ന്യൂയോര്ക്ക്: നോര്ത്ത് അമേരിക്കയിലെ ഇന്ത്യന് വംശജരായ മാധ്യമപ്രവര്ത്തകരുടെ ഏറ്റവും വലിയ കൂട്ടായ്മയായ ഇന്തോ അമേരിക്കന് പ്രസ് ക്ലബിന്റെ (ഐഎപിസി) നാഷണല് കമ്മിറ്റിയെ പ്രഖ്യാപിച്ചു.
പുതിയ ഭാരവാഹികളായി ഡോ. എസ്.എസ്. ലാൽ (പ്രസിഡന്റ്), ആനി കോശി (എക്സിക്യൂട്ടീവ് വൈസ് പ്രസിഡന്റ്), സി.ജി.ഡാനിയല്, ജെയിംസ് കുരീക്കാട്ടില്, പ്രകാശ് ജോസഫ്, സുനില് മഞ്ഞനിക്കര (വൈസ് പ്രസിഡന്റുമാർ), ബിജു ചാക്കോ (ജനറൽ സെക്രട്ടറി), ആന്ഡ്രൂസ് ജേക്കബ്, രാജ് ഡിങ്കര, ആനി ആനുവേലില്, ഡോ. നീതു തോമസ് (സെക്രട്ടറിമാർ), റെജി ഫിലിപ്പ് (ട്രഷറർ), അഡ്വ. ഇന്നസെന്റ് ഉലഹന്നാന് (ജോയിന്റ് ട്രഷറർ), ബൈജു പകലോമറ്റം, രൂപസി നെരൂല ((നാഷണല് കോ-ഓര്ഡിനേറ്റേർമാർ), ഒ.കെ. ത്യാഗരാജന്, തെരേസ ടോം, ഷിബി റോയ് എന്നിവരെ പിആർഒ മാരായും തെരഞ്ഞെടുത്തു.
2014 മുതല് 2016 വരെ ഐഎപിസി ഡയറക്ടറായിരുന്ന ഡോ. ലാല് ഇപ്പോള്, വാഷിംഗ്ടണ് ഡിസി ആസ്ഥാനമായുള്ള അമേരിക്കന് ഫാമിലി ഹെല്ത്ത് ഇന്റര്നാഷണല് എന്ന ഓര്ഗനൈസേഷനിലെ പകര്ച്ചവ്യാധി (ക്ഷയ രോഗം) വിഭാഗം ഡയറക്ടറാണ്. ലോകാരോഗ്യ സംഘടനയ്ക്കായി പല രാജ്യങ്ങളിലും പ്രവര്ത്തിച്ചിട്ടുള്ള ഡോ. ലാല്, ജനീവയിലെ ഗ്ലോബല് ഫണ്ടിന്റെ പ്രവര്ത്തനങ്ങളില് ഭാഗമായിരുന്നു. ലോകാരോഗ്യ സംഘടനയുടെ വിവിധ ഉപദേശക സമിതികളില് അംഗവുമായ ലാൽ തിരുവനന്തപുരം സ്വദേശിയാണ്. ഭാര്യ ഡോ. സന്ധ്യയ്ക്കും രണ്ട് ആണ്മക്കള്ക്കുമൊപ്പം വിര്ജീനിയയിലെ വിയന്നയിലാണ് താമസിക്കുന്നത്.
നിരവധി പുരസ്കാരങ്ങള്ക്ക് ഉടമയായ ആനി കോശി, മള്ട്ടി-ടാലെന്റഡ് മീഡിയ പ്രഫഷണലാണ്. മികച്ച പ്രാസംഗികയും അവതാരകയുമാണവര്. മാധ്യമ-കലാരംഗങ്ങളില് സജീവസാന്നിധ്യമായ ആനിയുടെ സൃഷ്ടികള് പ്രശംസനീയമാണ്. വിവിധ മേഖലകളിലെ ആനിയുടെ അച്ചടക്കമുള്ള തൊഴില് നൈതികത, ബ്രാന്ഡിംഗിനോടുള്ള അഭിരുചി, ബിസിനസ് നെറ്റ് വര്ക്കിംഗിലെ വൈദഗ്ധ്യം എന്നിവ സമൂഹത്തിലെ പലര്ക്കും മാതൃകയാണ്. മള്ട്ടി-ഡിസിപ്ലിനറി വുമന് ലീഡര് എന്ന നിലയില് കമ്യൂണിറ്റിയിലെ മികച്ച ഉദാഹരണമാണ് ആനി. ആനിയുടെ കഥ യുവ സംരംഭകര്ക്കും സ്ത്രീകള്ക്കും പ്രചോദനവും സമാനതകളില്ലാത്തതുമാണ്.
