ഫോമാ നിലമ്പൂർ-കക്കാടംപൊയിൽ പാർപ്പിട പദ്ധതി നാടിനു സമർപ്പിച്ചു
Friday, January 22, 2021 6:16 PM IST
ഫോമാ കേരളത്തിൽ നടത്തിക്കൊണ്ടിരിക്കുന്ന കാരുണ്യ പ്രവർത്തനങ്ങളും മറ്റു സഹായ പദ്ധതികളും, മറ്റു സംഘടനകൾക്ക് മാതൃകയും മലയാളികൾക്ക് ഏറെ അഭിമാനകാരവുമാണെന്ന് മുസ് ലിം ലീഗ് നേതാവ് കെ. കുഞ്ഞാലിക്കുട്ടി എംപി. ഫോമാ ഏറ്റെടുത്ത നിലമ്പൂർ-കക്കാടംപൊയിൽ പാർപ്പിട പദ്ധതി നാടിനു സമർപ്പിച്ചുകൊണ്ട് സംസാരിക്കുകയായിരുന്നു അദ്ദേഹം.

പ്രളയത്തിൽ വീട് നഷ്ട്ടപ്പെട്ടവർക്ക് ഫോമാ നൽകിയ കൈത്താങ്ങു അവിസ്മരണീയവും അതിലുപരി ആഹ്ലാദകരവുമാണ്. ഒരു മലയാളി എന്ന നിലയിലും ഒരു പൊതു പ്രവർത്തകൻ എന്ന നിലയിലും ഫോമയുടെ ജനസേവന പദ്ധതികളെ നോക്കിക്കാണുവാനും വരുംകാല പ്രവർത്തനങ്ങളിൽ ഭാഗമാകാനും ഏറെ സന്തോഷമുണ്ട്. ലോകജനത കോവിഡ് എന്ന മഹാമാരിയുടെ ദുരിതങ്ങളിൽ കൂടി കടന്നുപോകുമ്പോഴും വീട് നഷ്ടപ്പെട്ടവർക്ക് വീട് നൽകുക എന്ന ക്ലേശകരമായ പ്രവർത്തനം സമയ ബന്ധിതമായി തീർക്കാൻ ഫോമായുടെ പ്രവർത്തകർക്ക് കഴിഞ്ഞത് അവരുടെ നിശ്ചയദാർഢ്യവും സന്നദ്ധതയും വെളിവാക്കുന്നുവെന്ന് അദ്ദേഹം കൂട്ടിച്ചേർത്തു.

കേരളത്തിന്‍റെ പുനർനിർമാണ പ്രക്രിയയുടെ ഭാഗമായി 40 വീടുകളാണ് 2018 -2020 ഫോമാ ദേശീയ നിർവാഹക സമിതി കേരളത്തിൽ പൂർത്തീകരിച്ചത്. ഫോമായിലെ അംഗങ്ങളായ വിവിധ അസോസിയേഷനുകളുടെ പിന്തുണയോടെയും സാമ്പത്തിക സഹായത്തോടെയുമാണ് പാർപ്പിട പദ്ധതികൾ പൂർത്തീകരിച്ചിട്ടുള്ളത്. നിലമ്പൂർ-കക്കാടംപൊയിൽ പാർപ്പിട പദ്ധതികൾക്കാവശ്യമായ സാമ്പത്തിക സഹായവും, പിന്തുണയും നൽകിയത് മയാമി മലയാളി അസോസിയേഷൻ, മലായാളി അസോസിയേഷൻ ഓഫ് നോർത്ത് ഫ്ലോറിഡ, 2016- 2018 കാലത്തെ ഫോമയുടെ ദേശീയ സമിതി എന്നിവരാണ്.

