അബുദാബി: മാർത്തോമ യുവജനസഖ്യം ആതിഥ്യമരുളുന്ന ഇരുപതാമത് ത്രിദ്വിന ഗൾഫ് മാർത്തോമ്മാ യൂത്ത് കോണ്ഫറൻസ് 10 മുതൽ 12 വരെ മുസഫ മാർത്തോമ്മാ ദേവാലയത്തിൽ നടക്കും. ജിസിസി രാജ്യങ്ങളിലെ 18 ഇടവകകളിൽ നിന്നായി ആയിരത്തിലേറെ യുവജന പ്രതിനിധികൾ സമ്മേളനത്തിൽ പങ്കെടുക്കും.
10ന് രാവിലെ 9.30നു നടക്കുന്ന പൊതുസമ്മേളനത്തിൽ യുഎഇ സഹിഷ്ണത വകുപ്പ് മന്ത്രി ഷെയ്ഖ് നഹ്യാൻ ബിൻ മുബാറക്ക് അൽ നഹ്യാൻ ഉദ്ഘാടനകർമ്മം നിർവഹിക്കും. മാർത്തോമ്മാ സഭയുടെ പരമാധ്യക്ഷൻ ഡോ. ജോസഫ് മാർത്തോമ്മാ മെത്രാപ്പോലീത്ത അധ്യക്ഷത വഹിക്കും. യുഎഇ പ്രസിഡന്‍റിന്‍റെ മതകാര്യ ഉപദേഷ്ട്ടാവ് ഷെയ്ഖ് അലി അൽ ഹാഷ്മി, യുവജനസഖ്യം കേന്ദ്ര പ്രസിഡന്‍റ് തോമസ് മാർ തീത്തോസ് , ലുലു ഗ്രൂപ്പ് ചെയർമാൻ എം.എ. യൂസഫലി, ഗൾഫ് മേഖല ആംഗ്ലിക്കൻ ബിഷപ്പ് മൈക്കിൾ അഗസ്റ്റിൻ, യൂത്ത് കോണ്ഫറൻസ് ചെയർമാൻ റവ. ബാബു പി. കുലത്താക്കൽ, വൈസ് ചെയർമാൻ റവ. ബിജു സിപി എന്നിവർ പങ്കെടുക്കും. സുവനീറിന്‍റെ പ്രകാശനകർമ്മവും വിവിധ മത്സരങ്ങളിലെ വിജയികൾക്കുള്ള സമ്മാനദാനവും സാംസ്കാരിക പരിപാടികളും ഒരുക്കിയിട്ടുണ്ട്.
മരുഭൂമിയുടെ സുവിശേഷം എന്ന മുഖ്യ ചിന്തവിഷയത്തെ അടിസ്ഥാനമാക്കി മൂന്നു ദിവസം നടക്കുന്ന വിവിധ ക്ലാസുകൾക്കു പദ്മശ്രീ സുനിത കൃഷ്ണൻ, റവ. മോത്തി വർക്കി, ജോസഫ് അന്നക്കുട്ടി ജോസ് എന്നിവർ നേതൃത്വം നൽകും. യുഎഇയിലെ സാമൂഹ്യ രംഗത്ത് നിസ്തുല സേവനം നൽകുന്ന വ്യക്തികളെ സമ്മേളനത്തിന്‍റെ വിവിധ സെഷനുകളിൽ പരിചയപ്പെടുത്തും. ഇതോടനുബന്ധിച്ചു കൊച്ചുകുട്ടികൾക്കായി കിഡ്സ് കോണ്ഫറൻസും ഒരുക്കിയിട്ടുണ്ടന്ന് സംഘാടകർ വാർത്താസമ്മേളനത്തിൽ അറിയിച്ചു .
വാർത്താസമ്മേളനത്തിൽ യൂത്ത് കോണ്ഫറൻസ് ചെയർമാൻ റവ. ബാബു പി. കുലത്താക്കൽ, വൈസ് ചെയർമാൻ റവ. ബിജു സി.പി. , ജനറൽ കണ്‍വീനർ ബോബി ജേക്കബ്, ഫിനാൻസ് കണ്‍വീനർ ഡെന്നി കെ ജോർജ്, പ്രോഗ്രാം കണ്‍വീനർ സുനിൽ ജോണ് സാമുവേൽ, മീഡിയ കണ്‍വീനർ നിബു സാം ഫിലിപ്പ്, സഖ്യം സെക്രട്ടറി ജെറിൻ കുര്യൻ ജേക്കബ്, ട്രഷറർ ഷിജിൻ പാപ്പച്ചൻ എന്നിവർ പങ്കെടുത്തു.
റിപ്പോർട്ട്: അനിൽ സി. ഇടിക്കുള