പാലക്കാട് : ലഹരിക്കെതിരെ അട്ടപ്പാടി ആദിവാസി സമഗ്ര വികസന പദ്ധതി കുടുംബശ്രീ മിഷൻ മുഖേന നടപ്പാക്കുന്ന ‘നാമ് ഏകിലാ’ (നമുക്ക് ഉണരാം) ഇന്ന് രാവിലെ 11 ന് അഗളി ഇഎംഎസ് ഓഡിറ്റോറിയത്തിൽ എക്സൈസ് മന്ത്രി എം.ബി. രാജേഷ് ഉദ്ഘാടനം ചെയ്യും.
എൻ. ഷംസുദ്ദീൻ എംഎൽഎ അധ്യക്ഷനാവും. ജില്ലാ കളക്ടർ മൃണ്മയി ജോഷി മുഖ്യാതിഥിയാകും. ലഹരി ഉപയോഗത്തിനെതിരെ പുതുതലമുറയെ ബോധവത്കരിക്കുക, കായിക, മാനസിക വികാസങ്ങൾക്കു പിന്തുണ നൽകി ആരോഗ്യമുള്ള ജനതയെ വളർത്തിയെടുക്കുക, അട്ടപ്പാടിയുടെ ഭക്ഷ്യ സംസ്കാരത്തിന്റെ പ്രാധാന്യം തിരിച്ചറിയുക എന്നീ ലക്ഷ്യങ്ങളോടെയാണ് പരിപാടി സംഘടിപ്പിക്കുന്നത്. പരിപാടിയോടനുബന്ധിച്ച് അട്ടപ്പാടിയിൽ ആരംഭിക്കുന്ന സ്നേഹിത സെന്ററിനായി അനുവദിച്ച കെട്ടിടത്തിന്റെ ഉദ്ഘാടനം, ആദിവാസി യുവജന ക്ലബ്ബുകൾക്കുള്ള സ്പോർട്സ് കിറ്റ് വിതരണം, ട്രൈബൽ ഫുഡ് ഫെസ്റ്റ് ഉദ്ഘാടനം എന്നിവയും നടക്കും. കൂടാതെ ദേശീയ അവാർഡ് ജേതാവായ പിന്നണി ഗായിക നഞ്ചിയമ്മയെ മന്ത്രി ആദരിക്കും.
ഒറ്റപ്പാലം സബ് കളക്ടറും അട്ടപ്പാടി ഓഫീസറുമായ ഡി. ധർമ്മലശ്രീ മികച്ച ചെറുധാന്യ ഭക്ഷ്യവിഭവ ഗ്രൂപ്പുകളെ അനുമോദിക്കും. അട്ടപ്പാടി ബ്ലോക്ക് പഞ്ചായത്ത് പ്രസിഡന്റ് മാരുതി മുരുകൻ "നാമ് ഏകിലാ’ പ്രതിജ്ഞ ചൊല്ലും. കുടുംബശ്രീ ജില്ലാ മിഷൻ കോ- ഓർഡിനേറ്റർ ബി.എസ്. മനോജ്, കില ഡയറക്ടർ ജനറൽ ജോയ് ഇളമണ് സ്നേഹിത ബ്രോഷർ പ്രകാശനം നിർവഹിക്കും. കുടുംബശ്രീ എക്സിക്യൂട്ടീവ് ഡയറക്ടർ ജാഫർ മാലിക്, ജില്ലാ പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സണ് പി.സി. നീതു, ഗ്രാമപഞ്ചായത്ത് പ്രസിഡന്റുമാരായ അംബിക ലക്ഷ്മണൻ, പി. രാമമൂർത്തി, ജ്യോതി അനിൽകുമാർ, സിഡബ്ല്യുസി ചെയർമാൻ എം.വി. മോഹനൻ, കുടുംബശ്രീ അട്ടപ്പാടി ആദിവാസി സമഗ്രവികസന പദ്ധതി കോഓഡിനേറ്റർ കെ.പി. കരുണാകരൻ, ജനപ്രതിനിധികൾ, ഉദ്യോഗസ്ഥർ എന്നിവർ പങ്കെടുക്കും.