ജനുവരി 19 നു നടന്ന പാർപ്പിട പദ്ധതി സമർപ്പണ ഫോമാ പ്രസിഡന്‍റ് അനിയൻ ജോർജ് അധ്യക്ഷത വഹിച്ചു. ഫോമാ ട്രഷറർ തോമസ് ടി. ഉമ്മൻ കുഞ്ഞാലിക്കുട്ടിയെ സദസിലേക്ക് ക്ഷണിച്ചു. ചടങ്ങിൽ മുൻപ്രസിഡന്‍റ് ഫിലിപ്പ് ചാമത്തിൽ , മുൻ ജനറൽ സെക്രട്ടറി ജോസ് എബ്രഹാം, മുൻകാല ഭാരവാഹികളായ ഷിനു ജോസഫ്, വിൻസെന്‍റ് ബോസ്, ജെയിൻ മാത്യുസ് കണ്ണച്ചാൻ പറമ്പിൽ, ജോസഫ് ഔസോ, ബെന്നി വാച്ചാച്ചിറ, ഔസെഫ് വർക്കി, ബോബൻ എബ്രഹാം ,വിൽ‌സൺ ഉഴത്തിൽ ഫോമാ വൈസ് പ്രസിഡന്‍റ്, പ്രദീപ് നായർ, ജോയിന്‍റ് സെക്രട്ടറി ജോസ് മണക്കാട്ട് എന്നിവർ ആശംസകൾ നേർന്നു. കക്കാടംപൊയിൽ പദ്ധതിക്ക് സ്ഥലം ദാനം നൽകിയ നോയൽ മാത്യുവിനു അഭിനന്ദനങ്ങൾ രേഖപ്പെടുത്തുകയും ചെയ്തു. നോയൽ മാത്യു നന്ദി പ്രസംഗം നടത്തി. ചടങ്ങിൽ ഫോമാ ജനറൽ സെക്രട്ടറി ടി. ഉണ്ണികൃഷ്ണനും ട്രഷറർ തോമസ് ടി.ഉമ്മനും കക്കാടംപൊയിലിൽ ഡിസംബർ 21 ന് നേരിട്ട് ചെന്ന് ഗുണഭോക്താക്കൾക്ക് താക്കോൽ കൈമാറിയ ചടങ്ങിന്‍റെ വീഡിയോയും പ്രദർശിപ്പിച്ചു. സെക്രട്ടറി ടി. ഉണ്ണികൃഷ്ണൻ സ്വാഗതവും ജോയിന്‍റ് ട്രഷറർ ബിജു തോണിക്കടവിൽ നന്ദിയും പറഞ്ഞു. ഫോമായുടെ പ്രവർത്തകരും കേരളത്തിന്‍റെ വിവിധ ഭാഗങ്ങളിൽ നിന്നുള്ളവർ ഉൾപ്പടെ നിരവധി പേർ ചടങ്ങിൽ പങ്കെടുത്തു.


ഫോമായുടെ 2020-2022ലേക്കുള്ള ദേശീയ നിർവാഹക സമിതി നിരവധി കാരുണ്യ പ്രവർത്തനങ്ങൾക്കാണ് രൂപം നൽകിയിട്ടുള്ളത്. കേരളത്തിലെ നിർധനരായ മലയാളികൾക്ക് ഏറെ പ്രയോജനം നൽകാനുദ്ദേശിക്കുന്ന, വരുംകാലങ്ങളിൽ നടക്കുന്ന ഫോമയുടെ കാരുണ്യ പ്രവർത്തനങ്ങളിലും പാർപ്പിട പദ്ധതികളിലും എല്ലാവരും ഭാഗഭാക്കാകണമെന്നു ഫോമാ ദേശീയ നിർവാഹക കമ്മിറ്റി ഭാരവാഹികളായ പ്രസിഡന്‍റ് അനിയൻ ജോർജ്, ജനറൽ സെക്രട്ടറി ടി.ഉണ്ണികൃഷ്ണൻ,ട്രഷറർ തോമസ് ടി. ഉമ്മൻ, വൈസ് പ്രസിഡന്‍റ് പ്രദീപ് കുമാർ , ജോയിന്‍റ് സെക്രട്ടറി ജോസ് മണക്കാട്ട്, ജോയിന്‍റ് ട്രഷറർ ബിജു തോണിക്കടവിൽ എന്നിവർ അഭ്യർഥിച്ചു.