സി.ജി.ഡിനിയല് ഇന്തോ അമേരിക്കന് എഴുത്തുകാരനും അമച്വര് ഫോട്ടോഗ്രാഫറുമാണ്. ദീപാലയ ഫൗണ്ടേഷന്റെ പ്രസിഡന്റും സിഇഒയുമായ അദ്ദേഹം ഡല്ഹിയിലെയും മറ്റ് ഉത്തരേന്ത്യന് സംസ്ഥാനങ്ങളിലെയും താഴ്ന്ന വരുമാനക്കാരായ സമുദായങ്ങളിലെ കുട്ടികളുടെ സാക്ഷരതയ്ക്കും വിദ്യാഭ്യാസത്തിനുമായി പ്രവര്ത്തിച്ചുവരുന്നു.
പ്രമുഖ ഇന്തോ അമേരിക്കന് എഴുത്തുകാരനും കോളമിസ്റ്റും ഗ്ലോബല് റിപ്പോര്ട്ടര് ചാനലിന്റെ ലേഖകനുമാണ് ജയിംസ് കുരീക്കാട്ടില്. നിരവധി പ്രസിദ്ധീകരണങ്ങളില് അദ്ദേഹത്തിന്റേതായ ലേഖനങ്ങള് പ്രസിദ്ധീകരിച്ചിട്ടുണ്ട്. ഗ്ലോബല് റിപ്പോര്ട്ടല് ചാനലിനു വേണ്ടി നിവധി സംഭവങ്ങളാണ് അധ്യാപകന് കൂടിയായ അദ്ദേഹം റിപ്പോര്ട്ട് ചെയ്തിട്ടുള്ളത്. മിഷിഗണില് നിന്നു പ്രസിദ്ധീകരിക്കുന്ന ധ്വനി എന്ന മാഗസിന്റെ ചീഫ് എഡിറ്ററായ അദ്ദേഹം അമേരിക്കയിലെ സാഹിത്യപ്രവര്ത്തകരുടെ സംഘടനയായ ലാനയുടെ നേതൃത്വത്തിലും സജീവമാണ്.
പ്രകാശ് ജോസഫ് ഇന്തോ അമേരിക്കന് പ്രസ് ക്ലബ് അറ്റ്ലാന്റ ചാപ്റ്ററിന്റെ ബോര്ഡ് അംഗമായിരുന്നു. ഗ്രേറ്റര് അറ്റ്ലാന്റ മലയാളി അസോസിയേഷന് (ഗാമ) അംഗമാണ്. 2016-ല് സംഘടനയുടെ പ്രസിഡന്റായി തെരഞ്ഞെടുക്കപ്പെട്ടു. 2017 മുതല് ഗാമയുടെ ബോര്ഡ് ഓഫ് ട്രസ്റ്റി അംഗമാണ്. അറ്റ്ലാന്റാ പ്രവിശ്യയിലെ ലോക മലയാളി കൗണ്സില് പ്രസിഡന്റായി അടുത്തിടെ അദ്ദേഹം തെരഞ്ഞെടുക്കപ്പെട്ടിട്ടുണ്ട്.
