിലാളികൾ പുഴയിൽ വാഴ നട്ട് പ്രതികരിച്ചത്. ജില്ലാ ചെറുവഞ്ചി മത്സ്യത്തൊഴിലാളി യൂണിയൻ സംഘടിപ്പിച്ച സമരം ജില്ലാ പ്രസിഡന്‍റ് പി.ജി. സൗമിത്രൻ ഉദ്ഘാടനം ചെയ്തു.

പഴയ അറിവുകളും സംസ്‌കാരങ്ങളും തലമുറകളിലേക്ക് കൈമാറണം: മന്ത്രി ഒ.ആര്‍. കേളു

കൊച്ചി: പഴയ അറിവുകളും സംസ്‌കാരങ്ങളും തലമുറകളിലേക്ക് കൈമാറേണ്ടതുണ്ടെന്ന് മന്ത്രി ഒ.ആര്‍. കേളു. എറണാകുളം ട്രൈബല്‍ കോംപ്ലക്‌സില്‍ നടന്ന അന്താരാഷ്ട്ര മ്യൂസിയം ദിനാഘോഷം ഉദ്ഘാടനം ചെയ്യുകയായിരുന്നു മന്ത്രി.അറിവിന്‍റെ ഒരു വലിയ ശൃംഖലതന്നെ തദ്ദേശീയ ജനവിഭാഗങ്ങളില്‍ ഉണ്ട്. ഇവ കാലഹരണപ്പെടാതെ കാത്തുസൂക്ഷിക്കണം. ഇതിനായാണ് മ്യൂസിയങ്ങള്‍ സംരക്ഷിച്ചു പോരുന്നത്. പട്ടികവര്‍ഗ വിഭാഗങ്ങളുടെ സാമ്പത്തിക പുരോഗതി ലക്ഷ്യമിട്ട് സംസ്ഥാന സര്‍ക്കാര്‍ സംഘടിപ്പിക്കുന്ന ഗദ്ദിക നാടന്‍ കലാമേള ഈ വര്‍ഷം കൊച്ചിയില്‍ സംഘടിപ്പിക്കുമെന്നും മന്ത്രി പറഞ്ഞു. മേയര്‍ എം. അനില്‍കുമാര്‍ അധ്യക്ഷത വഹിച്ചു. കലാകാരന്‍മാരായ കുട്ടപ്പന്‍ കാണി, കെ.എസ്. സുകു, ആറളം ഫാം കോ ഓപ്പറേറ്റീവ് സൊസൈറ്റി അഡ്മിനിസ്‌ട്രേറ്റീവ് ഓഫീസര്‍ ഡോ. കെ.പി. നിതീഷ് കുമാര്‍, എന്‍ ഊര് സിഇഒ പി. പ്രിമല്‍ രാജ്, സനില കുഞ്ഞുമോന്‍, പി.ആര്‍. കണ്ണപ്പന്‍ തുടങ്ങിയവരെ ചടങ്ങില്‍ ആദരിച്ചു. യുസി കോളജ് ചരിത്ര വിഭാഗം മേധാവി ഡോ. ജെനി പീറ്റര്‍, ഒ.കെ. പ്രഭാകരന്‍, കൗണ്‍സിലര്‍ പത്മ എസ്. മേനോന്‍, കിര്‍ടാഡ്‌സ് ഡയറക്ടര്‍ ഡോ. എസ്. ബിന്ദു തുടങ്ങിയവര്‍ പ്രസംഗിച്ചു.

എറണാകുളം-അങ്കമാലി അതിരൂപത വിശ്വാസ പരിശീലന വര്‍ഷത്തിന് തുടക്കമായി

കൊച്ചി : എറണാകുളം-അങ്കമാലി അതിരൂപതയുടെ 2025-26 വിശ്വാസ പരിശീലന വര്‍ഷം കലൂര്‍ റിന്യൂവല്‍ സെന്‍ററില്‍ ജസ്റ്റീസ് സോഫി തോമസ് ഉദ്ഘാടനം ചെയ്തു. കുട്ടികളിലെ നിഷ്‌ക്കളങ്കത നിലനിര്‍ത്തികൊണ്ടുതന്നെ ജീവിതത്തിലെ പ്രതിസന്ധികളെ തരണം ചെയ്യാന്‍ അവരെ പരിശീലിപ്പിക്കുന്നതാവണം വിശ്വാസപരിശീലനം എന്ന് അവര്‍ പറഞ്ഞു. വിശ്വാസപരിശീലനവര്‍ഷത്തിന്‍റെ 'ഈശോയിലാണെന്‍റെ പ്രത്യാശ' എന്ന ലോഗോയുടെ പ്രകാശനകര്‍മവും ജസ്റ്റീസ് നിർവഹിച്ചു. പ്രധാനാധ്യാപകരും ഫൊറോന പ്രമോട്ടേഴ്‌സും സെക്രട്ടറിമാരും വിവിധ മത്സരങ്ങളിലും പരീക്ഷകളിലും വിജയികളായ കുട്ടികളും അവരുടെ മാതാപിതാക്കളും സമ്മേളനത്തില്‍ പങ്കെടുത്തു. വിശ്വാസപരിശീലനകേന്ദ്രം സംഘടിപ്പിച്ച വിവിധ മത്സരങ്ങളില്‍ വിജയികളായവര്‍ക്കും അതിരൂപതാതല സ്‌കോളര്‍ഷിപ്പ് നേടിയവര്‍ക്കും അവാര്‍ഡുകള്‍ വിതരണം ചെയ്തു. അതിരൂപത ഡയറക്ടര്‍ ഫാ. പോള്‍ മോറേലി, അതിരൂപത പ്രമോട്ടര്‍മാരുടെ പ്രതിനിധി പോള്‍ മണവാളന്‍, അധ്യാപകരുടെയും മാതാപിതാക്കളുടെയും പ്രതിനിധി മെറീനാ തോമസ്, കുട്ടികളുടെ പ്രതിനിധിയും അതിരൂപത പ്രതിഭയുമായ സാന്ദ്രാ ജോബി, അസി. ഡയറക്ടര്‍ ഫാ. ആന്‍റണി നടുവത്തുശേരി എന്നിവര്‍ പ്രസംഗിച്ചു.

ലഹരിക്കെതിരെ എക്‌സൈസിന്‍റെ ഓട്ടൻതുള്ളലും ഫ്ലാഷ് മോബും

കൊച്ചി: എക്‌സൈസ് വകുപ്പിന്‍റെ ആഭിമുഖ്യത്തിൽ പാട്ടും ചുവടുകളുമായി എന്‍റെ കേരളം പ്രദര്‍ശന-വിപണന വേദിയില്‍ ലഹരിക്കെതിരെ ബോധവത്കരണം നടത്തി. സംസ്ഥാന സര്‍ക്കാറിന്‍റെ നാലാം വാര്‍ഷികാഘോഷത്തിന്‍റെ ഭാഗമായി മറൈന്‍ഡ്രൈവില്‍ നടക്കുന്ന 'എന്‍റെ കേരളം' പ്രദര്‍ശനത്തില്‍ എക്‌സൈസ് വകുപ്പ് വിമുക്തി ലഹരി വിരുദ്ധ കാമ്പയിനിന്‍റെ ഭാഗമായി നടത്തിയ ഓട്ടൻതുള്ളലും ഫ്‌ളാഷ്‌മോബും കാണികള്‍ ആവേശത്തോടെയാണ് ഏറ്റെടുത്തത്. ജീവിതമാണ് ലഹരി എന്ന പ്രമേയത്തില്‍ എക്‌സൈസ് വകുപ്പിലെ 17 ഉദ്യോഗസ്ഥര്‍ ചേര്‍ന്നാണ് ഫ്‌ളാഷ് മോബ് അവതരിപ്പിച്ചത്. പ്രിവന്‍റീവ് ഓഫീസറായ ജിനേഷ് കുമാറാണ് നൃത്താവിഷ്‌കാരം നടത്തിയത്. ലഹരി സമൂഹത്തില്‍ സൃഷ്ടിക്കുന്ന ആഘാതങ്ങളും ദൂഷ്യഫലങ്ങളും ചൂണ്ടിക്കാട്ടിയായിരുന്നു ഓട്ടന്‍തുള്ളല്‍. സമൂഹത്തിന്‍റെ ആരോഗ്യകരമായ മുന്നേറ്റത്തിനായി ലഹരിക്കെതിരെ പോരാടുക എന്ന ലക്ഷ്യത്തെ മുന്‍നിര്‍ത്തി അസിസ്റ്റന്‍റ് എക്‌സൈസ് ഓഫീസറായ വി. ജയരാജാണ് ഓട്ടന്‍തുള്ളല്‍ ചിട്ടപ്പെടുത്തി അവതരിപ്പിച്ചത്.

പഴകിയ ഹോട്ടൽ ഭക്ഷണം പിടിച്ചെടുത്തു

ആലുവ: മാർക്കറ്റ് മേഖലയിൽ ആലുവ നഗരസഭാ ആരോഗ്യ വിഭാഗം നടത്തിയ പരിശോധനയിൽ പഴകിയ ഹോട്ടൽ ഭക്ഷണം പിടികൂടി. മെട്രോ സ്റ്റേഷനു സമീപമായി അഞ്ചോളം ഹോട്ടലുകളിൽ പരിശോധന നടത്തിയെങ്കിലും ഗ്രിൽ അറേബ്യ എന്ന ഹോട്ടലിൽ നിന്നാണ് പഴകിയ ഭക്ഷണം ലഭിച്ചത്. ഹോട്ടലിന് നോട്ടീസ് നൽകിയതായി അധികൃതർ അറിയിച്ചു.

കളമശേരി നഗരസഭയിലെ ക്രമക്കേട്: എൽഡിഎഫ് പ്രക്ഷോഭത്തിലേക്ക്

കളമശേരി: കളമശേരി നഗരസഭയിലെ ക്രമക്കേടുകൾക്കും അഴിമതിക്കുമെതിരേ എൽഡിഎഫുമായി ചേർന്ന് പ്രക്ഷോഭമാരംഭിക്കുമെന്ന് സിപിഎം കളമശേരി ഏരിയ കമ്മിറ്റി വാർത്താ സമ്മേളനത്തിൽ അറിയിച്ചു. ബാങ്കിൽ നിക്ഷേപിച്ച 2.30 കോടി രൂപ കാണാതായ തിരിമറി പരിശോധിക്കുക, സ്ഥലവും വീടുമില്ലാത്ത 830 ഗുണഭോക്താക്കൾക്ക് വീട് ലഭ്യമാക്കാൻ നടപടി ആരംഭിക്കുക, മാലിന്യ സംസ്കരണത്തിന്‍റെ മറവിൽ നികുതിപ്പണം കൊള്ളയടിക്കുന്ന നടപടി അവസാനിപ്പിക്കുക തുടങ്ങിയ ആവശ്യങ്ങളുന്നയിച്ചാണ് പ്രക്ഷോഭം ആരംഭിക്കുന്നത്. എൽഡിഎഫിന്‍റെ നേതൃത്വത്തിൽ 29ന് നടക്കുന്ന നഗരസഭാ മാർച്ചോടെ പ്രക്ഷോഭ പരിപാടികൾ ആരംഭിക്കുമെന്ന് ഏരിയ സെക്രട്ടറി കെ.ബി. വർഗീസ് പറഞ്ഞു.

കെസിവൈഎം ഗ്രാമദർശൻ ക്യാമ്പ് സംഘടിപ്പിച്ചു

തോപ്പുംപടി: കെസിവൈഎം തോപ്പുംപടി യൂണിറ്റിന്‍റെ ആഭിമുഖ്യത്തിൽ ചെല്ലാനം ഗ്രാമപഞ്ചായത്തിലെ കുതിരക്കുർക്കരിയിൽ ഗ്രാമ ദർശൻ ക്യാമ്പ് സംഘടിപ്പിച്ചു. ഗ്രാമങ്ങളെ തിരിച്ചറിയുന്നതിനും പ്രദേശത്തെ വികസന സാധ്യതകൾ മനസിലാക്കുന്നതിനും വേണ്ടിയാണ് ക്യാമ്പ് സംഘടിപ്പിച്ചത്. തോപ്പുംപടി യൂണിറ്റ് അംഗങ്ങൾ ക്യാമ്പിന്‍റെ ഭാഗമായി കുതിരക്കൂർക്കരി ഗ്രാമം സന്ദർശിക്കുകയും അവിടത്തെ വിദ്യാർഥികൾക്ക് പഠനോപകരണങ്ങൾ വിതരണം ചെയ്യുകയും ചെയ്തു. കെസിവൈഎം രൂപത ഡയറക്ടർ ഫാ. മിൽട്ടസ് കൊല്ലശേരി ഉദ്ഘാടനം ചെയ്തു. പ്രസിഡന്‍റ് സയന ഫിലോമിന അധ്യക്ഷ വഹിച്ചു. കെസിവൈഎം യൂണിറ്റ് ഡയറക്ടർ ഫാ. എബിൻ സെബാസ്റ്റ്യൻ, ഫാ.സിബിൻ അഞ്ചുകണ്ടത്തിൽ, മുൻ ലാറ്റിൻ സംസ്ഥാന പ്രസിഡന്‍റ് കാസി പൂപ്പന, കൊച്ചി രൂപത പ്രസിഡന്‍റ് ഡാനിയ ആന്‍റണി, കൊച്ചി രൂപത എക്സിക്യൂട്ടീവ് അംഗം ബെയ്സിൽ റിച്ചാർഡ്, യൂണിറ്റ് ആനിമേറ്റർ സുമിത് ജോസഫ്, യൂണിറ്റ് സെക്രട്ടറി ആൻസൺ കെ. ലൈജു, ട്രഷർ കെ.ജെ. എൽവിസ്,ജോവിൻ ജോസഫ്,ആദർശ് ജോയ്, ജോസ് റാൽഫ് എന്നിവർ സംസാരിച്ചു.

കാരുണ്യ പ്രവര്‍ത്തനങ്ങളുടെ ഉദ്ഘാടനം

കൊച്ചി: കര്‍ഷക കോണ്‍ഗ്രസ് കൊച്ചി നിയോജക മണ്ഡലം കമ്മിറ്റിയുടെ നേതൃത്വത്തില്‍ വിവിധ കാരുണ്യ പ്രവര്‍ത്തനങ്ങളുടെ ഉദ്ഘാടനം കര്‍ഷക കോണ്‍ഗ്രസ് ജില്ലാ പ്രസിഡന്‍റ് കെ.ജെ. ജോസഫ് നിര്‍വഹിച്ചു. കൊച്ചി നിയോജക മണ്ഡലം പ്രസിഡന്‍റ് ജോസ്‌മോന്‍ ഇടപ്പറമ്പില്‍ അധ്യക്ഷത വഹിച്ചു. ഡിസിസി ജനറല്‍ സെക്രട്ടറി എം.പി. ശിവദത്തന്‍, കൊച്ചി നിയോജക മണ്ഡലം യുഡിഎഫ് ചെയര്‍മാന്‍ ജോണ്‍ പഴേരി, കുമ്പളങ്ങി പഞ്ചായത്ത് പ്രസിഡന്‍റ് സൂസന്‍ ജോസഫ്, കര്‍ഷക കോണ്‍ഗ്രസ് ജില്ലാ സെക്രട്ടറി ജെ. ജേക്കബ്, നിയോജക മണ്ഡലം ജനറല്‍ സെക്രട്ടറി ദിലീപ് ദിനേശന്‍, വൈസ് പ്രസിഡന്‍റ് കാര്‍ലോസ് ഡിറ്റോ തുടങ്ങിയവര്‍ പ്രസംഗിച്ചു.

