ഫിലഡൽഫിയ: സമീപഭാവിയിൽ വിവാഹിതരാകാൻ ആഗ്രഹിക്കുന്ന യുവതീ യുവാക്കൾക്കായി ഷിക്കാഗോ സീറോമലബാർ രൂപതാ ഫാമിലി അപ്പോസ്തലേറ്റിന്റെ മേൽനോട്ടത്തിൽ ഫിലഡൽഫിയായിൽ നടത്തപ്പെട്ട മൂന്നുദിവസത്തെ വിവാഹ ഒരുക്ക സെമിനാർ (പ്രീ മാര്യേജ് കോഴ്സ്) സമാപിച്ചു.
ഫിലഡൽഫിയ സെന്റ് തോമസ് സീറോമലബാർ ഫൊറോനാ ദേവാലയം ആതിഥ്യമരുളിയ പ്രീകാനാ കോഴ്സ് ഓഗസ്റ്റ് 16 വെള്ളിയാഴ്ച്ച വൈകുന്നേരം ആരംഭിച്ച് 18 ഞായറാഴ്ച്ച വൈകുന്നേരം അവസാനിച്ചു. മൂന്നുദിവസം താമസിച്ചുള്ള പഠനപരിശീലനപരിപാടി നോർത്തീസ്റ്റ് ഫിലഡൽഫിയായിൽ ഫാദർ ജഡ്ജ് കാത്തലിക് ഹൈസ്കൂൾ കാന്പസിലുള്ള മിഷണറി സെർവന്റ്സ് ഓഫ് ദി മോസ്റ്റ് ബ്ലസഡ് ട്രിനിറ്റി ധ്യാനകേന്ദ്രത്തിലായി ക്രമീകരിച്ചത്. ഉദ്യോഗസ്ഥരായ യുവതീ യുവാക്കൾക്ക് അവധിയെടുക്കാതെ മൂന്നുദിവസവും ക്ലാസുകളിൽ പങ്കെടുക്കാൻ ഈ ക്രമീകരണംകൊണ്ട് സാധിച്ചു.
വ്യത്യസ്ത സാഹചര്യങ്ങളിൽ ജനിച്ചു വളർന്നു വിദ്യാഭ്യാസം പൂർത്തീകരിച്ച യുവതീയുവാക്കൾക്ക് വിവാഹജീവിതത്തിൽ വിജയം കണ്ടെത്തുന്നതിനും, വിവാഹജീവിതം കൂടുതൽ സന്തോഷപ്രദമായും, ദൈവികപരിപാലനയോടെയും ഫലപ്രദമായി മുന്പോട്ടു നയിക്കുന്നതിനും ഉൽപന്ന പല നല്ല കാര്യങ്ങളും ഈ കോഴ്സിൽ ചർച്ച ചെയ്യപ്പെട്ടു. ഗ്രൂപ്പ് തിരിച്ചുള്ള ചർച്ചാക്ലാസുകൾ, വീഡിയോ ഉപയോഗിച്ചുള്ള പഠനം, കേസ് സ്റ്റഡീസ്, പ്രഭാഷണങ്ങൾ, അനുഭവം പങ്കുവക്കൽ, കുന്പസാരം, വിശുദ്ധ കുർബാന, ആരാധന, കൗണ്സലിംഗ് എന്നിവയാണഅ മൂന്നുദിവസത്തെ പാഠ്യപദ്ധതിയിൽ ഉൾപ്പെടുത്തിയിരുന്നത്.
ജീവിതത്തിന്റെ വ്യത്യസ്തമേഖലകളിൽ പ്രശസ്തരും, പ്രഗൽഭരുമായ വ്യക്തികളാണ് ക്ലാസുകൾ നയിച്ചത്. വൈദികരും, സന്യസ്തരും, മെഡിക്കൽ രംഗത്തുള്ളവരും, കൗണ്സലിംഗ് വിദഗ്ധരും, മതാധ്യാപകരും, കോളജ് പ്രൊഫസർമാരും, മാതൃകാദന്പതികളും ഉൾപ്പെട്ട ഫാക്കൾറ്റിയാണ് ക്ലാസുകൾ നയിച്ചത്.
ഷിക്കാഗൊ സീറോ മലബാർ രൂപതാ ഫാമിലി അപ്പോസ്തലേറ്റ് ഡയറക്ടർ റവ. ഫാ. പോൾ ചാലിശേരി, ഫിലഡൽഫിയ സീറോ മലബാർ ഫൊറോനാ വികാരി റവ. ഫാ. വിനോദ് മഠത്തിപ്പറന്പിൽ, സണ്ടേസ്കൂൾ അധ്യാപകരായ ജോസ് മാളേയ്ക്കൽ, ജോസ് ജോസഫ്, സോബി ചാക്കോ, മഞ്ജു ചാക്കോ, ജേക്കബ് ചാക്കോ, സിബി എബ്രാഹം, ഡോ. എബ്രാഹം മാത്യു (ഡോ. മനോജ്), ട്രീസാ ലവ്ലി, റെനി എബ്രാഹം, സജി സെബാസ്റ്റ്യൻ എന്നിവരാണ് യുവജനങ്ങൾ പരിശീലനം നൽകിയത്. ജോസ് ജോസഫ് ആയിരുന്നു കോഴ്സ് കോർഡിനേറ്റർ.
ഫിലഡൽഫിയ ഇടവക വികാരി റവ. ഫാ. വിനോദ് മഠത്തിപ്പറന്പിലിന്റെ നേതൃത്വത്തിൽ കൈക്കാര·ാരായ സജി സെബാസ്റ്റ്യൻ, ബിനു പോൾ, പോളച്ചൻ വറീദ്, ജോർജ് വി. ജോർജ്, സെക്രട്ടറി ടോം പാറ്റാനിയിൽ, കോഴ്സ് കോർഡിനേറ്റർ ജോസ് ജോസഫ്, ജോയൽ ബോസ്ക്കോ എന്നിവർ കോഴ്സിന്റെ നടത്തിപ്പിനുള്ള ക്രമീകരണങ്ങൾ ചെയ്തു.
ഇന്ത്യയിലോ, അമേരിക്കയിലോ വിവാഹിതരാകാൻ ആഗ്രഹിക്കുന്ന എല്ലാ യുവതീയുവാക്കളും വിവാഹത്തിനു മുൻപ് നിർബന്ധമായും പൂർത്തിയാക്കിയിരിക്കേണ്ട പാഠ്യപദ്ധതിയാണ് പ്രീകാനാ കോഴ്സ്. വിവിധ സ്റ്റേറ്റുകളിൽനിന്നുള്ള 34 യുവതീയുവാക്കൾ ഈ വർഷത്തെ പ്രീകാനാ കോഴ്സിൽ പങ്കെടുത്തു.
റിപ്പോർട്ട്: ജോസ് മാളേയ്ക്കൽ