സുനില് മഞ്ഞിനിക്കര ഗ്ലോബല് റിപ്പോര്ട്ടര് ചാനലില് പ്രോഗ്രാം ഇന് ചീഫായി പ്രവര്ത്തിക്കുന്നു. ജയ്ഹിന്ദ് ടിവി യുഎസ്എയുടെ പ്രോഗ്രാം ഡയറക്ടറായിരുന്ന സുനില്, ഫോട്ടോഗ്രാഫിയിലും വീഡിയോ ഗ്രാഫിയിലും മികവു തെളിയിച്ചിട്ടുണ്ട്. നിരവധി ടിവി പ്രോഗ്രാമുകള് നിര്മിച്ചിട്ടുള്ള അദ്ദേഹം സിറിയന് ഓര്ത്തഡോക്സ് സഭയുടെ അമേരിക്കന് മലങ്കര അതിഭദ്രാസനത്തിന്റെ ദൃശ്യമാധ്യമ സംരംഭത്തിന് തുടക്കം കുറിച്ചതില് സുപ്രധാന പങ്കുവഹിച്ചിട്ടുണ്ട്.
ജനറല് സെക്രട്ടറിയായി തെരഞ്ഞെടുക്കപ്പെട്ടിട്ടുള്ള ബിജു ചാക്കോ നോര്ത്ത് അമേരിക്കയിലെ പ്രമുഖ മാധ്യമപ്രവര്ത്തകനാണ്. അമേരിക്കയിലും കാനഡയിലുമായി പ്രസിദ്ധീകരിക്കുന്ന ജയ്ഹിന്ദ് വാര്ത്തയുടെ ഡയറക്ടര് ബോര്ഡ് അംഗമാണ്. നോര്ക്കയടക്കം നിരവധി സംഘടനയുടെ നേതൃത്വത്തില് പ്രവര്ത്തിക്കുന്ന ബിജു ചാക്കോ, ന്യൂയോര്ക്ക് സെനറ്റിലേക്ക് തെരഞ്ഞെടുക്കപ്പെട്ട ആദ്യത്തെ മലയാളിയായ കെവിന് തോമസിന്റെ ഇലക്ഷന് പ്രവര്ത്തനങ്ങള്ക്ക് ചുക്കാന് പിടിക്കുകയും സെനറ്ററുടെ കമ്മ്യൂണിറ്റി പ്രവര്ത്തനങ്ങളുടെ സജീവമായ പങ്കാളിയുമാണ്.
സെക്രട്ടറിയായി തെരഞ്ഞെടുക്കപ്പെട്ട ആന്ഡ്രൂസ് ജേക്കബ് ഗ്ലോബല് റിപ്പോര്ട്ടര് ചാനലിന്റെ റിപ്പോര്ട്ടറാണ്. ഐഎപിസി ഹൂസ്റ്റണ് ചാപ്റ്ററിന്റെ മുന് സെക്രട്ടറി കൂടിയായ ഇദ്ദേഹം അറിയപ്പെടുന്ന മാധ്യമപ്രവര്ത്തകന് കൂടിയാണ്. ഹൂസ്റ്റണ് മലയാളി അസോസിയേഷന്റെ ട്രഷറര്, മുന് പ്രോഗ്രാം കോഓര്ഡിനേറ്റര്, ഹൂസ്റ്റണ് കോട്ടയം ക്ലബ് പ്രസിഡന്റ്, വേള്ഡ്മലയാളി അസോസിയേഷന്റെ അമേരിക്കന് റീജൺ കള്ചറല് ഫോറം ചെയര്മാന് എന്നി പദവികള് വഹിച്ചിട്ടുണ്ട്.
രാജ് ഡിങ്കര ന്യൂയോര്ക്കില് നിന്നു പ്രസിദ്ധീകരിക്കുന്ന ഇന്ത്യന് റിപ്പബ്ലിക്ക് ന്യൂസ് എന്ന ഇംഗ്ലീഷ് പത്രത്തിന്റെ പബ്ലീഷറും ഇന്തോ അമേരിക്കന് കമ്മ്യൂണിറ്റിയുടെ നിരവധി സംഘടനകളിലെ സജീവാംഗവുമാണ്.
ആനി ആനുവേലില് അറ്റ്ലാന്റ ആസ്ഥാനമായി പ്രവര്ത്തിക്കുന്ന സ്വതന്ത്ര മാധ്യമപ്രവര്ത്തകയാണ്. നാട്ടുവിശേഷം ന്യൂസ് എഡിറ്ററായ ആനി, കമ്മ്യൂണിറ്റി പ്രവര്ത്തനങ്ങളിലും ജീവകാരുണ്യ പ്രവര്ത്തനങ്ങളിലും അവര് സജീവ പങ്കാളിത്തം വഹിക്കുന്നു.