റെയില്‍വേ വികസനം: കരാര്‍ റദ്ദാക്കിയത് സ്വാഗതാര്‍ഹമെന്ന് ഹൈബി ഈഡന്‍

കൊച്ചി: എറണാകുളം റെയില്‍വേ സ്റ്റേഷനുകളിലെ പുനര്‍വികസന പദ്ധതി നിര്‍വഹണത്തില്‍ പുരോഗതിയില്ലാത്തതിനാല്‍ കോല്‍ക്കത്തയിലെ ബ്രിഡ്ജ് ആന്‍ഡ് റൂഫ് ലിമിറ്റഡിന് നല്‍കിയിരുന്ന കരാര്‍ റദ്ദാക്കിയ നടപടി സ്വാഗതാര്‍ഹമെന്ന് ഹൈബി ഈഡന്‍ എംപി. ശേഷിക്കുന്ന ജോലികള്‍ സമയബന്ധിതമായി പൂര്‍ത്തീകരിക്കാന്‍ വേണ്ട നടപടികള്‍ ഉൻ കൈക്കൊള്ളണമെന്നും കേന്ദ്ര റെയില്‍വേ മന്ത്രാലയത്തിന് അയച്ച കത്തില്‍ ആവശ്യപ്പെട്ടു. രണ്ടു വര്‍ഷമായിട്ടും 30 ശതമാനം പോലും പ്രവൃത്തികൾ പൂര്‍ത്തീകരിക്കാന്‍ കഴിയാത്തത് കരാറുകാരകന്‍റെ കഴിവില്ലായ്മയെയാണ് സൂചിപ്പിക്കുന്നത്. മഴക്കാലം ആരംഭിക്കാനിരിക്കെ ട്രെയിന്‍ യാത്രികര്‍ക്ക് വരാനിടയുള്ള അസൗകര്യങ്ങള്‍ മുന്‍കൂട്ടിക്കണ്ട് ആവശ്യമായ നടപടികള്‍ സ്വീകരിക്കണമെന്നും ഹൈബി ഈഡന്‍ എംപി ആവശ്യപ്പെട്ടു. എറണാകുളം സൗത്തില്‍ റീ ടെണ്ടര്‍ വേണ്ടിവരുന്ന സ്ഥിതിയുണ്ടെന്നും കാലതാമസം കൂടാതെ പ്രവൃത്തികൾ പൂര്‍ത്തീകരിക്കാനുള്ള ശ്രമം തുടരുമെന്നും ജനറല്‍ മാനേജര്‍ പറഞ്ഞു.

‘വേണം കോതമംഗലത്തിന് കൂടുതൽ കോടതികൾ’

കോതമംഗലം : കോതമംഗലത്ത് കൂടുതൽ കോടതികൾ അനുവദിക്കണമെന്ന ആവശ്യം ശക്തം. നിലവിൽ മജിസ്ട്രേറ്റ് കോടതിയും മുൻസിഫ് മജിസ്ട്രേറ്റ് കോടതിയുമടക്കം രണ്ട് കോടതികളാണ് കോതമംഗലത്തുള്ളത്. ഇതിനു പുറമെ കുടുബ കോടതിയുടെ സിറ്റിംഗ് മാസത്തിൽ രണ്ടു ദിവസവും എംഎസിടി കോടതിയുടെ സിറ്റിംഗ് ആഴ്ചയിൽ ഒരു ദിവസവും നടത്തുന്നുണ്ട്. കുടുംബ കോടതിയും എംഎസിടി കോടതിയും കോതമംഗലത്ത് അനുവദിക്കണമെന്ന ആവശ്യം കോതമംഗലത്ത് കോടതികൾ ആരംഭിച്ചകാലം മുതലുള്ളതാണ്. മൂവാറ്റുപുഴയിലെ കുടുബ കോടതിയിലും എംഎസിടി കോടതിയിലുമാണ് കോതമംഗലത്തുനിന്നുള്ള കേസുകൾ ഇപ്പോൾ പരിഗണിക്കുന്നത്. ഇവിടെ ഏറിയപങ്കും കോതമംഗലത്തുകാരുമായി ബന്ധപ്പെട്ട കേസുകളാണ് ഇവിടെ പരിഗണിക്കുന്നതും. വിവിധ ജഡ്ജിമാർ ഇതിനോടനുകൂലമായി പ്രതികരിച്ചിട്ടുണ്ട്. എന്നാൽ ആവശ്യം നടപ്പാകുന്നില്ല. സർക്കാരിനുണ്ടാകുന്ന അധിക സാന്പത്തിക ബാധ്യതയാണ് പ്രധാന തടസമായി പറയുന്നത്. കോതമംഗലത്ത് ഏഴ് കോടതികൾക്ക് സാധ്യത മുഴുവൻ സമയ കുടുബ കോടതിയും എംഎസിടി കോടതിയുമാണ് കോതമംഗലത്തിന് ആവശ്യമുള്ള രണ്ട് പ്രധാന കോടതികൾ. ഇവക്ക് പുറമെ അഞ്ച് കോടതികൾക്കു കൂടി സാധ്യതയുണ്ടെന്നാണ് അഭിഭാഷകർ ചൂണ്ടിക്കാണിക്കുന്നത്. ഇപ്പോഴത്തെ മുൻസിഫ് - മജിസ്ട്രേറ്റ് കോടതി വിഭജിച്ച് രണ്ടു കോടതികളാക്കണമെന്നതാണ് ഒരു നിർദേശം. ഈ കോടതി ഇപ്പോൾ ആഴ്ചയിൽ മൂന്നു ദിവസം വീതമാണ് സിവിൽ കേസുകളും ക്രമിനൽ കേസുകളും കൈകാര്യം ചെയ്യുന്നത്. സിവിൽ കേസുകളുടെ ബാഹുല്യം കണക്കിലെടുത്ത് ഇവിടെ മുഴുവൻ സമയ മുൻസിഫ് കോടതിക്ക് അർഹതയുണ്ട്. എറണാകുളത്ത് ഇപ്പോൾ പ്രവർത്തിക്കുന്ന ഇടമലയാർ കോടതി കോതമംഗലത്തേക്ക് മാറ്റാമെന്നതാണ് മറ്റൊരു സാധ്യത. ഇടമലയാർ ഡാമുമായി ബന്ധപ്പെട്ട കേസുകൾ കൈകാര്യം ചെയ്യുന്നതിനായി സ്ഥാപിച്ച അഡിഷണൽ ജില്ലാ കോടതിയാണിത്. ഇത്തരം കേസുകൾ ഒന്നും ഇപ്പോഴില്ലാത്തതിനാൽ ആ കോടതി കോതമംഗലത്തേക്ക് മാറ്റുന്നതിൽ തടസങ്ങളില്ല. പട്ടിക വർഗ വിഭാഗവുമായി ബന്ധപ്പെട്ട കേസുകൾ കൈകാര്യം ചെയ്യുന്ന ജില്ലാ കോടതിയും എറണാകുളത്ത് പ്രവർത്തിക്കുന്നുണ്ട്. ജില്ലയിലെ പട്ടികവർഗക്കാർ ബഹുഭൂരിപക്ഷവും കോതമംഗലം താലൂക്കിൽ അധിവസിക്കുന്നവരായതിനാൽ ഇവരുടെ കേസുകൾ കൈകാര്യം ചെയ്യുന്ന കോടതി പ്രവർത്തിക്കാൻ അനുയോജ്യമായ സ്ഥലവും കോതമംഗലമാണ്. എല്ലാ കോടതി സെന്‍ററുകളിലും പോക്സോ കോടതി സ്ഥാപിക്കണമെന്നാണ് കേന്ദ്ര സർക്കാരിന്‍റെ നിർദേശം. ജില്ലയിലെ മറ്റിടങ്ങളിൽ പോക്സോ കോടതിയുടെ പ്രവർത്തനം ആരംഭിച്ചിട്ടുമുണ്ട്. ജില്ലാ കോടതി ആരംഭിക്കുന്നതോടെ ഒരു സബ് കോടതി കോതമംഗലത്ത് അനിവാര്യമാകും. കോതമംഗലം റവന്യു ടവർ അനുയോജ്യം ടൗണിലെ റവന്യു ടവർ കോതമംഗലത്ത് അധികമായി ലഭിക്കുന്ന കോടതികൾ പ്രവർത്തിക്കാൻ പറ്റിയ ഇടമാണ്. മുന്പ് സർക്കാർ ഓഫിസുകൾ പ്രവർത്തിച്ചിരുന്നു ഈ സമുച്ചയം ഇപ്പോൾ ശൂന്യമാണ്. ചില ക്രമീകരണങ്ങൾ വരുത്തിയാൽ കോടതികൾക്കും അനുബന്ധ ഓഫിസുകൾക്കുമുള്ള സൗകര്യം ഒരുക്കാനാകും. ഇവിടെ ചെറുകിട വ്യാപാര സ്ഥാപനങ്ങൾ പ്രവർത്തിക്കുന്നത് കോടതികളുടെ പ്രവർത്തനത്തിന് തടസമാകില്ല.

ചാലിക്കടവ് ജംഗ്ഷനിലെ ബസ് കാത്തിരിപ്പു കേന്ദ്രം അപകടാവസ്ഥയിൽ

മൂവാറ്റുപുഴ: ചാലിക്കടവ് ജംഗ്ഷനിലെ ബസ് കാത്തിരിപ്പു കേന്ദ്രം അപകടാവസ്ഥയിൽ. നഗരത്തിലെ പ്രധാനപ്പെട്ട ജംഗ്ഷനുകളിൽ ഒന്നാണ് ചാലിക്കടവ് ജംഗ്ഷൻ. രണ്ടു ദിവസം മുന്പ് വാഹനമിടിച്ചാണ് കാത്തിരിപ്പു കേന്ദ്രം തകർന്നത്. ഏതുനിമിഷവും നിലംപതിക്കാവുന്ന അവസ്ഥയിലാണ് ഇപ്പോൾ കാത്തിരിപ്പു കേന്ദ്രം. സ്വകാര്യ കന്പനിയാണ് കാത്തിരിപ്പു കേന്ദ്രം പൊതുജനങ്ങൾക്കായി നിർമിച്ചു നൽകിയത്. കാത്തിരിപ്പു കേന്ദ്രം നീക്കംചെയ്യുകയോ, അടിയന്തരമായി അറ്റകുറ്റപ്പണികൾ നടത്തുകയോ ചെയ്യുകയോ വേണമെന്നാണ് ആവശ്യം. ഒടിഞ്ഞുതൂങ്ങിയ ഇരുന്പ് കഷണം വലിയ അപകടം വരുത്തിവയ്ക്കും.

നെൽപ്പാടത്തിനു സമീപത്തെ കുളത്തിൽ മാലിന്യം തള്ളി

കല്ലൂർക്കാട്: നെൽപ്പാടത്തിനു സമീപത്തെ കുളത്തിൽ വൻ തോതിൽ മാലിന്യം തള്ളിയ നിലയിൽ. കല്ലൂർക്കാട് പഞ്ചായത്തിൽ എട്ടാം വാർഡ് ഉൾപ്പെടുന്ന നാകപ്പുഴ സെന്‍റ് മേരീസ് പള്ളിക്കും സ്കൂളിനും സമീപത്തെ നെൽപ്പാടത്തോടു ചേർന്ന കുളത്തിലാണ് മാലിന്യം കണ്ടത്. പ്ലാസ്റ്റിക് കൂടുകളിലും ചാക്കുകളിലുമായാണ് മാലിന്യം ഉപേക്ഷിച്ചിരിക്കുന്നത്. കാടുമൂടിക്കിടന്ന കുളത്തിൽ മഴയിൽ വെള്ളം ഉയർന്നപ്പോൾ അതോടൊപ്പം മാലിന്യംവും പൊങ്ങിവരികയായിരുന്നു. മഴ ശക്തിയാർജിക്കുന്പോൾ ഇത് പാടത്തേക്കും മറ്റു കുടിവെള്ള സ്രോതസുകളിലേക്കും എത്തിച്ചേരാൻ സാധ്യതയുണ്ട്. മാലിന്യം അടിയന്തരമായി നീക്കം ചെയ്യണമെന്ന് പ്രദേശവാസികൾ ആവശ്യപ്പെട്ടു.

ഉപയോഗശൂന്യമായ കുഴൽക്കിണർ നവീകരിച്ചു

കുത്താട്ടുകുളം: സാമൂഹിക ആരോഗ്യ കേന്ദ്രത്തിലെ ശുദ്ധ ജലക്ഷാമത്തിന് പരിഹാരമായി. സാമൂഹിക ആരോഗ്യ കേന്ദ്രത്തിലെ വർഷങ്ങളായി ഉപയോഗശൂന്യമായി കിടന്ന കുഴൽക്കിണർ, നഗരസഭ നാലുലക്ഷം മുടക്കി നവീകരിച്ചാണ് ജലക്ഷാമത്തിന് പരിഹാരം കണ്ടത്. മണിക്കൂറിൽ 3000 ലിറ്റർ വെള്ളം ലഭിക്കും. ഇതോടെ ഇപ്പോൾ മാസം തോറും ജല അഥോറിറ്റിയിൽ അടയ്ക്കുന്ന 25000 രൂപ നഗരസഭയ്ക്ക് ഇതുവഴി ലാഭിക്കാം. പദ്ധതിയുടെ ഉദ്ഘാടനം നഗരസഭാധ്യക്ഷ വിജയ ശിവൻ നിർവഹിച്ചു. ഉപാധ്യക്ഷൻ സണ്ണി കുര്യാക്കോസ് അധ്യക്ഷത വഹിച്ചു. നഗരസഭാംഗങ്ങളായ ഷിബി ബേബി, സുമ വിശ്വംഭരൻ, ജിജി ഷാനവാസ്, എം.എം അശോകൻ, ഡോ. ജോജോ ജോണ്‍ തുടങ്ങിയവർ പ്രസംഗിച്ചു.

ജനറൽ ആശുപത്രിയിലേക്ക് ഡയാലിസിസ് മെഷീൻ

മൂവാറ്റുപുഴ: ജനറൽ ആശുപത്രിയിൽ പ്രവർത്തിക്കുന്ന ഡയാലിസിസ് സെന്‍ററിലേക്ക് പുതിയ ഡയാലിസിസ് മെഷീൻ നൽകി. മൂവാറ്റുപുഴ ആസ്ഥാനമായി പ്രവർത്തിക്കുന്ന മടേയ്ക്കൽ ചെറിയാൻ ചാരിറ്റബിൾ ട്രസ്റ്റാണ് മെഷീൻ നൽകിയത്. ആശുപത്രിയിൽ നടന്ന ചടങ്ങിൽ കേരള ബാങ്ക് പ്രസിഡന്‍റ് ഗോപി കോട്ടമുറിക്കൽ ഡയാലിസിസ് മെഷീൻ ആശുപത്രി അധികൃതർക്ക് കൈമാറി. 7,60,000 രൂപ വിലവരുന്ന ജർമൻ ടെക്നോളജിയിലുള്ള മെഷീനാണ് നൽകിയത്. അഞ്ചുവർഷത്തെ ഗ്യാരണ്ടിയും ഇതോടൊപ്പം കന്പനി ഉറപ്പു നൽകുന്നു. ചടങ്ങിൽ നഗരസഭ സ്ഥിരംസമിതി അധ്യക്ഷൻ പി.എം അബ്ദുൽസലാം അധ്യക്ഷത വഹിച്ചു. ആശുപത്രി സൂപ്രണ്ട് ഡോ. അനിത ബാബു, നഗരസഭാംഗങ്ങളായ ജിനു മടേയ്ക്കൽ, ജോസ് കുര്യാക്കോസ്, എച്ച്എംസി അംഗം കെ.എ നവാസ്, റെഡ്ക്രോസ് ചെയർമാൻ ജോർജ് എബ്രഹാം, മടേക്കൽ ചെറിയാൻ ചാരിറ്റബിൾ ട്രസ്റ്റ് മാനേജിംഗ് ഡയറക്ടർ സാബു ചെറിയാൻ മടേയ്ക്കൽ, ആർഎംഒ ഡോ. രാഹുൽ പീറ്റർ തുടങ്ങിയവർ പ്രസംഗിച്ചു.

സിഡിഎസ് കുടുംബശ്രീ ദിനാഘോഷം

തിരുമാറാടി: പഞ്ചായത്തിൽ നടന്ന സിഡിഎസ് കുടുംബശ്രീ ദിനാഘോഷം സ്ഥിരം സമിതി അധ്യക്ഷൻ സാജു ജോണ്‍ ഉദ്ഘാടനം ചെയ്തു. കുടുംബശ്രീ ചെയർപേഴ്സണ്‍ തങ്കമ്മ ശശി അധ്യക്ഷത വഹിച്ചു. സ്ഥിരം സമിതി അധ്യക്ഷ രമാ മുരളീധര കൈമൾ, പഞ്ചായത്തംഗം ആലീസ് ബിനു, പഞ്ചായത്ത് സെക്രട്ടറി പി.പി റെജിമോൻ, ബ്ലോക്ക് പഞ്ചായത്തംഗം ലളിതാ വിജയൻ, അസിസ്റ്റന്‍റ് സെക്രട്ടറി എസ്. സാബു രാജ്, സിഡിഎസ് വൈസ് ചെയർപേഴ്സണ്‍ ആശാ രാജു, ബ്ലോക്ക് കോഡിനേറ്റർ നീതു സൂരജ്, ട്രഷറർ രേഖ ദിലീപ്, കുടുംബശ്രീ അംഗങ്ങൾ, ബാലസഭ കുട്ടികൾ എന്നിവർ പങ്കെടുത്തു. ചടങ്ങിൽ എസ്എസ്എൽസിക്ക് മികച്ച വിജയം നേടിയ കുടുംബശ്രീ അംഗങ്ങളുടെ കുട്ടികൾക്ക് മെമന്‍റോ നൽകി.

