ഫിലഡൽഫിയ: സെപ്റ്റംബർ 5, 6, 7 തീയതികളിൽ ഫിലാഡൽഫിയ റാഡിസണ് ട്രിവോസ് ഹോട്ടലിൽ വച്ച് നടത്തുവാൻ നിശ്ചയിച്ചിട്ടുള്ള ഫോമാ 2020 കണ്വൻഷന്റെ വിജയകരമായ നടത്തിപ്പിനായി ഫിലഡൽഫിയായിൽനിന്നുമുള്ള സാബു സ്കറിയായെ നാഷണൽ കണ്വീനറായി ഐക്യകണ്ഠേന തിരഞ്ഞെടുത്തു. ഫോമാ എക്സിക്യൂട്ടീവ് കമ്മറ്റിയും നാഷണൽ കമ്മറ്റി അംഗങ്ങളും കൂടി ആലോചിച്ചു കൈക്കൊണ്ട ഈ തീരുമാനത്തെ ഏവരും സ്വാഗതം ചെയ്തു.
ഒട്ടനവധി പ്രവർത്തന വിജയങ്ങളിലൂടെ മികച്ച സംഘാടകനെന്ന് നിരവധി തവണ തെളിയിച്ചിട്ടുള്ള സാബു, മലയാളി അസോസിയേഷൻ ഓഫ് ഗ്രെയിറ്റർ ഫിലാഡൽഫിയായുടെ സജീവ പ്രവർത്തകനാണ്.
രണ്ടു വർഷക്കാലം മാപ്പിന്റെ പ്രസിഡന്റായും, വൈസ് പ്രസിഡന്റായും, ആറ് വർഷക്കാലം സ്പോർട്ട്സ് ചെയർമാനായും, രണ്ടു തവണ ബോർഡ് ഓഫ് ട്രസ്റ്റീസ് മെന്പറായും സ്തുത്യർഹമായ സേവനം കാഴ്ചവച്ചിട്ടുണ്ട്. ഇന്റർനാഷണൽ ഓവർസീസ് കോണ്ഗ്രസ് പെൻസിൽവാനിയാ ചാപ്റ്റർ ജനറൽ സെക്രട്ടറിയായി പ്രവർത്തിച്ചിട്ടുള്ള ഇദ്ദേഹം ഇപ്പോൾ ഐഎൻഒസി ഫണ്ട് റെയിസിംഗ് ചെയർമാനായും കേരളാ ചാപ്റ്റർ നാഷണൽ മെന്പർഷിപ്പ് കോർഡിനേറ്ററായും പ്രവർത്തിക്കുന്ന ഇദ്ദേഹം, 56 ഇന്റർനാഷനലിന്റെ നാഷണൽ കോർഡിനേറ്റർ കൂടിയാണ്. മുൻ ഫോമാ ആർവിപിയായി നിന്നുകൊണ്ട് നിരവധി പ്രോഗ്രാമുകൾ നടത്തി വിജയിപ്പിച്ച സാബു, മുൻ ഫോമാ കൾച്ചറൽ അഫയേഴ്സ് കമ്മറ്റി ചെയർമാനായും മികച്ച പ്രവർത്തനം കാഴ്ചവച്ചു. നിലവിൽ ഫോമാ മിഡ് അറ്റ്ലാന്റിക് ടാസ്ക്ക് ഫോഴ്സ് കോർഡിനേറ്ററായും പ്രവർത്തിക്കുന്നു.
സംഘടനാ നേതൃത്വപാടവത്തിൽ ഏൽപ്പിച്ചതും ഏറ്റെടുത്തതുമായ ദൗത്യങ്ങൾ വളരെ വിജയകരമാക്കി മാറ്റിയ പാരന്പര്യമാണ് സാബുവിനുള്ളത്. ആ ഉത്തമ വിശ്വാസമാണ് സാബുവിനെ ഫോമാ കണ്വൻഷന്റെ കണ്വീനറായി തിരഞ്ഞെടുക്കുവാൻ ഫോമാ തയാറായതെന്നും, സാബുവിന്റെ മേൽനോട്ടത്തിൽ കണ്വൻഷൻ ഭംഗിയായി നടക്കുവാൻ കഴിയട്ടെയെന്നും ഫോമാ പ്രസിഡന്റ് ഫിലിപ്പ് ചാമത്തിൽ, ജനറൽ സെക്രട്ടറി ജോസ് ഏബ്രാഹാം, ട്രഷറാർ ഷിനു ജോസഫ്, വൈസ് പ്രസിഡന്റ് വിൻസന്റ് ബോസ് , ജോയിൻറ് സെക്രട്ടറി സാജു ജോസഫ് , ജോയിന്റ് ട്രഷറാർ ജെയിൻ കണ്ണച്ചാൻപറന്പിൽ എന്നിവർ ആശംസിച്ചു.
റിപ്പോർട്ട്: ജോസ് ഏബ്രഹാം