ഡോ. നീതു തോമസ് അയോവയിലെ ഗ്ലോബര് റിപ്പോര്ട്ടല് ചാനലിന്റെ സീനിയര് റിപ്പോര്ട്ടറാണ്. ഗ്ലോബര് റിപ്പോര്ട്ടര് ടിവിയുടെ ദിവസേനയുള്ള ഗ്ലോബല് ന്യൂസ് അവറിലേക്ക് നീതു റിപ്പോര്ട്ടു ചെയ്ത പല വാര്ത്തകളും ശ്രദ്ധ ആകര്ഷിച്ചിട്ടുണ്ട്.
ട്രഷററായി തെരഞ്ഞെടുക്കപ്പെട്ട ഗ്ലോബല് റിപ്പോര്ട്ടര് ചാനലിന്റെ റിപ്പോര്ട്ടറായ ഇദ്ദേഹം അറിയപ്പെടുന്ന മാധ്യമപ്രവര്ത്തകന്കൂടിയാണ്. ജേണലിസത്തില് ബിരുദാനന്തര ബിരുദമുള്ള റെജി നിരവധി വിഷ്വല്, ഓണ്ലൈന് മാധ്യമങ്ങളില് ക്രിയേറ്റീവ് വിഭാഗം കൈകാര്യം ചെയ്യുന്നുണ്ട്. ഫിലാഡാല്ഫിയയിലാണ് താമസം.
ജോയിന്റ് ട്രഷററായി തെരഞ്ഞെടുക്കപ്പെട്ട അഡ്വ. ഇന്നസെന്റ് ഉലഹന്നാന്, ഹഡ്സണ് വാലി മലയാളി അസോസിയേഷന് പ്രസിഡന്റായും ബോര്ഡ് ഓഫ് ട്രസ്റ്റീസ് ചെയര്മാനായും സേവനമനുഷ്ഠിച്ചു. ഇന്ത്യന് - അമേരിക്കന് പൊളിറ്റിക്കല് ആക്ഷന് കൗണ്സില് പ്രസിഡന്റ്, ഫോക്കാന ന്യൂയോര്ക്ക് മേഖലാ സെക്രട്ടറി എന്നീ ചുമതലകള് വഹിച്ചു.
ഇന്ത്യന് അമേരിക്കന് ലോയേഴ്സ് ഫോറം ട്രഷറര് എന്ന നിലയിലും കമ്മ്യൂണിറ്റി സര്ട്ടിഫൈഡ് നോട്ടറി എന്ന നിലയിലും സ്തുത്യര്ഹമായ സേവനങ്ങള് നടത്തി. വിവിധ സ്ഥാപനങ്ങളുടെ സംഘടന ചുമതല വഹിച്ചിട്ടുള്ള അഡ്വ. ഇന്നസെന്റ് ഉലഹന്നാന് നിരവധി പുരസ്കാരങ്ങളും ലഭിച്ചിട്ടുണ്ട്.
നാഷണല് കോ-ഓര്ഡിനേറ്റേഴ്സായി തെരഞ്ഞെടുക്കപ്പെട്ട ബൈജു പകലോമറ്റം ഐഎപിസി മുന് സെക്രട്ടറി കൂടിയാണ്. ജയ്ഹിന്ദ് വാര്ത്തയുടെ നയാഗ്ര റീജണല് ഡയറക്ടറും കോളമിസ്റ്റുമാണ്. 2011 ല് രൂപീകൃതമായ നയാഗ്ര മലയാളി അസോസിയേഷന്റെ സ്ഥാപക നേതാവാണ് അദ്ദേഹം. രണ്ടുതവണ ഈ സംഘടനയുടെ പ്രസിഡന്റായിട്ടുണ്ട്. 2016 ല് ഫൊക്കാനയുടെ കാനഡ റീജണല് വൈസ് പ്രസിഡന്റായി. 2007 ല് ആഗോള കാത്തലിക് സംഘടനയായ നൈറ്റ് ഓഫ് കൊളംബസില് ചേരുകയും ഫോര്ത് ഡിഗ്രി എടുത്ത് സര് നൈറ്റാകുകയും ചെയ്തു.