ഡോ. ബോബിന്‌ ജോർജ് ജനറൽ സെക്രട്ടറി

വാഴക്കുളം : കുവൈറ്റിലെ സീറോ മലബാർ ആത്മീയ സംഘടനയായ സീറോ മലബാർ കൾച്ചറൽ അസോസിയേറ്റ് ജനറൽ സെക്രട്ടറിയായി ഡോ. ബോബിൻ ജോർജിനെ തെരഞ്ഞെടുത്തു. മൂവായിരത്തോളം അംഗങ്ങളുള്ള സംഘടനയുടെ 30-ാമത് ഭരണസമിതിയാണ് ചുമതലയേറ്റത്. എറണാകുളം ജില്ലയിലെ കല്ലൂർക്കാട് പരേതനായ എടപ്പാട്ടു വർക്കിയുടെ മകനാണ് ഡോ. ബോബിൻ. കുവൈറ്റിലെ അൽ ധനഹ് അമേരിക്കൻ സ്കൂളിലെ അധ്യാപകനാണ്. കത്തോലിക്ക കോണ്‍ഗ്രസ് ഗ്ലോബൽ വൈസ് പ്രസിഡന്‍റായിരുന്ന ഡോ. ബോബിൻ കേരള സർക്കാരിന്‍റെ മലയാളം മിഷൻ കുവൈറ്റ് ചാപ്റ്റർ വൈസ് പ്രസിഡന്‍റ്, കുവൈറ്റ് കൗണ്‍സിൽ ഫോർ സ്പെഷ്യൽ നീഡ്സ് ടീച്ചേഴ്സ് ഫോറം സെക്രട്ടറി എന്നീ നിലകളിലും പ്രവർത്തിച്ചു വരുന്നു.

സ്പോർട്സ് സന്ദേശയാത്രയ്ക്ക് നഗരസഭാതല സംഘാടകസമിതിയായി

കോതമംഗലം : കായിക വകുപ്പ് സംഘടിപ്പിക്കുന്ന കിക്ക് ഡ്രഗ്സ് സെ യെസ് ടു സ്പോർട്സ് സന്ദേശയാത്രയുടെ വിജയത്തിനായി നഗരസഭാതല സംഘാടക സമിതി രൂപീകരിച്ചു. ലഹരി വിരുദ്ധ കാന്പയിന്‍റെ ഭാഗമായി സംസ്ഥാന കായിക വകുപ്പ് കാസർഗോഡ് നിന്നും തിരുവനന്തപുരം വരെ നടത്തുന്ന ലഹരി വിരുദ്ധ സന്ദേശ യാത്രയുടെ ഭാഗമായി കായികതാരങ്ങൾ, യുവജനങ്ങൾ, വിദ്യാർഥികൾ, സന്നദ്ധ പ്രവർത്തകർ, റസിഡൻസ് അസോസിയേഷൻ അംഗങ്ങൾ, ക്ലബുകൾ, വ്യാപാരികൾ, തുടങ്ങിയ സമൂഹത്തിന്‍റെ എല്ലാ മേഖലയിൽ നിന്നുമുള്ളവർ പങ്കെടുക്കുന്ന മെഗാ മാരത്തോണ്‍ സന്ദേശ യാത്രയുടെ ഭാഗമായി ഒരുക്കിയിട്ടുണ്ട്. മന്ത്രി വി. അബ്ദുറഹിമാൻ നേതൃത്വം നൽകുന്ന വാക്കത്തോണും, സൈക്ലത്തോണും ലഹരി വിരുദ്ധ സന്ദേശ കാന്പയിനും, കായിക താരങ്ങളുമായി അഭിമുഖവും, തുടർന്ന് പുതിയ കളിയിടങ്ങൾ കണ്ടെത്തുകയും കായിക ക്ലബുകൾക്ക് ആവശ്യമായ സ്പോർട്സ് കിറ്റുകൾ വിതരണം ചെയ്യാനുള്ള പദ്ധതിയും ഇതോടൊപ്പം തയാറാക്കിയിട്ടുണ്ട്. 23ന് സംഘടിപ്പിക്കുന്ന ലഹരി വിരുദ്ധ സന്ദേശ യാത്ര നടത്തും. നഗരസഭാതല സംഘാടകസമിതി യോഗം ആന്‍റണി ജോണ്‍ എംഎൽഎ ഉദ്ഘാടനം ചെയ്തു. നഗരസഭ സ്ഥിരംസമിതി അധ്യക്ഷൻ കെ.എ നൗഷാദ് അധ്യക്ഷത വഹിച്ചു. നഗരസഭാധ്യക്ഷൻ ടോമി അബ്രഹാം, വൈസ് ചെയർപേഴ്സണ്‍ സിന്ധു ഗണേശൻ, സ്ഥിരം സമിതി അധ്യക്ഷൻ കെ.വി തോമസ്, നഗരസഭാംഗങ്ങളായ പി.ആർ ഉണ്ണികൃഷ്ണൻ, രമ്യ വിനോദ്, ജില്ലാ സ്പോർട്സ് കൗണ്‍സിൽ പ്രതിനിധികളായ പി.ഐ ബാബു, ജോയി പോൾ, പോലീസ്, എക്സൈസ്, വിവിധ സ്കൂൾ അധ്യാപകർ, വ്യാപാരി പ്രതിനിധികൾ, ഹോട്ടൽ ആന്‍റ് റസ്റ്റോറന്‍റ് അസോസിയേഷൻ ഭാരവാഹികൾ, റസിഡൻസ് അസോസിയേഷൻ ഭാരവാഹികൾ, കുടുംബശ്രീ ചെയർപേഴ്സണ്‍, ഹരിത കർമ സേനാംഗങ്ങൾ, ആരോഗ്യ പ്രവർത്തകർ, യൂത്ത് കോ-ഓഡിനേറ്റർ എന്നിവർ പങ്കെടുത്തു.

ആലുവ കോടതി വാടകക്കെട്ടിടത്തിൽ പ്രവർത്തനം ആരംഭിച്ചു

ആലുവ: പുതിയ കോടതി കെട്ടിടം നിർമിക്കുന്നതിന് മുന്നോടിയായി ആലുവ മുൻസിഫ് - മജിസ്ട്രേറ്റ് കോടതികൾ വാടക കെട്ടിടത്തിലേക്ക് മാറി. പ്രവർത്തനോദ്ഘാടനം എറണാകുളം ജില്ലാ ആൻഡ് സെഷൻസ് ജഡ്ജ് ഹണി എം. വർഗീസ് നിർവഹിച്ചു. അൻവർ സാദത്ത് എംഎൽഎ, മജിസ്ട്രേറ്റുമാർ, അഭിഭാഷകർ തുടങ്ങിയവർ ലളിതമായ ചടങ്ങിൽ പങ്കെടുത്തു. ബിഎസ്എൻഎൽ കെട്ടിടത്തിന്‍റെ താഴത്തെ നിലയിൽ രണ്ടു മജിസ്ട്രേറ്റ് കോടതികളും ഒന്നാം നിലയിൽ മുൻസിഫ് കോടതിയും പ്രവർത്തിക്കും. നിലവിലെ കോടതി കെട്ടിടം ജൂൺ ഒന്നിന് പൊളിക്കും.

മൊബൈൽ വെറ്ററിനറി യൂണിറ്റ് അനുവദിച്ചു

മൂവാറ്റുപുഴ: ക്ഷീര കർഷകർക്ക് ആശ്വാസവുമായി വീട്ടുപടിക്കൽ സേവനമെത്തുന്ന മൊബൈൽ വെറ്ററിനറി യൂണിറ്റ് മൂവാറ്റുപുഴയ്ക്ക് അനുവദിച്ചതായി മാത്യു കുഴൽനാടൻ എംഎൽഎ. സംസ്ഥാനത്ത് ആദ്യഘട്ടത്തിൽ പ്രഖ്യാപിച്ച സഞ്ചരിക്കുന്ന യൂണിറ്റുകളിൽ ഒന്നാണ് മൂവാറ്റുപുഴയ്ക്ക് ലഭിച്ചത്. ക്ഷീരഗ്രാമം പദ്ധതിയുടെ ഭാഗമായി നടത്തിയ സംവാദത്തിൽ കർഷകർ ഉന്നയിച്ച ആവശ്യങ്ങളെ തുടർന്ന് എംഎൽഎ മന്ത്രിയുമായി നടത്തിയ ചർച്ചയിലാണ് മൊബൈൽ വെറ്ററിനറി ക്ലിനിക്കിന്‍റെ സഞ്ചരിക്കുന്ന ആംബുലൻസ് അടക്കമുള്ള യൂണിറ്റ് മൂവാറ്റുപുഴയ്ക്കും അനുവദിച്ചത്. വലിയ മൃഗങ്ങൾ തളർന്നുവീഴുകയോ എഴുന്നേൽക്കാൻ കഴിയാത്തവിധം കിടപ്പിലാവുകയോ ചെയ്താൽ അവയ്ക്ക് യഥാസമയം വിദഗ്ധ ചികിത്സ ലഭ്യമാക്കുന്നതിനുള്ള ടെലി വെറ്ററിനറി പദ്ധതിയും ഇതോടൊപ്പമുണ്ട്. പദ്ധതി യാഥാർഥ്യമാകുന്നത്തോടെ അടിയന്തര സാഹചര്യങ്ങളിൽ രോഗനിർണയത്തിനും ചികിത്സയ്ക്കും സജ്ജമാക്കിയ സഞ്ചരിക്കുന്ന മൃഗാശുപത്രികളായ ആംബുലേറ്ററി ക്ലിനിക്കുകൾ കർഷകരുടെ വീട്ടുപടിക്കൽ ഓടിയെത്തും. മൊബൈൽ ക്ലിനിക്കിൽ വെറ്റിനറി ഡോക്ടർ, ഡ്രൈവർ / അറ്റൻഡർ എന്നിവർ ഉണ്ടാകും. ടോൾഫ്രീ നന്പറിൽ നിന്നുള്ള കർഷകരുടെ കോളുകൾ കൈകാര്യം ചെയ്യുന്നതിനുള്ള സൗകര്യം, ബീജദാനത്തിനുള്ള സൗകര്യം എന്നിവ സജ്ജികരിച്ച വാഹനമാണ് മൊബൈൽ യൂണിറ്റിൽ ഉണ്ടാവുകയെന്ന് എംഎൽഎ അറിയിച്ചു.

കേരള കോൺഗ്രസ്-എമ്മിൽ ചേർന്നു

മൂവാറ്റുപുഴ: കേരള കോണ്‍ഗ്രസ് ജേക്കബ് വിഭാഗം നേതാവും ആയവന പഞ്ചായത്ത് മുൻ വൈസ് പ്രസിഡന്‍റുമായിരുന്ന ഷാജി നിരോലിക്കലും സഹപ്രവർത്തകരും കേരള കോണ്‍ഗ്രസ്-എമ്മിൽ ചേർന്നു. പാർട്ടി ജില്ലാ പ്രസിഡന്‍റ് ടോമി ജോസഫ് അംഗത്വം നൽകി. മണ്ഡലം പ്രസിഡന്‍റ് ബേബി കാക്കനാട്ട് അധ്യക്ഷത വഹിച്ചു. നേതാക്കളായ ജോയി നടുക്കുടി, ടി.എ ഡേവിസ്, പി.കെ ജോണ്‍, ഷൈൻ ജേക്കബ്, ജോസി പി. തോമസ്, സിജോ ജോണ്‍, പി.എം ജോണ്‍, തോമസ് പിണക്കാട്ട്, ഷാജി നിരോലിക്കൽ, കാസിം, ബഷീർ എന്നിവർ പ്രസംഗിച്ചു.

ശതാബ്ദി ആഘോഷ സമാപനവും പൂർവവിദ്യാർഥി സംഗമവും

കോതമംഗലം: കോട്ടപ്പടി കൽക്കുന്നേൽ മാർ ഗീവർഗീസ് സഹദാ യാക്കോബായ പള്ളിയുടെ കീഴിൽ പ്രവർത്തിക്കുന്ന മാർ ഏലിയാസ് സണ്‍ഡേ സ്കൂൾ ശതാബ്ദി ആഘോഷങ്ങളുടെ സമാപനവും പൂർവ വിദ്യാർഥി സംഗമവും നടത്തി. ആലുവ തൃക്കുന്നത്ത് സെമിനാരിക്കു മുന്നിൽ നിന്ന് ആരംഭിച്ച ദീപശിഖാ പ്രയാണവും പതാക ഘോഷയാത്രയും വാഹന റാലിയുടെയും വാദ്യമേളങ്ങളുടേയും അകന്പടിയിൽ പള്ളിയിൽ എത്തിച്ചേർന്നപ്പോൾ ഇടവകജനങ്ങളും സണ്‍ഡേ സ്കൂൾ വിദ്യാർഥികളും ചേർന്ന് സ്വീകരിച്ചു. പൊതുസമ്മേളനം കുര്യാക്കോസ് മാർ യൗസേബിയോസ് മെത്രാപ്പോലീത്ത ഉദ്ഘാടനം ചെയ്തു. ഏലിയാസ് മാർ യൂലിയോസ് മെത്രാപ്പോലീത്ത അധ്യക്ഷത വഹിച്ചു. ഡീൻ കുര്യാക്കോസ് എംപി ജൂബിലി സ്മരണിക പ്രകാശനം ചെയ്തു. ആന്‍റണി ജോണ്‍ എംഎൽഎ ഡയാലിസിസ് ഫണ്ട് ഉദ്ഘാടനം നടത്തി. നിർധന അധ്യാപക പെൻഷൻ പദ്ധതി സഭ സെക്രട്ടറി ജേക്കബ് സി. മാത്യു ഉദ്ഘാടനം ചെയ്തു. കോട്ടപ്പടി പഞ്ചായത്ത് പ്രസിഡന്‍റ് മിനി ഗോപി വ്യക്ഷത്തൈ നട്ടു. ജൂബിലി കാൻസർ കെയർ ഏലിയാസ് മാർ യൂലിയോസ് മെത്രാപ്പോലീത്ത ഉദ്ഘാടനം ചെയ്തു. വികാരി ഫാ. ജോസ് പരത്തുവയലിൽ, സഹവികാരി ഫാ. ബെൻ സ്റ്റീഫൻ മാത്യു എന്നിവർ പങ്കെടുത്തു.

ഐഎസ്ഒ സർട്ടിഫിക്കറ്റ് വിതരണം ഇന്ന്

കോതമംഗലം: റൂറൽ ജില്ലയിലെ പെരുന്പാവൂർ സബ് ഡിവിഷൻ ഓഫീസിനും കോട്ടപ്പടി പോലീസ് സ്റ്റേഷനും ഐഎസ്ഒ സർട്ടിഫിക്കറ്റ്. കുറ്റകൃത്യങ്ങൾ തടയൽ, കുറ്റവാളികളെ കണ്ടെത്തൽ, ക്രമസമാധാന പാലനം, പൊതുജന സൗഹൃദം, ആധുനികവത്കരണം, ഭൗതിക സാഹചര്യങ്ങൾ, പാരിസ്ഥിതിക സംരക്ഷണം തുടങ്ങിയവയിലെ മികവ് അടിസ്ഥാനമാക്കിയാണ് സർട്ടിഫിക്കറ്റ് നൽകുന്നത്. സർട്ടിഫിക്കറ്റ് വിതരണച്ചടങ്ങ് ഇന്ന് വൈകുന്നേരം നാലിന് കോട്ടപ്പടി പോലീസ് സ്റ്റേഷനിൽ റേഞ്ച് ഡിഐജി ഡോ. എസ്. സതീഷ് ബിനോ ഉദ്ഘാടനം ചെയ്യും. ജില്ലാ പോലീസ് മേധാവി എം. ഹേമലത മുഖ്യ പ്രഭാഷണം നടത്തും. ഐഎസ്ഒ പ്രതിനിധി എൻ. ശ്രീകുമാർ സർട്ടിഫിക്കറ്റ് നൽകും. പെരുന്പാവൂർ എഎസ്പി ശക്തി സിംഗ് ആര്യ അധ്യക്ഷത വഹിക്കും.

