യുക്മ സ്കോട് ലൻഡ് റീജണൽ കലാമേള ഷെറ്റ്‌ലെസ്റ്റണിൽ
Wednesday, October 9, 2019 6:54 PM IST
ലണ്ടൻ: പത്താമത് യുക്മ ദേശീയ കലാമേളയുടെ മുന്നൊരുക്കമായി റീജണുകളിൽ നടക്കുന്ന മേഖലാ കലാമേളയുടെ ഭാഗമായി ഒക്ടോബർ 19 ന് (ശനി) ഗ്ലാസ്ഗോയിലെ ഷെറ്റ്‌ലെസ്റ്റൻ സെന്‍റ് പോൾസ് ദേവാലയ ഹാളിൽ കലാമേളക്ക് തിരിതെളിയും. സ്കോട്ട്ലൻഡ് മലയാളി അസോസിയേഷൻ (എസ് എം എ) ആണ് റീജണൽ കലാമേളക്ക് ആതിഥേയത്വം വഹിക്കുന്നത്.

രാവിലെ 10 ന് മത്സരങ്ങൾ ആരംഭിക്കും. റീജണൽ മത്സരങ്ങളിൽ വിജയികളാകുന്നവർക്ക്, നവംബർ 2 ന് (ശനി) മാഞ്ചസ്റ്ററിൽ നടക്കുന്ന യുക്മ ദേശീയ കലാമേളയിൽ പങ്കെടുക്കാൻ അർഹത ലഭിക്കുന്നതാണ്.

മത്സരങ്ങളിൽ പങ്കെടുക്കുവാൻ താല്പര്യമുള്ളവർ രജിസ്റ്റർ ചെയ്യുവാനായി സണ്ണി ഡാനിയേൽ 07951585396, തോമസ് പറമ്പിൽ 07765769773, ബിജു മാന്നാർ 07949333617 എന്നിവരുമായി ബന്ധപ്പെടേണ്ടതാണ്. വ്യക്തിഗത മത്സരങ്ങൾക്ക് ഓരോ മത്സര ഇനത്തിനും അഞ്ച് പൗണ്ടും ഗ്രൂപ്പ് മത്സരങ്ങൾക്ക് ഓരോ ഗ്രൂപ്പിനും 15 പൗണ്ടും ആണ് രജിസ്‌ട്രേഷൻ ഫീസ്.

മത്സരം നടക്കുന്ന സ്ഥലത്തിന്‍റെ മേൽവിലാസം: St.Paul Church Hall, Shettleston,
1651 Shettleston Road, Glasgow - G32 9AR.

മത്സര ഇനങ്ങൾ

ഏകാംഗ ഗാനം (Solo Song): പശ്ചാത്തല സംഗീതത്തിന്റെ സഹായമില്ലാതെ പാടുന്നത്. കുട്ടികൾ ഒഴികെയുള്ളവർ മലയാളം ലളിത ഗാനങ്ങൾ മാത്രമേ പാടാനായി തെരെഞ്ഞെടുക്കാവൂ. കുട്ടികളുടെ മത്സരത്തിൽ ഇംഗ്ലീഷിലോ മലയാളത്തിലോ ഉള്ള ഗാനങ്ങൾ പാടാവുന്നതാണ്. സബ്-ജൂണിയർ, ജൂണിയർ, സീനിയർ വിഭാഗങ്ങളിൽ സിനിമ ഗാനങ്ങൾ അനുവദനീയമല്ല.

പദ്യ പാരായണം (Poem Recitation): സബ്-ജൂണിയർ, ജൂണിയർ, സീനിയർ വിഭാഗങ്ങളിൽ മലയാളത്തിൽ മാത്രമുള്ള പദ്യങ്ങൾ. 5 മിനിറ്റ് സമയ പരിധിയുണ്ട്.

ഏകാംഗാഭിനയം (Mono Act): ചമയങ്ങളൊന്നുമില്ലാതെ വിവിധ കഥാപാത്രങ്ങളെ ഒരാൾ തന്നെ സ്റ്റേജിൽ അവതരിപ്പിക്കുന്ന രീതി. സബ്-ജൂണിയർ, ജൂണിയർ, സീനിയർ വിഭാഗങ്ങളിൽ മലയാളത്തിൽ മാത്രം. 5 മിനിറ്റ് സമയ പരിധിയുണ്ട്.

