സ്വതന്ത്രവാദം കുടുംബഭദ്രത തകർക്കും: ക്യുകെഐസി പ്രൊഫഷണൽസ് ഫാമിലി മീറ്റ് : Deepika.com Nri News Middle East & Gulf

ദോഹ: സമൂഹത്തിൽ പ്രചരിക്കുന്ന അധാർമികതയും അരാചകത്വവും വ്യാപകമാകാൻ കാരണം അതിരുകളില്ലാത്ത സ്വതന്ത്രവാദമാണെന്നും, അത് കുടുംബഭദ്രത തകർക്കുമെന്നും ക്യുകെഐസി പ്രൊഫഷണൽ വിംഗ് സംഘടിപ്പിച്ച പ്രൊഫഷണൽസ് ഫാമിലി മീറ്റ് അഭിപ്രായപ്പെട്ടു.

നവലിബറൽ വാദങ്ങൾ നൂറ്റാണ്ടുകൾ കൊണ്ട് നാം കരഗതമാക്കിയ നവോത്ഥാന മുന്നേറ്റങ്ങളിൽ നിന്ന് പിന്നോട്ട് വലിക്കുന്നതാണെന്ന് മുഖ്യാതിഥിയായി സംസാരിച്ച വിസ്ഡം സ്റ്റുഡന്‍റ്സ് പ്രസിഡന്‍റ് അർഷദ് അൽഹികമി ചൂണ്ടിക്കാട്ടി. മതനിരാസ പ്രവർത്തനങ്ങളിലേക്ക് സമൂഹത്തെയും യുവത്വത്തെയും നയിക്കാനുള്ള കൊണ്ട്പിടിച്ച ശ്രമങ്ങളിലാണ് പലരും. ധാർമിക മൂല്യങ്ങൾ മുറുകെ പിടിച്ച് മുന്നോട്ട് പോകാനുള്ള ഉത്തരവാദിത്വം പ്രൊഫഷണൽസ് ഉൾപ്പെടെയുള്ള സമൂഹത്തിന്‍റെ നാനാവിഭാഗം ജനങ്ങൾക്കുമുണ്ടെന്നും അദ്ദേഹം ഓർമ്മപ്പെടുത്തി.

സമ്മേളനം റിയാദ മെഡിക്കൽ സെന്‍റർ എം.ഡി ജംഷീർ ഹംസ ഉദ്ഘാടനം ചെയ്തു. സ്വലാഹുദ്ധീൻ സ്വലാഹി, മുജീബ് റഹ്മാൻ മിശ്കാത്തി, ഉമർ ഫൈസി, നിയാസ് കാവുങ്ങൽ, ഡോ. അസീം മുഹമ്മദ് തുടങ്ങിയവർ സംസാരിച്ചു.

നഴ്സറി വിദ്യാർഥികൾക്കായുള്ള ന്ധലിറ്റിൽ വിംഗ്സ്’ന് അസ്ലം കാളികാവ്, ജൈസൽ എന്നിവർ നേതൃത്വം നൽകി.

ബാലാവകാശ കമ്മീഷൻ കുട്ടികളുടെ സുരക്ഷ ഉറപ്പുവരുത്തണമെന്ന് മീറ്റിന്‍റെ ഭാഗമായി സംഘടിപ്പിച്ച വിദ്യാർത്ഥി സംഗമം ആവശ്യപ്പെട്ടു. രക്ഷിതാക്കളുടെയും അധ്യാപകരുടെയും സുരക്ഷാ വലയങ്ങളിൽ നിന്ന് കുട്ടികളെ അടർത്തിയെടുത്ത് അരക്ഷിതാവസ്ഥയിലേക്ക് തള്ളിവിടുന്ന ബാലാവകാശ കമ്മീഷന്‍റ സമീപനം പ്രതിഷേധാർഹമാണെന്നും കമ്മീഷൻ കുട്ടികളുടെ സുരക്ഷ ഉറപ്പ് വരുത്തണമെന്നും സമ്മേളനം കൂട്ടിചേർത്തു. മുജീബ് റഹ്മാൻ മിശ്കാത്തി, മുഹമ്മദ് അസ്ലം, ഹസീബ് പി.കെ, അൻസാർ ഇബ്നു ഉസ്മാൻ , തമീം ഇബ്നു സലീം എന്നിവർ സംസാരിച്ചു.