ഇലക്ട്രിക് സ്കൂട്ടർ ഇടിച്ച് സൈക്കിൾ യാത്രികൻ മരിച്ചു

പള്ളുരുത്തി: അമിതവേഗത്തിൽ എത്തിയ ഇലക്ട്രിക് സ്കൂട്ടർ ഇടിച്ച് സൈക്കിൾ യാത്രികൻ മരിച്ചു. ഇടക്കൊച്ചി ചെറുകാട്ടുപറന്പിൽ ജൂഡ്സൻ ഗോണ്‍സാൽവസ് (57) ആണ് മരിച്ചത്. ശനിയാഴ്ച രാത്രി ഒന്പതോടെ ഇടക്കൊച്ചി ശ്രീകൃഷ്ണസ്വാമി ക്ഷേത്രത്തിനു സമീപമാണ് അപകടം. ഇടിയുടെ ആഘാതത്തിൽ സൈക്കിളിൽനിന്ന് തെറിച്ചു വീണ ജൂഡ്സനെ നാട്ടുകാർ ചേർന്നാണ് ആശുപത്രയിൽ എത്തിച്ചത്. ചികിത്സയിലിരിക്കെ ഇന്നലെ ഉച്ചയോടെയായിരുന്നു മരണം. സംസ്കാരം ഇന്നു മൂന്നിന് ഇടക്കൊച്ചി സെന്‍റ് മേരീസ് പള്ളിയിൽ. ഭാര്യ: ജെസി. മക്കൾ: ഫെബിൻ, ഫിയോണ.

വീടിന് തീയിട്ട് ഗൃഹനാഥൻ തൂങ്ങി മരിച്ചനിലയിൽ

തൃപ്പൂണിത്തുറ: വീടിന് തീയിട്ട് ഗൃഹനാഥൻ തൂങ്ങിമരിച്ച നിലയിൽ. മകന് ചെറിയ പൊള്ളലേറ്റു. എരൂർ പെരീക്കാട് ചക്കാലപ്പറന്പിൽ പ്രകാശൻ (വാവൻ-59) ആണ് മരിച്ചത്. ഇന്നലെ പുലർച്ചെ 5.30 ഓടെ ഇയാൾ താമസിച്ചിരുന്ന വാടക വീടിന്‍റെ കിടപ്പുമുറിയിലും കിടക്കയിലും പെട്രോളൊഴിച്ച് തീയിടുകയായിരുന്നു. വീടിനകത്ത് ഉറങ്ങുകയായിരുന്ന വിദ്യാർഥിയായ മകൻ കിരണ്‍ തീ പടരുന്നതു കണ്ട് വീട്ടിൽനിന്നും ഇറങ്ങി ഓടുകയായിരുന്നു. തീയിട്ട ശേഷം പ്രകാശൻ വർക്ക് ഏരിയയിൽ, ഉടുത്തിരുന്ന മുണ്ടിൽ തൂങ്ങുകയായിരുന്നു. തീപിടിച്ച വീടിനോട് ചേർന്നുള്ള മറ്റിടങ്ങളിലേക്ക് തീ പടരാതെ കെടുത്തിയതിനാൽ വൻ അപകടം ഒഴിവായി. ഇയാളുടെ ഭാര്യ രാജേശ്വരി വഴക്കിനെ തുടർന്ന് വീട്ടിൽനിന്നും മാറിയാണ് താമസിക്കുന്നത്. ചെറിയ പൊള്ളലേറ്റ കിരണ്‍ (16) ആശുപത്രിയിൽ ചികിത്സ തേടി. മൃതദേഹം പോസ്റ്റ്മോർട്ടത്തിനു ശേഷം സംസ്കരിച്ചു.

പുതുമയും വ്യത്യസ്തതയും വിളിച്ചോതി,, എന്‍റെ കേരളം പ്രദര്‍ശന വിപണന മേള

കൊച്ചി: കൗതുകമായി റോബോ ടോയ് ഡോഗ് ബെന്‍, ആഘോഷമാക്കാന്‍ 360 സെല്‍ഫി, സാഹസപ്രിയര്‍ക്കായി ബര്‍മ പാലം, സിനിമാ പ്രേമികള്‍ക്കായി തിയറ്റര്‍... സര്‍ക്കാരിന്‍റെ നാലാം വാര്‍ഷികാഘോഷമായ എന്‍റെ കേരളം പ്രദര്‍ശന വിപണനമേള വ്യത്യസ്തകള്‍ കൊണ്ട് ആകര്‍ഷകമായി. മേളയുടെ രണ്ടാം ദിവസമായ ഇന്നലെ സാമൂഹ്യനീതി വകുപ്പിന്‍റെ നേതൃത്വത്തില്‍ സംഘടിപ്പിച്ച വയോജനങ്ങളുടെ കലാപ്രകടനം ആസ്വാദകരുടെ മനം കവര്‍ന്നു. 276 സ്റ്റാളുകളാണ് എന്‍റെ കേരളം പ്രദര്‍ശനത്തിലുള്ളത്. പൊക്കാളിപ്പാടവും കാര്‍ഷിക വിഭവങ്ങളുമായി കൃഷിവകുപ്പും കുന്നും മലയും തനതായി ഒരുക്കി വെര്‍ച്വല്‍ റിയാലിറ്റിയിലൂടെ തിരമാലയുടെ അനുഭവം പകര്‍ന്ന് ടൂറിസം വകുപ്പുമൊക്കെ മേളയെ ശ്രദ്ധേയമാക്കി. ഭക്ഷ്യവസ്തുക്കള്‍ മുതല്‍ കരകൗശല വസ്തുക്കള്‍ വരെയുള്ള ഗുണമേന്മയുള്ള വിവിധ ഉത്പന്നങ്ങള്‍ ഒരുക്കി വിപണന സ്റ്റാളുകളും മേളയില്‍ സജീവം. കൈത്തറിയും ആലങ്ങാട് ശര്‍ക്കര, തുടങ്ങിയ തനത് വിഭവങ്ങളും സ്റ്റാളുകളില്‍ ലഭിക്കും. ന്യായ വിലയില്‍ സാധനങ്ങള്‍ വാങ്ങാന്‍ കണ്‍സ്യൂമര്‍ ഫെഡിന്‍റെയും സപ്ലൈക്കോയുടെയും സ്റ്റാളുകള്‍ സജ്ജം. കളിയിലൂടെ ലഹരിക്കെതിരെ ബോധവത്കരണം ഉറപ്പാക്കുകയാണ് എക്‌സൈസിന്‍റെ വിമുക്തി. രുചി വൈവിധ്യങ്ങള്‍ ഒരു കുടക്കീഴില്‍ ഒരുക്കി ഭക്ഷണ പ്രേമികള്‍ക്ക് സ്വാദനുഭവം പകരുകയാണ് കുടുംബശ്രീയുടെ നേതൃത്വത്തിലുള്ള ഭക്ഷ്യമേള. രാത്രികളെ സംഗീതസാന്ദ്രമാക്കി പ്രശസ്തമായ ബാന്റുകളുടെ നേതൃത്വത്തില്‍ നടക്കുന്ന സംഗീത നിശയിലും വന്‍ ജനക്കൂട്ടമാണ് നിറയുന്നത്. 23 വരെയാണ് മേള.

പരിഗണന നോക്കി പാർട്ടികൾക്ക് പിന്തുണ; കരുത്തറിയിച്ച് ലത്തീന്‍ സമുദായ സംഗമം

കൊച്ചി: ലത്തീന്‍ വോട്ട് ബാങ്ക് ഒരു രാഷ്ട്രീയപാര്‍ട്ടിയുടെയും കുത്തകയല്ലെന്നും സമുദായംഗങ്ങളെ പരിഗണിക്കുന്ന പാര്‍ട്ടികളെ മാത്രമേ തെരഞ്ഞെടുപ്പുകളില്‍ പിന്തുണയ്ക്കൂവെന്നും പ്രഖ്യാപിച്ച് ലത്തീന്‍ സമുദായ സംഗമം. എറണാകുളം കച്ചേരിപ്പടി സെന്‍റ് ആന്‍റണീസ് സ്‌കൂള്‍ ഗ്രൗണ്ടില്‍ കെഎല്‍സിഎ വരാപ്പുഴ അതിരൂപത സംഘടിപ്പിച്ച സമുദായസംഗമം മന്ത്രി പി. രാജീവ് ഉദ്ഘാടനം ചെയ്തു. വരാപ്പുഴ അതിരൂപത സഹായ മെത്രാന്‍ ബിഷപ് ഡോ.ആന്‍റണി വാലുങ്കല്‍ അനുഗ്രഹ പ്രഭാഷണം നടത്തി. അതിരൂപത പ്രസിഡന്‍റ് സി.ജെ. പോള്‍ അധ്യക്ഷത വഹിച്ച ചടങ്ങില്‍ ഐ ഫൗണ്ടേഷനുമായി സഹകരിച്ച് കെഎല്‍സിഎ നടപ്പിലാക്കുന്ന നേത്ര ചികിത്സാ പ്രിവിലേജ് കാര്‍ഡിന്‍റെ വിതരണോദ്ഘാടനം മന്ത്രി നിര്‍വഹിച്ചു. കെഎല്‍സിഎ മുഖപത്രം സത്യനാദം പ്രത്യേക പതിപ്പ് ബിഷപ് ഡോ. വാലുങ്കല്‍ കിന്‍ഫ്ര ചെയര്‍മാന്‍ സാബു ജോര്‍ജിന് നല്‍കി പ്രകാശനം ചെയ്തു. കെഎല്‍സിഎ സംസ്ഥാന പ്രസിഡന്‍റ് അഡ്വ. ഷെറി ജെ. തോമസ്, അതിരൂപത വികാരി ജനറല്‍ മോണ്‍. മാത്യു ഇലഞ്ഞിമിറ്റം, ഹൈബി ഈഡന്‍ എംപി, ടി.ജെ. വിനോദ് എംഎല്‍എ, ഡിസിസി പ്രസിഡന്‍റ് മുഹമ്മദ് ഷിയാസ്, ബിജെപി ടൗണ്‍ ജില്ലാ പ്രസിഡന്‍റ് കെ.എസ്. ഷൈജു, കെസിഎഫ് ജനറല്‍ സെക്രട്ടറി വി.സി. ജോര്‍ജുകുട്ടി, അല്‍മായ കമ്മീഷന്‍ അസോ. ഡയറക്ടര്‍ ഷാജി ജോര്‍ജ്, കെഎല്‍സിഎ സംസ്ഥാന ജനറല്‍ സെക്രട്ടറി ബിജു ജോസി, ബിസിസി ഡയറക്ടര്‍ ഫാ.യേശുദാസ് പഴമ്പിള്ളി, കെഎല്‍സിഎ ഡയറക്ടര്‍ ഫാ.മാര്‍ട്ടിന്‍ തൈപ്പറമ്പില്‍ തുടങ്ങിയവര്‍ പ്രസംഗിച്ചു. എറണാകുളം ജില്ലയുടെ വിവിധ ഭാഗങ്ങളില്‍ നിന്നുള്ള ആയിരക്കണക്കിന് പ്രവര്‍ത്തകര്‍ കണ്‍വന്‍ഷനില്‍ പങ്കെടുത്തു.

ഇടക്കൊച്ചിയിൽ ഗൃഹനാഥൻ മരിച്ചത് മകന്‍റെ ക്രൂരമർദനത്തെ തുടർന്ന്

പള്ളുരുത്തി: ഇടക്കൊച്ചിയിൽ ഗൃഹനാഥൻ മരിച്ചത് മകന്‍റെ ക്രൂര മർദനത്തെ തുടർന്നെന്ന് പോലീസ്. ഭക്ഷണം കഴിച്ചതിനു ശേഷം പാത്രം വൃത്തിയായി കഴുകാത്തതും ഉപയോഗത്തിനു ശേഷം ടോയ്‌ലറ്റ് ശുചിയാകാത്തതുമാ ണ് മർദനത്തിനു കാരണമെന്ന് തെളിവെടുപ്പിനിടെ പ്രതി ലൈജു ജോൺ പോലീസിനോടു പറഞ്ഞു. പാലമുറ്റം എസ്എഎസി റോഡിൽ തൈപറമ്പിൽ ടി.ജി. ജോണി(64)യെയാണ് ശനിയാഴ്ച പുലർച്ചെ വീടിനുള്ളിൽ മരിച്ചനിലയിൽ കണ്ടെത്തിയത്. ജോണി മരണപ്പെട്ട വിവരം മകൻ ലൈജുവാണ് നാട്ടുകാരെ അറിയിച്ചത്. തുടർന്ന് പള്ളുരുത്തി പോലീസ് സ്ഥലത്തെത്തി ഇൻക്വസ്റ്റ് നടപടികൾ പൂർത്തിയാക്കി. പോസ്റ്റ്മോർട്ടം നടത്തിയപ്പോഴാണ് മൃതദേഹത്തിൽ വാരിയെല്ലുകൾ തകർന്നിരുന്നതായി ശ്രദ്ധയിൽപ്പെട്ടത്. സാധാരണ മരണമെന്നാണ് പോലീസ് ആദ്യം കരുതിയിരുന്നത്. എന്നാൽ നാട്ടുകാർ സംഭവത്തിൽ ദുരൂഹത ആരോപിച്ചതോടെയാണ് പോലീസ് കൂടുതൽ അന്വേഷണം നടത്തിയത്. പോസ്റ്റ്മോർട്ടം കഴിഞ്ഞതോടെ സംഭവം കൊലപാതകമാണെന്ന സൂചന പോലീസിനു ലഭിക്കുകയും തുടർന്ന് ലൈജുവിനെ കസ്റ്റഡിയിലെടുക്കുകയുമായിരുന്നു. സംഭവമിങ്ങനെ വെള്ളിയാഴ്ച ഇരുവരും തമ്മിൽ വീട്ടിൽ വച്ച് വാക്കേറ്റമുണ്ടായി. ഇതിനെ തുടർന്ന് ജോണിയെ ലൈജു ക്രൂരമായി മർദിച്ചു. അടുക്കളയിൽ ഉള്ളി ചതയ്ക്കുന്നതിന് ഉപയോഗിച്ചിരുന്ന ഒരടിയോളം നീളമുള്ള ഇരുമ്പുദണ്ഡ് കൊണ്ട് തലയിലും വാരിയെല്ലിലും കാലിലും അതിക്രൂരമായി മർദിച്ചു. തുടർന്ന് പിതാവ് ബോധരഹിതനായെങ്കിലും വിവരം പുറത്തറിയിച്ചില്ല. പിറ്റേന്ന് രാവിലെ പിതാവ് അനക്കമില്ലാതെ കിടക്കുന്നത് കണ്ടപ്പോഴാണ് നാട്ടുകാരെ വിവരമറിയിച്ചത്. മട്ടാഞ്ചേരി അസി. കമ്മീഷണർ ഉമേഷ് ഗോയലിന്‍റെ നേതൃത്വത്തിൽ പ്രതിയെ സ്ഥലത്തെത്തിച്ച് തെളിവെടുപ്പ് നടത്തി. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

യുവാവിനെ കാറിടിപ്പിച്ച് കൊന്ന കേസ് : സിഐഎസ്എഫ് ഉദ്യോഗസ്ഥരെ പിരിച്ചുവിടാൻ നടപടി തുടങ്ങി

