പാലക്കാട്: ജില്ലാ മെഡിക്കൽ ഓഫീസ്(ആരോഗ്യം), ടിബി ഓഫീസ്, ഐഎംഎ എന്നിവയുടെ സംയുക്താഭിമുഖ്യത്തിൽ "ഒന്നായി തുല്യരായി തടുത്തു നിർത്താം’ എന്ന പേരിൽ സംഘടിപ്പിക്കുന്ന ലോക എയ്ഡ്സ് വിരുദ്ധ ദിനാചരണ പരിപാടികൾക്ക് ജില്ലയിൽ തുടക്കമായി.
ജില്ലാതല ഉദ്ഘാടനം പാലക്കാട് ഐഎംഎ ഹാളിൽ നഗരസഭാ ചെയർപേഴ്സണ് പ്രിയ അജയൻ ഉദ്ഘാടനം ചെയ്തു. ജില്ലാ പഞ്ചായത്ത് വൈസ് പ്രസിഡന്റ് സി.കെ. ചാമുണ്ണി അധ്യക്ഷനായി.
ജില്ലാ മെഡിക്കൽ ഓഫീസർ(ആരോഗ്യം) ഡോ. കെ.പി. റീത്ത എയ്ഡ്സ് വിരുദ്ധ ദിനാചരണ സന്ദേശം നൽകി. ഐഎംഎ പാലക്കാട് സെക്രട്ടറി ഡോ. ആർ. സത്യജിത്ത് എയ്ഡ്സ് വിരുദ്ധ ദിന പ്രതിജ്ഞ ചൊല്ലിക്കൊടുത്തു.
സീമെറ്റ് കോളജ് ഓഫ് നഴ്സിംഗ് വിദ്യാർത്ഥികൾ അവതരിപ്പിച്ച മൂകാഭിനയം, മിസ്റ്റിക്ക് എറ മജീഷ്യൻ ശരവണൻ അവതരിപ്പിച്ച മാജിക്ക് ഷോ, വെൻട്രിലോക്വിസം എന്നിവ അരങ്ങേറി.
ഉദ്ഘാടന ചടങ്ങുകൾക്ക് മുന്നോടിയായി സംഘടിപ്പിച്ച ബോധവത്കരണ റാലി ഡെപ്യൂട്ടി ജില്ലാ മെഡിക്കൽ ഓഫീസർ(ആരോഗ്യം) ഡോ. കെ.ആർ. ശെൽവരാജ് ഫ്ലാഗ് ഓഫ് ചെയ്തു.
സ്റ്റുഡന്റ് പോലീസ് കേഡറ്റുകൾ, റാലിയിൽ കേരള സ്റ്റേറ്റ് എയ്ഡ്സ് കണ്ട്രോൾ സൊസൈറ്റി സുരക്ഷാ പ്രോജക്ടുകൾ, പിഡിഎൻപി പ്ലസ്, ജില്ലാ ടി.ബി ഓഫീസ്, ജില്ലാ മെഡിക്കൽ ഓഫീസ്(ആരോഗ്യം) ഉദ്യോഗസ്ഥർ, ജീവനക്കാർ എന്നിവർ പങ്കെടുത്തു. റാലിക്കു മുന്നോടിയായി സിമെറ്റ് കോളജ് വിദ്യാർഥിനികളുടെ ഫ്ലാഷ് മോബും അരങ്ങേറി.
എയ്ഡ്സ് വിരുദ്ധ ദിനാചരണത്തോടനുബന്ധിച്ച് ജില്ലാ മെഡിക്കൽ ഓഫീസിന്റെ വിവിധ കീഴ്സ്ഥാപനങ്ങളിൽ ദീപം തെളിയിക്കൽ, ബോധവത്കരണ റാലികൾ, ക്ലാസ്സുകൾ എന്നിവ സംഘടിപ്പിച്ചു. കേരള എയ്ഡ്സ് കണ്ട്രോൾ സൊസൈറ്റിയുടെ അഭിമുഖ്യത്തിലുള്ള ബോധവത്കരണ കലാരൂപങ്ങൾ ഈമാസം ജില്ലയിലെ വിവിധയിടങ്ങളിൽ പര്യടനം നടത്തും.
അറുപതോളം വേദികളിൽ അരങ്ങേറുന്ന പ്രദർശനങ്ങൾ അവതരിപ്പിക്കുന്നത് മിസ്റ്റിക്ക് എറ, മനോരഞ്ജൻ കോഴിക്കോട്, തണ്ണീർമുക്കം സദാശിവൻ എന്നിവരാണ്. മാജിക്ക് ഷോ, വെൻട്രിലോക്വിസം, തെരുവു നാടകം, കഥാപ്രസംഗം എന്നീ കലാരൂപങ്ങൾ ജില്ലയിൽ വിവിധയിടങ്ങളിൽ അരങ്ങേറും.