പ്രസംഗം (Elocution): സബ്-ജൂണിയർ, ജൂണിയർ വിഭാഗങ്ങളിൽ ഒന്നുകിൽ മലയാളത്തിലോ അല്ലെങ്കിൽ ഇംഗ്ലീഷിലോ പ്രസംഗിക്കാം. സീനിയർ വിഭാഗക്കാർക്ക് മലയാളത്തിൽ മാത്രമേ മത്സരമുള്ളൂ. 5 മിനിറ്റ് സമയ പരിധിയുണ്ട്.

ഏകാംഗ ശാസ്ത്രീയ നൃത്തം (Classical Dance Solo - Bharatanatyam & Mohiniyattam): തനതായ ശാസ്ത്രീയ ശാസ്ത്രീയ ഗാനങ്ങളോ സംഗീതമോ മാത്രമേ ഉപയോഗിക്കാവു. സിനിമ ഗാനങ്ങൾ അനുവദനീയമല്ല. ഭാരതനാട്യത്തിന്‍റേയും മോഹിനിയാട്ടത്തിന്‍റേയും ചമയങ്ങൾ അതാതു നൃത്തത്തിന് അനുയോജ്യമായ രീതിയിലുള്ളതായിരിക്കണം. സമയ പരിധി 10 മിനിറ്റ്.

നാടോടി നൃത്തം (Folk Dance): ആഘോഷാവസരങ്ങൾക്കു മാറ്റുകൂട്ടാനായി അവതരിപ്പിക്കാറുള്ള ഈ നൃത്തരൂപത്തിനു വളരെ ലളിതമായ ചുവടുവയ്പുകളാണ് സാധാരണ ഉപയോഗപ്പെടുത്താറ്. നൃത്തം ചെയ്യുന്ന ആളുടെ മേയ് വഴക്കവും സര്‍ഗശക്തിയുമാണ് ഈ നൃത്താനുഷ്ഠാനത്തിന്‍റെ അളവുകോൽ. സമയ പരിധി 7 മിനിറ്റ്.

സിനിമാറ്റിക് ഡാൻസ് (Cinematic Dance/Free style dance - single and group ): പൂർണമായ ശാസ്ത്രീയ, അർധ-ശാസ്ത്രീയ നൃത്തങ്ങൾ സിനിമാറ്റിക് ഡാൻസ് ആയി അവതരിപ്പിക്കാൻ പാടുള്ളതല്ല. അർദ്ധ-ശാസ്ത്രീയ നൃത്ത രീതി സിനിമാറ്റിക് ഡാൻസിന്‍റെ ഭാഗമാക്കുന്നതിൽ കുഴപ്പമില്ല.


കുട്ടികളുടെ വിഭാഗത്തിൽ നാല് മിനിറ്റ് വരെ ദൈർഘ്യം വരാവുന്ന വിധം കഥാവായന മത്സരവും (ഇംഗ്ലീഷിലോ മലയാളത്തിലോ) ഉണ്ടായിരിക്കുന്നതാണ്. ഏകാംഗ സിനിമാറ്റിക് ഡാൻസിന്‍റെ സമയ പരിധി 5 മിനിട്ടാണ്. സമൂഹ സിനിമാറ്റിക് ഡാൻസിനു 3 മുതൽ 8 വരെ നർത്തകരെ ഉൾപ്പെടുത്താവുന്നതാണ്. സമയ പരിധി 5 മിനിട്ടാണ്.

സംഘ ശാസ്ത്രീയ നൃത്തം (Classical Group Dance): ഏതു തരത്തിലുള്ള ഭാരതീയ ശാസ്ത്രീയ നൃത്തവും അതിന്‍റെ തനതായ രൂപത്തിലോ (pure) സമ്മിശ്ര രൂപത്തിലോ (fusion) അവതരിപ്പിക്കാവുന്നതാണ്. 3 മുതൽ 8 വരെ നർത്തകർക്കു പകെടുക്കാവുന്ന സംഘ നൃത്തത്തിന് 10 മിനിറ്റ് സമയ പരിധിയുണ്ട്.