നെടുമ്പാശേരി : യുവാവിനെ കാറിടിപ്പിച്ച് കൊലപ്പെടുത്തിയ കേസിലെ പ്രതികളായ സിഐഎസ്എഫ് ഉദ്യോഗസ്ഥരെ സർവീസിൽനിന്നു പിരിച്ചുവിടാൻ നടപടി തുടങ്ങി. ഇതുമായി ബന്ധപ്പെട്ട് സിഐഎസ്എഫ് ഡിഐജി ആർ. പൊന്നി, എഐജി ശിവ് പാണ്ഡെ എന്നിവർ ഇന്നലെ നെടുമ്പാശേരിയിലെത്തി. ഇവർ സംഭവസ്ഥലം സന്ദർശിച്ചു. പിന്നീട് സിഐഎസ്എഫ് ഉദ്യോഗസ്ഥരുടെ പ്രത്യേക യോഗവും ചേർന്നു. സംഭവം നെടുമ്പാശേരിയിലെ സിഐഎസ്എഫ് വിംഗിന് വൻ തിരിച്ചടിയും നാണക്കേടും ഉണ്ടാക്കിയെന്നാണ് വിലയിരുത്തൽ. അങ്കമാലി തുറവൂർ സ്വദേശി അരിശേരി വീട്ടിൽ ജിജോ ജയിംസിന്‍റെ മകൻ ഐവിൻ ജിജോ (24) യാണ് കൊല്ലപ്പെട്ടത്. കേസിൽ സിഐഎസ്എഫ് എസ്ഐ വിനയകുമാർ ദാസ്, കോൺസ്റ്റബിൾ മോഹൻകുമാർ എന്നിവരെ കോടതി റിമാൻഡ് ചെയ്തിരിക്കുകയാണ്. ഈ സാഹചര്യത്തിൽ ഉദ്യോഗസ്ഥരെ എത്രയും വേഗം സർവീസിൽ നിന്ന് നീക്കം ചെയ്യാൻ നടപടി സ്വീകരിക്കാനാണ് ഉന്നത ഉദ്യോഗസ്ഥരുടെ നിർദേശം. സംഭവത്തിൽ സിഐഎസ്എഫ് പ്രത്യേക അന്വേഷണവും ആരംഭിച്ചിട്ടുണ്ട്. നെടുമ്പാശേരി പോലീസിന്‍റെ അന്വേഷണത്തോടെ പൂർണമായും സഹകരിക്കുമെന്നും വ്യക്തമാക്കിയിട്ടുണ്ട്. അന്വേഷണവുമായി ബന്ധപ്പെട്ട് എഐജി ശിവ് പാണ്ഡെ സംസ്ഥാനത്ത് തുടരും. പ്രതികളായ ഉദ്യോഗസ്ഥരെ എത്രയും വേഗം സർവീസിൽ നിന്നും പിരിച്ചുവിടണമെന്ന് കൊല്ലപ്പെട്ട ഐവിൻ ജിജോയുടെ കുടുംബവും ആവശ്യപ്പെട്ടു. ഭയത്തോടെയാണ് ഇപ്പോൾ ഈ നാട്ടിൽ ജീവിക്കുന്നതെന്ന് ഐവിന്‍റെ അമ്മ പറഞ്ഞു. കേന്ദ്ര സർക്കാർ ജീവനക്കാർക്ക് എന്തും ചെയ്യാൻ അധികാരമുണ്ടോയെന്ന് ചോദിച്ച അവർ, ഇനി മറ്റാർക്കും ഈ അവസ്ഥ ഉണ്ടാകരുതെന്നും ചൂണ്ടിക്കാട്ടി. ഇതിനിടെ കേസിൽ പോലീസ് അന്വേഷണം ഊർജിതമാക്കിയിട്ടുണ്ട്. രണ്ട് പ്രതികളെയും കസ്റ്റഡിയിൽ വാങ്ങാനുള്ള അപേക്ഷ ഇന്ന് കോടതിയിൽ സമർപ്പിക്കും. കസ്റ്റഡിയിൽ ലഭിച്ച ശേഷം പ്രതികളെ സംഭവസ്ഥലത്ത് എത്തിച്ച് തെളിവെടുപ്പ് നടത്തും.

ട്രെയിലറും സ്കൂട്ടറുമിടിച്ച് നവവധു മരിച്ചു

അരൂർ: ട്രെയിലർ ലോറിയും സ്കൂട്ടറും കൂട്ടിയിടിച്ച് ഭർത്താ വിനൊപ്പം സ്കൂട്ടറിൽ യാത്ര ചെയ്തിരു ന്ന നവവധു വിന് ദാരു ണാന്ത്യം. അരൂർ പഞ്ചായത്ത് രണ്ടാം വാർഡിൽ തച്ചാറയിൽ ജോമോന്‍റെ ഭാര്യ എസ്തർ (27)ആണ് മരിച്ചത്. ദേശീയ പാതയിൽ അരൂർ ക്ഷേത്രം കവലയിൽ ഇന്നലെ രാവിലെ 9.30 ഓടെ ആയിരുന്നു അപകടം. സ്കൂട്ടറിൽ ജോമോനു പിന്നിലിരുന്ന് പോകുന്പോഴാണ് അപകടത്തിൽപ്പെട്ടത്. ജോമോൻ അത്ഭുതകരമായി രക്ഷപെട്ടു. ഇവരുടെ വിവാഹം കഴിഞ്ഞിട്ട് ആറു മാസമേ ആയിട്ടുള്ളൂ. റോഡിൽ തെറിച്ചു വീണ എസ്തറിന്‍റെ തലയിലൂടെ ലോറി കയറിയിറങ്ങുകയായിരുന്നുവെന്ന് ദൃക് സാക്ഷികൾ പറഞ്ഞു. അരൂർ പോലീസും ഫയർഫോഴ്സും സ്ഥലത്തെത്തി. അല്പനേരം ദേശീയപാത യിൽ ഗതാഗത തടസമുണ്ടായി. മൃതദേഹം അരൂക്കുറ്റി സർക്കാർ ആശുപത്രി മോർച്ചറിയിൽ.

ജില്ലയിൽ രണ്ട് മുങ്ങിമരണം : മരിച്ചത് സ്കൂൾ വിദ്യാർഥികൾ

കൊച്ചി/ തൃപ്പൂണിത്തുറ: ജില്ലയിൽ രണ്ടിടങ്ങളിലായി രണ്ടു വിദ്യാർഥികൾ മുങ്ങിമരിച്ചു. തമ്മനത്ത് ക്ഷേത്രക്കുളത്തിൽ 13കാരനും, എരൂർ ആസാദ് കോടംകുളങ്ങര കുളത്തിൽ പ്ലസ്ടു വിദ്യാർഥിയുമാണ് മുങ്ങി മരിച്ചത്. തമ്മനത്ത് കൂട്ടുകാര്‍ക്കൊപ്പം കളികഴിഞ്ഞ് ക്ഷേത്രക്കുളത്തില്‍കുളിക്കാനിറങ്ങിയപ്പോഴാണ് 13 കാരനായ കറുകപ്പള്ളി തട്ടാന്‍വീട്ടില്‍ ഹുസൈന്‍റെ മകന്‍ ഫാസില്‍ മുങ്ങിമരിച്ചത്. ഇന്നലെ രാവിലെ 10.30ഓടെ കൂത്താപ്പാടി ശ്രീധര്‍മ ശാസ്താ നരസിംഹമൂര്‍ത്തി ക്ഷേത്രക്കുളത്തിലായിരുന്നു സംഭവം. ഫാസിലിനൊപ്പം സുഹൃത്തുക്കളായ രണ്ടു പേർ ഉണ്ടായിരുന്നെങ്കിലും ഇവർ കുളത്തില്‍ ഇറങ്ങിയിരുന്നില്ല. ഫാസില്‍ നീന്തിക്കുളിക്കുന്നതിനിടെ ചെളിയില്‍ മുങ്ങിത്താഴുകയായിരുന്നു. ഒപ്പമുണ്ടായിരുന്ന സുഹൃത്തുക്കള്‍ ബഹളംവച്ചതിനെ തുടര്‍ന്ന് നാട്ടുകാർ കുളത്തില്‍ തെരച്ചില്‍ നടത്തി. അര മണിക്കുറിനു ശേഷമാണ് ഫാസിലിന്‍റെ മൃതദേഹം കണ്ടെത്താനായത്. കലൂര്‍ സെന്‍റ് അഗസ്റ്റിന്‍ ഹൈസ്‌കൂളിലെ ഒമ്പതാം ക്ലാസ് വിദ്യാര്‍ഥിയാണ് ഫാസില്‍. സഹോദരിമാര്‍: ഫിദ ഫാത്തിമ, ഫസ്‌ന. പാലാരിവട്ടം പോലീസ് ഇന്‍ക്വസ്റ്റ് നടപടികള്‍ പൂര്‍ത്തിയാക്കി മൃതദേഹം കളമശേരി മെഡിക്കല്‍ കോളജിലേക്ക് മാറ്റി. പോസ്റ്റുമോര്‍ട്ടത്തിനുശേഷം ബന്ധുക്കള്‍ക്ക് വിട്ടുകൊടുക്കും. ഇന്ന് രാവിലെ 10 മുതല്‍ കലൂര്‍ ജുമാ മസ്ജിദിലെ പൊതുദര്‍ശനത്തിനുശേഷം സ്വദേശമായ പാലക്കാട് കൊല്ലങ്കോട് ആനമാറി ജുമാ മസ്ജിദ് കബർസ്ഥാനില്‍ ഉച്ചയ്ക്ക് കബറക്കം നടത്തും. എളംകുളം ബണ്ട് റോഡിൽ വാടകയ്ക്ക് താമസിക്കുന്ന ഉദയംപേരൂർ മാന്ദ്രപ്പറന്പിൽ സാജന്‍റെ മകൻ അഖിൽ സാജൻ (18) ആണ് എരൂർ ആസാദ് കോടംകുളങ്ങര കുളത്തിൽ മുങ്ങിമരിച്ചത്. ഇന്നലെ വൈകുന്നേരം നാലിന് കുളിക്കാനെത്തിയ മൂവർ സംഘത്തിൽപ്പെട്ട അഖിൽ മുങ്ങിപ്പോവുകയായിരുന്നു. മാതാവ്: ജോയ്സി. സഹോദരൻ: അരുണ്‍ സാജൻ. ഹിൽപാലസ് പോലീസ് കേസെടുത്തു.

സിയാൽ 2.0 ഐടി വികസന പ്രോജക്ട് ഇന്ന് മുഖ്യമന്ത്രി ഉദ്ഘാടനം ചെയ്യും

നെടുമ്പാശേരി: കൊച്ചി അന്താരാഷ്ട്ര വിമാനത്താവളത്തിൽ സമ്പൂർണ ഡിജിറ്റൽവത്ക്കരണ പദ്ധതികൾക്ക് തുടക്കം.200 കോടി രൂപ ചെലവിട്ടുള്ള സിയാൽ 2.0 എന്ന ഐടി വികസന പ്രോജക്ട് ഇന്ന് വൈകിട്ട് അഞ്ചിന് മുഖ്യമന്ത്രി പിണറായി വിജയൻ ഉദ്ഘാടനം ചെയ്യും. സിയാൽ കൺവൻഷൻ സെന്‍ററിലാണ് ചടങ്ങ്. സമ്പൂർണ ഡിജിറ്റൽവത്ക്കരണത്തിന്‍റെ ഭാഗമായി യാത്രക്കാർക്ക് കൂടുതൽ സൗകര്യവും സൈബർ സുരക്ഷയിൽ ആധുനികവത്ക്കരണവുമാണ് സിയാൽ നടപ്പിലാക്കുന്നത്. ഡിപ്പാർച്ചർ സുരക്ഷാപരിശോധനാ പോയിന്‍റുകളിൽ ഫുൾബോഡി സ്‌കാനറുകൾ ഏർപ്പെടുത്തും. പരീക്ഷണാടിസ്ഥാനത്തിൽ ആഭ്യന്തര, രാജ്യാന്തര ടെർമിനലുകളിൽ ഓരോന്ന് വീതമാണ് ആദ്യം സ്ഥാപിക്കുക. സിഐഎസ്എഫ് ഭടൻമാർ മെറ്റൽ ഡിറ്റക്ടർ ഉപയോഗിച്ച് ദേഹപരിശോധന നടത്തുന്നതിന് പകരം, യാത്രക്കാർക്ക് സ്‌കാനർ കവാടത്തിലൂടെ കടന്നുപോകാനാകും. നിരോധിതവസ്തുക്കളുണ്ടെങ്കിൽ, തിരികെയിറങ്ങി അവ മാറ്റിയശേഷം വീണ്ടും കടക്കാനാകും. ഓട്ടോമാറ്റിക് ട്രേ റിട്രീവർ സിസ്റ്റമാണ് മറ്റൊന്ന്. യന്ത്രവത്കൃതമാക്കുന്നതോടെ ഹാൻഡ് ബാഗേജുകൾ അതിവേഗം സ്‌കാനിംഗിന് വിധേയമാക്കാനാകും. വിമാനത്താവളത്തിന്‍റെ ഓപ്പറേഷണൽ മേഖലയിലെയും പരിസര പ്രദേശങ്ങളിലെയും സുരക്ഷ ശക്തമാക്കുന്നതിന്‍റെ ഭാഗമായി നിർമിത ബുദ്ധി അടിസ്ഥാനമാക്കി പ്രവർത്തിക്കുന്ന 4000 കാമറകൾ സ്ഥാപിക്കുന്ന പദ്ധതിക്കും തുടക്കമാകും. സൈബർ ഡിഫൻസ് ഓപ്പറേഷൻ പ്രവർത്തനസജ്ജമാകുന്നതോടെ വിമാനത്താവളവുമായി ബന്ധപ്പെട്ട എല്ലാ ഓൺലൈൻ സംവിധാനങ്ങളുടെ സെർവറുകളും സൈബർ സുരക്ഷാ സാങ്കേതികവിദ്യയും തദ്ദേശീയമായിത്തന്നെ കൈകാര്യം ചെയ്യാനാകും. സിയാൽ 2.0 ഉദ്ഘാടനത്തിന്‍റെ ഭാഗമായി സിയാൽ കൺവെൻഷൻ സെന്‍ററിൽ എയ്‌റോ ഡിജിറ്റൽ സമിറ്റ് ഒരുകിയിട്ടുണ്ട്. ഇന്ന് ഉച്ചയ്ക്ക് 2.30 മുതൽ എക്‌സ്പീരിയൻസ് സെന്‍ററിൽ പൊതുജനങ്ങൾക്ക് പ്രവേശനമുണ്ടായിരിക്കും. ഉദ്ഘാടനം ചെയ്യപ്പെടുന്ന പ്രധാന പദ്ധതികളുടെ ലൈവ് ഡെമോൺസ്‌ട്രേഷൻ, റോബോട്ടിക്‌സ്, സൈബർ സുരക്ഷാ രംഗത്തെ നൂതന സംവിധാനങ്ങൾ തുടങ്ങിയവ ഇവിടെ ഒരുക്കിയിട്ടുണ്ട്. ഉദ്ഘാടനച്ചടങ്ങുകൾക്കുശേഷം അതേ വേദിയിൽ വിമാനത്താവളങ്ങളുടെ സാങ്കേതിക ആധുനികവത്ക്കരണത്തെക്കുറിച്ച് രണ്ട് പാനൽ ചർച്ചകൾ നടക്കും.

എസ്ആർവി യുപി സ്കൂളിലെ ഹൈടെക് ക്ലാസ് റൂമുകൾ ഉദ്ഘാടനം ചെയ്തു

കോലഞ്ചേരി: വിദ്യാലയത്തെ മികവിന്‍റെ കേന്ദ്രമാക്കി മാറ്റുക എന്ന ലക്ഷ്യത്തോടെ എസ്ആർവി യുപി സ്കൂളിൽ സ്കൂൾ വെൽഫെയർ കമ്മിറ്റി ആസൂത്രണം ചെയ്തു നടപ്പിലാക്കുന്ന ‘വിഷൻ 2030'ന്‍റെ ഭാഗമായി ശീതീകരിച്ച ഹൈടെക് ക്ലാസ് റൂമുകൾ ഉദ്ഘാടനം ചെയ്തു. സ്കൂൾ മാനേജർ എം.എസ്.എസ്. വാര്യരുടെ അധ്യക്ഷതയിൽ ചേർന്ന യോഗത്തിൽ ജില്ലാ പഞ്ചായത്ത് അംഗം ഉമാ മഹേശ്വരി ഉദ്ഘാടനം ചെയ്തു. നടി തെസ്നി ഖാൻ എസി സ്വിച്ച് ഓൺ കർമവും, പൂർവ വിദ്യാർഥി സി.പി. പ്രസാദ് സ്മാർട്ട് പ്രോജക്ടുകളുടെ ഉദ്ഘാടനവും നിർവഹിച്ചു. കോലഞ്ചേരി വിദ്യാഭ്യാസ ഉപജില്ലാ ഓഫീസർ ജി. പ്രീതി മുഖ്യപ്രഭാഷണം നടത്തി. പ്രധാനാധ്യാപകൻ അനിയൻ പി. ജോൺ, വെൽഫെയർ കമ്മിറ്റി ചെയർമാൻ തമ്പി പാതിരിക്കാട്ട്, സെക്രട്ടറി നാരായണൻ കൊച്ചുവീട്ടിൽ, എംആർഎസ്‌വി ഹൈസ്കൂൾ പ്രധാനാധ്യാപിക അഞ്ചു സ്കറിയ, മുൻ പഞ്ചായത്തംഗം ബേബി കുര്യാച്ചൻ, മഴുവന്നൂർ ലൈബ്രറി സെക്രട്ടറി എൻ.കെ. അനിൽകുമാർ, എംപിടിഎ ചെയർപേഴ്സൺ റെസി ബോബി, സീനിയർ അസിസ്റ്റന്റ് ബിജു വർഗീസ് എന്നിവർ പ്രസംഗിച്ചു.