ഡിജിറ്റല് മാര്ക്കറ്റിംഗ് മേഖലയിലെ സജീവസാന്നിധ്യവും പ്രഫഷണലുമാണ് രൂപ്സി നരുല. യുഎസില്നിന്ന് എംബിഎ പഠനം പൂര്ത്തിയാക്കിയ രൂപ്സി, സോഷ്യോളജിയില് മാസ്റ്റേഴ്സ് ബിരുദധാരിയാണ്. സീ ടിവി അമേരിക്കാസ്, ടിവി ഏഷ്യ, ഓക്സ്ഫോര്ഡ് യൂണിവേഴ്സിറ്റി പ്രസ്, ദ സൗത്ത് ഏഷ്യന് ടൈംസ് എന്നിവയുള്പ്പെടെ നിരവധി അച്ചടി, ഡിജിറ്റല്, പ്രക്ഷേപണ ശൃംഖലകളുമായി ബന്ധപ്പെട്ട് പത്തു വര്ഷമായി രൂപ്സി പ്രവര്ത്തിച്ചുവരുന്നു.
പിആര്ഒമാരായി തെരഞ്ഞെടുക്കപ്പെട്ട ഒ.കെ. ത്യാഗരാജന്, കാനഡയിലെ വാന്കൂവറില് താമസിക്കുന്ന കണ്ണൂർ സ്വദേശിയാണ്. ജയ്ഹിന്ദ് പത്രത്തിന്റെ എഡിറ്റോറിയല് ബോര്ഡ് അംഗമാണ്. നിയമത്തിലും പത്രപ്രവര്ത്തനത്തിലും വിദ്യാഭ്യാസം നേടിയിട്ടുള്ള അദ്ദേഹം ദൂരദര്ശന്, കൈരളി ചാനലുകളില് പ്രവര്ത്തിച്ചിട്ടുണ്ട്.
മല്ലു കഫേ മലയാള റേഡിയോ യുഎസ്എ @ 99.5 എഫ്എം ഉടമയും സിഇഒയും ലീഡ് ആര്ജെയുമാണ് ഷിബി. ഹൂസ്റ്റണ് ആസ്ഥാനമാക്കിയാണ് ഈ എഫ്എം പ്രവര്ത്തിക്കുന്നതെങ്കിലും, സ്ട്രീമിംഗ് ലോകമെമ്പാടും ലഭ്യമാണ്. കൊല്ലം സ്വദേശിയായ ഷിബി ഹൂസ്റ്റണ് ടിഎക്സില് ഭര്ത്താവിനും മകള്ക്കുമൊപ്പം താമസിക്കുന്നു. ഗ്രേറ്റര് ഹൂസ്റ്റണ് മലയാളി അസോസിയേഷന് ഡയറക്ടര് ബോര്ഡ് അംഗമാണ് ഇവര്. ഈ വര്ഷം സംഘടനയിലെ വനിതാ പ്രതിനിധിയായി ഷിബി തെരഞ്ഞെടുക്കപ്പെട്ടു.
പ്രമുഖ എഴുത്തുകാരിയും കോളമിസ്റ്റുമാണ് തെരേസ ടോം. പത്രങ്ങളിലും മാസികകളിലും നിരവധി കവിതകളും ലേഖനങ്ങളും പ്രസിദ്ധീകരിച്ചിട്ടുണ്ട്. രണ്ടു കവിതാ സമാഹാരങ്ങളും രണ്ടു ലേഖന സമാഹാരങ്ങളും ഉള്പ്പടെ നാലു പുസ്തകങ്ങള് പ്രസിദ്ധീകരിച്ചിട്ടുണ്ട്. ഡബ്ല്യുഎംസി സാഹിത്യസമ്മേളനത്തിന്റെ ചെയര്പേഴ്സണ് ആണ്. ആദ്യകാലം മുതല് ഐഎപിസിയുടെ പ്രവര്ത്തനങ്ങളില് സജീവമാണിവര്.
റിപ്പോർട്ട്: ജിൻസ്മോൻ പി. സക്കറിയ