ബ്രസൽസ് : കൊറോണവൈറസ് ബാധയുടെ വേഗം യൂറോപ്പിൽ കുറഞ്ഞു കൊണ്ടിരിക്കുന്നുവെന്ന് ലോകാരോഗ്യ സംഘടനയുടെ വിലയിരുത്തൽ. അതേസമയം, രോഗവ്യാപനം തടയാൻ സ്വീകരിച്ച നിയന്ത്രണങ്ങൾ നീക്കുന്നത് ഘട്ടം ഘട്ടമായി മാത്രമേ പാടുള്ളൂ എന്നും സംഘടനയിലെ വിദഗ്ധർ മുന്നറിയിപ്പ് നൽകുന്നു.
രാജ്യങ്ങൾ അതീവ ജാഗ്രത തുടരണം. ലോകത്താകമാനം 44 ലക്ഷം പേർക്കു രോഗം സ്ഥിരീകരിച്ചു കഴിഞ്ഞു. മരണസംഖ്യ മൂന്നു ലക്ഷവും പിന്നിട്ടു~ സംഘടന ചൂണ്ടിക്കാട്ടുന്നു.
അതേസമയം, വിവിധ രാജ്യങ്ങൾ നിയന്ത്രണങ്ങളിൽ ഇളവുകൾ നൽകിത്തുടങ്ങിയതോടെ വൈറസിന്‍റെ രണ്ടാം തരംഗം സംബന്ധിച്ച ആശങ്കകളും ശക്തമാണ്. ഒരുപക്ഷേ, മൂന്നാം ഘട്ടവും പ്രതീക്ഷിക്കാമെന്നും മുന്നറിയിപ്പ്.
രോഗത്തിനെതിരേ വാക്സിൻ കണ്ടെത്താനുള്ള ശ്രമങ്ങളും ലോകത്തിന്റെ വിവിധ ഭാഗങ്ങളിൽ തുടരുകയാണ്. ഒരു വർഷത്തിനുള്ളിൽ പ്രതിരോധ മരുന്ന് തയാറാകുമെന്നാണ് യൂറോപ്യൻ മെഡിസിൻ ഏജൻസി അവകാശപ്പെടുന്നത്.
പുതിയ കൊറോണ വൈറസ് പാൻഡെമിക് നിയമവുമായി ജർമനി
ബർലിൻ: കൊറോണ വൈറസ് പാൻഡെമിക്കിന്‍റെ പ്രത്യാഘാതങ്ങൾ പരിഹരിക്കാനുള്ള നടപടികൾ ജർമനി പാസാക്കി. ദേശീയ പ്രാധാന്യമുള്ള ഒരു പകർച്ചവ്യാധി ഉണ്ടായാൽ രാജ്യത്തെ ജനങ്ങളെ സംരക്ഷിക്കുന്നതിനുള്ള രണ്ടാമത്തെ നിയമം എന്ന തലക്കെട്ടിലുള്ള ഈ നിയമം ജർമൻ പാർലമെന്‍റ് അംഗീകരിച്ചു. ഉപരിസഭയുടെ അനുവാദംകൂടി ലഭിച്ചാൽ ഇത് ഉടൻ പ്രാബല്യത്തിലാവും. പുതിയ അണുബാധ സംരക്ഷണ നിയമം എന്ന് വിശേഷിപ്പിച്ചാണ് ജർമൻ പാർലമെന്‍റ് ഈ നിയമം പാസാക്കിയത്. പകർച്ചവ്യാധിയോടുള്ള ജർമനിയുടെ പ്രതികരണം മെച്ചപ്പെടുത്താൻ സഹായിക്കുന്നതിന് നിലവിലുള്ള വിവിധ നിയമങ്ങളിലും ചട്ടങ്ങളിലും ഭേദഗതികൾ ഇതിൽ ഉൾപ്പെടുന്നു.
കൂടുതൽ പരിശോധനകളിലൂടെ ലക്ഷണങ്ങളില്ലാത്ത ആളുകളിൽ പോലും കൊറോണ വൈറസിനായി, പ്രത്യേകിച്ച് നഴ്സിംഗ് ഹോമുകളിലും ആശുപത്രികളിലും നടത്തിയ പരിശോധനയുടെ അളവ് വർധിപ്പിക്കുകയും ചെയ്യുക എന്നതാണ് ജർമനിയുടെ ഇപ്പോഴത്തെ നിലപാട്.
കൊറോണ വൈറസ് പരിശോധനകൾക്കായി സ്റ്റാറ്റ്യൂട്ടറി ഹെൽത്ത് ഇൻഷുറൻസ് ഓർഗനൈസേഷനുകളും പണം നൽകേണ്ടിവരുമെങ്കിലും പരിശോധന ലഭിക്കുന്ന വ്യക്തിയ്ക്ക് രോഗനിർണയം നടത്തുക എന്നതാണ് പരമമായ ലക്ഷ്യം.
ജർമനിയുടെ 375 ആരോഗ്യ സംരക്ഷണ റീജിനുകൾക്ക് 50 മില്യണ്‍ യൂറോ സർക്കാർ നൽകിക്കഴിഞ്ഞു. അതിനാൽ അവർക്ക് സാങ്കേതികവിദ്യയും ഉപകരണങ്ങളും നവീകരിക്കാൻ കഴിയും.