റാങ്ക് ജേതാവിനെ അനുമോദിച്ചു

മൂവാറ്റുപുഴ: സിപിഎം പായിപ്ര സൊസൈറ്റിപ്പടി ബ്രാഞ്ച് കമ്മിറ്റിയുടെ നേതൃത്വത്തിൽ റാങ്ക് ജേതാവിനെ അനുമോദിച്ചു. പായിപ്ര പറക്കുന്നത്ത് ലത്തീഫിന്‍റെയും റീജയുടേയും മകളായ സഹല ലത്തീഫിനെയാണ് ആദരിച്ചത്. മഹാത്മാ ഗാന്ധി സർവകലാശാലയിൽ നിന്ന് ബിഎ പൊളിറ്റിക്കൽ സയൻസിൽ മൂന്നാം റാങ്ക് നേടിയ സഹലയ്ക്ക് ബ്രാഞ്ച് കമ്മിറ്റിയുടെ ഉപഹാരം സിപിഎം ജില്ലാ സെക്രട്ടറിയേറ്റംഗം പി.ആർ. മുരളീധരൻ സമ്മാനിച്ചു. ഇതോടനുബന്ധിച്ച് ചേർന്ന അനുമോദന യോഗത്തിൽ ബ്രാഞ്ച് സെക്രട്ടറി പി.എ. ബിജു അധ്യക്ഷത വഹിച്ചു. ലോക്കൽ സെക്രട്ടറി ബാബു ബേബി, ഡിവൈഎഫ്ഐ മേഖലാ പ്രസിഡന്‍റ് എം.ആർ. വിഷ്ണു, കെ. ഘോഷ്, എം.ആർ റെജികുമാർ, എം. ഇബ്രാഹിം, എൻ. വിജയൻ, എ.എൻ പരീത് എന്നിവർ പ്രസംഗിച്ചു.

കാരക്കാട്ട് മലയിലെ മണ്ണ് ഖനനം : ഹൈക്കോടതി അഭിഭാഷക കമ്മീഷൻ സ്ഥലം സന്ദർശിച്ചു

തിരുമാറാടി: മണ്ണത്തൂർ കാരക്കാട്ട് മലയിലെ മണ്ണ് ഖനനവുമായി ബന്ധപ്പെട്ട കേസിൽ ഹൈക്കോടതി അഭിഭാഷക കമ്മീഷൻ സ്ഥലം സന്ദർശിച്ചു. ആർ.യു. ഹ്യൂമൻ ഫൗണ്ടേഷന്‍റെ നേതൃത്വത്തിൽ സ്ഥാപനം തുടങ്ങാൻ കാരക്കാട്ടുമലയിൽ നിന്നും വലിയ തോതിൽ മണ്ണ് നീക്കിയിരുന്നു. കോടതി ഉത്തരവിനെത്തുടർന്ന് നിർത്തിവച്ചിരിക്കുന്ന നിർമാണ പ്രവർത്തനങ്ങളും മണ്ണെടുപ്പു നടന്ന സ്ഥവും കമ്മീഷൻ കണ്ടു വിലയിരുത്തി. അനിയന്ത്രിതമായി മണ്ണെടുപ്പ് നടത്തിയാൽ ഉണ്ടാകുന്ന പാരിസ്ഥിതിക പ്രശ്നങ്ങൾ പഞ്ചായത്ത് കോടതിയെ അറിയിച്ചിരുന്നു. പഞ്ചായത്ത് പ്രസിഡന്‍റ് സന്ധ്യാമോൾ പ്രകാശ്, വൈസ് പ്രസിഡന്‍റ് എം.എം. ജോർജ്, വാർഡംഗങ്ങളായ സാജു ജോണ്‍, സുനി ജോണ്‍സണ്‍, സെക്രട്ടറി പി.പി. റെജിമോൻ തുടങ്ങിയവർ ഒപ്പമുണ്ടായിന്നു.

അധ്യാപക ശാക്തീകരണം: ഒന്നാംഘട്ടം അവസാനിച്ചു

മൂവാറ്റുപുഴ: പൊതു വിദ്യഭ്യാസ വകുപ്പിനു കീഴിൽ സമഗ്രശിക്ഷ കേരളത്തിന്‍റെ ആഭിമുഖ്യത്തിലുള്ള അധ്യാപക ശാക്തീകരണതിന്‍റെ ഒന്നാംഘട്ടം അവസാനിച്ചു. അഞ്ച് ദിവസമായി നടന്ന ശാക്തീകരണ പരിപാടിയിൽ സമഗ്ര ഗുണമേന്മ പദ്ധതി, പുസ്തക വിലയിരുത്തൽ, പാഠ ആസൂത്രണം തയാറാക്കൽ, കല-തൊഴിൽ-കായിക ഉദ്ഗ്രഥിത വിദ്യാഭ്യാസം തുടങ്ങി വിവിധ വിഷയങ്ങളിൽ ചർച്ചയും അവതരണവും നടന്നു. ജൂണിൽ വിദ്യാലയങ്ങളിൽ ലഹരി വിരുദ്ധ പ്രചാരണം നടത്തും. വിദ്യാർഥികളിലും യുവാക്കളിലും വർധിച്ചുവരുന്ന ലഹരിക്ക് എതിരെ കൂത്താട്ടുകുളം എച്ച്എസ്എസിൽ നടന്ന ശാക്തീകരണത്തോടനുബന്ധിച്ച് അധ്യാപകർ മനുഷ്യച്ചങ്ങല നിർമിച്ചു. തുടർന്ന് കൂത്താട്ടുകുളം ബിആർസിയുടെ ആഭിമുഖ്യത്തിൽ നടന്ന മലയാളം വിഭാഗം അധ്യാപക ശാക്തീകരണത്തിന്‍റെ സമാപനം മൂവാറ്റുപുഴ എച്ച്എം ഫോറം സെക്രട്ടറി ഷാജി വർഗീസ് ഉദ്ഘാടനം ചെയ്തു. കൂത്താട്ടുകുളം എഇഒ ബോബി ജോർജ് അധ്യക്ഷത വഹിച്ചു. കൂത്താട്ടുകുളം പോലീസ് സ്റ്റേഷനിലെ എഎസ്ഐ എസ്. മധു ലഹരി ഉപയോഗത്തിന്‍റെ ലക്ഷണങ്ങളെക്കുറിച്ചും മൊബൈൽ ഫോണിൽ ഒളിഞ്ഞിരിക്കുന്ന അപകടങ്ങളെക്കുറിച്ചും അധ്യാപകർക്ക് ബോധവത്കരണ ക്ലാസെടുത്തു. ഡിഇഒ ആർ. സുമ, കൂത്താട്ടുകുളം എച്ച്എസ്എസ് പ്രധാന അധ്യാപിക എം. ഗീതാദേവി, ഫാ. ബിനോയ് ചാത്തനാട്ട്, സജിൽ വിൻസെന്‍റ് തുടങ്ങിയവർ പ്രസംഗിച്ചു. ശാക്തീകരണ പരിപാടിക്ക് വി.എസ്. ശ്യാംലാൽ, കെ.കെ. മനോജ്, ജോമോൻ ജോസ് എന്നിവർ നേതൃത്വം നൽകി. വിരമിക്കുന്ന അധ്യാപകരെ യോഗത്തിൽ ആദരിച്ചു. രണ്ടാംഘട്ട ശാക്തീകരണ പരിപാടി ഇന്ന് ആരംഭിക്കും.

നേര്യമംഗലം ഗവ. ആശുപത്രിയിൽ കിടത്തി ചികിത്സ ആരംഭിക്കണമെന്ന്

കോതമംഗലം: നേര്യമംഗലം ഗവ. ആശുപത്രിയിൽ രോഗികളെ കിടത്തി ചികിത്സിക്കുന്നതിന് അടിയന്തര നടപടി സ്വീകരിക്കാൻ അധികാരികൾ തയാറാകണമെന്ന് ആർഎസ്പി നേര്യമംഗലം ലോക്കൽ കമ്മിറ്റി നേതൃയോഗം ആവശ്യപ്പെട്ടു. കോതമംഗലം താലൂക്കിലെ ആദിവാസികളടക്കം സാന്പത്തികമായി പിന്നാക്കം നിൽക്കുന്ന ജനവിഭാഗങ്ങൾ തിങ്ങിപ്പാർക്കുന്ന പ്രദേശമാണ് കവളങ്ങാട് പഞ്ചായത്തിലെ നേര്യമംഗലം. സമീപ പഞ്ചായത്തുകളായ അടിമാലി, കഞ്ഞിക്കുഴി, കുട്ടന്പുഴ, കീരംപാറ തുടങ്ങി വിവിധ പഞ്ചായത്തുകളിലെ ദരിദ്ര ജനവിഭാഗങ്ങളുടെ ഏക ആശ്രയമാണ് ഈ ആശുപത്രി. 1968ൽ നേര്യമംഗലം പോലീസ് എയ്ഡ് പോസ്റ്റായി നിലനിന്നിരുന്ന കെട്ടിടമാണ് ഇപ്പോൾ ആശുപത്രിയായി പ്രവർത്തിച്ചുവരുന്നത്. ഇതിനോടനുബന്ധിച്ച് നിരവധി കെട്ടിടങ്ങൾ പണിതെങ്കിലും നാളിതുവരെ കിടത്തി ചികിത്സയ്ക്കുള്ള നടപടികൾ സ്വീകരിച്ചിട്ടില്ല. മഴക്കാലമാകുന്നതോടെ മാരകമായ സാംക്രമികരോഗങ്ങളടക്കം പടർന്നു പിടിക്കാൻ സാധ്യതയുള്ള സമയത്ത് ആവശ്യത്തിന് ഡോക്ടർമാരെയും ജീവനക്കാരെയും നിയമിച്ച് ആശുപത്രിയുടെ സേവനം ജനങ്ങൾക്ക് ലഭ്യമാക്കണമെന്ന് നേതൃയോഗം ആവശ്യപ്പെട്ടു. നേതൃയോഗം നിയോജക മണ്ഡലം സെക്രട്ടറി എ.സി. രാജശേഖരൻ ഉദ്ഘാടനം ചെയ്തു. ലോക്കൽ സെക്രട്ടറി കെ.പി. മുരളീധരൻ നായർ അധ്യക്ഷത വഹിച്ചു. വി.എം. സുഗതൻ, കെ.പി. സെബാസ്റ്റ്യൻ, എം.കെ. കുട്ടിയമ്മ, ഉഷ കുട്ടപ്പൻ, പി.കെ. രാജമ്മ, മിനി സേവ്യർ എന്നിവർ പ്രസംഗിച്ചു.

മൂവാറ്റുപുഴ നഗര വികസനം: അടിയന്തരമായി പൂർത്തീകരിച്ചില്ലെങ്കിൽ സമരമെന്ന് വ്യാപാരികൾ

മൂവാറ്റുപുഴ: മൂവാറ്റുപുഴ നഗര വികസനം അടിയന്തരമായി പൂർത്തീകരിച്ചില്ലെങ്കിൽ ശക്തമായ സമര പരിപാടിയുമായി മുന്നോട്ടു പോകുമെന്ന് കേരള വ്യാപാരി വ്യവസായി ഏകോപന സമിതി ജില്ലാ പ്രസിഡന്‍റ് പി.സി. ജേക്കബ്. മൂവാറ്റുപുഴ അസോസിയേഷൻ ഓഫീസിൽ മൂവാറ്റുപുഴ മേഖലാ സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. നിർമാണം അനന്തമായി നീളുന്നത് മൂവാറ്റുപുഴയിലെയും, സമീപപ്രദേശങ്ങളായ പേഴയ്ക്കാപ്പിള്ളി, തൃക്കളത്തൂർ, പെരുമറ്റം, വാളകം, അന്പലംപടി, മാറാടി, ആവോലി, വാഴക്കുളം എന്നിവിടങ്ങളിലെയും വ്യാപാരികളെ സാരമായി ബാധിക്കുന്നുണ്ട്. വാട്ടർ അഥോറിറ്റിയുടെയും കോണ്‍ട്രാക്ടറുടെയും ഏകോപനം ഇല്ലായ്മ മൂലമാണ് നിർമ്മാണം നീളുന്നതെന്നും രാത്രി സമയങ്ങളിൽ കൂടുതൽ തൊഴിലാളികളെ ഉപയോഗിച്ച് നിർമാണം പൂർത്തിയാക്കണമെന്നും അദ്ദേഹം ആവശ്യപ്പെട്ടു. ജില്ലാ ജനറൽ സെക്രട്ടറി എ.ജെ. റിയാസ് മുഖ്യപ്രഭാഷണം നടത്തി. മേഖലാ പ്രസിഡന്‍റ് തോമസ് വർഗീസ് അധ്യക്ഷത വഹിച്ചു. മേഖലാ ജനറൽ സെക്രട്ടറി അലക്സാണ്ടർ ജോർഡി, മേഖലാ ട്രഷറർ ജെയ്സൻ തോട്ടത്തിൽ, ജില്ലാ ട്രഷറർ സി.എസ്. അജ്മൽ ചക്കുങ്കൽ, ജില്ലാ വൈസ് പ്രസിഡന്‍റ് പി.എ കബീർ, ജോസ് വർഗീസ് പോത്താനിക്കാട്, സിജു സെബാസ്റ്റ്യൻ, വനിതാ നിയോജകമണ്ഡലം പ്രസിഡന്‍റ് ഡോ. വിജയലക്ഷ്മി ബാബു തുടങ്ങിയവർ പ്രസംഗിച്ചു. ഭാരവാഹികൾ: പി.എ. കബീർ (നിയോജക മണ്ഡലം പ്രസിഡന്‍റ്), സാബു (പോത്താനിക്കാട്), ജോയ് തോമസ് (കല്ലൂർക്കാട്), ജോയ് തോമസ് (നെല്ലാട്), കുട്ടൻപിള്ള (കാലാന്പൂർ), പി.യു. ഷംസുദീൻ (മൂവാറ്റുപുഴ) - വൈസ് പ്രസിഡന്‍റുമാർ, അനിൽ (തൃക്കളത്തൂർ), സുനിൽ (മാറാടി), സൈമണ്‍ (ആവോലി), ശശികുമാർ (വാളകം), ടോമി തോമസ് (വാഴക്കുളം) - സെക്രട്ടറിമാർ, ബിനു ചെറിയാൻ (പൈങ്ങോട്ടൂർ, ജനറൽ സെക്രട്ടറി), പി.കെ ബേബി (മാറാടി, ട്രഷറർ).

കാപ്പചുമത്തി ജയിലിലടച്ചു

മൂവാറ്റുപുഴ: നിരന്തര കുറ്റവാളിയെ കാപ്പ ചുമത്തി ജയിലിലടച്ചു. ആവോലി ആനിക്കാട് കുപ്ലിക്കുടിയിൽ ഡില്ലിറ്റ് (30)നെയാണ് കാപ്പ ചുമത്തി വിയ്യൂർ സെൻട്രൽ ജയിലിലടച്ചത്. റൂറൽ ജില്ലാ പോലീസ് മേധാവി എം. ഹേമലതയുടെ റിപ്പോർട്ടിന്‍റെ അടിസ്ഥാനത്തിൽ എറണാകുളം ജില്ലാ കളക്ടർ എൻ.എസ്.കെ. ഉമേഷാണ് ഉത്തരവിട്ടത്. മൂവാറ്റുപുഴ, കല്ലൂർക്കാട്, പോത്താനിക്കാട് പോലീസ് സ്റ്റേഷൻ പരിധികളിലായി കൊലപാകതശ്രമം, ദേഹോപദ്രവം, വീട്ടിൽ അതിക്രമിച്ചു കടക്കൽ തുടങ്ങി നിരവധി കേസുകളിൽ ‍ഇയാൾ പ്രതിയാണ്. 2025 ഫെബ്രുവരിയിൽ മൂവാറ്റുപുഴ ലതാ സ്റ്റാൻഡിൽ ഒരാളെ കൊലപ്പെടുത്താൻ ശ്രമിച്ചതിന് മൂവാറ്റുപുഴ പോലീസ് രജിസ്റ്റർ ചെയ്ത കേസിൽ പ്രതിയായതോടെയാണ് കാപ്പ ചുമത്തി ജയിലിലടച്ചത്. ഈ കേസിലെ മറ്റ് പ്രതികളായ, അമൽ രാജ്, അമൽനാഥ് എന്നിവരെ മുൻ ആഴ്ചകളിൽ കാപ്പ ചുമത്തി ജയിലിൽ അടച്ചിരുന്നു. മൂവാറ്റുപുഴ സിഐ ബേസിൽ തോമസ്, എസ്ഐ പി.ബി. സത്യൻ എന്നിവരുടെ നേതൃത്വത്തിലാണ് പ്രതിയെ അറസ്റ്റ് ചെയ്തത്.