സംഘ ഗാനം (Group Song): പശ്ചാത്തല സംഗീതത്തിന്റെ സഹായമില്ലാതെ പാടുന്നത്. മലയാളം ലളിത ഗാനങ്ങൾ മാത്രമേ പാടാനായി തെരെഞ്ഞെടുക്കാവൂ. സിനിമാ, ഭക്തി ഗാനങ്ങൾ അനുവദനീയമല്ല. 3 മുതൽ 8 വരെ ഗായകരെ ഉൾപ്പെടുത്താവുന്നതാണ്. സമയ പരിധി 5 മിനിട്ടാണ്.

മൂകാഭിനയം (Mime): സംഭാഷണമില്ലാതെ ഒരു വിഷയമോ കഥയോ അരങ്ങിൽ അഭിനയിച്ചു ഫലിപ്പിക്കുന്ന രീതി. മൈക്രോഫോൺ ഉപയോഗിക്കുവാൻ പാടുള്ളതല്ല. പാട്ടുകളോ സംഭാഷണമോ ഇല്ലാത്ത പിന്നണി സംഗീതം ആവശ്യമെങ്കിൽ ഉപയോഗിക്കാം. വെളുത്ത നിറം ആധാരമാക്കിയുള്ള ചമയം മുഖത്തുമാത്രം ഇടാവുന്നതാണ്. നിന്ദ്യമായതോ, അശ്ലീലമായതോ, അധിക്ഷേപിക്കുന്ന തരത്തിലുള്ളതോ ആയ ആംഗ്യങ്ങളും ഭാവപ്രകടനങ്ങളും ഒഴിവാക്കേണ്ടതാണ്. 4 മുതൽ 6 പേർക്കുവരെ പങ്കെടുക്കാവുന്ന മൂകാഭിനയത്തിനു 5 മിനിറ്റ് ആണ് സമയ പരിധി.

ചിത്ര രചന (Drawing - various medium): യുക്മ സാംസ്കാരിക വേദി സംഘടിപ്പിക്കുന്ന ചിത്ര രചന മത്സരത്തിൽ സബ്-ജൂണിയർ, ജൂണിയർ, സീനിയർ വിഭാഗങ്ങളിൽ പെട്ടവർക്ക് പങ്കെടുക്കാവുന്നതാണ്. ചിത്രം വര‍യ്ക്കാനുള്ള പേപ്പർ സംഘാടകർ നൽകുന്നതായിരിക്കും. എന്നാൽ രചനക്കാവശ്യമായ മറ്റു വസ്തുക്കൾ മത്സരാർത്ഥികൾ കൊണ്ടുവരേണ്ടതാണ്. ചിത്രം വരക്കുന്നതിനു ഏതു മാധ്യമവും മത്സരാർത്ഥികൾക്ക് ഉപയോഗിക്കാവുന്നതാണ്. സമയ പരിധി ഒരു മണിക്കൂർ. മത്സരാർഥികൾ രാവിലെ 9.15 നു ഹാളിൽ എത്തേണ്ടതാണ്. 9.30 ന് മത്സരം ആരംഭിക്കുമെന്ന് യുക്മ സാംസ്കാരിക വേദി അറിയിക്കുന്നു.

താഴെ പറയുന്ന അഞ്ചു പ്രായ വിഭാഗങ്ങളിലായിരിക്കും മത്സരങ്ങൾ. 2019 സെപ്റ്റംബർ ഒന്ന് ആയിരിക്കും പ്രായപരിധി നിർണയിക്കുന്ന തീയതി.
കുട്ടികൾ (Kids): 8 വയസു വരെയുള്ളവർ
സബ്-ജൂണിയർ (Sub-junior): 8 വയസിനു മുകളിൽ - 12 വയസു വരെയുള്ളവർ
ജൂണിയർ (Junior): 12 വയസിനു മുകളിൽ - 17 വയസു വരെയുള്ളവർ
സീനിയർ (Senior): 17 വയസിനു മുകളിൽ ഉള്ളവർ
പൊതു വിഭാഗം (Common): ഏതു പ്രായത്തിലുള്ളവരും

റിപ്പോർട്ട്: സജീഷ് ടോം
">