അധികാരികൾ ഇപ്പോഴും അവരുടെ കൊറോണ വൈറസ് കണക്കുകൾ ഫാക്സ് വഴി അയയ്ക്കുന്നുവെന്നും ഡിജിറ്റൽ നവീകരണം ആവശ്യമാണെന്നും അടുത്തിടെ ആവർത്തിച്ചുള്ള വിമർശനങ്ങൾ ഉയർന്നിരുന്നത് തടയിടുകയാണ് ഫണ്ട് നൽകിയതിന്‍റെ ലക്ഷ്യം. കൂടാതെ, പൊതുജനാരോഗ്യ സേവനത്തിനായി ഒരു സ്ഥിര കോണ്ടാക്റ്റ് പോയിന്റ് സ്റ്റാർട്ട്അപ്പ് എന്ന രീതിയിൽ സ്ഥാപിയ്ക്കുകയും ചെയ്യും.
കൊറോണ പ്രീമിയം
ജർമനിയിലെ വയോജന പരിചരണമുൾപ്പെടുന്ന ആരോഗ്യ മേഖലയിലെ ജീവനക്കാർക്കായി ആസൂത്രണം ചെയ്ത കൊറോണ പ്രീമിയത്തിനും ഫെഡറൽ കൗണ്‍സിൽ അംഗീകാരം നൽകി.
ഈ വർഷത്തെ പ്രതിസന്ധി ഘട്ടത്തിൽ പ്രത്യേകമായി ബോണസ് ലഭിക്കും. നികുതിരഹിതമായി ഒറ്റത്തവണ ആശുപത്രികളിലെ നഴ്സുമാർക്ക് 1500 യൂറോയും വൃദ്ധസദനങ്ങളിലെ ജീവനക്കാർക്ക് 1000 യൂറോ വരെയും ട്രെയിനികൾക്ക് 900 യൂറോയുമാണ് ലഭിയ്ക്കുക.
ഫെഡറൽ കൗണ്‍സിൽ പാസാക്കിയ നിയമം കൊറോണ പാൻഡെമിക്കെതിരായ പോരാട്ടത്തിൽ ഉത്തേജകമായി മാറും.
ജർമനിയിൽ ഇതുവരെ 3.1 ദശലക്ഷത്തിലധികം കൊറോണ വൈറസ് പരിശോധനകൾ നടത്തിയതായി 1,97,100 പോസിറ്റീവ് കേസുകൾ ഉണ്ടായതായി ആണെന്ന് ബർലിനിലെ റോബർട്ട് കോച്ച് ഇൻസ്റ്റിറ്റ്യൂട്ട് (ആർകെഐ) വ്യാഴാഴ്ച പ്രസിദ്ധീകരിച്ച റിപ്പോർട്ടിൽ പറയുന്നു.
ജർമനിയിലെ അണുബാധ നിരക്ക് 0.94 ൽ നിന്ന് 0.81 ആയി കുറഞ്ഞുവെങ്കിലും കഴിഞ്ഞ ഏഴുദിവസത്തെ ശരാശരി നോക്കുന്പോൾ 0,88 ആയിരിയ്ക്കുമെന്ന് ഇൻസ്റ്റിറ്റ്യൂട്ട് അറിയിച്ചു.
മൾട്ടിവൈറസ്
കോവിഡ് 19 ഒരു മൾട്ടി ഓർഗൻ വൈറസാണ് സാർസ്കോവി 2 എന്ന നോവലായ കൊറോണ വൈറസ് ശുദ്ധമായ ശ്വസന വൈറസല്ലന്നും പറയുന്നു. ശ്വാസകോശത്തിനു പുറമേ, മറ്റ് നിരവധി അവയവങ്ങളിലും അവയവ വ്യവസ്ഥകളിലും ഇത് ബാധിക്കും. ഹാംബുർഗ് യൂണിവേഴ്സിറ്റി ക്ലിനിക് എപ്പെൻഡോർഫ് (യുകെഇ) നടത്തിയ പഠനത്തിലാണ് ഈ വെളിപ്പെടുത്തൽ. ഗവേഷകർ പറയുന്നതനുസരിച്ച്, പഠനത്തിൽ നിന്നുള്ള കണ്ടെത്തലുകൾ കോവിഡ് 19 അണുബാധയിൽ നിന്ന് നേരത്തെയുള്ള കണ്ടെത്തലിനെക്കുറിച്ചും അതിന്‍റെ അനന്തരഫലങ്ങളെക്കുറിച്ചുമാണ് വിവരങ്ങൾ നൽകുന്നത്.
കോവിഡ് 19 അണുബാധ മൂലം മരിച്ച 27 പേരുടെ പോസ്റ്റ്മോർട്ടം ഫലങ്ങൾ യുകെഇയിൽ നിന്നുള്ള വൃക്ക വിദഗ്ധരും മൈക്രോബയോളജിസ്റ്റുകളും നിയമ വിദഗ്ധരും തങ്ങളുടെ പഠനത്തിൽ വിശകലനം ചെയ്തു. പ്രത്യേകിച്ച്, ശ്വാസകോശം, തൊണ്ട, ഹൃദയം, കരൾ, തലച്ചോറ്, വൃക്ക എന്നിവയിലെ രോഗകാരിയെ കണ്ടെത്താൻ ശാസ്ത്രജ്ഞർക്ക് കഴിഞ്ഞു. ഓരോ സെല്ലിലും വൈറസിന്‍റെ ഉയർന്ന സാന്ദ്രത ശ്വാസകോശ ത്തിൽ കണ്ടെത്തിയതായും പറയുന്നു.
റിപ്പോർട്ട്: ജോസ് കുന്പിളുവേലിൽ