ഭൂതത്താൻകെട്ടിൽ സർക്കാർ ഭൂമി കാടുകയറി നശിക്കുന്നു

കോതമംഗലം: ഭൂതത്താൻകെട്ടിൽ സർക്കാർ ഭൂമി കാടുകയറി നശിക്കുന്നു. വെളളൂരിലെ ഹിന്ദുസ്ഥാൻ ന്യൂസ് പ്രിന്‍റ് കന്പനിയുടെ ആവശ്യങ്ങൾക്കായി സ്വകാര്യ വ്യക്തികളിൽ നിന്നും വാങ്ങിയ എട്ടേക്കറോളം സർക്കാർ ഭൂമിയാണ് കാടുകയറി നശിക്കുന്നത്. എച്ച്എൻഎൽ കന്പനി സമീപകാലത്ത് സംസ്ഥാന സർക്കാർ വാങ്ങി. ഇതോടെയാണ് ഈ സ്ഥലം വ്യവസായ വകുപ്പിന്‍റെ അധീനതയിലായത്. എന്നാൽ പിന്നീട് അധികാരികൾ ഇങ്ങോട്ട് തിരിഞ്ഞു നോക്കിയിട്ടില്ല. ഇതോടെ കാടുമൂടി ഇവിടം ഇഴജന്തുക്കളുടെയും, കാട്ടുപന്നി ഉൾപ്പടെയുള്ള വന്യമൃഗങ്ങളുടെയും ആവാസകേന്ദ്രമായി. ഇവിടുത്തെ കെട്ടിടങ്ങൾ തകർന്നുകൊണ്ടിരിക്കുകയാണ്. ഇരുന്പ് സാധനങ്ങളുൾപ്പടെ വിലപിടിപ്പുള്ളവയെല്ലാം ആളുകൾ കടത്തികൊണ്ടുപോയി. ന്യൂസ് പ്രിന്‍റ് കന്പനിയിൽ പൾപ്പ് നിർമിക്കുന്നതിനാവശ്യമായ യൂക്കാലി, മാഞ്ചിയം, അക്വേഷ്യ എന്നിവ വളർത്താൻ കോട്ടപ്പാറ പ്ലാന്‍റേഷൻ എച്ച്എൻഎൽ പാട്ടത്തിനെടുത്തിരുന്നു. ഇവിടേക്ക് ആവശ്യമായ തൈകൾ ഉല്പാദിപ്പിക്കുന്ന നഴ്സറിക്കായാണ് ഭൂതത്താൻകെട്ടിലെ സ്ഥലം ഉപയോഗിച്ചിരുന്നത്. അതോടൊപ്പം കന്പനിയുടെ ഓഫീസും പ്രവർത്തിച്ചിരുന്നു. തൈ ഉത്പാദനം നിർത്തിയതോടെയാണ് ഇവിടെ കാടുകയറി നാശമായത്.

ദേശീയ കോണ്‍ഫറന്‍സ് സംഘടിപ്പിച്ചു

കൊച്ചി: വിപിഎസ് ലേക്‌ഷോര്‍ ആശുപത്രി അനസ്‌തേഷ്യോളജി വിഭാഗം പെരിയോപ്പറേറ്റീവ് മെഡിസിന്‍ ടുഡേയ്‌സ് ചാലഞ്ചസ്, ടുമാറോസ് സൊലൂഷന്‍സ് എന്ന വിഷയത്തില്‍ ദേശീയ കോണ്‍ഫറന്‍സ് സംഘടിപ്പിച്ചു. കൊച്ചി ഹോളിഡേ ഇന്നില്‍ നടന്ന സമ്മേളനം വിപിഎസ് ലേക്‌ഷോര്‍ മാനേജിംഗ് ഡയറക്ടര്‍ എസ്.കെ. അബ്ദുള്ള ഉദ്ഘാടനം ചെയ്തു. വിപിഎസ് ലേക്‌ഷോര്‍ അനസ്തീഷ്യോളജി വിഭാഗം മുന്‍ മേധാവി ഡോ. മോഹന്‍ മാത്യു മുഖ്യപ്രഭാഷണം നടത്തി. കൊച്ചി ഐഎംഎ പ്രസിഡന്‍റ് ഡോ. ജേക്കബ് ഏബ്രഹാം, കൊച്ചി ഐഎസ്എ പ്രസിഡന്‍റ് ഡോ. ടി. ജിതേന്ദ്ര എന്നിവര്‍ സംസാരിച്ചു. രാജ്യത്തിന്‍റെ വിവിധ ഭാഗങ്ങളില്‍ നിന്നുള്ള ഡോക്ടര്‍മാരും മെഡിക്കല്‍ പ്രഫഷണലുകളും മെഡിക്കല്‍ വിദ്യാര്‍ഥികളും പരിപാടിയില്‍ പങ്കെടുത്തു.

അശ്വതിക്കും കുഞ്ഞുങ്ങൾക്കും ഇനി സ്വസ്ഥമായുറങ്ങാം...

പറവൂർ: ഓർക്കാപ്പുറത്ത് അനാഥരായ അശ്വതിക്കും കുഞ്ഞുങ്ങൾക്കുമായി പ്രതിപക്ഷ നേതാവ് വി.ഡി. സതീശൻ മുൻകൈയെടുത്ത് നിർമിച്ച വീടിന്‍റെ താക്കോൽ കൈമാറി. കഴിഞ്ഞ സെപ്തംബർ 11നാണ് അശ്വതിയുടെ ഭർത്താവ് വയനാട് വൈത്തിരി സ്വദേശി മോഹൻ കുമാർ പറവൂർ ഗവണ്മെന്‍റ് ആശുപത്രി വളപ്പിലെ മരത്തിന്‍റെ മുകളിൽ ശിഖരങ്ങൾ മുറിച്ചു കൊണ്ടിരിക്കേ അബദ്ധത്തിൽ കയർ കഴുത്തിൽ കുരുങ്ങി ദാരുണമായി മരിച്ചത്. ഇതോടെ അശ്വതിയുംഅഞ്ച് വയസിൽ താഴെയുള്ള മൂന്ന് പെൺകുഞ്ഞുങ്ങളും ആലംബമില്ലാതെ ഒറ്റപ്പെടുകയായിരുന്നു. വാടക വീട്ടിൽ താമസിച്ചിരുന്ന ഇവർക്ക് സ്വന്തമായി സ്ഥലം പോലുമില്ലായിരുന്നു. കുടുംബത്തിന്‍റെ ദയനീയസ്ഥിതി ബോധ്യപ്പെട്ട പ്രതിപക്ഷ നേതാവ് വി.ഡി. സതീശൻ തന്‍റെ പുനർജനി പദ്ധതിയിൽപ്പെടുത്തി സ്ഥലം വാങ്ങി വീട് വച്ച് നൽകുകയായിരുന്നു. സതീശന്‍റെ അഭ്യർത്ഥനപ്രകാരം യുഎഇ അജ്മാനിലെ ഹാബിറ്റാറ്റ് സ്കൂൾ ചെയർമാൻ ശംസുദ്ദീൻ കോഴിക്കോടാണ് സ്ഥലം വാങ്ങി നൽകിയത്. മന്നം പാറപ്പുറം സ്വദേശിയും ഖത്തറിലെ കോസ്റ്റൽ ഗ്രൂപ്പ് ഉടമയുമായ അസിമുദ്ദീനാണ് ഏഴ് ലക്ഷം രൂപ ചിലവിൽ രണ്ട് കിടപ്പുമുറികളോടു കൂടിയ 540 സ്ക്വയർ ഫീറ്റ് വീട് നിർമിച്ചു നൽകിയത്. അശ്വതിയും മൂന്ന് കുഞ്ഞുങ്ങളും ചേർന്ന് പ്രതിപക്ഷ നേതാവിൽ നിന്ന് താക്കോൽ ഏറ്റുവാങ്ങി. അശ്വതിക്ക് ജോലി നൽകിയിട്ടുണ്ട്. കുഞ്ഞുങ്ങളുടെ വിദ്യഭ്യാസത്തിന്‍റെ കാര്യത്തിലും സഹായങ്ങളുണ്ടാകുമെന്ന് താക്കോൽ കൈമാറിയ ശേഷം വി.ഡി. സതീശൻ മാധ്യമപ്രവർത്തകരോട് പറഞ്ഞു. ചടങ്ങിൽ വീടിന്‍റെ സ്പോൺസർ അസിമുദ്ദീൻ, കാർഷിക ഗ്രാമവികസന ബാങ്ക് എക്സിക്യുട്ടീവ് ഡയറക്ടർ ടി.എ. നവാസ്, പറവൂർ നഗരസഭാധ്യക്ഷ ബീന ശശിധരൻ തുടങ്ങിയവർ സംബന്ധിച്ചു.

ചരിത്രമായി മാറിയ കേസ് വിചാരണകൾ.... ആലുവ കോടതി കെട്ടിടം വിസ്മൃതിയിലേക്ക്

നാല് പതിറ്റാണ്ട് പഴക്കമുള്ള കെട്ടിടം ജൂൺ ഒന്നിന് പൊളിക്കും ബോബൻ ബി. കിഴക്കേത്തറ ആലുവ: നിരവധി വിവാദ കേസുകളുടെ വിചാരണാ വേദിയായ ആലുവ കോടതിക്കെട്ടിടം നാൽപത് വർഷത്തിന് ശേഷം വിസ്മൃതിയിലേക്ക്. രണ്ട് നൂറ്റാണ്ട് പഴക്കമുള്ള കോടതി പാരമ്പര്യവുമായാണ് പഴയ കെട്ടിടം നിലകൊള്ളുന്നത്. ഏതാനും ദിവസങ്ങൾക്കുള്ളിൽ ഈ കെട്ടിടം ഇല്ലാതാവും. വിസ്മൃതിയിലേക്ക് നീങ്ങാൻ പോകുന്നത് നിരവധി പ്രമാദമായ കേസുകൾ വിചാരണ നടന്ന കോടതി കെട്ടിടമാണ്. കേരള മനസാക്ഷിയെ ഞെട്ടിച്ച ആലുവ നഗരത്തിൽ നടന്ന നിരവധി കൊലപാതക കേസുകൾ രജിസ്റ്റർ ചെയ്തത് ഈ കോടതിയിലാണ്. ഒരു കുടുംബത്തിലെ അഞ്ച് അംഗങ്ങളെ ഇല്ലാതാക്കിയ ആലുവ മാഞ്ഞൂരാൻ കൂട്ടക്കൊല, മൂന്നംഗങ്ങളെ ഇല്ലാതാക്കിയ മെർലി കൊലക്കേസ്, കുടുംബങ്ങൾ തമ്മിലുള്ള വൈരാഗ്യത്തിൽ ഒരേസമയം രണ്ടിടത്തായി രണ്ട് പേരെ വെട്ടിക്കൊന്ന ഇരട്ട കൊലപാതക കേസു മുതൽ പ്രമാദമായ ആലുവ മാർക്കറ്റിൽ അഞ്ചു വയസുകാരിയുടെ കൊലപാതകം വരെയുള്ള കേസുകളുടെ വിചാരണ ആലുവ കോടതിയിലാണ് നടന്നത്. പ്രശസ്തർ ഉൾപ്പെട്ട കേസുകളും ആലുവ കോടതിയിൽ വിചാരണ നേരിട്ടിട്ടുണ്ട്. നടൻ ദിലീപ് ഉൾപ്പെട്ട നടിയെ അപമാനിച്ച കേസ് അതിലൊന്നാണ്. വെള്ളാപ്പള്ളി നടേശനുമായി ബന്ധപ്പെട്ട വിവാദ പ്രസംഗ കേസ്, സ്വർണക്കടത്ത് കേസ് എന്നിവ ആലുവയിൽ വാർത്തയായി. ആലുവ കോടതിയുമായി ബന്ധപ്പെട്ടും ഒരു കുറ്റകൃത്യം നടന്നു. താത്കാലിക ജീവനക്കാരിയെ നിരന്തരം ലൈംഗിക ചൂഷണം ചെയ്ത ജീവനക്കാരന് കഴിഞ്ഞ വർഷമാണ് ശിക്ഷ ലഭിച്ചത്. രണ്ട് നൂറ്റാണ്ടിന്‍റെ പാരമ്പര്യം 200 വർഷം മുമ്പ് ജില്ലാ കോടതി ആലുവയിലാണ് പ്രവർത്തിച്ചിരുന്നത്. ബ്രിട്ടീഷ് ഭരണകാലം മുതൽ പ്രവർത്തിക്കുന്ന ആലുവ കോടതിയിൽ അന്നു മുതൽ എണ്ണിയാലൊടുങ്ങാത്ത കേസുകൾക്ക് വേദിയായിട്ടുണ്ട്. 1810 മുതൽ 1815 വരെ തിരുവതാംകൂർ ഭരിച്ചിരുന്ന റാണി ഗൗരി ലക്ഷ്‌മീഭായിയാണ് ജില്ലാ കോടതി അനുവദിച്ചത്. ഇന്ന് യുസി കോളജ് പ്രവർത്തിക്കുന്ന കച്ചേരി മാളിക എന്ന കെട്ടിടമാണ് അന്നത്തെ ജില്ലാ കോടതി. പിന്നീട് ജില്ലാ കോടതി നോർത്ത് പറവൂരിലേക്കും മറ്റു കോടതികൾ ആലുവയിലേക്കും മാറ്റുകയായിരുന്നു. 1985 മാർച്ച് എട്ടിനാണ് മുൻസിഫ് കോടതി ആലുവയിൽ പ്രവർത്തനം ആരംഭിക്കുന്നത്. ഇന്ന് "വിടവാങ്ങൽ' യോഗം ഇന്ന് അഭിഭാഷകരുടെ നേതൃത്വത്തിൽ വിടവാങ്ങൽ യോഗം കോടതി മുറ്റത്ത് നടക്കും. ജീർണാവസ്ഥയിലായ കെട്ടിടം ജൂൺ 1 ന് പൊളിച്ചുതുടങ്ങും. നിർമാണം തീരുന്നത് വരെ ഒരു കിലോമീറ്റർ അകലെയുള്ള ബിഎസ്എൻഎൽ കെട്ടിടത്തിലെ ഒരു ഭാഗത്ത് വാടകയ്ക്ക് പ്രവർത്തിക്കും.

അവധിക്കാലത്ത് ലഹരിക്കെതിരെ സംസ്കൃതം അധ്യാപകർ‌

കൊച്ചി: അവധിക്കാലത്ത് ലഹരിവിരുദ്ധ ബോധവത്കരണ സന്ദേശവുമായി അധ്യാപകരുടെ ദൃശ്യാവിഷ്കാരവും റാലിയും. ജില്ലയിലെ സർക്കാർ, എയ്ഡഡ് യുപി സ്കൂളുകളിലെ സംസ്കൃതം അധ്യാപകരാണ് വ്യത്യസ്തമായ ബോധവത്കരണവുമായി രംഗത്തെത്തിയത്. നോർത്ത് പറവൂർ എസ്എൻഎച്ച്എസ്എസ് (പുല്ലങ്കുളം) സ്കൂളിൽ നടന്ന സംസ്കൃത അധ്യാപക സംഗമത്തിന്‍റെ തുടർച്ചയായാണ് പരിപാടി സംഘടിപ്പിച്ചത്. സ്കൂളിൽനിന്ന് പെരുവാരം ജംഗ്ഷൻ വരെ ലഹരിവിരുദ്ധ ബോധവത്കരണ റാലി നടത്തി. പറവൂർ മുനിസിപ്പൽ കൗൺസിലർ സജി നമ്പിയത്ത് റാലി ഫ്ലാഗ് ഓഫ് ചെയ്തു. ലഹരിക്കെതിരെയുള്ള പ്ലക്കാർഡുകളും മുദ്രാവാക്യങ്ങളും ഗാനങ്ങളും റാലിയിൽ അകന്പടിയായി. സംസ്കൃതത്തിൽ തയാറാക്കിയ ലഹരിവിരുദ്ധ പോസ്റ്ററുകളും വേറിട്ട കാഴ്ചയായി. ലഹരിയുടെ അപകടങ്ങളെക്കുറിച്ച് അവബോധം പകരുന്ന ദൃശ്യാവിഷ്കാരത്തിന് വിവിധ അധ്യാപകർ നേതൃത്വം നൽകി.

