ഡാളസ്: വേൾഡ് മലയാളി കൗണ്‍സിൽ ഡിഎഫ്ഡബ്ല്യൂ പ്രൊവിൻസ് ഇത്തവണത്തെ ക്രിസ്മസ് പുതുവത്സര പരിപാടികൾ ചിലവു ചുരുക്കലിന്‍റെ ഭാഗമായും കേരളത്തിലെ പ്രകൃതി ദുരന്തത്തിൽ പങ്കു ചേരുന്നതിന്‍റെ ഭാഗമായും ലളിതമായി ആചരിച്ചു. കേരളത്തിൽ വേൾഡ് മലയാളി കൗണ്‍സിൽ ഗ്ലോബൽ കമ്മിറ്റിയുടെ നേതൃത്വത്തിൽ ഏറ്റെടുത്തു നടത്തുന്ന പ്രൊജെക്ടുകൾക്കു കൈത്താങ്ങൽ നൽകുക കൂടിയാണ് ലക്ഷ്യമെന്ന് പ്രൊവിൻസ് പ്രസിഡന്‍റ് വർഗീസ് കയ്യാലക്കകം അറിയിച്ചു.
വേൾഡ് മലയാളി കൗണ്‍സിൽ അമേരിക്ക റീജണ്‍ ചെയർമാൻ പി.സി. മാത്യു യോഗം ഉദ്ഘാടനം ചെയ്തു. വേൾഡ് മലയാളി കൗണ്‍സിൽ കേരളത്തിൽ ചെയ്യുന്ന ദുരിതാശ്വസ പ്രവർത്തനങ്ങളെ പറ്റി അദ്ദേഹം വിവരിച്ചു. കൊച്ചിയിൽ കഴിഞ്ഞ 13 നു കൂടിയ ഗ്ലോബൽ എക്സിക്യൂട്ടീവ് കൗണ്‍സിൽ മീറ്റിംഗിൽ എടുത്ത തീരുമാനം അനുസരിച്ചു വീടില്ലാത്തവർക്കുവേണ്ടി ആദ്യഘട്ടം ഇരുപത്തി അഞ്ചു വീടുകൾ വയ്ക്കുവാൻ തീരുമാനിച്ചതായി ഗ്ലോബൽ സെക്രട്ടറി സി.യു. മത്തായിയും പ്രസിഡന്‍റ് ജോണി കുരുവിളയും സംയുക്തമായി അറിയിച്ചതായി പി.സി. മാത്യു തന്‍റെ പ്രസംഗത്തിൽ പറഞ്ഞു. ലോകമെന്പാടുമുള്ള വിവിധ പ്രൊവിൻസുകളാണ് വീടുകൾ സ്പോണ്സർ ചെയ്യുക.
പ്രൊവിൻസ് പ്രസിഡന്‍റ് വർഗീസിന്‍റെ അധ്യക്ഷതയിൽ കൂടിയ യോഗത്തിൽ കഴിഞ്ഞ ഒരു വർഷം നടത്തിയ പ്രവർത്തനങ്ങൾ വിലയിരുത്തി. ബഹ്റൈൻ സയാനി സൂപ്പർ സ്പെഷ്യലിറ്റി മുൻ നഴ്സിംഗ് ഡയറക്ടർ മേരി തോമസ് ക്രിസ്മസ് സന്ദേശം നൽകി. ഹെൽത്ത് ഫോറം ചെയർ ബിജി എഡ്വേർഡ് ആശംസ പ്രസംഗം നടത്തി.
വൈസ് പ്രസിഡന്‍റ് സുനിൽ എഡ്വേർഡ്, തോമസ് ചെല്ലേത്, സാം മാത്യു, ബിസിനസ് ഫോറം കോഓർഡിനേറ്റർമാരായ ഷാജി നിരക്കൽ, അനിൽ മാത്യു ഓൾ സ്റ്റേറ്റ്, മനോജ് ഡബ്ലുഎഫ്ജി, തോമസ് മാത്യു, റജി കയ്യാലക്കകം മുതലായവർ പരിപാടികൾക്ക് നേതൃത്വം നൽകി. മാത്യു മത്തായി മനോഹരമായ ക്രിസ്തുമസ് ഗാനങ്ങൾ ആലപിച്ചു. കുട്ടികളുടെ പാട്ടും, വൈറ്റ് എലിഫന്‍റ് ഗെയിമും ലളിതമായ പരിപാടികൾക്ക് മനോഹാര്യം പകർന്നു. ഷേർലി ഷാജി നിരക്കൽ നന്ദി പ്രസംഗത്തിൽ പ്രോവിൻസിന്റെ പുതിയ പദ്ധതികൾക്ക് രൂപം കൊടുക്കുമെന്ന് അറിയിച്ചു.
ഗ്ലോബൽ ചെയർമാൻ ഡോ. എ.വി. അനൂപ്, ഗ്ലോബൽ പ്രസിഡന്‍റ് ജോണി കുരുവിള, വൈസ് പ്രസിഡന്‍റ് തോമസ് മൊട്ടക്കൽ, വൈസ് ചെയർ തങ്കമണി അരവിന്ദൻ, വൈസ് പ്രസിഡന്‍റ് എസ്.കെ. ചെറിയാൻ, അമേരിക്ക റീജണ്‍ പ്രസിഡന്‍റ് ജെയിംസ് കൂടൽ, സെക്രട്ടറി സുധിർ നന്പിയാർ, ട്രഷർ ഫിലിപ്പ് മാരേട്, അഡ്മിൻ വൈസ് പ്രസിഡന്‍റ് എൽദോ പീറ്റർ, ബിസിനസ്സ് ഫോറം പ്രസിഡന്‍റ് ഫ്രിക്സ്മോൻ മൈക്കിൾ, പ്രൊവിൻസ് ചെയർമാൻ തോമസ് എബ്രഹാം മുതലായവർ ക്രിസ്മസ് ന്യൂ ഇയർ ആശംസകൾ അറിയിച്ചു.
റിപ്പോർട്ട്: പുത്തൻപുരയ്ക്കൽ മാത്യു