ന്യൂഡൽഹി: ഫരീദാബാദ്-ഡൽഹി രൂപത സ്ഥാപിതമായി ഏഴുവർഷങ്ങൾ പിന്നിടുന്ന അവസരത്തിൽ പാലം ഫൊറോനായുടെ ആഭിമുഖ്യത്തിൽ കുടുംബസംഗമം "ഫമിലിയ 2019' ഓഗസ്റ്റ് 18 ഞായറാഴ്ച ജനക്പുരി എ- ബ്ലോക്ക് എംസിഡി ഹാളിൽ(സാന്തോം നഗർ) വച്ചു നടത്തപ്പട്ടു. ഫൊറോനയിലെ പാലം ഇൻഫന്‍റ് ജീസസ് ഫൊറോന, ദ്വാരക സെന്‍റ് പയസ് 10 ജനക്പുരി സെന്‍റ് തോമസ്, ഹരിനഗർ ചാവറ കുരിയാക്കോസ് ഏലിയാസ്, വികാസ്പുരി സെന്‍റ് എഫ്രേം, നജഫഗഡ് സേക്രട്ട് ഹാർട്ട് എന്നീ 6 ഇവകകളിലെ 900 കുടുംബങ്ങൾ ഈ സംഗമത്തിൽ പങ്കു ചേർന്നു. ഇടവകകളിലെ വ്യക്തികളെയും കുടുംബങ്ങളെയും കൂടുതൽ പരിചയപ്പെടുന്നതിനും കൂട്ടായ്മ വളർത്തുന്നതിനും ലക്ഷ്യമിട്ടുകൊണ്ടാണ് ഈ പരിപാടി സംഘടിപ്പിച്ചത്.
ഫൊറോന വികാരി റവ. ഫാ. അബ്രഹാം ചെന്പോറ്റിക്കൽ രക്ഷാധികാരിയും പി.ഇസഡ്. തോമസ് കണ്‍വീനറുമായ വിവിധ കമ്മിറ്റികൾ പരിപാടികൾക്ക് നേതൃത്വം നൽകി. ഓഗസ്റ്റ് 18 ഞായറാഴ്ച രാവിലെ 10.30ന് ഫൊറോന വികാരി റവ. ഫാ. അബ്രഹാം ചെന്പോറ്റിക്കൽ വിശിഷ്ടാതിഥികളെ സ്വാഗതം ചെയ്തു. 10.45ന് മേരി നാമധാരികളായ അമ്മമാരുടെ കാഴ്ച സമർപ്പണവും തുടർ 6 ഇടവക മധ്യസ്ഥരുടെ രൂപങ്ങളിൽ പുഷ്പഹാരങ്ങളും അർപ്പിച്ചു. രാവിലെ 11ന് ഫരീദാബാദ്-ഡൽഹി രൂപതാ മെത്രാപ്പോലീത്താ അഭി. കുര്യാക്കോസ് ഭരണിക്കുളങ്ങര ഫൊറോനയിലെ 6 ഇടവക വികാരിമാരായ റവ. ഫാ. അബ്രഹാം ചെന്പോറ്റിക്കൽ എംസ്ടി, റവ. ഫാ. ബിജു കണ്ണന്പുഴ, റവ. ഫാ.ആന്േ‍റാ കാഞ്ഞിരത്തിങ്കൽ, സിഎംഐ, റവ. ഫാ. ജോർജ് കിഴുതറ, റവ. ഫാ. സെബാസ്റ്റ്യൻ മൂലേച്ചാലിൽ, വി.സി. റവ. ഫാ. ആന്‍റൂ ആലുമ്മൂട്ടിൽ എംസ്ടി എന്നിവര്ക്കൊപ്പം തിരികൾ തെളിച്ചു പരിപാടികളുടെ ഓദ്യോഗികമായ ഉദ്ഘാടനം നിർവഹിച്ചു. തുടർന്ന് നടന്ന ആഘോഷമായ വി. കുർബാനയ്ക്ക് അഭി. കുര്യാക്കോസ് ഭരണികുളങ്ങര പിതാവ് മുഖ്യ കാർമികത്വം വഹിച്ചു. ഫൊറോനയിലെ ആറു വികാരിമാർ സഹകാർമികരായിരുന്നു.
വി. കുർബാനയ്ക്കുശേഷം ഫമിലിയ 2019ന്‍റെ സ്മരണിക അഭി. കുര്യാക്കോസ് ഭരണികുളങ്ങര പിതാവ് പ്രകാശനം ചെയ്തു. അതോടൊപ്പം ലോഗോസ് ക്വിസ് എ മുതൽ എഫ് വരെയുള്ള വിഭാഗങ്ങളിൽ ഫൊറോനയിൽ ഒന്നാംസ്ഥാനം നേടിയ ഷോണ് ക്രിസ്റ്റോ ഷാജി ഹരിനഗർ, ജൂലിയ മേരി തോമസ് ഹരിനഗർ, ക്രിസ്റ്റോ ബാബു വികാസ്പുരി, മോളി റ്റോമി പാലം, സുനിൽ വർഗീസ് ഹരിനഗർ, ജേക്കബ് എബ്രഹാം വികാസ്പുരി, സി. ബെറ്റ്സി എഫ്സിസി പാലം എന്നിവർക്കും പന്ത്രണ്ടാം ക്ലാസിൽ സയൻസ്, ആർട്സ്, കൊമേഴ്സ് വിഭാഗങ്ങളിൽ ആശിഷ് പോൾ പാലം, അനഖ ബോബി ജനക്പുരി, റോയൽ ജേക്കബ് ജോണ്സി ഹരിനഗർ ഫമിലിയ സുവനീറിന്‍റെ മുഖചിത്ര മത്സരത്തിൽ വിജയിച്ച റോബിൻ റെജി പാലം എന്നിവർക്കുള്ള അവാർഡുകൾ വിതരണം ചെയ്തു. തുടർന്ന് ഫരീദാബാദ് രൂപതാ ഡിഎസ്വൈഎമ്മിന്‍റെ കലാപരിപാടികൾ അരങ്ങേറി. ഓരോ മണിക്കൂറിലും നറുക്കെടുപ്പിലൂടെ സമ്മാനങ്ങളും വിതരണം ചെയ്തു.
സുപ്രീംകോടതി റിട്ട. ജഡ്ജി കുര്യൻ ജോസഫ് ഉത്തമ കുടുംബബന്ധങ്ങൾ സഭയുടെ അടിത്തറ എന്ന വിഷയത്തെ ആസ്പദമാക്കി ക്ലാസ് നയിച്ചു. ഓരോ ഇടവകകളുടെയും സാക്ഷിപ്ത ചരിത്രം അതാത് ഇടവക വികാരിമാർ ദൃശ്യ ശ്രാവ്യ മാധ്യമങ്ങൾ വഴി അവതരിപ്പിച്ചു. തുടർന്ന് ഫൊറോന ഗായകസംഘത്തിന്‍റെ വോയിസ് ഓഫ് ഫൊറൈൻ ഗാനമേളയും ഇടവകകളുടെ നേതൃത്വത്തിൽ വിവിധങ്ങളായ കലാപരിപാടികളും അവതരിപ്പിക്കപ്പെട്ടു. ഗിന്നസ് വേൾഡ് റിക്കാർഡ് ഉടമയായ വിൽസണ്‍ ചന്പക്കുളത്തിന്‍റെ മാസ്മരിക മായാജാലം പരിപാടിക്ക് മാറ്റുകൂട്ടി.
റിപ്പോർട്ട്: റെജി നെല്ലിക്കുന്നത്ത്