മാർപാപ്പയ്ക്കുവേണ്ടി കൃതജ്ഞതാബലി

കൊച്ചി: ആഗോള കത്തോലിക്ക സഭയുടെ 267-ാം മാര്‍പാപ്പയായി സ്ഥാനാരോഹണം ചെയ്ത ലെയോ പതിനാലാമന്‍ പാപ്പയ്ക്ക് പ്രാര്‍ഥനാശംസകള്‍ അര്‍പ്പിച്ചു കൃതജ്ഞതാ ബലി. എറണാകുളം സെന്‍റ് ഫ്രാന്‍സിസ് അസീസി കത്തീഡ്രലില്‍ നടന്ന ദിവ്യബലിയ്ക്ക് വരാപ്പുഴ ആര്‍ച്ച് ബിഷപ് ഡോ.ജോസഫ് കളത്തിപ്പറമ്പില്‍ മുഖ്യകാര്‍മികത്വം വഹിച്ചു. വികാരി ജനറല്‍മാരായ മോണ്‍. മാത്യു കല്ലിങ്കല്‍, മോണ്‍. മാത്യു ഇലഞ്ഞിമിറ്റം, ചാന്‍സലര്‍ ഫാ.എബിജിന്‍ അറക്കല്‍, അഗസ്റ്റീനിയന്‍ സഭ കേരള ഘടകം സുപ്പീരിയര്‍ ഫാ.വില്‍സണ്‍, ഫാ. പീറ്റര്‍ കൊച്ചുവീട്ടില്‍, ഫാ. യേശുദാസ് പഴമ്പിള്ളി എന്നിവര്‍ സഹകാര്‍മികരായിരുന്നു. ദിവ്യബലിക്ക് മുന്‍പ് ആര്‍ച്ച് ബിഷപ് പേപ്പല്‍ പതാക ഉയര്‍ത്തി.

"വയോജനങ്ങളെ ചേര്‍ത്തു നിര്‍ത്തേണ്ടത് സമൂഹത്തിന്‍റെ ഉത്തരവാദിത്വം'

കൊച്ചി: വയോജനങ്ങളെ ജീവിത സായാഹ്നത്തില്‍ ചേര്‍ത്തു നിര്‍ത്തേണ്ടത് സമൂഹത്തിന്‍റെ ഉത്തരവാദിത്വമാണെന്ന് കെ.എന്‍. ഉണ്ണികൃഷ്ണന്‍ എംഎല്‍എ. സര്‍ക്കാരിന്‍റെ നാലാം വാര്‍ഷികാഘോഷത്തിന്‍റെ ഭാഗമായി മറൈന്‍ഡ്രൈവില്‍ സാമൂഹ്യനീതി വകുപ്പിന്‍റെ പ്രദര്‍ശന വേദിയില്‍ നടന്ന സെമിനാര്‍ ഉദ്ഘാടനം ചെയ്യുകയായിരുന്നു അദ്ദേഹം. ഓര്‍ഫനേജ് കണ്‍ട്രോള്‍ ബോര്‍ഡ് കോ-ഓർഡിനേറ്റര്‍ ലൈജി ജേക്കബ്, സാമൂഹ്യ സുരക്ഷാ മിഷന്‍ ജില്ലാ കോ-ഓർഡിനേറ്റര്‍ കെ.സി. സുനിത, ഭിന്നശേഷി വിഭാഗം ജില്ലാ കോ-ഓർഡിനേറ്റര്‍ ആര്‍. ദിവ്യ, പ്രൊബേഷന്‍ ഓഫീസര്‍ ബിബിന്‍ ജോസ്, ജില്ലാ ട്രാന്‍സ്‌ജെന്‍ഡര്‍ ജസ്റ്റിസ് ബോര്‍ഡ് മെമ്പര്‍ റിനു മെഹര്‍, ജില്ലാ നശാമുക്ത് ഭാരത് കോ-ഓർഡിനേറ്റര്‍ ഡോ. ജാക്‌സണ്‍ തോട്ടുങ്കല്‍ എന്നിവര്‍ പ്രസംഗിച്ചു. photo എന്‍റെ കേരളം പ്രദര്‍ശന വിപണന മേളയില്‍ സാമൂഹ്യനീതി വകുപ്പ് സംഘടിപ്പിച്ച സെമിനാര്‍ കെ.എന്‍. ഉണ്ണികൃഷ്ണന്‍ എംഎല്‍എ ഉദ്ഘാടനം ചെയ്യുന്നു.

ജനസേവ ശിശുഭവനിലെ ആദ്യഅംഗം ശിവ വിവാഹിതനായി

ആലുവ: ജനസേവ ശിശുഭവനിലെ ആദ്യ അംഗമായെത്തിയ ശിവ മുരുകേശ് വിവാഹിതനായി. ഇടുക്കി പൂപ്പാറ പുത്തൻപുരയ്ക്കൽ വീട്ടിൽ ജയൻ - മുരുകേശ്വരി ദമ്പതികളുടെ മകൾ കാർത്തികയാണ് വധു. ആലുവ മഹാദേവ ക്ഷേത്രത്തിലാണ് ഇരുവരും വിവാഹിതരായത്. ജനസേവ ശിശുഭവൻ ചെയർമാൻ ജോസ് മാവേലി ക്ഷേത്രത്തിലെ ചടങ്ങുകൾക്ക് നേതൃത്വം നൽകി. 1999 ൽ ജനസേവ ശിശുഭവൻ ആരംഭിച്ചപ്പോഴുള്ള ആദ്യ ബാച്ചിൽപ്പെട്ട കുട്ടിയായിരുന്നു ശിവ. ഹൈസ്കൂൾ തലം തുടങ്ങി കോളജ് വരെ നിരവധി ഫുട്ബോൾ ടൂർണമെന്‍റുകളിൽ പങ്കെടുക്കുകയും ക്യാപ്റ്റൻ സ്ഥാനം വഹിക്കുകയും ചെയ്തിട്ടുണ്ട്. ദീർഘകാലം ജനസേവ ബോയ്സ് ഹോമിലെ കുട്ടികളുടെ ഗ്രൂപ്പ് ലീഡറായും പ്രവർത്തിച്ചിട്ടുണ്ട്. ജനസേവ ശിശുഭവന്‍റെ അഭിമാനമായ ബികോം ബിരുദധാരിയായ ശിവ മുരുകേഷ് ഇപ്പോൾ കേരള പോലീസിൽ പാലാരിവട്ടം സ്റ്റേഷനിലെ സിപിഒ ആണ്. ജനസേവ ഫുട്ബോൾ അക്കാദമിയിലെ ചിട്ടയായ കായികപരിശീലനം ശിവയെ പോലീസ് സെലക്ഷനും സഹായിച്ചു.

എറണാകുളം മാര്‍ഷലിംഗ് യാര്‍ഡിനെ ടെർമിനലായി വികസിപ്പിക്കണം: ഹൈബി

കൊച്ചി: എറണാകുളം മാര്‍ഷലിംഗ് യാര്‍ഡിനെ നാല് പ്ലാറ്റ്‌ഫോമുകളുള്ള ഒരു പുതിയ ടെര്‍മിനലായി വികസിപ്പിച്ച് മെട്രോ, റോഡ്, ജല ഗതാഗതം ഉള്‍പ്പെടെ മള്‍ട്ടിമോഡല്‍ ഗതാഗത സംവിധാനവുമായി സംയോജിപ്പിക്കണമെന്ന് ഹൈബി ഈഡന്‍ എംപി. തിരുവനന്തപുരത്ത് ദക്ഷിണ റെയില്‍വേ ജനറല്‍ മാനേജര്‍ ആര്‍.എന്‍. സിംഗിന്‍റെ അധ്യക്ഷതയില്‍ നടന്ന യോഗത്തിലാണ് എംപി ഈ ആവശ്യം മുന്നോട്ടു വച്ചത്. മെട്രോ റെയില്‍, വാട്ടര്‍ മെട്രോ, വൈറ്റില മൊബിലിറ്റി ഹബ് എന്നിവയുമായുള്ള സാമീപ്യം ഇവിടെ ഒരു മള്‍ട്ടിമോഡല്‍ ഗതാഗത സംവിധാനമായി സംയോജിപ്പിക്കുന്നതിന് വളരെയധികം സാധ്യതകളുണ്ട്. സൗത്ത്, നോര്‍ത്ത് റെയില്‍വേ സ്റ്റേഷനുകളിലെ തിരക്ക് പരിഹരിക്കുന്നതിന് മാര്‍ഷലിംഗ് യാര്‍ഡിനെ നാല് പ്ലാറ്റ്‌ഫോമുകളുള്ള ഒരു പുതിയ ടെര്‍മിനലായി വികസിപ്പിക്കേണ്ടത് അത്യാവശ്യമാണ്. കൂടുതല്‍ പിറ്റ് ലൈനുകളും സ്റ്റേബിളിംഗ് ലൈനുകളും നിര്‍മിച്ച് നിലവിലുള്ള കോച്ചിംഗ് ഡിപ്പോ വികസിപ്പിക്കണം. എറണാകുളം മാര്‍ഷലിംഗ് യാര്‍ഡില്‍ പുതിയ ടെര്‍മിനല്‍ വികസിപ്പിക്കുന്ന കാര്യം പരിശോധനയിലാണെന്ന് ദക്ഷിണ റയില്‍വേ ജനറല്‍ മാനേജര്‍ പറഞ്ഞു.

ചെട്ടിക്കാട് ഊട്ടുതിരുനാൾ; എട്ടാമിടം നാളെ

പറവൂർ: ചെട്ടിക്കാട് വിശുദ്ധ അന്തോണീസിന്‍റെ തീർഥാടന കേന്ദ്രത്തിൽ ഊട്ടു തിരുനാൾ എട്ടാമിടം നാളെ നടക്കും. രാവിലെ 10ന് ഈ വർഷം ആദ്യകുർബാന സ്വീകരിച്ച കുട്ടികളുടെ കൂട്ടായ്മ നടക്കും. തീർഥാടകരുടെ വീടുകളിൽ നിന്ന് ആദ്യ കുർബാന സ്വീകരിച്ച നിരവധി കുട്ടികൾ വെള്ള വസ്ത്രങ്ങളണിഞ്ഞ് മാതാപിതാക്കളോടൊപ്പം തീർത്ഥാടന കേന്ദ്രത്തിൽ എത്തിചേർന്ന് പ്രദക്ഷിണമായിദേവാലയത്തിലേക്ക് പ്രവേശിക്കും. തുടർന്ന് ദിവ്യബലി, നൊവേന, ആരാധന കുട്ടികൾക്കായുള്ള അഭിഷേക പ്രാർത്ഥന എന്നിവ നടക്കും ഫാ. മിഥുൻ മെന്‍റസ് മുഖ്യകാർമികനാകും. തുടർന്ന് കുട്ടികൾക്ക് തീർഥാടന കേന്ദ്രം ഓർമഫലകം സമ്മാനിക്കും. രാവിലെ 6.15 മുതൽ വൈകിട്ട് 6.30 വരെ തുടർച്ചയായി ദിവ്യബലി,നൊവേന, ആരാധന എന്നിവ നടക്കും. തീർഥാടകർക്ക് വിശുദ്ധന്‍റെ തിരുശേഷിപ്പുകൾ വണങ്ങുന്നതിനും പൊൻനാവ് നേർച്ചയ്ക്കും അടിമ സമർപ്പണത്തിനും വിപുലമായ ക്രമീകരണങ്ങൾ ഒരുക്കിയിട്ടുണ്ടെന്ന് റെക്ടർ റവ. ഡോ. ബെന്നി വാഴക്കൂട്ടത്തിൽ, ഫാ. അജയ് ആന്‍റണി പുത്തൻപറമ്പിൽ എന്നിവർ അറിയിച്ചു.

ആലുവ സബ് ജയിൽ റോഡിൽ ബിഎസ്എൻഎൽ കേബിളുകൾ തടസം; കാന നവീകരണം മുടങ്ങി

ആലുവ: സബ് ജയിൽ റോഡിൽ ഗ്രൗണ്ടിന് മുന്നിലെ കാന നവീകരണം മുടങ്ങി. ബിഎസ്എൻഎൽ കേബിളുകൾ മാറ്റി സ്ഥാപിക്കാനുള്ള കാലതാമസത്തെ തുടർന്നാണ് നവീകരണം നിർത്തിവച്ചത്. ഈഎസ്ഐ റോഡ് ആരംഭിക്കുന്നിടത്ത് കുറുകെയായി കാന പുതിയതായി പണിയേണ്ടതുണ്ട്. എന്നാൽ ബന്ധിപ്പിക്കേണ്ട പഴയ കാനയുടെ അകത്ത് ലാൻഡ് ഫോൺ കേബിളുകൾ ഉള്ളതിനാൽ അത് മാറ്റാതെ ജോലി ചെയ്യാനാകുന്നില്ലെന്നാണ് കരാറുകാരൻ പറയുന്നത്. ബിഎസ്എൻഎൽ അധികൃതരോട് കേബിളുകൾ മാറ്റി സ്ഥാപിക്കാൻ ആവശ്യപ്പെട്ടിട്ടുണ്ട്. ഈ മേഖലയിൽ കാനകൾ തുടർച്ചയായി ഇല്ലാത്തതിനാൽ മുനിസിപ്പൽ ഗ്രൗണ്ടിലെ വെള്ളം മുഴുവൻ കുത്തിയൊഴുകി ഇവിടെ ഗതാഗത തടസമുണ്ടാകാറുണ്ട്. സമീപത്തെ വക്കീൽ ഓഫീസുകളിൽ വെള്ളം കയറിയ സംഭവം വരെ ഉണ്ടായിട്ടുണ്ട്. കഴിഞ്ഞതവണത്തെ കനത്ത മഴയിൽ ഇവിടെ പ്രവർത്തിക്കുന്ന ലോഡ്ജിലേക്കാണ് മഴവെള്ളം കുത്തിയൊഴുകിയെത്തിയത്.

ബൈക്കുകൾ കൂട്ടിയിടിച്ചുണ്ടായ അപകടത്തിൽ യുവാവിന് ദാരുണാന്ത്യം

മൂവാറ്റുപുഴ: ബൈക്കുകൾ കൂട്ടിയിടിച്ചുണ്ടായ അപകടത്തിൽ യുവാവിന് ദാരുണാന്ത്യം. മുളവൂർ പൊന്നിരിക്കപ്പറന്പിൽ ഇർഷാദിയ മസ്ജിദിനു സമീപം ശനിയാഴ്ച രാത്രി 9.30നുണ്ടായ അപകടത്തിൽ തൊടുപുഴ ചിറ്റൂർ പള്ളിക്കാട്ടിൽ ദാസിന്‍റെ മകൻ ആകാശാ(24)ണ് മരിച്ചത്. മൂവാറ്റുപുഴയിൽ നിന്നും ചെറുവട്ടൂരിലേക്ക് പോകുകയായിരുന്ന ആകാശ് സഞ്ചരിച്ച ബൈക്ക് എതിർദിശയിൽ പൊന്നിരിക്കപറന്പ് ഭാഗത്തുനിന്നും വരികയായിരുന്ന വൈദ്യുത സ്കൂട്ടറുമായി കൂട്ടിയിടിക്കുകയായിരുന്നു. അപകടത്തിൽ ഗുരുതരമായി പരിക്കേറ്റ ആകാശിനെ മൂവാറ്റുപുഴയിലെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും ചികിത്സയിലിരിക്കേ മരിച്ചു. എതിർദിശയിൽ വന്ന വൈദ്യുത സ്കൂട്ടറിലെ യാത്രികരായ നെല്ലിക്കുഴി ആലക്കാട് അസ്ലാം കബീർ, അസ്ഫാൻ എന്നിവരെ പരിക്കുകളോടെ കോലഞ്ചേരി മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. മൂവാറ്റുപുഴ എച്ച്ഡിഎഫ്സി ബാങ്കിൽ ജോലി ചെയ്യുകയായിരുന്നു ആകാശ്. സംസ്കാരം നടത്തി. മാതാവ്: സലി. സഹോദരൻ: ദിനിൽ.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]