ഷിക്കാഗോ: ഷിക്കാഗോയിലുള്ള വിവിധ ഇന്ത്യൻ സംഘടനകളും, പള്ളികളും ചേർന്നു നടത്തുന്ന ക്രിസ്മസ് ആഘോഷം ഡിസംബർ 13 വെള്ളിയാഴ്ച റോളിംഗ് മെഡോസിലുള്ള മെഡോസ് കണ്‍വൻഷൻ സെന്‍ററിൽ (2950 Golf Road) വൈകിട്ട് 6.30നു ആരംഭിക്കുന്നതാണ്.
ഷിക്കാഗോ സെന്‍റ് തോമസ് സീറോ മലബാർ രൂപതാ സഹായ മെത്രാൻ ബിഷപ്പ് മാർ ജോയി ആലപ്പാട്ട് ക്രിസ്മസ് സന്ദേശം നൽകും. അമേരിക്കയിലെ വിവിധ വിശിഷ്ടാതിഥികളെക്കൊണ്ട് തിങ്ങിനിറയുന്ന ആഘോഷ പരിപാടികളിൽ യുഎസ് സെനറ്റർ റിച്ചാർഡ് ഡർബിൻ, കോണ്ഗ്രസ്മാൻ രാതാ കൃഷ്ണമൂർത്തി, യുഎസ് കോണ്ഗ്രസ്മാൻ ഷോണ് കാസ്റ്റണ്‍, സെനറ്റർ ലാറാ മർഫി, സെനറ്റർ റാം വില്ലിവാലം, സെനറ്റർ ലാറാ എൻവാൻ, കോണ്സുൽ ജനറൽ ഓഫ് ഇന്ത്യ സുധാകർ ദെലേല, മേയർ ടോം ഡിലി എന്നിവർ പങ്കെടുക്കും. ഈ സമ്മേളനത്തിന്‍റെ ചെയർമാൻ ഗ്ലാഡ്സണ്‍ വർഗീസ്, ജനറൽ കണ്‍വീനർ കീർത്തി റാവുരി, കണ്‍വീനർ ആന്േ‍റാ കവലയ്ക്കൽ എന്നിവരാണ്.
കേരളം, ഗുജറാത്ത്, ആന്ധ്രാപ്രദേശ്, തമിഴ്നാട്, പഞ്ചാബ്, പാക്കിസ്ഥാൻ എന്നിവിടങ്ങളിലെ പള്ളികളും, അവരുടെ ക്രിസ്മസ് കരോളും, ക്രിസ്മസ് ഡാൻസ്, സ്കിറ്റ്, ഡിന്നർ എന്നിവ സമ്മേളനത്തിന് കൊഴുപ്പേകും. എല്ലാ മലയാളി സുഹൃത്തുക്കളേയും സംഘാടകർ ആഘോഷ പരിപാടികളിലേക്ക് സ്വാഗതം ചെയ്തു.
റിപ്പോർട്ട്: ജോയിച്ചൻ പുതുക്കുളം