ബ്രിസ്റ്റോൾ: ബ്രിട്ടനിൽ നടന്ന പ്രാദേശിക തെരഞ്ഞെടുപ്പിൽ ബ്രിസ്റ്റോൾ ബ്രാഡ്ലി സ്റ്റോക്ക് നഗരത്തിന്റെ മേയറായി മലയാളിയായ ടോം ആദിത്യ തെരഞ്ഞെടുക്കപ്പെട്ടു. ബ്രിട്ടനിലെ ഭരണകക്ഷിയായ കണ്സർവേറ്റീവ് പാർട്ടിയുടെ ആദ്യത്തെ തെക്കേ ഇന്ത്യക്കാരനായ ജനപ്രതിനിധിയാണ് ടോം ആദിത്യ. സൗത്ത് വെസ്റ്റ് ഇംഗ്ലണ്ടിൽ ആദ്യമായിട്ടാണ് ഒരു ഇന്ത്യൻ വംശജൻ മേയറായി തെരഞ്ഞെടുക്കപ്പെടുന്നത് എന്ന പ്രത്യേകതയും ടോമിന്റെ ഈ സ്ഥാനലബ്ധിക്കുണ്ട്.
റാന്നി ഇരൂരിയ്ക്കൽ ആദിത്യപുരം തോമസ് മാത്യുവിന്റെയും ഗുലാബി മാത്യുവിന്റെയും പുത്രനും, ഇന്ത്യൻ സ്വാതന്ത്ര്യ സമര സേനാനിയും, പാലാ നഗരത്തിന്റെ ആദ്യകാല നേതാവുമായിരുന്ന വെട്ടം മാണിയുടെ പൗത്രനുമാണ് ടോം. ഭാര്യ: ലിനി. മക്കൾ: അബിഷേക്, അലീന, ആൽബെർട്ട്, അഡോണ, അൽഫോൻസ്. റോസ് പ്രീനാ, സിറിൽ പ്രണാബ് എന്നിവർ സഹോദരങ്ങളാണ്. കാഞ്ഞിരപ്പള്ളി അമൽ ജ്യോതി കോളേജിന്റെ മാനേജ്മെന്റ് കണ്സൾട്ടണ്റ്റായി ടോം മുൻപ് സേവനം ചെയ്തിട്ടുണ്ട്.
സൗത്ത് വെസ്റ്റ് ഇംഗ്ലണ്ടിലെ ബ്രിസ്റ്റോൾ സിറ്റിയും ഒൻപതു സമീപ ജില്ലകളും ഉൾപ്പെടുന്ന പോലീസ് ബോർഡിന്റെ വൈസ് ചെയർമാനായും, ബ്രിസ്റ്റോൾ സിറ്റി കൗണ്സിലിന്റെ സാമുദായിക സൗഹാർദ സമിതിയുടെ ചെയർമാനായും ടോം ആദിത്യ സേവനം ചെയ്യുന്നു. ഭരണകക്ഷിയായ കണ്സർവേറ്റീവ് പാർട്ടിക്കു ബ്രെക്സിറ്റ് പ്രതിസന്ധി കാരണം ഇംഗ്ലണ്ടിൽ 1335 ൽ അധികം കൗണ്സിലർമാരെ നഷ്ടപ്പെട്ട് കാലിടറിയപ്പോഴും, പടിഞ്ഞാറൻ ഇംഗ്ലണ്ടിൽ 2007 മുതൽ ഇക്വാലിറ്റീസ് കമ്മീഷൻ ചെയർമാനായും, പിന്നീട് കൗണ്സിലറായും, 2017 മുതൽ ഡെപ്യൂട്ടി മേയർ ആയും പ്രവർത്തിച്ച മലയാളിയായ ടോം ആദിത്യ എല്ലാ കൊടുംകാറ്റുകളെയും അതിജീവിച്ചു വീണ്ടും വൻ ഭൂരിപക്ഷത്തിൽ വിജയിക്കുകയായിരുന്നു. പടിഞ്ഞാറൻ ഇംഗ്ലണ്ടിലെ ആദ്യത്തെ ഏഷ്യൻ കൗണ്സിലർ കൂടിയാണ് അദ്ദേഹം.
തികഞ്ഞ മലയാള ഭാഷാസ്നേഹിയായ ടോം ആദിത്യ കഴിഞ്ഞ രണ്ടു പതിറ്റാണ്ടായി ഇംഗ്ലണ്ടിൽ മാനേജ്മെന്റ് കണ്സൾട്ടന്റൻറ്റായും, പ്രഭാഷകനായും, മനുഷ്യാവകാശപ്രവർത്തകനായും, സാമൂഹ്യശാസ്ത്രഗവേഷകനായും കർമരംഗത്തുണ്ട്. ജീവിതത്തിലെ വെല്ലുവിളികളെയും ബുദ്ധിമുട്ടുകളെയും തൃണവൽഗണിച്ചു മുന്നേറിയ വ്യക്തിത്വമാണ് ടോമിന്േറത്. പാലായിലും, റാന്നിയിലും, തിരുവനന്തപുരത്തും, ചങ്ങനാശേരിയിലും, എറണാകുളത്തും, ബാംഗ്ലൂരുമായി അദ്ദേഹം വിദ്യാഭ്യാസകാലഘട്ടം കഴിച്ചുകൂട്ടി. നിയമപഠനവും, എംബിഎയും പൂർത്തിയാക്കിയ ടോം അമേരിക്കയിലെ പ്രൊജക്ട് മാനേജ്മെന്റ് ഇൻസ്റിറ്റ്യൂട്ടിൽ നിന്നും, ലണ്ടനിൽ ഫിനാൻഷ്യൽ സർവീസിൽ ഉപരിപഠനവും പൂർത്തിയാക്കിയാണ് ഇംഗ്ലണ്ടിൽ കർമ്മപഥത്തിനു തുടക്കം കുറിച്ചത്. പ്രവൃത്തിമേഖലയിലും, സാമൂഹ്യപ്രവർത്തനത്തിലും ശ്രദ്ധയും അർപ്പണമനോഭാവവും പ്രതിബദ്ധതയുമാണ് റ്റോമിന്റെ വിജയക്കൂട്ട്.